Zoyada yoli yakpafuɛ

Be flɛ Zezabɛli i wa bla kun kɛ Atali. I klun yo wi kɛ i nin sa. I wun’n ti Zida famiɛn. Kɛ i wun wuli’n i wa kun yɛ ɔ yoli famiɛn-ɔn. Sanngɛ kɛ i wa’n wuli’n, i bɔbɔ sieli i wun famiɛn kekle nun. Kpɛkun be kwlaa nga ɔ wun kɛ be kwla kaci famiɛn’n, ɔ kunndɛli kɛ ɔ́ kún be. I anunman mun bɔbɔ’n ɔ kunnin be. Sran’m be kwlaa be sro i.

Ɲanmiɛn ɲrun jranfuɛ dan Zoyada nin i yi Zoseba be wunnin kɛ like nga Atali su yo’n timan kpa kaan sa. I sɔ’n ti’n, be fali Atali i anunman kaan kun be fiali. Be flɛ ba sɔ’n kɛ Zoasi. Be fɛ i ɔli Ɲanmiɛn i sua’n nun lɔ. Lɔ yɛ be tɛli i-ɔ.

Kɛ Zoasi ɲannin afuɛ nso’n, Zoyada flɛflɛli kpɛnngbɛn mun nin Levifuɛ mun, kpɛkun ɔ seli be kɛ: ‘Amun nian Ɲanmiɛn i sua’n i anuan’n su, nán maan sran fi wlu wa.’ I sin’n, Zoyada sieli Zoasi Zida famiɛn, kpɛkun ɔ fali famiɛn kle kun wlɛli i ti. Zidafuɛ mun be kpan seli kɛ: ‘Maan wie’n wla fi famiɛn’n!’

Kɛ Famiɛn Bla Atali tili sran’m be nɛn’n, ɔ wanndili ndɛndɛ kpa ɔli Ɲanmiɛn sua’n nun lɔ. Kɛ ɔ wunnin kɛ b’a sie sran uflɛ famiɛn’n, ɔ kpan seli kɛ: ‘B’a cici min wun ndɛ-o! B’a cici min wun ndɛ-o!’ Kpɛnngbɛn mun be trɛli i. Be fɛ i ɔli be ko kunnin i. ?I sin’n, sa benin yɛ ɔ juli-ɔ?

Zoyada ukali nvlefuɛ mun naan be nin Zoova be afiɛn sɛ ekun. Be seli kɛ Zoova kunngba cɛ yɛ bé sú i-ɔ. Zoyada yoli maan be bubuli Baali i sua’n nin amuin mun. Ɔ seli Ɲanmiɛn ɲrun jranfuɛ mun nin Levifuɛ’m be kɛ be ko di junman Ɲanmiɛn i sua’n nun lɔ, naan nvlefuɛ’m be kwla su Ɲanmiɛn lɔ ekun. I sin’n, Zoyada nin kpɛnngbɛn mun be fali Zoasi be ɔli famiɛn sua’n nun lɔ, kpɛkun be sieli i famiɛn bia’n su. Zidafuɛ’m be klun jɔli kpa. Siɛn mɔ Atali klunwifuɛ’n nunman lɛ kun’n, mɔ kusu be sɔman Baali kun’n, nvlefuɛ’m be kwla su Zoova kpa. Kɛ Zoyada yoli yakpafuɛ’n, i sɔ’n yoli nvlefuɛ mun be ye kpa. ?Nɛ́n i-ɔ?