Zoova mannin Samsɔn i wunmiɛn

Izraɛlifuɛ kpanngban be wa sɔli amuin mun ekun. I sɔ’n ti’n, Zoova yoli maan Filistifuɛ mun be wa kleli be yalɛ kpa. Sanngɛ Izraɛlifuɛ’m be nun wie mun be kloli Zoova. Be nun kun yɛle Manoa. Ɔ nin i yi be leman ba. Cɛn kun’n, Zoova sunmɛnnin i anzi kun Manoa i yi’n i sin. Anzi’n seli i kɛ: ‘Á wá wú ba yasua kun. Ɔ́ wá dé Izraɛlifuɛ mun Filistifuɛ’m be sa nun. Ɔ́ yó Nazirifuɛ.’ ?Kɛ be se kɛ sran kun ti Nazirifuɛ’n, a si i bo? Yɛle kɛ sran sɔ’n ti Zoova liɛ mlɔnmlɔn. Yɛ be yimɛn i ti’n.

I sin’n, Manoa nin i yi be wuli ba kun. Be flɛli i kɛ Samsɔn. Kɛ Samsɔn yoli kaklaka’n, Zoova yoli maan ɔ ɲannin wunmiɛn kpa. Ɔ kwla fɛ i sa ngbɛn kun asɔmɔli. Cɛn kun’n, Samsɔn i ngunmin kunnin Filistifuɛ ablasan (30). Filistifuɛ’m be kpɔ i tɛ kpa. Be kunndɛ kɛ bé kún i. Cɛn kun kɔnguɛ’n, Samsɔn ko lali Gaza lɔ. Kpɛkun Filistifuɛ mun be ko minndɛli i klɔ’n i anuan’n nun lɛ naan nglɛmun’n, bé trɛ́ i bé kún i. Sanngɛ kɔnguɛ afiɛn’n, Samsɔn jasoli. Ɔ ko tuli klɔ’n i anuan’n. Ɔ fa boli i wati, yɛ ɔ fa ɔli oka ng’ɔ o Ebrɔn i wun lɔ’n su.

Samsɔn wa kloli bla kun. Be flɛ i kɛ Delila. Cɛn kun’n, Filistifuɛ’m be ko wunnin i wun. Be seli i kɛ: ‘Sɛ a wun lika nga Samsɔn i wunmiɛn dan’n fin’n naan a kan kle e’n, é mán wɔ sika kpanngban. E kunndɛ kɛ é trɛ́ i naan é wlɛ́ i bisua.’ Kɛ mɔ Delila kunndɛ kɛ ɔ́ ɲán sika’n ti’n, ɔ kplinnin su. I klikli nun’n, Samsɔn w’a kanman sa nga ti yɛ ɔ le wunmiɛn dan’n i ndɛ w’a klemɛn i. Sanngɛ Delila jrannin Samsɔn i wun lele ɔ wa kannin ndɛ’n kleli i. Ɔ seli i kɛ: ‘Be nin-a yiman min ti le. Afin n ti Nazirifuɛ. Sɛ be yi min ti’n, min wunmiɛn’n ɔ́ wíe.’ Like nga Samsɔn yoli’n w’a yoman kpa. ?Nɛ́n i-ɔ?

Delila ɔli ndɛndɛ ko seli Filistifuɛ’m be kɛ: ‘N si like nga ti yɛ ɔ le wunmiɛn dan’n.’ Delila yoli maan Samsɔn lafili i ja su. Kpɛkun ɔ seli sran kun kɛ ɔ yi i ti’n. I sin’n, ɔ kpan seli kɛ: ‘Samsɔn, Filistifuɛ mun yɛ be o yɛ!’ Samsɔn jasoli. Sanngɛ ɔ leman wunmiɛn kun. Filistifuɛ’m be trɛli i, be boboli i ɲinma mun, kpɛkun be wlɛli i bisua.

Cɛn kun’n, Filistifuɛ akpi kpanngban be yiali be amuin Dagɔn i sua’n nun lɔ. Kpɛkun be kpan seli kɛ: ‘E amuin Dagɔn yili Samsɔn mannin e. Amun fɛ i bla naan e fɛ i e yiyi e ɲin su.’ Be fɛ i sieli sua’n i ja mlomlo nɲɔn be afiɛn, kpɛkun be yoli i finfin. Samsɔn seli Zoova kɛ: ‘Yaci, man min wunmiɛn ekun.’ Blɛ sɔ’n nun’n, nn Samsɔn i ti’n w’a fu kpa ekun. Samsɔn fɛli i wunmiɛn’n i kwlaa fa suli sua’n i ja mlomlo nɲɔn mun be bo. Sua wunmuan’n bu guali. Ɔ kunnin Filistifuɛ’m be kwlaa. Samsɔn wuli wie.