Satan sali Zezi niannin

Kɛ be yoli Zezi i batɛmun’n, Ɲanmiɛn wawɛ’n fɛ i ɔli aawlɛ flɛnnɛn’n nun lɔ. Ɔ dili cɛn ba ablanan (40), w’a diman like. Ɔ maan awe kunnin i kpa. Kɛ Satan wunnin i sɔ’n, ɔ seli Zezi kɛ: ‘Sɛ a ti Ɲanmiɛn Wa sakpa’n, se yɔbuɛ nga mun naan be kaci kpanwun.’ Sanngɛ Zezi fali Ɲanmiɛn Ndɛ’n tɛli i su kɛ: ‘Be klɛli i kɛ nán aliɛ ngunmin yɛ ɔ man sran nguan-ɔn. Ɔ fata kɛ e nanti ndɛ kwlaa nga Zoova kan’n su.’

I sin’n, Satan seli Zezi ekun kɛ: ‘Sɛ a ti Ɲanmiɛn Wa sakpa’n, yaci ɔ wun nun Ɲanmiɛn i sua’n i ti su lɔ naan tɔ asiɛ wun lɔ. Afin be klɛli i kɛ Ɲanmiɛn wá súnmɛn i anzi mun naan be sɔ ɔ nun.’ Sanngɛ Zezi boli Ɲanmiɛn Ndɛ’n su ekun. Ɔ seli kɛ: ‘Be klɛli i kɛ nán sa Zoova m’ɔ ti ɔ Ɲanmiɛn’n nian.’

I sin’n, Satan fali mɛn’n nun famiɛn diwlɛ’m be kwlaa nin be aɲanbeun ninnge mun, ɔ nin be aɲrunɲan’n kwlaa kleli Zezi. Kpɛkun ɔ seli i kɛ: ‘Sɛ a manman min kpɛ kunngba cɛ’n, ń fá famiɛn diwlɛ nga mun, ɔ nin be aɲrunɲan’n ń mán wɔ.’ Sanngɛ Zezi tɛli i su kɛ: ‘Satan, jaso min wun lɛ! Be klɛli i kɛ Zoova kunngba cɛ yɛ ɔ fata kɛ be su i-ɔ.’

Kɛ ɔ yoli sɔ’n, Satan yacili i lɛ ɔli. Kpɛkun anzi’m be blɛli Zezi i aliɛ. Kɛ ɔ fɛ i lɛ’n, Zezi boli Ɲanmiɛn i Famiɛn dilɛ’n i jasin fɛ’n i ndɛ kanlɛ bo. Junman sɔ’n i dilɛ ti yɛ Ɲanmiɛn sunmɛnnin i asiɛ’n su wa-ɔ. Ndɛ nga Zezi kan’n, ɔ yo sran mun be fɛ, yɛ lika kwlaa ng’ɔ kɔ’n sran’m be su i su.