Fluwa’n nun kannganfuɛ’m be kosan mun

Nyanndra Mun 8:22-31 kan angunndan’n i ndɛ. ?Ngue ti yɛ e se kɛ ndɛ sɔ’n ti Zezi i wun ndɛ i nun m’ɔ o ɲanmiɛn su lɔ’n niɔn?

Nyanndra Mun be fluwa sɔ mɔ Ɲanmiɛn maan be klɛli’n waan: ‘Anannganman i sa nuan ninnge ng’ɔ boli be’n, min yɛ n ti be klikli ɔ. Min yɛ ɔ dun mmua yili min naan w’a yi ninnge’n kwlaa ɔ. Kɛ oka’m bé fá fíte mɔ bé sí kɛ kpɔlɛkpɔlɛ o lika’n nun’n, nn b’a wu min. Kɛ ɔ́ síe ɲanmiɛn m’ɔ la nglo lɔ plaii’n, n wunnin nun. Nn n o i wun lɛ n sa o junman’n su. Cɛn kwlaa n yo i klun sa maan i klun jɔ klanman, nn ń kán ngowa i ɲrun, ngowa’n yɛ n kɛn i sa mlɔnmlɔn ɔn. Kɛ ɔ fin lɛ’n, kɛ n o sran’m be afiɛn’n, ɔ yo min fɛ.’

Nán angunndan jrɛiin sa’n i ndɛ yɛ Biblu’n nun ndɛ mma sɔ’n kan ɔn. Kusu nán Ɲanmiɛn i angunndan’n i ndɛ wie yɛ ɔ kan ɔn. Afin Ɲanmiɛn ti anannganman, yɛ nán sran uflɛ yɛ ɔ ‘boli’ i angunndan’n niɔn annzɛ ɔ ‘wuli’ i ɔ. Angunndan silɛ’n ti i nzuɛn. (Jue Mun 90:1, 2) Sanngɛ angunndan mɔ Nyanndra Mun kɛn i ndɛ’n, ɔ ti Zoova i sa nuan ninnge ng’ɔ ‘boli’ be’n, be klikli’n. Asa ekun’n, ndɛ sɔ’n se kɛ angunndan’n ijɔ yɛ ɔ yo like. Sanngɛ nn e si kɛ sran yɛ ɔ kwla yo sɔ ɔ. Ɔ maan, angunndan nga Nyanndra Mun kɛn i ndɛ’n, sran kun i ndɛ cɛ yɛ ɔ kan ɔn.—Nyanndra Mun 8:1.

Nyanndra Mun be fluwa’n waan ɔ fin lalaa kpa’n, angunndan’n o Zoova m’ɔ ti like Yifuɛ’n i wun lɛ yɛ ‘i sa o junman’n su.’ Nanwlɛ, Zezi i ndɛ cɛ yɛ Biblu’n nun ndɛ mma sɔ’n kan ɔn. I nun mɔ Zezi o ɲanmiɛn su lɔ’n, ɔ nin Zoova be dili junman likawlɛ. Ɔ maan Biblu’n waan: ‘Kɛ bé yí ninnge’n kwlaa’n, nn ɔ o lɛ, i ti yɛ maan be kwlaa be o lɛ ɔ.’—Kolɔsfuɛ Mun 1:17; Sa Nglo Yilɛ 3:14.

Sɛ Biblu’n fali angunndan’n sunnzunnin Zezi’n, i su ɔ. Afin Zezi yɛ ɔ yili Zoova i klun sa’n, ɔ nin i mmla’n be nglo kleli sran mun ɔn. Ɔ maan be wunnin Ɲanmiɛn i ngwlɛlɛ’n. I nun mɔ Zezi o ɲanmiɛn su lɔ’n, be flɛ i Ɲanmiɛn Ndɛ’n yɛle kɛ ɔ ijɔ Ɲanmiɛn nuan. (Zan 1:1) Biblu’n kɛn i ndɛ ekun kɛ i yɛ maan ‘e si kɛ Ɲanmiɛn kwla sa kwlaa yo, yɛ ɔ si sa’n kwlaa’ ɔ. (1 Korɛntfuɛ Mun 1:24, 30) Asa ekun’n, sran m’ɔ klo be dan’n ti’n, ɔ fɛli i wun kpɔli be ti. Nanwlɛ, wafa nga Biblu’n kan Zezi i sran’n i wafa ng’ɔ ti’n i ndɛ’n, ɔ yo ɲɛnmɛn!—Zan 3:16.