Wafa nga anzi nin sran’m be o nun’n

‘Kɛ ɔ yoli sɔ’n, i sin n wunnin anzi kun ekun, ɔ fin ɲanmiɛn su lɔ, ɔ le ɲrun kpa. Ɔ kpan seli kɛ: “Babilɔni klɔ dan’n w’a saci, w’a saci!”’—SA NGLO YILƐ 18:1, 2.

1, 2. ?Ngue yɛ ɔ kle kɛ Zoova fa anzi mun yo i klun sa ɔ?

I NUN mɔ be trali akoto Zan lomuɛn ɔli nvle kaan mɔ nzue bo sin yiɛ i’n nun’n, ɔ wunnin aolia nun like. Nvle sɔ’n be flɛ i Patmɔsu. I blɛ sɔ’n nun’n, nn ɔ ti oke. ‘Ɲanmiɛn wawɛ’n wluli’ Zan nun, ɔ maan ɔ wunnin e ‘Min’n i cɛn’n nun.’ Kɛ be sieli Zezi i famiɛn afuɛ nga be flɛ i 1914 nun yɛ e Min’n i cɛn’n boli i bo ɔ. E Min i cɛn sɔ’n fɛ i afuɛ nga be sieli i famiɛn’n lele ɔ́ fá jú i afuɛ akpi famiɛn dilɛ blɛ’n i awieliɛ.—Sa Nglo Yilɛ 1:10.

² Zoova bɔbɔ w’a faman sa sɔ’n w’a kleman Zan trele. Ɔ sinnin sran uflɛ ja su. Sa Nglo Yilɛ 1:1 waan: ‘Fluwa nga nun be kan sa nga ɔ cɛ kaan bé wá yó’n, mɔ Ɲanmiɛn fa wlali Zezi Klist sa nun kɛ ɔ fa kle i sran mun’n i ndɛ. Klist sunmɛnnin i anzi’n, ɔ wa yili be nglo kleli Zan m’ɔ ti i sran’n.’ Ɔ maan Zoova sinnin Zezi lika, yɛ i kusu sinnin anzi kun ja su naan sa nga bé wá jú e “Min’n i cɛn” nun’n, w’a kan kle Zan. Kɛ ɔ yoli sɔ’n, Zan kusu ‘wunnin anzi kun ekun, ɔ fin ɲanmiɛn su lɔ, ɔ le ɲrun kpa.’ ?Ngue ti yɛ ɔ fin Ɲanmiɛn wun lɔ bali ɔ? Biblu’n waan: ‘Ɔ kpan seli kɛ: “Babilɔni klɔ dan’n w’a saci, w’a saci!”’ (Sa Nglo Yilɛ 18:1, 2) Anzi sɔ’n, be mɛnnin i junman ngunmin kun. Yɛle kɛ be sunmɛnnin i kɛ ɔ wa kan Babilɔni klɔ dan m’ɔ ti mɛn wunmuan nun Ɲanmiɛn sulɛ wafa ng’ɔ ti tɛ’n i nzɔliɛ’n, i nunnunlɛ’n i ndɛ. Ɔ maan, e wun kɛ Zoova fa anzi mun di junman cinnjin kpa. Yɛle kɛ be yo i klun sa. É wá kán junman nga anzi’m be di i Ɲanmiɛn klun sa yolɛ’n nun’n, ɔ nin wafa nga be nin sran’m be o nun’n, i ndɛ. Sanngɛ, kwlaa naan y’a kɛn i sɔ liɛ’n i ndɛ’n, é dún mmua wún anzi’m be finwlɛ’n.

?Anzi’m be fin nin?

3. ?Ato ndɛ mennin yɛ sran’m be kɛn i anzi’m be su ɔ?

³ Andɛ sran kpanngban kpa be si kɛ anzi’m be o lɛ. Sanngɛ be nun sunman lika be siman be kpa, be siman be finwlɛ. I wie yɛle kɛ Ɲanmiɛn i sufuɛ wie’m be bu i kɛ kɛ e awlɛn su sran kun wu’n, ɔ kɔ ɲanmiɛn wun lɔ. Kɛ ɔ yo sɔ’n, ɔ kaci anzi. ?Sanngɛ ngue ndɛ yɛ Biblu’n kɛn i anzi’m be finwlɛ, ɔ nin be junman nga be di’n su ɔ?

4. ?Biblu’n waan anzi’m be fin nin?

⁴ Anzi nga i kwlalɛ’n tra nga’m be liɛ’n, yɛle anzi kpɛnngbɛn Misɛli. (Zid 9) Anzi sɔ’n yɛle Zezi Klist. (1 Tɛsalonikfuɛ Mun 4:16) I yɛ ɔ ukali Zoova m’ɔ ti Like Yifuɛ’n naan b’a bo ninnge’m be yilɛ bo ɔ. (Sa Nglo Yilɛ 19:11) Kɛ Zoova yili anzi sɔ’n, i yɛ maan Zoova yili anzi nga mun ɔn. (Kolɔsfuɛ Mun 1:15-17) Cɛn kun mɔ Zoova kɛ́n i anzi’m be ndɛ’n, ɔ usali Zɔbu kɛ: ‘?Blɛ nga mɔ ń wlá asiɛ’n i bo ase’n, nn a o nin? Sɛ a wun i nanwlɛ’n kan ɔn, kan kle min maan n nian. ?Wan yɛ ɔ wlɛli i cɔnjɔ’n su yɔbuɛ’n i ase blɛ mɔ aliɛ njɛnniɛn su nzraama’m bé tó kwlalɛ jue likawlɛ’n, mɔ min anzi’m bé kpán aklunjuɛ kpanlɛ’n niɔn?’ (Zɔb 38:4, 6, 7) Ndɛ sɔ’n kle weiin kɛ anzi’m be ti Ɲanmiɛn i sa nuan like. Ɲanmiɛn dun mmua yili be lele naan w’a yi klɔ sran.

5. ?Wafa sɛ yɛ Ɲanmiɛn siesieli anzi mun ɔn?

⁵ Ɲanmiɛn siesieli anzi mɔ be ti i mma mun’n, be akpasuaakpasua. Afin 1 Korɛntfuɛ Mun 14:33 se kɛ: ‘Ɲanmiɛn yo sa i nuan su, ɔ kloman sa sukusuku’n.’ I sɔ’n ti’n, be ti akpasuaakpasua nsan. I klikli’n, yɛle Serafɛn mun. Be o Ɲanmiɛn i bia’n wun lɛ. Be bo Ɲanmiɛn i sanwun m’ɔ ti’n, i jɔ. Yɛ be yo maan Ɲanmiɛn i sufuɛ’m be ka sanwun titi. I nɲɔn su’n, yɛle anzi nga be nian Ɲanmiɛn m’ɔ sie nglo nin asiɛ’n i ninnge’m be su’n. Yɛ i nsan su’n yɛle anzi nga be yo i nuan ndɛ’n i su sa’n. (Jue Mun 103:20; Ezai 6:1-3; Ezekiɛl 10:3-5; Daniɛl 7:10) ?Wafa sɛ yɛ Ɲanmiɛn i aolia nun ba sɔ’m be nin sran’m be o nun ɔn?—Sa Nglo Yilɛ 5:11.

?Junman mennin yɛ anzi’m be di ɔ?

6. ?Edɛni fie’n nun lɔ’n, junman mennin yɛ Zoova fa mannin anzi nga be niɛn i ninnge’m be su’n niɔn?

⁶ Anzi’m be ndɛ klikli nga Biblu’n kan’n, yɛle ng’ɔ o Bo Bolɛ 3:24 nun’n. I waan: ‘Kɛ Zoova fuannin sran’n, ɔ fali anzi nga be niɛn i ninnge’m be su mun fa sieli i Edɛni fie’n i wia afiliɛ lɔ. Kue sunman sin taaman o be sa nun yɛ be fa sasa nguan waka’n niɔn.’ Ɲanmiɛn i anzi sɔ m’ɔ fali be sieli i lɛ’n ti’n, Adam nin Ɛvu b’a kwlá wluman fie’n nun lɔ kun. Kɛ mɛn’n bó i bo’n yɛ sa sɔ’n juli ɔ. ?Ɔ maan, kɛ ɔ fin blɛ sɔ’n nun lele andɛ’n niɔn, junman mennin yɛ anzi’m b’a di ɔ?

7. ?Kɛ be se kɛ “anzi’n,” wafa sɛ yɛ be dunman’n i bo’n nin be junman nga be di’n, ɔ kɔ likawlɛ ɔ?

⁷ Be kannin anzi’m be ndɛ kpɛ 400 Biblu’n nun. Ebre nin Glɛki aniɛn nun’n, be kwla flɛ “anzi” mun kɛ “ngaliɛ difuɛ” mun. Ɔ maan, anzi mun yɛ Ɲanmiɛn sunmannin be naan be wa kɛn i klun ndɛ kle klɔ sran mun ɔn. Kɛ nga e dun mmua wunnin i ndɛ kpɔlɛ nɲɔn klikli nun lɛ’n, Zoova sinnin anzi kun sin naan w’a kan i klun ndɛ w’a kle akoto Zan.

8, 9. (a) ?Balɛ nga anzi’n bali Manɔaki nin i yi be wun wunlɛ lɛ’n, ɔ yoli be sɛ? (b) ?Sɛ siɛ nin niɛn’m be bu ndɛ sɔ’n i sin’n, ajalɛ mennin yɛ ɔ kle be ɔ?

⁸ Ɲanmiɛn fa anzi mun suɛn i sufuɛ’m be bo wie. Laa kpa nun’n, i nun mɔ jɔlɛ difuɛ mun yɛ be te sie Izraɛli nvle’n, bian kun o lɛ be flɛ i Manɔaki. I yi’n i klun ti kpan. Be kunndɛ ba be ɲɛnmɛn i. Ɔ maan, Zoova sunmannin i anzi kun Manɔaki i yi’n sin naan w’a se i kɛ ɔ́ wá wú ba. Ɔ seli kɛ: ‘Á wá wúnnzɛ yɛ á wá wú ba yasua kun. Ba nga á wá wú i lɛ’n, nán maan like mɔ be fa yi tre’n kɛn i ti’n le. Afin ba sɔ’n ɔ́ yó Ɲanmiɛn liɛ mlɔnmlɔn. I yɛ ɔ́ wá bó Izraɛli nvle i delɛ’n bo Filistifuɛ’m be sa nun ɔn.’—Jɔlɛ Difuɛ Mun 13:1-5.

⁹ Kɛ nga anzi’n fa kɛnnin i lɛ sa’n, Manɔaki i yi’n wuli ba sakpa, be flɛli i Samsɔn. Be nga be dunman’n fuli mɔ Biblu’n kan be ndɛ’n, ɔ ti be nun kun. (Jɔlɛ Difuɛ Mun 13:24) Kwlaa naan b’a wu ba’n, Manɔaki srɛli Ɲanmiɛn kɛ anzi’n bla ekun naan ɔ wa kle be like nga be ko yo naan b’a ta ba’n. Manɔaki seli kɛ: “?Sɛ sa sɔ’n i nuan yia’n, ngue yɛ é yó é mán ba’n niɔn?” Zoova i anzi’n flannin ndɛ ng’ɔ dun mmua kan kleli Manɔaki i yi’n nun kleli i. (Jɔlɛ Difuɛ Mun 13:6-14) Nanwlɛ, i sɔ’n wlali Manɔaki fanngan kpa! Andɛ’n, anzi’m be su kɔman siɛ nin niɛn’m be awloawlo’m be nun. Sanngɛ kɛ Manɔaki sa’n, sɛ siɛ nin niɛn’m be wun Zoova i atin’n i wlɛ naan be ta ba mun i liɛ’n su’n, ɔ ti kpa.—Efɛzfuɛ Mun 6:4.

10, 11. (a) ?Yialɛ nga Asiri sonja’m be bo sin yiali Elize nin i junman difuɛ’n, ɔ yoli be sɛ? (b) ?Sa ng’ɔ juli Elize nin i junman difuɛ’n be su lɛ’n, kɛ e bu i sin’n, ngue yɛ e wun i wlɛ ɔ?

¹⁰ Ɲanmiɛn nuan ijɔfuɛ Elize blɛ su’n, abonuan sa kun juli m’ɔ kle kɛ anzi’m be suan sran’m be bo ɔ. Yɛle kɛ, cɛn kun’n, Elize kali Dotan m’ɔ ti Izraɛli klɔ’n, i su. I junman difuɛ’n jasoli ndɛ kpa. Ɔ nian ɔn, sonja nin be nnɛn kpanngɔ nin be kakaklolo mun yɛ b’a sin b’a yia klɔ’n yɛ. Sirifuɛ’m be famiɛn’n yɛ ɔ sunmɛnnin i sonja yakpa mun kɛ be wa tra Elize ɔ. ?Kɛ ɔ wunnin i sɔ’n, amun si like ng’ɔ yoli’n? Srɛ m’ɔ kun i’n, yɛ atrɛkpa’n i angunndan m’ɔ sanngannin ti’n, ɔ kpannin seli i min kɛ: “?Ee min min, é yó i sɛ?” Ɔ bu i kɛ nn be liɛ w’a wie mlɔnmlɔn. Sanngɛ Elize tɛli i su kɛ: ‘Nán srɛ kun wɔ. Be nga be o e sin’n, be sɔnnin tra be sran liɛ mun.’ ?Elize i ndɛ sɔ’n i bo’n yɛle mennin?—2 Famiɛn Mun 6:11-16.

¹¹ Elize si kɛ anzi’m be o lɛ naan be suan be bo. Sanngɛ i junman difuɛ’n wunman i sɔ liɛ’n i wlɛ mlɔnmlɔn. Ɔ maan, ‘Elize srɛli Ɲanmiɛn. I waan: “Anannganman tike i ɲinma’n naan ɔ wun ase.” Yɛ Anannganman tikeli i ɲinma’n niɔn. Ɔ nian ɔn, nnɛn kpanngɔ mɔ be ti sin ngunmin, ɔ nin kakaklolo mɔ be tin sin ngunmin’n be yi oka mun, be sin yia Elize.’ (2 Famiɛn Mun 6:17) Ɔ maan, kɛ nga e fa wun i lɛ’n, Elize i junman difuɛ’n kwla wunnin anzi kpanngbanngban sɔ mun. E kusu sɛ Ɲanmiɛn wawɛ’n sie e naan e wun i ninnge’m be wlɛ’n, sɛ é kwlá sé’n, e wun anzi mun. É wún kɛ Zoova nin Zezi yɛ be sie be ɔ. Naan, be suan Zoova i sufuɛ’m be bo yɛ be sasa be.

Fanngan nga anzi’m be wlali sran mun Klist blɛ su’n

12. ?Fanngan mennin yɛ Anzi Gabliɛli wlali Mali ɔ?

¹² Cɛn kun’n, anzi Gabliɛli wa boli jasin fɛ kun kleli talua mɔ be flɛ i Mali m’ɔ siman bian’n. Ɔ seli i kɛ: ‘Nian, á wá wúnnzɛ, á wú ba yasua, yɛ á tɔ́n i dunman Zezi.’ Nanwlɛ, ndɛ sɔ mɔ Mali tili’n ɔ wlɛli i fanngan! Sanngɛ kwlaa naan anzi Gabliɛli wa kan ndɛ sɔ’n w’a kle Mali’n, ɔ dun mmua seli i kɛ: ‘Mali, nán srɛ kun wɔ, afin Ɲanmiɛn a bu wɔ sran.’ (Lik 1:26, 27, 30, 31) Anzi’n i ndɛ sɔ’n, ɔ wlali Mali i fanngan, ɔ mɛnnin i wunmiɛn. Afin, Ɲanmiɛn w’a bu i sran.

13. ?Wafa sɛ yɛ anzi’m be suannin Zezi bo ɔ?

¹³ Cɛn kun mɔ Zezi o aawlɛ flɛnnɛn nun lɔ’n, Satan sɛli i niannin’n. Sa ng’ɔ juli lɔ’n, ɔ kle kɛ anzi’m be suan e bo wie. Kɛ Satan sali Zezi niannin’n i agualiɛ su’n, Biblu’n waan: ‘Mmusu’m be si Satan yacili i nun, naan anzi’m b’a bɛ i sulɛ.’ (Matie 4:1-11) Kɔnguɛ kasiɛn nun kwlaa naan b’a tra Zezi b’a kun i’n, sa kɛ ngalɛ’n sa yɛ ɔ juli ɔ. Yɛle kɛ blɛ sɔ’n nun’n, Zezi i wla boli i wun. Ɔ maan, ɔ kotoli yɛ ɔ srɛli Ɲanmiɛn. Ɔ seli i kɛ: ‘“N Si, sɛ ɔ ti ɔ klun su’n, maan ɲrɛnnɛn wie nga to fuan min! Sanngɛ nán yo nga n klo kɛ ɔ yo su’n, sanngɛ yo nga a klo kɛ ɔ́ yó i su.” Yɛ anzi kun fin Ɲanmiɛn su lɔ ɔ wa wlɛli i fanngan ɔn.’ (Lik 22:42, 43) ?Sanngɛ ukalɛ mennin yɛ andɛ anzi’m be uka e ɔ?

Ukalɛ nga anzi’m be uka e andɛ’n

14. ?E blɛ liɛ nga nun’n, ɲrɛnnɛn mennin yɛ Zoova i Lalofuɛ’m be jrɛnnin i ɲrun ɔn? ?Yɛ i bo’n guali sɛ?

¹⁴ Kɛ e bo e ɲin ase e nian jasin fɛ’n bolɛ junman nga Zoova i Lalofuɛ’m be di i andɛ’n, sɛ ɔ ti kɛ anzi’m be suanman be bo’n, nn ɔ su yoman ye. Ɲrɛnnɛn nga be kleli be kwlaa naan alɛ dan nɲɔn su’n w’a tɔ’n, ɔ nin kɛ ɔ tɔli’n (1939-45), Zoova i Lalofuɛ’m be jrannin kekle. I wie yɛle nga Nazi’m be yoli be Alemaɲi lɔ’n, ɔ nin nga be yoli be blɔfuɛ mɛn’n nun lɔ wia afiliɛ lɔ nvle’m be nun’n. I nun mɔ Katoliki mun yɛ be sie nvle kɛ Itali nin Ɛspaɲi nin Pɔtugali mianmanlɛ nun’n, be kleli Zoova i Lalofuɛ’m be ɲrɛnnɛn cɛli kpa. Nvle nga laa be flɛ i Union Soviétique nin nvle nga be ti be akua’m be su’n, be kleli Zoova i Lalofuɛ’m be ɲrɛnnɛn lelele. Sanngɛ i wunman’n ngalɛ nun’n, Zoova i Lalofuɛ’m be jrannin kekle kpa. E sran ble mɛn nun wa kusu’n, be kleli Zoova i Lalofuɛ’m be ɲrɛnnɛn wie. Sanngɛ ɔ sɔnnin be nun.a Koko nun wa’n, Zoova i Lalofuɛ nga be o nvle nga be flɛ i Ziɔzi lɔ’n, be wunnin be ɲrun kpa. Kɛ nga e fa wun i lɛ’n, like kwlaa nga Satan kwla yo naan w’a jran be junman’n, ɔ yoli. Sanngɛ i sɔ’n tɔli nzue nun. Yɛle kɛ Zoova i anuannzɛ’n jrannin kekle yɛ dɔ nga su’n, ɔ kɔ ɔ ɲrun kpa. Sɛ i wunmuan’n ngalɛ’n kwla yoli ye’n, ɔ fin anzi’m be wie.—Jue Mun 34:8; Daniɛl 3:28; 6:23.

15, 16. ?Zoova i Lalofuɛ’m be jasin fɛ’n bolɛ junman nun’n, sɛ yɛ anzi’m be suan be bo ɔ?

¹⁵ Junman nga Zoova i Lalofuɛ’m be di’n, yɛle Sielɛ Blɛ jasin fɛ’n ndɛ m’ɔ o Biblu’n nun’n, i bolɛ asiɛ wunmuan’n su. Be kan kle sran mun naan be kaci Zezi i sɔnnzɔnfuɛ. Junman sɔ’n be tu be klun be di i kpa. (Matie 28:19, 20) Sanngɛ, be si kɛ sɛ ɔ timan be bo mɔ anzi’m be suan’n ti’n, nn be su kwlá diman junman sɔ’n kpa. Ɔ maan, ndɛ nga akoto Zan kannin m’ɔ o Sa Nglo Yilɛ 14:6, 7 nun’n, ɔ wla be fanngan kpa. I waan: ‘N wunnin anzi kun ekun ɔ tu sin ɲanmiɛn ble kpa nun lɔ, ɔ le jasin fɛ kun m’ɔ ti anannganman, m’ɔ kan kle sran nga be o asiɛ’n su mɔ be fin mɛnmɛn nin nvlenvle’n kwlaa nun’n, ɔ nin be kwlaa nga be aniɛn’n ti fanunfanun’n, ɔ nin sran wafawafa’n kwlaa. Ɔ kpan se kɛ: “Maan amun ɲin yi Ɲanmiɛn, an mɛnmɛn i, afin sran’m be ndɛ bulɛ blɛ’n w’a ju. I m’ɔ yili ɲanmiɛn su lɔ’n, nin asiɛ’n, nin jenvie’n, ɔ nin nzue ti mun’n, an koto i bo!”’

¹⁶ I ndɛ sɔ’n kle kɛ anzi’m be suan mɛn wunmuan nun jasin fɛ’n bolɛ junman nga Zoova i Lalofuɛ’m be di’n, i bo. Anzi’m be yo maan sran nga be klo nanwlɛ’n be ba Zoova i Lalofuɛ’m be sin. Annzɛ kusu be su Zoova i Lalofuɛ’m be bo naan be ko to i sɔfuɛ mun. I sɔ’n ti’n, wafa nga Zoova i Lalofuɛ wie mun nin sran wie’m be yia nun’n, nanwlɛ kɛ a niɛn i sa’n, ɔ timan like ngbɛn. Wie liɛ’n, kekle’n o sran wie’m be su annzɛ kusu be su kunndɛ kɛ be uka be naan be si Ɲanmiɛn. Kpɔkun blɛ kunngba sɔ nun’n, be nin Zoova i Lalofuɛ’m b’a yia nun.

Junman sroesroe nga anzi’m bé wá dí’n

17. ?Ngue yɛ anzi kunngba cɛ yoli Asiri sonja mun ɔn?

¹⁷ Anzi’m be ti Zoova i ngalɛ difuɛ yɛ be suan i sufuɛ’m be bo. Sanngɛ nɛ́n i ngba ɔ. Laa kpa’n nun’n, Zoova sunmannin be kɛ be wa di sran’m be jɔlɛ. I wie yɛle kɛ afuɛ ya mɔcuɛ nun ka naan y’a ju Zezi blɛ su’n, Asiri sonja’m be bali kɛ bé útu Zerizalɛmu klɔ’n. ?Sanngɛ Zoova yoli sɛ? Ɔ seli kɛ: ‘M bɔbɔ min dunman’n ti, ɔ nin min sufuɛ Davidi ti, ń sásá klɔ nga, yɛ ń dé i nun sran mun.’ Sa ng’ɔ juli’n, Biblu’n yiyili nun. I waan: ‘Le kun sɔ’n i kɔnguɛ’n, Anannganman i anzi’n ɔli Asirifuɛ’m be nanmue’n nun lɔ. Ɔ ko kunnin sran akpiakpi ya sran akpiakpi ablaɔcuɛ nin nnun. Bé jáso nglɛmun’n, nanmue’n nun ti fuɛn ngunmin.’ (2 Famiɛn Mun 19:34, 35) Kɛ e fa sonja’m be wunmiɛn’n sunnzun anzi kunngba cenje i wunmiɛn liɛ’n, ɔ tomɛn i fuɛn kaan sa.

18, 19. ?Junman sroesroe mennin yɛ anzi’m bé wá dí ɔ? ?Wafa sɛ yɛ sa sɔ’n kan mɛn nunfuɛ mun ɔn?

¹⁸ Anzi mun yɛ Zoova wá fá dí klɔ sran’m be jɔlɛ ekun ɔn. Ɔ cɛ kaan’n, Zezi ‘nin i anzi mun mɔ be le fanngan dan’n, bé bá sin m’ɔ jue’n nun.’ ?Bé bá ngue yolɛ? Bé wá ‘tú be nga be siman Ɲanmiɛn’n nin be nga be faman e Min Zezi i jasin fɛ’n su’n be fɔ.’ (2 Tɛsalonikfuɛ Mun 1:7, 8) ?Wafa sɛ yɛ sa sɔ’n kan mɛn’n nunfuɛ mun ɔn? Be nga kɛ é sé yɛ’n, be faman be su siemɛn i Sielɛ Blɛ jasin fɛ’n mɔ be bo i mɛn wunmuan’n nun i bo’n, bé wá núnnún be. Saan be nga be kunndɛ Zoova mɔ be ti sran kpa mɔ be ti wɛtɛɛfuɛ’n, be yɛ ‘sɛ Zoova ya cɛn’n ju’n, bé ɲán be ti ɔ.’—Sofoni 2:3.

¹⁹ Wafa nga Zoova fɛ i anzi mun suan e bo’n ti’n, ɔ fata kɛ e lɛ i ase. Junman nga anzi’m be di i Ɲanmiɛn klun sa yolɛ’n nun’n, sɛ e wun i wlɛ’n, ɔ́ wlá e fanngan. Afin, anzi wie’m be jasoli Zoova wun yɛ be suli Satan su. Like suanlɛ ng’ɔ́ bá lɛ’n, ɔ́ wá yíyí wafa nga Klistfuɛ’m be kwla yo naan b’a kwla jran cinnjin kpa Satan nin i mmusu tɛtɛ sɔ’m be ɲrun’n.

[Ja ngua lɛ ndɛ’n]

?Ngue yɛ amun suannin ɔn?

• ?Anzi’m be fin nin?

• ?Laa kpa’n nun’n, junman mennin yɛ anzi’m be dili ɔ?

• ?Junman nga anzi’m be di i andɛ’n, i su ndɛ mennin yɛ Sa Nglo Yilɛ 14:6, 7 kan ɔn?

• ?Junman sroesroe mennin yɛ anzi’m bé wá dí ɔ?

[Foto, bue 13]

Anzi kun wlali Manɔaki nin i yi be fanngan.

[Foto, bue 15]

“Be nga be o e sin’n, be sɔnnin tra be sran liɛ mun.”