Zoova wá ‘jrán e sin dí e ndɛ’n’

‘?Yɛ be nga Ɲanmiɛn kpali be mɔ be sun flɛ i kɔnguɛ nin wia nun’n, ɔ su jranman be sin diman be ndɛ’n?’​—LIK 18:7.

1. ?Wan yɛ be ajalɛ’n wla e fanngan ɔn? ?Yɛ ngue ti ɔ?

ASIƐ wunmuan’n su’n, Zoova i Lalofuɛ bla nin yasua wie’m be su Zoova titi w’a cɛ kpa. Atrɛkpa’n, amun bɔbɔ amun si be nun wie mun, annzɛ amun wla kpɛn be nun wie’m be su. Ɔ kwla yo e niaan bla oke kun. Aniaan bla sɔ mɔ be yoli i batɛmu w’a cɛ kpa’n, ɔ taman asɔnun aɲia’m be nun cɛn tu. Annzɛ kusu ɔ kwla yo e niaan bian oke kun m’ɔ bo jasin fɛ’n le mɔcuɛ kwlaa nun’n. Ɔ yo i sɔ titi w’a di afuɛ kpanngban kpa. Klistfuɛ kpa sɔ’m be nun sunman be sunnzunin kɛ Armagedɔn jú blɛ wie nun naan Zoova wá núnnún mɛn tɛ’n blɛ sɔ’n nun. Sanngɛ, w’a yoman sɔ. Ɔ nin i sɔ ngba’n, be yaciman Zoova sulafilɛ yɛ be kunndɛ kɛ bé ‘trá be awlɛn lele jú i awieliɛ.’ (Matie 24:13) Nanwlɛ, e niaan sɔ’m be Zoova sulafilɛ’n klanman’n, ɔ wla asɔnun wunmuan’n i fanngan.—Jue Mun 147:11.

2. ?Ngue sa yɛ ɔ yo e ya dan ɔn?

² Sanngɛ wie liɛ’n, e wun kɛ Klistfuɛ wie’m be faman ajalɛ kunngba’n su. Yɛle kɛ be bo jasin fɛ’n i titi w’a cɛ kpa. Sanngɛ kɛ ɔ́ cɛ́ kɔ́’n, be yaci Zoova sulafilɛ yɛ be kɔman aɲia’m be bo kun. Kɛ e wun kɛ be yo sɔ’n, ɔ yo e ya dan! Ɔ maan be kwlaa nga be ti kɛ ‘bua m’ɔ wlan daan sa’n,’ e kunndɛ kɛ é úka be naan be sa be sin Ɲanmiɛn i bua fa’n nun ekun. (Jue Mun 119:176; Rɔmfuɛ Mun 15:1) Sanngɛ, kɛ e wun kɛ sran wie’m be yaciman Ɲanmiɛn sulafilɛ mɔ wie’m be yaci i sulafilɛ’n, e usa e wun kɛ: ?Ngue ti yɛ Zoova i Lalofuɛ wie’m be te lafi i su, mɔ sanngɛ wie’m be yaci i sulafilɛ ɔ? ?Ngue yɛ e bɔbɔ e kwla yo naan “Anannganman i cɛn dan’n” mɔ w’a mantan koko’n, y’a lafi su titi ɔ? (Sofoni 1:14) Zezi i jasin fɛ’n mɔ Liki klɛli’n i nun ɲanndra’n kun tɛ kosan sɔ’m be su. Amun e fa naan e yiyi nun e nian.

Be mɔ ‘kɛ i m’ɔ kacili sran’n ɔ́ bá’n’ nn be ɲin o su’n be afɔtuɛ

3. ?Wan mun yɛ angbeti bla’n nin jɔlɛ difuɛ’n be su ɲanndra’n ti be liɛ trele ɔ? ?Yɛ ngue ti ɔ?

³ Liki ndɛ tre 18 nun’n, Zezi buli angbeti bla kun nin jɔlɛ difuɛ kun be su ɲanndra. Angunndan ng’ɔ o ɲanndra sɔ’n nun’n, ɔ nin ɲanndra kun wie mɔ e yiyili nun like suanlɛ ng’ɔ sinnin’n nun’n, be afiɛn’n ti kun. Ɲanndra sɔ’n kannin kɛ bian kun ɲannin aofuɛ naan ɔ ko srɛli like naan ɔ jrannin su kpa. (Lik 11:5-13) Sanngɛ angbeti bla’n nin jɔlɛ difuɛ’n be su ɲanndra’n i ɲrun nin i sin’n, ɔ ti be mɔ kɛ Zezi ‘m’ɔ kacili sran’n ɔ́ bá’ wá di i famiɛn’n nn be ɲin o su’n, be liɛ trele. Zezi i famiɛn dilɛ sɔ’n boli i bo afuɛ nga be flɛ i 1914 nun.—Lik 18:8.a

4. ?Ka naan Zezi w’a bu ɲanndra ng’ɔ o Like ndɛ tre 18 nun’n, ngue ndɛ yɛ ɔ kannin ɔn?

⁴ Ka naan Zezi w’a bu angbeti bla nin jɔlɛ difuɛ’n be su ɲanndra’n, ɔ dun mmua seli kɛ sran kwlaa wún like ng’ɔ́ klé kɛ ɔ o lɛ naan ɔ ti famiɛn’n. Naan kɛ ‘ɲanmiɛn’n kpa sin i bue kun lɔ m’ɔ́ kpája jú i bue kun lɔ’n,’ sran kwlaa wun i. (Lik 17:24; 21:10, 29-33) Sanngɛ “awieliɛ blɛ” nga nun’n, sran sunman be siemɛn i sɔ liɛ’n i nzɔliɛ. (Daniɛl 12:4) Afin like nga Nowe blɛ su nin Lɔtu blɛ sufuɛ’m be yoli mɔ b’a buman like fi angunndan’n, i kunngba’n yɛ be yo ɔ. Laa blɛ sɔ’m be nun’n, ‘sran’m be di like, be nɔn nzan, be to ninnge, be yo be ninnge atɛ, be di fie, yɛ be kplan sua, be yoli sɔ lele be kwlaa be wieli wu.’ (Lik 17:26-29) Nán kɛ ninnge sɔ’m be yolɛ’n ti tɛ ti yɛ sran’m be wuli ɔ. Sanngɛ kɛ mɔ be fa cicili be ti mɔ b’a buman Ɲanmiɛn klun sa’n i angunndan’n, i ti yɛ be wuli ɔ. (Matie 24:39) Andɛ kusu i kunngba’n niɔn. Sran’m be fa be bɔbɔ be ninnge liɛ’m be yolɛ’n cici be ti lele be siemɛn i nzɔliɛ kɛ y’a ju mɛn tɛ nga i bue nuan.—Lik 17:30.

5. (a) ?Wan yɛ Zezi i ndɛ’n ti be liɛ ɔ? ?Yɛ ngue ti ɔ? (b) ?Ngue ti yɛ Klistfuɛ wie’m be yacili Ɲanmiɛn sulafilɛ ɔ?

⁵ Zezi buli i sɔnnzɔnfuɛ’m be angunndan kpa. Afin ɔ si kɛ Satan i mɛn’n nun ninnge’m be kwla tanndan i sɔnnzɔnfuɛ’m be ɲrun naan b’a ‘sa be sin’ bɔbɔ. (Lik 17:22, 31) Klistfuɛ wie’m be yoli sɔ sakpasakpa. Yɛle kɛ Armagedɔn alɛ mɔ be lafili su titi kɛ cɛn kun Zoova wá fá núnnún mɛn tɛ nga’n, kɛ ɔ́ cɛ́ kɔ́ mɔ w’a yoman kɛ be fa sunnzunnin’n sa’n ti’n, be sa sin bubuli be. B’a lafiman Zoova i cɛn mɔ w’a mantan koko’n i su kun. Jasin fɛ’n bolɛ mɔ be fa cicili be ti’n, b’a yoman sɔ kun. Siɛn’n, be bɔbɔ be ninnge liɛ’m be yolɛ’n yɛ ɔ loli be ɔ. (Lik 8:11, 13, 14) I lɛ nun’n, be ‘sali be sin.’ ?Nán ɲrɛnnɛn yɛle sɔ’n?

Ɔ fata kɛ e ‘srɛ Ɲanmiɛn titi’

6-8. (a) Amun kan angbeti bla’n nin jɔlɛ difuɛ’n be su ɲanndra nga Zezi buli’n i ndɛ. (b) ?Wafa sɛ yɛ Zezi fali ɲanndra sɔ’n kannin Ɲanmiɛn sulafilɛ’n i ndɛ ɔ?

⁶ ?Like nga Zoova seli kɛ ɔ́ yó’n, ngue yɛ e kwla yo naan y’a lafi su lele y’a guɛ i ti nin bo kɛ ɔ́ yó ɔ? (Ebre Mun 3:14) Kɛ Zezi wieli i sɔnnzɔnfuɛ’m be su nun wla kɛ nán be sa be sin Satan i mɛn’n nun lɔ’n, kosan kɛ ngalɛ’n sa, yɛ ɔ fa usali be ɔ.

⁷ Liki waan Zezi ‘buli ɲanndra kun kleli be kɛ ɔ́ yó naan b’a srɛ Ɲanmiɛn titi, nán b’a yaciman’n ti.’ Ɔ seli kɛ: ‘Jɔlɛ difuɛ kun o klɔ kun su, ɔ sroman Ɲanmiɛn, ɔ buman sran fi sran. Bla kun kusu mɔ i wun wuli’n, ɔ o klɔ sɔ’n su wie. Ɔ kɔ jɔlɛ difuɛ sɔ’n i sin tititi, ɔ se i kɛ o jrɛn i sin ɔ di ndɛ m’ɔ o ɔ nin i kpɔfuɛ’n be afiɛn’n. Ɔ cɛli kpa jɔlɛ difuɛ waan ɔ kplinman su, sanngɛ le kun liɛ’n, ɔ buli i angunndan ɔ seli kɛ: “Kannzɛ n sroman Ɲanmiɛn, yɛ m buman sran sran’n, sanngɛ yalɛ mɔ bla sɔ’n kle min’n ti, ḿ má jrɛ́n i sin n dí i jɔlɛ sɔ’n, sɛ m’an yomɛn i sɔ ɔ, ɔ su yaciman min yalɛ klelɛ’n.”’

⁸ I sin’n Zezi seli ekun kɛ: ‘An nian ndɛ nga jɔlɛ difuɛ m’ɔ timan kpa’n ɔ kannin ɔn. ?Yɛ be nga Ɲanmiɛn kpali be mɔ be sun flɛ i kɔnguɛ nin wia nun’n, ɔ su jranman be sin diman be ndɛ’n? ?Ɔ́ sísí i bo naan w’a di be jɔlɛ’n? Cɛcɛ, ɔ́ jrán be sin dí be jɔlɛ sɔ’n ndɛndɛ kpa. ?Sanngɛ kɛ m mɔ n kacili Sran’n ḿ bá’n, ń wún sran bɔ kun m’ɔ lafi Ɲanmiɛn su asiɛ’n su wa ɔ?’—Lik 18:1-8.

‘Jran n sin di min ndɛ’n’

9. ?Angbeti bla’n nin jɔlɛ difuɛ’n be su ɲanndra nga Zezi buli’n, i nun ndɛ cinnjin’n yɛle mennin?

⁹ Ɲanndra klanman sɔ mɔ Zezi buli’n, i nun ndɛ cinnjin’n i ɲin fite weiin. Ndɛ cinnjin sɔ’n fiteli sran nɲɔn mɔ Zezi fali be buli ɲanndra’n be nuan. Kpɔkun ɔ fiteli Zezi bɔbɔ i nuan wie. Angbeti bla’n seli kɛ jɔlɛ difuɛ’n ‘jrɛn i sin ɔ di i ndɛ’n.’ Jɔlɛ difuɛ’n kusu seli kɛ: ‘Ḿ má jrɛ́n i sin ń dí i jɔlɛ sɔ’n.’ Zezi liɛ’n, ɔ usali kɛ: ‘?Ɲanmiɛn su jranman be sin diman be ndɛ’n?’ Kpɔkun i bɔbɔ tɛli su kɛ Zoova wá ‘jrán be sin dí be jɔlɛ sɔ’n ndɛndɛ kpa.’ (Lik 18:3, 5, 7, 8) ?Sanngɛ blɛ mennin yɛ Ɲanmiɛn wá ‘jrán be sin dí be jɔlɛ sɔ’n’ niɔn?

10. (a) ?Afuɛ mennin nun yɛ Klistfuɛ klikli’m be blɛ su’n, Ɲanmiɛn tuli sran’m be fɔ ɔ? (b) ?Andɛ Ɲanmiɛn i sufuɛ’m be liɛ’n, blɛ mennin yɛ Ɲanmiɛn dí be ndɛ’n niɔn? ?Yɛ ɔ́ dí i wafa sɛ?

¹⁰ Klistfuɛ klikli’m be blɛ su afuɛ nga be flɛ i 70 nun’n, be sacili Zerizalɛmu nin Ɲanmiɛn i sua’n. Kɛ ɔ yoli sɔ’n yɛ ‘blɛ mɔ Ɲanmiɛn wá tú sran’m be fɔ’n’ juli ɔ. (Lik 21:22) Sanngɛ andɛ Ɲanmiɛn i nvle nunfuɛ’m be liɛ’n, “Anannganman i cɛn dan’n” nun yɛ Zoova wá dí be ndɛ’n niɔn. (Sofoni 1:14; Matie 24:21) Blɛ sɔ nun’n, Zoova wá ‘klé be nga be kle i sufuɛ’m be ɲrɛnnɛn’n be ɲrɛnnɛn wie, yɛ ɔ́ fá Zezi Klist tú be nga be siman Ɲanmiɛn’n nin be nga be faman e Min Zezi i jasin fɛ’n su’n be fɔ.’—2 Tɛsalonikfuɛ Mun 1:6-8; Rɔmfuɛ Mun 12:19.

11. ?E ndɛ mɔ Zoova wá dí i ‘ndɛndɛ kpa’n’ i bo’n yɛle kɛ sɛ?

¹¹ ?Kɛ Zezi se kɛ Zoova wá jrán e sin dí e ndɛ ‘ndɛndɛ kpa’n,’ wafa sɛ yɛ ɔ fata kɛ e wun ndɛ sɔ’n niɔn? Biblu’n kle e kɛ Zoova “trɛ i awlɛn” naan sanngɛ sɛ blɛ ng’ɔ ti i liɛ’n su’n ju’n, ɔ su cuɛncuɛnmɛn i ja ase, ɔ́ dí e ndɛ’n. (Lik 18:7, 8; 2 Piɛr 3:9, 10) I sɔ yɛ ɔ yoli i Nowe blɛ su ɔ. Ɔ tɔli nzue dan fa nunnunnin sa tɛ yofuɛ mun ndɛndɛ kpa. Lɔtu blɛ su kusu’n, sin fin ɲanmiɛn su guali naan w’a nunnun sa tɛ yofuɛ mun. Zezi seli kɛ: ‘Kɛ m mɔ n kacili Sran’n min wun nglo yilɛ cɛn’n nun ɔ́ wá yó sɔ ɔ.’ (Lik 17:27-30) Ɔ maan ‘ɲrɛnnɛn dan kpa wá tɔ́’ klunwifuɛ’m be su kpɛ kunngba. (1 Tɛsalonikfuɛ Mun 5:2, 3) I sɔ’n ti’n, e kwla fa e wla gua Zoova su kɛ Satan i mɛn’n su kaman lɛ sa trilili naan cɛn kun ɔ́ dí e ndɛ’n.

‘Ɔ́ jrán be sin dí be jɔlɛ’n.’

12, 13. (a) ?Ngue yɛ angbeti bla’n nin jɔlɛ difuɛ’n be su ɲanndra mɔ Zezi buli kle e ɔ? (b) ?Ngue ti yɛ e kwla lafi su kɛ Zoova tí e srɛlɛ’n naan ɔ́ jrán e sin dí e ndɛ ɔ?

¹² Angbeti bla’n nin jɔlɛ difuɛ’n be su ɲanndra nga Zezi buli’n, ɔ fa e ɲin sie i ndɛ nanwlɛ cinnjin kpa wie mun ekun be su. Zezi seli kɛ: ‘An nian ndɛ nga jɔlɛ difuɛ m’ɔ timan kpa’n ɔ kannin ɔn. ?Yɛ be nga Ɲanmiɛn kpali be’n, ɔ su jranman be sin diman be ndɛ’n?’ Nán kɛ Zezi waan ɔ́ fá Zoova súnnzun jɔlɛ difuɛ’n naan i sɔnnzɔnfuɛ’m be bu i kɛ wafa nga jɔlɛ difuɛ fa yoli angbeti bla’n, i kunngba yɛ Zoova fa yo i sufuɛ mun ɔn. Sanngɛ Zezi seli sɔ naan ɔ́ klé i sɔnnzɔnfuɛ’m be kɛ Zoova timan kɛ jɔlɛ difuɛ’n sa. ?Wafa sɛ yɛ Ɲanmiɛn timan kɛ jɔlɛ difuɛ’n sa ɔ?

¹³ Jɔlɛ difuɛ’n “timan kpa” sanngɛ ‘Ɲanmiɛn ti jɔlɛ difuɛ kun m’ɔ di nanwlɛ’ ɔ. (Jue Mun 7:12; 33:5) Asa ekun’n, angbeti bla’n i ndɛ w’a loman jɔlɛ difuɛ’n, sanngɛ Zoova liɛ’n, sran’m be ndɛ lo i be tinuntinun. (2 Be Nyoliɛ 6:29, 30) Jɔlɛ difuɛ’n kunndɛman kɛ ɔ́ úka angbeti bla’n. Sanngɛ Zoova liɛ’n, i wun blibli i kɛ ɔ́ úka i sufuɛ mun. (Ezai 30:18, 19) ?Ngue yɛ i kwlaa sɔ’n kle e ɔ? Yɛle kɛ sɛ jɔlɛ difuɛ’n m’ɔ timan kpa’n, ɔ sieli i su bla’n i nuan bo naan ɔ dili i ndɛ’n, nán Zoova yɛ ɔ su tiemɛn i sufuɛ’m be srɛlɛ’n niɔn. Nanwlɛ, Zoova ɔ́ tí be srɛlɛ’n yɛ ɔ́ jrán be sin dí be ndɛ’n!—Nyanndra Mun 15:29.

14. ?Blɛ mɔ Ɲanmiɛn wá tú sran’m be fɔ’n m’ɔ su ba’n, ngue ti yɛ ɔ fataman kɛ e ɲin kpa su ɔ?

¹⁴ Kɛ nga e fa wun i lɛ’n, be nga be lafiman su kun kɛ blɛ mɔ Ɲanmiɛn wá tú sran’m be fɔ’n jú’n, be leman ndɛ be kanman. Afin kɛ be lafiman ‘Zoova i cɛn dan’ mɔ w’a mantan koko’n su kun’n, ɔ ti kɛ nn be su se Zoova kɛ ɔ kwlá yoman like ng’ɔ seli kɛ ɔ́ yó’n. Sanngɛ nanwlɛ, sran fi kwlá siman akplowa seman kɛ Ɲanmiɛn yoman like ng’ɔ se kɛ ɔ́ yó’n. (Zɔb 9:12) Kosan ng’ɔ fata kɛ e usa’n yɛle kɛ: ‘?E bɔbɔ ba’n, é kwlá láfi Ɲanmiɛn su lele gúɛ i ti nin bo?’ Kosan’n i kɛ ngalɛ’n sa’n yɛ Zezi usali fa guali angbeti bla’n nin jɔlɛ difuɛ’n be su ɲanndra m’ɔ buli’n, i bo ɔ.

‘?Ń wún sran bɔ kun sa m’ɔ lafi Ɲanmiɛn su asiɛ’n su wa ɔ?’

15. (a) ?Kosan mennin yɛ Zezi usali ɔ? ?Yɛ ngue ti yɛ ɔ usali kosan sɔ’n niɔn? (b) ?Kosan mennin yɛ ɔ fata kɛ e fa usa e wun ɔn?

¹⁵ Zezi usali kɛ: ‘?Sanngɛ kɛ m mɔ n kacili Sran’n ḿ bá’n, ń wún sran bɔ kun m’ɔ lafi Ɲanmiɛn su asiɛ’n su wa ɔ?’ (Lik 18:8) Nán Ɲanmiɛn sulafilɛ mɔ sran kwlaa se kɛ ɔ lafi’n, i ndɛ yɛ Zezi su kan ɔn. Sanngɛ Ɲanmiɛn sulafilɛ’n i kɛ nga angbeti bla’n lafi su kɛ bé di i ndɛ’n sa’n, i ndɛ yɛ ɔ kan ɔn. Ɔ maan, ɔ usali kosan sɔ’n naan i sɔnnzɔnfuɛ’m be nian sɛ be lafi Ɲanmiɛn su kpa sakpa o. Annzɛ sɛ be su yaci Ɲanmiɛn sulafilɛ blɛblɛblɛ naan bé sá be sin be ninnge nga be yacili be’n be su o. Annzɛ kusu sɛ be lafi Ɲanmiɛn su kɛ nga angbeti bla’n, ɔ lafili su kɛ bé dí i ndɛ’n sa o. I sɔ’n ti’n, i bɔbɔ w’a tɛman kosan m’ɔ usali’n su. Andɛ kusu’n, ɔ fata kɛ e usa e wun kosan yɛ’n: ‘“?Zezi m’ɔ kacili sran’n,” ɔ wun kɛ n lafi Ɲanmiɛn su kpa sakpa?’

16. ?Wafa sɛ yɛ angbeti bla’n lafili jɔlɛ difuɛ’n su ɔ?

¹⁶ Sɛ e waan é trán be nga Zoova wá jrán be sin dí be ndɛ’n be nun wie’n, ɔ fata kɛ e nian angbeti bla’n i ajalɛ’n su. ?Yɛle kɛ sɛ? Yɛle kɛ angbeti bla’n lafili jɔlɛ difuɛ’n su kɛ ɔ́ dí i ndɛ’n. Ɔ maan w’a yacimɛn i yalɛ klelɛ. Ɔ ‘kɔ jɔlɛ difuɛ sɔ’n i sin tititi, ɔ se i kɛ ɔ jrɛn i sin ɔ di i ndɛ’n.’ I sɔ kunngba’n, andɛ Ɲanmiɛn i sufuɛ’m be kwla fa be wla gua Zoova su kɛ ɔ́ cɛ́ ɔ́ cɛ́ ɔ, saan cɛn kun ɔ́ dí be ndɛ’n. Wafa nga be kle kɛ be fa be wla gua Ɲanmiɛn su’n, yɛle kɛ be srɛ i be jran su. Nanwlɛ, be ‘sun flɛ Zoova kɔnguɛ nin wia’n nun.’ (Lik 18:7) I sɔ’n ti’n, sɛ Klistfuɛ kun yaci Ɲanmiɛn srɛlɛ kɛ ɔ di i ndɛ’n, nn ɔ lafiman Zoova su kɛ ɔ kwla de i sufuɛ mun.

17. ?Ngue ti yɛ ɔ fata kɛ e srɛ Ɲanmiɛn e jran su naan e lafi su kɛ blɛ mɔ Zoova wá bú sran’m be fɔ m’ɔ su ba’n, saan ɔ́ jú ɔ?

¹⁷ Kɛ e nian angbeti bla sɔ’n sa’n, sɛ e srɛman Ɲanmiɛn e jranman su’n, e leman ndɛ e kanman. Afin amun bɔbɔ amun nian. Sran fi w’a wlaman angbeti bla’n i fanngan kɛ ɔ wɔ jɔlɛ difuɛ’n i sin. Sanngɛ ɔ ɔli i sin tititi. E liɛ’n, Biblu’n wla e fanngan kpa kɛ e nin ‘Ɲanmiɛn e koko yalɛ titi, nán e kpɔnzɔ.’ (Rɔmfuɛ Mun 12:12) Asa ekun’n, angbeti bla’n siman kɛ bé dí i ndɛ’n. Sanngɛ e liɛ’n, e si kɛ Zoova wá dí e ndɛ’n. Afin, ɔ sinnin i nuan ijɔfuɛ’n i lika seli kɛ: ‘Kannzɛ ɔ cɛ lele ɔ ɔ́ cɛ́ ngbɛn, saan i blɛ sɔ’n jú le. Maan i li cɛ bɔ lele, sanngɛ fa wɔ wla gua su. I kwlaa m’ɔ yoli o, saan i sɔ sa liɛ’n ɔ́ tɔ́, ɔ su sɛnmɛn i wun.’ (Abakik 2:3; Jue Mun 97:10) Angbeti bla’n lemɛn i sin jranfuɛ. Sanngɛ e liɛ’n, e le e sin jranfuɛ kwlafuɛ kun, yɛle Zezi. Ɔ ‘o Ɲanmiɛn i fama su, ɔ kpɛtɛ i man e.’ (Rɔmfuɛ Mun 8:34; Ebre Mun 7:25) Sɛ ɔ nin i sɔ’n ngba’n angbeti bla’n ɔli jɔlɛ difuɛ’n i sin yɛ ɔ lafili su kɛ ɔ́ dí i ndɛ’n, nán e yɛ é sé kɛ e su lafiman Zoova su ɔ. Nanwlɛ, ɔ fata kɛ e lafi su kpa kɛ blɛ mɔ Zoova wá tú sran’m be fɔ m’ɔ su ba’n, saan ɔ́ jú!

18. ?Wafa sɛ yɛ kɛ e srɛ Ɲanmiɛn’n, i sɔ kwla uka e naan y’a lafi i su kpa ɔ? ?Yɛ wafa sɛ yɛ i sɔ’n uka e naan y’a lafi su kɛ ɔ́ jrán e sin dí e ndɛ ɔ?

¹⁸ Angbeti bla’n i su ɲanndra’n kle e kɛ sran ng’ɔ srɛ Ɲanmiɛn’n, ɔ lafi i su wie. Naan sɛ e srɛ Ɲanmiɛn titi’n, e kwla jran sa nga be kwla saci e Ɲanmiɛn sulafilɛ’n be ɲrun kekle. Sanngɛ i sɔ’n kleman kɛ Ɲanmiɛn srɛlɛ ngbɛn’n yɛ ɔ́ yó maan sran kun láfi Ɲanmiɛn su titi ɔ. (Matie 6:7, 8) Kɛ e wun i wlɛ kɛ sɛ Ɲanmiɛn w’a kukuman e’n, e kwlá kukuman e wun mɔ e srɛ i’n, i sɔ srɛlɛ’n fa e mantan Ɲanmiɛn kpɔkun e lafi i su kpa. Yɛ kɛ mɔ Ɲanmiɛn sulafilɛ’n ti yɛ sran kwla fite nun’n ti’n, Zezi wunnin kɛ ɔ fata kɛ ɔ wlɛ i sɔnnzɔnfuɛ’m be fanngan naan be ‘srɛ Ɲanmiɛn titi, nán be yaci.’ (Lik 18:1; 2 Tɛsalonikfuɛ Mun 3:13) Sanngɛ maan e si kɛ nán srɛlɛ m’ɔ e srɛ’n, i ti yɛ “Anannganman i cɛn dan’n” jú ɔ. Sɛ e srɛ annzɛ y’a srɛman o, saan ɔ́ jú. Sanngɛ Ɲanmiɛn su mɔ e lafi’n, ɔ nin i srɛlɛ mɔ e srɛ i’n, be yɛ maan Ɲanmiɛn jrán e sin dí e ndɛ’n yɛ é fíte i alɛ’n nun annzɛ e su fiteman nun ɔn.

19. ?Wafa sɛ yɛ e kle kɛ e fa e wla gua Ɲanmiɛn su kpa kɛ ɔ́ ‘jrán e sin dí e ndɛ’ ɔ?

¹⁹ Kɛ nga e fa wunnin i’n sa’n, Zezi usali kɛ: ‘?Sanngɛ kɛ m mɔ n kacili Sran’n ḿ bá’n, ń wún sran bɔ kun m’ɔ lafi Ɲanmiɛn su asiɛ’n su wa ɔ?’ ?Wafa sɛ yɛ e tɛ kosan klanman sɔ’n su ɔ? Andɛ asiɛ wunmuan’n su’n, Zoova i sufuɛ nanwlɛfuɛ kpanngban be srɛ Zoova be tra be awlɛn. Kɛ be yo sɔ’n, nanwlɛ, ɔ yo e fɛ dan! Afin be kle i lɛ’n nun kɛ be lafi Ɲanmiɛn su kpa sakpa naan e kwla tɛ kosan mɔ Zezi usali’n su klanman. Nanwlɛ, kannzɛ Satan i mɛn tɛ’n kle e ɲrɛnnɛn sɛ’n, sanngɛ e fa e wla gua Ɲanmiɛn su kpa kɛ ‘be ng’ɔ kpali be’n, ɔ́ jrán be sin dí be ndɛ’n.’

[Ja ngua lɛ ndɛ’n]

?Amun wla kwla kpɛn su?

• ?Ngue ti yɛ Klistfuɛ wie’m be yacili Ɲanmiɛn sulafilɛ ɔ?

• ?Ngue ti yɛ e kwla lafi su kpa kɛ blɛ mɔ Zoova wá tú sran’m be fɔ’n m’ɔ su ba’n, saan ɔ́ jú ɔ?

• ?Ngue ti yɛ ɔ fata kɛ e srɛ Ɲanmiɛn e jran su ɔ?

• ?Ngue ti yɛ kɛ e srɛ Ɲanmiɛn e jran su’n e yacimɛn i sulafilɛ ɔ?

[Foto, bue 19]

?Ngue yɛ angbeti bla’n nin jɔlɛ difuɛ’n be su ɲanndra’n kle e ɔ?

[Foto mun, bue 21]

Andɛ sran kpanngban kpa be fa be wla gua Ɲanmiɛn su kɛ ɔ́ “jrán be sin dí be ndɛ’n.”