Kɛ an wun sa’m be wlɛ’n, an nian amun wun su
“Kɛ an wun sa’m be wlɛ’n, an nian amun wun su.”—2 PIƐR 1:5-8.
1. ?Ngue ti yɛ sa tɛ’m be te sɔn sran’m be su ɔ?
I NUN nga bé bó ndolo dan kpa Amlɛkɛn’m be mɛn nun lɔ kɛ, nán maan gbaflɛn nin talua’m be nɔn drɔgi kun’n, be seli be kɛ: “An se kɛ cɛcɛ.” Sɛ sran ngba kwla se kɛ cɛcɛ drɔgi nɔnlɛ nin nzanboɛ’n, ɔ nin mɛn dilɛ wafa nga ɔ ti sukusuku’n, ɔ nin aata nun ndrunmun dilɛ nun’n, ɔ nin “like nga klɔ sran i konvi sɔ i’n” be ɲrun’n, nanwlɛ, mɛn’n yó kpa (Rɔmfuɛ Mun 13:14)! ?Sanngɛ wan yɛ ɔ́ kwlá sé kɛ cɛcɛ selɛ’n, ɔ ti pɔpɔ blɛ kwlaa nun ɔn?
2. (a) ?Biblu’n nun sa mennin mun yɛ be kle e kɛ cɛcɛ n yoman’n i selɛ’n, i kekle m’ɔ ti’n, ɔ timan andɛ sa ndɛ ɔ? (b) ?Ngue like yɛ sa sɔ’m be kwla uka e naan y’a yo ɔ?
2 Kɛ mɔ klɔ sran kwlaa mɔ fɔ o i nun’n i wun su nianlɛ’n timan pɔpɔ ti’n, ɔ ti cinnjin kɛ e suan wafa nga e kwla yo naan y’a jran kekle ninnge ngba nga bé kúnndɛ fá e wlɛ́ i sa tɛ yolɛ nun’n, be ɲrun’n. Sran mɔ laa’n nun be miannin be ɲin be suli Ɲanmiɛn’n, mɔ blɛ wie nun b’a kwlá traman be awlɛn sa tɛ’n yolɛ’n i ɲrun’n, Biblu’n kan be ndɛ kle e. Maan e wla kpɛn Davidi su. Ɔ kunndɛli Bat-Seba, i wiengu i yi’n. Ayeliɛ sɔ’n ti’n, ba nga Bat-Seba wunnzɛli’n, w’a yoman kpa. Bat-Seba i wun’n kusu wuli wie. Sanngɛ nn be nɲɔn sɔ’n b’a yoman like fi (2 Samiɛl 11:1-27; 12:15-18). Akoto Pɔlu kusu seli weiin kɛ: “Sa kpa nga n klo kɛ ń yó’n, n yoman, sanngɛ sa nga n kloman kɛ ń yó’n, yɛ n yo ɔ.” Maan e bu i ndɛ nga ɔ kannin’n i angunndan (Rɔmfuɛ Mun 7:19). ?Blɛ wie nun’n, kɛ ɔ yo amun sɔ wie ɔ? Pɔlu kan gua su kɛ: ‘Ɲanmiɛn mmla’n i su falɛ’n yo n fɛ min awlɛn’n nun, sanngɛ n wun kɛ sa uflɛ o lɛ. Min nzuɛn mɔ maan n yo sa tɛ’n, ɔ nin angunndan nga mɔ maan n klo kɛ ń yó sa kpa’n, be ti kɛ sran nɲɔn mɔ be si akplowa sa, lele n fa tɛfuɛ’n su, ɔ maan n kaci sa tɛ yofuɛ mlɔnmlɔn. Eee, n ti ɲrɛnnɛnfuɛ dan! ?Wan yɛ ɔ́ tú min nzuɛn nga mɔ maan ń wú’n, i su ɔ?’ (Rɔmfuɛ Mun 7:22-24). Sa nga Biblu’n kan be ndɛ kle e’n, be wla e fanngan naan y’a kpɔnzɔman, naan y’a nian e wun su tankaan kpa.
Ɔ fata kɛ e suan e wun su nianlɛ
3. Like nga i ti yɛ e wun su nianlɛ’n i nglo yilɛ timan pɔpɔ’n, an yiyi nun.
3 E wun su nianlɛ’n, i wie yɛle kɛ nán e kplin su kɛ é yó sa tɛ. E wun su nianlɛ sɔ’n, ɔ nin Ɲanmiɛn sulafilɛ’n, ɔ nin e nzuɛn’n i kpa yolɛ’n, ɔ nin sa’m be wlɛ wunlɛ’n, ɔ nin e awlɛn tralɛ’n, ɔ nin e wun Ɲanmiɛn fa mantanlɛ’n, ɔ nin e niaan’m be kpa yolɛ’n, ɔ nin sran klolɛ’n, 2 Piɛr 1:5-7 ɔ kpanndan be kan be ndɛ likawlɛ. Kɛ bé wú e’n, e leman nzuɛn mɔ be yo ɲɛnmɛn dan sɔ’n be nun wie fi. Saan é súan be yolɛ naan b’a sɔn e nun. Sɛ e kunndɛ kɛ be ɲin fite kpa e ayeliɛ nun’n, saan é mían e ɲin dan kpa naan i sɔ’n w’a yo ye. ?I sɔ’n ti’n, kɛ mɔ nzuɛn kpa sɔ’m be nglo yilɛ timan pɔpɔ’n, e wun su nianlɛ’n yɛ ɔ́ yó pɔpɔ ɔ?
4. ?Ngue ti yɛ sran kpanngban be bu i kɛ be wun su nianlɛ’n timan be ndɛ ɔ? ?Sanngɛ like mennin yɛ i sɔ’n kle ɔ?
4 Nanwlɛ, sran kpanngban be bu i kɛ, be wun su nianlɛ’n timan be ndɛ. Kɛ bé dí mɛn bé kɔ́’n, sa nga ɔ o be klun’n yɛ be yo ɔ. Kannzɛ be ɲinfu o, kannzɛ be siman sɔ o, sanngɛ be wunnɛn mɔ fɔ o nun’n yɛ ɔ sie be ɔ. Kpɔkun, be ayeliɛ’n i bo nzuɛn nga be bɔbɔ annzɛ be wiengu’m be isa’n, ɔ timan be cinnjin (Zid 10). Andɛ yɛ e wun i wlɛ weiin tra laa’n kɛ, sran’m be kunndɛman kɛ bé sé kɛ cɛcɛ n yoman ɔn. I sɔ’n kle weiin kɛ ‘mɛn’n su kɔ i bue nuan’ kɛ nga Pɔlu dun mmua fa kannin’n sa, i waan: ‘Lika’n ɔ́ yó kekle. Afin sran’m bé bú be bɔbɔ be wun angunndan, bé yó sika klofuɛ, bé dí be nuan, bé tú be wun, bé sáci Ɲanmiɛn wun, [...] be su siman be wun su nian.’—2 Timote 3:1-3.
5. ?Ngue ti yɛ be wun su nianlɛ’n ɔ ti Zoova i Lalofuɛ’m be cinnjin ɔn? ?Yɛ afɔtuɛ mennin yɛ ɔ te yo kpa te man e ɔ?
5 Zoova i Lalofuɛ’m be si kɛ be wun su nianlɛ’n ti like cinnjin, sanngɛ be si kɛ i yolɛ’n timan pɔpɔ. Ɲanmiɛn i mmla’n i su nantilɛ mɔ be kunndɛ kɛ bé nánti naan b’a jɔ i klun’n, ɔ nin ajalɛ tɛ nga be wunnɛn mɔ fɔ o nun’n ɔ kunndɛ kɛ be fa’n, be nɲɔn’n be si akplowa. Kɛ Pɔlu sa’n, Zoova i Lalofuɛ’m be kusu be si i su ndɛ. I sɔ’n ti’n, nán andɛ sa yɛ be kunndɛ kɛ bé ɲán be ti akplowa silɛ sɔ’n nun ɔn. Afuɛ akpi kun afuɛ ya ngwlan blu nin nsiɛn (1916) nun’n, fluwa nga amun su kanngan nun lɛ’n i nun kun kannin “ajalɛ kpa nga ɔ fata kɛ e fa naan y’a nian e wun su e angunndan bulɛ’n, ɔ nin e ijɔlɛ’n, ɔ nin e ayeliɛ’n nun’n,” be ndɛ. I sɔ’n kle kɛ, ɔ fata kɛ Filipfuɛ Mun 4:8 ɔ ka e angunndan’n nun titi. Be klɛli ndɛ sɔ’n w’a di afuɛ 2000 (akpi nɲɔn) kun. Kpɔkun i su falɛ’n w’a yoman pɔpɔ blɛ nga be klɛli’n i nun annzɛ afuɛ 1916 nun, naan se kɛ andɛ yɛ ɔ́ yó pɔpɔ ɔ. Sanngɛ Ɲanmiɛn i afɔtuɛ nga ɔ o ndɛ mma sɔ nun’n, ɔ te yo kpa te man e. Sanngɛ kusu’n, Klistfuɛ’m be mian be ɲin kpa naan b’a tra be awlɛn ninnge nga mɛn’n i ɲin blo be su’n, be lika. Afin be si kɛ i sɔ yolɛ’n kle kɛ be yo be Yifuɛ’n i klun sa.
6. ?E wun su nianlɛ i kunndɛlɛ nun’n, ngue ti yɛ ɔ fataman kɛ e sa sin bubu e ɔ?
6 Galasifuɛ Mun 5:22, 23 kle kɛ ‘sa nga Ɲanmiɛn wawɛ’n maan sran yo’n,’ sa i nuan su yolɛ annzɛ be wun su nianlɛ’n, ɔ o i nun wie. Sɛ e fa ‘Ɲanmiɛn nin sran klolɛ’n, be klun m’ɔ jɔ’n, be wla ase gualɛ’n, be awlɛn tralɛ’n, sran ye yolɛ’n, aklunye yolɛ’n, nanwlɛ dilɛ’n, wɛtɛɛ yolɛ’n’ e fa nannan be wun su nianlɛ’n su’n, é ɲán su mmlusuɛ dan kpa. I sɔ yolɛ’n ɔ́ úka e maan kɛ nga Piɛli fa kannin’n sa’n, ‘e su tranman lɛ ngbɛn, yɛ like nga e yo’n ɔ́ yó ye.’ (2 Piɛ. 1:8). Sanngɛ, sɛ y’a kwlá yiman nzuɛn sɔ’n i nglo ndɛndɛ’n, annzɛ kɛ nga e kunndɛ kɛ é yí i nglo’n sa’n, ɔ fataman kɛ e sa sin bubu e, annzɛ e bu e wun fɔ. Wie liɛ’n, y’a sie i nzɔliɛ kɛ suklu’n lɔ’n, suklu ba kun suan like ndɛndɛ trɛ i wiengu mun. Annzɛ junman su lɔ’n, junman difuɛ kun suan junman uflɛ ndɛndɛ trɛ i wiengu mun. I kunngba’n kusu’n, be wie’m be yi Klistfuɛ nzuɛn’m be nglo ndɛndɛ tra be wiengu mun. Like nga ɔ ti cinnjin’n, yɛle kɛ e mian e ɲin e yi nzuɛn nga be ti Ɲanmiɛn liɛ’n, be nglo kɛ nga e kwlɛ i yo’n sa. Sɛ e di ukalɛ nga Zoova fɛ i Ndɛ’n ɔ nin asɔnun’n fa uka e’n i su kpa’n, é kwlá yó i sɔ’n. Nán like kun i yolɛ ndɛndɛ’n yɛ ɔ ti cinnjin ɔn. Sanngɛ wafa nga e mian e ɲin e yo like sɔ’n titi’n, mɔ maan be wun i kɛ e su yo kpa tra laa’n, yɛ ɔ ti cinnjin ɔn.
7. ?Ngue like yɛ ɔ kle kɛ e wun su nianlɛ’n ti cinnjin ɔn?
7 Kannzɛ bɔɔ kɛ be kan nzuɛn sɔ’m be ndɛ’n, be kan sa i nuan su yolɛ’n i ndɛ kasiɛn su, sanngɛ i sɔ’n kleman kɛ sa i nuan su yolɛ annzɛ e wun su nianlɛ’n, ɔ timan cinnjin kɛ be onga mun sa. I li bɔɔ kɛ be boli i kasiɛn su’n, yɛ ɔ kle kɛ ɔ ti cinnjin’n niɔn. Maan e fa sie e klun kɛ sɛ e si e wun su nian’n kpa’n, ‘like nga klɔ sran i konvi sɔ i’n,’ ɔ su ɲanman ta e su. Sanngɛ fɔ m’ɔ o sran’m be nun’n ti’n, be klo ‘klɔ sran i nzuɛn’n, mɔ yɛle bla nin bian kunndɛlɛ, sa tɛtɛ yolɛ, wlaka bolɛ, amuɛn sɔlɛ, bae dilɛ, sran kpɔlɛ, ɔ nin utre. Be ɲin ci be wiengu, be fa ya, be bo timan kun, be bubu be wun nun.’ (Galasifuɛ Mun 5:19, 20). I sɔ ti’n, ɔ fata kɛ e mian e ɲin dan kpa titi naan e kpɔci angunndan tɛtɛ nga be kwla ba e ti nun’n ɔ nin e awlɛn nun’n.
Be wun su nianlɛ’n ti kekle man e nun wie mun
8. ?Sa mennin ti yɛ be wun su nianlɛ’n ti kekle man sran wie mun ɔn?
8 Be wun su nianlɛ’n ti kekle kpa man Klistfuɛ wie mun tra be onga mun. ?Ngue ti yɛ ɔ ti sɔ ɔ? Wafa nga be si’n ɔ nin be nin’n be tali be’n, annzɛ sa nga be wunnin be laa’n, be kwla yo maan be wun su nianlɛ’n yo kekle man be. Sɛ e wun su nianlɛ’n i nglo yilɛ’n ɔ nin i sɔ yolɛ titi’n w’a kleman e yalɛ’n, maan e klun jɔ su. Sanngɛ, sɛ i sɔ yolɛ’n ti kekle man sran wie mun’n, naan be yo sa wie mun mɔ be yoman e fɛ’n titi’n, maan e si be aunnvuɛ. ?Wan yɛ ɔ kwla se kɛ fɔ nunmɛn i nun naan ɔ ti sran ndɛnmanfuɛ ɔ?—Rɔmfuɛ Mun 3:23; Efɛzfuɛ Mun 4:2.
9. ?Ninnge mennin mun yɛ be kle sran wie’m be yalɛ ɔ? ?Kpɔkun blɛ mennin nun yɛ bé wíe mlɔnmlɔn ɔn?
9 Maan e fa sunnzun ase kun: Wie liɛ’n, e si kɛ e niaan Klistfuɛ wie’m be laa nun be nɔnnin siklɛti annzɛ drɔgi. Ɔ maan i ti’n, blɛ wie nun be konvi kwla sɔ ninnge sɔ mun dan kpa liɛ su. Annzɛ kusu’n, wie’m be kwlá traman be awlɛn aliɛ nin nzan’n be wun. Annzɛ kusu, sran wie’m be kwlá sieman be nuan’n diin. I sɔ ti’n, be ijɔlɛ nun’n, be nuan’n fɔn ndɛndɛ kpa. Kɛ ɔ ko yo naan b’a wla ninnge sɔ’n be ase’n, ɔ fata kɛ be kplin be ɲin kpa naan b’a nian be wun su titi. ?Ngue ti ɔ? Zak 3:2 di i nanwlɛ se kɛ: ‘E kwlaa e fɔn sa sunman nun. Sran nga i nuan fitefiteman tɛtɛ’n, ɔ ti sran kpa m’ɔ kwla niɛn i wun su.’ Wie’m be konvi sɔ sika nun mma tolɛ. Annzɛ be fa ya ndɛndɛ. Ninnge sɔ mun ɔ nin uflɛ wie mun ekun be ase walalɛ’n timan pɔpɔ. I sɔ’n kwla cɛ kpa. I sɔ ti’n, kannzɛ bɔɔ e kwla yo kpa tra laa’n e wun su nianlɛ nun’n, sanngɛ, saan blɛ nga é wá yó sran kpa’n, mɔ fɔ kaan sa su tranman e nun kun’n, yɛ e konvi su kaman sa tɛtɛ’m be sin kun ɔn. Lele naan blɛ sɔ’n w’a ju’n, sɛ e mian e ɲin naan e nian e wun su titi’n, ɔ́ úka e naan y’a saman e sin sa tɛtɛ yolɛ nun ekun. Kɛ é mían e ɲin sɔ’n, maan e uka e wiengu naan i sa sin w’a bubumɛn i i ɲin mianlɛ’n nun.—Sa Nga Be Yoli’n 14:21, 22.
10. (a) ?Ngue ti yɛ be wun su nianlɛ bian nin bla nna nun’n, ɔ ti kekle kpa man sran wie mun ɔn? (b) ?Ninnge mennin mun yɛ aniaan bian kun yacili be yolɛ ɔ? (An nian bue 16 i kuku’n nun.)
10 Bian nin bla nna nun’n, be wun su nianlɛ’n ti kekle man sran wie mun. Kɛ e niɛn i sa’n, e ɲin m’ɔ o bian nin bla nna’n i sin’n, ɔ o wafa nga Ɲanmiɛn yili e’n i nun. Sanngɛ ɔ ti kekle kpa man sran wie mun kɛ be nian Ɲanmiɛn mmla’n su, naan b’a si be wun su nian bian nin bla nna nun. Wie liɛ’n, sa nga ti yɛ be kwlá nianman be wun su’n, yɛle kɛ be ɲin blo bian nin bla nna’n su ngboko. Asa ekun, mɛn nga e o nun yɛ’n i nunfuɛ’m be ɲin m’ɔ blo bian nin bla nna’n su dan’n ti, be kannvun bian nin bla klolɛ’n kɛ mme nga be kunndɛ kɛ bé tú’n sa. Kpɔkun Klistfuɛ nga be waan kɛ ɔ ko yo naan b’a ɲan be ti b’a su Ɲanmiɛn’n ti’n, bé mínndɛ kan naan b’a ja bian annzɛ bla’n, mɛn nun ninnge sɔ’m be ti’n, lika’n kwla yo kekle man be (1 Korɛntfuɛ Mun 7:32, 33, 37, 38). Ɔ maan, kɛ Ɲanmiɛn Ndɛ’n se kɛ “sɛ be ja kun’n, ɔ ti kpa tra kɛ be konvi tran bla nin bian su’n”, be kwla kpɛ i kpo be ja bla annzɛ bian. I sɔ’n ti like kpa kun m’ɔ le ɲrun ɔn. I kunngba’n kusu’n, kɛ nga Ɲanmiɛn Ndɛ’n fa kan’n sa’n, be jran su kpa naan “aja sɔ’n yo e Min’n i klun su.” (1 Korɛntfuɛ Mun 7:9, 39). E kwla lafi su kɛ Zoova klun jɔ be wun, afin be nanti i mmla’n m’ɔ ti i nuan su’n, i su. Be niaan Klistfuɛ mɔ be nin be su Ɲanmiɛn likawlɛ’n, be di aklunjuɛ. Afin be wun kɛ, be ti Ɲanmiɛn sufuɛ kpa mɔ be fɛ i mmla’n su klanman ɔn.
11. ?Wafa sɛ yɛ e kwla uka aniaan bian annzɛ aniaan bla nga be nin a jaman bla annzɛ bian’n niɔn?
11 ?Yɛ sɛ e ɲanman e klun su bian annzɛ bla nin? Nanwlɛ, sran kun m’ɔ kunndɛ kɛ ɔ́ já bla annzɛ bian’n m’ɔ ɲanman wie’n, i wla kwla bo i wun! Afin wie liɛ’n, i janvuɛ’m b’a ja bla annzɛ bian, kpɔkun be di aklunjuɛ. Sanngɛ kusu nn ɔ te o lɛ, ɔ ɲanman wie jaman. Kɛ mɔ sran wie’m be ɲanman be klun su bian annzɛ bla naan b’a ja’n ti’n, be tɔ like fiɛn wie’m be yolɛ nun. I wie yɛle kɛ, be kankan be yasua lika’n annzɛ be bla lika’n i nun ngowa naan be wun sanndi be (masturbation). Kɛ ɔ́ cɛ́ kɔ́’n, i sɔ’n kaci be ti su trɔ. Kpɔkun be wunman be wun fɛ kun. Ɔ maan i ti’n, ɔ fataman kɛ Klistfuɛ fi ɔ yo like wie m’ɔ kwla sanngan i wiengu nga ɔ su miɛn i ɲin naan w’a kunndɛman bian annzɛ bla sukusuku’n, i angunndan. Yɛle kɛ e wla kwla fi e wun kpɔkun e kan ndɛ wie m’ɔ bubu sran sa sin’n. Wie liɛ’n, e kwla usa kosan wie m’ɔ nin i fataman’n. Yɛle kɛ: ?Blɛ mennin nun yɛ á wá já bla ɔ, annzɛ bian ɔn? Wie liɛ’n e kunndɛman kɛ é wɔ́ sran sɔ’n i safle. Sanngɛ nanwlɛ, ɔ flunman kɛ e si e wun su nian naan y’a ijɔman plapla (Jue Mun 39:2)! Be nga be o e afiɛn mɔ be nin a jaman bian annzɛ bla’n, mɔ be ti saun’n, ɔ fata kɛ e tu e klun naan e yo be mo juejue su. Kɛ e kan ndɛ wie m’ɔ kwla bubu sran sa sin’n, ɔ flunman kɛ e kan ndɛ nga ɔ kwla wla sran fanngan’n. Wienun ɔn, sɛ e sran akpasua kaan kun e yia aliɛ wun, annzɛ Klistfuɛ’m b’a yia kɛ bé bó nzɛmunndɛ’n, e flɛ sran nga be nin a jaman bian annzɛ bla’n naan be trɛn i bo wie.
E wun su nianlɛ aja’n nun
12. ?Ngue ti yɛ ɔ fata kɛ be nga be o aja nun bɔbɔ’n be nian be wun su ɔ?
12 Nán kɛ y’a ja bian annzɛ bla’n, i ti yɛ e ɲin kpá e wun su nianlɛ su bian nin bla nna ndɛ nun ɔn. I wie yɛle kɛ bian nin bla nna nun’n, wafa nga bian’n nin bla’n be awlɛn o be wiengu su’n, ɔ ti fanunfanun. Annzɛ kusu blɛ wie nun’n, yasua’n annzɛ bla’n i wunnɛn’n kpɛjɛmɛn i, ɔ maan be bian nin bla nna kɛ laa’n sa’n, ɔ kwla yo kekle. Wie liɛ’n ekun, sa wie mɔ bian nin bla nna nun ɔ juli be nun kun su ti’n, afɔtuɛ nga be se kɛ: ‘Like nga yasua yo mɛn i yi ɔ ɔ ti su’n, maan ɔ yo mɛn i, maan bla’n kusu yo i sɔ mɛn i wun’n,’ i su falɛ’n kwla yo kekle man yasua wie annzɛ bla wie mun. Sa sɔ’n ti’n, ɔ fata kɛ bian’n annzɛ bla mɔ nɛ́n i yɛ sa sɔ’n ɲɛnnin i’n, ɔ niɛn i wun su kpa tra laa’n. Sanngɛ afɔtuɛ nga klolɛ su Pɔlu fa mannin Klistfuɛ nga be o aja nun’n, ɔ fataman kɛ be nɲɔn’n be wla fi su. I waan: ‘Sɛ ɔ timan kɛ amun nɲɔn’n amun bo a yo kun kɛ amún fá blɛ kaan kɛ amun nin Ɲanmiɛn amún kókó yalɛ’n, nán an kpɛ amun wun ainngba. Sɛ blɛ sɔ’n ko sin’n, an kan bo nun, sɛ w’a yoman sɔ ɔ, ɔ cɛman naan amun anwlɛn mɔ an kwlá traman’n ti, Satan a ɲan amun.’—1 Korɛntfuɛ Mun 7:3, 5.
13. ?Ngue like yɛ e kwla yo e man be nga be su mian be ɲin naan b’a kwla be wun su nian’n niɔn?
13 Sɛ bian nin bla’n be suan be wun su nianlɛ kɛ ɔ nin i fata sa’n, bé ɲán be aja’n i nun aklunjuɛ dan. Kɛ bé yó i sɔ’n kusu’n, be niaan nga be kplin be ɲin be nian be wun su sa sɔ nun’n, maan be si be aunnvuɛ. Maan e kwlaa e srɛ Zoova e man e niaan mun kɛ ɔ uka be maan be wun Ɲanmiɛn ninnge’m be wlɛ kpa, naan be ɲan fanngan, naan be nian be wun su titi. E srɛ Ɲanmiɛn man be ekun maan be fa ajalɛ nga ɔ kwla uka be’n naan b’a wla sa tɛtɛ yolɛ nga be konvi sɔ be’n be ase.—Filipfuɛ Mun 4:6, 7.
Nán maan e yaci e wiengu ukalɛ
14. ?Ngue ti yɛ ɔ fata kɛ e si e niaan’m be aunnvuɛ ɔ?
14 Wie liɛ’n, sa wie’m be nun’n, e kwla nian e wun su. Sanngɛ e niaan Klistfuɛ nga sa kunngba sɔ’n nun’n, be wun su nianlɛ’n ti kekle man be’n, e siman be aunnvuɛ. Sanngɛ sran’m be ti ngunminngunmin. Sran wie’m be liɛ’n, sa kaan sanngan be angunndan ndɛndɛ; sanngɛ sran uflɛ’m be liɛ’n, ɔ timan sɔ. Wie’m be kusu be liɛ’n, be wun su nianlɛ’n timan kekle be sa nun. Sanngɛ, maan e wla kpɛn su kɛ sran nga ɔ kplin i ɲin ɔ niɛn i wun su’n, ɔ timan sran tɛ. Ɔ maan i ti, ɔ fata kɛ e si e niaan’m be aunnvuɛ. Be nga be te kplin be ɲin naan b’a yi be wun su nianlɛ’n i nglo’n, sɛ e yaciman be aunnvuɛ silɛ’n, i sɔ’n man e aklunjuɛ. I sɔ yɛ ndɛ nga Zezi kɛnnin i Matie 5:7 nun’n, ɔ wla e fanngan kɛ e yo ɔ.
15. ?Ngue ti yɛ ndɛ nga ɔ o Jue Mun 130:3 nun’n ɔ fɔnvɔ e e wun su nianlɛ nun ɔn?
15 E kunndɛman kɛ é kplí é dí e niaan Klistfuɛ wie mɔ w’a yiman Klistfuɛ nzuɛn’n i nglo sa wie nun’n, i jɔlɛ mlɔnmlɔn. Kɛ mɔ Zoova fɛmɛn i ɲin siemɛn i blɛ nga e fɔn e wun su nianlɛ nun’n i su’n, mɔ sanngɛ i ɲin o blɛ sunman nga e nian e wun su’n i su’n ti’n, i sɔ’n wla e fanngan dan kpa. Kannzɛ bɔɔ e niaan Klistfuɛ’m b’a wunmɛn i sɔ liɛ’n nun o, sanngɛ kɛ mɔ Zoova si sɔ’n ti’n, i sɔ’n wla e fanngan. Like nga ɔ kwla fɔnvɔ e kpa’n, yɛle kɛ e fa ndɛ nga ɔ o Jue Mun 130:3 nun’n e sie i e angunndan nun. Ndɛ sɔ’n se kɛ: ‘?Zoova, sɛ ɔ waan á nían sa tɛ nga e yo’n, wan cɛ yɛ ɔ ka lɛ ɔ ɔ́ yó ye ɔ?’
16, 17. (a) ?E wun su nianlɛ nun’n, wafa sɛ yɛ e kwla nanti Galasifuɛ Mun 6:2, 5 su ɔ? (b) ?E wun su nianlɛ nun’n, ngue like yɛ é wá wún i like suanlɛ nga ɔ́ bá lɔ’n nun ɔn?
16 Kɛ ɔ ko yo naan y’a jɔ Zoova klun’n, ɔ fata kɛ e tinuntinun e nian e wun su. Sanngɛ e kwla lafi e nian Klistfuɛ’m be ukalɛ’n su wie. Kannzɛ bɔɔ ɔ fata kɛ sran kun suɛ i trɔ liɛ’n, sanngɛ be wlali e fanngan kɛ e uka e wiengu naan be jran kekle be nzuɛn tɛ nga be kle be yalɛ’n be ɲrun (Galasifuɛ Mun 6:2, 5). Sɛ e si’n annzɛ e nin’n, annzɛ kusu e yi’n annzɛ e wun’n, annzɛ kusu e janvuɛ’m be man e afɔtuɛ naan y’a tɔman sa tɛ yolɛ nun’n, maan i sɔ’n yo e cenjele like. Afin afɔtuɛ sɔ’m be kwla uka e maan e nian e wun su, e yo sa nga ɔ ti kpa’n!
17 Ninnge nga y’a suan be lele y’a ju wa yɛ’n, be kwla yo Klistfuɛ kpanngban be liɛ’n su. Sanngɛ ɔ le sa wie mun mɔ be wun kɛ ɔ fata kɛ be bɔbɔ, be nian be wun su be lika ɔ. Kpɔkun wafa nga klɔ sran mɔ fɔ o i nun’n, ɔ kwla yi be wun su nianlɛ’n i nglo ju’n lɛ’n, be kunndɛ kɛ bé yí i sɔ’n i nglo kpa jú lɛ wie. ?Ɔ ti amun liɛ su? ?Sɛ ɔ ti sɔ’n niɔn, ngue yɛ amun kwla yo naan amun a yi like sɔ m’ɔ o sa nga Ɲanmiɛn wawɛ maan sran yo’n i nun’n, i nglo ɔ? ?Kpɔkun, wafa sɛ yɛ i sɔ yolɛ’n, kwla uka amun naan amun a yo Ɲanmiɛn ninnge nga amun fa amun ɲin sie su kɛ amún yó’n niɔn? Like suanlɛ nga ɔ́ bá lɛ’n, ɔ́ wá yíyí nun.
?Amun wla kwla kpɛn su?
?Ngue ti yɛ be wun su nianlɛ’n [...]
• ɔ ti Klistfuɛ’m be cinnjin ɔn?
• ɔ ti kekle kpa man e nun wie mun ɔn?
• ɔ ti cinnjin bian nin bla jalɛ’n nun ɔn?
• ɔ ti nzuɛn kun mɔ e kwla uka e wiengu naan e kwlaa y’a yi i nglo ɔ?
[Kuku, bue 8]
Ɔ suannin i wun su nianlɛ
Zoova i Lalofuɛ kun m’ɔ tran Alemaɲi nvle nun lɔ’n, ɔ di junman televiziɔn nin aladio’m be like nga ba fa kle sran mun’n, i sua’n nun. I junman dilɛ nun’n, ɔ nian like nga televiziɔn nin aladio kɔe 30 (ablasan) be kle’n, be su. Wie liɛ’n, ninnge nga televiziɔn nin aladio’m be kle’n, yɛle kɛ flimu annzɛ ninnge uflɛ wie mɔ be kwla kpanndan be fite likawlɛ’n. Kɛ ɔ yo sɔ’n, ɔ fata kɛ ɔ fɛ i ɲin sie i sa sɔ’n su naan w’a wun kɛ sa sɔ’n fin’n i wlɛ kpa, naan w’a siesie i ye. Ɔ se kɛ: “Be kpanndan be fite likawlɛ sɔ titi. Blɛ nga ɔ ti tɛ kpa’n, yɛle kɛ blɛ nga nzaje sa’m be yolɛ’n annzɛ bian nin bla kunndɛlɛ sukusuku’n b’a jran kpa’n, yɛ sa sɔ’m be ju ɔ. Ninnge tɛtɛ sɔ’m be ka min ti nun lele ɔ di cɛn sunman annzɛ bɔɔ le mɔcuɛ sunman. Afin ɔ ti kɛ be klɛli be min ti nun sa.” Ɔ dili i nanwlɛ kɛ i sɔ’n kleli i yalɛ Ɲanmiɛn ninnge’m be nun. I waan: “Nzaje sa nga n nian be’n ti’n, min wun su nianlɛ’n yoli kekle mannin min. Bian nin bla kunndɛlɛ sukusuku nga n niannin be’n, be yoli maan ndɛnngan bali min nin min yi’n, e afiɛn. Ninnge tɛtɛ sɔ’m be ɲrun kekle jranlɛ’n, ɔ yoli kekle kpa mannin min cɛn kwlaa. Kɛ ɔ ko yo naan m’an ɲan min ti’n, kannzɛ bɔɔ n su ɲanman akatua dan junman sɔ nun’n, n boli junman uflɛ kunndɛlɛ’n i bo. Kɛ ɔ yoli sɔ’n w’a cɛman yɛ n ɲannin wie ɔ. Ɔ maan n ɲannin min klun su like.”