Fluwa’n nun kannganfuɛ’m be kosan mun

?Ngue ti yɛ Zezi seli kɛ sran kpa’n ‘si ngwlɛlɛ’ ɔ?

Zezi usali kɛ: ‘?Sran kpa nanwlɛfuɛ m’ɔ si ngwlɛlɛ’n mɔ i min’n fɛ sie i sran’m be su kɛ ɔ man be aliɛ blɛ ng’ɔ ti i nuan su’n i su’n, yɛle wan?’ (Matie 24:45) “Sran” sɔ’n, ɔ ti Klistfuɛ nga Ɲanmiɛn kpali be sieli be ngunmin’n, be nzɔliɛ. ?Ngue ti yɛ Zezi waan ɔ si ngwlɛlɛ ɔ?a

Sɛ e fa e ɲin sie Zezi i like klelɛ’n su’n, é wún like nga ti yɛ ɔ seli kɛ sran kpa’n “si ngwlɛlɛ’n” i bo kpa. I wie yɛle talua blu’m be wun ɲanndra mɔ kɛ ɔ wieli ‘sran kpa nanwlɛfuɛ m’ɔ si ngwlɛlɛ’n’ i ndɛ kan’n, ɔ buli’n. Ɔ seli kɛ talua blu sɔ’m be buabuali be wun kɛ bé kó kpá yasua kun m’ɔ su fa atɔnvlɛ’n i atin. Be nun nnun be fali be kannin’n, sanngɛ b’a fɛmɛn i nzue wie b’a traman nun. Ɔ maan kɛ yasua’n bali’n, b’a kwlá wluman kan be fa atɔnvlɛ lɔ’n. Sanngɛ be onga’m be liɛ’n, be yoli ngwlɛlɛfuɛ. Afin be fali be kannin’n, yɛ be fɛli i nzue’n wie trali nun. Kpɛkun, b’a lafiman. Ɔ maan, kɛ atɔnvlɛ’n bali’n, be nin i wluli kan be fa atɔnvlɛ lɔ’n.—Matie 25:10-12.

Talua blu sɔ’m be ti Klistfuɛ nga Ɲanmiɛn fɛli i wawɛ’n mannin be’n, be nzɔliɛ. Sran m’ɔ su fa atɔnvlɛ’n kusu yɛle Zezi Klist. Ka naan afuɛ nga be flɛ i 1914 w’a ju’n, Klistfuɛ nga Ɲanmiɛn fɛli i wawɛ’n mannin be’n, be ɲin trannin Zezi Klist sin kpa. Kɛ afuɛ nga be flɛ i 1914 juli mɔ Ɲanmiɛn sieli Zezi i famiɛn’n, be nun sunman be buli i kɛ bé wá ká lɛ bé kɔ́ ɲanmiɛn su naan be nin Zezi bé kó dí famiɛn’n. B’a wunmɛn i wlɛ kɛ junman dan o lɛ naan ɔ fata kɛ be di. Kɛ be wa wunnin i wlɛ’n, be nga be si ngwlɛlɛ mɔ be wun sa sin’n, be ɲannin wunmiɛn. Ɔ maan, be tɔli junman’n i dilɛ wun aklunjuɛ su. Be kleli kɛ be ti ‘sran kpa nanwlɛfuɛ m’ɔ si ngwlɛlɛ’n.’ Sanngɛ be nga be yoli kɛ talua nnun mɔ be ti sinnglinfuɛ’m be sa’n, be fali ajalɛ uflɛ. Yɛle kɛ, b’a buabuaman be wun naan b’a kpaja titi kɛ kannin sa sran’m be ɲrun.

Amun e fa Matie 7:24 naan e nian wafa nga Zezi fa ndɛ mma “ngwlɛlɛ’n” fa kan ndɛ ekun’n. Ɔ seli kɛ: ‘I sɔ’n ti, sran kwlaa ng’ɔ tie ndɛ nga ń kɛ́n i yɛ’n naan ɔ fa su’n, ɔ ti kɛ ngwlɛlɛfuɛ m’ɔ kplɛnnin i sua yɛbuɛ su’n sa.’ Ngwlɛlɛfuɛ’n, ɔ kplɛn i sua yɛbuɛ su kɛ ɔ ko yo naan sɛ nzue tɔ́ naan ɔ tu aunmuan’n, sua’n w’a tɔman’n ti. Sinnglinfuɛ’n liɛ’n, ɔ kplɛn i sua’n aunɲan nun. Ɔ maan sua’n bubu. I sɔ’n ti’n, sran ng’ɔ ti Zezi i sɔnnzɔnfuɛ m’ɔ si ngwlɛlɛfuɛ’n, ɔ wun i wlɛ kɛ klɔ sran’m be ngwlɛlɛ liɛ’n yoman like ye. Kɛ m’ɔ si ngwlɛlɛ m’ɔ bu akunndan, m’ɔ wun sa sin’n ti’n, ɔ lafi like nga Zezi kle’n su. Ɔ maan, i su yɛ ɔ nian fɛ i ajalɛ mun ɔn. Like kunngba’n yɛ ‘sran kpa nanwlɛfuɛ m’ɔ si ngwlɛlɛ’n’ yo ɔ.

Amun e nian wafa nga Biblu’n i lika nga laa be klɛli i Ebre nun’n i lika sunman nun’n, be fali ndɛ mma “ngwlɛlɛ’n” kannin ndɛ wie mun. Kɛ ɔ ko yo naan Zoova i nvle nunfuɛ’m b’a ɲan aliɛ b’a di’n ti’n, Zoova bɔbɔ yoli maan Ezipti famiɛn sieli Zozɛfu Ezipti mɛn’n su. ?Ngue ti yɛ Zozɛfu yɛ be sieli i sɔ ɔ? Ezipti famiɛn’n seli Zozɛfu kɛ: ‘M’an wunman sran fi m’ɔ si ngwlɛlɛ dan kɛ wɔ sa ɔ.’ (Bo Bolɛ 41:33-39; 45:5) I kunngba’n, Biblu’n kan Abigaili i ndɛ kɛ ɔ “si ngwlɛlɛ kpa.” I liɛ’n, ɔ mannin Davidi m’ɔ ti Zoova i sran’n, ɔ nin Davidi bɔbɔ i sran’m be aliɛ. (1 Samiɛl 25:3, 11, 18) E wun kɛ like nga ti yɛ Biblu’n kan Zozɛfu nin Abigaili be ndɛ kɛ be ti ngwlɛlɛfuɛ’n, yɛle kɛ be wunnin Ɲanmiɛn klun sa’n i wlɛ. Kpɛkun, kɛ mɔ be wun sa sin’n ti’n, be yoli like ng’ɔ ti su’n.

Ɔ maan, kɛ Zezi se kɛ sran kpa’n si ngwlɛlɛ’n, yɛle kɛ be nga sran sɔ’n ti be nzɔliɛ’n, bé klé kɛ be wun sa sin naan be si akunndan. Kɛ mɔ be lafi Ɲanmiɛn Ndɛ’n m’ɔ ti nanwlɛ’n su ti’n, i nun yɛ be nian be fa be ajalɛ mun ɔn. Kpɛkun, be nian nun wie be kle like.

[Ja ngua lɛ ndɛ’n]