Ɛstɛɛ deli i nvle’n nunfuɛ mun

Ɛstɛɛ ti Zifu talua. Ɔ tran Pɛɛsifuɛ’m be klɔ nga be flɛ i kɛ Sizi’n i su lɔ. Laa’n, i osufuɛ’m be tran Zerizalɛmun. Sanngɛ Nebikadnezaa trali be ɔli. I si i niaan bian mɔ be flɛ i Maadose’n yɛ ɔ tɛli i-ɔ. Ɔ di junman Pɛɛsi famiɛn mɔ be flɛ i kɛ Asierisi’n i awlo lɔ.

Cɛn kun’n, Famiɛn Asierisi waan be kunndɛ bla uflɛ be mɛn i. I sran’m be fali nvle’n nun bla klanman kpa mun be bali. Ɛstɛɛ o bla sɔ mun be nun wie. Bla kwlaa sɔ’m be nun’n, Ɛstɛɛ yɛ famiɛn’n fɛli i-ɔ. Maadose seli Ɛstɛɛ kɛ nán ɔ kan kle sran kɛ ɔ ti Zifu.

Be flɛ bian kun kɛ Aman. Ɔ ti famiɛn’n i awlo lɔ sran dandan mun be su kpɛn, yɛ ɔ tu i wun. Ɔ kunndɛ kɛ sran’m be kwlaa be koto i bo. Sanngɛ Maadose waan ɔ kotomɛn i bo. I sɔ’n ti’n, ɔ fali ya dan kpa. Yɛ i waan ɔ́ kún Maadose. Kɛ Aman wa tili i kɛ Maadose ti Zifu’n, ɔ fali ajalɛ kɛ ɔ́ kún Zifu’m be kwlaa nga be o nvle’n nun’n. Ɔ seli famiɛn’n kɛ: ‘Zifu’m be timan kpa. Ɔ fata kɛ e nunnun be.’ Asierisi tɛli i su kɛ: ‘Like kwlaa nga a kunndɛ kɛ á yó’n, yo.’ Kpɛkun ɔ mannin Aman i atin kɛ ɔ kpɛ mmla kun. Mmla sɔ’n se kɛ Adaa anglo’n i le blu-nin-nsan (13) su’n, maan be kun Zifu’m be kwlaa. Zoova wunnin sa sɔ’n i kwlaa nun.

Ɛstɛɛ siman kɛ b’a kpɛ mmla. Ɔ maan Maadose fali mmla fluwa’n kun ko mannin Ɛstɛɛ. Kpɛkun ɔ seli i kɛ: ‘Ko wun famiɛn’n i wun.’ Ɛstɛɛ seli i kɛ: ‘Sran kwlaa nga famiɛn’n w’a flɛmɛn i m’ɔ kɔ i wun wunlɛ’n, be kun i. I cɛn ba ablasan (30) yɛ, famiɛn’n nin-a flɛman min. Sanngɛ ń má kɔ́. Sɛ ɔ fɛ i kpɔnman’n tinngɛ min ɲrun’n, be su kunman min. Sanngɛ sɛ w’a yoman sɔ’n, bé kún min.’

Yɛ Ɛstɛɛ ɔli famiɛn’n i awlo lɔ-ɔ. Kɛ famiɛn’n wunnin i’n, ɔ fɛli i kpɔnman’n tinngɛli i ɲrun. Ɔ wunngeli famiɛn’n i wun lɔ, kpɛkun famiɛn’n usɛli i kɛ: ‘?Ɛstɛɛ, ngue yɛ a kunndɛ kɛ n yo man wɔ-ɔ?’ Ɛstɛɛ tɛli i su kɛ: ‘M’an tɔn aliɛ dan kpa, min waan a nin Aman amun bla naan e ko di.’ Kɛ bé dí like’n, Ɛstɛɛ seli be kɛ be bla cɛn uflɛ naan be wa di like ekun. Kɛ be bali’n, famiɛn’n usali Ɛstɛɛ kɛ: ‘?Ngue yɛ a kunndɛ kɛ n yo man wɔ-ɔ?’ Ɛstɛɛ tɛli i su kɛ: ‘Sran kun kunndɛ kɛ ɔ́ kún min nin min nvle’n nunfuɛ mun. Yaci de e.’ Yɛ famiɛn’n usɛli i kɛ: ‘?Wan yɛ ɔ kunndɛ kɛ ɔ́ kún wɔ-ɔ?’ Ɔ tɛli i su kɛ: ‘Klunwifuɛ ng’ɔ o yɛ’n niɔn. Aman-ɔn.’ Asierisi fali ya dan kpa, ɔ maan be ja nun lɛ’n, ɔ yoli maan be kunnin Aman.

Sran fi kwlá kaciman mmla nga Aman kpɛli’n. Famiɛn’n bɔbɔ kwlá kacimɛn i kun. I sɔ’n ti’n, famiɛn’n fali Maadose sieli i sran dandan’m be su kpɛn, kpɛkun ɔ mɛnnin i atin kɛ ɔ kpɛ mmla uflɛ. Ɔ maan Maadose kpɛli mmla kun. Mmla sɔ’n se kɛ sɛ sran’m be ba Zifu’m be kunlɛ’n, maan Zifu’m be kpli be ti. Adaa anglo’n i le blu-nin-nsan (13) su’n, Zifu’m be kwlali be kpɔfuɛ mun. Kɛ ɔ fɛ i lɛ’n, Zifu’m be di i sɔ’n i ti cɛn afuɛ kwlaa.