Maan asɔnun’n wɔ i ɲrun

‘Asɔnunfuɛ’m be le alaje, yɛ asɔnun’n kɔ i ɲrun.’—SA NGA BE YOLI’N 9:31.

1. ?‘Ɲanmiɛn i asɔnun’n’ i su ndɛ benin yɛ é wá yíyí be nun ɔn?

AFUƐ nga be flɛ i 33 nun pantekɔtu nun yɛ Zoova fali Klist i sɔnnzɔnfuɛ wie mun yoli nvle uflɛ kun ɔn. Be yɛ be ti “Izraɛlifuɛ nga be ti i liɛ sakpa’n” niɔn. (Galasifuɛ Mun 6:16) Klistfuɛ sɔ mɔ Ɲanmiɛn fɛli i wawɛ’n mannin be’n, Biblu’n flɛ be ekun kɛ ‘Ɲanmiɛn i asɔnun.’ (1 Korɛntfuɛ Mun 11:22) ?Sanngɛ, ngue yɛ Ɲanmiɛn i asɔnun sɔ’n yó ɔ? ?Wafa sɛ yɛ ‘Ɲanmiɛn i asɔnun’n’ siesie i ninnge’m be yolɛ’n niɔn? ?Ninnge’m be yolɛ sɔ’n ti e liɛ wie? ?Yɛ e kwla di su aklunjuɛ?

2, 3. ?Wafa sɛ yɛ Zezi kleli kɛ asɔnun’n su yoman sukusuku ɔ?

² Like suanlɛ ng’ɔ sinnin’n nun’n, Zezi kannin Ɲanmiɛn i asɔnun’n i takalɛ’n i ndɛ. Ɔ seli Piɛli kɛ: ‘Yɛbuɛ tanda’n su yɛ ḿ má kplán min asɔnun’n niɔn, yɛ wie’n su kwlá sacimɛn.’ (Matie 16:18) Asa ekun’n, wafa ng’ɔ fata kɛ asɔnun mɔ bé wá táka’n, ɔ siesie i ninnge’m be yolɛ’n, ɔ kɛnnin i ndɛ kleli i akoto mun wie.

³ Zezi i ijɔlɛ nin i ayeliɛ’n nun’n, ɔ kleli kɛ Klistfuɛ wie’m bé wá dí kpɛnngbɛn asɔnun’n nun. Be kpɛnngbɛn dilɛ sɔ’n yɛle kɛ, bé sú be wiengu mun. Zezi seli kɛ: ‘An si kɛ be nga be sie be kɛ be sie nvle wie mun’n, be mianmian be sran mun, yɛ sran dandan’m be tin be sran’m be su. Amun liɛ’n su yoman sɔ, sanngɛ amun nun sran ng’ɔ klo kɛ ɔ́ yó dan’n, maan ɔ su i wiengu mun, yɛ amun nun sran ng’ɔ klo kɛ ɔ́ yó amun su kpɛn’n, maan ɔ yo i wiengu’m be kwlaa be kanga.’ (Mark 10:42-44) Ndɛ sɔ’n kle weiin kɛ ‘Ɲanmiɛn i asɔnun’n’ nun’n, sran’m be su tranman lɛ ngbɛn kɛ sran mɔ be leman siefuɛ mɔ be afiɛn sɛman’n sa. Sanngɛ i nunfuɛ’m be bo yó kun, yɛ bé yó ninnge’n kwlaa i nuan su sɛsɛsɛ.

4, 5. ?Ngue yɛ ɔ kle kɛ ɔ fata kɛ be kle asɔnunfuɛ’m be like ɔ?

⁴ Zezi bɔbɔ m’ɔ́ wá yó ‘Ɲanmiɛn i asɔnun’n’ i su kpɛn’n, ɔ kleli kɛ i akoto nin i sɔnnzɔnfuɛ wie’m bé wá dí junman trele kun asɔnun’n nun. ?Junman benin yɛle sɔ’n? Yɛle kɛ bé wá klé asɔnunfuɛ mun Zoova i su like. Kɛ Ɲanmiɛn cɛnnin Zezi’n, ɔ fiteli i akoto wie’m be ɲrun. Blɛ sɔ nun’n, nán e wla fi ndɛ ng’ɔ kan kleli Piɛli’n su. Ɔ usali Piɛli kɛ: “?Zan wa Simɔn, a klo min?” Ɔ tɛli i su kɛ: “Ɛɛn! Nannan, a si kɛ n klo wɔ.” Yɛ Zezi seli i kɛ: “Nian m bua mma’m be lika. [...] Nian m bua’m be lika. [...] Nian m bua’m be lika.” (Zan 21:15-17) Nanwlɛ, junman dan kpa yɛ Zezi fa mannin Piɛli lɛ ɔ!

⁵ Kɛ e nian Zezi i ndɛ’n i kpa’n, e wun kɛ ɔ fa asɔnunfuɛ’m be kwlaa, i yasua o, i bla o, i bakanngan o, sunnzun bua mma mun. Yɛ bua ba sɔ mun’n, ɔ fata kɛ be kle be Biblu’n nun like naan be nian be lika kpa. Asa ekun’n, kɛ mɔ Zezi seli i sɔnnzɔnfuɛ’m be kwlaa kɛ be kle sran’m be like maan be kaci i sɔnnzɔnfuɛ’n ti’n, ɔ fata kɛ sran kwlaa ng’ɔ kaci kɛ i bua ba uflɛuflɛ sa’n, be kle i junman sɔ’n i dilɛ.—Matie 28:19, 20.

6. ?Ninnge’m be yolɛ wafa benin yɛ be yoli i ‘Ɲanmiɛn i asɔnun’n’ m’ɔ takali uflɛuflɛ’n nun ɔn?

⁶ Kɛ ‘Ɲanmiɛn i asɔnun’n’ takali’n, i nunfuɛ’m be yiali titi be suannin like yɛ be wlali be wiengu fanngan. Biblu’n waan: ‘Be fa be su sie be mɔ Zezi sunmannin be’n be ndɛ’n su kpa, be tran aniaan tranlɛ, be di like likawlɛ, be nin Ɲanmiɛn be koko yalɛ tititi.’ (Sa Nga Be Yoli’n 2:42, 46, 47) Like kun ekun mɔ Biblu’n waan be yoli’n yɛle kɛ, be mannin be nun yasua wie’m be junman kɛ be di. Yasua sɔ mɔ be kpali be’n, b’a nianman suklu nga be dili’n, annzɛ kusu be bɔbɔ be like mɔ be si i yo’n naan b’a kpa be. Sanngɛ, be mɔ ‘Ɲanmiɛn wawɛ’n sie be, mɔ be si ngwlɛlɛ kpa’n,’ yɛ be kpali be ɔ. Sran sɔ’m be nun kun yɛle Etiɛni. Biblu’n waan ɔ ‘lafi Zezi su kpa naan Ɲanmiɛn wawɛ’n sie i.’ Asɔnun’n m’ɔ o lɛ’n ti’n, ‘Ɲanmiɛn ndɛ’n truli, yɛ Zezi i sɔnnzɔnfuɛ’m be trɛli dan kpa Zerizalɛmu lɔ.’—Sa Nga Be Yoli’n 6:1-7.

Ɲanmiɛn nin be dili junman

7, 8. (a) ?Klistfuɛ klikli’m be blɛ su’n, junman benin yɛ akoto mun nin Zerizalɛmu lɔ kpɛnngbɛn’m be dili ɔ? (b) ?Kɛ asɔnunfuɛ’m be sɔli ajalɛ mɔ akoto mun nin Zerizalɛmu lɔ kpɛnngbɛn’m be fali’n nun klanman’n, i bo’n guali sɛ?

⁷ Kɛ nga e fa wunnin i lɛ’n, Klistfuɛ klikli’m be blɛ su’n, akoto mun yɛ be sieli asɔnun’n niɔn. Sanngɛ nán be ngunmin yɛ be dili i sɔ junman’n niɔn. Cɛn kun’n, Pɔlu nin i wiengu junman difuɛ’m be sali be sin Antiɔsu m’ɔ o Siri mɛn’n nun lɔ’n su. Sa Nga Be Yoli’n 14:27 waan: ‘Kɛ be juli lɔ’n, be yiali asɔnunfuɛ mun, be kannin sa nga Ɲanmiɛn yo mannin be’n i kwlaa kleli be.’ Blɛ sɔ’n nun mɔ be o lɔ’n, akplowa kun toli asɔnunfuɛ’m be afiɛn. Yɛle kɛ, wie’m be waan be mɔ be timan Zuifu’n be wla klɛn. Yɛ wie’m be waan nán be ti. Kɛ ɔ ko yo naan akplowa’n i nun w’a kpɛ’n ti’n, be sunmannin Pɔlu nin Barnabasi kɛ be ɔ Zerizalɛmu. Be waan be wɔ be ko kan ndɛ sɔ’n be mɔ ‘Zezi sunmannin be’n be nin kpɛnngbɛn mun be ja su.’ Afin be yɛ be dun be ɲrun mmua ɔ.—Sa Nga Be Yoli’n 15:1-3.

⁸ Kɛ ‘be mɔ Zezi sunmannin be’n be nin kpɛnngbɛn mun be yiali kɛ bé dí ndɛ sɔ’n,’ Zezi i niaan bian Zaki m’ɔ timan akoto sanngɛ ɔ ti asɔnun kpɛnngbɛn’n, yɛ ɔ siesieli aɲia’n niɔn. (Sa Nga Be Yoli’n 15:6) Kɛ be dili ndɛ’n lele mɔ Ɲanmiɛn wawɛ’n kusu tinngɛ be’n ti’n, be nuan tɔli ajalɛ kun su. Be klɛli i sɔ ajalɛ liɛ’n ko mannin asɔnun mun. (Sa Nga Be Yoli’n 15:22-32) Asɔnun’m be sɔli nun klanman. ?Kɛ be yoli sɔ’n, i bo’n guali sɛ? Aniaan’m be kwlaa, i yasua o, i bla o, be wla guali ase. Biblu’n waan: ‘Asɔnunfuɛ’m be lafi Ɲanmiɛn su kpa, yɛ sran’m be uka su tititi.’—Sa Nga Be Yoli’n 16:5.

9. ?Junman benin yɛ Biblu’n kle kɛ ɔ fata kɛ be mɔ be sie be asɔnun nun’n, be di ɔ?

⁹ ?Wafa sɛ yɛ blɛ sɔ nun’n, asɔnun nga be o likalika’m be nun’n, be siesieli be ninnge yolɛ mun ɔn? Amun e fa lika mɔ be flɛ i Krɛti mɔ nzue bo sin yiɛ i’n, i lɔ asɔnun’m be su ndɛ e nian. Klɔ sɔ’n su sran kpanngban be ɲin ti kekle. Sanngɛ be nun wie’m be kacili be nzuɛn’n, kpɔkun be kacili Klistfuɛ. (Tit 1:10-12; 2:2, 3) Klistfuɛ sɔ’m be trannin Krɛti i klɔklɔ’m be su, yɛ be ɲrun dunfuɛ’m be kusu be o lele Zerizalɛmu. Sanngɛ be afiɛn m’ɔ ti nun sɔ’n w’a yoman ndɛ. Afin, be sieli “asɔnun kpɛnngbɛn” klɔklɔ’m be su. Be niannin Biblu’n nun yɛ be sieli kpɛnngbɛn sɔ mun ɔn. Kpɛnngbɛn sɔ’m be ‘ndɛ nanwlɛ mɔ be kle’n ti’n, be kwla tu sran’m be fɔ, yɛ be kle be nga be kpalo be ndɛ’n kɛ b’a fɔn.’ (Tit 1:5-9; 1 Timote 3:1-7) Asa ekun’n, be sieli yasua wie mun asɔnunfuɛ’m be lika nianfuɛ. Be kusu’n, be niannin Biblu’n nun yɛ be sieli be ɔ.—1 Timote 3:8-10, 12, 13.

10. ?Kɛ nga Matie 18:15-17 fa kan’n sa’n, wafa sɛ yɛ ɔ fata kɛ be siesie ndɛ mun ɔn?

¹⁰ Zezi kleli kɛ i sɔ yɛ bé síe asɔnun’n niɔn. Nán e wla fi ndɛ ng’ɔ kannin m’ɔ o Matie 18:15-17 nun’n su. Ɔ kleli kɛ ndɛ kwla tɔ Ɲanmiɛn i sufuɛ nɲɔn be afiɛn. Sɛ i sɔ sa ju’n, ɔ fata kɛ sran mɔ be yoli i sa’n, ɔ flɛ i niaan’n ‘aamiɛn kan kle i.’ Sɛ ɔ yo sɔ naan i niaan’n waan ɔ timan’n, ɔ fata kɛ ɔ fa sran kun annzɛ nɲɔn mɔ be si ndɛ’n nun’n, mɔ be kwla uka be’n ukɛ i su. ?Yɛ sɛ ɔ yo i kwlaa sɔ’n naan i niaan’n waan ɔ timan’n nin? I lɛ nun’n, Zezi seli kɛ: ‘Sɛ ɔ faman be ndɛ’n su’n, kɛn i asɔnunfuɛ’m be ɲrun, sɛ ɔ faman’n, bu i kɛ sran m’ɔ nunman amun nun sa, bu i kɛ gua bo sika defuɛ sa.’ Asɔnunfuɛ nga Zezi waan sran’n ko kan ndɛ’n be ɲrun lɛ’n, yɛle Zuifu mun. Afin i nun mɔ Zezi kán sɔ’n, nn Zuifu mun yɛ be o ‘Ɲanmiɛn i asɔnun’n’ nun ɔn.a Sanngɛ kɛ ɔ́ kɔ́ i ɲrun’n, Klistfuɛ mun yɛ be wa kacili asɔnunfuɛ mun ɔn. Ɔ maan, kɛ Zezi se kɛ be kan ndɛ’n asɔnunfuɛ’m be ɲrun’n, be ndɛ yɛ ɔ kan ɔn. Zezi i ndɛ sɔ’n kle ekun kɛ sran wie’m bé síe asɔnun’n naan i nunfuɛ’m b’a fa atin kpa su naan be wla w’a gua ase.

11. ?Wan mun yɛ be siesie asɔnun’n nun ndɛ mun ɔn?

¹¹ Asɔnun kpɛnngbɛn mun yɛ ɔ fata kɛ be siesie asɔnun’n nun sa mun ɔn. I sɔ yɛ Tit 1:9 waan sran m’ɔ ti asɔnun kpɛnngbɛn’n, ɔ yo ɔ. Sanngɛ asɔnun kpɛnngbɛn sɔ mun’n, fɔ o be nun kɛ Titi mɔ Pɔlu sunmɛnnin i kɛ ɔ wɔ asɔnun’m be nun ko ‘siesie sa nga b’a wiemɛn i siesie’n’ sa. (Tit 1:4, 5) Andɛ’n, sran nga be waan bé síe i asɔnun kpɛnngbɛn’n, ɔ fata kɛ ɔ yo sran m’ɔ lafi Ɲanmiɛn su’n, m’ɔ su i w’a cɛ kan’n. Ɔ maan, asɔnunfuɛ’m be onga’m be kwla lafi i su.

12. ?Like benin yɛ ɔ fata kɛ asɔnun kpɛnngbɛn’m be yo i asɔnunfuɛ’m be lika ɔ?

¹² Pɔlu seli Efɛzi asɔnun kpɛnngbɛn’m be kɛ: ‘An nian amun bɔbɔ amun wun kpa, yɛ an nian bua fa nga Ɲanmiɛn wawɛ’n fa amun sieli be su’n be su kpa, yɛ an nian Ɲanmiɛn i asɔnun’n m’ɔ fɛ i bɔbɔ wa’n toli’n i lika.’ (Sa Nga Be Yoli’n 20:28) Like kunngba’n yɛ andɛ asɔnun kpɛnngbɛn’m be yo ɔ. Yɛle kɛ, be ‘nian Ɲanmiɛn i asɔnun’n i lika.’ Kɛ bé níɛn i lika sɔ’n, ɔ fataman kɛ be tin be su. Sanngɛ be yo i klolɛ su. (1 Piɛr 5:2, 3) Nanwlɛ, ɔ fata kɛ asɔnun kpɛnngbɛn’m be tu be klun be yo Ɲanmiɛn i ‘bua fa’n’ i kpa.

Maan e fa e wun mantan asɔnun’n i kpa

13. ?Sa benin yɛ ɔ kwla tɔ asɔnun’n nun ɔn? ?Yɛ ngue ti ɔ?

¹³ Fɔ o asɔnun kpɛnngbɛn nin asɔnunfuɛ’m be kwlaa be nun. Ɔ maan, ndɛ kwla tɔ be afiɛn. Klistfuɛ klikli’m be blɛ su bɔbɔ mɔ akoto wie’m be te o lɛ’n, ndɛnngan tɔli be afiɛn. (Filipfuɛ Mun 4:2, 3) Asɔnun sunianfuɛ kun annzɛ sran kun kwla kan ndɛ ya wie, annzɛ kusu ɔ kwla kan ndɛ wie m’ɔ timan nanwlɛ ɔ. Wie liɛ kusu’n, e kwla wun kɛ sa tɛ wie o lɛ naan asɔnun kpɛnngbɛn’m be si sɔ. Sanngɛ be nianman nun be siesieman. Ɔ kwla yo sɔ. Sanngɛ atrɛkpa’n, asɔnun kpɛnngbɛn’m b’a dun mmua b’a di ndɛ sɔ’n. Annzɛ kusu be su di naan e bɔbɔ yɛ e siman nun ɔn. I kwlaa yoli o, maan e wla kpɛn Korɛnti lɔ asɔnun’n su. Kɛ sran wie yoli sa tɛ asɔnun sɔ’n nun’n, kannzɛ i li ɔ cɛli sɛ’n, sanngɛ Zoova w’a yacimɛn i lɛ. Kɛ i blɛ liɛ’n juli’n, be tuli sa tɛ yofuɛ’n i fɔ kekle kpa. (1 Korɛentfuɛ Mun 5:1, 5, 9-11) Maan e usa e wun kosan yɛ’n. ‘?Sɛ i blɛ sɔ’n nun’n n o Korɛnti lɔ wie’n, nn ngue yɛ ń yó ɔ?’

14, 15. ?Ngue ti yɛ sran wie’m b’a suman Zezi su kun ɔn? ?Yɛ afɔtuɛ benin yɛ i sɔ’n man e ɔ?

¹⁴ Amun e nian sa kun ekun m’ɔ kwla tɔ asɔnun’n nun’n. Yɛle kɛ wie liɛ’n, aniaan kun wunman like wie mɔ Biblu’n kle’n i wlɛ naan w’a nanti su. Ɔ kunndɛ like sɔ’n i bo tulɛ’n Biblu’n nin Biblu’n i akua’m be nun. Wie bɔbɔ’n, Klistfuɛ kun mɔ i ɲin w’a ti’n, annzɛ asɔnun kpɛnngbɛn kun ukɛ i. Sanngɛ ngbɛn ɔn, ɔ wunman ndɛ’n i wlɛ. ?I lɛ nun’n, ngue yɛ ɔ kwla yo ɔ? Sa kɛ ngalɛ’n sa juli Zezi blɛ su. I afuɛ kun m’ɔ́ sín’n, yɛ be kunnin i ɔ. Yɛle kɛ cɛn kun’n, ɔ seli kɛ ɔ ti ‘kpaun m’ɔ man nguan’n’ naan sran nga w’a ‘dimɛn i m’ɔ kacili sran’n i nnɛn’n, yɛ w’a nɔnmɛn i mmoja’n,’ ɔ su ɲanman nguan. I sɔ ndɛ m’ɔ kannin’n, w’a yomɛn i sɔnnzɔnfuɛ wie’m be fɛ mlɔnmlɔn. Yɛ kɛ ɔ yo naan be se i kɛ ɔ yiyi ndɛ sɔ’n nun kle be’n, annzɛ kusu be lafi su kɛ sɛ i blɛ ju’n Zoova wá tíke be ɲin’n, i sɔnnzɔnfuɛ’m be nun kpanngban be ‘tili be wun b’a sumɛn i su kun.’ (Zan 6:35, 41-66) ?Sɛ i blɛ sɔ’n nun e o lɛ’n, nn ngue yɛ e kusu é yó ɔ?

¹⁵ E blɛ liɛ’n nun’n, sran wie’m be nin asɔnun’n bu naan be ngunmin bé sú Ɲanmiɛn. Like nga ti yɛ be yo sɔ’n yɛle kɛ wie liɛ’n, be waan be loli be ngasi, annzɛ be yoli sa tɛ asɔnun’n nun naan kpɛnngbɛn’m b’a siesieman. Annzɛ kusu like wie mɔ be kleli’n, ɔ timan be liɛ’n su. ?Be nga be yo sɔ’n i kpa lika’n o nin? E Klistfuɛ mun e tinuntinun e kwla fa e wun mantan Ɲanmiɛn. Sanngɛ e kwlá seman kɛ Ɲanmiɛn i sa’n nunman asɔnun’n su kɛ akoto’m be blɛ su’n sa naan é cúɛn e wun. Klistfuɛ klikli’m be blɛ su’n, Zoova i sa trannin asɔnun’m be su. Yɛle kɛ, ɔ yoli maan be siesieli asɔnun kpɛnngbɛn nin asɔnunfuɛ’m be lika nianfuɛ mun asɔnun’m be nun. Like kunngba’n yɛ Ɲanmiɛn yo i andɛ ɔ.

16. ?Sɛ ɔ yo sran kun kɛ ɔ nin asɔnun’n bu’n, ngue yɛ ɔ fata kɛ ɔ bu i angunndan ɔn?

¹⁶ Sɛ Klistfuɛ kun nin asɔnun’n bu naan ɔ bu i kɛ ɔ nin Ɲanmiɛn be afiɛn mántan’n, ɔ su lɛkɛ i wun. Afin asɔnun’n ti Ɲanmiɛn liɛ. E asɔnun liɛ’n nin o, nga be o mɛn wunmuan’n nun’n nin o, be kwlaa be ti i liɛ. I yo, sran kun i ngunmin kwla su Ɲanmiɛn, annzɛ ɔ nin sran akpasua kan wie be kwla yia be su Ɲanmiɛn. ?Sanngɛ kɛ be yia sɔ’n, wan yɛ ɔ́ síe be ɔ? Afin, asɔnun kpɛnngbɛn annzɛ asɔnunfuɛ’m be lika nianfuɛ fi nunman be nun. Pɔlu klɛli fluwa ko mannin Kolɔsu asɔnun’n. Fluwa kunngba’n, ɔ seli kɛ be kanngan nun kle Laodisefuɛ mun wie. Fluwa sɔ nun’n, ɔ seli kɛ: ‘Ɔ maan Klist ti an jran kekle kɛ sua mɔ be wlɛ i bo ase kpa’n sa.’ I sɔ’n kle weiin be nga be nin asɔnun’n sanman nun’n, b’a kwlá timan fluwa sɔ’n i nun ndɛ’n naan w’a yo be ye.—Kolɔsfuɛ Mun 2:6, 7; 4:16.

Sɛ nanwlɛ ti sua’n, nn asɔnun’n ti i kuatrɛn nin i kofiaja

17. ?Asɔnun’n i su like benin yɛ 1 Timote 3:15 kle ɔ?

¹⁷ Fluwa klikli nga Pɔlu klɛ ko mannin Timote’n, ɔ kannin ninnge ng’ɔ fata kɛ be wun i asɔnun kpɛnngbɛn nin asɔnunfuɛ’m be lika nianfuɛ’m be lika’n i ndɛ. Kɛ ɔ wieli ninnge sɔ’m be ndɛ kan cɛ’n, ɔ kannin ‘Ɲanmiɛn m’ɔ lafiman’n i asɔnun’n’ i ndɛ kɛ ‘sɛ nanwlɛ ti sua’n, nn asɔnun’n ti i kuatrɛn nin i kofiaja.’ (1 Timote 3:15) Klistfuɛ klikli’m be blɛ su’n, Klistfuɛ nga Ɲanmiɛn fɛli i wawɛ’n mannin be mɔ be yɛ be ti asɔnun’n, be kwlaa be kleli kɛ be ti kuatrɛn sakpa. Afin asɔnun’n nun yɛ Klistfuɛ’m be kwlaa be ko tie ndɛ ‘nanwlɛ’n’ niɔn. Lɔ ekun yɛ be suan ndɛ nanwlɛ’n i bo. Yɛ ndɛ nanwlɛ sɔ’n ti yɛ be jran kekle ɔ.

18. ?Ngue ti yɛ asɔnun aɲia’m be ti cinnjin man e ɔ?

¹⁸ Andɛ kusu’n, Ɲanmiɛn i awlo’n mɔ yɛle i asɔnun’n m’ɔ o asiɛ wunmuan’n su’n, sɛ ‘nanwlɛ ti sua’n, nn asɔnun’n ti i kuatrɛn nin i kofiaja.’ I sɔ’n ti’n, e lika liɛ’n nun lɔ aɲia nga asɔnun’n yo’n, maan e wɔ be bo titi. Kpɔkun, sɛ be fa ijɔlɛ wla nzrafuɛ’m be nuan’n, maan e sɔ su. I liɛ’n, é jrán kekle, e nin Ɲanmiɛn e afiɛn’n mántan kpa yɛ é kwlá yó i klun sa’n. Kɛ Pɔlu klɛli Korɛnti lɔ asɔnun’n i fluwa’n, ɔ fali be ɲin sieli i ndɛ nga be kan be aɲia’m be bo’n be su. Ɔ seli kɛ like ndɛ nga be kɛn i aɲia’m be bo’n, be kɛn i weinwein naan be mɔ be ti’n ‘be yo sran.’ (1 Korɛentfuɛ Mun 14:12, 17-19) Andɛ kusu’n, sɛ e wun i wlɛ kɛ e asɔnun’n ti Ɲanmiɛn Zoova liɛ naan e kɔ i bo’n, é kwlá yó sran.

19. ?Ngue ti yɛ an fa amun wun mantan asɔnun’n niɔn?

¹⁹ Sɛ e waan é yó Klistfuɛ mɔ w’a yo sran’n, ɔ fata kɛ e ka asɔnun’n nun titi. Afin, asɔnun’n nun’n, be kleman like ng’ɔ ti ato’n. Kpɔkun asɔnunfuɛ mun yɛ Ɲanmiɛn fali Sielɛ Blɛ jasin fɛ’n bolɛ’n mannin be kɛ be bo i asiɛ wunmuan’n su ɔ. Nanwlɛ, ninnge nga Ɲanmiɛn sin asɔnun’n i lika yo’n, be sɔnnin.—Efɛzfuɛ Mun 3:9, 10.

[Ja ngua lɛ ndɛ’n]

?Amun wla kwla kpɛn su?

• ?Ngue ti yɛ e si kɛ Ɲanmiɛn i sa o asɔnun’n su ɔ?

• ?Kannzɛ fɔ o asɔnun kpɛnngbɛn’m be nun’n, sanngɛ ngue yɛ be yo i asɔnun’n nun ɔn?

• ?Wafa sɛ yɛ asɔnun uka amun naan amun a yo sran ɔn?

[Foto, bue 15]

Akoto nin Zerizalɛmu lɔ kpɛnngbɛn mun yɛ be dunnin Klistfuɛ’m be ɲrun mmua ɔ.

[Foto, bue 16]

Like nga be kle asɔnun kpɛnngbɛn mun nin asɔnunfuɛ’m be lika nianfuɛ mun’n ti’n, be kwla nian asɔnun’n i lika.