Zezi nantili nzue su

Zezi kwla yo sran’m be juejue, ɔ kwla cɛn be nga be wuli’n. Sanngɛ nɛ́n i ngba-ɔ. Ɔ kwla yo maan sɛ aunmuan’n fita kekle kpa, naan nzue’n su tɔ’n, aunmuan’n yaci fitalɛ, kpɛkun nzue’n kpɛ. Kɛ ɔ ɔli oka’n su lɔ m’ɔ wieli Ɲanmiɛn srɛ’n, ɔ wunnin kɛ aunmuan dan kpa su fita kekle kpa Galile Jenvie’n su. Kɛ ɔ́ yó sɔ’n, nn nzue’n tɔ́. Aunmuan’n ti’n, i akoto’m be kwlá kanman alie’n. Zezi fin oka’n su jrali, kpɛkun ɔ nantili nzue’n su ɔli alie’n i wun lɔ. Akoto’m be wunnin kɛ sran kun su nanti nzue’n su. Ɔ maan srɛ kunnin be kpa. Sanngɛ Zezi seli be kɛ: ‘Min-ɔn. Nán srɛ kun amun.’

Piɛli seli i kɛ: ‘E Min, sɛ ɔ ti wɔ sakpa’n, se min kɛ n bla ɔ wun lɔ.’ Zezi seli Piɛli kɛ: ‘Bla.’ Piɛli fin alie’n nun jrali nzue’n su, kpɛkun ɔ nanti ɔli Zezi wun lɔ. Kɛ ɔ́ yó sɔ’n, nn aunmuan’n fíta kekle, nn nzue’n kusu tɔ́. Sanngɛ kɛ Piɛli wá jú Zezi wun lɔ’n, ɔ niannin aunmuan’n ɔ nin nzue m’ɔ su tɔ’n. Kpɛkun srɛ kunnin i, yɛ ɔ boli mlɔnlɛ bo-ɔ. Ɔ kpan seli kɛ: ‘E Min, de min!’ Yɛ Zezi trɛli i sa’n niɔn. Ɔ usɛli i kɛ: ‘?Ngue ti yɛ ɔ akunndan’n yoli nɲɔnnɲɔn-ɔn? ?A lafiman min su?’

Zezi nin Piɛli be fuli alie’n nun. Kpɛkun nzue’n nin aunmuan’n be ka lɛ kpɛli. Ɔ yoli akoto’m be fɛ kpa. Be seli Zezi kɛ: “A ti Ɲanmiɛn Wa sakpa.”

Nán cɛn sɔ’n nun ngunmin yɛ Zezi jrannin nzue’n nin aunmuan’n niɔn. Cɛn kun’n, ɔ nin i akoto’m be fali alie’n naan bé kɔ́ nzue’n i bue kun lɔ. Kɛ bé kɔ́’n, nn Zezi o alie’n i sin lɔ ɔ su lafi. Aunmuan dan kpa kun kpɛli. Kɛ ɔ́ yó sɔ’n, nn nzue’n tɔ́. Nzue’n bo guali alie’n nun, kpɛkun alie’n yili. Akoto’m be ko tinngeli Zezi. Be kpan seli kɛ: ‘Like Klefuɛ, e su wa wu. Uka e!’ Zezi jasoli, kpɛkun ɔ seli jenvie’n kɛ: “Yaci bolɛ! Jran diin!” Kɛ ɔ seli sɔ cɛ’n, aunmuan’n jrannin, kpɛkun jenvie’n yacili bolɛ. Yɛ Zezi usali be kɛ: ‘?Amun lafiman min su?’ Be seli be wiengu kɛ: “Aunmuan’n nin jenvie’n bɔbɔ be fa ndɛ ng’ɔ kan’n su.” Akoto’m be wunnin i wlɛ kɛ sɛ be lafi Zezi su sakpa’n, ɔ fataman kɛ like fi kun be srɛ.