Maan e jran kekle angunndan nga sran’m be bu’n i ɲrun
‘E liɛ’n, angunndan nga sran’m be bu’n, nɛ́n i wie yɛ Ɲanmiɛn maan e bu ɔ, sanngɛ Ɲanmiɛn fɛ i wawɛ’n mannin e.’—1 KORƐNTFUƐ MUN 2:12.
1. ?Wafa sɛ yɛ be lakali Ɛvu be ɲɛnnin i ɔ?
KƐ ƐVU m’ɔ ti bla klikli’n ɔ́ kán sa nga ti yɛ ɔ yoli ɲin kekle Zoova su i ndɛ’n, ɔ seli kɛ: ‘Wuo yɛ ɔ lakali min ɔn.’ (Bo Bolɛ 3:13). Kannzɛ bɔbɔ ndɛ sɔ mɔ Ɛvu kannin’n ti nanwlɛ’n, sanngɛ i sɔ’n mɛnmɛn i atin kɛ ɔ yo sa tɛ. Ɲanmiɛn maan akoto Pɔlu seli kɛ: ‘Ɛvu yɛ be lɛkɛli i ɔ.’ (1 Timote 2:14). Be lakali Ɛvu be ɲɛnnin i, afin kɛ ɔ́ dí waka mma nga Ɲanmiɛn seli kɛ nán be di’n, ɔ buli i kɛ ɔ́ ɲán i ɲin kekle yolɛ’n i su mmlusuɛ naan ɔ́ yó kɛ Ɲanmiɛn sa. Sran ng’ɔ yoli mɔ maan Ɛvu yoli sa tɛ’n, Ɛvu w’a wunman sran sɔ’n i wlɛ. I lɛ nun’n, be lɛkɛli i ekun. Afin, Ɛvu w’a siman kɛ mmusu’m be si Satan yɛ ɔ fiali wuo’n i sin yɛ ɔ kan ndɛ’n kleli i ɔ.—Bo Bolɛ 3:1-6.
2. (a) ?Ngue yɛ Satan te fa fia sran’m be wun ɔn? (b) ?Ngue yɛle ‘angunndan nga sran’m be bu’n?’ ?Yɛ kosan mennin yɛ é wá tɛ́ be su ɔ?
2 Kɛ ɔ fɛ i Adam nin Ɛvu be blɛ su lele m’ɔ́ fá jú andɛ’n, Satan te laka sran mun. I yɛ ɔ ‘laka mɛn wunmuan nunfuɛ’m be kwlaa’n niɔn.’ (Sa Nglo Yilɛ 12:9). Ajalɛ kunngba’n yɛ ɔ te fa te laka sran mun ɔn. Kannzɛ ɔ fiaman wuo sin kun naan w’a laka sran mun’n, sanngɛ i sran’n i wafa ng’ɔ ti’n, ɔ te fia su sran’m be ɲrun. Be ɲin su yiyilɛ nun’n, ɔ nin aladio nin televiziɔn nun, yɛ zronali nin ninnge wie mun ekun be nun’n, Satan laka sran mun. Yɛle kɛ ɔ yo maan be bu i kɛ mmlusuɛ fi nunman Ɲanmiɛn i sran sielɛ klolɛ su’n i nun, annzɛ kusu ɔ yo maan be bu i kɛ ɔ timan cinnjin kɛ Ɲanmiɛn sie be. Mmusu’m be si Satan i sran lakalɛ’n ti’n, lika kwlaa nun’n, sran’m be buman Biblu’n nun mmla’m be su falɛ’n i like fi kun; kpalolɛ yɛ be kpalo i ɔ. Biblu’n flɛ i sɔ liɛ’n kɛ: ‘Angunndan nga sran’m be bu’n.’ (1 Korɛntfuɛ Mun 2:12). Angunndan sɔ’n, ɔ sie be nga be siman Ɲanmiɛn kpa’n. ?Wafa sɛ yɛ be yi angunndan sɔ’n i nglo ɔ? ?Yɛ wafa sɛ yɛ e kwla jran kekle naan y’a buman i sɔ angunndan’n wie ɔ? Kosan sɔ mun yɛ é wá tɛ́ be su ɔ.
Sran’m be ayeliɛ’n su yo tɛ dan
3. ?Ngue ti yɛ angunndan nga sran’m be bu’n, be yi i nglo weiin kpa liɛ su e blɛ liɛ’n nun ɔn?
3 E blɛ liɛ nga nun’n, angunndan nga sran’m be bu’n, be yi i nglo weiin kpa liɛ su (2 Timote 3:1-5). Atrɛkpa’n, amun sieli i nzɔliɛ kɛ sran’m be ayeliɛ’n su yo tɛ dan. Sa nga ti yɛ ɔ ti sɔ’n, Biblu’n yiyi nun weiin. Yɛle kɛ, kɛ afuɛ 1914 nun Ɲanmiɛn Sielɛ Blɛ’n takali’n, alɛ tɔli ɲanmiɛn su lɔ. Satan nin i anzi’m b’a ɲanman jranwlɛ, yɛ be kannin be bo guali be asiɛ’n su wa. Kɛ mɔ ya su yɛ Satan bali’n ti’n, ɔ wlɛ i wun ase kpa ɔ laka mɛn wunmuan nunfuɛ’m be kwlaa (Sa Nglo Yilɛ 12:1-9, 12, 17). Ajalɛ kwlaa nga ɔ kwla fa naan w’a laka sran mun’n, yɛ ɔ fa naan ‘be nga Ɲanmiɛn fali be’n sɛ ɔ laka be ɔ ɔ yo ye’n, ɔ́ láka be.’ (Matie 24:24). E mɔ e ti Ɲanmiɛn i sufuɛ’n, e yɛ i ɲin ci e kpa’n niɔn. Ɔ maan, like kwlaa nga ɔ kwla yo naan e nin Zoova e afiɛn’n w’a saci naan y’a ɲanman anannganman nguan’n, yɛ ɔ wlɛ i wun ase yo ɔ.
4. ?Zoova i sufuɛ’m be bu Biblu’n i sɛ? ?Yɛ mɛn’n nunfuɛ’m be kusu be bu i sɛ?
4 Biblu’n ti fluwa nanndoliɛ, afin ɔ kle e Bofuɛ’n m’ɔ ti sran klofuɛ’n i su like. Sanngɛ, Satan yo maan sran’m be kan e Bofuɛ sɔ’n i wun ndɛ tɛ. Zoova i sufuɛ’m be liɛ’n, be klo Biblu’n kpɔkun ɔ ti be aɲanbeun like. Be si kɛ Biblu’n ti Ɲanmiɛn Ndɛ’n, naan ɔ timan sran nuan ndɛ (1 Tɛsalonikfuɛ Mun 2:13; 2 Timote 3:16). Sanngɛ, Satan i mɛn’n i nunfuɛ’m be kunndɛ kɛ e bu angunndan uflɛ Biblu’n i lika. I wie yɛle kɛ, fluwa kun m’ɔ kan Biblu’n i wun ndɛ tɛ’n i su fitilɛ’n seli kɛ: “Biblu’n ‘fiman’ Ɲanmiɛn, i kpa’n bɔbɔ’n, ɔ timan ‘Ɲanmiɛn Ndɛ’n.’ Nán Ɲanmiɛn yɛ maan be klɛli ɔ, sanngɛ Ɲanmiɛn ɲrun jranfuɛ mun mɔ be kunndɛ kɛ bé síe sran’n, be yɛ be klɛli ɔ.” Be nga be fɛ i sɔ ndɛ liɛ’n su’n, be kwla mlin ndɛndɛ kpa. Afin be kwla bu i kɛ be le atin be su Ɲanmiɛn wafa nga ɔ ti be liɛ’n su’n, annzɛ kusu be sumɛn i mlɔnmlɔn.—Nyanndra Mun 14:12.
5. (a) ?Ɲanmiɛn sulɛ’n i su ndɛ mennin yɛ fluwa klɛfuɛ kun kannin ɔn? (b) ?Ndɛ mennin yɛ mɛn’n nunfuɛ’m be kan m’ɔ nin nga Biblu’n kan’n be timan kun ɔn? (An nian kuku’n nun.)
5 Biblu’n mɔ be kɛn i ndɛ tɛ trele annzɛ nvialiɛ nun’n, ɔ nin sa tɛ nga be nga be tɔn be wun suɛn kɛ be ti Klistfuɛ’n be yo’n i ti’n, sran’m be buman Ɲanmiɛn sulɛ bɔbɔ ba sa’n, ɔ nin asɔnun’n i like kpa kun. Aladio nin televiziɔn nin zronali’m be nun’n, fluwa sifuɛ dandan’m be kan Ɲanmiɛn sulɛ’n i wun ndɛ tɛ. Fluwa klɛfuɛ kun seli kɛ: “Sran’m be nun sunman be buman Zuifu’m be Ɲanmiɛn sulɛ’n, ɔ nin Klistfuɛ’m be liɛ’n, i like fi. Sɛ be waan b’a bu be like dan o, yɛle kɛ be ɲin su yiyilɛ like sa. Sɛ ɔ timɛn i sɔ’n ti’n, be bu i kɛ Ɲanmiɛn sulɛ’n ti lalafuɛ like, naan ɔ tanndan sran’m be ngwlɛlɛ silɛ’n ɔ nin be sa silɛ’n i ɲrun. Le nɲɔn nga nun yɛ sran’m be yi i sɔ aɲinciɛ liɛ’n i nglo kpa liɛ su ɔ.” Titi’n, be nga be waan Ɲanmiɛn nunman lɛ mɔ ‘angunndan nga be bu’n i kwlaa’n yoli ngbɛn’n,’ be yɛ be yi aɲinciɛ sɔ’n i nglo ɔ.—Rɔmfuɛ Mun 1:20-22.
6. ?Wafa sɛ yɛ mɛn’n nunfuɛ’m be bu bla nin bian kunndɛlɛ nga Biblu’n bu i fɔ’n niɔn?
6 Kɛ ɔ́ kɔ́ i ɲrun mɔ sran’m be faman Ɲanmiɛn ndɛ’n su kun’n, i sɔ’n boman e nuan. Afin, Biblu’n se kɛ yasua ng’ɔ kunndɛ i wiengu yasua’n, annzɛ bla ng’ɔ kunndɛ i wiengu bla’n, i sɔ’n ɔ ‘timɛn i su mlɔnmlɔn.’ (Rɔmfuɛ Mun 1:26, 27). Ɔ se ekun kɛ be nga be kunndɛ bla annzɛ bian’n, yɛ be nga be kunndɛ bla be yi bo annzɛ bian be wun bo’n, Ɲanmiɛn su sieman be mlɔnmlɔn (1 Korɛntfuɛ Mun 6:9). Sanngɛ nvle sunman be nun’n, sran’m be buman kɛ sa sukusuku sɔ’m be ti like tɛ. I li bɔbɔ, fluwa’m be nun nin jue nga be to’n be nun’n, be blɔ sa sukusuku sɔ mun kɛ like kpa wie sa. Kpɔkun be yi be nglo televiziɔn nun. Be nga be bu sa sukusuku sɔ’m be fɔ’n, sran’m be ɲin ci be. Afin, be waan i sɔfuɛ’m be timan kpa, naan be klo be wiengu fɔ bulɛ ngboko. I li bɔbɔ i sɔfuɛ mun’n, be bu be ekun kɛ be siman sa naan be bu lalafuɛ angunndan. Kɛ ɔ yo naan sran’m be wun Biblu’n nun afɔtuɛ’m be kɛ be ti be bɔbɔ be kpa yolɛ like’n, mɛn nunfuɛ’m be liɛ’n, be waan Biblu’n tanndan be ɲrun naan be kwlá yoman be like nga be klo’n.—Nyanndra Mun 17:15; Zid 4.
7. ?Kosan mennin mun yɛ ɔ fata kɛ e fa usa e bɔbɔ e wun ɔn?
7 Mɛn nga Ɲanmiɛn i kpɔfuɛ’m be su sɔn nun yɛ nun’n, ngwlɛlɛ like yɛle kɛ e nian e bɔbɔ e nzuɛn’n i kpa yolɛ’n i kpa. Kɛ ɔ ko yo naan blɛblɛblɛ y’a to a fuanman atin nga Ɲanmiɛn kleli e’n ti’n, maan e srɛ Ɲanmiɛn titi kpɔkun e bu e ayeliɛ’n i su angunndan e nian. Wie liɛ’n e kwla usa e wun kɛ: ‘?Sa nga be timan’n kpa mɔ n yacili be yolɛ w’a cɛ kpa’n, n su sa min sin ń kló be yolɛ ekun? ?Ayeliɛ nga Ɲanmiɛn bu be fɔ’n, be timan tɛ dan min ɲrun kun? ?Ɲanmiɛn ninnge mɔ laa be yoli min cinnjin kpa’n, min ɲin su kpa be su siɛn’n? ?Ajalɛ nga n fa’n, ɔ kle kɛ n dun mmua fa min wun man Ɲanmiɛn maan ɔ sie min?’ (Matie 6:33). I sɔ yolɛ’n, ɔ́ úka e naan y’a kwla jran kekle angunndan nga sran’m be bu’n i ɲrun naan y’a bumɛn i sɔ angunndan’n wie.
‘Nán e to fuan atin’n’
8. ?Kɛ be to fuan Zoova i atin’n, i bo’n gua sɛ?
8 Akoto Pɔlu seli i niaan Klistfuɛ’m be kɛ: ‘Maan e fa ndɛ nga e tili be’n sie e klun kpa tra laa’n, sɛ y’a yoman sɔ ɔ, ɔ cɛman naan y’a to a fuan atin’n.’ (Ebre Mun 2:1). Mmeli nga ɔ to fuan atin’n, ɔ juman kan ɔ su kɔ’n. Sɛ mmeli i kanfuɛ’n i ɲin kpa lika nga aunmuan’n fita kɔ’n i su’n, ɔ kwla to fuan atin’n ɔ ko tu si cenje wie i ndɛndɛ kpa, kpɔkun mmeli’n kwla utu. I sɔ kunngba’n, sɛ e ɲin kpa Ɲanmiɛn Ndɛ nanwlɛ m’ɔ ti nanndoliɛ like’n i su’n, e kwla to fuan atin nga Zoova kleli e’n i ndɛndɛ kpa. Kpɔkun e su lafiman Ɲanmiɛn su kpa kun. Lele mɔ é fá yó sɔ’n, nán kɛ wie liɛ é ká lɛ é yáci nanwlɛ’n i su falɛ ti ɔ. Afin i lɛ nun’n, sran sunman be yaciman Zoova sulɛ le kunngba. Sanngɛ wie liɛ’n, be mannin ninnge wie’m be atin maan be fali be angunndan’n i blɛblɛblɛ, kpɔkun be ɲin w’a tranman Ɲanmiɛn Ndɛ’n su kun. I sɔ mɔ be wunmɛn i wlɛ ndɛndɛ’n, ɔ fa be yi sa tɛ yolɛ’n nun. Kɛ mmeli kanfuɛ wie mɔ lafilɛ’n w’a ti i’n sa’n, kɛ bé sé kɛ sran sɔ’m b’a tinnge o, nn lika’n w’a saci lalaa w’a wie.
9. ?Ngue nun yɛ Zoova yrali Salomɔn su dan ɔn?
9 Amun e fa e ɲin sie Salomɔn i mɛn dilɛ’n su e nian. Zoova sieli i famiɛn Izraɛli su. Zoova yoli maan Salomɔn kplannin Ɲanmiɛn sulɛ sua, kpɔkun ɔ klɛli Biblu’n i nun fluwa’n wie mun. Zoova fiteli Salomɔn kpɛ nɲɔn, kpɔkun ɔ mɛnnin i aɲanbeun ninnge kpanngban, i dunman’n fuli, yɛ i famiɛn dilɛ’n yoli fɔuun. Ɔ nin i sɔ ngba’n, Zoova mannin Salomɔn ngwlɛlɛ dan. Biblu’n waan: ‘Ɲanmiɛn mannin Salomɔn ngwlɛlɛ dan, ɔ nin sa silɛ dan kpa. Like ng’ɔ kannin be su ndɛ’n be sɔnnin kpa kɛ jenvie nuan aunɲan sa. Salomɔn i ngwlɛlɛ liɛ’n ɔ tra wia afinliɛ lɔfuɛ mun, ɔ nin Ezipti lɔfuɛ’m be kwlakwla be liɛ’n.’ (1 Famiɛn Mun 5: 1, 9, 10; 11:9). Nanwlɛ, sran m’ɔ fata kɛ ɔ su Ɲanmiɛn titi’n, yɛle Salomɔn. Sanngɛ, ɔ to fuannin atin’n. ?Ngue ti ɔ?
10. ?Mmla mennin yɛ Salomɔn w’a faman su ɔ? ?Yɛ i bo’n guali sɛ?
10 Salomɔn si Ɲanmiɛn Mmla’n yɛ ɔ wun i wlɛ weiin kpa. Mmla nga be fa mannin Izraɛli lɔ famiɛn mun kɛ be fa su’n, atrɛkpa be yoli Salomɔn i cinnjin kpa. Mmla sɔ’m be nun kun se kɛ: “Nán [famiɛn’n] ɔ ja bla kaka naan i ti nun saci.” (Mmla’n 17:14, 17). Ɔ nin i sɔ ngba’n, Salomɔn jali bla ya nso, kpɔkun ɔ boli soman ya nsan. I bo bla kaka sɔ’m be ti nvle uflɛ nun bla mun, kpɔkun be sɔ amuɛn. E siman sa nga ti yɛ Salomɔn jali bla kaka sɔ mun’n, ɔ nin ndɛ nga ɔ kannin fa yiyili i ayeliɛ sɔ nun’n. Like nga e si i’n yɛle kɛ, w’a faman Ɲanmiɛn i mmla’n su. Like nga Zoova kunndɛman kɛ ɔ ju mɔ i ti yɛ ɔ mannin mmla’n, yɛ ɔ juli ɔ. E kɛnngɛn i Biblu’n nun kɛ: ‘Be kwlakwla sɔ’m be kacili [Salomɔn] i awlɛn’n [...]. Be cuɛnnin i kɛ ɔ ko sɔ ninnge mun.’ (1 Famiɛn Mun 11:3, 4). Blɛblɛblɛ, w’a nantiman Ɲanmiɛn i ngwlɛlɛ liɛ’n su kun. Ɔ maan ɔ to fuannin atin’n. Kɛ ɔ́ kɔ́ i ɲrun’n, Salomɔn kloli i yi’m be klun sa yolɛ’n trali Ɲanmiɛn liɛ’n. ?Nán mlinlɛ yɛ Salomɔn m’ɔ dun mmua klɛli afɔtuɛ kpa kun’n, ɔ mlinnin mlɔnmlɔn lɛ? Afin, ɔ seli kɛ: ‘Min wa, fa angunndan nanti. Sɛ a fa angunndan nanti’n, n klun jɔ́. I liɛ’n, sɛ sran kan min wun ndɛ’n, ń kwlá sɔ́ su.’—Nyanndra Mun 27:11.
Angunndan nga sran’m be bu’n i ta’n ti dan
11. ?Wafa sɛ yɛ like nga e fa e ɲin sie su’n ɔ ɲan ta e angunndan’n su ɔ?
11 Sa sɔ m’ɔ juli Salomɔn su’n ɔ kle e kɛ, sɛ e se e wun kɛ, kɛ mɔ e si nanwlɛ ndɛ ti’n mɛn nun ninnge’m be kwlá ɲanman ta e angunndan’n su’n, i sɔ’n ti tɛ kpa. Wafa kunngba nga aliɛ nga e di’n ɔ ɲan ta e wunnɛn’n nun’n, like nga e fa e ɲin sie su’n be ti kɛ “aliɛ” sa wie, kpɔkun be ɲan ta e angunndan’n ɔ nin e ayeliɛ’n su. Kɛ mɔ ninnge yifuɛ’m be si sɔ’n ti’n, afuɛ kwlaa nun be tua sika kpanngban kpa naan be bo ninnge nga b’a yi be’n be su ndolo, annzɛ be yi be nglo. Ndolo bofuɛ sɔ’m be fa be nuan nun mlɛnmlɛn’n, ɔ nin ninnge kɛ foto mun sa, mɔ kɛ sran’m be nian be wun blibli be’n, yɛ be fa kle ɔ. Ɔ maan, sran’m be konvi sɔ ninnge mun. Be si ekun kɛ kpɔkpɔ’n yɛ ɔ yi sɛ’n niɔn. Ɔ maan kɛ bé bó ninnge’n be su ndolo bé blɔ́ be’n, be si kɛ ɔ́ kɔ́ i ɲrun’n, saan sran’m bé tó. Be ɲan be ninnge’m be nglo yilɛ’n, annzɛ be su ndolo bolɛ sɔ’n i su nvasuɛ kpa. Ɔ timɛn i ti’n nn be faman sika wlaman nun. Afin, ninnge’m be nglo yilɛ’n, annzɛ be su ndolo bolɛ’n ɔ ɲan ta sran’m be angunndan’n ɔ nin be ayeliɛ’n su.
12. (a) ?Wafa sɛ yɛ Satan yo m’ɔ ɲan sran mun ɔn? (b) ?Ngue yɛ ɔ kle kɛ Satan kwla ɲan Klistfuɛ mun bɔbɔ ɔ?
12 Wafa kunngba nga ninnge’m be nglo yifuɛ mun, annzɛ be su ndolo bofuɛ’m be fa yo’n, Satan yo maan sran’m be bu i kɛ i klun sa liɛ’m be yolɛ’n ti kpa. Afin ɔ si kɛ ɔ́ kɔ́ i ɲrun’n, saan sran’m bé fɛ́ i angunndan liɛ’n su. I wie yɛle kɛ, be ɲin su yiyilɛ nin ninnge wie mun ekun be yolɛ’n nun’n, Satan laka sran mun maan be flɛ sa kpa’n kɛ sa tɛ, yɛ sa tɛ’n kɛ sa kpa (Ezai 5:20). Klistfuɛ kpa mun bɔbɔ be tɔli Satan i sran lakalɛ aya’n nun. Biblu’n wla e su nun kpa kɛ: ‘Cɛn wie lele kɛ mɛn’n kɔ́ i bue nuan’n, sran wie’m be su lafiman Ɲanmiɛn su kun, bé fá like nga mmusu mɔ be laka sran’n be kle’n su. Be nga be kle like sɔ’n, be ti atofuɛ be klo dunman, be klun angunndan w’a yo kɛ blalɛ nglɛ m’ɔ yra sran ɔn ɔ yo kokloko’n sa.’—1 Timote 4:1, 2; Zeremi 6:15.
13. ?Sran tɛ’n yɛle wan? ?Yɛ wafa sɛ yɛ sran nga e nin be san nun’n be nzuɛn’n kwla ɲan ta e su ɔ?
13 E nun wie fi kwlá seman kɛ angunndan nga sran’m be bu’n, ɔ kwlá ɲanman ta i su. Satan i mɛn’n i ta’n ti dan. Biblu’n wla e su nun kpa kɛ: “Nán amun laka amun wun, sɛ sran kpa nin sran tɛ be san nun’n, i nzuɛn tɛ’n sɛ i.” (1 Korɛntfuɛ Mun 15:33). Kɛ be kan sran tɛ’n i ndɛ’n, ɔ kwla yo like kwlaa ng’ɔ nin angunndan nga sran’m be bu’n be kɔ likawlɛ’n, annzɛ sran kwlaa mɔ wie liɛ, ɔ kwla yo asɔnunfuɛ bɔbɔ mɔ i ninnge’m be yolɛ’n fin angunndan nga sran’m be bu’n. Sɛ e se e wun kɛ sran tɛ’n i nzuɛn’n kwlá saman e’n, nn e kwla se wie ekun kɛ sran kpa’n i nzuɛn’n kwlá saman e. Sɛ e se sɔ kusu’n, nn y’a mlin! Biblu’n yiyi i sɔ liɛ’n nun weiin se kɛ: “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu m’ɔ fɛ i wun mantan sinnglinfuɛ’n, ɔ kaci sinnglinfuɛ.”—Nyanndra Mun 13:20.
14. ?Ngue nun yɛ e kwla jran kekle angunndan nga sran’m be bu’n i ɲrun ɔn?
14 Sɛ e waan é jrán kekle angunndan nga sran’m be bu’n i ɲrun’n, ɔ fata kɛ e nin ngwlɛlɛfuɛ mun mɔ be su Zoova’n e san nun. Ninnge nga be kwla yo e Ɲanmiɛn sulafilɛ’n i ye’n, yɛ ɔ fata kɛ be tran e angunndan nun ɔn. Akoto Pɔlu seli kɛ: ‘Aniaan mun, min ndɛ’n i atabo’n yɛ: maan amun angunndan’n tran like kwlaa ng’ɔ ti kpa’n, nin sa kwlaa mɔ sran yo ɔ ɔ ti kpa’n be su, yɛlɛ: ndɛ nanwlɛ’n, nin like nga be bu i like kpa’n, nin like ng’ɔ ti i nuan su’n, nin sa ng’ɔ timan tɛ mlɔnmlɔn’n, nin like ng’ɔ ti klanman’n, yɛ ndɛ nga be ti ɔ ɔ jɔ be klun’n.’ (Filipfuɛ Mun 4:8). Kɛ mɔ e kwla wun sa kpa nin sa tɛ’n be ngbaciɛ’n ti’n, e kwla fa e angunndan sie i ninnge nga be ti kpa’n be su. I sɔ’n ti’n, sa’n kwlaa nun’n, maan e bu ninnge nga be kwla fa e mantan Zoova’n, i angunndan.
Ɲanmiɛn wawɛ’n i ta liɛ’n ti dan tra su
15. ?Ɔ yo sɛ yɛ maan laa Korɛnti lɔ Klistfuɛ’m be nzuɛn’n ɔ nin klɔ kunngba’n nunfuɛ’m be liɛ’n w’a yoman kun ɔn?
15 Sɛ angunndan nga sran’m be bu’n ɔ le ta sran’m be ayeliɛ’n su’n, Ɲanmiɛn wawɛ’n liɛ’n, ɔ sie Klistfuɛ kpa mun. I sɔ yɛ ɔ sieli Korɛnti lɔ Klistfuɛ mun ɔn. Ɔ maan, kɛ Pɔlu klɛ́ be’n, ɔ seli kɛ: ‘E liɛ’n, angunndan nga sran’m be bu’n, nɛ́n i wie yɛ Ɲanmiɛn maan e bu ɔ, sanngɛ Ɲanmiɛn fɛ i wawɛ’n mannin e kɛ e si like kwlaa ng’ɔ mannin ye i klun ufue’n ti’n.’ (1 Korɛntfuɛ Mun 2:12). Angunndan nga sran’m be bu’n, yɛ laa ɔ o Kɔrɛnti klɔ wunmuan’n nun ɔn. Korɛntfuɛ’m be mɛn dilɛ sukusuku’n ti’n, ndɛ nga be se kɛ ‘ɔ di mɛn kɛ Korɛntfuɛ mun sa’n,’ mɔ i bo’n yɛle ‘sa sukusuku yolɛ’n mɔ be fa cici be ti’n,’ ɔ kacili flɛn dilɛ like. Satan sacili sran’m be angunndan’n. Ɔ maan, b’a wunman Ɲanmiɛn i ndɛ nanwlɛ’n i wlɛ kpa, annzɛ kusu b’a wunmɛn i wlɛ mlɔnmlɔn (2 Korɛntfuɛ Mun 4:4). Sanngɛ, Zoova wawɛ’n i fanngan nun’n, Korɛntfuɛ wie’m be ɲin tikeli. Ɔ maan be wunnin nanwlɛ ndɛ’n i wlɛ. Ɲanmiɛn wawɛ’n i fanngan nun’n, be kacili be mɛn dilɛ wafa’n. I sɔ’n ti’n, Ɲanmiɛn klun jɔli be wun, kpɔkun ɔ yrali be su (1 Korɛntfuɛ Mun 6:9-11). Kannzɛ angunndan nga sran’m be bu’n i ta’n ti dan’n, sanngɛ Zoova wawɛ’n i ta liɛ’n ɔ yoli dan trali su.
16. ?Ngue yɛ e kwla yo naan Ɲanmiɛn wawɛ’n w’a sie e titi ɔ?
16 I sɔ kunngba’n yɛ ɔ ju andɛ ɔ. Zoova wawɛ’n i ta liɛ’n tra like’n kwlaa, yɛ sran kwlaa nga be lafi i su mɔ be srɛ i’n, ɔ fa man be klun ufue su (Lik 11:13). Sɛ e waan Ɲanmiɛn wawɛ’n sie e’n, nán maan like nga ɔ fata kɛ e yo’n, ɔ ka angunndan nga sran’m be bu’n i ɲrun kekle jranlɛ’n i ngunmin su. Sanngɛ, ɔ fata kɛ e suan Biblu’n nun like titi naan e nian su e nanti, naan e klun angunndan’n ɔ tran Biblu’n su titi. Sɛ e yo sɔ’n, sa kwlaa nga Satan kunndɛ kɛ ɔ́ fá sáci e’n be nun’n, Zoova súan e bo.
17. ?Wafa sɛ yɛ sa nga ɔ juli Lɔtu su’n ɔ kle kɛ e kwla ɲan fɔnvɔlɛ wie ɔ?
17 Kannzɛ bɔbɔ Klistfuɛ’m be timan mɛn’n nunfuɛ’n, sanngɛ be o mɛn’n nun (Zan 17:11, 16). E nun wie fi kwlá seman kɛ angunndan nga sran’m be bu’n, ɔ buman wie mlɔnmlɔn. Afin, be nga be buman Ɲanmiɛn nin i mmla’m be like fi’n, e nin be e kwla di junman, annzɛ e tran likawlɛ. ?Lɔtu m’ɔ trannin Sodɔmu lɔ sran tɛtɛ’m be afiɛn’n, mɔ sa tɛ nga be yo’n ɔ “yo i ya’n,” i sɔ’n wie yɛ ɔ yo e ɔ (2 Piɛr 2:7, 8)? Sɛ ɔ ti sɔ’n niɔn, e kwla gua e wla ase. Afin Zoova sasali Lɔtu kpɔkun ɔ deli i. Ɔ kwla yo sɔ wie man e. E si m’ɔ ti sran klofuɛ’n, ɔ wun e wun sa kwlaa, yɛ ɔ si e su sa kwlaa. Ɔ maan, ɔ kwla uka e, yɛ ɔ kwla man e wunnmiɛn naan Ɲanmiɛn ninnge’m be nun y’a kpɔnzɔman (Jue Mun 33:18, 19). Sɛ e fa sa mun e wlɛ i Zoova sa nun’n, yɛ sɛ e lafi i su naan e bo flɛ i’n, ɔ́ úka e maan sa kwlaa nun’n, é jrán kekle angunndan nga sran’m be bu’n i ɲrun.—Ezai 41:10.
18. ?Ngue ti yɛ ɔ fata kɛ e nin Zoova e afiɛn’n m’ɔ mantan’n ɔ yo e nanndoliɛ kpa ɔ?
18 Mɛn nga nun mɔ Satan laka sran mun, mɔ be faman be wun mantanman Ɲanmiɛn yɛ’n i nun’n, Zoova yra e mɔ e ti i sufuɛ’n e su, ɔ maan e si ndɛ nanwlɛ’n. I sɔ ti’n, fɔun nun tranlɛ nin aklunjuɛ nga e di’n, mɛn’n nunfuɛ’m be dimɛn i sɔ (Ezai 57:20, 21; Galasifuɛ Mun 5:22). Anannganman nguan mɔ e lafi su kɛ é ɲɛ́n i mɛn klanman nun’n, mɔ angunndan nga sran’m be bu’n ɔ su tranman nun kun’n, ɔ ti e like nanndoliɛ kpa. I sɔ’n ti’n, maan e nin Ɲanmiɛn e afiɛn’n m’ɔ mantan’n, ɔ yo e like cinnjin kpa wie. Kpɔkun, maan e yo like kwlaa nga e ko yo naan Ɲanmiɛn ninnge’m be nun’n y’a to y’a fuanman atin’n. Maan e kwlaa e fa e wun mantan Zoova. I liɛ’n, ɔ́ úka e naan y’a jran kekle angunndan nga sran’m be bu’n i ɲrun.—Zak 4:7, 8.
?Amun kwla yiyi nun?
• ?Wafa sɛ yɛ Satan fa gblɛ nin ato’n laka sran mun ɔn?
• ?Wafa sɛ yɛ e kwla yo naan y’a to y’a fuaman Zoova i atin’n niɔn?
• ?Ngue yɛ ɔ kle kɛ angunndan nga sran’m be bu’n i ta’n ti dan ɔn?
• ?Wafa sɛ ryɛ e kwla yo naan Ɲanmiɛn wawɛ’n w’a sie e titi ɔ?
[Chart on page 21]
SRAN’M BE NGWLƐLƐ’N, YƐ NGWLƐLƐ M’Ɔ FIN ƝANMIƐN’N
Nanwlɛ’n ti fanunfanun, ɔ maan sran kun i ndɛ liɛ ng’ɔ kan’n yɛ ɔ ti nanwlɛ ɔ.
“[Ɲanmiɛn] ndɛ’n ti nanwlɛ.”—Zan 17:17.
Sɛ ɔ waan á sí sa kpa’n annzɛ sa tɛ’n, lafi wɔ bɔbɔ wɔ angunndan’n su.
‘Klɔ sran’n i klun angunndan’n ti tɛ tra like kwlaa, be yo angunndan sɔ’n sa fi ɔ ɔ yoman ye.’—Zeremi 17:9.
Yo ɔ bɔbɔ ɔ klunklo like.
‘N si kɛ sran’n i nguan’n nunmɛn i sa nun. Ajalɛ ng’ɔ tu’n, ɔ finmɛn i.’—Zeremi 10:23.
Aɲanbeun’n yɛ ɔ man aklunjuɛ’n niɔn.
‘Sika klolɛ’n yɛ ɔ ti sa tɛtɛ’n kwlaa i bo’n niɔn.’—1 Timote 6:10.