Kɛ kekle’n o e su mɔ e tra e awlɛn’n, e yo sran
“Be nga be jrannin kekle’n, e se kɛ be liɛ su ti ye.”—ZAK 5:11.
1, 2. ?Ngue yɛ ɔ kle kɛ Zoova w’a yiman sran kɛ ɔ wun ɲrɛnnɛn ɔn?
SRAN ng’ɔ kpɛn su’n, ɔ kunndɛman kɛ ɔ́ wún ɲrɛnnɛn. Zoova bɔbɔ m’ɔ yili e’n, ɔ kunndɛman kɛ e wun ɲrɛnnɛn. Kɛ e suan Biblu’n nun like’n, yɛ e wun sɔ liɛ’n i wlɛ ɔ. Kɛ Ɲanmiɛn yí yasua nin bla klikli’n, wafa ng’ɔ yoli be’n, ɔ kle weiin kɛ Ɲanmiɛn kunndɛman kɛ e wun ɲrɛnnɛn. I klikli nun’n, Ɲanmiɛn boli yasua’n. Biblu’n waan: ‘Kpɛkun Anannganman Ɲanmiɛn fali fa naan w’a fa yi sran kun, yɛ ɔ fitali sran’n i bue’n nun yɛ sran’n deli wunmiɛn ɔn, yɛ ɔ ɲannin nguan ɔn.’ (Bo Bolɛ 2:7) Ɔ maan, kɛ Ɲanmiɛn boli Adam’n, lɛ kaan sa nunmɛn i nun. Kɛ m’ɔ ti sɔ’n ti’n, ɔ su tɔman tukpaciɛ yɛ ɔ su wuman.
2 ?Yɛ Adam i tranwlɛ’n nin? Biblu’n waan: ‘Anannganman Ɲanmiɛn dili fie Edɛni wia afiliɛ lɔ lika’n nun, naan w’a fa sran m’ɔ yili’n w’a sie i lɔ. Anannganman Ɲanmiɛn yoli maan waka nga be wun be ɔ, be ko klo be’n, mɔ kusu be mma’m be yo fɛ’n, be fifili lɔ.’ (Bo Bolɛ 2:8, 9) Nanwlɛ, Adam i tranwlɛ’n yo ɲɛnmɛn. Afɛ nunman Edɛni fie nun lɔ.
3. ?Ngue like yɛ sran klikli’m be ɲɛnnin i wun atin ɔn?
3 Bo Bolɛ 2:18 se kɛ: ‘Kpɛkun Anannganman Ɲanmiɛn’n waan: “Ɔ timan kpa kɛ sran ngunmin tran. Ń wá yó i ukafuɛ kun m’ɔ nin i bé kwlá trán.”’ Zoova boli bla kun mɔ fɔ nunmɛn i nun’n mannin Adam naan b’a tran awlo tranlɛ fɛ. (Bo Bolɛ 2:21-23) Biblu’n se ekun kɛ: ‘Ɲanmiɛn boli muae mannin be. Ɔ seli be kɛ: “An trɛ, an sɔn kpa, an yi asiɛ’n, an sie i.”’ (Bo Bolɛ 1:28) Ɔ maan, Ɲanmiɛn mannin sran klikli’m be atin kɛ be yo naan asiɛ wunmuan’n kaci lika klanman kɛ Edɛni fie’n sa. Ba nga bé wú be’n kusu, bé dí aklunjuɛ. Be su siman like nga be flɛ i afɛ’n. Nanwlɛ, kɛ be se kɛ be boli sran klanman’n yɛle be liɛ’n!—Bo Bolɛ 1:31.
Wafa nga kekle m’ɔ o sran su’n boli i bo’n
4. ?Kɛ e nian wafa nga mɛn’n fa boli i bo’n, ngue yɛ e wun kɛ ɔ o sran’m be su ɔ?
4 Kɛ e wun wafa nga kekle’n o sran’m be su lele nin andɛ’n, e si kɛ sa kun ti yɛ ɔ kacili sɔ ɔ. Sa tɛ’n o sran’m be su yɛ be wun ɲrɛnnɛn dan. Kɛ ɔ fɛ i lele andɛ’n, Adam nin Ɛvu be osufuɛ’m be tɔ tukpaciɛ, be yo kpɛnngbɛn yɛ i agualiɛ su’n, be wu. Nanwlɛ, asiɛ’n faman lika klanman mɔ sran’m be kwla di su aklunjuɛ ɔ. I sɔ ngalɛ’n, Rɔmfuɛ Mun 8:22 kɛn i ndɛ. I waan: ‘Like nga Ɲanmiɛn yili be’n, be kwlaa be oto, yɛ be wun ɲrɛnnɛn kɛ bla mɔ w’a tran awuliɛ’n sa.’
5. ?Ngue ti yɛ ɲrɛnnɛn nga e wun i andɛ’n, Adam nin Ɛvu be sa o nun ɔn?
5 Ɲrɛnnɛn beblebe nga sran’m be wun i cɔcɔcɔ yɛ’n, e kwlá seman kɛ be fin Zoova. (2 Samiɛl 22:31) E kwla se kɛ ɔ fin sran’m be bɔbɔ. Afin, Biblu’n waan: ‘B’a saci mlɔnmlɔn, tete’n yɛ be bo ɔ.’ (Jue Mun 14:1) Like kwlaa ng’ɔ ti kpa’n yɛ i bo bolɛ nun’n, Ɲanmiɛn fa mannin Adam nin Ɛvu ɔ. Like kunngba ng’ɔ fata kɛ be yo’n, yɛle i ndɛ’n su nantilɛ. Sanngɛ, be bɔbɔ be klunklo like liɛ’n yɛ be yoli ɔ. Kɛ mɔ Adam nin Ɛvu be jasoli Zoova wun’n ti’n, Zoova w’a suanman be bo kun. Ɔ maan, be kacili fɔnfuɛ. Be mma’m be kusu be kacili sɔ wie.—Bo Bolɛ 3:17-19; Rɔmfuɛ Mun 5:12.
6. ?Ɲrɛnnɛn nga e wun i andɛ’n, ngue ti yɛ Satan i sa o nun ɔn?
6 Sran nga i sa o kekle nga e wun i andɛ’n i nun wie’n, yɛle anzi m’ɔ kacili mmusu’m be si Satan’n. Kɛ Ɲanmiɛn yili anzi sɔ’n, w’a miɛnmiɛnmɛn i, afin ajalɛ nga i waan ɔ́ fá, ɔ kwla fa. Sanngɛ i liɛ’n, i waan sran’m be su i. Sanngɛ nn sran kunngba ng’ɔ nin sulɛ fata’n yɛle Zoova m’ɔ yili like kwlaa’n. Satan sɔ’n, ɔ wlawlali Adam nin Ɛvu naan be kusu be jaso Ɲanmiɛn wun. Naan i liɛ’n, bé ‘yó kɛ Ɲanmiɛn bɔbɔ sa, bé sí sa kpa’n nin sa tɛ’n.’—Bo Bolɛ 3:5.
Zoova kunngba cɛ yɛ ɔ fata kɛ ɔ sie nglo nin asiɛ’n niɔn
7. ?Zoova i sin jasolɛ’n i su sa nga sran’m be wun i fiaan yɛ’n, ɔ kle sɛ?
7 Zoova sin jasolɛ’n, i su afɛ nga sran’m be wun i fiaan yɛ’n, ɔ kle kɛ Zoova kunngba cɛ yɛ ɔ fata kɛ ɔ sie nglo nin asiɛ’n niɔn. I kunngba cɛ yɛ i sielɛ’n ti kpa ɔ. Kɛ ɔ fɛ i bo bolɛ nun lele andɛ’n, sa’m be kle weiin kɛ Satan m’ɔ ‘sie mɛn nga’ yɛ maan klunwi’n w’a tru ɔ. I yɛ maan sa tɛ’n w’a tru ɔ. Ɔ maan, sran’m be klun jɔman mlɔnmlɔn. (Zan 12:31) Asa ekun’n, klɔ sran’m be siefuɛ mɔ Satan sie be’n, be siman sran’m be sie. (Zeremi 10:23) Ɔ maan, sran’m be sielɛ wafa kwlaa nga bé síesíe’n, ɔ́ tɔ́ nzue nun. Sanngɛ Zoova kunngba liɛ’n yɛ ɔ ti kpa ɔ. Laa sa nin andɛ liɛ’m be kle sɔ weiin.
8. ?Ajalɛ benin yɛ Zoova w’a fɛ i sran’m be famiɛn diwlɛ’n i wun ɔn? ?Yɛ wafa sɛ yɛ ɔ́ yó ye ɔ?
8 Kɛ mɔ sran’m be bɔbɔ yɛ be jasoli Zoova wun ti’n, ɔ yacili be lɛ naan be sie be wun be nian. Ɔ yacili be lɛ w’a cɛ kpa. Ɔ maan siɛn’n, sɛ Ɲanmiɛn nunnun sran’m be famiɛn diwlɛ liɛ’n naan ɔ tɛkɛ i liɛ’n, ɔ nin i fata. Ɲanmiɛn dun mmua seli kɛ: “Famiɛn [klɔ sran’m be famiɛn diwlɛ mun] sɔ’m be blɛ su’n, Ɲanmiɛn m’ɔ o nglo lɔ’n ɔ́ síe famiɛn diwlɛ kun [i famiɛn diwlɛ’n mɔ Zezi ti su famiɛn’n] m’ɔ su saciman le. Famiɛn diwlɛ sɔ’n ɔ́ núnnún famiɛn diwlɛ kun nga mun kpɛkun i bɔbɔ ɔ́ ká lɛ tititi.” (Daniɛl 2:44) Mmusu nin klɔ sran’m be sielɛ liɛ’n su tranman lɛ kun. Saan Ɲanmiɛn i Sielɛ liɛ’n, yɛ ɔ́ ká lɛ yɛ ɔ́ síe asiɛ’n niɔn. Klist yɛ ɔ ti Ɲanmiɛn i Sielɛ’n i su famiɛn ɔn. Be nga be nin i dí famiɛn sɔ’n, be kpɔli be ti sran’m be nun asiɛ’n su wa. Be ti sran 144.000.—Sa Nglo Yilɛ 14:1.
Wafa nga kekle m’ɔ o sran su’n ti’n, ɔ kwla yo sran’n
9, 10. ?Ngue ti yɛ ɲrɛnnɛn nga Zezi wunnin i’n, ɔ yoli i ye ɔ?
9 Be nga bé wá dí famiɛn Ɲanmiɛn i Sielɛ nun’n, ɔ ti cinnjin kpa kɛ e nian sa nga ti yɛ be kwla di i sɔ junman’n. I klikli nun’n, Klist bɔbɔ kleli kɛ ɔ kwla di famiɛn. Afuɛ ng’ɔ dili i Si wun lɔ’n, be kwlá kaman. Blɛ wunmuan sɔ mɔ Zezi o i Si wun lɔ’n, ‘nn i sa o junman’n su.’ Ɔ yo i Si klun sa. (Nyanndra Mun 8:22-31) Kɛ Zoova seli Zezi kɛ ɔ bla asiɛ’n su wa’n, ɔ kplinnin su. Kɛ ɔ bali kusu’n, ɔ kannin Zoova i Sielɛ’n i ndɛ kleli sran mun. Ɔ loli i wun mɛnnin i Si. Ɔ si kɛ Zoova yɛ ɔ le kwlalɛ’n niɔn. I sɔ nun’n, ɔ kle e kwlaa e ajalɛ klanman.—Matie 4:17; 6:9.
10 Zezi wunnin ɲrɛnnɛn kpa liɛ su. I agualiɛ su’n, be kunnin i. Kɛ ɔ́ dí i junman asiɛ’n su wa’n, ɔ sieli i nzɔliɛ kɛ sran’m be fɛ sakpa. ?I sɔ m’ɔ wunnin i nin ɲrɛnnɛn mɔ i bɔbɔ wunnin i’n, be yoli i ye? I yo. Afin Ebre Mun 5:8 waan: ‘Kannzɛ ɔ ti Ɲanmiɛn Wa’n, ɔ wunnin ɲrɛnnɛn, ɔ maan i aɲinyiɛ’n i ɲin fiteli dan.’ Sa nga Zezi wunnin be asiɛ’n su wa’n ti’n, ɔ si sa ng’ɔ o e su’n, yɛ ɔ si e aunnvuɛ. Afɛ ng’ɔ o sran’m be su’n, ɔ wunnin i wlɛ. Ɔ maan, like ng’ɔ fata kɛ ɔ yo naan afɛ’n w’a jaso sran’m be su’n, ɔ si i weiin kpa. Pɔlu kannin junman sɔ’n i ndɛ Ebre Mun be fluwa’n nun. I waan: ‘Kɛ ɔ́ yó naan w’a yo Ɲanmiɛn ɲrun jranfuɛ’m be su kpɛn’n, naan w’a si i niaan’m be aunnvuɛ’n naan w’a si Ɲanmiɛn junman’n di kpa’n, naan w’a kwla yaci sran’m be wun sa’n w’a cɛ be’n, saan ɔ́ káci i wun kɛ be sa. Afin kɛ ɔ wunnin ɲrɛnnɛn lakalɛ mɔ be lɛkɛli i’n ti’n, i kusu kwla uka be nga be laka be’n.’ Ɔ kɛn i ekun kɛ: ‘Afin Ɲanmiɛn ɲrun jranfuɛ nga e le i’n, ɔ timan sran m’ɔ siman kɛ e kwlaman like fi yo ɔ, afin like nga be fa lakali e’n, be fɛ i kwlaa’n lɛkɛli i wie, sanngɛ w’a yoman sa tɛ le. I sɔ’n ti, maan e fa e wla gua Ɲanmiɛn su e wunnge i bia’n mɔ be kɔ lɔ ɔ be ɲan ye’n i wun lɔ naan ɔ si e aunnvuɛ, naan blɛ nga e sa mian’n, ɔ yo e ye, yɛ ɔ ti e wun ɲanman nun.’—Ebre Mun 2:17, 18; 4:14-16; Matie 9:36; 11:28-30.
11. ?Wafa sɛ yɛ kekle nga be nga bé wá dí famiɛn nin Ɲanmiɛn ɲrun jranfuɛ junman be wunnin i’n, ɔ yo be ye ɔ?
11 Ndɛ nga e kɛnnin i Zezi su lɛ’n, i kunngba’n yɛ e kwla kɛn i sran 144.000 be su ɔ. Sran sɔ mun’n, be ‘kpɔli be ti sran’m be nun’ naan be nin Klist Zezi be ko di famiɛn Ɲanmiɛn i Sielɛ’n nun. (Sa Nglo Yilɛ 14:4) Be kwlaa be ti sran kɛ e sa. Be tali be asiɛ’n su wa kekle nin ɲrɛnnɛn’n nun. Ɲanmiɛn mɔ be waan bé sú i seiin naan bé sú Zezi su’n ti’n, be kunnin be nun wie mun. Sanngɛ ‘ɲannzuɛn w’a kunman be e Min’n i ndɛ kanlɛ ti. Sanngɛ Ɲanmiɛn fanngan nun’n, ɲrɛnnɛn nga be wun i jasin fɛ’n ti’n, maan ɔ sɔn be nun.’ (2 Timote 1:8) Sa nga be wunnin i asiɛ’n su wa’n ti’n, be kwla tran ɲanmiɛn su lɔ be sie sran mun. Afin, be suannin aklunye yolɛ, nin sran klolɛ nin sran ukalɛ.—Sa Nglo Yilɛ 5:10; 14:2-5; 20:6.
Be nga bé wá trán asiɛ’n su wa’n, be klun jɔ́
12, 13. ?Wafa sɛ yɛ afɛ’n yó be nga be lafi su kɛ bé trán asiɛ’n su’n, be ye ɔ?
12 Be nga be lafi su kɛ bé wá trán asiɛ’n su wa’n, be su tɔman tukpaciɛ kun. Awlaboe’n su tɔman be su, yɛ be su wuman kun. ?Sanngɛ ɲrɛnnɛn nga be wun i andɛ’n, ɔ́ yó be ye? E nun wie fi kunndɛman kɛ afɛ nin ɲrɛnnɛn tɔ i su. Sanngɛ, kɛ sa’m be tɔ e su mɔ e tra e awlɛn’n, ɔ yo maan e nzuɛn’n yo kpa ekun yɛ e klun jɔ.
13 Amun e nian ndɛ nga Ɲanmiɛn Ndɛ’n kan’n. I waan: ‘Sɛ bɔ an yo sa kpa naan i sɔ’n ti an wun ɲrɛnnɛn’n, amun liɛ su ti ye.’ Ɔ kan gua su kɛ: “Sɛ be kpɛ amun nzowa Klist dunman m’ɔ o amun su’n ti’n, amun liɛ su ti ye.” (1 Piɛr 3:14; 4:14) Biblu’n kan kɛ: ‘Kɛ bé kpɛ́ amun nzowa, mɔ bé klé amun yalɛ, mɔ bé tɔ́n amun suɛn tɛtɛ’n kwlaa n dunman nun’n, amun liɛ su ti ye, yɛle kɛ amun mo’n ɔ́ wá yó dan ɲanmiɛn su lɔ. I sɔ’n ti, maan amun klun jɔ, maan amun wun blibli amun.’ (Matie 5:11, 12) Biblu’n kɛn i ekun kɛ: ‘Sran nga sa tɔ i su m’ɔ trɛ i awlɛn’n, i liɛ su ti ye. Afin kɛ Ɲanmiɛn wun kɛ ɔ trɛ i awlɛn sa sɔ nun’n, nguan m’ɔ ti like kpa, ɔ́ fá mɛ́n i.’—Zak 1:12.
14. ?Ngue ti yɛ kɛ be kle Zoova i sufuɛ’m be ɲrɛnnɛn’n, be di aklunjuɛ ɔ?
14 E si kɛ nán kɛ sran i wun di’n yɛ i wun yo i fɛ ɔ. Sɛ e di aklunjuɛ annzɛ e wun jɔ e’n, nán ɲrɛnnɛn m’ɔ tɔ e su’n ti ɔ. Sanngɛ, Zoova klun sa yolɛ nin Zezi i ajalɛ mɔ e fa su’n ti ɔ. I wie yɛle sa kun m’ɔ juli Klistfuɛ klikli’m be blɛ su’n. Kɛ mɔ akoto’m be bo Klist Zezi i su jasin fɛ’n ti’n, be wlali be nun wie’m be bisua yɛ be fali be ɔli Zuifu’m be kpɛnngbɛn’m be ɲrun. Be boli be nin ngble naan b’a yaci be nun. ?Sanngɛ, ɔ yoli akoto mun sɛ? Biblu’n se kɛ: ‘Kɛ bé jáo jɔlɛ difuɛ’m be ɲrun lɛ’n, be klun ti jɔwa yɛle kɛ be si kɛ be ɲin mɔ be guɛli i ase Zezi dunman nun’n ɔ ti kpa, afin Ɲanmiɛn yɛ ɔ sieli i sɔ ɔ.’ (Sa Nga Be Yoli’n 5:17-41) Sɛ akoto’m be klun jɔli’n, nán bolɛ mɔ be boli be’n, ɔ nin ɲrɛnnɛn mɔ be kleli be’n ti ɔ. Sanngɛ, Zoova nin Klist be ajalɛ mɔ be fali su’n, i ti yɛ be klun jɔli ɔ.—Sa Nga Be Yoli’n 16:25; 2 Korɛntfuɛ Mun 12:10; 1 Piɛr 4:13.
15. ?Wafa sɛ yɛ ɲrɛnnɛn nga e wun i andɛ’n, ɔ kwla uka e naan y’a jran kekle ainman ɔn?
15 Sɛ be kle e ɲrɛnnɛn naan be tanndan e ɲrun naan ɔ sɔn e nun’n, é yó kpa. I sɔ’n yó maan e ɲrun lɔ sa nga bé wá tɔ́ e su’n, é kwlá jrán be ɲrun kekle. Biblu’n waan: ‘N niaan mun, sa fanunfanun ng’ɔ tɔ amun su’n, an bu i amun cenjele like, afin an si kɛ kɛ an lafi Ɲanmiɛn su, mɔ be sa amun nian’n, yɛ maan an kaci sran mɔ be tra be awlɛn ɔn.’ (Zak 1:2, 3) Ndɛ kunngba’n yɛ Rɔmfuɛ Mun 5:3-5 kan ɔn. I waan: ‘Sa ng’ɔ tɔ e su’n kusu ɔ maan e klun jɔ ekun, afin e si kɛ ɲrɛnnɛn wunlɛ’n maan e kaci sran mɔ e tra e awlɛn, yɛ e awlɛn tralɛ sɔ’n nun e yo yakpa, yɛ e yakpa sɔ’n ti yɛ e fa e wla’n gua Ɲanmiɛn su ɔ. Yɛ e wla mɔ e fa gua Ɲanmiɛn su’n ti e ɲin su guaman ase.’ Ɔ maan, kɛ é trá e awlɛn é sú Ɲanmiɛn é kɔ́’n nn é yó yakpa kusu é kɔ́. Ɔ maan sa tɛ nga bé wá tɔ́ e su mɛn tɛ kain nga nun ekun’n, é kwlá trá e awlɛn be ɲrun.
Zoova wá yó be nga kekle’n o be su’n be ye
16. ?Ɲrɛnnɛn nga be nga bé wá dí famiɛn nin Ɲanmiɛn ɲrun jranfuɛ junman be wunnin i’n ti’n, ngue yɛ Zoova wá yó mán be ɔ?
16 Klistfuɛ mɔ e ti’n ti’n, wie liɛ’n be fɛn e bo ninnge mun. Be kle e ɲrɛnnɛn. I sɔ’n ti’n, e fɛ kpa. Sanngɛ, kɛ e si kɛ Zoova wá yó e ye’n, ɔ jɔ e klun kpa liɛ su. I wie yɛle Klistfuɛ nga bé kɔ́ ɲanmiɛn su’n be liɛ. Pɔlu seli be kɛ: ‘Kɛ sran’m bé dé amun ninnge mun amun sa nun’n, amun nin be a kpliman, sanngɛ amun klun jɔli su, afin an si kɛ an le ninnge wie mɔ be ti kpa tra nga lɛ’n, mɔ bé ká lɛ tititi.’ I sɔ like’n yɛle kɛ, bé wá dí famiɛn Ɲanmiɛn i Sielɛ’n nun. (Ebre Mun 10:34) Kɛ Zoova nin Klist be dunman nun bé wá yó sran’m be ye asiɛ m’ɔ́ wá káci mɛn klanman’n su’n, an bu aklunjuɛ nga bé wá dí’n, i akunndan. I sɔ’n ti’n, e si kɛ ndɛ nga akoto Pɔlu kan kleli Klistfuɛ kpa mun yɛ’n, ɔ ti nanwlɛ. Ɔ seli be kɛ: ‘Kɛ m bu aɲrunɲan like nga Ɲanmiɛn wá yí i nglo kle e’n i akunndan’n, m buman ɲrɛnnɛn nga e wun i ndɛ’n i like fi.’—Rɔmfuɛ Mun 8:18.
17. ?Ngue like yɛ Zoova waan ɔ́ yó mán be nga be su i guɛ i ti nin i bo mun ɔn?
17 Be nga bé wá trán asiɛ’n su wa’n, i kunngba’n yɛ Zoova wá yó mán be ɔ. Yɛle kɛ sɛ Zoova sulɛ’n ti be fɛn be bo ninnge mun, annzɛ be yaci be bo ninnge mun’n, Zoova wá fá mán be lele kpɛ blu. Zoova wá yó maan fɔ su tranman be nun kun. Yɛ ɔ́ mán be anannganman nguan asiɛ’n su wa. Mɛn uflɛ sɔ nun’n, Zoova ‘núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun.’ (Sa Nglo Yilɛ 21:4) Nanwlɛ, i sɔ liɛ’n be flɛmɛn i like klanman! Sɛ Zoova dunman nun e yaci e bo ninnge wie mun annzɛ be fi e sa’n, ɔ timan like fi. Afin, ɔ leman like kun mɔ i kpa trá mɛn klanman nga Zoova waan ɔ́ fá mán e’n niɔn. Mɛn sɔ’n, Zoova waan i sufuɛ nga be tra be awlɛn be su i’n, be yɛ ɔ́ fá mán be ɔ.
18. ?Nda benin yɛ Zoova ta e i Ndɛ’n nun m’ɔ fɔnvɔ e ɔ?
18 Ɲrɛnnɛn kwlaa ng’ɔ o e su’n ti’n, ɔ fata kɛ e jran kekle. Fɛ nga é wá dí i mɛn klanman nun lɔ’n ti’n, e wla fí afɛ ng’ɔ tɔli e su’n. Ezai 65:17, 18 se e kɛ: ‘Be su boman laa sa’m be su be diman jɔlɛ kun. Be su buman be akunndan kun. Maan amun klun jɔ, yɛ maan amun wun blibli amun cɛn’n kwlakwla like nga ń wá yí be’n be ti.’ I sɔ kwlaa ngalɛ’n ti’n, sɛ Zaki m’ɔ ti Zezi i niaan’n kannin ndɛ ng’ɔ o yɛ’n, i ndɛ yo fɛ. Ɔ seli kɛ: “Be nga be jrannin kekle’n, e se kɛ be liɛ su ti ye.” (Zak 5:11) Nanwlɛ, sɛ e lafi Ɲanmiɛn su naan e tra e awlɛn sa kekle’n i ɲrun’n, é ɲán su andɛ yɛ é ɲán su ainman.
?Wafa sɛ yɛ amún tɛ́ kosan’m be su ɔ?
• ?Ngue ti yɛ sran’m be wun ɲrɛnnɛn ɔn?
• ?Wafa sɛ yɛ ɲrɛnnɛn nga be nga bé wá dí famiɛn’n nin be nga bá wá trán asiɛ’n su wa’n be wun i’n, ɔ kwla yo be ye ɔ?
• ?Kannzɛ bɔbɔ e wun ɲrɛnnɛn’n, sanngɛ ngue ti yɛ dɔ nga su e klun kwla jɔ ɔ?
[Foto, bue 18]
Adam nin Ɛvu be ɲannin be ɲrun lɔ fɛ dilɛ’n i wun atin.
[Foto, bue 20]
Ɲrɛnnɛn mɔ Zezi wunnin i ti’n, ɔ kwla di famiɛn nin Ɲanmiɛn ɲrun jranfuɛ’m be su Kpɛn junman’n i kpa.
[Foto, bue 22]
Akoto’m be ‘ɲin mɔ be guɛli i ase’ be Ɲanmiɛn sulafilɛ’n ti’n, be klun jɔli.