LIKE SUANLƐ 7

Ndɛ mɔ be kwla lafi su’n

Liki 1:3

LIKE NG’Ɔ FATA KƐ A YO’N: Kan ndɛ ng’ɔ ti nanwlɛ’n. I liɛ’n ɔ ndɛ tiefuɛ’m bé kwlá láfi su.

WAFA NGA Á YÓ’N:

Fa ɔ ndɛ’n fluwa nga be kwla lafi be su’n be nun. Maan ɔ ndɛ’n taka Ɲanmiɛn Ndɛ’n su. A kwla kɛnngɛn i Biblu’n nun trele. Sɛ ɔ waan á bó fluwa sifuɛ dandan’m be ndɛ kun su’n, annzɛ zronali nun ndɛ kun su’n, annzɛ á bó sa kun m’ɔ juli’n i su’n, annzɛ á kán ndɛ wie fá súan ɔ ndɛ’n i bo’n, dun mmua nian sɛ ndɛ sɔ’n ti nanwlɛ, annzɛ be te di su-o.
Kan ndɛ ng’ɔ ti nanwlɛ’n. Kɛ á yíyí Biblu’n nun ndɛ mma’m be nun’n, maan ndɛ nga a kan’n ɔ nin like nga ti yɛ be klɛli ndɛ sɔ’n be wɔ likawlɛ. Asa ekun’n, maan ɔ nin Biblu’n nun ndɛ wunmuan’n, ɔ nin fluwa nga “junman difuɛ nanwlɛfuɛ m’ɔ si ngwlɛlɛ” yili’n, be wɔ likawlɛ wie. (Matie 24:45) Sɛ a fa ndɛ wie fluwa kun nun’n, bu like nga ti yɛ be klɛli ndɛ sɔ’n i akunndan. Yɛ ndɛ trele nga be waan bé kán mɔ i ti yɛ be klɛli ndɛ sɔ’n, bu i akunndan wie, naan ndɛ nga á kán’n w’a yo nanwlɛ.

Nán blɔ ndɛ’n, annzɛ nán kpɛ wie gua nun. Sɛ be se kɛ “sran wie mun’n,” nán se kɛ “sran’m be dan lika.” Annzɛ kusu sɛ be se kɛ “ɔ ju wie’n,” nán se kɛ “blɛ kwlaa nun.” Sɛ be sɛ kɛ “atrɛkpa’n sa kun w’a juman’n,” nán se kɛ “sa sɔ’n w’a juman mlɔnmlɔn.”
Yiyi ndɛ’n nun. Sɛ a kanngan Biblu’n nun ndɛ mma kun nun’n, annzɛ a bo fluwa kun nun ndɛ wie su’n, usa kosan wie mun. Annzɛ kusu fa sunnzun ase naan ɔ ndɛ tiefuɛ’m be bɔbɔ be wun ndɛ’n i wlɛ.