LIKE SUANLƐ 83
Zezi mannin sran akpi kpanngban be aliɛ
Afuɛ 32 nun’n, cɛn kun’n, akoto’m be ɔli jasin bolɛ be bali. Kɛ ɔ́ yó sɔ’n, nn Delɛ Cɛn’n w’a mantan koko. Kɛ mɔ be fɛli dan’n ti’n, Zezi fali be alie nun ɔli Bɛtsaida naan be ko lo wunmiɛn kan. Sanngɛ kɛ alie’n mantannin cenje’n, Zezi wunnin kɛ sran akpi kpanngban be dunnin mmua be ɲrun lɔ be su minndɛ be. Kannzɛ bɔbɔ Zezi kunndɛli kɛ ɔ nin i akoto mun bé trán be ngunmin kan’n, sanngɛ ɔ sɔli sran’m be nun klanman. Ɔ yoli be tukpacifuɛ’m be juejue, yɛ ɔ kleli be like. Zezi kannin Ɲanmiɛn Sielɛ’n i ndɛ kleli be lele nnɔsua. Kɛ lika’n wá sán’n, i akoto’m be bali be wa seli i kɛ: ‘Awe kun sran mun. Se be kɛ be wɔ naan be ko kunndɛ like be di.’
Zezi seli kɛ: ‘Nán maan be wɔ. Amun man be like wa naan be di.’ Akoto’m be usɛli i kɛ: ‘?A kunndɛ kɛ e ko to kpanwun e blɛ be?’ Filipu m’ɔ ti akoto’m be nun kun’n, ɔ seli kɛ: ‘Sɛ bɔbɔ e le sika kpanngban kpa naan e fa to kpanwun’n, ɔ su juman sran nga’m be ngba.’
Zezi usali be kɛ: ‘?Like diwa o lɛ?’ Andre tɛli su kɛ: ‘E le kpanwun nnun, yɛ jue kanngan nɲɔn. Ɔ juman lika fi.’ Zezi seli be kɛ: ‘Amun fa kpanwun’n nin jue’n be blɛ min.’ Ɔ seli sran mun kɛ be trantran ase ijre’n su akpasuaakpasua. Maan akpasua wie nun sran’m be yo ablenun (50), yɛ maan wie nun sran’m be yo ya (100). Zezi fali kpanwun’n nin jue’n, ɔ niannin ɲanmiɛn su lɔ, kpɛkun ɔ srɛli Ɲanmiɛn. I sin’n, ɔ fali kpanwun’n nin jue’n mannin akoto mun, yɛ be kusu be fa cɛcɛli sran mun-ɔn. Yasua akpi nnun (5.000) ɔ nin bla nin ba kanngan’m be kwlaa be dili, be ku yili. I sin’n, akoto’m be isɛli i onga’n naan w’a saciman. Ɔ yili gbogbo blu-nin-nɲɔn (12). Nanwlɛ, sa sɔ’n ti abonuan dan. ?Nɛ́n i-ɔ?
Sran’m be klun jɔli kpa. I sɔ’n ti’n, be waan bé síe Zezi famiɛn. Sanngɛ Zezi si kɛ blɛ nga Zoova kunndɛ kɛ ɔ yo famiɛn’n, ɔ nin-a juman. Ɔ maan ɔ yoli maan sran’m be ɔli. Kpɛkun ɔ seli i akoto mun kɛ be wɔ Galile Jenvie’n i bue kun lɔ. Yɛ be fuli be alie’n nun be ɔli-ɔ. Zezi kusu i ngunmin ɔli oka kun su. ?A si sa ti’n? Ɔ kunndɛ kɛ ɔ́ kó srɛ́ i Si Ɲanmiɛn. Kannzɛ bɔbɔ Zezi ɲɛnmɛn i ti’n, sanngɛ ɔ srɛ Ɲanmiɛn titi.
“Nán amun di junman aliɛ m’ɔ saci’n ti. Sanngɛ amun di junman aliɛ m’ɔ saciman m’ɔ man nguan m’ɔ leman awieliɛ’n, i ti. Sran Wa’n yɛ ɔ́ mán amun aliɛ sɔ’n niɔn.”—Zan 6:27.