Zoova jrannin Zozafati sin

Zozafati m’ɔ ti Zida famiɛn’n bubuli Baali i sɔwlɛ mun, ɔ nin amuin mun Zide mɛn’n nun. Ɔ kunndɛ kɛ sran mun be si Zoova i mmla’n. I sɔ’n ti’n ɔ sunmannin Levifuɛ mun, ɔ nin Izraɛli kpɛnngbɛn mun Zida nvle wunmuan’n nun naan be kle sran mun Zoova i mmla’n.

Nvle nga be mantan Zida’n be nunfuɛ’m b’a faman alɛ b’a wlaman Zidafuɛ’m be sin, afin be si kɛ Zoova o be sin. I kpa bɔbɔ’n, be cɛli Famiɛn Zozafati i ninnge wie mun. Sanngɛ Moabufuɛ mun nin Amɔnfuɛ mun, ɔ nin be nga be fin Seii mɛn’n nun lɔ’n, be bali kɛ be nin Zidafuɛ’m bé kún. Zozafati si kɛ ɔ fata kɛ Zoova ukɛ i. Ɔ yoli maan Izraɛlifuɛ mun be kwlakwla, i bla-o, i yasua-o, i bakan-o, be yiali Zerizalɛmun lɛ. Kpɛkun ɔ srɛli Zoova. Ɔ seli kɛ: ‘Zoova, wɔ yɛ a kwla de e-ɔ. Yaci, kle e like ng’ɔ fata kɛ e yo’n.’

Zoova tɛli i srɛlɛ sɔ’n su. Ɔ seli kɛ: ‘Nán srɛ kun amun. Ń má úka amun. Amun ko jranjran, amun ka amun osu’n nun lɛ, amún wá wún wafa nga ń má dé amun’n.’ ?Wafa sɛ yɛ Zoova deli be-ɔ?

Kɛ aliɛ cɛnnin cɛ’n, Zozafati kpali jue tofuɛ wie mun, kpɛkun ɔ seli be kɛ maan be dun sonja’m be ɲrun mmua. Be fɛ i Zerizalɛmun lɛ lele be juli alɛ kunwlɛ’n nun lɔ. Be flɛ lika sɔ’n kɛ Tekoa.

Kɛ jue tofuɛ’m bé tó jue bé mánmán Zoova aklunjɔɛ su’n, nn Zoova kún be ti alɛ. Moabufuɛ nin Amɔnfuɛ mun be nun sanngannin. Ɔ maan be kunnin be wiengu. Be nun kun sa w’a kaman lɛ. Sanngɛ Zoova sasali Zidafuɛ mun nin be sonja mun, ɔ nin Ɲanmiɛn ɲrun jranfuɛ mun. Nvle nga be mantan Zida mɛn’n be nunfuɛ’m be tili sa nga Zoova yoli’n. Ɔ maan be wunnin i wlɛ kɛ Zoova te sɛsɛ i sran mun. ?Wafa sɛ yɛ Zoova de i sran mun-ɔn? Ɔ kwla yo sa fanunfanun. Yɛ ɔ mianman sran wun naan w’a de i sufuɛ mun.