‘Nannan kle e sran nin Ɲanmiɛn be yalɛ kokolɛ’n’

‘I sɔnnzɔnfuɛ’m be nun kun seli i kɛ: “Nannan, kle e sran nin Nyanmiɛn be yalɛ kokolɛ’n.”’—LIK 11:1.

1. ?Ngue ti yɛ Zezi i sɔnnzɔnfuɛ’n kun seli Zezi kɛ ɔ kle i sran nin Ɲanmiɛn be yalɛ kokolɛ’n niɔn?

AFUƐ 32 nun e blɛ liɛ’n nun’n, cɛn kun Zezi i sɔnnzɔnfuɛ kun wunnin kɛ Zezi nin Ɲanmiɛn be su koko yalɛ. W’a timan ndɛ nga Zezi kan kleli i Si’n, afin atrɛkpa’n, Zezi kannin ndɛ’n i klun lɔ. Sanngɛ, kɛ Zezi kannin ndɛ kleli Ɲanmiɛn wieli cɛ’n, i sɔnnzɔnfuɛ’n seli i kɛ: ‘Nannan, kle e sran nin Ɲanmiɛn be yalɛ kokolɛ’n.’ (Lik 11:1). ?Ngue ti yɛ i sɔnnzɔnfuɛ’n seli i sɔ ɔ? Ɲanmiɛn srɛlɛ’n ti Zuifu’m be nzuɛn. Asa ekun’n, Biblu’n i akpasua nga be klɛli i Ebre aniɛn nun Jue Mun be fluwa’n nun’n, ɔ nin i lika wie’m be nun ekun’n, be diman sran nin Ɲanmiɛn be yalɛ kokolɛ ndɛ’m be yalɛ. Ɔ maan, nán kɛ sran nin Ɲanmiɛn be yalɛ kokolɛ’n ɔ ti like kun mɔ Zezi i sɔnnzɔnfuɛ’n ɔ simɛn i ɔ. Annzɛ kusu, nán kɛ i bɔbɔ’n ɔ nin Ɲanmiɛn be nin a kokoman yalɛ le ti yɛ ɔ seli kɛ be kle i i sɔ yolɛ ɔ. Titi’n, ɔ wun kɛ Zuifu’m be kpɛnngbɛn mun yɛ Ɲanmiɛn ɲrun jranfuɛ dandan’m be nin Ɲanmiɛn be koko yalɛ. Sanngɛ, ɔ wunnin kɛ Zezi nin Ɲanmiɛn be yalɛ kokolɛ liɛ’n, ɔ nin be kpɛnngbɛn mun mɔ be bu be wun sran tra sran’m be liɛ’n, ɔ timan kun.—Matie 6:5-8.

2. (a) ?Ngue yɛ ɔ kle kɛ sran nin Ɲanmiɛn be yalɛ kokolɛ ajalɛ nga Zezi kleli’n, ɔ timan like m’ɔ fata kɛ e kan e flan nun kunngunngun ɔn? (Nian kuku nun wie) (b) ?Ngue ti yɛ ɔ ti cinnjin kɛ e si wafa nga sran nin Ɲanmiɛn be koko yalɛ’n niɔn?

² Kɛ Zezi kannin Ɲanmiɛn ndɛ’n oka’n su lɔ’n, i osu’n w’a kwla di anglo 18 kun. Cɛn sɔ nun’n, ɔ kleli i sɔnnzɔnfuɛ’m be sran nin Ɲanmiɛn be yalɛ kokolɛ’n i ajalɛ kun (Matie 6:9-13). Sanngɛ atrɛkpa i blɛ sɔ nun’n, nn i sɔnnzɔnfuɛ nga ɔ seli kɛ be kle i sran nin Ɲanmiɛn be yalɛ kokolɛ’n, ɔ nunman lɛ wie. I sɔ’n ti’n,sran nin Ɲanmiɛn be yalɛ kokolɛ ajalɛ nga Zezi kleli’n, Zezi flannin i kpɔlɛ cinnjin’m be nun klolɛ su. Sanngɛ maan e sie i nzɔliɛ kɛ, Zezi w’a flanman ndɛ kunngba’n i nun ndɛ mma’m be nun sa kungunngun. I sɔ’n kle weiin kɛ, sran nin Ɲanmiɛn be yalɛ kokolɛ ajalɛ nga Zezi kleli’n, ɔ timan like m’ɔ fata kɛ be suan naan ɔ ka be ti nun naan be kan be flan nun ɔn (Lik 11:1-4). Kɛ Zezi i sɔnnzɔnfuɛ’n i liɛ’n sa’n, e kusu e kunndɛ kɛ be kle e sran nin Ɲanmiɛn be yalɛ kokolɛ’n naan y’a fa e wun y’a mantan Zoova. I sɔ’n ti’n, sran nin Ɲanmiɛn be yalɛ kokolɛ ajalɛ nga Zezi kleli i sɔnnzɔnfuɛ mun mɔ akoto Matie klɛli’n, amun e fa naan e yiyi nun kpa e nian. I nun ndɛ cinnjin’m be ti like srɛlɛ nso. Like nsan klikli’n, ɔ wɔ Ɲanmiɛn klun sa’n i trelele, kpɔkun i nnan kasiɛn’m be wɔ ninnge nga be ju e’n, ɔ nin nga be mian e sa Ɲanmiɛn ninnge’m be nun’n. Sanngɛ like suanlɛ nga nun’n, é wá yíyí like nsan klikli’n be nun.

Siɛ klofuɛ

3, 4. ?Kɛ e flɛ Zoova kɛ e “Si,” i sɔ’n kle sɛ?

³ I bo bolɛ nun’n, Zezi kleli kɛ, ɔ fata kɛ e nin Ɲanmiɛn e yalɛ kokolɛ’n ɔ yi i nglo kɛ e nin Zoova e afiɛn’n mantan kpa naan e ɲin yi i wie kpa ekun. Kɛ Zezi i sɔnnzɔnfuɛ’m be wa yiɛli i wun lɛ oka’n su lɔ’n, ɔ seli kɛ, sɛ bé srɛ́ Zoova’n, maan be se kɛ: ‘E Si mɔ a o ɲanmiɛn su lɔ’n.’ (Matie 6:9). Fluwa sifuɛ kun waan, kannzɛ Ebre aniɛn’n nun, annzɛ Arame aniɛn’n mɔ sran sunman be ti’n i nun yɛ Zezi kannin ndɛ’n, sanngɛ kɛ ɔ se kɛ e “Si,” i sɔ yɛ bakan m’ɔ klo i si’n ɔ fa flɛ i titi ɔ. Ɔ maan, kɛ e flɛ Zoova e Si’n, i sɔ’n kle kɛ e nin i e afiɛn’n mantan kpa, kpɔkun e lafi i su.

⁴ Kɛ e se kɛ “e Si” e kle ekun kɛ, e ti bla nin yasua nga be o awlobo dan kun nun mɔ be si kɛ Zoova yɛ ɔ ti be Nguan Manfuɛ’n, i nunfuɛ wie (Ezai 64:8; Sa Nga Be Yoli’n 17:24, 28). Klistfuɛ nga Ɲanmiɛn fɛli i wawɛ’n mannin be mɔ be ti ‘Ɲanmiɛn wa’n,’ be kwla ‘kpan flɛ Ɲanmiɛn kɛ: “Baba!”’ (Rɔmfuɛ Mun 8:14, 15). Yɛ sran kpanngban kpa nga be trali be janvuɛ’n, be kusu be fali be wun be mannin Zoova, kpɔkun be yoli be batɛmu. Zezi dunman nun ti’n, i sɔfuɛ mɔ be ti ‘bua’m be wie mun’n,’ be kwla fa be wun mantan Zoova, kpɔkun be flɛ i “e Si” wie (Zan 10:16; 14:6). E kwla wunnge e Si m’ɔ o nglo lɔ’n i wun, e srɛ i titi, kpɔkun e mɛnmɛn i, e lɛ i ase i klun ufue dan m’ɔ yi i nglo titi e lika’n ti. Asa ekun’n, e kwla kan e sa nga be ju e su’n, be ndɛ kle i. Afin, e si kɛ ɔ nian e lika.—Filipfuɛ Mun 4:6, 7; 1 Piɛr 5:6, 7.

Zoova dunman’n i klolɛ

5. ?Sran nin Ɲanmiɛn be yalɛ kokolɛ’n i klelɛ nun’n, ngue yɛ Zezi dun mmua srɛli ɔ? ?Yɛ ngue ti yɛ ndɛ sɔ’n, ɔ ti i su ɔ?

⁵ Zezi nin Ɲanmiɛn be yalɛ kokolɛ’n i klelɛ nun’n, like nga ɔ dun mmua srɛli’n yɛ ɔ ti ninnge kwlaa be nun cinnjin kpafuɛ’n niɔn. Ɔ seli kɛ: ‘Maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn, annzɛ maan sran’m be bo ɔ dunman fɛ.’ (Matie 6:9). Nanwlɛ, kɛ mɔ e klo Zoova i sa’n, mɔ e wun kɛ sran’m be saci i dunman’n, ɔ yo e ya kpa. Ɔ maan like nga ɔ fata kɛ ɔ yo e cinnjin kpa’n yɛle kɛ, maan sran’m be bo i dunman fɛ. Kɛ Satan jasoli Zoova wun’n, ɔ yoli maan Adam nin i yi’n be yoli ɲin kekle Zoova su. Be ayeliɛ sɔ’n sacili Ɲanmiɛn Zoova i dunman’n, kpɔkun i sɔ’n yoli maan wafa nga Zoova sie mɛn wunmuan’n, akplowa tɔli su (Bo Bolɛ 3:1-6). Kɛ ɔ fɛ i lɛ lele m’ɔ́ fá jú andɛ’n, be nga be tɔn be wun suɛn kɛ be ti Ɲanmiɛn i ja nunfuɛ’n, be fa be ɲannzuɛn sa nga be yo’n, ɔ nin be like nga be kle’n, be saci Zoova dunman.

6. ?Sɛ é srɛ́ naan e se kɛ maan be bo Zoova dunman fɛ’n, ngue yɛ ɔ fataman kɛ e yo ɔ?

⁶ Kɛ e nin Zoova é kókó yalɛ’n, e se kɛ maan sran’m be wun i wlɛ kɛ i ngunmin yɛ ɔ ti Ɲanmiɛn ɔn. Mɛn wunmuan’n i sielɛ’n i su akplowa nga w’a tɔ yɛ’n i nun’n, srɛlɛ sɔ’n kle sran nga e jin i sin’n. Yɛle kɛ, e jran Zoova sin kɛ ɔ le atin sie nglo lɔ nin asiɛ’n su ninnge’m be kwlaa. Nanwlɛ, Zoova kunndɛ kɛ sran kwlaa nga be o nglo lɔ’n ɔ nin asiɛ’n su wa’n be koto i sielɛ kpa’n i bo be klunklo su nin aklunjuɛ su. Afin be klo i sa yɛ be klo i dunman’n (1 Be Nyoliɛ 29:10-13; Jue Mun 8:1; 148:13). Zoova dunman’n i klolɛ’n ti’n, e kpalo like kwlaa nga i yolɛ’n kwla saci i dunman fɛ’n (Ezekiɛl 36:20, 21; Rɔmfuɛ Mun 2:21-24). Sɛ anzi nin sran’m bé dí alaje’n, nn b’a wun i wlɛ kɛ Zoova ngunmin yɛ ɔ ti Ɲanmiɛn’n niɔn, annzɛ nn b’a bo i dunman fɛ naan b’a koto i sielɛ’n i bo klolɛ su. I sɔ’n ti’n, kɛ é srɛ́ Zoova mɔ e se kɛ ‘maan sran’m be wun i wlɛ kɛ wɔ ngunmin yɛ a ti Ɲanmiɛn’n, annzɛ maan be bo ɔ dunman fɛ’n,’ i sɔ’n kle kɛ e lafi su kɛ Zoova ɔ́ yó i klun sa’n, naan i sɔ’n mánmán i dunman’n.—Ezekiɛl 38:23.

Sielɛ Blɛ’n nga ti yɛ e srɛ’n

7, 8. (a) ?Sielɛ Blɛ mennin yɛ Zezi seli kɛ e srɛ naan ɔ ju’n niɔn? (b) ?Ngue yɛ Daniɛli fluwa’n ɔ nin Sa Nglo Yilɛ’n fluwa’n, be kle e Sielɛ Blɛ sɔ’n su ɔ?

⁷ Sran nin Ɲanmiɛn be yalɛ kokolɛ nun’n, like nɲɔn su nga Zezi srɛli’n yɛ: ‘Maan ɔ sielɛ blɛ’n ju.’ (Matie 6:10a). Ndɛ sɔ’n, ɔ su like srɛlɛ klikli’n su trele. Like nga mɔ maan sran’m bé wá wún i wlɛ kɛ Zoova ngunmin yɛ ɔ ti Ɲanmiɛn’n, yɛle i Sielɛ Blɛ’n m’ɔ o ɲanmiɛn su lɔ’n, mɔ i Wa Zezi Klist ti i su Famiɛn’n (Jue Mun 2:1-9). Ɲanmiɛn nuan ijɔfuɛ Daniɛli kannin Sielɛ Blɛ sɔ’n i ndɛ kɛ ɔ ti ‘yɔbuɛ’ naan ɔ fin “oka su.” (Daniɛl 2:34, 35, 44, 45). Oka’n ti mɛn wunmuan’n mɔ Zoova sie’n i nzɔliɛ. Ɔ maan yɔbuɛ’n, ɔ ti mɛn wunmuan’n mɔ Zoova sie’n i nzɔliɛ uflɛ. Yɛle kɛ, yɔbuɛ’n ti Zoova i famiɛn dilɛ’n. Ɲanmiɛn nuan ijɔfuɛ’n i ndɛ nun’n, yɔbuɛ’n ‘kacili oka dan kpa kun, yɛ ɔ dili asiɛ wunmuan’n.’ I sɔ’n kle kɛ, Ɲanmiɛn i Sielɛ Blɛ’n wá síe asiɛ wunmuan’n.

⁸ Sielɛ Blɛ sɔ nun’n, sran akpiakpi ya sran akpiakpi ablanan nin nnan (144.000) mɔ ‘be kpɔli be ti sran’m be nun’n,’ be nin Klist bé dí famiɛn’n, kpɔkun bé yó Ɲanmiɛn i ɲrun jranfuɛ (Sa Nglo Yilɛ 5:9, 10; 14:1-4; 20:6). Sran sɔ mɔ bé wá úka be Min Zezi Klist, Daniɛli waan be ti ‘Ɲanmiɛn mɔ like fi nunmɛn i sin’n i nvle’n nunfuɛ mun.’ Kpɔkun bé wá fá ‘Famiɛn diwlɛ nga be o asiɛ’n su wa’n be nun famiɛn bia mun, yɛ bé fá kwlalɛ’n nin aɲrunɲan’n [...]. Ɲanmiɛn i nvle’n nunfuɛ sɔ’m be famiɛn diwlɛ’n ɔ́ trán lɛ tititi. Yɛ mɛn’n nun siefuɛ’m be kwlaa be ɲin yí i, yɛ bé sú i.’ (Daniɛl 7:13, 14, 18, 27). Sielɛ Blɛ sɔ’n yɛ Klist seli i sɔnnzɔnfuɛ’m be kɛ be srɛ naan ɔ ju’n niɔn.

?Ngue ti yɛ e te se kɛ maan Sielɛ Blɛ’n ɔ ju’n niɔn?

9. ?Ngue ti yɛ sɛ e srɛ naan e se kɛ maan Ɲanmiɛn Sielɛ Blɛ’n ɔ ju’n, ɔ ti i su ɔ?

⁹ Sran nin Ɲanmiɛn be yalɛ kokolɛ nun’n, Klist seli kɛ e srɛ naan Ɲanmiɛn Sielɛ Blɛ’n ju. Ɲanmiɛn nuan ijɔfuɛ’m be ndɛ’m be su kpɛnlɛ’n, ɔ kle kɛ afuɛ 1914 nun yɛ Ɲanmiɛn Sielɛ Blɛ’n takali Ɲanmiɛn su lɔ ɔ.a ?Sɛ ɔ ti sɔ’n niɔn, ɔ fata kɛ e srɛ ekun kɛ maan Ɲanmiɛn i Sielɛ Blɛ’n ɔ “ju”? Ɛɛn. Ɲanmiɛn nuan ijɔfuɛ Daniɛli i ndɛ’n nun’n, yɔbuɛ’n m’ɔ ti Ɲanmiɛn Sielɛ Blɛ’n i nzɔliɛ’n, ɔ wa finnin waka sran kpandangblauun kpa kun m’ɔ ti klɔ sran’m be awa’m be nzɔliɛ’n. Kpɔkun, waka sran sɔ’n i kwlaa fufuli, ɔ kacili ndutre. Sanngɛ sa sɔ’n nin a juman. Daniɛli waan: ‘Famiɛn diwlɛ’n su saciman le, yɛ mɛn uflɛ su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun, kpɔkun i bɔbɔ ɔ́ ká lɛ tititi.’—Daniɛl 2:44.

10. ?Ngue ti yɛ e ɲin ta Ɲanmiɛn ɲrun kɛ i Sielɛ Blɛ’n ɔ ju ɔ?

¹⁰ E ɲin ta Ɲanmiɛn ɲrun kɛ i Sielɛ Blɛ’n ɔ bla naan ɔ wa nunnun Satan i mɛn tɛ kain’n, ɔ nin sran kwlaa nga be tanndan Zoova i famiɛn diwlɛ’n, i ɲrun’n. I liɛ’n, sran’m bé wún i wlɛ kɛ i ngunmin yɛ ɔ ti Ɲanmiɛn’n niɔn. E srɛ Ɲanmiɛn tantrantan kpa e se kɛ: ‘Maan ɔ sielɛ blɛ’n ju.’ Kpɔkun, kɛ nga akoto Zan fa kannin’n sa’n, e se kɛ: ‘Maan ɔ yo sɔ! E Min Zezi, bla!’ (Sa Nglo Yilɛ 22:20). Ɛɛn, maan Zezi bla naan ɔ wa bo Zoova dunman fɛ naan ɔ kle kɛ Zoova yɛ ɔ sie mɛn wunmuan’n niɔn. I liɛ’n, ndɛ nga jue tofuɛ’n kannin’n, ɔ́ yó nanwlɛ. Ɔ seli kɛ: ‘Maan be si kɛ wɔ mɔ ɔ dunman’n yɛle [Zoova, NW], ɔ kunngba cɛ yɛ like fi nunman ɔ sin asiɛ wunmuan’n su ɔ.’—Jue Mun 83:19.

‘Maan ɔ klun sa’n ɔ yo’

11, 12. (a) ?Ngue ti yɛ kɛ é srɛ́ Ɲanmiɛn’n, e se kɛ ‘maan e mɔ e o asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa’n,’ niɔn? (b) ?Kɛ e srɛ Zoova kɛ maan i klun sa’n ɔ yo’n, i bo’n yɛle mennin ekun?

¹¹ I sin’n, Zezi kleli i sɔnnzɔnfuɛ’m be kɛ, sɛ be nin Ɲanmiɛn be koko yalɛ’n, maan be se kɛ: ‘Maan e mɔ e o asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’ (Matie 6:10). Zoova klo kɛ ɔ́ yí nglo lɔ nin asiɛ’n su ninnge’m be kwlaa, i ti yɛ ɔ yili be ɔ. Ɔ maan ɲanmiɛn su lɔ’n, i anzi mɔ be kwla’n, be kpan se kɛ: ‘E Min Ɲanmiɛn, kɛ bé yí wɔ ayɛ bé mánmán wɔ mɔ be se kɛ a kwla sa’n kwlaa yo’n i su ɔ, afin wɔ yɛ a yili like’n kwlaa ɔ, a klo kɛ á yí be ti yɛ a yili be ɔ, yɛ ɔ ti yɛ be o lɛ ɔ.’ (Sa Nglo Yilɛ 4:11). Sa kun ti yɛ Zoova maan ‘asiɛ’n su like’n kwlaa nin ɲanmiɛn su lɔ liɛ’n kwlaa’ be o lɛ ɔ (Efɛzfuɛ Mun 1:8-10). I sɔ’n ti’n, sɛ é srɛ́ naan e se kɛ maan Ɲanmiɛn i klun sa’n ɔ yo’n, nn e su se Zoova kɛ ɔ yo i klun sa’n. Asa ekun’n, i sɔ’n kle kɛ, e ɲin ta Ɲanmiɛn ɲrun kpa kɛ i klun sa’n ɔ́ yó nglo lɔ nin asiɛ wunmuan’n su.

¹² Kɛ e srɛ Ɲanmiɛn kɛ ngalɛ’n sa’n, i sɔ’n kle kɛ e bɔbɔ e mian e ɲin e yo Zoova i klun sa’n e nannan su. Zezi seli kɛ: “Min aliɛ’n yɛle sran ng’ɔ sunmannin min’n i klun sa’n yolɛ nin junman ng’ɔ mannin min’n i bo guagualɛ.” (Zan 4:34). Kɛ Zezi sa’n, e fali e wun mannin Ɲanmiɛn, kpɔkun e kacili Klistfuɛ. I sɔ’n ti’n, Ɲanmiɛn i klun sa yolɛ’n ti e awlɛn su like kpa. Zoova nin i Wa’n mɔ e klo be sa’n ti’n, e ‘yo Ɲanmiɛn klun sa, e yoman klɔ sran klun sa kun.’ (1 Piɛr 4:1, 2; 2 Korɛntfuɛ Mun 5:14, 15). E kpalo ninnge nga be nin Zoova klun sa’n be kɔman likawlɛ’n (1 Tɛsalonikfuɛ Mun 4:3-5). Kɛ mɔ e fa blɛ e kanngan Biblu’n nun, kpɔkun e suan i nun like’n ti’n, e ‘si like nga Zoova klo kɛ e yo’n.’ I wie yɛle kɛ é ‘kán Ɲanmiɛn sielɛ’n i jasin fɛ’n,’ i juejue su.—Efɛzfuɛ Mun 5:15-17; Matie 24:14.

Zoova i klun sa yolɛ’n ɲanmiɛn su lɔ

13. ?Lele naan Satan w’a yo ɲin kekle’n, wafa sɛ yɛ be yoli Ɲanmiɛn i klun sa’n ɲanmiɛn su lɔ titi ɔ?

¹³ Be yoli Zoova i klun sa’n ɲanmiɛn su lɔ titi lele naan anzi’m be nun kun w’a yo ɲin kekle naan i sɔ’n ti b’a flɛ i Satan. Kɛ Ɲanndra Mun be fluwa’n kán Ɲanmiɛn i Wa klikli’n i ndɛ’n, ɔ kɛn i ndɛ ɲanndra nun kɛ angunndan’n ɔ ti kɛ sran sa. Ɔ kle kɛ, ɔ fin lalaa kpa nun’n, Ɲanmiɛn i Wa kunngba cɛ’n ‘ngowa yɛ ɔ kɛn i sa mlɔnmlɔn [i klun jɔ, NW], afin i Si’n i klun sa yolɛ’n jɔ i klun. Atrɛkpa kɛ ɔ o Zoova wun lɛ’n, ‘i sa’n o junman’n su,’ ‘ninnge’n mɔ be o ɲanmiɛn su lɔ nin asiɛ’n su wa’n be kwlaa’ be yilɛ’n nun (Nyanndra Mun 8:22-31; Kolɔsfuɛ Mun 1:15-17). Ɔ yoli Zoova i Ndɛ’n, annzɛ Zoova i nuan ijɔfuɛ.—Zan 1:1-3.

14. ?Wafa nga anzi’m be yo Zoova i klun sa’n Ɲanmiɛn su lɔ’n, i su like mennin yɛ Jue Mun 103 ɔ kle e ɔ?

¹⁴ Jue tofuɛ’n kle weiin kɛ Zoova sie ninnge kwlaa naan anzi kpanngban kpa’m be fɛ i aniɛn’n su. I waan: ‘Anannganman takali i famiɛn bia’n ɲanmiɛn su lɔ, ɔ sie ninnge’n kwlaa. Anzi mun, amun mɔ an kplin amun ɲin be yo i nuan ndɛ’n i su sa’n, mɔ amun fɛ i aniɛn’n su’n, amun la Anannganman i ase. Anzi mun, amun mɔ amun ti i sufuɛ mun’n, mɔ an yo i klun sa’n, an lɛ i ase. Sɛ ń kwlá sé’n, amun kwlaa mɔ amun ti i sa nuan ninnge mɔ amun o lika’n kwlaa nun’n [m’ɔ sie amun’n], an lɛ i ase.’—Jue Mun 103:19-22.

15. ?Wafa sɛ yɛ Sielɛ mɔ Zezi ɲɛnnin i’n ɔ ɲannin ta Zoova i klun sa yolɛ’n su ɲanmiɛn su lɔ ɔ?

¹⁵ Zɔbu i fluwa’n kle kɛ, kɛ Satan yoli ɲin kekle bɔbɔ’n, ɔ kali ɲanmiɛn su lɔ (Zɔb 1:6-12; 2:1-7). Sanngɛ, Sa Nglo Yilɛ fluwa’n waan blɛ kun wá jú naan bé kán Satan nin i mmusu’m be bo. Blɛ sɔ’n ɔ kwla juli afuɛ akpi kun ya ngwlan afuɛ blu nin nnan (1914) nun, kɛ Ɲanmiɛn fali Sielɛ’n mannin Zezi’n. Kɛ ɔ fin lɛ’n, ɲin keklefuɛ sɔ’m b’a ɲanman tranwlɛ ɲanmiɛn su lɔ kun. Be bali asiɛ’n i wun wa (Sa Nglo Yilɛ 12:7-12). Sran fi kwlá siman Zoova i sielɛ’n i su akplowa ɲanmiɛn su lɔ kun. Sanngɛ siɛn’n, sran nga be ti be nɛn’n ɲanmiɛn su lɔ’n, be nuan’n ti kun be manman Zoova nin Zezi Klist m’ɔ ti ‘bua gbaflɛn’n.’ (Sa Nglo Yilɛ 4:9-11). Zoova i klun sa’n yɛ be yo i ɲanmiɛn su lɔ siɛn’n niɔn.

Zoova i klun sa asiɛ’n i lika’n

16. ?Wafa sɛ yɛ mɛn’n nun’n, be nga be tɔn be wun suɛn kɛ be ti Klistfuɛ’n, be asɔnun’m be like nga be kle mɔ sran’m be wla osu kɛ bé ɲɛ́n i’n, ɔ nin srɛlɛ nga e srɛ Ɲanmiɛn’n ɔ kɔman likawlɛ ɔ?

¹⁶ Mɛn’n nun’n, be nga be tɔn be wun suɛn kɛ be ti Klistfuɛ’n, be asɔnun’m be kanman ninnge nga Ɲanmiɛn wá yó be asiɛ’n su’n, be ndɛ. Afin be liɛ’n, be waan sran kpa’m be kwlaa bé kɔ́ ɲanmiɛn su. Sanngɛ nn Zezi seli kɛ, kɛ é srɛ́’n, e se kɛ: ‘Maan ɔ sielɛ blɛ’n ju, maan e mɔ e wo asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’ (Matie 6:10). ?Kɛ e nian sa kekleekle nga be yo be asiɛ’n su dɔ nga su’n, ɔ nin sran lufle bulɛ’n, ɔ nin tukpaciɛ nin wie’n, e kwla se bɔbɔ kaan sa kɛ Zoova i klun sa’n ɔ yo asiɛ’n su? E kwlá seman sɔ mlɔnmlɔn! Sanngɛ, srɛlɛ m’ɔ fata kɛ e srɛ’n yɛle kɛ, maan Ɲanmiɛn i klun sa’n ɔ yo asiɛ’n su kɛ like nga ɔ́ wá yó mɔ akoto Piɛli kɛnnin i ndɛ’n sa’n. I waan: ‘Ɲanmiɛn seli kɛ ɔ́ mán e ɲanmiɛn su lɔ [Klist i Sielɛ Blɛ’n] nin asiɛ uflɛ [sran kpa mun], lɔ yɛ be nga be yo sa kpa’n bé trán ɔn. I yɛ e su minndɛ i ɔ.’—2 Piɛr 3:13.

17. ?Sa nga ti yɛ Zoova yili asiɛ’n yɛle mennin?

¹⁷ Sa kun ti yɛ Zoova yili asiɛ’n niɔn. I nuan ijɔfuɛ Ezai waan: ‘[Zoova, NW] yili nglo’n. Ɔ siesieli asiɛ’n i wafa’n, kpɔkun yɛ ɔ yili ɔ, yɛ ɔ maan ɔ yoli cinnjinnjin ɔn. W’a yimɛn i ngbɛn, ɔ yili i kɛ be tran su. Ndɛ nga ɔ kan’n yɛ: “Min yɛ n ti [Zoova, NW] ɔ, uflɛ fi nunman n sin.”’ (Ezai 45:18). Ɲanmiɛn sieli klɔ sran klikli’n ɔ nin i yi’n asiɛ’n i lika klanman kun su, kpɔkun ɔ seli be kɛ: “An trɛ, yɛ an sɔn kpa, an yi asiɛ’n, an sie i.” (Bo Bolɛ 1:27, 28; 2:15). Nanwlɛ, sa nga ti yɛ Zoova m’ɔ ti like Yifuɛ’n ɔ yili asiɛ’n, yɛle kɛ sran kpa mɔ fɔ nunman be nun’n, mɔ be klunklo su be koto i sielɛ’n i bo’n, be yi asiɛ’n m’ɔ́ wá yó lika klanman’n, naan be tran nun titi kɛ nga Klist fa kannin’n sa.—Jue Mun 37:11, 29; Lik 23:43.

18, 19. (a) ?Ngue yɛ ɔ fata kɛ ɔ ju kwlaa ka naan Ɲanmiɛn klun sa’n w’a yo asiɛ’n su wa ɔ? (b) ?Like suanlɛ nga ɔ́ bá lɛ nun’n, Zezi i Ɲanmiɛn srɛlɛ ajalɛ’n i nun kpɔlɛ mennin mun yɛ é wá yíyí nun ɔn?

¹⁸ Sɛ yasua nin bla nga be tanndan Zoova i sielɛ’n i ɲrun’n be te o lɛ’n, Zoova klun sa’n su yoman asiɛ’n su le. I sɔ’n ti’n, Ɲanmiɛn wá súnmɛn i anzi kwlafuɛ mun, Klist dún mmua be ɲrun kpɔkun bé “núnnún be nga be saci asiɛ’n.” Satan i mɛn tɛ’n, ɔ nin Ɲanmiɛn sulɛ wafa tɛtɛ mun, ɔ nin politiki nun ndrunmun difuɛ mun, ɔ nin aata difuɛ dandan nin sika klofuɛ mun, yɛ alɛ kunlɛ ninnge dandan mun, be kwlaa bé núnnún mlɔnmlɔnmlɔn (Sa Nglo Yilɛ 11:18; 18:21; 19:1, 2, 11-18). Kɛ ɔ ko yo sɔ’n, sran’m bé sí kɛ Zoova yɛ ɔ sie mɛn wunmuan’n niɔn. Kpɔkun, bé bó i dunman fɛ. I sɔ ngalɛ’n kwlaa ti yɛ kɛ é srɛ́ Ɲanmiɛn’n, e se kɛ: ‘E Si mɔ a o ɲanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn, annzɛ maan be bo ɔ dunman fɛ. Maan ɔ sielɛ blɛ’n ju, maan e mɔ e o asiɛ’n su wa’n e yo ɔ klun sa’n kɛ be mɔ be o ɲanmiɛn su lɔ’n be yo’n sa’n’ niɔn.—Matie 6:9, 10.

¹⁹ Sanngɛ Zezi i Ɲanmiɛn srɛlɛ ajalɛ nun’n, ɔ kleli kɛ e kwla srɛ e bɔbɔ e ninnge liɛ’m be ti wie. Like suanlɛ nga ɔ́ bá lɛ nun’n, é wá kán ninnge sɔ’m be ndɛ.

[Ja ngua lɛ ndɛ’n]

I nun flanlɛ

• ?Ngue ti yɛ kɛ é kán ndɛ é klé Zoova mɔ e se kɛ “e Si,” ɔ ti i su ɔ?

• ?Ngue ti yɛ ɔ ti cinnjin kpa kɛ, kɛ é srɛ́ Ɲanmiɛn e se kɛ maan be bo Zoova dunman fɛ’n niɔn?

• ?Ngue ti yɛ kɛ é srɛ́ Ɲanmiɛn’n, e se kɛ maan Ɲanmiɛn Sielɛ Blɛ’n ju’n niɔn?

• ?Kɛ é srɛ́ Ɲanmiɛn mɔ e se kɛ maan e mɔ e wo asiɛ’n su wa’n e yo i klun sa kɛ be mɔ be o ɲanmiɛn su lɔ’n be yo’n sa’n, i bo’n yɛle mennin?