LIKE SUANLE 93
Zezi sɛli i sin ɲanmiɛn su lɔ
Zezi nin i sɔnnzɔnfuɛ’m be yiali Galile lɔ. Ɔ mannin be junman cinnjin kpa kun. Ɔ seli be kɛ: ‘An wɔ ko kle sran’m be like naan be kaci min sɔnnzɔnfuɛ. An kle be like nga n kleli amun’n, yɛ an yo be batɛmun.’ Kpɛkun ɔ kan guali su kɛ: ‘Min nin amun e o nun cɛn kwlaa.’
Kɛ Ɲanmiɛn cɛnnin Zezi’n, ɔ dili cɛn ba ablanan (40) asiɛ’n su wa ekun. Blɛ sɔ’n nun’n, ɔ fiteli i sɔnnzɔnfuɛ kpanngban be ɲrun Galile nin Zerizalɛmun lɔ. Ɔ kan ndɛ cinnjin wie mun kleli be, kpɛkun ɔ yoli abonuan sa kpanngban. I agualiɛ su’n, ɔ nin i sɔnnzɔnfuɛ’m be yiali Olivie Oka’n su lɔ. Ɔ seli be kɛ: ‘Nán amun jaso Zerizalɛmun wa. Amun minndɛ like nga Siɛ’n seli kɛ ɔ́ fá mán amun’n.’
I akoto’m b’a wunmɛn i ndɛ’n i wlɛ. Be usɛli i kɛ: ‘?Blɛ nga nun yɛ á wá síe Izraɛli nvle’n niɔn?’ Zezi seli be kɛ: ‘Blɛ nga Zoova sieli i kɛ n di Famiɛn’n ɔ nin-a juman. Ɔ cɛ kan’n, Ɲanmiɛn i wawɛ’n wá tín amun, kpɛkun amún wá kán min ndɛ klé sran mun. Maan amun bo jasin fɛ’n Zerizalɛmun, nin Zide, nin Samari lele fa ju asiɛ’n i tiwa lɔ.’
I sin’n, Ɲanmiɛn mannin Zezi su, kpɛkun ɲanmiɛn ble kun kɛtɛli i su. I sɔnnzɔnfuɛ’m be niannin nglo lɔ lele, sanngɛ b’a wunmɛn i kun.
Zezi i sɔnnzɔnfuɛ’m be jasoli Olivie Oka’n su be ɔli Zerizalɛmun. Be yia nglo sua ba kun nun titi be srɛ Ɲanmiɛn. Be su minndɛ kɛ Zezi kle be ajalɛ ng’ɔ fata kɛ be fa’n.
“Bé wá bó Ɲanmiɛn Sielɛ’n i jasin fɛ nga asiɛ wunmuan’n su, naan be ti i nvlenvle’m be kwlaa be nun. I sin yɛ mɛn’n wíe-ɔ.”—Matie 24:14.