Amun e nian like nga Zezi yoli’n su e yo
“N yoli i sɔ kleli amun naan amun kusu an nian nga n yoli amun’n su yo.”—ZAN 13:15.
1. ?Ngue ti yɛ Zezi yɛ ɔ fata kɛ Klistfuɛ’m be niɛn i ajalɛ’n su ɔ?
MƐN wunmuan nun’n, sran kunngba cɛ yɛ i mɛn dilɛ’n nun w’a yoman sa tɛ kun sa le ɔ. Sran sɔ’n yɛle Zezi. Kɛ be yi Zezi be sie i bue kun’n, “sran’m be kwlaa be yoli sa tɛ.” (1 Famiɛn Mun 8:46; Rɔmfuɛ Mun 3:23). I sɔ’n ti’n, Klistfuɛ kpa’m be liɛ’n, sran nga i ajalɛ’n ti kpa m’ɔ fata kɛ be nian su’n yɛle Zezi. Afuɛ 33 nun E.B.N., Nisan i le 14 i kɔnguɛ kasiɛn nun’n, ka naan b’a tra Zezi b’a kun i’n, ɔ seli i sɔnnzɔnfuɛ’m be kɛ be niɛn i ajalɛ’n su be yo. I waan: “N yoli i sɔ kleli amun naan amun kusu an nian nga n yoli amun’n su yo.” (Zan 13:15). Kɔnguɛ kasiɛn sɔ’n nun’n, Zezi kannin ajalɛ sunman m’ɔ fata kɛ Klistfuɛ’m be mian be ɲin be nian su yo’n, be ndɛ. Like suanlɛ nga nun’n, é wá fá e ɲin síe ajalɛ sɔ’m be nun wie’m be su.
Be wun ase kanlɛ’n ti cinnjin
2, 3. ?Wun ase kanlɛ nun’n, wafa sɛ yɛ Zezi kleli ajalɛ kpafuɛ’n niɔn?
2 Kɛ Zezi sé i sɔnnzɔnfuɛ’m be kɛ be niɛn i liɛ’n su yo’n, ɔ kannin be wun ase kanlɛ’n i ndɛ kpa. Ɔ wlali i sɔnnzɔnfuɛ’m be su nun titi kɛ be yo wun ase kanfuɛ. Nisan i le 14 i kɔnguɛ’n nun’n, ɔ kleli be kɛ i bɔbɔ ti wun ase kanfuɛ. Yɛle kɛ ɔ wunnzinnin i akoto’m be ja. Kpɔkun ɔ seli be kɛ: ‘Sɛ m mɔ n ti amun like klefuɛ nin amun min’n, n wunnzinnin amun ja’n, amun kusu an wunnzin amun wiengu ja.’ (Zan 13:14). Kɛ ɔ yoli sɔ’n, ɔ seli i akoto’m be kɛ be nian like ng’ɔ yoli’n su yo. Nanwlɛ, i sɔ’n ti wun ase kanlɛ’n i ajalɛ kpa!
3 Akoto Pɔlu waan ka naan Zezi w’a ba asiɛ’n su wa’n, ɔ nin ‘Ɲanmiɛn be ti kun.’ Sanngɛ w’a bumɛn i sɔ’n i like fi, ɔ kacili klɔ sran wun ase kanfuɛ. I kpa bɔbɔ’n, ‘ɔ yoli i wun aenvuɛ, ɔ yoli aɲinyiɛfuɛ lele ɔ fa wuli, waka’n su yɛ ɔ wuli ɔ.’ (Filipfuɛ Mun 2:6-8). Bu ndɛ sɔ’n i sin nian. Zezi m’ɔ ti nglo nin asiɛ’n be su sran dan’n i nɲɔn su’n, ɔ kplinnin su kɛ anzi’m be kpa trɛ i. Yɛle kɛ, be wuli i ba nɔnman m’ɔ leman wunmiɛn’n, kpɔkun siɛ nin niɛn mɔ fɔ wo be nun’n be tɛli i. Kpɔkun i agualiɛ su’n, ɔ wuli kɛ kodiawiefuɛ wie sa (Kolɔsfuɛ Mun 1:15, 16; Ebre Mun 2:6, 7). I sɔ’n ti wun ase kanlɛ dan! ?E kwla ‘bu angunndan kunngba’ sɔ’n wie naan y’a ‘tuman e wun?’ (Filipfuɛ Mun 2:3-5). Ɛɛn, sanngɛ i sɔ yolɛ’n timan pɔpɔ.
4. ?Ninnge mennin mun yɛ sran’m be fa tu be wun ɔn? ?Sanngɛ, ngue ti yɛ tutre dilɛ’n ti tɛ ɔ?
4 Wun ase kanlɛ’n i asabesin’n yɛle tutre’n (Nyanndra Mun 6:16-19). Tutre dilɛ’n yili Satan ase (1 Timote 3:6). Wun tulɛ angunndan’n tra ndin ndɛndɛ kpa klɔ sran’n i awlɛn’n nun. Kpɔkun kɛ ɔ ko yo sɔ’n, i bo tulɛ’n yo kekle kpa. Sran’m be nvle’m be ti’n, ɔ nin be wunnɛn kplo’n ti’n, ɔ nin be ninnge nga be le be’n ti’n, ɔ nin ninnge nga be suan be suklu’m be nun’n ti’n, ɔ nin junman kpa mɔ be di’n ti’n, ɔ nin ɲrun mɔ be le i’n ti’n, ɔ nin be wun wlawlalɛ’n ti’n, ɔ nin be wun kpinngbinlɛ’n i wafa kun mɔ be si i yo’n ti’n, ɔ nin sa sunman wie mun ekun be ti’n, be tu be wun. Sanngɛ, ninnge sɔ’m be nun wie fi timan Zoova ɲrun cinnjin (1 Korɛntfuɛ Mun 4:7). Ɔ maan sɛ ninnge sɔ’m be fa e yi i tutre dilɛ nun’n, e nin Zoova e afiɛn’n sáci. Biblu’n waan: “Anannganman o nglo lɔ, sanngɛ ɔ wun be nga be kan be wun ase’n mun. Sran nga be yo be wun dandan’n, ɔ o mmua lɔ ɔ wun be.”—Jue Mun 138:6; Nyanndra Mun 8:13.
Maan e yo wun ase kanfuɛ e niaan’m be afiɛn
5. ?Ngue ti yɛ ɔ ti cinnjin kɛ asɔnun kpɛnngbɛn’m be yo wun ase kanfuɛ’n niɔn?
5 Ɔ fataman kɛ e sa nun like nga e man’n, ɔ nin like nga Zoova junman’n i dilɛ’n nun e yo’n, annzɛ asɔnun’n nun junman nga e di’n, be nun wie ti e tu e wun (1 Be Nyoliɛ 29:14; 1 Timote 6:17, 18). I kpa bɔbɔ’n, kɛ e di junman kpanngban asɔnun’n nun’n, yɛ ɔ fata kɛ e yo wun ase kanfuɛ kpa’n niɔn. Akoto Piɛli wlali asɔnun kpɛnngbɛn’m be su nun kpa kɛ nán be ‘tin be nga be fa be mannin be kɛ be nian be su’n be su, sanngɛ be yo sa ng’ɔ ti kpa’n maan be nian su.’ (1 Piɛr 5:3). Be sieli asɔnun kpɛnngbɛn mun naan be su be niaan mun naan be kle be ajalɛ kpa. B’a seman kɛ be yo be niaan’m be min naan be tin be su.—Lik 22:24-26; 2 Korɛntfuɛ Mun 1:24.
6. ?E Klistfuɛ mɛn dilɛ’n nun’n, ngue nun yɛ ɔ fata kɛ e yo wun ase kanfuɛ ɔ?
6 Nán asɔnun kpɛnngbɛn’m be ngunmin yɛ ɔ fata kɛ be yo wun ase kanfuɛ ɔ. Ninnge mɔ gbaflɛn’m be kwla bu be su angunndan ndɛndɛ’n, ɔ nin wunmiɛn mɔ be le i’n ti’n, be kwla fa be wun sunnzun kpɛnngbɛn mun kpɔkun be tu be wun. I sɔ’n ti’n, Piɛli seli kɛ: ‘Amun kwlaa an yo amun wun kɛ kanga sa, yɛ an uka amun wun, afin be klɛli i Ɲanmiɛn Ndɛ’n nun kɛ: “Ɲanmiɛn nin be nga be tu be wun mun be le i, sanngɛ ɔ yo aenvuɛfuɛ’m be ye.”’ (1 Piɛr 5:5). Nanwlɛ, wun ase kanlɛ kɛ Klist liɛ’n sa’n ti nguan like man e ngba. Kɛ sran’m be buman jasin fɛ’n i ndɛ’n, annzɛ be kle e ɲrɛnnɛn jasin fɛ’n bolɛ’n ti’n, saan é yó wun ase kanfuɛ naan y’a kwla bo i titi. Saan é yó wun ase kanfuɛ naan y’a sɔ afɔtuɛ’m be nun klanman, annzɛ naan y’a yaci ninnge nga be timan cinnjin’n be yolɛ naan y’a uka e jasin fɛ’n bolɛ junman’n su. Asa ekun’n, kɛ be tɔn e suɛn tɛtɛ kpa mun, annzɛ kɛ be kpɛ mmla’m be fa tanndan e ɲrun’n, annzɛ be kle e yalɛ tɛ kpa’n, ɔ fata kɛ e yo wun ase kanfuɛ naan y’a kwla jran kekle naan e Ɲanmiɛn sulafilɛ’n w’a kpɔnzɔman.—1 Piɛr 5:6.
7, 8. ?Sa mennin be nun yɛ e kwla suan wun ase kanlɛ ɔ?
7 ?Wafa sɛ yɛ sran m’ɔ tu i wun kpɔkun ɔ bu i bɔbɔ i wun angunndan’n, ɔ kwla yo naan w’a ‘tumɛn i wun, sanngɛ ɔ bu sran wie’m be sran tra’ i bɔbɔ ɔ (Filipfuɛ Mun 2:3)? Ɔ fata kɛ ɔ niɛn i bɔbɔ i wun kɛ nga Zoova fa niɛn i’n sa. Zezi kannin wafa kpa nga sran kun kwla si wafa ng’ɔ ti’n, i ndɛ. Ɔ seli kɛ: “Amun kusu, kɛ an ko yo kwlaa nga be seli amun kɛ an yo’n, amún sé kɛ: ‘E ti kɛ junman difuɛ mɔ y’a yoman like fi sa, nga be seli e kɛ e yo’n, yɛ e yoli ɔ.’” (Lik 17:10). Maan e si kɛ e nun wie fi kwlá yoman ninnge nga Zezi yoli be mun’n. Sanngɛ, Zezi yoli wun ase kanfuɛ.
8 I kpa bɔbɔ’n, e kwla srɛ Zoova kɛ ɔ uka e naan e suan e bɔbɔ e wun silɛ kpa. Kɛ jue tofuɛ’n sa’n, e kwla se kɛ: ‘Yo maan n ɲan silɛ naan n wun ɔ mmla’m be wlɛ jrɛiin, afin be su yɛ n fa min wla n gua ɔ.’ (Jue Mun 119:66). Zoova kunndɛ kɛ ɔ́ úka e naan e si e jranwlɛ’n, kpɔkun e wun ase kanlɛ ajalɛ’n, ɔ́ yrá su (Nyanndra Mun 18:12). Zezi seli kɛ: ‘Sran ng’ɔ yo i wun dandan’n, Ɲanmiɛn wá gúɛ i ɲin ase, sanngɛ sran ng’ɔ tumɛn i wun’n, Ɲanmiɛn maan ɔ́ ɲán ɲrun.’—Matie 23:12.
Maan e wun sa kpa nin sa tɛ’n be wlɛ
9. ?Wafa sɛ yɛ Zezi buli sa ng’ɔ ti kpa’n nin sa ng’ɔ ti tɛ’n niɔn?
9 Kannzɛ bɔbɔ Zezi dili afuɛ 33 klɔ sran’m be afiɛn’n, sanngɛ w’a “yoman sa tɛ le.” (Ebre Mun 4:15). I sɔ’n ti’n, kɛ jue tofuɛ’n kán Mɛsi’n i ndɛ’n, ɔ seli kɛ: ‘A klo sa ng’ɔ ti kpa’n, a kloman sa tɛ’n mlɔnmlɔn.’ (Jue Mun 45:8; Ebre Mun 1:9). I lɛ nun’n, Klistfuɛ’m be kusu be mian be ɲin be nian Zezi i ajalɛ’n su. Yɛle kɛ, nán sa kpa’n nin sa tɛ’n be wlɛ ngunmin sa yɛ be wun i ɔ. Sanngɛ be kpɔ sa ng’ɔ ti tɛ’n kpɔkun be klo sa ng’ɔ ti kpa’n (Amɔs 5:15). I sɔ’n uka be maan be jran kekle be ɲin’n m’ɔ o sa tɛ’n su titi’n, i ɲrun.—Bo Bolɛ 8:21; Rɔmfuɛ Mun 7:21-25.
10. ?Sɛ e ti “sa tɛ” yofuɛ naan e kaciman’n, nn ajalɛ mennin yɛ e yi i nglo ɔ?
10 Zezi seli Nikodɛmu m’ɔ ti Farizifuɛ’n kɛ: ‘Sran kwlaa ng’ɔ ti sa tɛ yofuɛ’n, ɔ kloman wia’n mlɔnmlɔn, ɔ fiteman weiin nun, afin ɔ kloman kɛ be wun i ɲoliɛ tɛtɛ’n. Sanngɛ sran ng’ɔ yo sa kpa’n, ɔ fite weiin nun naan be wun kɛ sa ng’ɔ yo’n ti Ɲanmiɛn klun su.’ (Zan 3:20, 21). Amun bɔbɔ amun nian, Zan seli kɛ Zezi ti yɛ maan ‘sran’m be wun ase sakpa ɔ.’ (Zan 1:9, 10). Ɔ maan, Zezi seli kɛ sɛ e ti “sa tɛ” yofuɛ’n, yɛle kɛ sɛ e yo like ng’ɔ jɔman Ɲanmiɛn klun’n, nn e kloman wia’n mlɔnmlɔn. ?Kɛ amun niɛn i sa’n, amun kwla se kɛ amun kloman Zezi ɔ nin i mmla mun? Sanngɛ, i sɔ yɛ be nga be ti sa tɛ yofuɛ mɔ be kaciman’n, be yo ɔ. Atrɛkpa’n, ɔ yoman be kɛ be kloman Zezi ɔ nin i mmla mun. Sanngɛ nn nanwlɛ, kɛ Zezi bu be sɔ ɔ.
Wafa nga e kwla nian sa kpa’n nin sa tɛ’n kɛ nga Zezi fa wunnin be’n i sa’n
11. ?Sɛ e waan é nían wafa nga Zezi fa wunnin sa kpa’n nin sa tɛ’n i su’n, ngue yɛ ɔ ti cinnjin man e ɔ?
11 Like ng’ɔ ti Zoova i ɲrun like kpa’n, ɔ nin ng’ɔ ti i ɲrun like tɛ’n, ɔ fata kɛ e wun be wlɛ weiin kpa. I lɛ nun’n, saan Biblu’n nun like suanlɛ’n kunngba cɛ yɛ ɔ kwla uka e ɔ. Kpɔkun kɛ e like suanlɛ’n kɔ́ i ɲrun’n, ɔ fata kɛ e srɛ Ɲanmiɛn kɛ nga jue tofuɛ’n fa srɛli’n sa. I waan: “Anannganman, kle min wɔ atin’n, kle min kan n sin’n.” (Jue Mun 25:4). Sanngɛ, nán maan e wla fi su le kɛ Satan ti sran lakafuɛ (2 Korɛntfuɛ Mun 11:14). Ɔ kwla yo maan sa tɛ’n kaci Klistfuɛ nga be sasaman be wun’n, be ɲrun kɛ like kpa sa. I sɔ’n ti’n, like nga e suan’n, ɔ nin afɔtuɛ nga ‘sran kpa nanwlɛfuɛ m’ɔ si ngwlɛlɛ’n’ man e’n, ɔ fata kɛ e bu be su angunndan kpa (Matie 24:45-47). Like suanlɛ’n, ɔ nin Ɲanmiɛn srɛlɛ’n, ɔ nin like nga e suannin’n i su angunndan bulɛ’n, bé úka e maan é yó kpa trá laa’n. Kpɔkun ‘be nga b’a yo sran mɔ be kunndɛ sa ng’ɔ ti kpa’n nin tɛ’n be ngbaciɛ lele b’a si i kpa’n,’ é yó i sɔfuɛ’n wie (Ebre Mun 5:14). Ɔ maan é kpɔ́ sa tɛ yolɛ’n, kpɔkun é kló sa kpa yolɛ’n.
12. ?Afɔtuɛ mennin yɛ Biblu’n man e naan y’a yoman sa tɛ yofuɛ ɔ?
12 Sɛ e kpɔ sa tɛ yolɛ’n, e su yaciman sa tɛ yolɛ ninnge’m be lɛ naan be tra ndin e awlɛn’n nun. Kɛ Zezi wuli mɔ afuɛ kpanngban sinnin’n, akoto Zan seli kɛ: ‘Nán an klo mɛn dilɛ’n, nán an klo ninnge nga be o mɛn’n nun’n. Sran ng’ɔ klo mɛn dilɛ’n, nn ɔ kloman e Si’n. Like nga be yo be mɛn’n nun’n i kwlaa’n: be ɲin m’ɔ blo ninnge’m be su’n, nin angunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi finman e Si’n, sanngɛ be ti mɛn’n nun nzuɛn.’—1 Zan 2:15, 16.
13, 14. (a) ?Ngue ti yɛ ninnge nga be o mɛn’n nun’n be klolɛ’n ti tɛ kpa man Klistfuɛ mun ɔn? (b) ?Wafa sɛ yɛ e kwla yo naan y’a kloman ninnge nga be o mɛn’n nun’n mun ɔn?
13 Sran wie’m be kwla se be wun kɛ mɛn’n nun ninnge’n ngba be timan tɛ. Kannzɛ bɔbɔ be ndɛ yo fɛ’n, sanngɛ mɛn’n nin i nun ninnge’m be kwla tanndan e ɲrun Zoova sulɛ’n nun ndɛndɛ kpa. Mɛn nun ninnge nga sran’m be yili be’n, be nun wie fi kwlá faman e mantanman Ɲanmiɛn. Ɔ maan, sɛ e klo ninnge nga be o mɛn’n nun’n naan kannzɛ bɔbɔ ninnge sɔ’m be timan tɛ’n, nn y’a fa atin tɛ su (1 Timote 6:9, 10). Kannzɛ mɛn’n nun ninnge’m be ti sɛ o, sanngɛ be nun sunman be ti tɛ yɛ be kwla saci e. Sɛ e nian flimu, annzɛ televiziɔn nun ninnge nga be kle nzaje sa mun’n, annzɛ mɔ be yi aɲanbeun ninnge mun nin bla nin bian kunndɛlɛ sukusuku’n be nglo’n, ninnge sɔ’m be kwla kaci e ɲrun like kpa. Sanngɛ i sin’n, bé káci kɛ aya sa, yɛ é tɔ́ nun. Asa ekun’n, sɛ e nin be nga be klo mɛn dilɛ’n, annzɛ be nga be ti aɲinkplifuɛ mun e san nun’n, ninnge sɔ’m be kwla yo e ɲrun cinnjin kpa wie.—Matie 6:24; 1 Korɛntfuɛ Mun 15:33.
14 Sanngɛ kusu’n, sɛ like nga e klo i’n yɛle Zoova Ndɛ’n, ‘be ɲin m’ɔ blo ninnge’m be su’n, nin angunndan nga be bu fa gua ninnge nga be wun be’n be su’n, ɔ nin be wun tulɛ’n,’ be su mlinman e. Asa ekun’n, sɛ e nin be nga be fa be wun man Ɲanmiɛn Sielɛ Blɛ maan ɔ sie be’n e san nun’n, é yó kɛ be sa wie. Yɛle kɛ, é kló like nga be klo i’n, kpɔkun é kpɔ́ like nga be kpɔ i’n.—Jue Mun 15:4; Nyanndra Mun 13:20.
15. ?Kɛ Zezi liɛ’n sa’n, sɛ e klo sa ng’ɔ ti kpa’n, naan y’a kloman sa tɛ’n mlɔnmlɔn’n, wafa sɛ yɛ i sɔ’n úka e ɔ?
15 Kɛ mɔ Zezi klo sa ng’ɔ ti kpa’n, kpɔkun w’a kloman sa tɛ’n mlɔnmlɔn’n ti’n, i sɔ’n ukɛli i maan i ɲin trannin i ‘klun mɔ wá jɔ́’n’ su titi (Ebre Mun 12:2). E kwla yo sɔ wie. Yɛle kɛ, e si kɛ ‘mɛn’n nin i nun ninnge kwlaa mɔ sran ɲin blo su’n, bé wíe.’ Ɔ maan aklunjuɛ kwlaa nga mɛn’n nun ninnge sɔ’m be man e’n be ti le nɲɔn aklunjuɛ. Sanngɛ, ‘sran ng’ɔ yo Ɲanmiɛn klun sa’n, ɔ́ ká lɛ tititi.’ (1 Zan 2:17). Kɛ mɔ Zezi yoli Ɲanmiɛn klun sa’n ti’n, ɔ tikeli klɔ sran’m be ɲrun anannganman nguan atin’n (1 Zan 5:13). Maan e kwlaa e nian i nantilɛ sein su e nanti naan e ɲan anannganman nguan’n.
E jran kekle yalɛ klelɛ’n ɲrun
16. ?Ngue ti yɛ ɔ ti cinnjin kpa kɛ Klistfuɛ be klo be wiengu’n niɔn?
16 Zezi kannin ajalɛ kun ekun m’ɔ fata kɛ i sɔnnzɔnfuɛ’m be nian su be yo’n, i ndɛ. Ɔ seli kɛ: ‘Ndɛ nga ń kán klé amun’n yɛ: an klo amun wiengu kɛ n fa klo amun’n sa.’ (Zan 15:12, 13, 17). Sa nga ti yɛ Klistfuɛ’m be klo be niaan mun’n, be sɔnnin. I blɛ sɔ’n nun be kwlaa be ɲrun lɛ’n, wafa nga bé wá jrán kekle kpɔlɛ nga mɛn nunfuɛ’m bé wá kpɔ́ be’n i ɲrun’n, Zezi buli i angunndan. Ɔ seli be kɛ: ‘Sɛ mɛn nunfuɛ’m be kpɔ amun’n, maan an si kɛ min yɛ be dun mmua kpɔli min ɔn. Sran m’ɔ su sran’n timan kpa trɛmɛn i min’n. Sɛ be kleli n yalɛ’n, bé klé amun yalɛ wie.’ (Zan 15:18, 20). Nanwlɛ, yalɛ klelɛ nun’n, Klistfuɛ’m be ti kɛ Zezi sa. Ɔ fata kɛ be suan yakpa yolɛ, yɛ sɛ be klo be wiengu kpa’n, i sɔ’n úka be naan b’a jran kekle kpɔlɛ mɔ bé kpɔ́ be’n i ɲrun.
17. ?Ngue ti yɛ mɛn nunfuɛ’m be kpɔ Klistfuɛ kpa mun’n niɔn?
17 ?Ngue ti yɛ mɛn nunfuɛ’m be kpɔ Klistfuɛ mun’n niɔn? Afin Klistfuɛ’m be “timan mɛn nunfuɛ” kɛ Zezi kusu timan mɛn nunfuɛ’n sa (Zan 17:14, 16). Be faman be wun wlaman sonja dilɛ’n, ɔ nin politiki ninnge’m be nun. Sanngɛ be fa Biblu’n nun mmla’m be su, be nguan’n ti like cinnjin be ɲrun, kpɔkun be mɛn dilɛ’n ti sanwun (Sa Nga Be Yoli’n 15:28, 29; 1 Korɛntfuɛ Mun 6:9-11). Ɲanmiɛn ninnge’m be yolɛ’n yɛ be dun mmua fa sie be ɲrun be yo ɔ. Kannzɛ bɔbɔ be o mɛn’n nun’n, sanngɛ kɛ nga Pɔlu fa klɛli’n sa’n, ɔ fataman kɛ be ‘ɲin blo i nun ninnge’m be kunndɛlɛ’n su ngboko.’ (1 Korɛntfuɛ Mun 7:31). Nanwlɛ, sran wie’m be kan Zoova i Lalofuɛ’m be mɛn dilɛ klanman’n i ndɛ kpa. Sanngɛ, Zoova i Lalofuɛ’m be yoman ninnge wie mun naan sran’m be klo be, annzɛ naan be sɔ be nun kpa. Yɛ kɛ mɔ mɛn nunfuɛ sunman be wunman Zoova i Lalofuɛ’m be ayeliɛ’n i bo’n ti’n, be kpɔ be.
18, 19. ?Yalɛ klelɛ’n nin ɲrɛnnɛn klelɛ’n i ɲrun’n, wafa sɛ yɛ Klistfuɛ’m be niannin Zezi i ajalɛ’n su ɔ?
18 Kɛ be trali Zezi lele mɔ bé fá kún i’n, kɛ be se kɛ mɛn nunfuɛ’m be kpɔ sran tɛtɛ kpa’n, Zezi i akoto’m be wunnin i. Zezi i kpɔlɛ sɔ’n nun kusu’n, be wunnin ajalɛ ng’ɔ fali’n. Kɛ Zɛtsemane fie’n nun lɔ Zezi i kpɔfuɛ’m be bɛli i tralɛ’n, Piɛli fɛli i tokofi’n naan ɔ́ kplí Zezi i ti. Sanngɛ Zezi seli i kɛ: ‘Fa ɔ tokofi’n wlɛ i bua’n nun, sran kwlaa ng’ɔ tra tokofi nun’n, tokofi’n i nuan yɛ ɔ́ kɔ́ ɔ.’ (Matie 26:52; Lik 22:50, 51). Laa nun’n, kɛ Izraɛlifuɛ’m be nin be kpɔfuɛ’m bé kún’n, be fa tokofi. Siɛn’n, ɔ timan sɔ kun. Afin Ɲanmiɛn Sielɛ Blɛ’n nunman ‘mɛn nga nun,’ yɛ ɔ leman like mɔ be fa sisi i wun m’ɔ sɛsɛ i ɔ (Zan 18:36). Ɔ ka kan’n, Piɛli nin be nga be ti ɲanmiɛn su lɔ ba’n, bé yó nvle ng’ɔ ti Ɲanmiɛn liɛ sakpa’n i nunfuɛ (Galasifuɛ Mun 6:16; Filipfuɛ Mun 3:20, 21). Sanngɛ kɛ ɔ fɛ i lɛ’n, ka naan blɛ sɔ’n w’a ju’n, ɔ fata kɛ Zezi i sɔnnzɔnfuɛ’m be jran kekle be kpɔlɛ’n, ɔ nin be yalɛ klelɛ’n i ɲrun kɛ nga Zezi fa jrannin kekle’n sa. Yɛle kɛ be ti yakpa, sanngɛ be ti wɛtɛɛfuɛ. Be fa be ndɛ’n wla Zoova sa nun, kpɔkun be srɛ i naan ɔ man be fanngan naan b’a jran kekle.—Lik 22:42.
19 Kɛ afuɛ wie’m be sinnin’n, Piɛli seli kɛ: ‘Klist bɔbɔ wunnin ɲrɛnnɛn. Ɔ yoli sɔ kɛ an nian su naan an nanti i ajalɛ liɛ’n su. Bɛ kpɛli i nzowa, w’a yiman a manman be, be kleli i ɲrɛnnɛn, w’a fuaman be ti, sanngɛ ɔ fɛ i ndɛ liɛ’n wlali Ɲanmiɛn m’ɔ di ndɛ nanwlɛ’n i sa nun.’ (1 Piɛr 2:21-23). Kɛ nga Zezi fa kannin’n sa’n, be kleli Klistfuɛ’m be yalɛ tɛtɛ kpa afuɛ nga be sinnin’n be nun. Maan ɔ yo afuɛ ya kpɔlɛ klikli’n nun o, annzɛ e blɛ liɛ’n nun o, Zezi i sɔnnzɔnfuɛ’m be ɲrɛnnɛn’n i ɲrun kekle jranlɛ’n i su ndɛ nga be klɛli’n, ɔ kle kɛ be nanti sein titi naan be ti wɛtɛɛfuɛ (Sa Nglo Yilɛ 2:9, 10). Sa kwlaa nga be ju e su’n be nun’n, maan e kwlaa e tinuntinun e nanti kɛ be sa wie.—2 Timote 3:12.
“An nian like nga e Min Zezi Klist yo’n su yo”
20-22. ?Ngue nun yɛ Klistfuɛ’m be “nian like nga e Min Zezi Klist yo’n su yo” ɔ?
20 Pɔlu seli Rɔmu lɔ asɔnunfuɛ’m be kɛ: ‘An fa e Min Zezi Klist yo kɛ amun ɲrɛn sa [an nian like nga e Min Zezi Klist yo’n su yo, NW]. Nán an bu like nga klɔ sran i konvi sɔ i’n i angunndan kɛ amún yó.’ (Rɔmfuɛ Mun 13:14). Kannzɛ bɔbɔ fɔ’n wo Klistfuɛ’m be nun’n, sanngɛ be mian be ɲin be nian be Min’n i nzuɛn’n, ɔ nin ninnge ng’ɔ yoli be’n be su yo.—1 Tɛsalonikfuɛ Mun 1:6.
21 Sɛ e suan e Min’n i mɛn dilɛ’n su like naan e nian su e di e liɛ’n, é kwlá nían “like nga e Min Zezi Klist yo’n su yó.” E nian Zezi i wun ase kanlɛ’n su, ɔ nin i sa kpa klolɛ’n su, ɔ nin sa tɛ’n mɔ w’a klomɛn i mlɔnmlɔn’n i su. Mɛn nunfuɛ mɔ w’a yoman’n, ɔ nin i awlɛn tralɛ ɲrɛnnɛn nun’n, e nian be su e yo. E buman ‘like nga klɔ sran i konvi sɔ i’n i angunndan kɛ é yó.’ Yɛle kɛ, e yoman like nga i yolɛ’n jɔ e bɔbɔ e klun’n. Sanngɛ kɛ é fá ajalɛ’n, annzɛ kɛ é kúnndɛ sa wie i trawlɛ’n, e usa e wun kɛ: ?Sɛ ɔ ti Zezi’n niɔn, nn ajalɛ mennin yɛ ɔ́ fá ɔ? ?Ngue yɛ ɔ kwla kunndɛ kɛ n yo ɔ?
22 I atabo’n yɛle kɛ e nian ‘Ɲanmiɛn i sielɛ’n i jasin fɛ’n i kanlɛ’n’ mɔ Zezi kɛnnin i kpa’n su e kan (Matie 4:23; 1 Korɛntfuɛ Mun 15:58). I lɛ’n nun kusu’n, wafa nga Klistfuɛ’m be nian like nga Zezi yoli’n su be yo’n, like suanlɛ ng’ɔ́ bá lɛ’n wá yíyí nun.
?Amún yíyí nun sɛ?
• ?Ngue ti yɛ ɔ ti cinnjin kpa kɛ Klistfuɛ’m be yo wun ase kanfuɛ’n niɔn?
• ?Wafa sɛ yɛ e kwla wun sa kpa nin sa tɛ’n be wlɛ ɔ?
• ?Yalɛ klelɛ’n nin be ɲrun tanndanlɛ’n be ɲrun’n, wafa sɛ yɛ Klistfuɛ’m be nian Zezi i ajalɛ’n su ɔ?
• ?Wafa sɛ yɛ e kwla “nian like nga e Min Zezi Klist yo’n su yo” ɔ?