Ninnge cinnjin nga be kwla uka e naan y’a si awlo yalɛ koko’n

‘NÁN ndɛ nga min waan ń kán’n yɛ ɔ o lɛ.’ ‘M’an simɛn i kan.’ ?I sɔ sa liɛ’n nin a juman amun su le? Yalɛ kokolɛ’n ti kɛ like kwlaa sa. Be suan. Wie’m be si i yo kpa. Sanngɛ ɔ ti tankantankan wie’m be sa nun. Sɛ amun siman yalɛ koko’n, amun kwla suan naan amun a kan amun klun ndɛ b’a kle sran mun naan w’a yo be fɛ.

Sran wie’m be nvle nun ninnge yolɛ’n i su yɛ be nian yɛ be nin be yi’n annzɛ be wun’n be tran ɔn. Be seli wie’m be kɛ ‘yasua’ ijɔman ngboko. Yasua ng’ɔ ijɔ ngboko’n, be bu i finfinfuɛ. Kɛ Biblu’n se kɛ: ‘Maan sran’m be kwlakwla be sie be su be tie ndɛ nga be kan’n kpa, nán maan sran fi kan ndɛ ndɛnndɛ’n,’ i su ɔ. (Zak 1:19) Ndɛ sɔ’n wɔ yasua nin bla mun, kpɔkun ɔ kle kɛ nán ijɔlɛ ngbɛn sa’n, yɛ be flɛ i yalɛ kokolɛ’n niɔn. Sran nɲɔn be kwla tran be ijɔ lele. Sanngɛ sɛ be nun wie fi tieman ndɛ nga i wiengu kan’n, i sɔ liɛ’n timan yalɛ kokolɛ. Like ng’ɔ kwla yo naan yalɛ kokolɛ’n w’a yo kpa kɛ nga Biblu’n fa kɛn i lɛ’n sa’n, yɛle kɛ ɔ fata kɛ e sie e su sran ng’ɔ su ijɔ’n i nuan’n bo.

Be kokoman yalɛ

Nvle wie’m be nun’n, bla’m be kanman be klun ndɛ liɛ mun. Yasua’m be kusu be ɲin ti saa be awlo nun ndɛ’m be su. I sɔ nvle’m be nun’n, yasua’n annzɛ bla’n bɔbɔ yɛ ɔ bu like nga i yi’n annzɛ i wun’n le i awuliɛ’n i sin ɔn. Yasua’n ijɔman sanngɛ kɛ i yi’n niɛn i sa’n, ɔ si like ng’ɔ miɛn i’n. Kpɔkun ɔ yo i su like. Be liɛ’n kɛ be ti be wun aniɛn’n liɛ’n kɛ ngalɛ’n sa. Sanngɛ i sɔ yalɛ kokolɛ liɛ’n, ɔ ti kɛ be ja kunngba su able silɛ sa. Afin, bla’n bu angunndan naan w’a wun like ng’ɔ mian i wun i sa’n. Sanngɛ blɛ sunman nun’n, yasua’n yomɛn i sɔ bla’n i lika wie.

Ɔ ti su kɛ nvle wie nun’n, yasua’m be fa be ɲin be sie i like ng’ɔ mian be yi’n i su. Kannzɛ bɔbɔ ɔ ti sɔ’n, sanngɛ sɛ be nga be o aja nun’n, be suan yalɛ kokolɛ’n ɔ́ yó kpa mán be.

Be afiɛn yalɛ kokolɛ’n ti cinnjin kpa

Yalɛ kokolɛ nanwlɛ su’n, ɔ yo maan e wun ndɛ’m be wlɛ yɛ e kpɛman ndɛ’m be wun. Izraɛli nvle’n i bo bolɛ nun’n, Ribɛni akpasua’n, nin Gadi akpasua’n, ɔ nin Manase akpasua’n mɔ be trannin Zurdɛn i wia afiliɛ lɔ lika nun’n, be kplannin Ɲanmiɛn suwlɛ kun nzue ba’n i nuan. ‘Be kplɛnnin i dan, ɔ maan ɔ timan fiawa.’ Izraɛli nvle’n i akpasua’n i onga’n w’a wunman ajalɛ sɔ’n i wlɛ kpa. Be buli i kɛ akpasua nga be o nvle’n i sin lɔ mɔ be kplannin Ɲanmiɛn suwlɛ sɔ’n, be su wa sɔ amuɛn. Ɔ maan, nvle i akpasua nga be buli i kɛ be nga’m be yoli ɲin kekle Ɲanmiɛn su’n, be nin be bali alɛ kunlɛ. Sanngɛ kwlaa naan b’a ɔ alɛ’n i kunlɛ’n, akpasua nga be o wia atɔliɛ lɔ’n, be sunmannin sran kɛ be ko wun be nga be o wia afiliɛ lɔ’n be wun. Nanwlɛ, ajalɛ sɔ mɔ be fali’n yoli ngwlɛlɛ ajalɛ. Be nga be o wia atɔliɛ lɔ’n, be wa wunnin kɛ nán amuɛn sɔlɛ ti yɛ akpasua kun nga’m be kplannin Ɲanmiɛn suwlɛ sɔ’n niɔn. Like ti mɔ wia afiliɛ lɔ akpasua’n yoli i sɔ’n, yɛle kɛ srɛ kunnin be kɛ cɛn wie lele’n, akpasua nga’m bé sé be kɛ: ‘Amun like fi nunman Zoova sa nun.’ Ɲanmiɛn suwlɛ sɔ mɔ be kplannin’n, ɔ ti nzɔliɛ m’ɔ kle kɛ be kusu be ti Zoova sufuɛ wie ɔ. (Zozie 22:10-29) I li bɔɔ be flɛli Ɲanmiɛn suwlɛ sɔ’n kɛ Lalofuɛ. Afin, ɔ di lalo kɛ Zoova yɛ ɔ ti Ɲanmiɛn Kpli ɔ.—Zozie 22:34.

Ndɛ’n i nun yiyilɛ sɔ’n guali akpasua nga be kunndɛ kɛ bé dí alɛ’n be wla ase. Ɔ maan like nga be waan bé yó akpasua kun nga mun’n, b’a yomɛn i kun. Be wun aniɛn tilɛ’n, ɔ guali ya tɛ’n i ase. I sin’n, kɛ Izraɛli nvle m’ɔ ti kɛ Ɲanmiɛn i yi sa’n, ɔ yoli ɲin kekle Ɲanmiɛn su’n, Ɲanmiɛn sili i aunnvuɛ. Yɛ ɔ seli i kɛ ɔ́ ‘kɛ́n i awlɛn su ndɛ.’ (Oze 2:16) Nanwlɛ, i sɔ’n ti ajalɛ kpa man be nga be o aja nun’n! Amun mian amun ɲin tu amun klun naan amun nin amun yi’n annzɛ amun wun’n be koko yalɛ klanman. I sɔ yolɛ maan amún wún angunndan nga sran kun bu’n. Sɛ sran i angunndan’n ti sannganwa kpa’n, i sɔ’n nun yɛ i sɔ yolɛ’n ti cinnjin ɔn. Sran wie’m be waan ijɔlɛ sa’n, be toman. Sanngɛ Pati Mialiki m’ɔ ti zronali klɛfuɛ Amlɛnkɛn be mɛn’n nun lɔ’n, ɔ seli kɛ: “Sɛ be toman ijɔlɛ’n bɔbɔ’n, sanngɛ ɔ ti cinnjin kpa. Sran wie’m be kwlá tuman be klun be kanman be klun ndɛ. Sɛ ɔ ti kɛ be yo i sɔ’n, nn i su mmlusuɛ nga bé ɲɛ́n i’n, ɔ́ trá banki nun sika lele.”

Maan e yalɛ kokolɛ’n wɔ i ɲrun

Sran wie’m be kwla kpɛ i kpo be se kɛ: ‘Kɛ e jali lele m’ɔ́ fá jú andɛ’n, e nuan nin a sɛman le. E aja liɛ’n sacili.’ Wie’m be kwla bu i kɛ, kɛ be jali wieli’n, be yalɛ kokolɛ kwlá kɔmɛn i ɲrun kun. Sanngɛ amun bu be nga mɔ be nvle liɛ nun’n, be fuɛ mun yɛ be man be bian annzɛ bla’n be angunndan be nian. Nvle sɔ’m be nun’n, be nga be o aja’n nun’n, be nin be yi annzɛ be wun’n be si yalɛ koko.

Izaaki nin Rasɛli mɔ be trannin wia afiliɛ lɔ lika’n nun’n, be si mun yɛ be siesieli be aja’n niɔn. Be sunmannin sran kun kɛ ɔ ko fa bla blɛ Izaaki. Kannzɛ bɔbɔ be si mun yɛ be siesieli be aja’n, sanngɛ Izaaki nin i yi Rebeka mɔ be wuli i afuɛ ko ju 4.000 yɛ’n, be man e ajalɛ kpa bian nin bla be yalɛ kokolɛ’n nun. Izaaki ɔli wlanwlanlɛ bo nun lɔ yɛ ɔ nin sran nga be sunmɛnnin i’n be yiali ɔ. Sran’n ‘boli lɔ jasin’n kwlaa kleli Izaaki.’ Biblu’n kan gua su kɛ: ‘Izaaki sikeli Rebeka i nin Sara i tannin sua laa’n nun. Ɔ fɛ i yoli i yi. Izaaki kloli i.’—Bo Bolɛ 24:62-67.

Maan e sie i nzɔliɛ kɛ i klikli nun’n, Izaaki dun mmua fɛli i su sieli i ndɛ nga sran nga be sunmɛnnin i kannin’n i bo. ‘I sin kwlaa’ yɛ ɔ fali Rebeka yoli i yi ɔ. Sran mɔ be sunmɛnnin i’n, i ɲin yi Ɲanmiɛn Zoova mɔ Izaaki su i’n. I sɔ’n ti’n, sɛ Izaaki lafi i su’n, i ndɛ yo fɛ. Kɛ ɔ yoli sɔ’n, Izaaki fali Rebeka yoli i yi, kpɔkun ‘ɔ kloli i.’

?Izaaki nin Rebeka be yalɛ kokolɛ’n ɔli i ɲrun klanman titi? Kɛ be wa Ezau wa jali Ɛti bla mun’n, ndɛ wa tɔli Izaaki nin Rebeka be awlo’n nun. Ɔ maan Rebeka ‘seli’ Izaaki kɛ: ‘Sɛ Zakɔbu ja Ɛti bla’n, nn be flɛ kɛ n liɛ’n a wie.’ (Bo Bolɛ 26:34; 27:46) E wun i lɛ nun kɛ Rebeka kannin ndɛ ng’ɔ o i klun’n weiin.

Kɛ ɔ yoli sɔ’n, Izaaki kusu seli Zakɔbu m’ɔ ti Ezau i niaan’n kɛ nán maan ɔ ja Kanaan bla. (Bo Bolɛ 28:1, 2) Like ng’ɔ fata kɛ Rebeka yo’n, yɛ ɔ yoli ɔ. Izaaki nin i yi Rebeka be tuli be klun be kokoli be awlo ndɛ’m be su yalɛ klanman. I sɔ nun’n, be man e ajalɛ kpa andɛ. ?Yɛ sɛ ndɛ wie o lɛ naan e nin e yi’n annzɛ e wun’n e nuan sɛman su’n nin? ?Ngue yɛ ɔ fata kɛ e yo ɔ?

Wafa nga e kwla siesie e afiɛn ndɛ’n

Sɛ e nin e yi’n annzɛ e wun’n e nuan sɛman ndɛ wie su’n, nán maan e tannin nvlɛ. Sɛ e yo sɔ’n, nn e su se e yi’n annzɛ e wun’n kɛ: “N klun jɔman, i sɔ’n ti’n n kloman kɛ ɔ kusu ɔ klun jɔ wie.” ?Sɛ e tannin nvlɛ’n, i sɔ’n yɛ ɔ́ yó maan bé wún e ya falɛ’n i bo ɔ?

Ɔ nin i fata kɛ e nin e yi’n annzɛ e wun’n e tu e klun e koko ndɛ’n i su yalɛ nanwlɛ su. Sɛ e nuan nun ndɛ’n kwla yra fiaan kɛ kue yɛ b’a fa wɔ sran’n sa’n, i awlɛn tralɛ su yoman pɔpɔ. Izaaki i si Abraamu nin i nin Sara be wunnin i sɔ sa liɛ’n. Yɛle kɛ Sara kwlá wuman ba. Ɔ maan ɔ fali blɛ sɔ’n nun ajalɛ kun su. Ɔ fɛli i afanniɛn talua Agar fa mannin Abraamu kɛ ɔ nin i be wun ba. Kɛ ɔ yoli sɔ’n, Agar wuli ba yasua kun mannin Abraamu. Be flɛ i Ismaɛli. Sanngɛ i sin m’ɔ́ cɛ́ kan’n, Sara kusu wa wuli i wa liɛ Izaaki. Kɛ be kpɛli Izaaki i ɲɔnflɛn’n, Sara sieli i nzɔliɛ kɛ Ismaɛli to i wa liɛ’n i mma. Ɔ maan Sara wunnin kɛ sa su i wa’n su. Ɔ seli Abraamu kɛ ɔ kan afanniɛn bla’n nin i wa’n be bo. E wun i weiin kɛ, Sara kɛnnin i klun ndɛ weiin kleli i wun. Nanwlɛ, fuanlɛ nga Sara waan Abraamu fuan Agar nin i wa liɛ’n, w’a yoman Abraamu i klun su mlɔnmlɔn.

?Sanngɛ wafa sɛ yɛ be kwla siesieli ndɛ sɔ’n niɔn? Biblu’n se kɛ: ‘Sanngɛ Ɲanmiɛn seli i kɛ: “Wɔ afanniɛn bla’n nin i wa yasua’n be ti nán koko. Ndɛ nga Sara kɛnnin i lɛ’n yɛ yo ɔ. Afin osu nga n kɛnnin i kɛ ń mán wɔ’n ɔ fin Izaaki.”’ Ndɛ nga Zoova kannin’n, Abraamu niannin su yoli i weiin.—Bo Bolɛ 16:1-4; 21:1-14.

I yo, e kwla se kɛ ‘sɛ ɔ ti kɛ Ɲanmiɛn kwla kan ndɛ kle e’n, nn e nuan kwla sɛ!’ I sɔ liɛ’n fiti ajalɛ uflɛ nga be nga be o aja’n nun’n, be kwla fa naan b’a siesie be afiɛn ndɛ’n, i su. ?Wafa sɛ be nga be o aja nun’n, be kwla nanti ndɛ nga Ɲanmiɛn kan’n su ɔ? Ɔ fata kɛ be kanngan Ɲanmiɛn Ndɛ’n nun likawlɛ, yɛ be nanti ndɛ nga Ɲanmiɛn kan’n su.—1 Tɛsalonikfuɛ Mun 2:13.

Aniaan bla kun m’ɔ jali bian w’a cɛ’n, ɔ seli kɛ: “Kɛ talua nga b’a ja bian’n be ba min ngwlɛlɛ afɛ usalɛ’n, kosan nga n ta be usa’n, yɛle kɛ: ?A nin ɔ wun an kanngan Biblu’n nun likawlɛ? Be nga ndɛ o be aja’n nun’n, be nun sunman be yomɛn i sɔ liɛ’n.” (Tit 2:3-5) Ndɛ sɔ mɔ aniaan bla’n kannin’n, e sie i nzɔliɛ wie. Ɔ nin i fata kɛ e nin e yi’n annzɛ e wun’n, e kanngan Biblu’n nun cɛn kwlaa likawlɛ. Sɛ e yo sɔ’n, ɔ ti kɛ e ti Ɲanmiɛn Ndɛ’n i ‘aniɛn’n’ sa. Ɔ ti kɛ nn ɔ su kle e atin cɛn kwlaa sa. (Ezai 30:21) Sanngɛ sɛ é kwlá sé’n, nán maan e fa Biblu’n e kaci ngble naan cɛn kwlaa’n e kle e yi’n annzɛ e wun’n i like nga w’a yoman’n. Like ng’ɔ fata kɛ e yo’n, yɛle kɛ maan e sran nɲɔn’n, e nian wafa nga Biblu’n nun afɔtuɛ nga e kanngan nun’n, e kwla nanti be su likawlɛ’n.

?Sɛ e su siesie e afiɛn ndɛ wie’n, ngue ti yɛ e nianman fluwa Publications de la Société Watch Tower — Indexa nun naan y’a wun ndɛ sɔ’n i su ajalɛ ɔ? Atrɛkpa’n, siɛ nin niɛn mɔ b’a yo kpɛnngbɛn’n, be lika yɛ e nian ɔn, kpɔkun i sɔ’n kpɛ e afiɛn ndɛnngan. Sɛ ɔ ti sɔ’n niɔn, nán maan e kpankpan naan y’a kle e wiengu like ng’ɔ fata kɛ ɔ yo annzɛ like ng’ɔ fataman kɛ ɔ yo’n. E tran ase yɛ e nian Index nun likawlɛ. I klikli nun’n, e nian ndɛ tre nga be flɛ i kɛ ‘Siɛ nin niɛn mun’ i nun. I sin’n, e fa ndɛ tre sɔ’n i ce nga be flɛ i ‘Siɛ nin niɛn kpɛnngbɛn’m be osu nianlɛ’n.’ Kpɔkun, fluwa nga Zoova i Lalofuɛ’m be yili mɔ be kɛn i sɔ ndɛ’n, e kanngan be nun. É wá wún kɛ Biblu’n i akua sɔ mɔ b’a dun mmua b’a uka Klistfuɛ sunman’n, be kwla uka e wie.

Sɛ e kanngan Biblu’n i akua sɔ’m be nun likawlɛ’n, i sɔ’n úka e naan y’a wun e ndɛ’n i trawlɛ. Asa ekun’n, é wá wún Biblu’n nun ndɛ wie mun mɔ bé klé e wafa nga Zoova bu e ndɛ sɔ’n. Maan e kunndɛ be Biblu’n nun, naan e kanngan be nun likawlɛ. Sɛ e yo sɔ’n, é wá tíe Ɲanmiɛn i aniɛn’n yɛ ɔ́ klé e ndɛ’n i trawlɛ!

Nán e yaci yalɛ kokolɛ

?Anuan mɔ be tikeli w’a cɛ’n, y’a tike wie le? Kɛ mɔ be tikeli w’a cɛ’n ti’n, w’a di anganblalɛ, ɔ maan kɛ é cúɛn’n nn ɔ́ tɛ́. ?Yɛ sɛ be tike anuan sɔ’n titi, annzɛ be kɛnkɛn i nin ngo titi’n nin? I tikelɛ su yoman ya mlɔnmlɔn. I kunngba’n yɛle yasua nin bla’n be afiɛn yalɛ kokolɛ’n. Sɛ e fɛ i sɔ’n kaci e nzuɛn naan e kɛnkɛn i nin e Klistfuɛ nzuɛn kɛ sran klolɛ sa’n, e nin e yi’n annzɛ e wun’n e yalɛ kokolɛ’n su yoman kekle. I li bɔbɔ sɛ sa kekle tɔ’n, i sɔ nun yɛ e koko yalɛ’n niɔn.

Awlo yalɛ kokolɛ’n timan pɔpɔ. Sɛ bɔbɔ ɔ nin i fata kɛ e mian e ɲin naan y’a koko awlo yalɛ’n, maan e mian e ɲin e yo i sɔ. I liɛ’n, ɔ́ yó maan e nin e yi annzɛ e wun e afiɛn’n sɛ́ klanman.

[Ja ngua lɛ ndɛ’n]

[Foto, bue 7]

?Kɛ e nuan sɛman ndɛ kun su’n, e kunndɛ Ɲanmiɛn i sin atin?