LIKE SUANLƐ 18
?É yó sɛ naan y’a si Klisifuɛ kpa mun?
Sran kpanngban be tɔn be wun suɛn kɛ be ti Klisifuɛ. Sanngɛ be lafiman like kunngba’n su, yɛ be nantiman mmla kunngba’n su. ?Ɔ maan é yó sɛ naan y’a si Klisifuɛ kpa mun?
1. ?Wan mun yɛ be flɛ be Klisifuɛ mun-ɔn?
Klisifuɛ mun’n yɛle Zezi Klisi i sɔnnzɔnfuɛ mun. (Kanngan Sa Nga Be Yoli’n 11:26 nun.) ?Ngue yɛ be yo be fa kle kɛ be ti Zezi i sɔnnzɔnfuɛ-ɔ? Zezi bɔbɔ seli kɛ: “Sɛ amun fa min ndɛ’n su titi’n, nn amun ti min sɔnnzɔnfuɛ sakpa.” (Zan 8:31) I sɔ’n kle kɛ ɔ fata kɛ Klisifuɛ kpa’m be nanti ndɛ nga Zezi kannin’n su. Asa ekun’n, like nga Zezi kleli’n ɔ taka Ɲanmiɛn Ndɛ’n su. I wafa kunngba’n like nga Klisifuɛ kpa’m be kle’n ɔ taka Biblu’n su.—Kanngan Liki 24:27 nun.
2. ?Wafa sɛ yɛ Klisifuɛ kpa’m be yi klolɛ’n i nglo-ɔ?
Zezi seli i sɔnnzɔnfuɛ’m be kɛ: “Amun klo amun wiengu kɛ nga n fa kloli amun’n sa.” (Zan 15:12) ?Wafa sɛ yɛ Zezi yili i nglo kɛ ɔ klo i sɔnnzɔnfuɛ mun-ɔn? Yɛle kɛ ɔ nin be yoli ninnge mun likawlɛ. Ɔ wlali be fanngan, yɛ ɔ ukali be. I kpa bɔbɔ’n be dunman nun’n ɔ fɛli i nguan’n mannin. (1 Zan 3:16) I wafa kunngba’n, Klisifuɛ kpa’m be kanman klolɛ’n i ndɛ sa ngbɛn. Be yi i nglo be ayeliɛ’n nun, ɔ nin ndɛ nga be kan’n nun.
3. ?Junman benin yɛ Klisifuɛ kpa’m be di-ɔ?
Zezi mɛnnin i sɔnnzɔnfuɛ’m be junman cinnjin kun kɛ be di. “Ɔ sunmannin be kɛ be ko kan Ɲanmiɛn Sielɛ’n i ndɛ.” (Liki 9:2) Klisifuɛ klikli’m b’a boman jasin fɛ’n Ɲanmiɛn sulɛ sua’m be ngunmin nun. Be boli i awlo’m be nun, ɔ nin nzra nun wie. (Kanngan Sa Nga Be Yoli’n 5:42; 17:17 nun.) Andɛ kusu’n, kan kwlaa nga sran’m be o lɛ’n, Klisifuɛ kpa’m be bo jasin fɛ’n be kle be. Kɛ mɔ be klo be wiengu mun’n ti’n, be fa be blɛ’n nin be wunmiɛn’n be kan Ɲanmiɛn Ndɛ’n be kle be. I sɔ mɔ be yo’n, ɔ fɔnvɔ sran mun, yɛ ɔ yo maan be ɲan like be fa be wla gua su.—Marki 12:31.
SI NDƐ’N NUN KPA EKUN
Maan e fa e ɲin e sie i ninnge wie mɔ be kwla uka ɔ naan w’a wun ngbaciɛ ng’ɔ o Klisifuɛ kpa mun, ɔ nin be nga be nantiman Zezi i ndɛ’n su’n be afiɛn’n.
4. Be kunndɛ Biblu’n nun ndɛ nanwlɛ’n
Klisifuɛ klikli’m be kleli kɛ Ɲanmiɛn Ndɛ’n ti be cinnjin.
Nán be kwlaa nga be se be wun kɛ be ti Klisifuɛ’n yɛ be kle kɛ Biblu’n nun ndɛ’n ti be cinnjin-ɔn. An bo VIDEO’N. I sin’n, an koko kosan yɛ’m be su yalɛ.
?Ngue yɛ be nga be tɔn be wun suɛn kɛ be ti Klisifuɛ’n be yoli naan sran’m b’a siman like nga Zezi kleli’n niɔn?
Zezi kannin ndɛ nanwlɛ ng’ɔ o Ɲanmiɛn Ndɛ’n nun’n i ndɛ kleli sran mun. An kanngan Zan 18:37 nun. I sin’n, an koko kosan yɛ’n i su yalɛ:
?Ngue yɛ ɔ kwla uka e naan y’a wun ‘be nga be o ndɛ nanwlɛ’n i sin’n’ be wlɛ-ɔ?
5. Be kan ndɛ nanwlɛ ng’ɔ o Biblu’n nun’n i ndɛ kle sran mun
Klisifuɛ klikli’m be boli jasin fɛ’n be kleli be wiengu mun.
Kwlaa naan Zezi w’a wɔ ɲanmiɛn su’n, ɔ mɛnnin i sɔnnzɔnfuɛ’m be junman kun. Lele nin andɛ’n, be te di junman sɔ’n. An kanngan Matie 28:19, 20 nin Sa Nga Be Yoli’n 1:8 nun. I sin’n, an koko kosan yɛ’n i su yalɛ:
?Ɔ fata kɛ be bo jasin fɛ’n lele ju nin?
6. Be nanti like nga be kle’n su
Like ng’ɔ ukali bian kun mɔ be flɛ i kɛ Tɔmun’n naan w’a wun i wlɛ kɛ w’a wun Klisifuɛ kpa mun’n. An bo VIDEO’N. I sin’n, an koko kosan yɛ’m be su yalɛ.
?Ngue yɛ Ɲanmiɛn sulɛ wafa’m be yoli m’ɔ bubuli Tɔmun i sa sin-ɔn?
?Ngue ti yɛ ɔ lafi su kɛ w’a wun ndɛ nanwlɛ’n niɔn?
Like nga e yo’n ɔ ti cinnjin tra ndɛ nga e kan’n. An Kanngan Matie 7:21 nun. I sin’n, an koko kosan yɛ’n i su yalɛ:
?Kɛ sran kun kɛn i nuan nun ngbɛn kɛ ɔ ti Zezi i sɔnnzɔnfuɛ’n ɔ nin kɛ ɔ yi i nglo i ayeliɛ’n nun’n, oninfuɛ’n yɛ ɔ ti Zezi i cinnjin-ɔn?
7. Be klo be wiengu
Klisifuɛ klikli’m be yili i nglo kɛ be klo be wiengu.
Klisifuɛ kpa’m be kwla fa be nguan’n sie i wie nuan, be wiengu’m be ti. An bo VIDEO’N. I sin’n, an koko kosan yɛ’m be su yalɛ.
?Ngue ti yɛ aniaan bian Lɔidi fɛli i nguan’n sieli i wie nuan-ɔn?
?A bu i kɛ i sɔ m’ɔ yoli’n kle kɛ ɔ ti Klisifuɛ kpa?
An kanngan Zan 13:34, 35 nun. I sin’n, an koko kosan yɛ’m be su yalɛ:
?Wafa sɛ yɛ Zezi i sɔnnzɔnfuɛ mun (yɛle kɛ Klisifuɛ kpa mun) be nin be nga be wunnɛn kplo’n annzɛ be nvle’n timan kun’n be tran-ɔn?
?Wafa sɛ yɛ be yo sɔ alɛ blɛ nun-ɔn?
SRAN WIE’M BE WAAN: “Klisifuɛ’m be timan Ɲanmiɛn i sufuɛ kpa mun, afin be yoli sa tɛtɛ kpanngban.”
?Biblu’n nun ndɛ mma benin yɛ a kwla fa uka sran kun naan w’a wun Klisifuɛ kpa’m be wlɛ-ɔ?
NDƐ’N I KPƆLƐ BOLƐ
Klisifuɛ kpa’m be nanti Biblu’n nun ndɛ’n su. Be klo be wiengu sakpa, yɛ be kan ndɛ nanwlɛ m’ɔ o Biblu’n nun’n i ndɛ kle sran mun.
Ndɛ’n i nun flanlɛ
?Ngue su yɛ Klisifuɛ kpa’m be like nga be kle’n ɔ taka-ɔ?
?Ngue yɛ be fa sie Klisifuɛ kpa’m be nzɔliɛ-ɔ?
?Junman benin yɛ Klisifuɛ kpa’m be di-ɔ?
NDƐ WIE MUN EKUN
Sran wie mɔ be mian be ɲin be nian like nga Zezi kleli’n ɔ nin i ayeliɛ’n su’n.
Like ng’ɔ ukali bla kun naan w’a fɛ i wun w’a wla Ɲanmiɛn i sufuɛ kpa mun be nun wie’n.
“Be fali Biblu’n be tɛli min kosan’m be kwlaa su!” (Sasafuɛ Tranwlɛ’n nun ndɛ)
Blɛ kekle’n nun’n, wafa nga Klisifuɛ kpa’m be kle kɛ be klo be wiengu’n.
Kɛ ɔ fɛ i laa lele andɛ’n, Klisifuɛ kpa’m be kle kɛ be ti Zezi i sɔnnzɔnfuɛ sakpa.
“?Ngue yɛ be fa sie Klisifuɛ kpa’m be nzɔliɛ-ɔ?” (Sasafuɛ Tranwlɛ’n, afuɛ 2012, Mɛ 1)