“Amun yi amun aklunjuɛ’n i nglo”
‘Amun di cɛn fa manman Anannganman, amun yi amun aklunjuɛ i nglo.’—MMLA’N 16:15.
1. (a) ?Ndɛ cinnjin mennin yɛ Satan mannin be su ɔ? (b) ?Kɛ Adam nin Ɛvu be jasoli Zoova sin’n, ndɛ mennin yɛ Zoova kannin ɔn?
SATAN lakali Adam nin Ɛvu kɛ be jaso Ɲanmiɛn m’ɔ ti be Yifuɛ’n i sin. I sɔ’n kusu yɛ be yoli ɔ. Be lakalɛ’n nun’n, Satan tɔnnin Zoova i suɛn. Afin, ɔ sili i akplowa kɛ Zoova diman nanwlɛ naan ɔ nin i fataman kɛ ɔ sie klɔ sran mun. Be lakalɛ sɔ’n nun’n, ndɛ cinnjin kun mɔ Satan mannin su ekun’n, yɛle kɛ sɛ klɔ sran’n su Ɲanmiɛn’n, nán ngbɛn ti ɔ. Naan klɔ sran bɔbɔ i ninnge m’ɔ ti i cinnjin’n ti ɔ. Ndɛ cinnjin kasiɛn sɔ mɔ Satan mannin su lɛ’n, Zɔbu blɛ su yɛ ɔ yili i nglo kpa ɔ. (Bo Bolɛ 3:1-6; Zɔb 1:9, 10; 2:4, 5) Sanngɛ Zoova liɛ’n, w’a sisimɛn i bo, ɔ fali ajalɛ naan w’a kwla tɛ akplowa ndɛ sɔ mɔ Satan mannin su’n, be su. I nun bɔbɔ mɔ Adam nin Ɛvu be te o Edɛni fie’n nun lɔ’n, yɛ Zoova fali ajalɛ sɔ’n niɔn. Zoova seli kɛ “osu” kun wá bá naan Satan wá ká osu sɔ’n i ja sin. Kpɔkun osu’n wá kpɔ́tɔ Satan i ti’n.—Bo Bolɛ 3:15.
2. ?Wafa sɛ yɛ Zoova tuli ndɛ ng’ɔ o Bo Bolɛ 3:15 nun’n, i su kpɛnlɛ’n i ɲin ɔn?
2 Kɛ ɔ́ cɛ́ kɔ́’n, Zoova yoli maan sran’m be wa wunnin ndɛ sɔ’n i bo kpa. I sɔ’n ti’n, Ɲanmiɛn seli Abraamu kɛ “osu” sɔ’n fín i afinliɛ nunfuɛ’m be nun. (Bo Bolɛ 22:15-18) Izraɛli nvlenvle 12 kusu be fin Abraamu i anunman Zakɔbu. Afuɛ nga be flɛ i 1513 nun ka naan y’a ju Zezi blɛ su’n, nvle 12 sɔ’m be wa kacili nvle wunmuan kun. Kɛ ɔ yoli sɔ’n, Zoova mannin be mmla yɛ mmla sɔ’m be nun’n, ɔ le cɛn wie m’ɔ fata kɛ be di be afuɛ kwlaa ɔ. Akoto Pɔlu waan cɛn dilɛ sɔ’m be ‘ti like nga bé wá bá’n be wawɛ.’ (Kolɔsfuɛ Mun 2:16, 17; Ebre Mun 10:1) Like nga Zoova waan osu sɔ’n yó’n, ɔ́ kpɛ́n su sɛsɛsɛ. Sɛ e wun cɛn dilɛ sɔ’m be bo’n, é wún wafa nga i sɔ’n yó ye. Yɛ i sɔ’n yó maan é wún kɛ ndɛ nga Zoova kan’n, ɔ kpɛn su.
Osu’n bali
3. ?Wan yɛle Osu nga Zoova seli kɛ ɔ́ bá’n? ?Yɛ wafa sɛ yɛ be kɛli i ja sin ɔn?
3 Kɛ Zoova seli kɛ osu kun wá bá’n, ɔ dili afuɛ lele 4.000 kwlaa naan w’a ba. Osu sɔ’n yɛle Zezi. (Galasifuɛ Mun 3:16) Zezi kusu i nun m’ɔ o asiɛ’n su wa’n, fɔ nunmɛn i nun. Ɔ jrannin kekle guɛli i ti nin i bo. Ɔ maan, ɔ kleli kɛ Satan buali ato. Kɛ mɔ fɔ nunmɛn i nun’n ti’n, i wie liɛ’n le gua kpan. I wie sɔ’n ti’n, Adam nin Ɛvu be afinliɛ nunfuɛ’m bé kwlá fín sa tɛ’n nin wie’n nun fíte. Kɛ Ɲanmiɛn seli kɛ Satan ‘ká osu’n i ja sin,’ i bo’n yɛle kɛ Zezi wú waka’n su.—Ebre Mun 9:11-14.
4. ?Ngue yɛ ɔ ti Zezi i wun kpɔlɛ tɛ’n i nzɔliɛ ɔ?
4 Afuɛ nga be flɛ i 33 Nisan anglo i le 14 su Zezi wuli.a Izraɛli lɔ’n, Nisan 14 ti aklunjuɛ cɛn, afin ɔ ti be Delɛ cɛn dilɛ. Cɛn sɔ’n nun’n, awloboawlobo’m be di bua nga w’a kpɛ cro’n mɔ lɛ kaan sa nunman i wun’n. Kɛ be yo sɔ’n, be wla kpɛn su kɛ bua mɔ w’a kpɛ cro’n i mmoja’n ti yɛ be mma klikli’m be fiteli nun ɔn. Afin, afuɛ nga be flɛ i 1513 nun ka naan y’a ju Zezi blɛ su Nisan 14 nun’n, kɛ anzi’n sinnin Ezipti mɛn nun kunnin Eziptifuɛ’m be mma klikli mun’n, Izraɛlifuɛ’m be mma liɛ’m b’a wuman wie. (Ezipt Lɔ Tulɛ 12:1-14) Bua sɔ’n ti Zezi i nzɔliɛ. I sɔ’n ti’n, akoto Pɔlu seli kɛ ‘b’a kun Klist m’ɔ ti kɛ e Delɛ cɛn i bua sa’n.’ (1 Korɛntfuɛ Mun 5:7) Kɛ nga bua nga w’a kpɛ cro’n i mmoja’n deli Izraɛlifuɛ’m be mma mun sa’n, Zezi kusu i mmoja’n de sran kpanngban.—Zan 3:16, 36.
‘Be nga be wu mɔ bé cɛ́n’n be nun klikli’n’
5, 6. (a) ?Cɛn mennin nun yɛ be cɛnnin Zezi ɔ? ?Ngue yɛ be yoli Moizi mmla’n nun m’ɔ ti i cɛnlɛ’n i nzɔliɛ ɔ? (b) ?Ɔ yo sɛ yɛ maan Zezi i cɛnlɛ’n ti’n, ndɛ ng’ɔ o Bo Bolɛ 3:15 nun’n kwla kpɛn su ɔ?
5 Kɛ Zezi wuli’n i cɛn nsan su’n, Zoova cɛnnin i. Kɛ ɔ cɛnnin’n, ɔ fɛli i wun kpɔlɛ tɛ’n i gua’n fa ko kleli i Si. (Ebre Mun 9:24) Izraɛlifuɛ’m be cɛn nga be di be laa be fa manman Ɲanmiɛn’n be nun kun ti Zezi i cɛnlɛ’n i wawɛ. Yɛle kɛ kɛ Izraɛlifuɛ’m be ko wie Delɛ cɛn’n i di’n, i cɛn ng’ɔ́ bɛ́ i sin’n, yɛ be bo kpaun nga be guaman nun kpaun ayre’n i cɛn dilɛ’n i bo. I lika m’ɔ́ cɛ́n ekun’n, yɛle kɛ Nisan 16 su’n, Izraɛlifuɛ’m be fa like kɛ ble sa’n i sɔlɛ klikli’n, be fa man Ɲanmiɛn ɲrun jranfuɛ’n naan ɔ fa toto i Zoova ɲrun. Like sɔ m’ɔ ti kɛ ble sa’n i kpɛlɛ’n yɛ ɔ ti be lɔ ninnge nga be luali’n, i bo blɛ’n niɔn. (Saun Yolɛ 23:6-14) Like nga be yo i cɛn sɔ nun’n, ɔ ti Zezi i cɛnlɛ’n i nzɔliɛ. Afin kɛ Zezi wuli’n i le nsan su’n, m’ɔ ti afuɛ nga be flɛ i 33 nun, Nisan 16 su’n, Zoova cɛnnin i. Kɛ ɔ fɛ i lɛ’n, ɔ kacili aolia sran m’ɔ kwlá wunman kun ɔn. I sɔ’n nun’n, Zoova yoli maan like nga Satan waan ɔ́ yó naan ɔ́ núnnún Zezi ‘m’ɔ kan ndɛ nanwlɛ’n, mɔ be kwla fa be wla guɛ i su’n,’ ɔ kpili ase.—Sa Nglo Yilɛ 3:14; 1 Piɛr 3:18, NW.
6 I sɔ’n ti’n, Zezi ‘ti be nga be wu mɔ bé cɛ́n’n be nun klikli’n.’ (1 Korɛntfuɛ Mun 15:20) Zezi i cɛnlɛ’n timan kɛ be nga be wuli laa mɔ be cɛnnin be’n sa. Afin, Zezi liɛ’n ɔ su wuman kun mlɔnmlɔn. Kɛ ɔ wuli mɔ be cɛnnin i’n, ɔ ɔli ɲanmiɛn su ko trannin Zoova i fama su. Ɔ minndɛli kɛ Zoova sie i Famiɛn. (Jue Mun 110:1; Sa Nga Be Yoli’n 2:32, 33; Ebre Mun 10:12, 13) Dɔ nga su’n, Zezi ti Famiɛn. Ɔ maan ɔ ka kaan’n, ɔ́ wá kpɔ́tɔ Satan nin osu’n be ti’n. Yɛle kɛ ɔ́ núnnún be mlɔnmlɔnmlɔn.—Sa Nglo Yilɛ 11:15, 18; 20:1-3, 10.
Abraamu i osu nunfuɛ wie mun ekun
7. ?Ngue yɛ be flɛ i ble mma klikli’n i kpɛlɛ blɛ’n i cɛn dilɛ’n niɔn?
7 Osu nga Zoova kɛnnin i ndɛ kɛ ɔ́ wá bá’n, yɛle Zezi. I yɛ Zoova fá bú ninnge nga ‘Satan yo’n i nuan nɲa ɔ.’ (1 Zan 3:8) Sanngɛ i nun mɔ Zoova sé Abraamu kɛ ɔ́ ɲán “osu’n,” ɔ kleli i kɛ i osu nunfuɛ’m bé sɔ́n kpa ‘kɛ ɲanmiɛn su nzraama mun sa annzɛ kɛ jenvie nuan aunɲan’n sa.’ (Bo Bolɛ 22:17) Cɛn kun ekun mɔ laa be di’n, ɔ ti “osu” uflɛ sɔ’m be nzɔliɛ. Yɛle kɛ, kɛ Nisan 16 cɛn ko sin’n, Izraɛlifuɛ’m be ka cɛn ba ablenun. I cɛn ba ablenun’n su’n, be di ble mma klikli’n i kpɛlɛ blɛ’n i cɛn. Mmla nga be fa mannin be m’ɔ kle kɛ be di cɛn sɔ’n, ɔ se kɛ: ‘Kɛ amun kɛ i lele m’ɔ́ fá jú wunmiɛn delɛ cɛn nso su’n, mɔ i sin aliɛ uflɛ ɔ fa cɛn ekun’n, nn cɛn ba ablenun w’a ju. I cɛn sɔ’n nun’n, amún wá mán min like ekun. Amun fa kpaun nɲɔnnɲɔn amun awloboawlobo’m be nun, naan amun toto be min ɲrun lɛ. Sɛ amun tɔn kpaun kun ɔn, amun fa ble sanmlɛn mlɛnnɛnnɛn kpa’n i kilo nsan. Amun gua nun kpaun ayre. Maan ɔ yo amun fie’m be su ninnge klikli mun.’b—Saun Yolɛ 23:16, 17, 20.
8. ?Sa cinnjin mennin yɛ ɔ yoli afuɛ nga be flɛ i 33 Klistfuɛ klikli’m be blɛ su Pantekɔtu’n nun ɔn?
8 Kɛ Zezi o asiɛ’n su wa’n, be dili ble mma klikli’n i kpɛlɛ blɛ’n i cɛn’n wie. Be flɛ cɛn sɔ’n Pantekɔtu. Glɛki nun’n pantekɔtu’n i bo’n yɛle “cɛn ablenun su’n.” Afuɛ nga be flɛ i 33 nun Pantekɔtu nun’n, Zezi mɔ Ɲanmiɛn cɛnnin i m’ɔ ti Ɲanmiɛn ɲrun jranfuɛ’m be su kpɛn’n, ɔ fali Ɲanmiɛn wawɛ’n mɛnnin i sɔnnzɔnfuɛ 120 nga be yiali Zerizalɛmu lɛ’n. Kɛ ɔ fin lɛ’n, Zezi i sɔnnzɔnfuɛ sɔ’m be kacili kɛ Ɲanmiɛn i klun ba mun sa. Ɔ maan, be kacili Zezi i niaan mun. (Rɔmfuɛ Mun 8:15-17) Be ti nvle uflɛ kun i nunfuɛ mun. Be yɛle ‘Izraɛlifuɛ nga be ti Ɲanmiɛn liɛ sakpa’n.’ (Galasifuɛ Mun 6:16) Nvle sɔ mɔ i bo bolɛ nun’n, i nunfuɛ’m b’a sɔnman’n, kɛ ɔ́ cɛ́ kɔ́’n be wa yoli sran lele 144.000.—Sa Nglo Yilɛ 7:1-4.
9, 10. ?Ngue yɛ Pantekɔtu cɛn nun’n, ɔ ti Klistfuɛ nga Ɲanmiɛn fɛli i wawɛ’n mannin be’n be nzɔliɛ ɔ?
9 Klistfuɛ sɔ mɔ Ɲanmiɛn fɛli i wawɛ’n mannin be’n, be nzɔliɛ yɛle kpaun nɲɔn nga kpaun ayre o nun mɔ Pantekɔtu nun’n, Ɲanmiɛn ɲrun jranfuɛ’n toto i Zoova ɲrun’n. Kpaun ayre sɔ’n kle kɛ fɔ o sran sɔ’m be nun. Sanngɛ, Zezi i wun kpɔlɛ tɛ’n ti’n, be nin Ɲanmiɛn be afiɛn’n w’a sɛ. (Rɔmfuɛ Mun 5:1, 2) ?Sanngɛ ngue ti yɛ be fa kpaun nɲɔn ɔn? Yɛle kɛ Klistfuɛ sɔ mɔ Ɲanmiɛn fɛli i wawɛ’n mannin be’n, be fin sran akpasua nɲɔn. Akpasua klikli’n fin Zuifu mun. Yɛ i nɲɔn su’n yɛle be nga be timan Zuifu’n.—Galasifuɛ Mun 3:26-29; Efɛzfuɛ Mun 2:13-18.
10 Kpaun nɲɔn nga be toto i Ɲanmiɛn ɲrun pantekɔtu’n nun’n, ble mma klikli nga Izraɛlifuɛ’m be kpɛli’n yɛ be fa yo ɔ. I sɔ’n ti yɛ be nga Ɲanmiɛn fɛli i wawɛ’n mannin be’n, be ti ‘like ng’ɔ yili be’n be kwlaa be nun klikli’n’ niɔn. (Zak 1:18) Be yɛ Zezi i wun kpɔlɛ tɛ’n ti’n, Zoova dun mmua yacili be wun sa tɛ’n cɛli be ɔ. Ɲanmiɛn maan be su wuman kun, yɛ be nin Zezi bé kó dí famiɛn ɲanmiɛn su lɔ. (1 Korɛntfuɛ Mun 15:53; Filipfuɛ Mun 3:20, 21; Sa Nglo Yilɛ 20:6) Ɔ cɛ kan’n, bé wá ‘fá blalɛ kpɔnman kánkán nvlenvle mun.’ Kpɔkun bé wá ‘tía Satan su yɛ bé núnkun i.’ (Sa Nglo Yilɛ 2:26, 27; Rɔmfuɛ Mun 16:20) Akoto Zan seli kɛ: ‘Lika kwlaa nga Bua Gbaflɛn’n kɔ́’n, be su i su. Be kpɔli be ti sran’m be nun kɛ be yo Ɲanmiɛn nin Bua Gbaflɛn’n be sran’m be nun klikli.’—Sa Nglo Yilɛ 14:4.
Sran’m be delɛ cɛn dilɛ
11, 12. (a) ?Sa tɛ’n i ti srɛlɛ cɛn dan nun’n, ngue yɛ be yo ɔ? (b) ?Cɛn sɔ’n nun’n, mmlusuɛ mennin yɛ tɛ nga be fa nannin tola nin boli be yi’n, ɔ man Izraɛlifuɛ mun ɔn?
11 Anglo nga be flɛ i Etanimu i cɛn ba blu su’n, Izraɛlifuɛ’m be di be cɛn kun. Siɛn’n be flɛ anglo sɔ’n kɛ Tishri.c Mmlusuɛ nga be di i cɛn sɔ’n nun’n, ɔ ti mmlusuɛ nga Zezi i wun kpɔlɛ tɛ’n man e’n, i wawɛ. Cɛn sɔ’n nun’n, nvlefuɛ’m be kwlakwla be yia sa tɛ’n i ti srɛlɛ cɛn dan’n i bo. Be yia be yi tɛ man Ɲanmiɛn.—Saun Yolɛ 16:29, 30.
12 Sa tɛ’n i ti srɛlɛ cɛn dan’n nun’n, Ɲanmiɛn ɲrun jranfuɛ’m be su kpɛn’n, ɔ kun nannin tola kun. Kpɔkun, ɔ fa nnɛn mmoja’n fa wlu Ɲanmiɛn i sua’n i lika kpa tra su’n nun lɔ. Ɔ fa nnɛn mmoja’n fa kpɛntɛnkpɛntɛn i Ɲanmiɛn i alaka’n i su tre’n i ɲrun lɛ. I sɔ m’ɔ yo’n, ɔ ti kɛ nn ɔ su fa mmoja’n klé Ɲanmiɛn sa. Like nga ɔ yoli i lɛ’n, ɔ ti i bɔbɔ nin i ‘awlobofuɛ mun,’ yɛle kɛ Ɲanmiɛn ɲrun jranfuɛ nin Levi akpasua’m be sa tɛ’n i ngbata. Kɛ ɔ ko wie i sɔ yo’n, ɔ fa boli nɲɔn. Ɔ fa kun fa yi ‘mɛn mma’m’ be sa tɛ’n i ti tɛ. Ɔ fa boli sɔ’n i mmoja’n wie kpɛntɛnkpɛntɛn i Ɲanmiɛn i alaka’n m’ɔ o Ɲanmiɛn i sua’n i lika kpa tra su’n nun lɔ’n, i su tre’n i ɲrun lɛ. I sin’n, ɔ fɛ i sa nɲɔn’n gua boli kun ng’ɔ ka lɛ’n i ti su. Kpɔkun Izraɛlifuɛ’m be sa tɛ kwlakwla nga be yoli’n, ɔ nin be fɔnlɛ’n kwlakwla nga be fɔnnin Ɲanmiɛn wun’n, ɔ koko i wunmuan’n gua boli’n su. Kɛ ɔ ko wie i sɔ liɛ’n yo’n, be fa boli’n be kɔ aawlɛ flɛnnɛn’n nun lɔ, kpɔkun be yaci i lɔ. Nga be yo i lɛ’n, ɔ ti kɛ nn boli’n w’a fa nvlefuɛ’m be sa tɛ’n w’a wɔ sa.—Saun Yolɛ 16:3-16, 21, 22.
13. ?Wafa sɛ ninnge nga be yo be sa tɛ’n i ti srɛlɛ cɛn dan nun’n, be yi ninnge nga Zezi wá yó be’n be nglo ɔ?
13 Sa sɔ’m be ti junman nga Zezi m’ɔ ti Ɲanmiɛn ɲrun jranfuɛ’m be su kpɛn danfuɛ’n wá dí’n, i wawɛ. Kɛ Zezi bali m’ɔ wuli’n, i mmoja’n i gua kpan’n ti’n, Ɲanmiɛn yaci sran’m be wun sa cɛ be. I klikli nun’n, mmoja sɔ’n ti’n, be nga Ɲanmiɛn fɛli i wawɛ’n mannin be mɔ be ti kɛ sua mɔ nán sran yɛ ɔ kplannin’n sa’n, Zoova bu be sran kpa yɛ be ti saun. (Efɛzfuɛ Mun 2:19-22; 1 Korɛntfuɛ Mun 6:11) Kɛ nga e fa kannin’n sa’n, nannin tola mɔ laa Izraɛlifuɛ’m be kun i’n, ɔ ti i sɔ liɛ’n i nzɔliɛ. Ɔ maan sran sɔ’m be kwla ɲan atin siɛn’n be kɔ ɲanmiɛn su. I nɲɔn su’n, Zezi i mmoja’n i gua m’ɔ le i’n, sran kpanngban kpa uflɛ nga be lafi i su’n, be ɲan mmlusuɛ wie. I yɛ ɔ ti boli nga laa Izraɛli lɔ be fa yi tɛ’n, i nzɔliɛ’n niɔn. I sɔ’n ti’n, sran kpanngban kpa sɔ’m bé kwlá ɲán anannganman nguan m’ɔ fili Adam nin Ɛvu be sa’n, asiɛ’n su wa. (Jue Mun 37:10, 11) Zezi i mmoja’n m’ɔ guɛli i ase’n ti’n, ɔ ti kɛ nn ɔ fali klɔ sran’m be sa tɛ’n kɛ nga be kan Izraɛlifuɛ’m be sa tɛ’n gua boli’n su mɔ be ko yaci i aawlɛ flɛnnɛn’n nun lɔ’n sa.—Ezai 53:4, 5.
E yi e aklunjuɛ i nglo e Ɲanmiɛn’n i ɲrun
14, 15. ?Ngue sa yɛ be yo i kpata bo tranlɛ cɛn dilɛ’n i bo ɔ? ?Yɛ ngue su yɛ ɔ fata Izraɛlifuɛ’m be ɲin sie ɔ?
14 Kɛ Izraɛlifuɛ’m be ko wie sa tɛ’n i ti srɛlɛ cɛn dan’n i di’n, be di kpata bo tranlɛ cɛn’n. Cɛn nga Zuifu’m be di’n be nun’n, kpata bo tranlɛ cɛn’n yɛ ɔ kpi kpa ɔ. (Saun Yolɛ 23:34-43) Kpata bo tranlɛ cɛn’n bo i bo Etanimu anglo’n i cɛn ba 15 su yɛ ɔ kɔ lele i cɛn ba 21 su. Cɛn ba 22 ti cɛn sɔ’n i atubo. Cɛn sɔ’n nun’n, nvlefuɛ’m be kwlaa be yia Ɲanmiɛn dunman nun be su i. Cɛn sɔ’n kle kɛ ninnge nga Izraɛlifuɛ’m be tali be’n, ɔ nin nga be luali be’n, ɔ nin nga be boli be’n, be tulɛ blɛ’n annzɛ be tilɛ blɛ’n, annzɛ be kpɛlɛ blɛ’n w’a wie. Be di aklunjuɛ blɛ sɔ’n nun, be manman Zoova be lɛ i ase i klun ufue’n ti. Zoova seli be kɛ: ‘Amun yi amun aklunjuɛ i nglo yɛle kɛ Anannganman amun Ɲanmiɛn’n yó maan amun fie’m be yo kpa, yɛ like kwlaa nga amun yo’n ɔ́ yó ye.’ (Mmla’n 16:15) Nanwlɛ, blɛ sɔ’n nun be di aklunjuɛ dan!
15 Kpata bo tranlɛ cɛn’n i dilɛ nun’n, Izraɛlifuɛ’m be tran kpata’m be bo cɛn ba nso. I sɔ’n kpɛn be wla kɛ blɛ wie nun’n, be trannin kpata’m be bo aawlɛ flɛnnɛn’n nun lɔ. Yɛ cɛn sɔ’n nun’n, be bu be Si Zoova m’ɔ nian be lika’n i angunndan kpa. (Mmla’n 8:15, 16) Kpata bo tranlɛ cɛn’n i dilɛ nun’n, Izraɛlifuɛ’m be kwlaa, i aɲanbeunfuɛ o, i yalɛfuɛ o be tran kpata’m be bo. I sɔ’n yo maan be wun i wlɛ kɛ be kwlaa be ti kun naan ɔ leman yalɛfuɛ nin aunɲanfuɛ.—Neemi 8:14-16.
16. ?Kpata bo tranlɛ cɛn dilɛ’n ti ngue i wawɛ?
16 Kɛ Izraɛlifuɛ’m be ko wie be fie’m be su ninnge’m be su yiayia’n, yɛ be di kpata bo tranlɛ cɛn’n niɔn. Ɔ maan, cɛn sɔ’n ti be nga be lafi Zezi Klist i wun kpɔlɛ tɛ’n su’n, be yialɛ’n i wawɛ. Aklunjuɛ nun yɛ be yia be sɔ ɔ. Afuɛ nga be flɛ i afuɛ 33 Pantekɔtu nun Klistfuɛ klikli’m be blɛ su mɔ Ɲanmiɛn fɛli i wawɛ’n mannin Zezi i sɔnnzɔnfuɛ 120, yɛ sran sɔ’m be yialɛ’n boli i bo ɔ. Sran sɔ’m bé káci ‘Ɲanmiɛn ɲrun jranfuɛ mun.’ Kpata bo tranlɛ cɛn dilɛ’n nun’n, kpata’m be bo yɛ Izraɛlifuɛ’m be tran ɔn. I sɔ yolɛ’n ti nzɔliɛ like. Yɛle kɛ be nga be kpali be sieli be ngunmin’n be si kɛ be su kaman mɛn tɛ nga nun wa lelele. Be ti kɛ “wlanwlanfuɛ asiɛ’n su” wa sa. Afin be liɛ nga be lafi su’n, yɛle kɛ bé wá kɔ́ ɲanmiɛn su. (1 Piɛr 2:5, 11) Kɛ mɛn’n ɔ́ kɔ́ i bue nuan’n, i nun yɛ be nga bé kɔ́ ɲanmiɛn su sɔ’n be yiayialɛ’n wie ɔ. Blɛ sɔ’n nun yɛ 144.000 be nuan’n yía ɔ.—2 Timote 3:1.
17, 18. (a) ?Ngue yɛ ɔ kle kɛ sran wie mɔ be su kɔman ɲanmiɛn su’n, be kwla ɲan Zezi i wun kpɔlɛ tɛ’n i su mmlusuɛ ɔ? (b) ?Kpata bo tranlɛ cɛn dilɛ m’ɔ ti ninnge nga bé bá lɔ’n be wawɛ mɔ Zezi maan bé kpɛ́n su’n, waan mun yɛ sɛ é kwlá sé’n, be di wie ɔ? ?Yɛ kpata bo tranlɛ cɛn dilɛ sɔ’n mɔ Zezi maan ɔ́ kpɛ́n su’n i agualiɛ su’n, ngue sa yɛ ɔ́ jú ɔ?
17 Kpata bo tranlɛ cɛn dilɛ’n sɔ’n nun’n, Izraɛlifuɛ’m be kun nannin lele 70 be fa yi tɛ be man Ɲanmiɛn. (Kalɛ 29:12-34) Like nuan 70 ti like 7 sɔ lele kpɛ 10. Biblu’n nun’n, like nuan 7 ti Ɲanmiɛn ɲrun ninnge nga be nuan ti sɛsɛsɛ mɔ lɛ fi nunman nun’n, i nzɔliɛ. Like nuan 10 kusu ti asiɛ’n su wa ninnge nga be nuan ti sɛsɛsɛ mɔ lɛ nunman nun’n, i nzɔliɛ. Ɔ maan, be kwlaa nga be ti sran kpa asiɛ’n su wa mɔ sɛ é kwlá sé’n, be fin awloboawlobo 70 mɔ be ti Nowe i afinliɛ nunfuɛ mun’n, bé kwlá ɲán Zezi i wun kpɔlɛ tɛ’n su mmlusuɛ. (Bo Bolɛ 10:1-29) I sɔ’n ti’n, be su yia be kwlaa nga be o asiɛ’n su wa mɔ be lafi Zezi i wun kpɔlɛ tɛ’n su’n. Sran sɔ’m be liɛ’n, be lafi su kɛ bé trán mɛn klanman nun asiɛ’n su wa.
18 Yialɛ nga be su yia sran mun e blɛ liɛ’n nun’n, akoto Zan wunnin i aolia nun. I klikli nun’n, kɛ bé bóbó sran 144.000 be nun kasiɛn nga Ɲanmiɛn sieli be nzɔliɛ’n be nuan’n, ɔ tili. I sin’n, ɔ ‘wunnin sran kpanngban kpa, mɔ sran fi kwlá kaman be’n.’ Sran sɔ’m be jinjin Zoova nin Zezi be ɲrun lɛ, yɛ ‘mme nɲa o be sa nun.’ Sran kpanngban sɔ’m be ‘fin afɛ dan’n nun,’ yɛ bé trán mɛn uflɛ’n nun asiɛ’n su wa. Be kusu’n, ɔ ti kɛ be ti wlanwlanfuɛ sa mɛn tɛ nga nun. Be liɛ’n, like nga be minndɛ i kpa’n yɛle blɛ mɔ Bua Gbaflɛn’n wá tá be, mɔ wá fá be kɔ́ nzue ti mun mɔ be man nguan’n be nuan’n.’ Blɛ sɔ’n nun’n, ‘Ɲanmiɛn wá núnnún be ɲinmuɛn’n kwlaa.’ (Sa Nglo Yilɛ 7:1-10, 14-17) Kpata bo tranlɛ cɛn dilɛ m’ɔ ti ninnge nga bé bá lɔ’n be wawɛ’n i agualiɛ su’n, kɛ Klist wá dí afuɛ akpi famiɛn’n, sran kpanngban kpa sɔ mun nin be nga bé cɛ́n be’n, bé trán asiɛ’n su wa. Blɛ sɔ’n nun’n wie’n su tranman lɛ kun.—Sa Nglo Yilɛ 20:5.
19. ?Sɛ e bu laa Izraɛli lɔ cɛn’m be dilɛ’n be su angunndan’n, mmlusuɛ mennin yɛ e kwla ɲɛn i ɔ?
19 E kusu kɛ e o yɛ’n, sɛ e bu laa Zuifu’m be cɛn nga be dili be’n be su angunndan’n, é ‘yí e aklunjuɛ’n i nglo’ wie. Nanwlɛ, kɛ e wun wafa nga Zoova dun mmua yiyili ninnge’m be nun naan y’a wun wafa nga ndɛ ng’ɔ kɛnnin i Edɛni fie nun lɔ’n w’a kpɛn su’n, ɔ yo ɲɛnmɛn. Kusu kɛ e wun wafa nga ndɛ sɔ’n i nuan su yia blɛblɛblɛ dɔ nga su’n, ɔ man aklunjuɛ. Andɛ’n, Osu nga Zoova kɛnnin i ndɛ’n, e si kɛ ɔ bali naan be kɛli i ja sin. Dɔ nga su’n, ɔ ti Famiɛn ɲanmiɛn su lɔ. Asa kusu be nga be ti sran 144.000 be nun wie’m be nin Ɲanmiɛn be nantili klanman lele be fa wuli. ?Kɛ be wu sɔ’n, ngue yɛ ɔ bɛ i sin ɔn? ?Ndɛ nga Ɲanmiɛn kɛnnin i Edɛni fie nun lɔ’n, ɔ cɛ naan w’a kpɛn su mlɔnmlɔn annzɛ ɔ su cɛman kun? Like suanlɛ ng’ɔ́ bá lɛ’n wá tɛ́ kosan sɔ’m be su.
[Ja ngua lɛ ndɛ mun]
a Andɛ kananndrie nun’n, Nisan anglo’n fa Marsi anglo’n i afiɛn lele fa ju Avrili anglo’n i afiɛn.
b Titi’n, kɛ be toto ninnge mun Ɲanmiɛn ɲrun’n, Ɲanmiɛn ɲrun jranfuɛ’n fa kpaun nga be guali nun kpaun ayre nɲɔn. Ɔ fa kpaun sɔ’n sie i sa klun, ɔ mɛn i sa’n su nglo, kpɔkun ɔ toto kpaun kɔ wa kɔ wa. I sɔ yolɛ’n ti nzɔliɛ like. Yɛle kɛ, b’a fa ninnge nga be fa yi sraka’n be kle Zoova.—An nian fluwa Étude perspicace des Écritures, volume 2, i bue 850, mɔ Zoova i Lalofuɛ mun be yili’n nun.
c Andɛ kananndrie nun’n, Etanimu annzɛ Tishri anglo’n fa Sɛptamblu anglo’n i afiɛn lele fa ju Ɔktɔblu anglo’n i afiɛn.
?Amun kwla yiyi nun?
• ?Bua nga w’a kpɛ cro mɔ laa’n be fa di Delɛ cɛn’n, ɔ ti ngue nzɔliɛ?
• ?Pantekɔtu cɛn dilɛ’n ti sran mennin’m be yialɛ i nzɔliɛ?
• Ninnge nga be yo i sa tɛ i ti srɛlɛ cɛn dan nun m’ɔ ti Zezi i wun kpɔlɛ tɛ’n i nzɔliɛ’n, amun yiyi wie’m be nun.
• ?Wafa sɛ yɛ laa kpata bo tranlɛ cɛn dilɛ’n ti Klistfuɛ’m be yialɛ’n i wawɛ ɔ?
[Be klɛ lɔngɔ su, bue 24, 25]
(Voir la publication)
Cɛn dilɛ mun: Be bo’n:
Delɛ Cɛn dilɛ’n Nisan 14 Delɛ cɛn bua’n Zezi i wun
i kunlɛ kpɔlɛ tɛ’n
Kpaun nga be Nisan 15 Wunmiɛn
guaman nun delɛ cɛn’n
kpaun ayre’n Nisan 16 Like kɛ ble sa Zezi i nguan
i cɛn dilɛ’n mɔ be fa man’n cɛnlɛ’n
(Nisan 15-21)
↑
Cɛn ba 50
↓
Ble mma Sivan 6 Be fa kpaun Zezi fɛli i niaan
klikli’n i nɲɔn be man nga Ɲanmiɛn fɛli
kpɛlɛ blɛ’n Ɲanmiɛn i wawɛ’n mannin
i cɛn dilɛ’n be’n kleli Zoova
(“Pantekɔtu”)
Sa tɛ’n i ti Tishri 10 Be fa nannin Zezi fɛli i
srɛlɛ cɛn dan’n tola kun nin mmoja’n i ngua’n
boli nɲɔn be fa kpɔli sran’m
man Ɲanmiɛn be kwlaa be ti
Kpata bo tranlɛ Tishri 15-21 Izraɛlifuɛ’m be Be nga Ɲanmiɛn
cɛn dilɛ’n klun jɔ kpata bo fɛli i wawɛ’n
(Sran’m be yialɛ, tranlɛ nin fie’m mannin be’n nin
Tannin sua’n) be su ninnge’m “sran kpanngban
be yiayialɛ’n su. kpa’m” be
Be fa nannin yiayialɛ
tola 70 yi tɛ.
[Foto, bue 23]
Dɛlɛ cɛn bua’n i mmoja’n ti, sran’m be fiteli nun. Zezi kusu i mmoja’n ti’n, sran kpanngban bé fíte nun.
[Foto, bue 24]
Like kɛ ble sɔlɛ klikli nga Izraɛlifuɛ’m be kpɛ fa man Ɲanmiɛn Nisan 16 nun’n, ɔ ti Zezi i cɛnlɛ’n i nzɔliɛ.
[Foto, bue 25]
Pantekɔtu nun kpaun nɲɔn ti Klistfuɛ nga Ɲanmiɛn fɛli i wawɛ’n mannin be’n, be nzɔliɛ.
[Foto mun, bue 26]
Kpata bo tranlɛ cɛn dilɛ’n ti Klistfuɛ nga bé kɔ́ ɲanmiɛn su’n nin “sran kpanngban kpa” mun be nuan yialɛ’n nzɔliɛ.