Gbaflɛn nin talua nga Zoova klun jɔ be wun’n

Zoova i Lalofuɛ gbaflɛn nin talua’m be ti yɛ be klɛli ndɛ nga é wá kókó su yalɛ yɛ’n niɔn. I sɔ ti’n, é wlá gbaflɛn nin talua kwlaa be fanngan kɛ be siesie be wun be suɛn i kpa. I liɛ’n, cɛn nga asɔnun’n kókó i su yalɛ’n, bé kwlá tú be klun bé tɛ́ tɛ kosan’m be su.

“Min wa, fa akunndan nanti. Sɛ a fa akunndan nanti’n, ń klun jɔ́. I liɛ’n, sɛ sran kan min wun ndɛ’n, ń kwlá sɔ́ su.”​—NYANNDRA MUN 27:11.

1, 2. (a) Gbaflɛn annzɛ talua, sa nga ti yɛ sɛ ɔ kɔnvi sɔli mɛn nun ayeliɛ’n, i sɔ’n kleman kɛ a kwlá yoman Klist­fuɛ kun’n, kɛn i ndɛ (Rɔmfuɛ Mun 7:21). (b) ?Afɔtuɛ mennin yɛ Azafu i ajalɛ’n man wɔ ɔ? (An nian pazi 4 i kuku’n nun.)

MAAN e fa sunnzun ase kun. Gbaflɛn annzɛ talua, w’a wɔ tralɛ tolɛ. Kɛ á níannían ɔn, ɔ ɲin w’a tɔ tralɛ klanman kpa kun su. Ɔ ti kɛ ɔ wun su tralɛ yɛ be kpali sa, kpɔkun i gua’n ti pɔpɔ. Sanngɛ kɛ á níannían tralɛ’n i kpa’n, kpɔkun w’a wun i kɛ i nuan su’n ti ɲannjiɲannjiwa, afin b’a mianmianman i ngbaliɛ’m be nun kpa. Tralɛ sɔ mɔ a kloli i lɛ’n, kannzu ɔ timan kpa. ?Á fá ɔ sika wlɛ́ i like sɔ’n nun?

² Sunnzun ase sɔ’n, ɔ yi sa nga ɔ kwla tanndan gbaflɛn nin talua nga be ti Klist­fuɛ’n be ɲrun’n, i nglo. Yɛle kɛ, kɛ i klikli nun’n, a nian mɛn’n nun ninnge mun’n, be ti klanman kɛ tralɛ nga ɔ waan á tó’n sa. Atrɛkpa, suklu lɔ’n, ɔ wiengu suklu ba wie’m be nɔn drɔgi, annzɛ be nɔn nzan be bo, annzɛ be kunndɛ bian nin bla sukusuku. ?Atrɛkpa, ɔ kɔnvi w’a sɔ be ayeliɛ sɔ’m be wie le? ?Be ayeliɛ sɔ’n mɔ be flɛ i mɛn dilɛ’n, w’a kpɛn ɔ klun le kɛ á dí i sɔ mɛn’n wie bɔbɔ kaan sa? Sɛ i sɔ angunndan bali ɔ ti nun’n, nán bu ɔ klun lɔ ndɛndɛ kɛ a ti sran tɛ annzɛ kusu a kwlá yoman Klist­fuɛ. Afin i kwlaa yoli o, Biblu’n seli kɛ mɛn nun ninnge’m bé ɲán ta sran’m be su. I li bɔbɔ, be nga be waan bé yó Ɲanmiɛn i klun sa’n be liɛ’n, ɔ́ yó kekle kpa mán be.​—2 Timote 4:10.

3. (a) ?Ngue ti yɛ mɛn’n nun ninnge’m be kunndɛlɛ’n ti afɛ ngbɛn ɔn? (b) ?Wafa sɛ yɛ Klist­fuɛ kun kleli kɛ mɛn’n nun ninnge’m be kunndɛlɛ’n ti afɛ ngbɛn ɔn?

³ Siɛn’n, fa mɛn nga nun ninnge mun naan niannian be kpa kɛ nga a fa niannin tralɛ nga a kloli i’n, mɔ ɔ waan á tó’n sa. Kpɔkun usa ɔ wun kosan yɛ mun: ‘?Sɛ mɛn nga nun ninnge’m be ti kɛ tralɛ sa’n, tannin i kpa’n wie yɛ be fa kpali tralɛ sɔ’n niɔn? ?Yɛ be kpɛli i wafa sɛ?’ Biblu’n kɛn i weiin kɛ: “Mɛn’n nin i nun ninnge kwlaa bɔ sran nyin blo su’n, bé wíe.” (1 Zan 2:17). Kannzɛ bɔbɔ mɛn’n dilɛ’n yo fɛ’n, sanngɛ ɔ cɛman. Kpɔkun, sɛ mɛn’n nun ayeliɛ’m be ti like mɔ be to’n, i gua’n cɛnnin dan. Ɔ maan sɛ a to’n, a ɲanman su like kpa. Maan e sie i nzɔliɛ e nian. Aniaan bla Klist­fuɛ kun wunnin i “talua nzue sacilɛ’n i su ɲrɛnnɛn’n.” Ɔ maan i bɔbɔ seli kɛ: “Mɛn’n kwla yo ɔ ɲrun klanman. Ɔ ti kɛ sran kun yɛ ɔ flɛ wɔ kɛ a wa di fɛ sa. Kpɔkun, ɔ yo maan a bu i kɛ a su wunman sa sɔ’m be su ɲrɛnnɛn. Sanngɛ ɔ timan sɔ mlɔnmlɔn. Afin kɛ mɛn’n ko mian wɔ kplɔlɔ lele m’ɔ ko cuɛn ɔ nun nzue’n ko wie’n, kpɔkun w’a yi ɔ floko’n i blo.”a ?Gbaflɛn annzɛ talua, ngue ti yɛ á sáci wɔ gbaflɛn annzɛ talua nzue’n mɛn dilɛ kɛ ngalɛ sa’n nun ɔn?

Ɔ sasa wɔ “Klunwifuɛ’n ti”

4, 5. (a) ?Ka naan Zezi w’a wu’n, ngue yɛ ɔ srɛli Zoova kɛ ɔ yo ɔ? (b) ?Yɛ ngue ti yɛ i srɛlɛ sɔ’n ti i su ɔ?

⁴ Kɛ mɔ gbaflɛn nin talua nga be ti Zoova i Lalofuɛ’n be si kɛ mɛn nga kwlá yoman be ye’n ti’n, be mian be ɲin naan b’a kloman mɛn’n i dilɛ wafa sɔ’n wie (Zak 4:4). ?Gbaflɛn annzɛ talua sɔ mɔ be lafi Ɲanmiɛn su’n, be nun kun yɛle wɔ? Sɛ ɔ ti sɔ’n, nn é yó wɔ mo. Nanwlɛ, e si kɛ, kɛ a ko yo naan w’a kwla jran kekle ninnge nga ɔ janvuɛ’m be se wɔ kɛ a yo’n be ɲrun’n, naan w’a yoman kɛ be sa’n, ɔ timan pɔpɔ. Sanngɛ, a le ukafuɛ.

⁵ Ka naan Zezi w’a wu’n, ɔ srɛli Zoova kɛ ɔ “nian” i sɔnnzɔnfuɛ’m be su “Klunwifuɛ’n ti.” (Zan 17:15). Sa kpa kun ti yɛ Zezi srɛli i si sɔ ɔ. Afin ɔ si kɛ, kannzɛ bɔbɔ i sɔnnzɔnfuɛ’m be ti kpɛnngbɛn annzɛ gbaflɛn nin talua o, Ɲanmiɛn i sulɛ tankaan’n su yoman pɔpɔ be sa nun. ?Ngue ti ɔ? Sa klikli’n yɛle kɛ, Zezi si kɛ klunwifuɛ kun m’ɔ le tinmin’n, kpɔkun mɔ be wunmɛn i’n, ɔ́ wá klé i sɔnnzɔnfuɛ’m be yalɛ. “Klunwifuɛ” sɔ’n yɛle mmusu’m be si Satan. Biblu’n kan aolia nun sran klunwifuɛ sɔ’n i ndɛ se kɛ: “Ɔ ti kɛ asɔmɔli b’ɔ wlanwlan ɔ kpan kunndɛ nnɛn’n sa.”​—1 Piɛr 5:8.

6. ?Wafa sɛ yɛ e si kɛ Satan siman gbaflɛn nin talua’m be aunnvuɛ ɔ?

⁶ Kɛ ɔ fɛ i mɛn’n i bo bolɛ’n nun lele m’ɔ́ fá jú yɛ’n, sa yaya nin ɲrɛnnɛn tɛtɛ kpa mun yɛ ɔ yo Satan fɛ kɛ ɔ́ fá klé sran’m be nun ɔn. Bu ɲrɛnnɛn dan nga Satan kleli Zɔbu nin i awlobofuɛ mun’n i su angunndan nian (Zɔb 1:13-19; 2:7). Nzaje sa wie mun mɔ Satan fa kleli sran’m be yalɛ’n, mɔ be kannin be ndɛ aladio nun, annzɛ zronali nun, annzɛ televiziɔn nun’n, atrɛkpa a tili sa sɔ’m be ngan annzɛ a wunnin be ɔ ɲin jrɛiin su. Kɛ Satan wlánwlán m’ɔ́ kúnndɛ nnɛn dí’n, ɔ siman gbaflɛn nin talua’m be aunnvuɛ bɔbɔ kaan sa. E sa e sin e blɛ liɛ nun afuɛ ya kpɔlɛ klikli nun e nian. Nvialiɛ nun’n, Erɔdu guguli kɛ be kun Bɛtleɛmu klɔ’n su ba yasua nga b’a di afuɛ nɲɔn’n annzɛ nga be nin a diman afuɛ nɲɔn’n be kwlaa (Matie 2:16). Atrɛkpa, Satan yɛ ɔ fɛli i sɔ angunndan’n wlali Erɔdu ti nun ɔn. Satan waan ɔ́ yó sɔ naan ɔ́ kún ba yasua nga Ɲanmiɛn sieli i kɛ cɛn wie lele ɔ de sran mun, naan ɔ di Satan bɔbɔ i jɔlɛ’n (Bo Bolɛ 3:15). Nanwlɛ, Satan siman gbaflɛn nin talua’m be aunnvuɛ mlɔnmlɔn. Like kunngba cɛ nga ɔ o i ti nun’n, yɛle kɛ ɔ́ dí sran’m be nun kpanngban kpa kɛ nnɛn sa. E blɛ liɛ’n su yɛ e wun i sɔ’n i wlɛ kpa ɔ, afin be kannin Satan bo ɲanmiɛn su lɔ be yili i asiɛ’n su wa, yɛ ɔ ‘bali ya su yɛle kɛ ɔ si kɛ i cɛn’n w’a sɔnman kun.’​—Sa Nglo Yilɛ 12:9, 12.

7. (a) ?Ngbaciɛ mennin yɛ ɔ o Zoova nin Satan be afiɛn ɔn? (b) ?Ɔ mɛn dilɛ nun’n, ngue yɛ Zoova kunndɛ i nin wɔ ɔ?

⁷ Ngbaciɛ dan nga ɔ o Satan nin Zoova be afiɛn’n yɛle kɛ, Satan ‘ba ya su,’ sanngɛ Zoova liɛ’n ɔ si “aunnvuɛ dan.” (Lik 1:78). Zoova yɛ ɔ yi sran klolɛ’n i nglo kpa ɔ. Yɛle kɛ i nzuɛn kwlaa taka sran klolɛ su’n, ɔ maan Biblu’n kɛn i ndɛ se kɛ: “Nyanmiɛn’n yɛ ɔ ti sran klofuɛ nin-ɔn.” (1 Zan 4:8). Nian kɛ ngbaciɛ o mɛn nga i min’n ɔ nin Ɲanmiɛn nga i sulɛ’n ti wɔ cenjele like’n, be afiɛn ɔn! Kɛ Satan kúnndɛ dí sran mun kɛ nnɛn sa’n, nn Zoova liɛ’n “ɔ klo-man kɛ sran kun sa mlin.” (2 Piɛr 3:9). Afin Zoova i ɲrun’n, sran kwlaa i nguan’n ti i cinnjin. Ɔ kusu, ɔ nguan’n ti i cinnjin wie. Kɛ Zoova se kɛ nán yo mɛn’n nunfuɛ’n, nán kɛ i waan ɔ́ kpɛ́ wɔ aklunjuɛ dilɛ’n i sin, annzɛ kusu ɔ́ bó wɔ kpaun ti ɔ (Zan 15:19). Sanngɛ, ɔ nian wɔ su klunwifuɛ’n ti. Like nga ɔ lo ɔ Si m’ɔ o nglo lɔ’n, yɛle kɛ a ɲan like kun m’ɔ ti kpa lele’n tra mɛn’n nun ninnge mɔ be cɛman’n. Like sɔ’n yɛle kɛ á ɲán ‘nguan sakpa,’ yɛle kɛ á ɲán anannganman nguan asiɛ’n m’ɔ́ wá káci mɛn klanman’n, i su (1 Timote 6:17-19). Zoova klo kɛ ɔ liɛ’n yo ye. I sɔ ti’n, ɔ wla wɔ fanngan kɛ a fa ɔ ɲin sie anannganman nguan sɔ’n i kunndɛlɛ’n su (1 Timote 2:4). Asa ekun, Zoova yia wɔ kɛ a yo like cinnjin kpa kun. ?Ngue like yɛle i sɔ’n?

Yo maan “n klun jɔ”

8, 9. (a) ?Gbaflɛn annzɛ talua, ngue yɛ a kwla fa man Zoova ɔ? (b) ?Kɛ nga e fa wun i Zɔbu liɛ’n su sa’n, wafa sɛ yɛ Satan kan Zoova wun ndɛ ɔ?

⁸ ?W’a to like w’a man ɔ janvuɛ kun le, mɔ like sɔ’n yoli i fɛ lele trali su’n? Sa nga ti yɛ ɔ janvuɛ’n i klun jɔli like nga a mɛnnin i’n su’n, yɛle kɛ atrɛkpa, a miannin ɔ ɲin kunndɛli like nga a si kɛ ɔ́ jɔ́ ɔ janvuɛ’n i klun’n. Siɛn’n, usa ɔ wun kosan yɛ’n: ?Like kpa mennin yɛ n kwla fa man min Yifuɛ Ɲanmiɛn Zoova ɔ? I klikli nun’n, i sɔ ndɛ’n kwla yo wɔ ɲrun finfin ndɛ. I sɔ’n ti’n, a kwla usa ɔ wun kɛ: ?Ngue like yɛ Ɲanmiɛn mɔ like fi nunmɛn i sin’n, ɔ kwla miɛn i wun klɔ sran sa nun ɔn? ?Ngue like yɛ n kwla fa man Ɲanmiɛn m’ɔ lemɛn i ɔ? Biblu’n tɛ kosan sɔ’m be su Nyanndra Mun 27:11 nun. I waan: “Min wa, fa akunndan nanti. Sɛ a fa akunndan nanti’n, n klun jɔ́. I liɛ’n, sɛ sran kan min wun ndɛ’n, ń kwlá sɔ́ su.”

⁹ Ɔ Biblu’n nun like suanlɛ nun’n, a wunnin kɛ mmusu’m be si Satan yɛ ɔ kan Zoova wun ndɛ tɛ ɔ. Ɔ se Ɲanmiɛn kɛ sran kwlaa nga be su i’n, be sumɛn i klolɛ su, naan sran’m be bɔbɔ be like nga ɔ lo be’n, i ti yɛ be su i ɔ. Ɔ maan sɛ sran’m be wun ɲrɛnnɛn’n, be kwlaa bé yáci i sulɛ. Nian, ?Zɔbu mɔ be kwlá sacimɛn i wun bɔ kaan sa’n, i wun ndɛ mennin yɛ Satan kannin kleli Zoova ɔ? Ɔ seli Zoova kɛ: ‘A sɛsɛ i, a sɛsɛ i awlo’n nin i bo ninnge’n kwlaa. Junman ng’ɔ di’n kwlaa a yo maan ɔ yo ye. I nnɛn’m be tru mɛn wunmuan’n nun kpokpaa. Sɛ ɔ waan m bua ato’n, saci i sa nun ninnge mun naan nian, sɛ w’a kanman wɔ ndɛ tɛtɛ cɛ’n, a ko fa ko se.’​—Zɔb 1:10, 11.

10. (a) ?Wafa sɛ yɛ e si kɛ nán Zɔbu i Ɲanmiɛn sulɛ tankaan i kunngba su yɛ Satan sili akplowa’n niɔn? (b) ?Wafa sɛ yɛ Ɲanmiɛn i mɛn wunmuan’n i sielɛ’n, i su ndɛ’n kan wɔ wie ɔ?

¹⁰ Kɛ nga Biblu’n fa kɛn i ndɛ sa’n, nán Zɔbu i Ɲanmiɛn sulɛ tankaan i kunngba su yɛ Satan sili akplowa’n niɔn. Sanngɛ sran kwlaa nga be su Zoova’n, be su akplowa yɛ Satan sili ɔ. Yɛ a o sran sɔ’m be nun wie. Afin, Satan seli Zoova kɛ: “Sran [nán Zɔbu i ngunmin ɔn, e kwlaa e ndɛ ɔ] i wunnɛn’n yɛ ɔ ti cinnjin i sa nun ɔn. Kannzɛ sran kun i anyanbeun’n ɔ ti sɛ, sɛ sa’n tɔ cinnjin kpa’n, ɔ fɛ i anyanbeun’n fa to i ti-ɔ ɔ yo ye.” (Zɔb 2:4). ?A wun ɔ like liɛ nga ɔ fata kɛ a yo i sa sɔ nun’n? Kɛ nga Nyanndra Mun 27:11 fa kannin sa’n, Zoova waan a yo like kun mɛn i naan like sɔ’n ti’n, w’a kwla tɛ i wun ndɛ tɛ kanfuɛ Satan su. Bu i sin nian. Ɲanmiɛn m’ɔ sie mɛn wunmuan’n, ɔ su se wɔ kɛ ɔ bɔbɔ a fa angunndan nanti naan ndɛ dan sɔ’n i nun kpɛ. ?Nán junman dan kun ɔ nin ɔ sran bulɛ dan kpa yɛle i sɔ’n? ?A kwla mian ɔ ɲin yo like nga Zoova seli kɛ a yo’n? Zɔbu kwla yoli i sɔ like’n (Zɔb 2:9, 10). Zezi yoli like sɔ’n wie. Kpɔkun kɛ ɔ fɛ i Zezi bɔbɔ blɛ’n su lele m’ɔ fa ju andɛ’n, sran kpanngban kpa wie mun, ɔ nin gbaflɛn nin talua sunman be kwla yoli like sɔ’n wie kusu (Filipfuɛ Mun 2:8; Sa Nglo Yilɛ 6:9). Ɔ kusu a kwla yo like kunngba sɔ’n wie. Like nga ɔ fataman kɛ ɔ wla fi su’n, yɛle kɛ sran fi kwlá seman kɛ i ndɛ nunman sa sɔ’n nun. Ɔ maan ajalɛ nga á fá’n, ɔ́ klé sran nga a jin i sin’n: Sɛ nán Satan’n, nn Zoova ɔ. ?Wan li sin yɛ á jrán ɔn?

Zoova nian wɔ lika!

11, 12. ?Gbaflɛn annzɛ talua, sɛ a su Zoova o, annzɛ sɛ a sumɛn i o, wafa sɛ yɛ ɔ bu i ɔ? Yiyi nun.

¹¹ ?Ajalɛ nga á fá’n, Zoova i ndɛ o nun? ?Sran kpanngban nga be su Zoova tankaan’n, be kleman kɛ Satan buali ato? I yo, Satan waan sran fi kwlá suman Zoova klolɛ su. Nanwlɛ, i sɔ ndɛ’n ti ato. Sanngɛ, Zoova kunndɛ kɛ a jran i m’ɔ ti Ɲanmiɛn m’ɔ sie mɛn wunmuan’n i sin tititi, afin ɔ nian ɔ bɔbɔ ba’n i su. I sɔ’n ti Zezi seli kɛ: “Amun Si b’ɔ o nyanmiɛn su lɔ’n ɔ kloman kɛ ba kanngan nga’m be nun kun mlin.”​—Matie 18:14.

¹² Nanwlɛ, i kwlaa sɔ’n kle kɛ Zoova fɛ i ɲin sie ajalɛ nga a fa’n su. Kpɔkun nga ɔ ti cinnjin kpa ekun’n, yɛle kɛ ajalɛ nga á fá’n, ɔ kwla kun Zoova i ya, annzɛ kusu ɔ kwla jɔ i klun. Biblu’n kle weiin kɛ, sa kpa annzɛ sa tɛ nga sran’m be yo’n, ɔ wluwlu Zoova wun. E kwla fa sa nga ɔ juli Izraɛlifuɛ’m be blɛ su’n, e sie i nzɔliɛ. Yɛle kɛ, i nun mɔ Izraɛlifuɛ’m be nun kpanngban kpa be yoli ɲin kekle Zoova su’n, “be klɔklɔli i.” (Jue Mun 78:40, 41). Ka naan nzue dan’n w’a tɔ Nowe blɛ su’n, kɛ “sran’m be klunwi’n kɔ́ i nyrun cɛn’n kwlaa,” ɔ yoli Zoova “i ya dan.” (Bo Bolɛ 6:5, 6). Bu i ndɛ sɔ’n i sin nian. Sɛ a yo sa tɛ’n, ɔ́ yó ɔ Yifuɛ’n i ya. Nán kɛ i sɔ’n kle kɛ Ɲanmiɛn i ngasi lolɛ yoman ya ti ɔ. Sanngɛ, ɔ klo wɔ ti ɔ, yɛ ɔ nian ɔ su kpa. Kusu’n, kɛ a yo sa nga ɔ ti kpa’n, Zoova klun jɔ. Sɛ i klun jɔ’n, nán kɛ Satan i su m’ɔ kwla tɛ’n i ngunmin ti ɔ, sanngɛ nga ɔ yo i fɛ’n ekun, yɛle kɛ ɔ kwla yo ɔ Suyra­fuɛ siɛn’n. Afin ɔ su yralɛ’n ti like kun m’ɔ o i klun kɛ ɔ́ yó ɔ (Ebre Mun 11:6). ?Nán Siɛ kun m’ɔ ti sran klofuɛ kpa mɔ a le i’n, yɛle Ɲanmiɛn Zoova?

Á ɲán suyralɛ kpanngban kpa ikisa

13. ?Gbaflɛn annzɛ talua, suyralɛ mennin yɛ Zoova i sulɛ’n man wɔ ikisa ɔ?

¹³ Zoova i sulɛ nun’n, nán e ɲrun lɔ ngunmin yɛ é ɲán suyralɛ’n niɔn. Afin gbaflɛn nin talua nga be ti Zoova i Lalofuɛ’n, be di aklunjuɛ ikisa wie. I sɔ’n ti’n, jue tofuɛ waan: “Sa nga Anannganman jran su kekle kɛ be yo be’n, be ti i su. Aklunjuɛ cɛ yɛ ɔ o sa sɔ’m be sin ɔn.” (Jue Mun 19:9). Zoova si like nga ɔ ti kpa man e’n tra klɔ sran kwlaa. Ɔ maan, Ɲanmiɛn nuan ijɔfuɛ Ezai waan Zoova seli kɛ: “Min Anannganman [Zoova] bɔ n ti amun Nyanmiɛn’n, n kle amun like, amun bɔbɔ amun kpa yolɛ ti yɛ n kle amun ɔn. Min yɛ n kle amun atin ng’ɔ fata kɛ amun sin nun nin ɔn. Sɛ ɔ ti kɛ amun sieli amun su mmla nga m mannin amun’n i bo’n, wuun amún dí alaje. Sɛ alaje sɔ’n ti nzue’n, wuun ń sé kɛ ɔ́ yó kɛ nzue ba kun b’ɔ sonji kpuu b’ɔ kpɛ-man’n sa. Sɛ ɔ ti kɛ amun sieli amun su mmla sɔ’n i bo’n, wuun amún nyán muae. Sɛ muae sɔ’n ti jenvie’n, wuun ń sé kɛ ɔ́ bó gua cenje’n su tititi.”​—Ezai 48:17, 18.

14. ?Gbaflɛn annzɛ talua, Biblu’n nun mmla mennin yɛ ɔ kwla uka wɔ naan w’a tɔman kalɛ nun ɔn?

¹⁴ Sɛ a fa Biblu’n nun mmla’m be su’n, a su tɔman sa nga be man awlaboɛ’n be nun. E fa sunnzun ase kun e nian. Biblu’n se kɛ be nga be klo sika’n, ‘be fa be ɲin bloli nun lele, ɔ man awlaboɛ’n w’a kun be kpo.’ (1 Timote 6:9, 10). ?Biblu’n nun ndɛ ngalɛ’n i nuan su sa w’a tɔ ɔ janvuɛ wie su le? Afin, kɛ mɔ gbaflɛn nin talua wie’m be waan saan fii bé ɲán ninnge nga b’a yi be uflɛuflɛ mun’n ti’n, be bo kalɛ dan kpa naan b’a to ninnge sɔ mun. Ɔ kwla yo tralɛ annzɛ ninnge kɛ aladio, annzɛ televiziɔn, annzɛ selilɛli, ɔ nin ninnge wie mun ekun sa. ?Nanwlɛ, kɛ like kun mɔ a lemɛn i ti sika’n, mɔ ɔ waan saan fii á tó like sɔ’n, ɔ maan i ti á kó úsa i wun afɛ’n, nán ɔ wun kanga nun wlalɛ yɛle i sɔ’n?​—Nyanndra Mun 22:7.

15. ?Gbaflɛn annzɛ talua, wafa sɛ yɛ Biblu’n nun mmla’m be sasa ɔ bla nin bian kunndɛlɛ sukusuku’n i nun ɲrɛnnɛn’n i lika ɔ?

¹⁵ Bla nin bian kunndɛlɛ sukusuku’n i su sa wie mun mɔ be ɲɛn i’n, bu i sin wie nian. Afuɛ kwlaa nun mɛn wunmuan nun’n, talua kpanngban kpa mɔ be nin a jaman bian’n, be wunnzɛ. Wie’m be wu ba mun, sanngɛ kɛ mɔ b’a sunnzunmɛn i sɔ laa’n ti’n, be ngunmin be kwlá taman ba’n. Wie’m be kusu be tu kuɛ’n, ɔ maan be angunndan’n bu be fɔ cɛn kwlaa. Wie mun ekun be ɲan bla nin bian kunndɛlɛ sukusuku nun tukpaciɛ kɛ SIDA’n sa. Be nun sran nga be si Zoova be liɛ’n, be ayeliɛ’n i su ɲrɛnnɛn dan kpa mɔ be wun i’n, yɛle kɛ be nin Zoova be afiɛn’n sacib (Galasifuɛ Mun 5:19-21). I sɔ’n kwlaa ti’n, Biblu’n se kɛ: “An wla bla nin bian kunndɛlɛ i ase.”​—1 Korɛntfuɛ Mun 6:18.

Su Ɲanmiɛn m’ɔ ‘di aklunjuɛ’n’

16. (a) ?Wafa sɛ yɛ e si kɛ Zoova klo kɛ blɛ mɔ a te yo gbaflɛn annzɛ talua’n, maan ɔ klun jɔ kpa’n niɔn? (b) ?Ngue ti yɛ Zoova kle wɔ atin nga ɔ fata kɛ a fa su’n niɔn?

¹⁶ Biblu’n waan Zoova ‘di aklunjuɛ.’ (Jue Mun 104:31). Ɔ klo kɛ a di aklunjuɛ wie. I sɔ ti’n, i ndɛ’n se kɛ: “Gbanflɛn kan, yo like nga bɔ maan sran klun jɔ sakpa’n. Kɛ a tɛ yo gbanflɛn kan’n, maan ɔ klun jɔ kpa.” (Akunndanfuɛ’n 11:9). Sanngɛ, Zoova nian sa nga a yo be’n. Kpɔkun sɛ á dí be su aklunjuɛ o, annzɛ á wún be su ɲrɛnnɛn ikisa o, annzɛ ɔ ɲrun lɔ o, ɔ wun i kwlaa. I sɔ ti’n, afɔtuɛ nga ɔ man wɔ’n yɛ: “Blɛ bɔ a tɛ yo gbanflɛn’n, maan ɔ wla kpɛn ɔ yifuɛ’n i su kwlaa naan nyrɛnnɛn blɛ’n ɔ’a ju. Maan ɔ wla kpɛn i su naan w’a yo kpɛnngbɛn, afin ɔ kpɛnngbɛn bɛ sɔ’n nun’n, ɔ nyin wá tú nguan’n su.”​—Akunndanfuɛ’n 12:1.

17, 18. ?Wafa sɛ yɛ Klist­fuɛ talua kun kannin i aklunjuɛ nga ɔ di i Ɲanmiɛn sulɛ nun’n, i ndɛ ɔ? ?Yɛ, wafa sɛ yɛ ɔ kusu a kwla di aklunjuɛ kunngba sɔ’n wie ɔ?

¹⁷ Kɛ é sé yɛ’n, gbaflɛn nin talua kpanngban’m be di Zoova sulɛ’n i su aklunjuɛ dan kpa. E fa Lina m’ɔ le afuɛ 15 e sie i nzɔliɛ e nian. Ɔ seli kɛ: “Kɛ ń nánti’n, n kɔmin jin su. N ti juejue, afin n nɔnman siklɛti nin drɔgi. Afɔtuɛ nga n ɲan be asɔnun nun’n, be uka min maan n jran kekle Satan i aya’m be ɲrun. Aklunjuɛ’n fite n kplo’n su, afin n ɲan fɔnvɔlɛ kpa Ɲanmiɛn Sielɛ Blɛ Sua’n nun lɔ. I kwlaa sɔ’n be nun dan kpafuɛ’n, yɛle kɛ n lafi su kɛ ń ɲán anannganman nguan asiɛ’n su.”

¹⁸ Kɛ Lina sa’n, gbaflɛn nin talua sunman nga be ti Klist­fuɛ’n, be mian be ɲin be lafi Ɲanmiɛn su. Ɔ maan, be di aklunjuɛ. Kannzɛ bɔbɔ sa kekleekle’m be ju be su wie ikisa’n, sanngɛ be wun i wlɛ kɛ like kpa kun o be ɲrun lɔ. Ɔ maan, i kwlaa yoli o, nán yaci Ɲanmiɛn mɔ sran’n i kpa yolɛ’n ti i cinnjin’n, i sulɛ le. Yo maan i klun jɔ. I liɛ’n, ɔ́ yó maan á dí aklunjuɛ sa lele ɔ su wieman le.​—Jue Mun 5:12.

[Ja ngua lɛ ndɛ mun]

?Amun wla kwla kpɛn su?

• ?Gbaflɛn annzɛ talua, sa mennin yɛ Satan “klunwifuɛ’n” kunndɛ kɛ a tɔ nun ɔn?

• ?Gbaflɛn annzɛ talua, wafa sɛ yɛ a kwla yo maan Zoova klun jɔ ɔ?

• ?Gbaflɛn annzɛ talua, wafa sɛ yɛ Biblu’n kle kɛ Zoova nian wɔ su ɔ?

• ?Gbaflɛn annzɛ talua, suyralɛ wie mennin yɛ Zoova i sulɛ’n man wɔ ɔ?

[Kuku/Foto, bue 4]

Laa Ɲanmiɛn sufuɛ kpa kun i angunndan’n nun sanngannin

Azafu ti Levifuɛ. Izraɛli blɛ su’n, ɔ yoli jue tofuɛ dan kpa kun Zoova i sua’n nun. Jue nga ɔ kpɛli be’n, be toli i nzra nun be fa suli Zoova. Sanngɛ ɔ nin junman nanndoliɛ sɔ mɔ Azafu di’n, i ɲin wa bloli sran wie’m be wun. Sran sɔ mun yɛle be nga be fɔn Ɲanmiɛn mmla’n mɔ sanngɛ be ninnge’m be yo ye be sa nun’n. I waan: ‘Ɔ ka kaan naan m’an tu ajalɛ tɛ, ɔ ka kaan naan m’an tɔ. Afin n wunnin i kɛ be nga be yi Ɲanmiɛn’n i blo’n, be ninnge’m be yo ye be sa nun, kpɔkun min ɲin bloli ɲin keklefuɛ sɔ’m be wun.’—Jue Mun 73:2, 3.

I sin’n, sa sɔ’n ti Azafu ko wluli Ɲanmiɛn i sua’n nun lɔ naan w’a srɛ i. Kɛ ɔ wa fɛli i angunndan sɛli i Ɲanmiɛn ninnge’m be su ekun’n, ɔ wunnin i wlɛ kɛ Zoova i ɲin ci sa tɛ yofuɛ mun naan sɛ i blɛ ju’n, sran nga ɔ yoli sa kpa’n ɔ nin sran nga ɔ yoli sa tɛ’n, sran kun bɔbɔ ɔ́ ɲán like nga ɔ yoli’n i su akatua (Jue Mun 73:17-20; Galasifuɛ Mun 6:7, 8). Nanwlɛ, sa tɛ yofuɛ’m be wo atin ndrɔn su. Kɛ i blɛ’n wá jú mɔ Zoova wá sáci mɛn tɛ’n, bé tɔ́ tɛtɛ kpa.—Sa Nglo Yilɛ 21:8.