Nán e man mmusu’m be si Satan’n i wluwlɛ

“Nán an man mmusu’m be si Satan’n i wluwlɛ.”—EFƐZFUƐ MUN 4:27.

1. ?Ngue ndɛ yɛ sran’m be kɛn i Satan su ɔ?

Ɔ FIN laa kpa’n, sran kpanngban wie’m be bu i kɛ mmusu’m be si Satan’n le wuɛ naan i ja bui’m be ti kɛ nannin’m be liɛ’n sa naan i wun tralɛ’n ti ɔkwlɛ. Kpɔkun asunmbɛ kun o i sa nun naan ɔ fa kpalo klunwifuɛ mun gua sin dan kun nun. Sanngɛ Biblu’n seman sɔ mlɔnmlɔn. Sran wie mun ekun be liɛ’n, be kpɛ kpo be se kɛ Satan’n nunman lɛ, annzɛ sa tɛ’n yɛ be flɛ i Satan’n niɔn.

2. ?Satan i su ndɛ mennin wie mun yɛ Biblu’n kan ɔn?

² Biblu’n kle weiin kɛ mmusu’m be si Satan’n o lɛ naan ɔ ti aolia nun sran. I nun mɔ Zezi Klist o ɲanmiɛn su lɔ’n, nn ɔ o lɔ wie. Ɔ maan, be wun be wun. Kpɔkun, kɛ Zezi bali asiɛ’n su wa’n, ɔ nin Satan’n be ijɔli. (Zɔb 1:6; Matie 4:4-11) Dunman nga kɛ Ɲanmiɛn boli aolia nun sran sɔ’n ɔ fa flɛli i’n, Biblu’n boman su. Sanngɛ Biblu’n nun be flɛ i kɛ mmusu’m be si Satan. Glɛki aniɛn’n nun ndɛ mma nga be kaci i kɛ mmusu’m be si Satan’n, i bo’n yɛle suɛn tɔnfuɛ nin sran ɲrun tanndanfuɛ. Afin, aolia nun sran sɔ’n tɔnnin Ɲanmiɛn i suɛn. Kpɔkun, ɔ tanndannin Ɲanmiɛn ɲrun. Asa ekun’n, kɛ mɔ mmusu’m be si Satan’n sinnin wuo kun lika yɛ ɔ lakali Ɛvu’n ti’n, Biblu’n flɛ i kɛ “wuo lalaa.” (Sa Nglo Yilɛ 12:9; 1 Timote 2:14) I kunngba’n, be flɛ i “Klunwifuɛ’n.”—Zan 17:15.a

3. ?Kosan mennin yɛ é wá tɛ́ su ɔ?

³ Kɛ mɔ e ti Zoova i sufuɛ’n ti’n, e kunndɛman kɛ é fá Satan m’ɔ ti Ɲanmiɛn i kpɔfuɛ dan’n, i ajalɛ’m be su le. Sanngɛ e kunndɛ kɛ é fá Pɔlu i afɔtuɛ yɛ’n su. I waan: “Nán an man mmusu’m be si Satan’n i wluwlɛ.” (Efɛzfuɛ Mun 4:27) ?Satan’n i ayeliɛ mennin wie mun yɛ ɔ fataman kɛ e fa su ɔ?

Nán e niɛn i sran suɛn tɔnlɛ ayeliɛ’n su

4. ?Wafa sɛ yɛ “Klunwifuɛ’n” tɔnnin Ɲanmiɛn i suɛn ɔn?

⁴ Kɛ be flɛ “Klunwifuɛ’n” kɛ suɛn tɔnfuɛ’n, i sɔ’n nin i fata kpa. Suɛn tɔnfuɛ’n, ɔ kɛn i wiengu i wun ndɛ tɛtɛ. Ɲanmiɛn seli Adam kɛ: “Sa kpa’n nin sa tɛ’n be silɛ waka’n i mma liɛ’n, nán di i li. Sɛ a di’n, saan wulɛ cɛ yɛ á wú ɔ.” (Bo Bolɛ 2:17) Adam boli i sɔ ndɛ’n su kleli Ɛvu. Sanngɛ, mmusu’m be si Satan’n ɔ wa kannin ndɛ uflɛ kleli i. Ɔ sinnin wuo kun sin yɛ ɔ nin Ɛvu be ijɔli ɔ. Ɔ seli Ɛvu kɛ: ‘Amun su wuman. Ɲanmiɛn bɔbɔ si kɛ cɛn nga amun di’n, amun ɲin tí. Amún yó kɛ i bɔbɔ sa, amún sí sa kpa’n nin sa tɛ’n.’ (Bo Bolɛ 3:4, 5) Nanwlɛ, i sɔ’n ti Zoova i suɛn tɔnlɛ dan!

5. ?Ngue ti yɛ be flɛli Diotrɛfu kɛ suɛn tɔnfuɛ ɔ?

⁵ Ɲanmiɛn seli Izraɛlifuɛ’m be kɛ: “Nán amun tɔn amun osufuɛ’m be suɛn.” (Saun Yolɛ 19:16) Akoto Zan blɛ su’n, ɔ kannin sran kun mɔ tɔn i wiengu’m be suɛn’n i ndɛ. Ɔ seli kɛ: ‘N klɛ ndɛ kaan m blɛli asɔnun’n i nunfuɛ mun, sanngɛ Diotrɛfu m’ɔ klo kɛ ɔ́ yó be su kpɛn’n, ɔ faman e ndɛ’n su. Ɔ maan sɛ n ju lɔ’n, ń kán sa ng’ɔ yo’n nin e wun ndɛ tɛtɛ ng’ɔ kan’n.’ (3 Zan 9, 10) Zan i wun ndɛ tɛtɛ kanlɛ’n ti’n, Diotrɛfu yoli suɛn tɔnfuɛ. Nanwlɛ, Klistfuɛ kpa fi kunndɛman kɛ ɔ́ fá Diotrɛfu nin Satan m’ɔ ti suɛn tɔnfuɛ’m be si’n, be ayeliɛ’n su.

6, 7. ?Ngue ti yɛ ɔ fataman kɛ e tɔn e wiengu suɛn ɔn?

⁶ Zoova i sufuɛ’m be ndɛ tɛtɛ kanlɛ’n nin be suɛn tɔnlɛ’n finman andɛ. ‘Ɲanmiɛn ɲrun jranfuɛ dandan mun nin mmla klefuɛ’m be kannin Zezi i wun ndɛ tɛtɛ kpa.’ (Lik 23:10) Pɔlu kusu’n, Ɲanmiɛn ɲrun jranfuɛ’m be su kpɛn Ananiasi nin kpɛnngbɛn wie’m be tɔnnin i suɛn. (Sa Nga Be Yoli’n 24:1-8) Kpɔkun, Biblu’n kan Satan i ndɛ kɛ ɔ ti ‘e niaan’m be sanmanfuɛ m’ɔ sanman be Ɲanmiɛn ja su wia nun nin kɔnguɛ’n.’ (Sa Nglo Yilɛ 12:10) E niaan sɔ mun yɛle Klistfuɛ nga bé wá kɔ́ ɲanmiɛn su mɔ blɛ kasiɛn’n nga nun be te o asiɛ’n su wa’n.

⁷ Klistfuɛ fi kunndɛman kɛ ɔ́ tɔ́n i wiengu suɛn, annzɛ ɔ́ kɛ́n i wun ndɛ tɛtɛ. Sanngɛ, sɛ y’a wunman sa kun nun kpa naan e di nun lalo’n, é yó suɛn tɔnfuɛ. Moizi mmla’n nun’n, sran ng’ɔ jaso di lalo kɛ i wiengu kun yoli sa tɛ mɔ sanngɛ w’a yoman sɔ sakpa’n, be kwla kun i sɔ suɛn tɔnfuɛ’n. (Ezipt Lɔ Tulɛ 20:16; Mmla’n 19:15-19) Afin, ninnge nga Zoova i ɲin ci be’n, i kun yɛle ‘lalofuɛ ng’ɔ diman ndɛ nanwlɛ’n.’ (Nyanndra Mun 6:16-19) I sɔ’n ti’n, e kunndɛman kɛ é fá suɛn tɔnfuɛ’m be si’n i sran suɛn tɔnlɛ’n ayeliɛ’n su mlɔnmlɔn.

Maan e kpalo i sran kunlɛ nzuɛn’n

8. ?Ngue ti yɛ be waan ‘kɛ ɔ fin i bo bolɛ nun’n, Satan ti sran kunfuɛ’n’ niɔn?

⁸ Mmusu’m be si Satan’n ti sran kunfuɛ. Zezi waan: “Kɛ ɔ fin i bo bolɛ nun’n, ɔ ti sran kunfuɛ.” (Zan 8:44) Sa nga i bo bolɛ’n nun Satan yoli mɔ i ti yɛ ɔ ti sran kunfuɛ’n, yɛle kɛ ɔ suli Adam nin Ɛvu be bo maan b’a faman Ɲanmiɛn i atin’n su. I sɔ’n ti’n, be wuli kpɔkun be fali wie’n sali be mma mun. (Rɔmfuɛ Mun 5:12) Ɔ maan kɛ be se kɛ sran kunfuɛ’n, e wun i wlɛ weiin kɛ sran ndɛ yɛ be kan ɔn, nán sa tɛ’n i ndɛ yɛ be kan ɔn.

9. ?Kɛ nga 1 Zan 3:15 fa kannin’n sa’n, wafa sɛ yɛ e kwla yo sran kunfuɛ ɔ?

⁹ Mmla blu nga Zoova fa mannin Izraɛlifuɛ mun’n, kun se kɛ: “Nán kun sran.” (Mmla’n 5:17) Akoto Piɛli kusu seli Klistfuɛ mun kɛ: ‘Ɲrɛnnɛn nga an wun i’n, nán maan ɔ yo kɛ amun a kun sran.’ (1 Piɛr 4:15) Ɔ maan e mɔ e ti Zoova i sufuɛ’n, ɔ fataman kɛ e kun sran. Sanngɛ, sɛ e kpɔ e wiengu kun naan e kunndɛ kɛ ɔ wu’n, Ɲanmiɛn ɲrun e ti sran kunfuɛ. Akoto Zan seli kɛ: ‘Sran kwlaa ng’ɔ kpɔ i niaan’n, nn ɔ ti sran kunfuɛ, yɛ an si kɛ sran kunfuɛ’n ɔ leman anannganman nguan.’ (1 Zan 3:15) Ɲanmiɛn seli Izraɛlifuɛ’m be kɛ: “Nán amun niaan i kpɔlɛ ndɛ sa ɔ tran amun klun.” (Saun Yolɛ 19:17) I sɔ’n ti’n, sa kwlaa ng’ɔ tɔ e nin e niaan Klistfuɛ kun e afiɛn’n, maan e siesie i ndɛndɛ naan Satan wa saciman e bo kun yolɛ’n.—Lik 17:3, 4.

Maan e jran ato buafuɛ’m be Si’n i ɲrun kekle

10, 11. ?Ngue yɛ ɔ fata kɛ e yo naan y’a jran Satan m’ɔ ti ato buafuɛ’m be si’n, i ɲrun kekle ɔ?

¹⁰ Mmusu’m be si Satan’n ti ato buafuɛ. Zezi waan: “Ɔ bua ato, afin ato’n ti i nzuɛn, ato’n ti i junman, i yɛ ɔ ti ato buafuɛ’m be si’n niɔn.” (Zan 8:44) Satan buali ato kleli Ɛvu. Sanngɛ Zezi liɛ’n, ɔ kan ndɛ ng’ɔ ti nanwlɛ’n kle sran mun. (Zan 18:37) Ɔ maan sɛ e ti Klist i sɔnnzɔnfuɛ’n, ɔ fataman kɛ e kan ato ndɛ. Afin klunwifuɛ’n kwlá yoman Ɲanmiɛn i Lalofuɛ. I sɔ’n ti’n, ɔ fata kɛ e “di nanwlɛ.” (Zakari 8:16; Efɛzfuɛ Mun 4:25) Afin, ‘Ɲanmiɛn m’ɔ buaman ato’n,’ ɔ yra i sufuɛ nanwlɛfuɛ’m be su.—Jue Mun 31:5; 50:16; Ezai 43:10.

¹¹ Sɛ e fiteli Satan i ato ndɛ’m be nun naan i sɔ’n yo e fɛ dan’n, é fá “atin kpafuɛ’n” su titi. (2 Piɛr 2:2; Zan 8:32) Klistfuɛ’n i like klelɛ wunmuan’n, ɔ taka “jasin fɛ’n m’ɔ ti nanwlɛ’n” su. (Galasifuɛ Mun 2:5, 14) Ɔ maan, sɛ y’a faman “ndɛ nanwlɛ’n” su titi naan y’a jranman “ato buafuɛ’m be si’n” i ɲrun kekle’n, e su kwla ɲanman nguan.—3 Zan 3, 4, 8.

Maan e jran Ɲanmiɛn i kpɔfuɛ klikli’n i ɲrun kekle

12, 13. ?Ajalɛ mennin yɛ ɔ fata kɛ e fɛ i be nga be kaci be sin si Ɲanmiɛn’n, be lika ɔ?

¹² I bo bolɛ nun’n, mmusu’m be si Satan’n nantili nanwlɛ’n nun. Sanngɛ Zezi waan ‘ɔ diman nanwlɛ mlɔnmlɔn, afin ɔ siman nanwlɛ’n.’ (Zan 8:44) Lele nin andɛ’n, Ɲanmiɛn i kpɔfuɛ klikli sɔ’n te tanndan ‘Ɲanmiɛn m’ɔ buaman ato’n,’ i ɲrun. Klistfuɛ klikli’m be blɛ su’n, Klistfuɛ wie’m be tɔli “aya nga mmusu’m be si Satan suali’n” nun. Afin atrɛkpa’n, be fɛli i ato ndɛ’m be su. I sɔ’n ti’n, Pɔlu seli Timote kɛ ɔ tu i sɔfuɛ’m be fɔ amanniɛn su. I liɛ’n, bé fló aya mɔ Satan suali m’ɔ trali be’n i nun, kpɔkun bé kwlá yó Ɲanmiɛn klun sa’n ekun. (2 Timote 2:23-26) Nanwlɛ, sɛ e tra ndɛ nanwlɛ’n nun kekle kpa’n, ɔ ti kpa tra kɛ e tɔ sran m’ɔ kacili sin sili Ɲanmiɛn’n i aya nun.

¹³ Kɛ Adam nin i yi’n be tieli mmusu’m be si Satan’n i ato ndɛ’n mɔ b’a kpalomɛn i’n ti’n, be kacili be sin sili Ɲanmiɛn. ?Andɛ kusu’n, be nga be kaci be sin si Ɲanmiɛn’n be fluwa mɔ be klɛ be’n, annzɛ be ninnge nga be fite ɛntɛnɛti nun’n, nán be kpalolɛ yɛ ɔ fata kɛ é kpálo ɔ? Sɛ e klo Ɲanmiɛn nin i ndɛ nanwlɛ’n, i sɔ cɛ yɛ é yó ɔ. Ɔ maan, ɔ fataman kɛ e sike be nga be kaci be sin si Ɲanmiɛn’n, annzɛ e yo be like. Afin, ɔ cɛman naan y’a ‘yo sa kunngba nga be yo be’n be wie.’ (2 Zan 9-11) Nán maan e nun wie fi fa mmusu’m be si Satan i ato ndɛ’m be su. Yɛle kɛ, nán maan e yaci “atin kpafuɛ’n” naan e ko su be nga be tɔn be wun suɛn kɛ be ti like klefuɛ’n mɔ be kle “like nga be ti ato’n,” mɔ be kpɛ be ‘ti nun kan ndɛ mun, yɛ bé fá e kunndɛ be sika’n’ be su.—2 Piɛr 2:1-3.

14, 15. ?Afɔtuɛ mennin yɛ Pɔlu mannin Efɛzi lɔ asɔnun kpɛnngbɛn mun ɔn? ?Yɛ afɔtuɛ mennin yɛ ɔ mannin i wiengu junman difuɛ Timote ɔ?

¹⁴ Pɔlu seli Efɛzi lɔ asɔnun kpɛnngbɛn’m be kɛ: ‘An nian amun bɔbɔ amun wun kpa, yɛ an nian bua fa nga Ɲanmiɛn wawɛ’n fa amun sieli be su’n be su kpa, yɛ an nian Ɲanmiɛn i asɔnun’n m’ɔ fɛ i bɔbɔ wa’n toli’n i lika. N si kɛ, kɛ n ko wɔ’n, gboklo wlɛfuɛ’m bé wá wlú amun nun, yɛ bé sáci bua fa sɔ’n. Yɛ amun nun sran wie’m bé wá jáo bé kán ndɛ m’ɔ timɛn i su’n bé fá láka Klistfuɛ mun naan be su be su.’ (Sa Nga Be Yoli’n 20:28-30) Kɛ i blɛ juli mɔ sran sɔ mɔ be nin Ɲanmiɛn b’a bu’n be yili be wun nglo’n, be ‘kannin ndɛ m’ɔ timɛn i su’n’ sakpa.

¹⁵ Afuɛ 65 nun Klistfuɛ klikli’m be blɛ su’n, akoto Pɔlu mannin Timote i afɔtuɛ kɛ ɔ ‘kan ndɛ nanwlɛ m’ɔ kpɛmɛn i wun’n.’ Kpɔkun ɔ seli i ekun kɛ: ‘Nán fa ɔ wun wla ndɛ ngbɛnngbɛn mɔ be nin Ɲanmiɛn ndɛ’n be timan kun’n be nun, afin be nga be yo sɔ’n be faman be wun mantanman Ɲanmiɛn lele be nin i bu. Be nuan nun ndɛ’n ɔ́ yó kɛ kannin sa, ɔ́ trɛ́. Be nun wie yɛle Imene nin Filɛti mɔ b’a yaci ndɛ nanwlɛ’n. Be se sran’m be kɛ be nga be wuli’n b’a cɛn, ɔ maan be wie’m be lafiman Ɲanmiɛn su kpa kun.’ I blɛ sɔ’n nun yɛ be nga be nin Ɲanmiɛn b’a bu’n be boli be wun nglo yilɛ’n i bo ɔ! Sanngɛ Pɔlu waan: ‘Ɲanmiɛn i sua’n i bo ase m’ɔ wlali’n ɔ́ jrán kekle.’—2 Timote 2:15-19.

16. ?Kannzɛ Ɲanmiɛn i kpɔfuɛ dan’n fɛ i ato ndɛ mun tru lika nun’n, sanngɛ ngue ti yɛ maan titi e klo Ɲanmiɛn nin i Ndɛ’n niɔn?

¹⁶ Satan sin be nga be nin Ɲanmiɛn b’a bu’n be lika titi naan ɔ́ sáci Ɲanmiɛn i sulɛ kpafuɛ’n, sanngɛ ɔ yoman ye. I afuɛ ya kun afuɛ ablasan nin nso su yɛ’n, Charles Taze Russell fɛli i ɲin sieli asɔnun’m be like klelɛ’n su kpa. I waan ɔ́ nían naan sɛ be di nanwlɛ o. Sanngɛ, ɔ wunnin kɛ be like klelɛ’n kwlaa nun’n, be kpɛ Biblu’n nun ndɛ’n i wun. I sɔ’n ti’n, Russell nin i wiengu akpasua kan mɔ be klo ndɛ nanwlɛ’n, be takali be Biblu’n nun like suanlɛ akpasua kun Pittsburgh lɔ. Ɔ o Amlɛnkɛn’m be lɔ lika nga be flɛ i Pennsylvanie i nun lɔ. Kɛ ɔ fɛ i lɛ lele m’ɔ́ fá jú andɛ’n, ɔ su wa di afuɛ 140. Afuɛ kpanngban sɔ nun’n, Zoova i sufuɛ’m be ndɛ nanwlɛ’n i silɛ’n, ɔ nin be Ɲanmiɛn klolɛ’n w’a yo dan. Kpɔkun kannzɛ Ɲanmiɛn i kpɔfuɛ dan’n fɛ i ato ndɛ mun tru lika nun’n, sanngɛ sran kpa nanwlɛfuɛ m’ɔ si ngwlɛ’n mɔ Ɲanmiɛn ninnge’m be nun’n ɔ lafiman’n, ɔ uka e maan titi e klo Zoova, ɔ nin i Ndɛ’n.—Matie 24:45.

Nán e lo e wun man mɛn’n i siefuɛ’n naan ɔ sie e

17-19. ?Mɛn nga Satan ti i min’n, yɛle mennin? ?Yɛ ngue ti yɛ ɔ fataman kɛ e klo mɛn sɔ’n i dilɛ ɔ?

¹⁷ E wun aya kun ekun nga Satan sua’n, yɛle kɛ ɔ laka e naan e klo sran mɔ be siman Ɲanmiɛn’n be mɛn dilɛ’n. Kɛ Zezi kán Satan ndɛ’n, ɔ flɛli i kɛ: “Sran ng’ɔ sie mɛn nga’n.” Kpɔkun ɔ seli kɛ: ‘Ɔ kwlá yoman n like fi mlɔnmlɔn.’ (Zan 14:30) E kusu’n, e si kɛ Satan m’ɔ ti “klunwifuɛ’n sie mɛn wunmuan’n.” (1 Zan 5:19) Sanngɛ nán e lo e wun mɛn i! Kɛ mɔ Satan kunndɛ kɛ Zezi kaci i sin si Ɲanmiɛn’n ti’n, ɔ fali “mɛn i famiɛn diwlɛ’n kwlaa” kleli Zezi. Sanngɛ Zezi kpaloli i sɔ liɛ’n i kekle kpa. (Matie 4:8-10) Mɛn nunfuɛ mɔ Satan sie be’n, be kpɔ Klist i sɔnnzɔnfuɛ mun. (Zan 15:18-21) Ɔ maan, sɛ akoto Zan seli kɛ nán e klo mɛn dilɛ’n, i ndɛ yo fɛ!

¹⁸ Zan seli kɛ: ‘Nán an klo mɛn dilɛ’n, nán an klo ninnge nga be o mɛn’n nun’n. Sran ng’ɔ klo mɛn dilɛ’n, nn ɔ kloman e Si’n. Like nga be yo be mɛn’n nun’n i kwlaa’n: be ɲin m’ɔ blo ninnge’m be su’n, nin angunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi finman e Si’n, sanngɛ be ti mɛn’n nun nzuɛn. Mɛn’n nin i nun ninnge kwlaa mɔ sran ɲin blo su’n, bé wíe, sanngɛ sran ng’ɔ yo Ɲanmiɛn klun sa’n, ɔ́ ká lɛ tititi.’ (1 Zan 2:15-17) Nanwlɛ, ɔ fataman kɛ e klo mɛn dilɛ’n mlɔnmlɔn. Afin i nun ninnge mɔ sran’m be ɲin blo su’n, Zoova ɲin ci be.

¹⁹ ?Yɛ sɛ e awlɛn’n tran mɛn dilɛ’n su’n nin? Sɛ ɔ yo sɔ’n, maan e srɛ Ɲanmiɛn kɛ ɔ uka e naan e awlɛn tu su. (Galasifuɛ Mun 5:16-21) Sɛ e wun i wlɛ kɛ ‘mmusu tɛtɛ mɔ be o nglo lɔ’n’ mun yɛ be ti sran tɛtɛ’m be ‘kpɛnngbɛn mun’n,’ é nían e wun su titi “mɛn nun sa tɛtɛ yolɛ’m be nun.”—Zak 1:27; Efɛzfuɛ Mun 6:11, 12; 2 Korɛntfuɛ Mun 4:4.

20. ?Ngue ti yɛ e kwla se kɛ e ‘timan mɛn nunfuɛ’ ɔ?

²⁰ Kɛ Zezi kɛ́n i sɔnnzɔnfuɛ’m be ndɛ’n, ɔ seli kɛ: ‘Be timan mɛn nunfuɛ kɛ n kusu n timan mɛn nunfuɛ’n sa.’ (Zan 17:16) Klist i niaan mɔ bé kɔ́ ɲanmiɛn su’n, be nin be janvuɛ’m be nian be wun su titi naan be nantilɛ’n, ɔ nin be Ɲanmiɛn sulɛ’n nun’n, b’a yoman kɛ mɛn nunfuɛ mun sa. (Zan 15:19; 17:14; Zak 4:4) Kɛ mɔ e timan mɛn nunfuɛ mɔ e “bo sa nga be yo ɔ ɔ ti su’n i ndolo’n” ti’n, sran tɛtɛ’m be kpɔ e. (2 Piɛr 2:5) Sran sɔ mɔ e tran be afiɛn’n, wie’m be kunndɛ bla nin bian sukusuku, be kunndɛ sran’m be yi nin be wun mun, be di ndrunmun, be sɔ amuɛn mun, be wua, be bua ato, kpɔkun be nɔn nzan be bo. (1 Korɛntfuɛ Mun 5:9-11; 6:9-11; Sa Nglo Yilɛ 21:8) Sanngɛ e liɛ’n, ninnge tɛtɛ sɔ mɔ ‘angunndan nga sran’m be bu’n’ yɛ ɔ su be bo yɛ maan be yo be’n, e yoman wie.—1 Korɛntfuɛ Mun 2:12.

Nán e man mmusu’m be si Satan’n i wluwlɛ 

21, 22. ?Afɔtuɛ nga Pɔlu mannin m’ɔ o Efɛzfuɛ Mun 4:26, 27 nun’n, wafa sɛ yɛ e kwla nanti su ɔ?

²¹ Nán ‘angunndan nga sran’m be bu’n’ yɛ ɔ sie e ɔ. Sanngɛ Ɲanmiɛn wawɛ’n yɛ ɔ sie e ɔ. Ɔ maan, e yo sa nga Ɲanmiɛn wawɛ’n maan sran yo’n. Sa sɔ’m be wie yɛle kɛ e klo Ɲanmiɛn nin sran, kpɔkun e yo sa i nuan su. (Galasifuɛ Mun 5:22, 23) I sɔ’n uka e maan, kɛ Satan kunndɛ kɛ ɔ́ sáci e Ɲanmiɛn sulafilɛ’n, e jran kekle. Mmusu’m be si Satan’n kunndɛ kɛ e ‘fa ya naan e yo sa tɛ,’ sanngɛ Ɲanmiɛn wawɛ’n uka e maan e ‘gua ya ble’n i ase, e yaci ya’n mlɔnmlɔn.’ (Jue Mun 37:8) Sa wie nun’n, e ndɛ m’ɔ yo fɛ’n ti’n, e kwla fa ya. Sanngɛ i sɔ’n nun bɔbɔ’n, Pɔlu man e afɔtuɛ. I waan: “Sɛ an fa ya’n, nán an yo sa tɛ. Nán an fa ya sɔ’n lele maan wia’n tɔ su. Nán an man mmusu’m be si Satan’n i wluwlɛ.”—Efɛzfuɛ Mun 4:26, 27.

²² Sɛ e fa ya naan e yaciman’n, e kwla yo sa tɛ. Kpɔkun mmusu’m be si Satan’n, ɔ kwla fa e ya falɛ sɔ’n bubu asɔnunfuɛ’m be nun, annzɛ ɔ su e bo maan e tɔ sa tɛ nun. I sɔ’n ti’n, ɔ fata kɛ e siesie e nin e wiengu mun e afiɛn ndɛ mun kɛ nga Ɲanmiɛn waan e fa yo’n sa ndɛndɛ. (Saun Yolɛ 19:17, 18; Matie 5:23, 24; 18:15, 16) Kannzɛ e ndɛ yo fɛ naan e fa ya’n, nán maan e fa ya sɔ’n lele naan ɔ kaci sran’n i kpɔlɛ. Sanngɛ, maan Ɲanmiɛn wawɛ’n sie e naan e tra e awlɛn naan e yo sa i nuan su.

23. ?Like suanlɛ ng’ɔ́ bá lɔ nun’n, kosan mennin mun yɛ é wá tɛ́ be su ɔ?

²³ Like suanlɛ nga nun’n, y’a kan mmusu’m be si Satan i nzuɛn m’ɔ fataman kɛ e nian su’n be nun wie be ndɛ. Sanngɛ sran wie’m be kwla usa kosan wie mun. Be yɛle kɛ: ?Ɔ fata kɛ e sro Satan? ?Ngue ti yɛ Satan kle Klistfuɛ’m be ɲrɛnnɛn ɔn? ?Ngue yɛ e kwla yo naan mmusu’m be si Satan’n w’a ɲanman e ɔ?

[Ja ngua lɛ ndɛ’n]

?Wafa sɛ yɛ amún tɛ́ su ɔ?

• ?Ngue ti yɛ ɔ fataman kɛ e tɔn sran suɛn le ɔ?

• ?Kɛ nga 1 Zan 3:15 fa kan sa’n, ngue ti yɛ ɔ fataman kɛ e yo sran kunfuɛ ɔ?

• ?Ajalɛ mennin yɛ ɔ fata kɛ e fɛ i be nga be kaci be sin si Ɲanmiɛn’n be lika ɔ? ?Yɛ ngue ti ɔ?

• ?Ngue ti yɛ ɔ fataman kɛ e klo mɛn dilɛ ɔ?

[Foto, bue 5]

Nán Klistfuɛ wie fi man mmusu’m be si Satan i wluwlɛ naan ɔ saci e bo kun yolɛ’n.

[Foto mun, bue 7]

?Ngue ti yɛ Zan se kɛ nán e klo mɛn dilɛ’n niɔn?