Davidi nin Goliati

Zoova seli Samiɛli kɛ: ‘Kɔ Zese i awlo lɔ. I mma’m be nun kun yɛ ɔ́ wá yó Izraɛli famiɛn’n niɔn.’ Yɛ Samiɛli ɔli Zese i awlo lɔ-ɔ. Kɛ ɔ wunnin Zese i wa kpɛn’n, ɔ seli i klun lɔ kɛ: ‘Kɔlɛ gbanflɛn nga-ɔ.’ Sanngɛ Zoova seli Samiɛli kɛ nɛ́n i-ɔ. Zoova seli kɛ: ‘Like ng’ɔ o sran’n i awlɛn’n nun’n, yɛ n nian-ɔn. Nán like nga sran ɲinma wun i’n yɛ n nian-ɔn.’

Zese fɛli i mma mun be nun nsiɛn ekun kleli Samiɛli. Sanngɛ Samiɛli seli Zese kɛ: ‘Zoova w’a faman be nun wie fi. ?Ɔ mma yasua mun be ngba yɛ?’ Zese tɛli su kɛ: ‘Kun ekun te o lɛ. I yɛ ɔ ti be nun kaan’n niɔn. Be flɛ i Davidi. Ɔ ɔli bua mun be su nianlɛ.’ Kɛ Davidi bali’n, Zoova seli Samiɛli kɛ: ‘I yɛ n fɛli i-ɔ.’ Samiɛli fali ngo guali Davidi i ti’n su naan ɔ yo Izraɛli famiɛn.

Kɛ ɔ cɛli kan’n, alɛ tɔli Izraɛlifuɛ mun nin Filistifuɛ’m be afiɛn. Filistifuɛ mun be le be alɛ kunfuɛ kpa kun. Ɔ ti tɛnndɛn kpa, be flɛ i kɛ Goliati. Cɛn kwlakwla ɔ klɔklɔ Izraɛlifuɛ mun. Ɔ se be kɛ: ‘Amun yi sran kun naan e nin i e bla nun. Sɛ ɔ kwla min’n, é yó amun kanga. Sɛ kusu n kwlɛ i’n, amún yó e kanga.’

Cɛn kun’n, Davidi fali aliɛ ɔli i niaan mɔ be ti sonja’n be manlɛ alɛ kunwlɛ lɔ. Ɔ tili ndɛ nga Goliati su kan’n. Kpɛkun ɔ seli kɛ: ‘Min nin i é kó kún.’ Famiɛn Saili seli i kɛ: ‘A te yo bakan.’ Davidi tɛli i su kɛ: ‘Zoova wá úka min.’

Saili kunndɛli kɛ Davidi fɛ i alɛ ninnge mun. Sanngɛ Davidi seli kɛ: ‘N kwlá faman ninnge nga mun n kunman alɛ.’ Davidi fɛli i kpafloko’n, kpɛkun ɔ ɔli nzue ba kun nuan lɔ. Ɔ ko kpali yɔbuɛ treketreke nnun, ɔ fa be wlɛli i pata’n nun. I sin’n, ɔ wanndi ɔli Goliati i wun lɔ. Goliati seli i kɛ: ‘Mantuan kan, bla maan n kun wɔ naan n fa ɔ fuɛn’n n man anunman nin blo nnɛn mun.’ Srɛ w’a kunman Davidi. Ɔ seli kɛ: ‘Tokofi nin cua yɛ a fa ba-ɔ. N liɛ’n, Zoova i dunman’n yɛ n fa ba-ɔ. Nán e yɛ amun nin e su kun-ɔn. Ɲanmiɛn yɛ amun nin i su kun-ɔn. Be kwlaa nga be o wa yɛ’n, bé wá sí kɛ Zoova i wunmiɛn’n tra tokofi nin cua. Ɔ́ wá fá amun wlá e sa nun.’

Davidi fali yɔbuɛ kun wlɛli i kpafloko’n nun, kpɛkun ɔ totoli i kpa naan w’a to. Zoova yoli maan yɔbuɛ’n finnin Goliati i ngban’n su, ɔ wluli i ti’n nun. Goliati tɔli, kpɛkun ɔ wuli. Kɛ ɔ yoli sɔ’n, Filistifuɛ’m be wanndili. ?A lafi Zoova su kɛ Davidi sa?