E ti ɲanlɛ anunman trafuɛ’n i sa nun

‘Zoova yɛ ɔ́ dé wɔ ɔ wun aya suafuɛ’m be sa nun ɔn [anunman trafuɛ’n i sa nun ɔn, NW].’—JUE MUN 91:3.

1. ?Wan yɛle “anunman trafuɛ’n?” ?Yɛ ngue ti yɛ ɔ fata kɛ e nian e wun i lika ɔ?

KƐ NGA koniɛn difuɛ kun kunndɛ nnɛn sa’n, Klistfuɛ kpa’m be kusu’n, sran kun o lɛ m’ɔ kunndɛ kɛ ɔ́ kún be ɔ. Sran sɔ’n, i ngwlɛlɛ’n cɛnnin yɛ ɔ ti gblɛfuɛ. Jue Mun 91:3 fɛ i sunnzun ‘anunman trafuɛ.’ ?Wan yɛle sran sɔ’n? Kɛ ɔ fɛ i afuɛ nga be flɛ i 1883, Sasafuɛ Tranwlɛ’n Zuɛn 1 nun’n, be yiyi nun kɛ sran sɔ’n yɛle mmusu’m be si Satan. Klunwifuɛ sɔ m’ɔ kunndɛ kɛ ɔ́ kún Zoova i sufuɛ mun’n, wafa nga anunman trafuɛ’n yo m’ɔ tra anunman mun’n, i wie yɛ ɔ yo ɔ.

2. ?Ngue ti yɛ Biblu’n fa Satan sunnzun anunman trafuɛ ɔ?

² Laa Zuifu’m be blɛ su’n, anunman wie’m be kpanlɛ fɛfɛ annzɛ be ndrɛ klanman ti’n, be sua be aya, be tra be. Wie liɛ kusu’n, be dilɛ annzɛ tɛ yilɛ ti yɛ be tra be ɔ. Anunman’m be kusu kɛ be o lɛ’n, be tralɛ leman ba. Afin, ɔ cɛman naan b’a tu. I sɔ’n ti’n, anunman trafuɛ’n nian be didilɛ’n su kpa naan w’a sua aya ng’ɔ ko tra be’n. Ɔ maan, kɛ Biblu’n fa Satan sunnzun anunman trafuɛ’n, i sɔ’n uka e maan e wun i ayeliɛ’n i wlɛ weiin. Yɛle kɛ, Satan sie e tinuntinun e nzuɛn’n i nzɔliɛ. Kpɛkun, ɔ sua aya ng’ɔ ko tra e kplo naan y’a yo i klun sa’n. (2 Timote 2:26) Sɛ Satan i aya’n tra e’n, e nin Ɲanmiɛn e afiɛn sáci. Kpɛkun, e liɛ wíe mlɔnmlɔn. Kɛ ɔ ko yo naan y’a yoman sɔ’n ti’n, ɔ fata kɛ e si ‘anunman trafuɛ’ sɔ’n i aya fanunfanun mun naan e sasa e wun.

3, 4. ?Wafa sɛ yɛ Satan yo kɛ asɔmɔli sa ɔ? ?Yɛ wafa sɛ yɛ ɔ yo kɛ ɔnda sa ɔ?

³ Jue tofuɛ’n fa Satan i ayeliɛ’n sunnzun asɔmɔli’n, ɔ nin ɔnda’n, be ninnge yolɛ’n wie. (Jue Mun 91:13) Kɛ asɔmɔli’n o lɛ’n, wie liɛ’n, ɔ su nnɛn’n su trele ko trɛ i. I sɔ yɛ wie liɛ’n, Satan yo ɔ. Yɛle kɛ, ɔ fa yalɛ klelɛ nin mmla nga awa kpɛ be’n, ɔ wla Zoova i nvle nunfuɛ’m be sin alɛ. (Jue Mun 94:20) Kɛ Satan yo sɔ’n, Zoova i nvle nunfuɛ wie’m be kwla yaci Zoova sulɛ. Sanngɛ blɛ sunman nun’n, i sɔ’n yo maan Zoova i nvle nunfuɛ’m be afiɛn mantan kpa tra laa’n. ?Yɛ wafa sɛ yɛ Satan yo kɛ ɔnda’n sa ɔ?

⁴ Kɛ ɔnda o lɛ’n, i gblɛ liɛ’n be kanman. Ɔ fia yɛ ɔ ka ɔ. Satan kusu’n, ngwlɛlɛ dan m’ɔ si i’n ti’n, ɔ kpɛ sran’m be gblɛ. I sɔ yolɛ nun’n, ɔ sacili Ɲanmiɛn i nvle nunfuɛ wie’m be ti nun. Ɔ maan, be yacili Zoova lɛ be yoli i klun sa liɛ’n. I sɔ’n, i bo guali tɛ kpa mannin be. Ɔ yoli kusu mɔ e si Satan i nzuɛn’n niɔn. (2 Korɛntfuɛ Mun 2:11) I sɔ’n ti’n, amun e fa e ɲin sie i ninnge yolɛ sɔ’m be nun nnan be su e nian.

Srongble’n

5. ?Ngue ti yɛ sran kpanngban be tɔ “srongble’n” m’ɔ ti kɛ aya sa’n, i nun ɔn?

⁵ Satan “anunman trafuɛ’n” si kɛ, kɛ sran kun o sa’n, ɔ kunndɛ kɛ i wiengu’m be klun jɔ i wun. Kɛ mɔ mmusu’m be si Satan si sɔ’n ti’n, ɔ kunndɛ kɛ ɔ́ fɛ́ i sɔ liɛ’n ɲán Klistfuɛ mun. I wie yɛle kɛ, ɔ lakali Ɲanmiɛn i nvle nunfuɛ wie mun. Ɔ maan, be yoli ‘srongble.’ (Nyanndra Mun 29:25) Kɛ srongble’n ti’n, Klistfuɛ’m be yo like wie m’ɔ timan Zoova klun su’n, annzɛ kusu be yoman like wie mɔ Ɲanmiɛn Ndɛ’n se kɛ be yo’n, nn “anunman trafuɛ’n” w’a ɲan be.—Ezekiɛl 33:8; Zak 4:17.

6. ?Wafa sɛ yɛ gbanflɛn annzɛ talua kun kwla tɔ “anunman trafuɛ’n” i aya nun ɔn?

⁶ Suklu lɔ’n, Klistfuɛ gbanflɛn annzɛ talua kun i wiengu’m be kwla miɛn i kɛ ɔ nɔn siklɛti. Ɔ si kɛ siklɛti nɔnlɛ’n, ɔ timan kpa naan sɛ ɔ nɔn’n, ɔ́ fɔ́n Ɲanmiɛn i mmla’n. Sanngɛ i yɛ ɔ su nɔn i yɛ. (2 Korɛntfuɛ Mun 7:1) ?Ngue ti ɔ? Atrɛkpa’n, ɔ kunndɛman kɛ i wiengu’m be yo i tokotoko naan be sri i. I lɛ nun’n, ɔ yoli srongble. Gbanflɛn nin talua mun, nán amun tran lɛ naan Satan laka amun, ɔ ɲan amun! Nán amún sé kɛ amún ɲin kpá Ɲanmiɛn i mmla’m be su bɔɔ kaan sa. Sɛ ɔ timɛn i ti’n, “anunman trafuɛ’n” trá amun yɛ amún yó i klun sa. Biblu’n nun afɔtuɛ mɔ se kɛ nán amun nin sran tɛ san nun’n, amun nanti su!—1 Korɛntfuɛ Mun 15:33.

7. ?Wafa sɛ yɛ Satan yo mɔ siɛ nin niɛn wie’m be kpɔnzɔ ɔ?

⁷ Siɛ nin niɛn nga be ti Klistfuɛ’n, be si kɛ Ɲanmiɛn Ndɛ’n waan be nian be awlofuɛ’m be lika. Ɔ maan, i sɔ’n ti be cinnjin kpa. (1 Timote 5:8) Sanngɛ, Satan kunndɛ kɛ ɔ́ fɛ́ i sɔ liɛ’n, ɔ́ ɲán be. Wienun ɔn, kɛ mɔ Klistfuɛ wie’m be junman sunianfuɛ’n mianmian be kɛ be di junman tratra su’n ti’n, be baman aɲia’m be ngba be bo. Wie liɛ kusu srongble’n ti’n, be kwlá srɛman be min’n i atin naan b’a tran nvle kun aɲia’n i bo, b’a guɛ i ti nin i bo. Like ng’ɔ kwla sasa e aya sɔ’n i lika’n, yɛle kɛ maan ‘Anannganman i su yɛ e lafi ɔ.’ (Nyanndra Mun 3:5, 6) Asa ekun’n, nán maan e wla fi su kɛ e ti Zoova i awlo nunfuɛ naan ɔ́ nían e lika. Sɛ e wun i wlɛ sɔ’n, srɛ su kunman e. ?Siɛ nin niɛn mun, amun lafi su kɛ, sɛ amun yo Zoova klun sa’n, ɔ́ nían amun nin amun awlofuɛ’m be lika? ?Annzɛ kusu srongble ti’n, mmusu’m be si Satan trá amun naan amun yo i klun sa? É srɛ́ amun kɛ amun fɛ i sɔ ndɛ’n wlɛ i srɛlɛ nun.

Aɲanbeun ninnge kunndɛlɛ m’ɔ saci sran’n

8. ?Wafa sɛ yɛ Satan fa aɲanbeun ninnge kunndɛlɛ’n sua e wun aya ɔ?

⁸ Satan fa aɲanbeun ninnge kunndɛlɛ’n sua e wun aya wie. Mɛn’n nun aata difuɛ’m be wlawla sran mun kɛ be ɲan be wun ndɛndɛ naan sɛ be di ndrunmun bɔbɔ’n, ɔ timan tɛ. Ɲanmiɛn i sufuɛ mun bɔbɔ be tɔ i sɔ aya’n nun. Ɔ ju wie’n, sran wie kwla se e kɛ: “Nian nun di junman. I liɛ’n, kɛ á ɲán ɔ wun mɔɔ á trán pɔɔ nun, á wún kɛ mɛn dilɛ yo fɛ. I li bɔɔ sɛ a klo’n, a kwla yo atin bofuɛ.” Atrɛkpa’n, be nga asɔnun’n nun be didi be niaan Klistfuɛ be wun’n, yɛ be kan ndɛ sɔ m’ɔ kɔman atin su’n niɔn. Sanngɛ maan e bu i sin e nian. ?Nán ndɛ kunngba’n yɛ bian aɲanbeunfuɛ mɔ Zezi waan ɔ ti ‘sinnglinfuɛ’n,’ ɔ kannin ɔn?—Lik 12:16-21.

9. ?Wafa sɛ yɛ Klistfuɛ wie’m be ɲin m’ɔ blo ninnge’m be su’n ti’n, Satan ɲannin be ɔ?

⁹ Satan yo maan i mɛn tɛ’n ti’n, sran’m be ɲin blo ninnge’m be su. Ninnge sɔ mɔ Klistfuɛ’n i ɲin blo be su’n ti’n, Ɲanmiɛn ndɛ’n ‘yoman kpa.’ (Mark 4:19) Biblu’n wla e fanngan kɛ sɛ e ɲan like e di naan e ɲan tannin e kwla’n, maan ɔ ju e. (1 Timote 6:8) Sanngɛ, Satan laka Klistfuɛ kpanngban. Afin, be bumɛn i kɛ ndɛ sɔ’n ti be liɛ wie. Atrɛkpa’n, be wun tulɛ’n ti yɛ be ɲin blo mɛn dilɛ wafa wie su ɔ. ?Yɛ e li? ?E ɲin blo ninnge’m be su, ɔ maan e fa Ɲanmiɛn sulɛ’n sie i siɛn? (Aze 1:2-8) Nga m’ɔ yo ɲrɛnnɛn yɛle kɛ, kɛ kekle’n ju’n, aniaan wie’m be yaci Ɲanmiɛn sulɛ aɲanbeun kunndɛlɛ’n ti. Kɛ sran kun klo aɲanbeun ninnge mun dan sɔ’n, ɔ yo “anunman trafuɛ’n” i fɛ!

Be ɲin su yiyilɛ m’ɔ saci sran’n

10. ?Ngue ti yɛ ɔ fata kɛ Klistfuɛ kwlaa bu i klun lɔ nian ɔn?

¹⁰ Like kun ekun mɔ “anunman trafuɛ’n” yo’n, yɛle kɛ ɔ sanngan sran’m be ti nun. Ɔ maan, be wunman sa ng’ɔ ti kpa’n nin ng’ɔ ti tɛ’n be ngbaciɛ’n. Kɛ e nian sran’m be ɲin su yiyilɛ’n, ɔ nin Sodɔmu nin Gomɔrufuɛ’m be ayeliɛ’n ti kun. Nzaje sa mun, ɔ nin bian nin bla nna’n, yɛ be kan be ndɛ yɛ be yi be zronali nin televiziɔn’n, be nun ɔn. Ninnge sɔ mɔ sran’m be nian be fa yiyi be ɲin su’n ti’n, be kwlá wunman ‘sa ng’ɔ ti kpa’n nin tɛ’n be ngbaciɛ.’ (Ebre Mun 5:14) Sanngɛ, maan e wla kpɛn ndɛ nga Zoova kan kleli i nuan ijɔfuɛ Ezai’n i su. I waan: ‘Be nga be flɛ sa kpa’n kɛ sa tɛ’n, mɔ be flɛ sa tɛ’n kusu kɛ sa kpa’n, be yako!’ (Ezai 5:20) I sɔ’n ti’n, maan e bu e klun lɔ nian. E nian sɛ “anunman trafuɛ’n” su fa be ɲin su yiyilɛ tɛtɛ sáci e akunndan’n nin o.—2 Korɛntfuɛ Mun 13:5.

11. ?Ajulisu flimu wie’m be su afɔtuɛ benin yɛ Sasafuɛ Tranwlɛ’n mannin ɔn?

¹¹ I afuɛ kɔe 25 nun yɛ, Sasafuɛ Tranwlɛ’n seli e kɛ e nian e wun su flimu wie’m be nianlɛ’n i lika.a Wafa nga ajulisu flimu sɔ’m bé sáci sran’n i akunndan’n ɔ wunman nun’n, be yiyili nun. Be seli kɛ: “Flimu sɔ’m be nun’n, be kle kɛ like kwlaa nga sran kun kwla yo naan sran uflɛ w’a wu i ti’n, kannzɛ like sɔ’n ti sɛ ti sɛ, ɔ kwla yo naan ɔ timan tɛ. Kɛ ɔ́ yó sɔ’n, nn miziki fɛfɛ o i bo. I wie yɛle kɛ flimu kun nun’n, talua kun wunnzɛli. Sran ng’ɔ wunnzɛli i’n, be flɛ i Viktɔlu, yɛ ɔ timɛn i wun. Ɔ kɔ toli i janvuɛ kun naan w’a se i kɛ: ‘I li maan n wunnzɛ sɛ, min ndɛ nunman nun. Viktɔlu ti min awlɛn su sran!’ Kɛ ɔ yo sɔ’n, nn wɔ mɔ a su nian flimu’n, a su klo Viktɔlu wie. Yɛ talua yo wɔ annvɔ. Ɔ maan, be ajalɛ tɛ nga be fali’n w’a yo wɔ klun su. Sran kun m’ɔ niannin flimu sɔ mun wie laa’n, ɔ seli kɛ: ‘Nanwlɛ, flimu sɔ’m be timan kpa. Sanngɛ, kɛ a tɔ be nianlɛ’n su sa’n, a kwlá yaciman. N wun kɛ wie liɛ’n, yasua nin bla’m be su yo sa tɛ. Sanngɛ n klun lɔ’n, n jran be sin.’”

12. ?Kɛ be se kɛ nán e nian flimu wie mun’n, ngue ti yɛ ɔ ti su ɔ?

¹² Kɛ ɔ fɛ i blɛ nga be klɛli ndɛ sɔ’n lele andɛ’n, flimu sɔ mɔ be saci sran’n, b’a tru dan. Lika kpanngban nun’n, kɛ ɔ fɛ i nglɛmun lele mɔ aliɛ’n fá sán m’ɔ́ fá cɛ́n’n, ninnge sɔ mun yɛ be kle be ɔ. I yasua o, i bla o, i gbaflɛn kan nin talua o, i sɔ ninnge mun yɛ be ta be nian ɔn. Nán maan e laka e wun e se kɛ, ɔ ti be ɲin su yiyilɛ ngbɛn naan ɔ yoman like fi. Afin, e su seman kɛ é flɛ́ i sɔ sran mun e awlo lɔ. ?Sɛ ɔ ti sɔ’n niɔn, ngue ti yɛ é fá be ayeliɛ’n é yíyí e ɲin su ɔ?

13, 14. ?Ndɛ benin yɛ aniaan wie’m be kannin m’ɔ kle kɛ flimu wie’m be su afɔtuɛ nga be mannin’n, ɔ yoli be ye ɔ?

¹³ Be nga be nantili afɔtuɛ nga ‘sran kpa nanwlɛfuɛ m’ɔ si ngwlɛlɛ’n,’ ɔ man be’n su’n, be ɲannin su mmlusuɛ. (Matie 24:45-47) Kɛ sran wie’m be kanngannin afɔtuɛ sɔ’m be nun’n, ye m’ɔ yoli be’n ti’n, be klɛli Sasafuɛ Tranwlɛ’n i klɛfuɛ’m be fluwa.b Bla kun seli kɛ: “N niannin ajulisu flimu sɔ mun afuɛ lele 13. N buli i kɛ, kɛ mɔ n kɔ aɲia’m be bo titi, mɔ wie liɛ’n n bo jasin fɛ’n ti’n, like fi kwlá yoman min. Sanngɛ nn ato ɔ. Flimu sɔ’m be nun’n, be kle kɛ sɛ yasua kun yo i yi’n kpokokpoko annzɛ ɔ klomɛn i kun naan bla’n ko kunndɛ bian uflɛ’n, ɔ fin yasua’n. I sɔ’n ti’n, n kusu n ko kunndɛli bian min wun bo. N fɔnnin Zoova wun.” Be tuli bla sɔ’n asɔnun’n nun. I sin’n, ɔ kacili i nzuɛn’n. Ɔ maan, be sɔli i nun asɔnun’n nun ekun. Ajulisu flimu’m be su afɔtuɛ nga Sasafuɛ Tranwlɛ’n man’n, be yoli i ye. Ɔ maan, i sɔ flimu mɔ Zoova kloman be’n, ɔ yacili be nianlɛ.—Amɔs 5:14, 15.

¹⁴ Sran kun ekun seli kɛ: “Kɛ n kanngannin fluwa’n nun’n, n sunnin. Afin n wunnin kɛ, kannzu min nin Zoova e afiɛn’n w’a ti nun. Ɔ maan, n tali Ɲanmiɛn i nda kɛ n su nianman flimu sɔ mun kun mlɔnmlɔn.” E niaan bla kun m’ɔ kanngannin fluwa sɔ’n nun’n, ɔ lali Ɲanmiɛn ase. Afin, ɔ dili i nanwlɛ kɛ flimu sɔ mun yɛ ɔ nian be ɔ. Kpɛkun, ɔ seli kɛ: “N klun titi min. Afin flimu sɔ mɔ n ta be nian ti’n, n siman sɛ n timan Zoova i janvuɛ kun o!” ?Sɛ i afuɛ 25 yɛ, flimu sɔ’m be sacili sran mun’n, andɛ é sé e liɛ sɛ? (2 Timote 3:13) I sɔ’n ti’n, maan e nian e wun su be ɲin su yiyilɛ tɛ’n i lika, kɛ ɔ ko yo naan Satan w’a ɲanman e’n ti. Ɔ kwla yo flimu nga y’a kan be ndɛ lɛ’n, annzɛ video nun ngowa kanlɛ tɛtɛ’n, annzɛ jue nin balo tɛtɛ mun.

E afiɛn ndɛnngan’m be kwla yo kɛ aya sa

15. ?Wafa sɛ yɛ mmusu’m be si Satan trali wie mun maan be yo i klun sa’n niɔn?

¹⁵ Kɛ ndɛ tɔ Klistfuɛ’m be afiɛn’n, Satan kwla sin lɛ naan be afiɛn’n saci. Kannzɛ Zoova i anuannzɛ nun e ti sɛ e ti sɛ, e kwla tɔ i sɔ aya’n nun. Satan ɲannin sran wie mun. Yɛle kɛ, ndɛ m’ɔ tɔli be nin be niaan’n be afiɛn’n ti’n, be nin be diman kun. Wafa nga Ɲanmiɛn ra e su i sulɛ nun’n, be bumɛn i like kun.—Jue Mun 133:1-3.

16. ?Wafa sɛ yɛ Satan sáci e afiɛn’n, e wunman nun ɔn?

¹⁶ Mɛn’n nun alɛ dan klikli nun’n, Satan tɔli Zoova i sufuɛ’m be su naan ɔ́ núnnún be. Sanngɛ, w’a yoman ye. (Sa Nglo Yilɛ 11:7-13) Like ng’ɔ yo i siɛn’n, yɛle kɛ, ɔ́ sáci be afiɛn’n be wunman nun. Yɛle kɛ, sɛ ndɛnngan tɔ e afiɛn naan e siesieman’n, é mán ‘anunman trafuɛ’ sɔ’n i wluwlɛ. Sɛ e yo sɔ’n, Ɲanmiɛn wawɛ’n su kwlá sieman e bɔbɔ nin asɔnun’n kun. Kɛ ɔ yo sɔ kusu’n, ɔ yo Satan fɛ dan. Afin, ɔ si kɛ sɛ e bo timan kun’n, e su kwlá boman jasin fɛ’n i kpa.—Efɛzfuɛ Mun 4:27, 30-32.

17. ?Be nga ndɛnngan tɔ be afiɛn’n, wafa sɛ yɛ be kwla siesie ɔ?

¹⁷ ?Sɛ ndɛnngan tɔ e nin e niaan kun e afiɛn’n, ngue like yɛ e kwla yo ɔ? Nanwlɛ, ɔ ti su kɛ ndɛ ngba timan kun. ?Sanngɛ, ndɛ benin yɛ ɔ lemɛn i siesiewlɛ ɔ? (Matie 5:23, 24; 18:15-17) Afɔtuɛ nga be o Biblu’n nun’n, be fin Ɲanmiɛn, yɛ fiɛn kaan sa nunman be nun. Ɔ leman ndɛ kun mɔ sɛ e nanti Biblu’n nun mmla’m be su’n, e kwla siesieman ɔn!

18. ?Ngue ti yɛ sɛ e nian Zoova liɛ’n su e yo’n, i sɔ’n úka e naan y’a siesie e afiɛn ndɛnngan mun ɔn?

¹⁸ Zoova “yaci sran wun sa cɛ i” weiin. (Jue Mun 86:5; 130:4) Kɛ e nian like nga Ɲanmiɛn yo’n su e yo’n, e kle kɛ e ti i awlɛn su ba. (Efɛzfuɛ Mun 5:1) E kwlaa e ti sa tɛ yo yofuɛ, yɛ e kunndɛ kɛ Zoova yaci e sa tɛ’n cɛ e. I sɔ’n ti’n, sɛ e yaciman sran wun sa cɛmɛn i’n, maan e nian e wun kpa. Afin, ɔ cɛman naan y’a yo kɛ junman difuɛ m’ɔ simɛn i wiengu aunnvuɛ mɔ Zezi fɛli i ndɛ buli ɲanndra’n sa. Junman difuɛ sɔ’n, i min’n yacili kalɛ dan kpa kun m’ɔ o i su’n, ɔ cɛli i. Sanngɛ i liɛ su’n, w’a yacimɛn i wiengu junman difuɛ’n i kalɛ kaan’n w’a cɛmɛn i. Kɛ junman difuɛ’n i min tili ndɛ sɔ’n, ɔ seli kɛ be wla junman difuɛ m’ɔ siman aunnvuɛ’n i bisua. Kɛ Zezi gúɛ i ɲanndra’n bo’n, ɔ seli kɛ: ‘Sɛ an yaciman amun wiengu’m be sa mɔ be yo amun’n cɛman be amun klun ufue su’n, kɛ min Si m’ɔ o ɲanmiɛn su lɔ’n ɔ́ wá yó amun sɔ ɔ.’ (Matie 18:21-35) Maan e bu ɲanndra sɔ’n, ɔ nin wafa nga kpɛ sunman Zoova yaci e sa tɛ mun cɛ e’n, be akunndan. I liɛ’n, ndɛnngan kwlaa ng’ɔ tɔ e afiɛn’n, é kwlá síesíe!—Jue Mun 19:15.

Maan e fia ‘Ɲanmiɛn mɔ like fi nunmɛn i sin’n’ i sin

19, 20. ?Blɛ tɛ nga e o nun yɛ nun’n, wafa sɛ yɛ ɔ fata kɛ e bu Zoova ‘i sin fialɛ’n’ ɔ nin “i fɔnvɔ’n” niɔn?

¹⁹ Blɛ nga e o nun yɛ’n ti tɛ kpa. Sɛ ɔ timan sasalɛ nga Zoova sasa e klolɛ su’n ti’n, nn Satan w’a nunnun e kwlaa kpan. I sɔ’n ti’n, kɛ ɔ ko yo naan y’a tɔman “anunman trafuɛ’n” sɔ’n i aya nun’n, ɔ fata kɛ e ‘fia Ɲanmiɛn mɔ like fi nunmɛn i sin’n,’ i sin. I liɛ’n, é ‘trán Ɲanmiɛn m’ɔ kwla like kwlaa yo’n i fɔnvɔ’n nun.’—Jue Mun 91:1.

²⁰ E kpa yolɛ ti yɛ Zoova fɛ i mmla nin sa wie mun sie e ɲrun ɔn. Nán e mianmianlɛ ti ɔ. Nán klɔ sran yɛ ɔ kunndɛ kɛ ɔ́ trá e kɛ nnɛn sa ɔ. Sɛ ɔ timan Zoova ti’n, nn e liɛ w’a wie. (Jue Mun 124:7, 8) I sɔ’n ti’n, maan e srɛ Zoova naan ɔ de e “anunman trafuɛ’n” sɔ’n i sa nun!—Matie 6:13.

[Ja ngua lɛ ndɛ mun]

?Amun wla kpɛn su?

• ?Ngue ti yɛ “srongble’n” ɔ timan kpa mlɔnmlɔn ɔ?

• ?Wafa sɛ yɛ mmusu’m be si Satan fa aɲanbeun ninnge’m be kunndɛlɛ’n ɲan sran mun ɔn?

• ?Wafa sɛ yɛ Satan fali be ɲin su yiyilɛ’n suali sran wie’m be wun aya, ɔ trali be ɔ?

• ?Aya benin yɛ mmusu’m be si Satan fa saci e nin e niaan mun afiɛn ɔn?

[Foto, bue 29]

Sran wie’m be tɔli “srongble’n” m’ɔ ti kɛ aya sa’n nun.

[Foto, bue 30]

?Ninnge nga Zoova kpɔ be’n, yɛ e fa yiyi e ɲin su ɔ?

[Foto, bue 31]

?Sɛ ndɛnngan tɔ e nin e niaan Klistfuɛ kun e afiɛn’n, wafa sɛ yɛ e kwla siesie ɔ?