Zezi kpali akoto blu-nin-nɲɔn

Zezi boli jasin fɛ’n i bolɛ bo w’a di afuɛ kun nin sin. Siɛn’n, ɔ fata kɛ ɔ fa ajalɛ cinnjin kpa kun. ?Wan mun yɛ ɔ́ fá be naan ɔ nin be w’a di junman’n niɔn? ?Wan mun yɛ ɔ́ klé be like naan b’a dun asɔnun’n i ɲrun mmua-ɔ? Zezi kunndɛ kɛ Zoova kle i atin naan w’a kwla fa ajalɛ sɔ’m. I sɔ’n ti’n, i ngunmin ɔli oka kun su. Ɔ ko srɛli Ɲanmiɛn kɔnguɛ lele aliɛ cɛnnin. Kɛ aliɛ cɛnnin’n, ɔ flɛli i sɔnnzɔnfuɛ mun, kpɛkun ɔ fali be nun blu-nin-nɲɔn (12) yoli i akoto. ?A si be dunman? Be yɛle Piɛli, Andre, Zaki, Zan, Filipu, Batelemin, Toma, Matie, Zaki m’ɔ ti Alfe i wa’n, Tade, Simɔn, yɛ Zida Iskariɔti.

Kɛ Zezi kɔ́ lika’n, ɔ nin be blu-nin-nɲɔn sɔ mun yɛ be kɔ-ɔ. Zezi kleli be like, kpɛkun ɔ sunmannin be kɛ be ko bo jasin. Zoova mannin be tinmin naan be fuan mmusu mun, yɛ be yo tukpacifuɛ’m be juejue.

Zezi flɛli sran blu-nin-nɲɔn (12) sɔ mun kɛ i janvuɛ, yɛ ɔ lafili be su. Farizifuɛ’m be waan sran sɔ mun b’a diman suklu naan be leman ɲrun. Sanngɛ Zezi kleli be like naan b’a kwla di be junman’n. Ka naan Zezi w’a wu’n, yɛ kɛ ɔ cɛnnin nguan’n, ɔ nin be yɛ be sannin nun-ɔn. Be nun sunman be fin Galile kɛ Zezi sa. Yɛ be nun wie’m be le bla.

Fɔ o akoto’m be nun. Ɔ maan be fɔn. Ɔ ju wie’n, be kan ndɛ’n ka naan b’a bu i sin, yɛ be fa ajalɛ tɛ. Sa wie’m be nun’n, b’a kwlá traman be awlɛn. I kpa bɔbɔ’n, be sili akplowa naan bé sí sran ng’ɔ ti be nun sran dan’n. Sanngɛ be ti sran kpa, yɛ be klo Zoova. Be yɛ be yoli asɔnun’n i nun sran klikli mun-ɔn. Kɛ Zezi ɔli ɲanmiɛn su’n, be yɛ be dunnin asɔnun’n i ɲrun mmua-ɔ.