?Wafa sɛ yɛ e kwla jran mmusu’m be ɲrun cinnjin ɔn?
‘Anzi nga b’a tranman junman nga Ɲanmiɛn sieli be su i su’n, mɔ be yacili be lika’n, Ɲanmiɛn ci be guali aosin tuun kpa’n nun, ɔ su ɲannjiman be mlɔnmlɔn naan sɛ i jɔlɛ dilɛ cɛn dan’n ju ɔ w’a di be ndɛ’n.’—ZID 6.
1, 2. ?Ngue yɛ sran’m be wunmɛn i wlɛ Satan nin i mmusu’m be su ɔ?
AKOTO PIƐLI seli Klistfuɛ’m be kɛ: ‘An sasa amun wun, an niannian! Afin mmusu’m be si Satan m’ɔ ti amun kpɔfuɛ’n, ɔ ti kɛ asɔmɔli m’ɔ wlanwlan ɔ kpan kunndɛ nnɛn’n sa.’ (1 Piɛr 5:8) Akoto Pɔlu kusu seli kɛ: ‘N kloman kɛ amun nin mmusu mun di. An kwlá nɔnman e Min’n i klowa’n nun naan amun kunngba’n amun a nɔn mmusu’n be liɛ’n nun. Yɛ amun nin e Min’n kwlá wlaman asa naan amun kunngba’n amun nin mmusu mun amun a wla asa.’—1 Korɛntfuɛ Mun 10:20, 21.
2 ?Sanngɛ wan yɛle Satan nin mmusu mun? ?Nin yɛ be fin ɔn? ?Ɲanmiɛn yɛ ɔ boli be sɔ ɔ? ?Ta nga be le i sran’m be su’n, ɔ cɛnnin annzɛ w’a cɛnman? ?Sran kɛ ngalɛ sa mɔ be tinmin’n cɛnnin’n, ngue bɔɔ cɛ yɛ e kwla fa sasa e wun be lika ɔ?
?Nin yɛ Satan nin mmusu’m be fin ɔn?
3. ?Ɔ yoli sɛ yɛ maan be wa flɛli Ɲanmiɛn i anzi’n kun Satan ɔn?
3 Mɛn i bo bolɛ nun Edɛni fie nun lɔ’n, Ɲanmiɛn i anzi kun jasoli i wun. ?Ngue ti ɔ? Afin, junman nga Ɲanmiɛn fa mɛnnin i kɛ ɔ di’n, i klun w’a jɔman su. Ɔ maan, kɛ Ɲanmiɛn yili Adam nin Ɛvu’n, anzi sɔ’n waan ɔ́ wláwlá be naan be jaso Ɲanmiɛn wun. Naan i liɛ’n, sran’m bé sú i bɔbɔ. Be kusu be fɛli i atin liɛ’n su. Kɛ ɔ yoli sɔ’n yɛ be w’a tɔnnin anzi sɔ’n i dunman kɛ Satan’n niɔn. I blɛ sɔ’n nun’n, anzi wie’m be suli i su. ?Wafa sɛ?—Bo Bolɛ 3:1-6; Rɔmfuɛ Mun 5:12; Sa Nglo Yilɛ 12:9.
4. ?Kwlaa naan Nowe blɛ su anannganman su nzue dan’n w’a tɔ’n, ngue yɛ anzi nga be jasoli Ɲanmiɛn wun’n, be yoli ɔ?
4 Ɲanmiɛn Ndɛ’n se kɛ Nowe blɛ su’n, kwlaa naan anannganman su nzue dan’n w’a tɔ’n, asiɛ’n su wa bla mun yɛ Ɲanmiɛn i anzi wie’m be liɛ’n be wuli be ti ɔ. Sanngɛ nn i sɔ’n ti tete like. Biblu’n waan: ‘Ɲanmiɛn mma mun be wunnin kɛ sran’m be wa bla sɔ’m be ti nglanman kpa naan b’a kunndɛ wie b’a ja.’ Be nin klɔ sran’m be mma bla sɔ mun yɛ be wuli sran jajraajra mun’n niɔn. (Bo Bolɛ 6:2-4) Kɛ ɔ fin lɛ mɔ mmusu sɔ’m be jasoli Ɲanmiɛn wun’n, be nin Satan yɛ be o nun siɛn’n niɔn.
5. ?Kɛ Zoova fá nzue dan’n núnnún asiɛ’n, ngue yɛ mmusu’m be yoli ɔ?
5 Kɛ Ɲanmiɛn fali anannganman su nzue’n nunnunnin mɛn’n, sran jajraajra sɔ’m be nin be nin’m be wuli. Sanngɛ anzi nga be nin klɔ sran’m be wa wuli ba’n, be sali be sin ɲanmiɛn su lɔ. Sanngɛ ‘b’a tranman junman nga Ɲanmiɛn sieli be su i su’ kun. Ɲanmiɛn ‘ci be guali aosin tuun kpa’n nun.’—Zid 6.
6. ?Wafa sɛ yɛ mmusu’m be laka sran mun ɔn?
6 Kɛ mɔ mmusu sɔ mun ‘b’a tranman junman nga Ɲanmiɛn sieli be su i su’ kun’n ti’n, Satan klun sa yɛ be yo ɔ. I sɔ’n ti’n, Ɲanmiɛn w’a manman be atin kɛ be fa klɔ sran wunnɛn kun. Sanngɛ be te yo ninnge wie mun ekun. Yɛle kɛ be wlawla yasua nin bla mun naan be kunndɛ bian annzɛ bla sukusuku. Kpɔkun be lakalaka klɔ sran mun naan be di bae. Sran ng’ɔ to i wiengu amuɛn’n, m’ɔ sɔ amuɛn’n, m’ɔ o vodu nun’n, m’ɔ nin wunmiɛn ijɔ’n, i sɔ sran liɛ’n, ɔ di bae. (Mmla’n 18:10-13; 2 Be Nyoliɛ 33:6) Sa nga wá tɔ́ Satan su’n, i kunngba’n yɛ ɔ́ wá tɔ́ mmusu’m be su ɔ. Yɛle kɛ bé wá núnnún be mlɔnmlɔnmlɔn. (Matie 25:41; Sa Nglo Yilɛ 20:10) Kɛ mɔ be nin a nunnunman be’n ti’n, ɔ fata kɛ e jran be ɲrun cinnjin. ?Sanngɛ, Satan i tinmin liɛ’n ju nin? ?Wafa sɛ yɛ e kwla jran Satan nin i mmusu’m be ɲrun cinnjin kpa ɔ? I sɔ kosan mun yɛ é wá yíyí nun siɛn’n niɔn.
?Satan i tinmin liɛ’n ju nin?
7. ?Wafa sɛ yɛ Satan tin mɛn nunfuɛ’m be su ɔ?
7 Kɛ ɔ fɛ i bo bolɛ’n nun lele andɛ’n, junman nga Satan di’n, yɛle Zoova i su ato bualɛ. (Nyanndra Mun 27:11) Ɔ laka sran sunman. Afin, 1 Zan 5:19 waan: “Klunwifuɛ’n sie mɛn wunmuan’n.” Mɛn wunmuan mɔ Satan sie i’n ti yɛ ɔ kwla seli Zezi kɛ ɔ́ fá “mɛn’n i famiɛn diwlɛ’n kwlaa” nin aɲrunɲan ninnge’n kwlaa mɛ́n i’n niɔn. (Lik 4:5-7) Akoto Pɔlu kannin Satan i ndɛ kɛ: ‘Sɛ e jasin fɛ nga e kan’n ɔ te o bui bo’n, nn be nga be su mlin’n be ɲrun yɛ ɔ te o bui bo ɔ. Be liɛ’n, be lafiman su yɛle kɛ mɛn nga i min’n ɔ sacili be angunndan’n naan Klist m’ɔ fa Ɲanmiɛn’n i wafa ng’ɔ ti’n i kwlaa i jasin fɛ’n, b’a wunmɛn i wlɛ.’ (2 Korɛntfuɛ Mun 4:3, 4) Satan’n, ‘ato’n ti i junman, i yɛ ɔ ti ato buafuɛ’m be si’n niɔn.’ Sanngɛ ‘i bɔbɔ kaci i wun kɛ anzi m’ɔ kpaja’n sa.’ (Zan 8:44; 2 Korɛntfuɛ Mun 11:14) Ɔ maan, kɛ Satan o lɛ’n, ajalɛ ng’ɔ fata kɛ ɔ fa naan w’a laka mɛn siefuɛ nin be nga be sie be’n, be diman be yalɛ i sa nun. Gblɛ nin ato ndɛ nga be nga be tɔn be wun suɛn kɛ be su Ɲanmiɛn’n be kan’n, yɛ Satan fa laka mɛn’n nunfuɛ mun ɔn.
8. ?Wafa sɛ yɛ Biblu’n kan Satan i tinmin ng’ɔ le i’n, i ndɛ ɔ?
8 Sa ng’ɔ juli Daniɛli blɛ su afuɛ nga be flɛ i 536 nin 535 be afiɛn kwlaa naan y’a ju Zezi blɛ su’n, ɔ kle kɛ Satan i tinmin’n cɛnnin. Blɛ sɔ’n nun’n, Ɲanmiɛn sunmɛnnin i anzi kun kɛ ɔ wa wla Daniɛli i fanngan. Sanngɛ kɛ anzi’n bá’n, ‘wawɛ [mɔ yɛle mmusu] ng’ɔ sasa Pɛrsi famiɛn diwlɛ’n, ɔ buli i ɲrun.’ Anzi sɔ mɔ Ɲanmiɛn sunmɛnnin i’n, ɔ jrannin wawɛ sɔ’n i ɲrun kekle cɛn ba lele 21. Ɔ yoli sɔ lele naan ‘Mikaɛli m’ɔ ti anzi dan kun’n,’ w’a bɛ i ukalɛ. Biblu’n nun ndɛ kunngba sɔ’n kan ‘wawɛ [mɔ yɛle mmusu] ng’ɔ sasa Glɛki mɛn’n,’ i ndɛ wie. (Daniɛl 10:12, 13, 20) Asa ekun’n, Sa Nglo Yilɛ 13:1, 2 kan Satan i ndɛ kɛ ɔ ti ‘dragɔn.’ Naan dragɔn sɔ’n ‘tinnin nnɛn dan kun, ɔ fɛli i bia’n nin i kwlalɛ dan’n mɛnnin i.’ Nnɛn dan sɔ’n, ɔ ti politiki anuannzɛ kwlaa be nzɔliɛ.
9. ?Wan mun yɛ Klistfuɛ’m be nin be kun ɔn?
9 Kɛ e niɛn i sɔ ninnge mun’n, ndɛ nga akoto Pɔlu kɛnnin i yɛ’n, ɔ boman e nuan. Ɔ seli kɛ: ‘Nán e nin klɔ sran yɛ e kun ɔn, sanngɛ e nin mmusu mun, nin aosin tuun nga e o nun yɛ’n i min’n i kpɛnngbɛn mun, yɛ mmusu tɛtɛ mɔ be o nglo lɔ’n yɛ e kun ɔn.’ (Efɛzfuɛ Mun 6:12) Be yɛ be jin sran mun nin be siefuɛ’m be sin yɛ be wlawla be ɔ. Ɔ maan sran’m be nunkunlɛ mɔ be nunkun be’n, ɔ nin nzaje sa mɔ nanwlɛ be bo e kwlaa e nuan’n, e wun be bo. Sanngɛ ɔ nin i sɔ ngba’n, like nga e kwla yo naan y’a kwla jran cinnjin mmusu tɛtɛ sɔ’m be ɲrun’n, yɛ é wá wún i siɛn’n niɔn.
?Ngue yɛ e kwla fa sasa e wun ɔn?
10, 11. ?Wafa sɛ yɛ e kwla jran cinnjin Satan nin i mmusu’m be ɲrun ɔn?
10 E bɔbɔ wunmuan sa’n, e kwlá jranman Satan nin i mmusu’m be ɲrun. I sɔ’n ti’n, Pɔlu man e afɔtuɛ kun. I waan: ‘Maan e Min’n tin amun sran wunmuan mɔ amun nin i amun a kaci nin i kwlalɛ m’ɔ leman wunsu’n ti.’ Ɔ fata kɛ e talo Ɲanmiɛn. Ɔ maan, Pɔlu guɛli i ndɛ’n su kɛ: ‘Kɛ ɔ ko yo naan amun a kwla jran mmusu’m be si Satan m’ɔ kpɛ amun gblɛ’n i ɲrun’n ti’n, an fa Ɲanmiɛn i alɛ ninnge’n kwlaa wla amun wun. An fa Ɲanmiɛn i alɛ ninnge’n kwlaa naan sɛ lika’n yo tɛ’n amun a kwla kpli amun ti, yɛ kɛ an kwla be kwlaa’n, amún jrán kekle.’—Efɛzfuɛ Mun 6:10, 11, 13.
11 Pɔlu kan kleli i niaan Klistfuɛ mun kpɛ nɲɔn kɛ be ‘fa Ɲanmiɛn i alɛ ninnge’n kwlaa wla be wun.’ I sɔ’n kle kɛ sran’n nga i waan ɔ nin mmusu’m bé kún mɔ i angunndan’n “kwlaa” nunman alɛ’n su’n, ɔ su fiteman nun. ?Ɔ maan, ngue yɛle Ɲanmiɛn i alɛ ninnge kwlaa sɔ m’ɔ fata kɛ Klistfuɛ’m be wla naan b’a kwla jran mmusu’m be ɲrun kekle’n?
“An tanndan amun wun amun jran kekle”
12. ?Wafa sɛ yɛ Klistfuɛ’m be kwla fa nanwlɛ’n cici be bo lika’n niɔn?
12 Pɔlu seli kɛ: ‘Ɔ maan an tanndan amun wun an jran kekle. An fa nanwlɛ’n yo kɛ kplo sa, an fa ci amun bo. An yo sa ng’ɔ ti i nuan su’n, maan ɔ yo kɛ like kokloko mɔ án fá káta amun wue’n su’n sa.’ (Efɛzfuɛ Mun 6:14) Ɲanmiɛn i alɛ ninnge nɲɔn nga Pɔlu kɛn i ndɛ wa’n, yɛle like mɔ be fa ci be bo nin like kokloko mɔ be fa kata be wue’n su’n. Blɛ sɔ’n nun’n, sran ng’ɔ ti sonja’n, ɔ fɛ i like ng’ɔ ti kɛ kplo sa’n, ɔ ci i bo kpa. Kɛ ɔ yo sɔ’n, ɔ kwla sɛsɛ i bo lika’n (ɔ yo sɔ naan like yaya w’a yomɛn i wi’n, annzɛ i kun bo’n). Kɛ ɔ fɛ i kplo’n ci i bo’n, ɔ kwla fɛ i tokofi’n sende i bo. Biblu’n nun nanwlɛ ndɛ’n ti kɛ kplo’n sa. Ɔ fata kɛ e fa ci e bo kpa. Yɛle kɛ e nanti Biblu’n nun ndɛ’n su. ?E kanngan Biblu’n nun cɛn kwlaa? ?E nin e awlofuɛ mun e kanngan Biblu’n nun likawlɛ? ?Fluwa e nian Ɲanmiɛn ndɛ’n nun cɛn kwlaa’n, e nin e awlofuɛ mun e nian nun cɛn kwlaa? ?Asa kusu’n, kɛ é súan Biblu’n nun like’n, e kunndɛ ninnge’m be wlɛ wunlɛ Biblu’n i akua nga ‘sran kpa nanwlɛfuɛ m’ɔ si ngwlɛlɛ’n’ yili be’n, be nun titi? (Matie 24:45) Sɛ e yo i sɔ’n, nn e su nanti ndɛ nga Pɔlu kɛnnin i lɛ’n su. Ninnge nga be kwla uka e Ɲanmiɛn sulɛ nun ekun’n, yɛle video nin DVD nga sran kpa nanwlɛfuɛ’n yili be’n. Sɛ e fa nanwlɛ’n e fa cici e ti’n, i sɔ’n úka e naan y’a fa ajalɛ kpa. Ɔ́ sásá e ajalɛ tɛ’n i lika.
13. ?Wafa sɛ yɛ e kwla sasa e klun angunndan’n niɔn?
13 Like kokloko nga sonja’n fa kɛtɛ i wue’n su’n, ɔ sɛsɛ i awlɛn’n nin i wie lika wie mun kun. Klistfuɛ mun kusu’n, ɔ fata kɛ be nian be klun angunndan’n su. Yɛle kɛ be yo ninnge nga Ɲanmiɛn klo be’n, yɛ be nanti i mmla’m be su. Sɛ é kwlá sé’n, sɛ e fa like kokloko sɔ’n fa kata e wue’n su’n, e su buman Ɲanmiɛn Ndɛ’n i finfin le. Sɛ e mian e ɲin lele naan ‘e faman sa tɛ yolɛ’n sieman e awlɛn’n nun mlɔnmlɔn’n, naan klun ufue yolɛ’n yɛ ɔ tran e awlɛn’n nun’n,’ ɔ́ yó maan ‘ajalɛ ng’ɔ timan kpa’n, e su tumɛn i mlɔnmlɔn.’—Amɔs 5:15; Jue Mun 119:101.
14. ?Kɛ be se kɛ ‘maan e awlɛn mɔ e tra kan jasin fɛ’n yo kɛ e ngbabua sa’n,’ i bo’n yɛle mennin?
14 Ngbabua ng’ɔ sɔ’n, yɛ Rɔmu sonja’m be wla be fa wlanwlan Rɔmu mɛn wunmuan’n nun. ?Ɔ maan kɛ be se Klistfuɛ’m be kɛ ‘be awlɛn mɔ be tra kan jasin fɛ’n yo kɛ be ngbabua sa’n,’ i bo’n yɛle mennin? (Efɛzfuɛ Mun 6:15) I sɔ’n kle kɛ be ɲin o jasin fɛ’n bolɛ’n su. Ɔ maan, kɛ be ɲɛn i wun atin’n, be sisiman be bo lele naan b’a bo. (Rɔmfuɛ Mun 10:13-15) Jasin fɛ’n bolɛ’n yɛ maan e kwla jran cinnjin Satan ‘m’ɔ kpɛ e gblɛ’n’ i ɲrun ɔn.—Efɛzfuɛ Mun 6:11.
15. (a) ?Ngue yɛ ɔ kle kɛ e ‘Ɲanmiɛn su mɔ e lafi’n m’ɔ yo kɛ e ɲrɛn sa’n,’ ɔ ti cinnjin ɔn? (b) ?Satan i ‘ta’n m’ɔ sɔ i nuan to’n,’ be nun wie mennin yɛ be kwla saci e Ɲanmiɛn sulafilɛ’n niɔn?
15 Pɔlu guɛli i ndɛ’n su kɛ: ‘Sa kwlaa ng’ɔ tɔ amun su’n, maan Klist su mɔ an lafi’n [Ɲanmiɛn su mɔ an lafi’n, NW] ɔ yo kɛ amun ɲrɛn sa naan Klunwifuɛ’n i ta’n m’ɔ sɔ i nuan to’n, i kwlaa wie su.’ (Efɛzfuɛ Mun 6:16) Kɛ Pɔlu bó i ndɛ’n bo m’ɔ se kɛ ‘sa kwlaa ng’ɔ tɔ amun su’n’ amun Ɲanmiɛn sulafilɛ’n yo kɛ ɲrɛn sa’n, i sɔ’n kle kɛ Ɲanmiɛn su mɔ e lafi’n ti e like nanndoliɛ. Ɔ fataman kɛ e Ɲanmiɛn sulafilɛ’n kpɔnzɔ le. Ɲrɛn’n ɔ sasa sran. Kɛ Ɲanmiɛn sulafilɛ’n ti sɔ ɔ. Ɲanmiɛn sulafilɛ’n ti’n, Satan ‘i ta’n m’ɔ sɔ i nuan to’n,’ ɔ kwlá ɲanman e. ?Andɛ’n, ngue yɛ e kwla fa sunnzun Satan i ta’n m’ɔ sɔ i nuan to’n niɔn? Ɔ kwla yo nzowa kpɛlɛ m’ɔ yo sran’n i ya kpa’n, annzɛ ato bualɛ annzɛ kusu gblɛ kpɛlɛ’n. Be nga be jasoli Ɲanmiɛn wun m’ɔ be kpɔ i’n, be yo i sɔ ninnge mun naan e Ɲanmiɛn sulafilɛ’n kpɔnzɔ. Asa kusu’n, Satan i ‘ta’ sɔ’n kwla yo aɲanbeun ninnge’m be kunndɛlɛ mɔ e fa cici e ti’n. Ɔ maan, wie liɛ’n, e fa e wun sunnzun be nga be ti aɲinkplifuɛ mun’n. Atrɛkpa’n, sran sɔ mɔ e fa e wun e sunnzun be lɛ’n, be le sua nin loto ngblingbli mun. Annzɛ kusu kɔmin ɲanman nga be wla’n, be toli i gua kpan. Annzɛ ajulisu tralɛ’n yɛ be le i ɔ. Kannzɛ e wiengu’m be yo sɔ’n, ɔ fata kɛ e Ɲanmiɛn sulafilɛ’n yo dan naan y’a kwla kpalo Satan i ‘ta’n m’ɔ sɔ i nuan to’n.’ ?Sanngɛ é yó sɛ naan e Ɲanmiɛn sulafilɛ’n w’a taka kpa?—1 Piɛr 3:3-5; 1 Zan 2:15-17.
16. ?Ngue yɛ ɔ kwla uka e naan e Ɲanmiɛn sulafilɛ’n i bo’n w’a taka kpa ɔ?
16 Sɛ e waan é fá e wun mántan Ɲanmiɛn kpa’n, ɔ fata kɛ e bɔbɔ’n e suan Biblu’n nun like. Yɛ e srɛ Ɲanmiɛn titi naan ɔ wla e Ɲanmiɛn sulafilɛ’n i bo ase kpa. Yɛ sɛ e srɛ Zoova’n maan e ayeliɛ’n nin srɛlɛ nga e srɛli i’n, be san nun. I wie yɛle e Sasafuɛ Tranwlɛ’n i nun like suanlɛ’n. Kɛ é síesíe e wun’n, maan e yo naan cɛn nga é wá súan nun like aɲia’n bo lɔ’n, y’a tɛ kosan’m be su. Sɛ e suan Biblu’n nun like naan e suan Biblu’n i akua’m be nun like wie’n, e Ɲanmiɛn sulafilɛ’n táka kpa tankaan.—Ebre Mun 10:38, 39; 11:6.
17. ?Wafa sɛ yɛ ‘delɛ mɔ Ɲanmiɛn de e’n ɔ yo kɛ kpongbo kle sa’ ɔ?
17 Kɛ Pɔlu kannin Ɲanmiɛn i alɛ ninnge’m be ndɛ lele’n, ɔ guɛli i bo kɛ: ‘Maan delɛ mɔ Ɲanmiɛn de amun’n ɔ yo kɛ kpongbo kle sa, an fa wla amun ti. An fa Ɲanmiɛn ndɛ’n m’ɔ ti kɛ i wawɛ’n i tokofi’n sa m’ɔ fa mannin amun’n.’ (Efɛzfuɛ Mun 6:17) Sonja’m be fa kpongbo kle’n be sasa be ti’n. Afin, e ti’n yɛ e fa bu angunndan ɔn. I kunngba’n niɔn, e mɔ e ti Klistfuɛ’n, like nga e wla o su kɛ e ɲɛn i’n, ɔ sasa e ti mɔ e fa bu angunndan’n. (1 Tɛsalonikfuɛ Mun 5:8) E liɛ’n, e faman mɛn’n nun ninnge nin aɲanbeun ninnge mun e saciman e angunndan. Like nga e wla o su’n, yɛle like nga Ɲanmiɛn waan ɔ́ fá mán e’n. I sɔ’n yɛ Zezi yoli ɔ.—Ebre Mun 12:2.
18. ?Ngue ti yɛ ɔ fataman kɛ e fa e Biblu’n nun kannganlɛ cɛn kwlaa yo kondro vaa ɔ?
18 Ɲanmiɛn i alɛ ninnge’m be nun like kasiɛn ng’ɔ sasa e Satan nin i mmusu’m be lika’n, yɛle Ɲanmiɛn nuan ndɛ m’ɔ o Biblu’n nun’n. I sɔ’n ti bɔbɔ yɛ ɔ fataman kɛ e fa e Biblu’n nun kannganlɛ cɛn kwlaa yo kondro vaa’n niɔn. Sɛ e si Ɲanmiɛn ndɛ’n nun kpa’n, i sɔ’n sásá e naan Satan i ato ndɛ’m b’a saciman e. Ɔ́ sásá e mmusu tɛtɛ’m be ato ndɛ nga be kan saci e dunman’n be lika. Yɛ ndɛ tɛtɛ nga be nga be jasoli Ɲanmiɛn wun be kan’n, ɔ́ sásá e be lika wie.
‘Sa’n kwlaa nun’n, amun nin Ɲanmiɛn koko yalɛ’
19, 20. (a) ?Ngue yɛ ɔ́ wá tɔ́ Satan nin i mmusu’m be su ɔ? (b) ?Ngue yɛ e kwla yo naan e nin Ɲanmiɛn e afiɛn w’a mantan kpa ɔ?
19 Ɔ kaan sa’n, bé wá núnnún Satan nin i mmusu mun. Satan bɔbɔ ‘si kɛ i cɛn’n w’a sɔnman kun.’ Ɔ maan, ya ble kpa yɛ w’a fa ɔ. Yɛ be nga ‘be fa Ɲanmiɛn mmla’n, nin ndɛ nanwlɛ nga Zezi yili i nglo’n su’n,’ ɔ nin be kun. (Sa Nglo Yilɛ 12:12, 17) I ti’n, ɔ fata kɛ e jran cinnjin kpa Satan nin i mmusu’m be ɲrun.
20 Nanwlɛ, kɛ be se e kɛ e wla Ɲanmiɛn i alɛ ninnge mun’n, ɔ yo e fɛ dan! Kɛ Pɔlu kannin Ɲanmiɛn i alɛ ninnge’m be wlalɛ ndɛ’n, i agualiɛ su’n, ɔ mannin afɔtuɛ kun. I waan: ‘Kɛ an ko yo i kwlaa sɔ’n, an srɛ Ɲanmiɛn kɛ ɔ jran amun sin. Sa’n kwlaa nun’n, amun nin Ɲanmiɛn koko yalɛ i wawɛ’n i fanngan nun tititi. An niɛn i sɔ’n su yo i titi, nán an kpɔnzɔ. An srɛ Ɲanmiɛn kɛ ɔ niɛn i sran’m be kwlaa be su.’ (Efɛzfuɛ Mun 6:18) Kɛ e srɛ Ɲanmiɛn’n, e nin i e afiɛn mantan kpa. Ɔ maan, Ɲanmiɛn ninnge’m be nun e lafiman. I sɔ’n ti’n, maan e fa Pɔlu i ndɛ sɔ’n su kpa naan e nin Ɲanmiɛn e koko yalɛ titi. I liɛ’n, é kwlá jrán cinnjin kpa Satan nin i mmusu’m be ɲrun.
?Ngue yɛ amun suannin ɔn?
• ?Nin yɛ Satan nin mmusu’m be fin ɔn?
• ?Satan i tinmin liɛ’n ju nin?
• ?Sasalɛ mennin yɛ ɔ fata kɛ e sasa e wun Satan nin i mmusu’m be lika ɔ?
• ?Ngue yɛle Ɲanmiɛn i alɛ ninnge m’ɔ fata kɛ e wla’n?
[Foto, bue 17]
‘Ɲanmiɛn mma mun be wunnin kɛ sran’m be wa bla sɔ’m be ti nglanman kpa.’
[Foto, bue 19]
?Amun kwla yiyi Ɲanmiɛn i alɛ ninnge nsiɛn’m be nun?
[Foto mun, bue 21]
?Wafa sɛ yɛ Ɲanmiɛn i alɛ ninnge sɔ’n maan e kwla jran cinnjin Satan nin i mmusu’m be ɲrun ɔn?