Daniɛli o asɔmɔli’m be kunman’n nun

Dariisi m’ɔ fin Medi’n, ɔ wa yoli Babilɔnin famiɛn. Ɔ wunnin kɛ Daniɛli timan kɛ i wiengu mun sa. I sɔ’n ti’n, ɔ fɛ i sieli nvle’n nun sran dandan’m be su kpɛn. Sran sɔ’m be ɲin wa cili Daniɛli. Be waan bé yó naan ɔ tu lɛ. Be si kɛ Daniɛli srɛ Zoova kpɛ nsan cɛn kwlakwla. I sɔ’n ti’n, be seli Dariisi kɛ: ‘Nannan, kpɛ mmla kun m’ɔ se kɛ ɔ ngunmin cɛ yɛ ɔ fata kɛ be koto ɔ bo-ɔ. Sran kwlaa nga w’a nantiman mmla sɔ’n su’n, maan be fɛ i be yi asɔmɔli’m be kunman’n nun.’ Be ndɛ sɔ’n yoli Dariisi i fɛ. Ɔ maan ɔ fɛli i sa ti nzɔliɛ sieli mmla fluwa sɔ’n su.

Kɛ Daniɛli tili ndɛ sɔ’n, ɔ ɔli i awlo. Ɔ ko kotoli i fenɛtri m’ɔ ti tikewa’n i ɲrun lɛ, kpɛkun ɔ srɛli Zoova. I kpɔfuɛ’m be wluli i sua’n nun lɔ. Kɛ bé kɔ́’n, nn ɔ su srɛ Ɲanmiɛn. Be toli Dariisi lɔ ndɛndɛ kpa, be ko seli i kɛ: ‘Daniɛli i ɲin yiman wɔ. Cɛn kwlakwla’n, ɔ srɛ i Ɲanmiɛn’n kpɛ nsan.’ Dariisi klo Daniɛli i sa kpa, ɔ kunndɛman kɛ ɔ wu. Kɛ ɔ fɛ i nglɛmun lele nnɔsua’n, ɔ kunndɛli like nga ɔ ko yo naan w’a de Daniɛli’n. Sanngɛ kɛ famiɛn’n ko fɛ i sa ti nzɔliɛ ko sie i mmla kun su’n, sran fi kwlá kacimɛn i kun. Famiɛn’n bɔbɔ kwlá kacimɛn i. Ɔ maan ɔ seli i sran mun kɛ be fa Daniɛli be yi i asɔmɔli’m be kunman’n nun.

Kɔnguɛ sɔ’n nun’n, Daniɛli ti’n Dariisi w’a kwlá lafiman. Kɛ aliɛ cɛnnin cɛ’n, famiɛn’n wanndi ɔli asɔmɔli’m be kunman’n su lɔ. Kɛ ɔ juli lɔ’n, ɔ seli kɛ: ‘?Daniɛli, ɔ Ɲanmiɛn’n deli wɔ?’

Dariisi tili sran kun nɛn. Kannzu Daniɛli-ɔ! Ɔ seli Dariisi kɛ: ‘Zoova i anzi’n katali asɔmɔli’m be nuan’n su. B’a yoman min like fi.’ Nanwlɛ, Dariisi i klun jɔli kpa. Ɔ seli i sran’m kɛ be yi Daniɛli. I lika fi w’a kploman. I sin’n, famiɛn’n seli kɛ: ‘Amun fa be nga be tɔnnin Daniɛli i suɛn’n be yi asɔmɔli’m be kunman’n nun.’ Kɛ be guali be kunman’n nun lɔ’n, asɔmɔli’m be dili be.

Dariisi klɛli fluwa ko mɛnnin i nvle’n nunfuɛ mun. Ɔ seli be kɛ: ‘Maan sran’m be kwlaa be sro Daniɛli i Ɲanmiɛn’n. Afin ɔ deli Daniɛli asɔmɔli’m be sa nun.’

?A srɛ Zoova cɛn kwlakwla kɛ Daniɛli sa?