Maan e ayeliɛ’n kle kɛ e lafi Ɲanmiɛn su
‘Sran ng’ɔ lafi Ɲanmiɛn su’n, sɛ sa ng’ɔ yo be’n be timan kpa’n, nn i Ɲanmiɛn sulafilɛ’n ti ngbɛn.’—ZAK 2:17.
1. ?Ngue ti yɛ Klistfuɛ klikli’m be niannin be ayeliɛ’n nin be Ɲanmiɛn sulafilɛ’n su ɔ?
SƐ É kwlá sé’n, Klistfuɛ klikli’m be ngba be nantilɛ’n kleli kɛ be lafi Ɲanmiɛn su sakpa. Zaki m’ɔ ti Zezi i sɔnnzɔnfuɛ’n seli Klistfuɛ’m be kɛ: ‘Ɲanmiɛn ndɛ nga an ti’n, an lafi su. Nán an tie i ngbɛn. Sɛ sran kun o sa m’ɔ deman wunmiɛn’n, nn w’a wu. I kunngba’n niɔn, sɛ sran kun se kɛ ɔ lafi Ɲanmiɛn su mɔ be wunmɛn i sɔ i nzuɛn’n nun’n, nn i Ɲanmiɛn sulafilɛ’n ti ngbɛn.’ (Zak 1:22; 2:26) Kɛ Zaki kannin ndɛ sɔ mɔ afuɛ 35 sinnin’n, Klistfuɛ sunman b’a yaciman sɔ nantilɛ. Yɛle kɛ be ayeliɛ’n kleli titi kɛ be lafi Ɲanmiɛn su. Sanngɛ be nun wie’m b’a nantiman sɔ kun. I wie yɛle kɛ Zezi yili Smirni lɔ asɔnunfuɛ’m be ayɛ. Sanngɛ Sardi lɔfuɛ’m be liɛ’n, ɔ seli be kɛ: ‘N si amun ɲoliɛ’n, sran’m be se kɛ amun ɲin o su, sanngɛ amun a wu.’—Sa Nglo Yilɛ 2:8-11; 3:1.
2. ?Kɛ ɔ ko yo naan Klistfuɛ kun w’a wun i wlɛ kɛ ɔ lafi Ɲanmiɛn su annzɛ ɔ lafimɛn i su’n ti’n, kosan mennin yɛ ɔ fata kɛ ɔ fa usɛ i wun ɔn?
2 Kɛ mɔ Sardi lɔ Klistfuɛ’m be ti sɔ’n ti’n, Zezi wlali be fanngan kɛ wafa nga i bo bolɛ’n nun be kloli Klist i ndɛ nanwlɛ’n, be nian nun be klo i sɔ ekun. Yɛ be kan be wun be yo like nga be kwla yo naan be nin Ɲanmiɛn be afiɛn’n w’a yo kpa’n. (Sa Nglo Yilɛ 3:2, 3) I sɔ’n ti’n, maan e kwlaa e usa e wun kosan yɛ’n: ‘?Kɛ n o yɛ’n, sa nga n yo’n kle sɛ? ?Ɔ kle weiin kɛ n te lafi Ɲanmiɛn su sakpa? ?Sɛ nán jasin fɛ’n bolɛ’n, annzɛ aɲia’m be bo kɔlɛ’n nun’n, n wla min wun ase naan b’a wun i sɔ liɛ’n kpa like kwlaa nga n yo’n nun?’ (Lik 16:10) Wafa nga sran kun kwla kle kɛ ɔ lafi Ɲanmiɛn su’n, ɔ sɔnnin. Sanngɛ kɛ e yia e niaan wie mun kɛ e wa yiyi e ɲin su’n, annzɛ kɛ e ja bla mɔ e flɛ sran mun kɛ be wa di i ti aliɛ’n, wafa nga e kwla kle kɛ e lafi Ɲanmiɛn su’n i ndɛ yɛ é wá kɛ́n i siɛn’n niɔn.
Kɛ sran nga e yia be kɛ e wa yiyi e ɲin su’n b’a sɔnman’n
3. ?Yialɛ mɔ be yia be di fɛ’n i su ndɛ mennin yɛ Biblu’n kan ɔn?
3 Klistfuɛ kwlaa klo fɛ, ɔ maan sɛ i niaan’m be yia’n, ɔ kunndɛ kɛ be yiɛ i wie. Ɲanmiɛn Zoova “di aklunjuɛ.” Yɛ ɔ kunndɛ kɛ i sufuɛ’m be di aklunjuɛ wie. (Jue Mun 104:31) I bɔbɔ yoli maan ndɛ nga Salomɔn kannin’n, be klɛli i Biblu’n nun. Salomɔn seli kɛ: ‘N wunnin i kɛ like ng’ɔ ti kpa man sran’n yɛle aklunjuɛ dilɛ. Afin ɲanmiɛn’n i bo wa’n, like fi timan kpa manman sran kɛ like dilɛ, nin nzan nɔnlɛ, ɔ nin aklunjuɛ ɲanlɛ’n sa.’ (Akunndanfuɛ’n 3:1, 4, 13; 8:15) I sɔ aklunjuɛ liɛ’n, e kwla di i awlo lɔ aliɛ dilɛ’n sin annzɛ kɛ aniaan wie’m be yia be yiyi be ɲin su’n.—Zɔb 1:4, 5, 18; Lik 10:38-42; 14:12-14.
4. ?Sran ng’ɔ yia sran mun’n, ngue su yɛ ɔ fata kɛ i ɲin tran kpa ɔ?
4 Sɛ e bɔbɔ yɛ e siesie ninnge mun’n, kannzɛ bɔbɔ sran’m be sɔnnin annzɛ b’a sɔnman o, ɔ nin i fata kɛ e dun mmua e tran e bu angunndan kpa. (Rɔmfuɛ Mun 12:13) Afin e kunndɛ kɛ ‘ngwlɛlɛ m’ɔ fin ɲanmiɛn su’n,’ ɔ sie e naan e “yo i kwlaa i nuan su sɛsɛsɛ.” (1 Korɛntfuɛ Mun 14:40; Zak 3:17) Akoto Pɔlu seli kɛ: ‘Sɛ amún dí like o, sɛ amún nɔ́n nzue annzɛ nzan o, sɛ amún yó like wie o, an yo i kwlaa sɔ’n i nuan su maan Ɲanmiɛn ɲan ɲrun. Nán an saci [sran] Glɛki mun nin Zuifu mun.’ (1 Korɛntfuɛ Mun 10:31, 32) ?I sɔ’n ti’n, sɛ e yia sran mun’n, ninnge mennin wie’m be su yɛ ɔ fata kɛ e ɲin tran kpa ɔ? Sɛ e dun mmua bu ninnge sɔ’m be angunndan sie’n, e ngba nga e yiali’n e ayeliɛ’n klé kɛ e lafi Ɲanmiɛn su sakpa.—Rɔmfuɛ Mun 12:2.
?Wafa sɛ yɛ e kunndɛ kɛ e ɲin su yiyilɛ aɲia’n ɔ yo ɔ?
5. ?Sɛ sran kun yiɛ i wiengu mun naan ɔ́ mán be nzan annzɛ ɔ su manman be’n, annzɛ kusu bé tó jue’n, ngue yɛ ɔ fata kɛ ɔ yo ɔ?
5 Sɛ sran kun yiɛ i wiengu mun naan ɔ́ mán be nzan annzɛ ɔ su manman be’n, ɔ fata kɛ ɔ nian nun kpa. Nán nzan’n yɛ maan aɲia’n yo fɛ ɔ. Cɛn kun mɔ Zezi yili atrɛ mannin sran kpanngban kpa be like kɛ be di’n, nán e wla fi su kɛ kpaun nin kpatra yɛ ɔ fa mannin be ɔ. W’a sieman su nzan, sanngɛ nn ɔ kwla yo i sɔ’n. (Matie 14:14-21) Sanngɛ sɛ e waan é mán sran’m be nzan’n, maan e man be ngwlɛlɛ su. Be nga be nɔnman nzan kusu’n, maan e kunndɛ be liɛ nga be kwla nɔn’n. (1 Timote 3:2, 3, 8; 5:23; 1 Piɛr 4:3) Sɛ e wlawla sran mun naan like nga be nɔn’n ti’n be wunnɛn’n yo be kɛ ‘wuo wie yɛ w’a ka be sa’n,’ ɔ timan kpa. (Nyanndra Mun 23:29-32) ?Yɛ sɛ bé bó miziki annzɛ bé tó jue aɲia sɔ’n i bo’n nin? Sɛ ɔ ti sɔ’n, jue nga bé tó’n, ɔ nin wafa nga be to jue bɔbɔ ba’n, maan e nian nun kpa. (Kolɔsfuɛ Mun 3:8; Zak 1:21) Kɛ Klistfuɛ sunman be yia kɛ bé yíyí be ɲin su’n, be bo Mélodies du Royaume, annzɛ be to i sɔ jue mun. Kɛ be yo sɔ’n, be wun kɛ be aɲia’n yo fɛ. (Efɛzfuɛ Mun 5:19, 20) Sɛ miziki yɛ e su tie’n, nán maan e mɛn i nɛn’n su ngboko naan sɛ sran wie’m be su koko yalɛ’n, b’a timan sa. Annzɛ kusu naan w’a loman e mantanfuɛ’m be ngasi.—Matie 7:12.
6. ?Wafa sɛ yɛ yalɛ kokolɛ’n nun annzɛ ninnge uflɛ nun’n, sran ng’ɔ yiɛ i wiengu mun’n kwla kle kɛ ɔ lafi Ɲanmiɛn su ɔ?
6 Kɛ Klistfuɛ’m be yia kɛ bé yíyí be ɲin su’n, be kwla yo ninnge fanunfanun. I wie yɛle kɛ, be kwla man be nɛn’n su be kanngan fluwa wie’m be nun, annzɛ be kan sa fɛfɛ wie mɔ be wunnin be’n be ndɛ. Sɛ aniaan ng’ɔ yiali sran mun’n wun kɛ ndɛ nga be su kan’n ɔ nin Klistfuɛ fataman’n, ɔ kwla fa sran’m be ɲin sie i ndɛ ng’ɔ nin i fata’n su amanniɛn su. Asa ekun’n, sɛ ɔ wun kɛ sran kun o lɛ naan i kunngba yɛ ijɔlɛ’n o i nuan sa trilili’n, maan ngwlɛlɛ su ɔ fa ijɔlɛ’n wla sran uflɛ nuan. Ɔ kwla yo gbaflɛn nin talua nga be o lɛ’n. Annzɛ kusu i bɔbɔ kwla fiti ndɛ wie su naan sran’m be koko su yalɛ. Be ɲin su yiyilɛ aɲia kɛ ngalɛ’n sa’n, ɔ yo bakanngan nin kpɛnngbɛn’m be kwlaa be ye. Sɛ e mɔ e yiali sran mun’n e yo ninnge mun ngwlɛlɛ su nin amanniɛn su’n, be kwlaa nga e yiali be’n ‘bé wún kɛ e ti wɛtɛɛfuɛ.’ (Filipfuɛ Mun 4:5) Asa ekun’n, be wun i wlɛ kɛ e lafi Ɲanmiɛn su naan e yi i sɔ liɛ’n i nglo sa kwlaa nga e yo’n nun.
Bla jalɛ’n nin i bo aliɛ dilɛ’n
7. ?Sɛ e ja bla naan é yía é dí i ti aliɛ’n, ngue ti yɛ ɔ fata kɛ i siesielɛ’n yo e cinnjin ɔn?
7 Cɛn kun ekun mɔ Klistfuɛ’m be di nun aklunjuɛ dan’n, yɛle cɛn nga be ja bla’n. Kɛ sran’m be fa atɔnvlɛ mɔ bé dí i ti aliɛ’n, laa Ɲanmiɛn i sufuɛ’m be trɛnnin i bo. Zezi nin i sɔnnzɔnfuɛ’m be blɛ su kusu’n, be trɛnnin i bo wie. (Bo Bolɛ 29:21, 22; Zan 2:1, 2) Sanngɛ le nɲɔn nga nun’n, kɛ sran’m be ja bla mɔ be flɛ sran mun kɛ be wa di i ti aliɛ’n, kɛ e nian wafa ng’ɔ yo’n, e wun kɛ saan é nían e wun su naan e liɛ nga é yó’n w’a yo i nuan su sɛsɛsɛ kɛ Klistfuɛ’m be yo’n sa. I kwlaa yoli o, kɛ be ja bla mɔ be yia be di i ti aliɛ’n, i sɔ’n timan tɛ. Sanngɛ blɛ sɔ nun’n, ɔ fata kɛ Klistfuɛ’n i ayeliɛ’n kle kɛ ɔ lafi Ɲanmiɛn su.
8, 9. ?Kɛ nga 1 Zan 2:16, 17 fa kan’n sa’n, ngue yɛ kɛ sran sunman bé já bla’n be yo ɔ?
8 Be nga be buman Ɲanmiɛn nin i mmla’n be like fi’n be nun sunman be liɛ’n, kɛ be se kɛ be su ja bla’n, cɛn sɔ’n nun ninnge kwlaa nga bé yó’n, be yo tratra su. Kɛ bé yó sɔ kusu’n, sran fi kanman ndɛ. Abloki lɔ fluwa kun nun’n, bla kun waan be jɛli i kɛ be lɔ “famiɛn’n” fa ja bla’n sa. I waan: ‘E fuli kakaklolo kun nun yɛ nnɛn kpanngɔ nnan be cuɛn e ɔ. E sin lɔ’n, kakaklolo 12 be su e su. Kɛ ɔ́ yó sɔ’n, nn jue tofuɛ’m be o be kakaklolo liɛ’n nun e sin lɔ ekun yɛ e ngba e kɔ ɔ. E dili aliɛ kpakpa mun yɛ e tieli jue fɛfɛ mun. Nanwlɛ, ɔ kpili o. Cɛn sɔ nun’n, kɛ famiɛn wie i yi sa’n, min yɛ be niannin min ɔn. I sɔ kusu yɛ n sunnzunnin kɛ ɔ yo ɔ.’
9 I lɛ nun’n, kannzɛ ɔ le nvle kun nin i ninnge yolɛ’n, sanngɛ angunndan nga bla’n buli’n yɛ akoto Zan kɛnnin i ndɛ’n niɔn. Ɔ seli kɛ: ‘Like nga be yo be mɛn’n nun’n i kwlaa’n: be ɲin m’ɔ blo ninnge’m be su’n, nin angunndan nga be bu fa gua ninnge nga be wun be’n be su’n, ɔ nin be wun tulɛ’n, i kwlaa sɔ’n i wie fi finman e Si’n, sanngɛ be ti mɛn’n nun nzuɛn.’ Afin amun bɔbɔ an bu i sin be nian. ?Klistfuɛ mɔ i ɲin w’a ti Ɲanmiɛn sulɛ’n nun mennin yɛ ɔ kwla kunndɛ kɛ i bla jalɛ’n, ɔ yo kɛ “famiɛn” liɛ’n sa ɔ? ?Annzɛ kusu i bla jalɛ’n i ti aliɛ nga bé dí’n ti’n, ɔ́ yí sika kpanngban fá tú i wun naan be se kɛ cɛn sɔ’n “kplili dan” ɔn? Sanngɛ like ng’ɔ́ yó’n, ɔ́ yó klé kɛ ‘sran ng’ɔ yo Ɲanmiɛn klun sa’n, ɔ́ ká lɛ tititi.’—1 Zan 2:16, 17.
10. (a) ?Sɛ é já bla naan e waan é yó ninnge mun ngwlɛlɛ su’n, ngue ti yɛ ɔ fata kɛ e siesie i kpa ɔ? (b) ?Sran’m be yialɛ nun’n, ajalɛ mennin yɛ ɔ fata kɛ e fa ɔ?
10 Klistfuɛ nga bé já bla mɔ be waan bé yó ninnge mun i nuan su sɛsɛsɛ nin ngwlɛlɛ su’n, Biblu’n nun afɔtuɛ’n kwla uka be kpa. Kannzɛ cɛn nga bé já be wun’n, ɔ ti be cɛn ngunmin kun’n, sanngɛ be wun i wlɛ kɛ ɔ ti Klistfuɛ nɲɔn mɔ be waan bé ɲán anannganman nguan’n, be aja’n i bo bolɛ. Sran fi mianman be kɛ be flɛ sran kpanngban be aliɛ dilɛ’n i bo. Sɛ be waan bé flɛ́ sran’n, ɔ fata kɛ be dun mmua bu i sika’n i sin nian, sɛ ɔ kwla yo ye o. Kpɔkun maan be nian, sɛ bé flɛ́ sran kpanngban annzɛ be su flɛman sran kpanngban o. (Lik 14:28) Kɛ bé wá já’n, yasua’n yɛ Ɲanmiɛn ɲrun’n, ɔ́ síe bla’n niɔn. (1 Korɛntfuɛ Mun 11:3; Efɛzfuɛ Mun 5:22, 23) Ɔ maan like nga bé yó naan be aja’n i ti aliɛ’n dilɛ’n w’a yo ye’n, yasua’n yɛ ɔ niɛn i kwlaa su ɔ. Sanngɛ, ɔ fata kɛ ɔ usɛ i yi’n i ngwlɛlɛ afɛ naan wafa nga bé yó’n, annzɛ sran nga bé flɛ́ be’n, be nuan sɛ su. Afin kɛ mɔ be waan bé yó ninnge mun ngwlɛlɛ su’n ti’n, be kwlá flɛman be osufuɛ nin be janvuɛ’m be kwlaa. Kusu’n, be si kɛ be niaan Klistfuɛ nga be su kwlá flɛman be’n, be su faman be wun ya.—Akunndanfuɛ’n 7:9.
“Aliɛ’n i sunianfuɛ’n”
11. ?Kɛ bé já bla’n, ngue yɛ sran ng’ɔ ti “aliɛ’n i sunianfuɛ’n” kwla yo ɔ?
11 ?Sɛ be mɔ be su wa ja be wun’n be waan bé flɛ́ sran be aliɛ dilɛ’n i bo’n, bé yó sɛ naan ninnge kwlaa w’a yo Ɲanmiɛn liɛ’n su? Atɔnvlɛ nga bé fɛ́ i Kana lɔ mɔ Zezi ɔli i bo’n, be sieli Klistfuɛ kun kɛ ɔ yo “aliɛ’n i sunianfuɛ.” Nán andɛ sa yɛ Zoova i Lalofuɛ’m be si sɔ ɔ. (Zan 2:9, 10) I sɔ kunngba’n yɛ Klistfuɛ m’ɔ ti ngwlɛlɛfuɛ m’ɔ su wa ja bla’n, ɔ yo ɔ. Ɔ fata kɛ ɔ fa aliɛ’n i su nianlɛ m’ɔ ti cinnjin’n wla Klistfuɛ kun mɔ i ɲin w’a ti Ɲanmiɛn sulɛ nun’n, i sa nun. Kɛ sran sɔ’n ko si wafa nga sran m’ɔ su ja bla’n ɔ kunndɛ kɛ be yo ninnge mun’n, ɔ́ nían su yó i lele ɔ́ fá gúɛ i ti nin i bo.
12. ?Sɛ sran ng’ɔ su ja bla’n waan ɔ́ mán sran’m be nzan’n, ngue su yɛ ɔ fata kɛ i ɲin tran ɔn?
12 Ndɛ kpɔlɛ 5 nun’n, e wunnin kɛ, kɛ sran wie’m be yia sran’m be bla jalɛ aliɛ dilɛ’n i bo’n, be manman be nzan. Be yo sɔ naan sran wie w’a nɔnman nzan lele naan aklunjuɛ mɔ be waan bé dí i cɛn sɔ nun’n, w’a yoman be nuan nun wiwi. (Rɔmfuɛ Mun 13:13; 1 Korɛntfuɛ Mun 5:11) Sɛ kusu sran ng’ɔ su ja bla’n waan ɔ́ mán sran’m be nzan’n, i yɛ ɔ fata kɛ ɔ nian nun ɔn. Ɔ fata kɛ ɔ nian nun naan be man sran’m be nzan’n i ngwlɛlɛ su. I nun mɔ bé fá atɔnvlɛ Kana lɔ’n, be mannin sran’m be nzan. Zezi bɔbɔ m’ɔ trɛnnin i bo’n, ɔ mannin sran’m be nzan m’ɔ ti kpa’n. I sɔ’n ti’n, aliɛ’n i sunianfuɛ’n seli kɛ: ‘Sran kwlaa dun mmua man sran’m be nzan kpafuɛ’n. Kɛ b’a nɔn mɔ be ku a yi’n yɛ ɔ man be ng’ɔ yoman fɛ kpa’n niɔn. Sanngɛ ɔ liɛ’n w’a fa nzan kpafuɛ’n w’a sie lele yɛ w’a fa ju yɛ.’ (Zan 2:10) I lɛ nun’n, Zezi w’a yoman sɔ naan sran’m be nɔn nzan be bo. Afin i bɔbɔ si kɛ nzanbɔɛ’n ti like tɛ. (Lik 12:45, 46) Sɛ nzan kpafuɛ’n mɔ be fa bali kasiɛn su’n, ɔ boli aliɛ sunianfuɛ’n i nuan’n, i su ɔ. Afin atrɛkpa’n, kɛ sran wie’m bé fá atɔnvlɛ’n, ɔ sieli i nzɔliɛ kɛ sran’m be nɔn nzan be bo. (Sa Nga Be Yoli’n 2:15; 1 Tɛsalonikfuɛ Mun 5:7) I sɔ’n ti’n, sran ng’ɔ su ja bla’n ɔ nin i aliɛ sunianfuɛ’n, ɔ fata kɛ be nian nun kpa naan sran kwlaa nga be yiali be’n be nanti Biblu’n nun afɔtuɛ nga su. I waan: ‘Nán an nɔn nzan bo, afin ɔ yo sran wanzo.’—Efɛzfuɛ Mun 5:18; Nyanndra Mun 20:1; Oze 4:11.
13. ?Sɛ sran kun ja bla naan bé tó jue i aliɛ dilɛ’n i bo’n, ngue su yɛ ɔ fata kɛ yasua nin bla’n be ɲin tran ɔn? ?Yɛ ngue ti ɔ?
13 Sɛ e yia sran mun naan bé tíe jue’n, nán maan be mɛn i nɛn’n su lele naan sɛ yalɛ yɛ sran’m be su koko’n, b’a timan sa. Asɔnun kpɛnngbɛn kun waan: “Wie lɛ’n, kɛ lika’n sán mɔ yalɛ kokolɛ’n kpí’n, annzɛ mɔ bé bó able silɛ’n i bo’n, kpɔkun b’a man jue’n i nɛn’n su kpa. Jue mɔ i bo bolɛ’n nun i nɛn’n ti fɛfɛ kan’n, kɛ ɔ́ kɔ́ i ɲrun’n, be man su lele ɔ maan be timan sa kun. Bla mɔ bé jɛ́ i mɔ be flɛ be wiengu Klistfuɛ mun kɛ be wa di i ti aliɛ’n, ɔ ti e kwlaa e fɛ dilɛ cɛn. ?Sanngɛ sɛ jue’n i kekle bolɛ’n ti’n cɛn sɔ’n yo sukusuku’n, i klanman lika’n o nin?” I sɔ’n ti’n, ɔ fata kɛ sran ng’ɔ su ja bla’n ɔ nin i aliɛ sunianfuɛ’n be nian nun kpa. Sran nga be flɛli i kɛ ɔ to jue’n, sɛ bé túɛ i kalɛ annzɛ be su tuɛmɛn i kalɛ o, nɛ́n i yɛ sɛ bé mɛ́n i nɛn’n su kekle annzɛ bé mánmán su kekle’n, ɔ fata kɛ ɔ nian su ɔ. Pɔlu seli kɛ: ‘Sɛ amún yó like wie o, sɛ amún kán ndɛ wie o, like kwlaa nga amún yó’n, an yo i e Min Zezi dunman nun.’ (Kolɔsfuɛ Mun 3:17) ?Kɛ be nga e flɛli be’n bé wá sá be sin mɔ be wla wá kpɛ́n jue nga e toli’n su’n, bé kwlá sé kɛ e yoli ninnge kwlaa Zezi dunman nun? I sɔ yɛ ɔ fata kɛ ɔ yo ɔ.
14. ?Kɛ Klistfuɛ’m be ja bla ko wie’n, ngue yɛ kɛ be wla wá kpɛ́n su’n, ɔ fataman kɛ ɔ yo be nsisɔ ɔ?
14 Nanwlɛ, bla jalɛ nga i bo’n be yo ninnge kwlaa i nuan su m’ɔ yo kpa’n, kɛ sran wla kpɛn su’n, ɔ yomɛn i nsisɔ. Adam nin i yi Edyta be jali be wun w’a di afuɛ 30. Bla jalɛ kun i ti aliɛ dilɛ’n i ndɛ mɔ be kannin’n yɛ. Be waan: “Be toli Zoova i manmanlɛ jue. Be ɲin su yiyilɛ ngowa uflɛ nga be kanin’n, be kɛnnin i i nuan su sɛsɛsɛ. Nán able silɛ nin jue tielɛ ti yɛ e yiali ɔ. Kɛ a niɛn i sa’n, a si kɛ Klistfuɛ mun yɛ b’a yia. Ɔ yoli Ɲanmiɛn liɛ’n su. Yɛ i kwlaa yoli fɛ.” Nanwlɛ, maan atɔnvlɛ yasua’n nin i atɔnvlɛ bla’n be yo like kwlaa nga be kwla yo’n naan b’a kle kɛ be lafi Ɲanmiɛn su sakpa’n.
Cɛlɛ ninnge mun
15. ?Biblu’n nun afɔtuɛ mennin yɛ ɔ fata kɛ be nga bé cɛ́ like’n be nanti su ɔ?
15 Nvle sunman nun’n, kɛ sran’m be ja be wun’n, be janvuɛ nin be osufuɛ’m be cɛ be ninnge mun. ?Sɛ e waan é cɛ́ like’n, ngue yɛ ɔ fataman kɛ e wla fi su ɔ? “Be wun tulɛ’n” i ndɛ wie mɔ akoto Zan kannin’n, nán maan e wla fi su. Afin, ɔ kleli kɛ be wun tulɛ’n timan Klistfuɛ mɔ be lafi Ɲanmiɛn su’n be nzuɛn. Sanngɛ ɔ ti ‘mɛn m’ɔ́ wíe’n,’ i nzuɛn. (1 Zan 2:16, 17) ?Ndɛ sɔ mɔ Ɲanmiɛn maan Zan kannin’n, kɛ e nian i siin kpa’n, ɔ nin i fata kɛ be bo be mɔ be cɛli like’n be dunman nzra nun? I nun mɔ Maseduanifuɛ nin Akaifuɛ’m be yiyili sika kɛ bé fá kó mán be niaan Klistfuɛ nga be o Zerizalɛmu lɔ’n, Biblu’n w’a seman kɛ be boli be dunman nzra nun. (Rɔmfuɛ Mun 15:26) Ɔ maan Klistfuɛ ng’ɔ kunndɛ kɛ ɔ́ cɛ́ sran nga be jali be wun’n be like’n, maan ɔ yo i nvialiɛ nun. Nán e wla fi afɔtuɛ nga Zezi mannin m’ɔ o Matie 6:1-4 nun’n su.
16. ?Ngue yɛ be nga be ja be wun’n uflɛuflɛ’n be kwla yo naan sɛ be cɛ be like’n b’a loman sran wie’m be ngasi ɔ?
16 Kɛ sran’m be cɛ e like mɔ e bo be dunman nzra nun’n, ɔ ti kɛ nn e su se kɛ sran’n i like liɛ ng’ɔ mannin e’n ɔ ti kpa, annzɛ ɔ le gua kpan tra i wiengu nga’m be liɛ’n. Sɛ e yo sɔ’n, nn e su ‘yo sa m’ɔ kun e wiengu ya’n.’ I sɔ’n ti’n, be nga be ja be wun uflɛuflɛ mɔ be cɛ be like’n, ɔ fataman kɛ be bo sran ng’ɔ cɛ like’n i dunman. Afin sɛ be yo sɔ’n, ɔ́ ló be nga atrɛkpa’n be sa nun w’a yoman fɛ naan b’a cɛ be like wie’n be ngasi. (Galasifuɛ Mun 5:26; 6:10) Sanngɛ sɛ atɔnvlɛ yasua kun nin i atɔnvlɛ bla’n be si sran ng’ɔ cɛ be like’n i dunman’n, ɔ timan tɛ. Wie liɛ’n, kɛ bé tíke like nga be fa cɛli be’n su’n, be wun kɛ sran ng’ɔ cɛli like sɔ’n klɛli i dunman fluwa kaan wie su fa sieli nun. Sɛ sran’n yoli sɔ’n, nán maan e bo su nzra nun. Nanwlɛ, sɛ e bɔbɔ yɛ e cɛ like o, annzɛ e yɛ be cɛ e like o, annzɛ kusu e bɔbɔ yɛ e toli like wie o, i kwlaa sɔ nun’n, maan e ayeliɛ’n kle kɛ e lafi Ɲanmiɛn su.
17. ?Klistfuɛ’m be Ɲanmiɛn sulafilɛ’n nin sa nga bé yó nun’n, ngue su yɛ ɔ fata kɛ be fa be ɲin sie ɔ?
17 Nán sa kpa yolɛ nin asɔnun aɲia’m be bo kɔlɛ’n, ɔ nin jasin fɛ’n bolɛ’n be nun ngunmin yɛ e kwla kle kɛ e lafi Ɲanmiɛn su ɔ. E kwla kle i sɔ liɛ’n like kwlaa nga e yo’n nun. Nanwlɛ, sa kwlaa nga é yó mɔ be nun wie yɛ y’a kan be ndɛ like suanlɛ nga nun’n, maan e yo be e ‘guagua be bo.’ Sɛ e yo sɔ’n, é klé kɛ e lafi Ɲanmiɛn su sakpa.—Sa Nglo Yilɛ 3:2.
18. ?Kɛ Klistfuɛ’m be ja bla’n, ɔ nin kɛ be flɛ sran mun kɛ be wa yiyi be ɲin su’n, wafa sɛ yɛ Zan 13:17 kwla yo nanwlɛ ɔ?
18 Zezi wunnzinnin i akoto’m be ja fa kleli be kɛ ɔ ti wun ase kanfuɛ’n naan be nian su yo. Kɛ ɔ wieli be ja wunnzin’n, ɔ seli be kɛ: ‘Sɛ an si sa sɔ’n naan an fa su’n, amun liɛ su ti ye.’ (Zan 13:4-17) Atrɛkpa e tranwlɛ lɔ’n, aofuɛ’m be ja wunnzinlɛ’n timan e nzuɛn. Sanngɛ like suanlɛ nga nun’n, e wunnin kɛ ninnge wie’m be yolɛ nun’n, e kwla kle kɛ e lafi Ɲanmiɛn su. Ɔ kwla yo sran klolɛ nin sa nga e yo be’n be nun, annzɛ kɛ e flɛ sran mun kɛ be wa yiyi be ɲin su’n, annzɛ kɛ é já bla mɔ e flɛ sran mun i bo’n. Nanwlɛ, sɛ e bɔbɔ yɛ e su ja bla o, annzɛ sran wie yɛ ɔ su ja bla awa ja su yɛ ɔ flɛli e i bo o, annzɛ be jali bla yɛ be flɛli e i ti aliɛ dilɛ’n i bo o, i kwlaa sɔ nun’n, maan e ayeliɛ’n kle kɛ e lafi Ɲanmiɛn su.
?Wafa sɛ yɛ amún tɛ́ kosan’m be su ɔ?
• ?Sɛ e flɛ sran kɛ be wa yiyi be ɲin su’n, wafa sɛ yɛ e kwla kle kɛ e lafi Ɲanmiɛn su ɔ?
• ?Sɛ e su ja bla, annzɛ e flɛ sran kɛ be wa di e bla jalɛ’n i ti aliɛ’n, wafa sɛ yɛ e kwla kle kɛ e lafi Ɲanmiɛn su ɔ?
• ?Sɛ e cɛ be nga be jali be wun’n be like’n, annzɛ e bɔbɔ yɛ be cɛ e like’n, wafa sɛ yɛ e kwla kle kɛ e lafi Ɲanmiɛn su ɔ?
[Foto, bue 18]
Kannzɛ y’a flɛman sran kpanngban’n, sanngɛ maan ‘ngwlɛlɛ m’ɔ fin Ɲanmiɛn su’n sie e.’