Maan e sɔnnzɔn like Klefuɛ Dan’n
“An sie amun su ndɛ nga be kan’n be su kpa.”—LIK 8:18.
1, 2. ?Kɛ Zezi dí Ɲanmiɛn i junman’n, ngue ti yɛ ɔ fata kɛ e fa e ɲin sie i wafa nga ɔ nin sran’m be trannin’n i su ɔ?
KƐ ZEZI Klist dí i Like Klefuɛ Dan junman’n, m’ɔ́ úka sran mun naan be kaci i sɔnnzɔnfuɛ’n, ɔ seli be nga be fɛ i ndɛ’n su’n be kɛ: “An sie amun su ndɛ nga be kan’n be su kpa.” (Lik 8:16-18) Kɛ mɔ e ti Klistfuɛ’n ti’n, ɔ fata kɛ e nanti ndɛ sɔ’n su e Ɲanmiɛn junman dilɛ’n nun. Sɛ ndɛ nga be kan kle e Ɲanmiɛn nin ninnge nga i waan ɔ́ yó be’n be su’n, e fa e su sie be su kpa’n, é nían be su é nánti, kpɛkun i sɔ’n yó maan é yó Ɲanmiɛn Sielɛ jasin bofuɛ mɔ junman nga be di’n ba nvlɛ’n. Andɛ e kwlá timan Zezi i nɛn’n kun. Sanngɛ e kwla kanngan ndɛ nga ɔ kannin be’n, ɔ nin ninnge ng’ɔ yoli be’n Biblu’n nun. ?Kɛ Zezi dí Ɲanmiɛn junman’n, wafa nga ɔ nin sran mun be trannin’n, i su ndɛ benin yɛ Biblu’n kan ɔn?
2 Zezi yoli jasin fɛ’n i bofuɛ kun m’ɔ si i junman’n kpa ɔ. Ɔ sili Ɲanmiɛn Ndɛ’n kle kpa. (Lik 8:1; Zan 8:28) Sɛ e kunndɛ kɛ sran’m be kaci Zezi i sɔnnzɔnfuɛ’n, ɔ fata kɛ e bo jasin fɛ’n, kpɛkun e kle sran’m be like. Sanngɛ sran like klelɛ’n ti kekle man Klistfuɛ wie mun mɔ be sa w’a tɔ jasin fɛ’n bolɛ’n nun kpa’n. Jasin fɛ’n bolɛ’n, ɔ ti ndɛ mɔ e kan kle sran mun’n. Sanngɛ sɛ e waan é klé sran mun Zoova nin ninnge nga ɔ́ wá yó be’n be su like’n, ɔ fata kɛ e nin sran sɔ mun e afiɛn’n mantan. (Matie 28:19, 20) Sɛ e sɔnnzɔn Zezi Klist m’ɔ ti Like Klefuɛ Dan’n, m’ɔ yoli maan sran’m be kacili i sɔnnzɔnfuɛ’n, é kwlɛ́ i sɔ liɛ’n yó.—Zan 13:13.
3. ?Sɛ e sɔnnzɔn Zezi, wafa sɛ yɛ i sɔ’n kwla uka e naan y’a uka sran mun naan b’a yo i sɔnnzɔnfuɛ ɔ?
3 Sɛ e sɔnnzɔn wafa nga Zezi kleli sran’m be like’n, i sɔ’n kle kɛ e nian akoto Pɔlu i ndɛ nga su e nanti. Ɔ seli kɛ: ‘Like nga an yo man be mɔ be timan Klistfuɛ’n, an fa ngwlɛlɛ yo. Kɛ amun a ɲan amun ti’n, nán an tran lɛ ngbɛn, an yo like ng’ɔ yo sa ye’n. Maan amun ijɔlɛ wafa’n yo sran’m be fɛ, maan amun nuan nun ndɛ’n yo fɛ kɛ njin sa naan amun a tɛ sran ng’ɔ usa amun sa’n, i su klanman.’ (Kolɔsfuɛ Mun 4:5, 6) Sɛ kɛ é úka sran mun naan be yo Zezi i sɔnnzɔnfuɛ’n, e klo kɛ é sɔ́nnzɔn Zezi’n, ɔ fata kɛ e mian e ɲin. Sanngɛ sɛ e yo sɔ’n, like nga e kle’n ɔ́ kán sran’m be awlɛn’n, afin ɔ́ úka e naan like ng’ɔ mian sran’m be sa be tinuntinun’n, y’a nian su y’a ‘tɛ be su klanman.’
Zezi yoli maan sran’m be kannin be klun ndɛ
4. ?Ngue ti yɛ e kwla se kɛ Zezi yoli ndɛ tiefuɛ kpa ɔ?
4 Kɛ ɔ fin i bakan nun’n, Zezi fɛ i su sie ndɛ nga sran’m be kan’n i bo, kpɛkun ɔ wla be fanngan maan be kan be klun ndɛ. Kɛ Zezi ɲannin afuɛ 12, i si nin i nin bé kó wún i ɔ, ɔ ti Ɲanmiɛn sua’n nun lɔ like klefuɛ’m be afiɛn, ‘ɔ tie be ndɛ mɔ be kan’n yɛ ɔ usa be sa.’ (Lik 2:46) Zezi w’a ɔman Ɲanmiɛn sua’n nun lɔ kɛ ɔ́ kó fɛ́ i ngwlɛlɛ m’ɔ si i’n, ɔ́ gúa like klefuɛ’m be ɲin ase. Kannzɛ bɔɔ ɔ usali like klefuɛ’m be kosan’n, sanngɛ ndɛ nga be kan’n i tielɛ ti yɛ ɔ ɔli lɔ ɔ. Atrɛkpa’n, Zezi i su m’ɔ fa sie i ndɛ nga sran’m be kan’n i bo’n, ɔ yoli maan Ɲanmiɛn nin sran’m be kloli i sa.—Lik 2:52.
5, 6. ?Wafa sɛ yɛ e si kɛ Zezi fɛ i su sie i like suanfuɛ’m be ndɛ nga be kan’n i bo ɔ?
5 Kɛ be yoli Zezi i batɛmu m’ɔ yoli Mɛsi bɔbɔ’n, ɔ fɛli i su sieli ndɛ nga sran’m be kan’n i bo titi. Like ng’ɔ fata kɛ Zezi kle sran mun’n i ndɛ yoli i cinnjin kpa. Sanngɛ w’a seman kɛ i sɔ’n ti, be nga be ba ndɛ ng’ɔ kan’n i tielɛ’n, i ɲin kpá be su. Blɛ sunman nun’n, ɔ jran kan, yɛ ɔ usa be wafa nga be bu i ndɛ mun’n, kpɛkun ɔ tie ndɛ nga be kan’n. (Matie 16:13-15) Kɛ Marti i niaan bian Lazali wuli’n, Zezi seli Marti kɛ: ‘Sran nga i ɲin o su m’ɔ lafi n su’n, ɔ su wuman le.’ I sin’n, ɔ usɛli i kɛ: “?A lafi ndɛ sɔ’n su?” Marti tɛli i su kɛ: ‘Ɛɛn. Nannan, n si kɛ wɔ yɛ a ti Klist’n niɔn. A ti Ɲanmiɛn Wa.’ (Zan 11:26, 27) E si kɛ, kɛ Marti kán ndɛ sɔ’n, Zezi fɛli i su sieli su. Nanwlɛ, Marti i ndɛ sɔ m’ɔ kle kɛ ɔ lafi Ɲanmiɛn nin Zezi be su’n, ɔ kwla jɔli Zezi klun dan.
6 Kɛ Zezi i sɔnnzɔnfuɛ’m be nun sunman be kpɔcili i’n, ɔ kunndɛli kɛ ɔ́ tí i akoto’m be klun ndɛ. I sɔ’n ti ɔ usali be kɛ: ‘?Amun li, an kɔman wie?’ Simɔn Piɛli tɛli i su kɛ: ‘?Wan sin yɛ é kɔ́ ɔ? Ɔ ndɛ’n yɛ maan e ɲan anannganman nguan ɔn. E lafi su yɛ e si kɛ a ti Ɲanmiɛn i Sran.’ (Zan 6:66-69) Ndɛ sɔ’n yoli Zezi i fɛ kpa. Sɛ Biblu’n nun like suanfuɛ kun kɛn i sɔ ndɛ’n kle e’n, saan fɛ bɔɔ cɛ, yɛ ɔ́ yó e ɔ.
Zezi sieli i su sran’m be nuan bo aɲinyiɛ su
7. ?Ngue ti yɛ Samalifuɛ kpanngban be wa lafili Zezi su ɔ?
7 Like kun ekun nga ti yɛ Zezi kwla ukali sran mun maan be yo i sɔnnzɔnfuɛ’n, yɛle kɛ ɔ niannin sran’m be lika kpɛkun ɔ fɛli i su sieli be nuan bo aɲinyiɛ su. Le kun Zezi boli jasin fɛ’n kleli bla kun m’ɔ ti Samalifuɛ’n, Zakɔbu i nzue gbo ng’ɔ o Sikali lɔ’n i wun lɛ. Ɔ nin bla’n be kokoli yalɛ. I ngunmin w’a ijɔman lele. Ndɛ nga bla’n kan’n, ɔ fɛli i su sieli i bo. Kɛ Zezi tíe bla’n i ndɛ’n, ɔ wunnin kɛ Ɲanmiɛn i sulɛ’n ti i cinnjin kpa. Yɛ ɔ seli i kɛ Ɲanmiɛn kunndɛ be nga be su i be akunndan’n nun nanwlɛ nun’n. Zezi i ɲin yili bla sɔ’n, yɛ ɔ kleli kɛ bla sɔ’n i ndɛ lo i. Ɔ maan bla’n ko kɛnnin i ndɛ kleli sran uflɛ mun, yɛ ‘bla’n i ndɛ m’ɔ kan kleli be’n ti’n, klɔ sɔ’n sufuɛ kpanngban be lafili Zezi su.’—Zan 4:5-29, 39-42.
8. ?Kɛ mɔ sran’m be klo kɛ bé kán be klun ndɛ’n, wafa sɛ yɛ i sɔ’n kwla uka e naan e nin be y’a bo yalɛ kokolɛ’n bo ɔ?
8 Blɛ sunman nun’n, sran’m be kunndɛ kɛ bé kán be klun ndɛ. Laa nun’n, Atɛni lɔfuɛ’m be kunndɛli kɛ bé kán be klun ndɛ yɛ bé tí ndɛ uflɛ. I sɔ’n yoli maan Pɔlu kwla ijɔli be ɲrun klɔ sɔ’n nun lɔ lika nga be flɛ i Areopazi’n nun lɔ. (Sa Nga Be Yoli’n 17:18-34) Kɛ jasin fɛ’n bolɛ nun e to sran’n, e yalɛ kokolɛ’n i su fitilɛ nun’n, e kwla se kɛ: “Like nga ti yɛ n ba ɔ osu nianlɛ’n, yɛle kɛ min waan ń sí akunndan nga a bu i ndɛ nga su’n [maan e fa ndɛ kun].” Maan e fa e su sie i ndɛ nga sran’n kan’n i bo, kpɛkun maan e koko i ndɛ sɔ’n su yalɛ, annzɛ kusu e usa ndɛ sɔ’n nun. I sin’n, maan e fa ndɛ nga Biblu’n kɛn i ndɛ sɔ’n su’n e kle i amanniɛn su.
Zezi si wafa nga be bo yalɛ kokolɛ bo’n
9. ?Kwlaa naan Zezi w’a ‘yiyi Ɲanmiɛn Ndɛ nga be klɛli’n’ nun w’a kle Kleɔpasi nin i janvuɛ’n, ngue yɛ ɔ dun mmua yoli ɔ?
9 Blɛ kwlaa nun’n, Zezi sili ndɛ ng’ɔ fata kɛ ɔ kan’n. Zezi sili ndɛ tie kpa. Asa ekun’n, blɛ sunman nun’n, ɔ sili akunndan nga sran’m be bu’n, ɔ maan ɔ sili ndɛ ng’ɔ fata kɛ ɔ kan’n. (Matie 9:4; 12:22-30; Lik 9:46, 47) Maan e fɛ i sɔ’n su sunnzun ase kun e nian. Kɛ Ɲanmiɛn cɛnnin Zezi m’ɔ cɛli kan’n, i sɔnnzɔnfuɛ’m be nun nɲɔn be fin Zerizalɛmu be su kɔ Emaisi. Zezi Klist i jasin fɛ’n mɔ i sɔnnzɔnfuɛ’m be klɛli’n se kɛ: ‘Kɛ be nuan te o yalɛ sɔ’n su mɔ bé kókó kɔ́’n, Zezi bɔbɔ wa toli be su naan ɔ nin be a san nun. Sanngɛ b’a wunmɛn i sran wlɛ. Ɔ usali be kɛ: “?Ngue yalɛ yɛ an koko kɔ ɔ?” Yɛ be jrannin ɔn, be yoli be ɲrun’n tuun. Be nun kun mɔ be flɛ i kɛ Kleɔpasi’n usɛli i kɛ: “?A o ɔ liɛ nin mɔ sa ng’ɔ yoli Zerizalɛmu wa’n w’a wunman nun ɔn?” Yɛ ɔ usali be kɛ: “?Ngue sa ɔ?”’ Kɛ bé kán kɛ Zezi m’ɔ fin Nazarɛti’n ɔ kleli sran’m be like, ɔ yoli abonuan sa mun, yɛ be kunnin i’n, Like Klefuɛ Dan’n fɛli i su sieli i kwlaa sɔ’n bo. Blɛ sɔ nun’n, nn sran wie’m be waan Zezi w’a cɛn. Zezi yacili Kleɔpasi nin i janvuɛ’n be nun be kannin ndɛ nga be klo kɛ bé kán’n. I sin’n, ɔ yiyili like ng’ɔ fata kɛ be si i’n nun kleli be. Ɔ ‘yiyili Ɲanmiɛn Ndɛ nga be klɛli’n nun kleli’ be.—Lik 24:13-27, 32.
10. ?É yó sɛ naan y’a si wafa nga sran nga e to be jasin fɛ’n bolɛ nun’n be bu Ɲanmiɛn i sulɛ’n niɔn?
10 Atrɛkpa’n, e siman wafa nga sran nga e to be jasin fɛ’n bolɛ nun’n be bu Ɲanmiɛn i sulɛ’n. Sɛ e waan é sí akunndan nga be bu i ndɛ sɔ’n su’n, e kwla se be kɛ e kunndɛ kɛ é sí Ɲanmiɛn srɛlɛ’n i su akunndan nga sran’m be bu’n. Ɔ maan e kwla usa kɛ: “?A bu i kɛ sran kun ti e srɛlɛ mun sakpasakpa?” Wafa nga sran’n tɛ́ kosan’n su’n, atrɛkpa’n ɔ́ yí akunndan ng’ɔ bu’n i nglo, kpɛkun ɔ́ yó maan é sí asɔnun wafa ng’ɔ o nun’n. Sɛ ɔ ti sran mɔ Ɲanmiɛn sulɛ’n i ndɛ ti i cinnjin’n, e kwla yo maan ɔ kɛn i klun ndɛ wie mun ekun. Wienun ɔn, e kwla usɛ i kɛ: “?A bu i kɛ Ɲanmiɛn tie srɛlɛ’m be ngba, annzɛ kusu ɔ tieman srɛlɛ wie mun?” Kosan kɛ ngalɛ sa’n, ɔ kwla yo maan e koko yalɛ amanniɛn su. Sɛ ɔ nin i fata kɛ e fa ndɛ nga Biblu’n kɛn i ndɛ sɔ’n su’n e kle i’n, maan i sɔ yolɛ nun’n, e fa ngwlɛlɛ e nanti. Nán maan e wɔ sran’n i safle. Sɛ ndɛ nga e kannin’n yoli i fɛ’n, ɔ́ kwlá sé e kɛ e bla cɛn uflɛ. ?Yɛ sɛ ɔ usa e kosan kun mɔ e kwlá tɛman su’n nin? E kwla ko kunndɛ i su tɛlɛ’n, kpɛkun e sa e sin i wun lɔ. I liɛ’n, ‘sa nga ti yɛ e wla o Klist su’n, sɛ be usa e i su sa’n, e kwla tɛ su.’—1 Piɛr 3:15.
Zezi kleli sran kpa’m be like
11. ?Ngue yɛ ɔ kwla uka e naan y’a wun be ng’ɔ fata kɛ e kle be like mun ɔn?
11 Zezi m’ɔ ti sran mɔ fɔ nunmɛn i nun’n, ɔ kwla wunnin be ng’ɔ fata kɛ ɔ kle be like’n be wlɛ. Be nga ‘Ɲanmiɛn fali be kɛ be ɲan anannganman nguan’n,’ be wunlɛ’n timan pɔpɔ e sa nun. (Sa Nga Be Yoli’n 13:48) I sɔ’n w’a yoman pɔpɔ w’a manman akoto mun wie. Zezi seli be kɛ: ‘Klɔ kwlaa nga an ju su’n, sɛ ɔ ti dan o, sɛ ɔ ti kaan o, an usa sɛ sran kpa wie o lɛ’n.’ (Matie 10:11) Kɛ nga Zezi i akoto’m be fa yoli’n sa’n, ɔ fata kɛ e kusu e kunndɛ sran nga be klo kɛ bé tíe ndɛ nga e kan’n, naan bé súan ndɛ nanwlɛ ng’ɔ o Biblu’n nun’n. Sɛ e waan é wún sran kpa mun’n, ɔ fata kɛ e fa e su e sie i ndɛ nga be nga e bo jasin fɛ’n kle be’n, be kan’n i bo. Kpɛkun wafa nga sran’m be sɔ ndɛ nga e kan’n nun’n, maan e fa e ɲin sie su.
12. ?Ngue yɛ e kwla yo naan y’a uka sran nga jasin fɛ’n i ndɛ lo i’n niɔn?
12 Sɛ sran kun kle kɛ Ɲanmiɛn Sielɛ’n i ndɛ nga e kannin’n yoli i fɛ’n, kwlaa naan y’a ko niɛn i osu ekun’n, nán maan e yaci Biblu’n nun like ng’ɔ fata kɛ e kle i’n, i su akunndan bulɛ. Kɛ é bó jasin fɛ’n é klé sran kun’n, sɛ e klɛ ninnge nga e sieli be nzɔliɛ sran sɔ’n i lika’n e sie’n, i sɔ’n kwla uka e naan y’a kle i Biblu’n nun like ng’ɔ nin i fata’n. Kɛ é sá e sin é kó nían sran’n i osu ekun’n, sɛ e kunndɛ kɛ é sí ninnge ng’ɔ lafi be su’n, nin akunndan ng’ɔ bu’n, ɔ nin sa nga be o i su mun’n, ɔ ti cinnjin kɛ e fa e su e sie i ndɛ ng’ɔ́ kán’n i bo kpa.
13. ?Ngue yɛ ɔ kwla uka e naan y’a wun Biblu’n i wun akunndan nga sran kun bu’n i wlɛ ɔ?
13 ?É yó sɛ naan wafa nga sran’m be bu Ɲanmiɛn Ndɛ’n, b’a kan b’a kle e? Lika wie’m be nun’n, e kwla usa kɛ: “?A bu i kɛ Biblu’n i wlɛ wunlɛ ti kekle?” Blɛ sunman nun’n, wafa nga sran’n fa tɛ kosan sɔ’n su’n, ɔ yi akunndan ng’ɔ bu i Ɲanmiɛn i ninnge’m be su’n i nglo. Wafa uflɛ mɔ e nin be kwla koko yalɛ’n, yɛle kɛ e kwla kanngan Biblu’n nun ndɛ mma kun nun kpɛkun e usa kɛ: “?A bu ndɛ nga sɛ?” Kɛ nga Zezi fa yoli sa’n, sɛ e usa kosan ng’ɔ nin i fata’n, junman nga e di i jasin fɛ’n bolɛ nun’n, ɔ́ bá nvlɛ. Sanngɛ i sɔ yolɛ nun’n, ɔ fata kɛ e nian e wun su.
Zezi sili kosan’m be usa
14. ?Kannzɛ bɔɔ y’a usaman sran’m be kosan’n, wafa sɛ yɛ e kwla kle kɛ ndɛ nga be kan’n ti e cinnjin ɔn?
14 Maan e kle kɛ ndɛ nga sran’m be kan’n ti e cinnjin. Ɔ fataman kɛ e gua be ɲin ase. Maan e nian like nga Zezi yoli’n su. Zezi usali sran’m be kosan amanniɛn su, kpɛkun i kosan’m be uka sran mun maan be bu ndɛ ng’ɔ kan’n i su akunndan. Asa ekun’n, ɔ fɛ i su sie i ndɛ nga sran’m be kan’n i bo, ɔ yo maan sran kpa’m be wla gua ase, kpɛkun ɔ yo maan be wun fa be feke. (Matie 11:28) Sran wafa kwlaa be kan ndɛ ng’ɔ lo be’n kle i. Srɛ kunman be. (Mark 1:40; 5:35, 36; 10:13, 17, 46, 47) Sɛ sran’m be bɔbɔ be tu be klun be kan Biblu’n nin like ng’ɔ kle’n i su akunndan nga be bu’n i ndɛ kle e’n, ɔ fataman kɛ e usɛ i sɔ’n su kosan kun.
15, 16. ?Wafa sɛ yɛ e kwla yo naan e nin sran mun y’a koko Ɲanmiɛn sulɛ ’m be su ndɛ’n su yalɛ ɔ?
15 Sɛ e si kosan usa’n, ɔ ti kpa. Sanngɛ kusu sɛ e kunndɛ kɛ e nin sran mun é kókó yalɛ’n, e kwla kan ndɛ fɛ kun kpɛkun kɛ sran’n ɔ́ gúagúa e ndɛ’n su’n, e fa e su sie ndɛ ng’ɔ kan’n i bo. I sɔ’n yɛ Zezi yoli ɔ. Ɔ seli Nikodɛmu kɛ: ‘Sran nga b’a wumɛn i ekun’n, ɔ su kwlá yoman mɛn nga Ɲanmiɛn sie’n i nunfuɛ mlɔnmlɔn.’ (Zan 3:3) Nikodɛmu bu ndɛ sɔ’n i akunndan ɔn, ɔ wunmɛn i wlɛ bɔɔ kaan sa. Ɔ maan ɔ usali Zezi i kosan, yɛ ɔ fɛli i su sieli ndɛ nga Zezi kannin’n su. (Zan 3:4-20) E kusu, e kwla fa ajalɛ sɔ’n naan e nin sran mun y’a koko yalɛ.
16 Andɛ’n, Ɲanmiɛn sulɛ wafa’m b’a sɔn dan. Sran kpanngban kpa mɔ be o lika kɛ sran Ble mɛn’n nun, nin blɔfuɛ mɛn’n nun lɔ wia afiliɛ lɔ, ɔ nin Amlɛnkɛn’m be lɔ sa’n, ndɛ sɔ’n ti be nnana. Sɛ e o lika sɔ’m be nun’n, wie liɛ’n yalɛ kokolɛ’n i su fitilɛ nun’n, e kwla se kɛ: “Kɛ n wun kɛ asɔnun’m b’a sɔn’n, i sɔ’n sanngan min akunndan’n. Sanngɛ n lafi su kɛ ɔ cɛ kaan’n, nvlenvle’m be nunfuɛ’m be kwlaa be bo yó kun bé sú Ɲanmiɛn kɛ ng’ɔ nin i fata’n sa. ?A klo kɛ ɔ yo sɔ?” Sɛ like nga e lafi su mɔ e kɛn i ndɛ’n, ɔ fu sran’m be nun’n, e kwla yo maan sran’m be kan be klun ndɛ. Asa ekun’n, sɛ kosan nga e usa’n i su tɛlɛ wafa’n ti nɲɔn cɛ’n, i su tɛlɛ’n su yoman kekle. (Matie 17:25) Kɛ sran’n ko tɛ kosan nga e usali’n su’n, maan e fa Biblu’n nun ndɛ mma kun annzɛ nɲɔn e fa tɛ kosan sɔ’n su. (Ezai 11:9; Sofoni 3:9) Kɛ sran’n ɔ́ tɛ́ kosan’n su’n, sɛ e fa e su sie ndɛ ng’ɔ kan’n i bo naan ɔ ka e ti nun’n, é kwlá wún ndɛ ng’ɔ fata kɛ cɛn uflɛ e kan’n, i wlɛ.
Zezi sieli i su ba kanngan’m be nuan bo
17. ?Ngue yɛ ɔ kle kɛ ba kanngan’m be ndɛ loli Zezi ɔ?
17 Nán kpɛnngbɛn’m be ngunmin yɛ be ndɛ loli Zezi ɔ. Ba kanngan’m be kusu be ndɛ loli i wie. Ɔ sili ngowa nga be kan’n, nin ndɛ nga be kan be mun. Blɛ wie nun’n, ɔ flɛli ba kanngan mun kɛ be blɛ i sin. (Lik 7:31, 32; 18:15-17) Ba kanngan’m be o Zezi i ndɛ tiefuɛ’m be nun wie. Kɛ ba kanngan’m be kpan manmannin Mɛsi’n, Zezi fɛli i ɲin sieli su, yɛ ɔ kleli kɛ be kɛnnin i sɔ Ɲanmiɛn Ndɛ’n nun. (Matie 14:21; 15:38; 21:15, 16) Andɛ ba kanngan kpanngban be su yo Zezi i sɔnnzɔnfuɛ. ?Ɔ maan wafa sɛ yɛ e kwla uka be ɔ?
18, 19. ?Wafa sɛ yɛ e kwla uka ba kanngan mun naan b’a yo Zezi i sɔnnzɔnfuɛ ɔ?
18 Sɛ e kunndɛ kɛ é úka e mma kanngan mun Ɲanmiɛn ninnge’m be nun’n, ɔ fata kɛ e fa e su sie i ndɛ nga be kan’n i bo. Ɔ ti cinnjin kɛ akunndan nga be bu m’ɔ nin Zoova i liɛ’n kɔman likawlɛ’n, e wun i wlɛ. Kannzɛ bɔbɔ ndɛ nga e mma kanngan’m be kan’n ti sɛ ti sɛ o, maan ndɛ klikli nga é kán’n, ɔ wla be fanngan. I sin’n, e kwla fa Biblu’n nun ndɛ mma nga be nin i fata’n, e fa uka e mma mun naan akunndan nga Zoova bu i sa sɔ’n su’n, b’a wun i wlɛ.
19 Kosan’m be kwla uka e naan y’a si ba kanngan’m be klun akunndan’n. Sanngɛ wafa kunngba nga kpɛnngbɛn’m be kloman kɛ be usa be kosan ngboko’n, ba kanngan’m be kusu be klomɛn i sɔ’n wie. Kɛ ɔ yo naan e fa kosan mun e bobo ba’m be su’n, e kwla kan sa wie m’ɔ juli e su’n i ndɛ kan. Wienun ɔn e kwla kan wafa nga e wun yo e’n ndɛ sɔ’n su’n, i ndɛ. Kpɛkun like nga ti yɛ e wun yo e sɔ’n, e kwla yiyi nun. I sin’n, e kwla usa kɛ: “?Ɔ wun yo ɔ sɔ wie?” Atrɛkpa’n, wafa nga ba’n ɔ́ tɛ́ kosan’n su’n, ɔ́ mán amun Biblu’n nun ndɛ mma wie’m be su yalɛ kokolɛ’n i wun atin. Ɔ maan yalɛ kokolɛ sɔ’n ɔ́ wlá amun wa’n i fanngan yɛ ɔ́ úkɛ i dan.
Maan e sɔnnzɔn Like Klefuɛ Dan’n titi
20, 21. ?Ngue ti yɛ kɛ é úka sran mun maan be yo Zezi i sɔnnzɔnfuɛ’n, ɔ fata kɛ e fa e su sie i ndɛ nga be kan’n i bo kpa ɔ?
20 Sɛ e waan é úka e mma kanngan mun annzɛ sran uflɛ naan be yo Zezi i sɔnnzɔnfuɛ’n, ɔ ti cinnjin kpa kɛ e fa e su sie i ndɛ nga be kan’n i bo. I sɔ yolɛ’n yi klolɛ mɔ e klo sran’n i nglo. Kɛ sran kun kán ndɛ mɔ e fa e su sie i ndɛ sɔ’n i bo’n, ɔ kle kɛ e kan e wun ase, kpɛkun sran ng’ɔ ijɔ’n, ɔ wun i kɛ e bu i sran naan i ndɛ lo e. Asa ekun’n kɛ é tíe sran’n i ndɛ’n, maan e fa e ɲin sie i wafa nga i wun yo i’n su.
21 Kɛ é bó jasin fɛ’n, maan e fa e su sie i ndɛ nga sran’m be kan’n i bo kpa. Sɛ e fa e ɲin sie i ndɛ nga be kan’n su kpa’n, Biblu’n nun ndɛ ng’ɔ kwla yo be fɛ kpa’n, e kwla wun i wlɛ. I sin’n, maan e mian e ɲin e uka be. Yɛ i sɔ yolɛ nun’n, maan e nian ajalɛ wafawafa nga Zezi fa kleli sran’m be like’n be su. Sɛ e yo sɔ’n, é dí aklunjuɛ afin e sɔnnzɔn Like Klefuɛ Dan’n.
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ Zezi yoli maan sran’m be kannin be klun ndɛ ɔ?
• ?Ngue ti yɛ Zezi fɛli i su sieli i ndɛ nga i like suanfuɛ’m be kan’n i bo ɔ?
• ?Kɛ é bó jasin fɛ’n, wafa sɛ yɛ e kwla usa kosan ɔn?
• ?Ngue yɛ e kwla yo naan y’a uka ba kanngan mun Ɲanmiɛn i ninnge’m be nun ɔn?
[Foto, bue 26]
Kɛ é bó jasin fɛ’n, maan e fa e su sie i ndɛ nga sran’m be kan’n i bo