Angbeti bla kun i wa’n sɛli i sin nguan nun

I nun mɔ nzue’n tɔman’n, Zoova seli Eli kɛ: ‘Kɔ Sarɛpta. Angbeti bla kun o lɔ, ɔ́ wá mán wɔ aliɛ.’ Kɛ Eli juli lɔ’n, ɔ wunnin angbeti bla yalɛfuɛ kun klɔ’n i anuan’n i wun lɛ. Ɔ su isa yie. Eli srɛli bla’n i nzue. Kɛ bla’n kó fá nzue’n, Eli seli i ekun kɛ: ‘Yaci, blɛ min kpanwun kan.’ Sanngɛ bla’n seli i kɛ: ‘N leman kpanwun naan m’an fa man wɔ. N le sanmlɛn kan nin ngo kan. Ń má fá tɔ́n min nin min wa’n e like kan.’ Eli seli i kɛ: ‘Zoova waan, sɛ a tɔn kpanwun man min’n, ɔ sanmlɛn nin ɔ ngo’n be su wieman lele nzue’n fá tɔ́ ekun.’

Angbeti bla’n ɔli awlo, ɔ ko tɔnnin kpanwun mannin Zoova i nuan ijɔfuɛ’n. Kɛ nga Zoova fa kannin’n sa’n, angbeti bla’n nin i wa’n be ɲannin aliɛ be dili i titi blɛ kekle sɔ’n nun. I sanmlɛn’n nin i ngo’n b’a wieman.

I sin’n sa yaya kun juli. Angbeti bla’n i wa kan’n tɔli tukpacɛ, kpɛkun ɔ wuli. Bla’n srɛli Eli kɛ ɔ ukɛ i. Eli fali ba’n i nin sa nun, yɛ ɔ fɛ i fuli nglo sua’n nun lɔ. Ɔ lali ba’n bɛ kun su, kpɛkun ɔ srɛli Ɲanmiɛn seli kɛ: ‘Zoova, yaci, yo maan ba nga ɲan nguan ekun.’ Sɛ Zoova yo sa sɔ’n, ɔ́ yó abonuan sa dan. ?A si like ti’n? Afin nga e si i’n yɛle kɛ, blɛ sɔ’n nun’n, be nin-a cɛnman sran le. Kpɛkun angbeti bla sɔ’n nin i wa’n be timan Izraɛlifuɛ bɔbɔ.

Ba’n loli wunmiɛn, kpɛkun ɔ ɲannin nguan. Eli seli angbeti bla’n kɛ: ‘Nian, ɔ wa’n w’a ɲan nguan.’ Bla’n i klun jɔli dan! Ɔ seli Eli kɛ: ‘A ti Ɲanmiɛn sran sakpa. Afin ndɛ nga Zoova waan a kan’n yɛ a kan-ɔn.’