Be nin nzue ti mɔ be man nguan’n be nuan kɔlɛ fata
‘Bua Gbanflɛn’n ɔ́ tá be, ɔ́ fá be kɔ́ nzue ti mun mɔ be man nguan’n be nuan.’—NGL. 7:17.
1. ?Wafa sɛ yɛ Ɲanmiɛn Ndɛ nun’n, be flɛ Klistfuɛ nga Ɲanmiɛn kpali be sieli be ngunmin’n mun ɔn? ?Yɛ junman benin yɛ Zezi fa mannin be ɔ?
ƝANMIƐN NDƐ’N nun’n, be flɛ Klistfuɛ nga be nian Klist i ninnge’m be su asiɛ’n su wa’n be kɛ ‘sran kpa nanwlɛfuɛ m’ɔ si ngwlɛlɛ’n.’ Kɛ afuɛ nga be flɛ i 1918 nun’n, Klist bali “sran” sɔ’n i osu nianlɛ’n, ɔ wunnin kɛ Klistfuɛ sɔ mɔ Ɲanmiɛn kpali be sieli be ngunmin’n, be mɛn i sran’m be ‘aliɛ blɛ ng’ɔ ti i nuan su’n i su’ titi. Ɔ maan, Zezi m’ɔ ti sran sɔ’n i Min’n, ɔ fɛli i ‘ninnge’n kwlaa wlɛli i sa nun.’ (An kanngan Matie 24:45-47 nun.) I sɔ’n kle kɛ kwlaa naan Klistfuɛ nga be kpali be sieli be ngunmin’n b’a ɔ ɲanmiɛn su’n, be su be wiengu Zoova i sufuɛ nga be o asiɛ’n su mun.
2. ?Zezi i ninnge mun yɛle benin?
2 Sran ng’ɔ ti kwlafuɛ’n, i sa o i ninnge’m be su yɛ ɔ kwla fa be yo like ng’ɔ klo kɛ ɔ́ fá yó’n. Asiɛ’n su wa’n, ninnge kwlaa ɔ nin sran kwlaa nga ɔ suan Ɲanmiɛn Sielɛ’n i bo’n, be ti Zezi Klist mɔ Zoova sieli i Famiɛn’n i liɛ. “Sran kpanngban kpa” nga akoto Zan wunnin be aolia nun’n, be o ninnge sɔ’m be nun wie. Zan kan sran kpanngban sɔ’m be ndɛ se kɛ: ‘N wunnin sran kpanngban kpa, sran fi kwlá kaman be, sran sɔ’m be fin mɛnmɛn’n kwlaa nin nvlenvle’n kwlaa nun, sran wafawafa’n kwlaa o be nun, be ijɔ aniɛn wafawafa’n kwlaa. Be jinjin bia’n nin Bua Gbanflɛn’n be ɲrun lɛ, tralɛ ufue o be wun, yɛ mme nɲa o be sa nun.’—Ngl. 7:9.
3, 4. ?Cenjele like dan benin yɛ sran kpanngban kpa’m be le i ɔ?
3 Be nga be o sran kpanngban kpa sɔ’m be nun’n, be ti be nga Zezi flɛli be kɛ ‘bua’m be wie’n’ be nunfuɛ. (Zan 10:16) Be si kɛ bé ɲán anannganman nguan asiɛ’n su wa mɛn klanman’n nun. Be lafi su kɛ Zezi ‘fá be kɔ́ nzue ti mun mɔ be man nguan’n be nuan,’ yɛ ‘Ɲanmiɛn núnnún be ɲinmuɛn’n kwlaa.’ Kɛ mɔ i sɔ’n o be akunndan’n nun ti’n, be ‘kpuli be tralɛ mun Bua Gbanflɛn’n i mmoja’n nun yɛ be fieli ɔ.’ (Ngl. 7:14, 17) Be lafi tɛ nga Zezi yili’n su. Ɔ maan, Ɲanmiɛn ɲrun’n, be tralɛ’n ti ufue. Ɲanmiɛn bu be sran kpa, ɔ maan be kaci i janvuɛ kɛ Abraamu sa.
4 Sran kpanngban kpa mɔ be ti bua’m be wie’m be nunfuɛ’n, mɔ be nuan’n uka su titi’n, Ɲanmiɛn bu be sran kpa. Ɔ maan be kwla lafi su kɛ, afɛ dan’n nun’n, kɛ mɛn nga ɔ́ wá núnnún’n, bé ɲán be ti. (Zak 2:23-26) Be kwla fa be wun mantan Zoova, yɛ be wunmuan’n bé kwlá fín Armagedɔn alɛ’n nun fíte. (Zak 4:8; Ngl. 7:15) Sran kpanngban kpa’m be yoman be ninnge liɛ mun ngunmin. Sanngɛ be nian ajalɛ nga Famiɛn m’ɔ o ɲanmiɛn su lɔ’n, ɔ nin i niaan nga be o asiɛ’n su wa be kle’n su yɛ be tu be klun be di junman ɔn.
5. ?Wafa sɛ yɛ be nga be o sran kpanngban kpa’m be nun’n, be suan Klist i niaan nga be kpali be sieli be ngunmin’n be bo ɔ?
5 Satan i mɛn nga nunfuɛ’m be kleli Klistfuɛ nga be kpali be sieli be ngunmin’n be ɲrɛnnɛn, yɛ be te kle be ɲrɛnnɛn. Sanngɛ be kwla lafi su kɛ be niaan nga be o sran kpanngban kpa’m be nun’n, bé súan be bo titi. Kɛ Klistfuɛ nga be kpali be sieli be ngunmin be nuan’n yó kaan kpa kɔ́ i ɲrun’n, nn sran kpanngban kpa’m be nuan liɛ’n úka su dan kpa afuɛ kwlaa nun. Mɛn wunmuan’n nun Klistfuɛ’m be asɔnun’m be tra asɔnun 100.000. Be nga be kpali be sieli be ngunmin’n be bɔbɔ be kwlá nianman asɔnun sɔ’m be su kunngunngun. Ɔ maan, wafa kun nga bua’m be wie’m be uka be nga be kpali be sieli be ngunmin’n, yɛle kɛ sran kpanngban kpa’m be nun yasua nga be ɲin w’a ti Ɲanmiɛn ninnge’m be nun’n, be yo asɔnun kpɛnngbɛn asɔnun’m be nun. Be uka be nga be kpali be sieli be ngunmin mun naan b’a nian Klistfuɛ akpinngbin sunman nga be fali be wlali ‘sran kpa nanwlɛfuɛ m’ɔ si ngwlɛlɛ’n’ i sa nun’n be lika.
6. ?Ɲanmiɛn Ndɛ’n nun’n, wafa sɛ yɛ be dun mmua kannin wafa nga bua’m be wie’m be nunfuɛ’m bé súan Klistfuɛ nga be kpali be sieli be ngunmin’n be bo’n, i ndɛ ɔ?
6 Wafa nga bua’m be wie’m be nunfuɛ’m bé súan Klistfuɛ nga be kpali be sieli be ngunmin’n be bo’n, Ɲanmiɛn nuan ijɔfuɛ Ezai dun mmua kɛnnin i ndɛ. Ɔ seli kɛ: ‘Zoova waan yoo: “Eziptifuɛ’m be junman’n i su mmlusuɛ’n, yɛ Etiopifuɛ’m be ninnge nga be ɲannin be’n be su mmlusuɛ’n, ɔ nin Sebafuɛ mɔ be ti sran jajraajra’n be kusu be ninnge’m be su mmlusuɛ’n, i kwlaa sɔ’n ɔ́ sín amun ja su, yɛ i kwlaa sɔ’n ɔ́ yó amun liɛ. Sran sɔ’m bé sú amun su.”’ (Eza. 45:14) Sɛ é kwlá sé’n, Klistfuɛ nga bé trán asiɛ’n su wa’n, be su be nga be kpali be sieli be ngunmin’n, ɔ nin e ɲrun dinfuɛ’m be anuannzɛ’n be su, yɛ be nian ajalɛ nga be kle’n su. Bua’m be wie’m be ti kɛ junman difuɛ mɔ be tuaman be kalɛ’n sa. Mɛn wunmuan’n nun jasin fɛ’n bolɛ junman mɔ Klist fa mɛnnin i sufuɛ nga be kpali be sieli be ngunmin’n mɔ be o asiɛ’n su wa’n, be klunklo su’n, be tu be klun be fa be wunmiɛn’n nin be sa nun ninnge mun be fa suɛn i bo.—Yol. 1:8; Ngl. 12:17.
7. ?Cenjele like benin yɛ sran kpanngban kpa’m be nunfuɛ’m bé wá ɲɛ́n i mɔ i ti yɛ kɛ é sé yɛ’n be su kle be like’n niɔn?
7 Kɛ sran kpanngban kpa’m be suan be niaan nga be kpali be sieli be ngunmin’n be bo’n, be kusu be kle be like naan kɛ Armagedɔn alɛ’n ko sin’n, b’a kwla bo mɛn uflɛ’n nun tranlɛ’n bo. Ɔ fata kɛ mɛn uflɛ sɔ’n i nun tranlɛ’n i bo bolɛ’n yo kpa. Yɛ ɔ fata kɛ mɛn uflɛ sɔ’n i nunfuɛ’m be klunklo su, be fa ajalɛ nga be Min’n kle be’n su. Klistfuɛ’m be tinuntinun be kwla yi i nglo kle Famiɛn Zezi Klist kɛ ɔ kwla fa be di i junman’n. Sɛ bikisa be lafi Ɲanmiɛn su naan be su i klanman’n, bé yí i nglo kɛ mɛn uflɛ’n nun’n, sɛ Famiɛn man be junman’n, bé kwlɛ́ i dí.
Sran kpanngban kpa’m be yi be Ɲanmiɛn sulafilɛ’n i nglo
8, 9. ?Wafa sɛ yɛ sran kpanngban kpa’m be nunfuɛ’m be yi be Ɲanmiɛn sulafilɛ’n i nglo ɔ?
8 Bua’m be wie mun mɔ be ti Klistfuɛ nga be kpali be sieli be ngunmin’n be janvuɛ’n, be yili be Ɲanmiɛn sulafilɛ’n i nglo wafa sunman nun. I klikli su’n, be uka be nga be kpali be sieli be ngunmin’n, be bo Ɲanmiɛn Sielɛ jasin fɛ’n. (Mat. 24:14; 28:19, 20) I nɲɔn su’n, be lo be wun be nian ajalɛ nga e ɲrun dinfuɛ’m be anuannzɛ’n kle be’n su nanti.—Ebr. 13:17; an kanngan Zakari 8:23 nun.
9 Wafa nsan su nga sran kpanngban kpa’m be suan be niaan nga be kpali be sieli be ngunmin’n be bo’n, yɛle kɛ be mɛn dilɛ nun’n, be nian Zoova i mmla sɛsɛ’m be su nanti. Be mian be ɲin be ‘klo Ɲanmiɛn nin sran, be klun jɔ, be wla gua ase, be tra be awlɛn, be yo sran ye, be yo aklunye, be di nanwlɛ, be yo wɛtɛɛ, yɛ be yo sa i nuan su.’ (Gal. 5:22, 23) Nzuɛn kɛ ngalɛ sa’n, andɛ be taman be wun. Afin nga e ta be wun’n yɛle “klɔ sran i nzuɛn’n.” Ɔ maan, sran kpanngban kpa’m be fua kpa kɛ ninnge nga be ti klɔ sran nzuɛn’n, be su yoman wie. Klɔ sran’m be nzuɛn sɔ’n yɛle ‘bla nin bian kunndɛlɛ sukusuku, sa tɛtɛ yolɛ, wlaka bolɛ, amuɛn sɔlɛ, bae dilɛ, sran kpɔlɛ, ɔ nin utre. Be ɲin ci be wiengu, be fa ya, be bo timan kun, be bubu be wun nun, be le konvi, be nɔn nzan bo, be yo sa finfin mun, yɛ be yo i sin sa wie mun ekun.’—Gal. 5:19-21.
10. ?Fualɛ benin yɛ sran kpanngban kpa’m be nunfuɛ’m b’a fua ɔ?
10 Kɛ mɔ fɔ’n o e nun’n ti’n, like nga Ɲanmiɛn wawɛ’n maan sran yo’n, i yolɛ’n kwla yo kekle man e. Asa ekun’n, klɔ sran’n nzuɛn’n i ase wlalɛ’n, nin yalɛ nga Satan i mɛn’n kle e’n i ɲrun kekle jranlɛ’n, be kwla yo kekle man e wie. Sanngɛ y’a fua kɛ fɔnlɛ nga ɔ ju blɛ wie e fɔn’n, ɔ nin ninnge wie mɔ e kwlaman be yo’n, annzɛ kusu alaje mɔ e lɛmɛn i’n, e su manman be atin kɛ be bubu e sa sin naan klolɛ nga e fa klo Zoova’n, ɔ kan ase. E si kɛ like nga Zoova seli kɛ ɔ́ yó’n, ɔ́ yó. Yɛle kɛ ɔ́ yó maan sran kpanngban kpa’m bé fín afɛ dan’n nun bé fíte.
11. ?Kɛ ɔ ko yo naan Klistfuɛ’m be Ɲanmiɛn sulafilɛ’n w’a kpɔnzɔ’n, ngue yɛ Satan yo ɔ?
11 Sanngɛ e nian e wun su kpa titi. Afin e si kɛ e kpɔfuɛ dan’n yɛle Mmusu’m be si Satan. Yɛ i kusu nin a fɛman. (An kanngan 1 Piɛr 5:8 nun.) Ɔ sin be nga be kpɔci Zoova’n, ɔ nin sran uflɛ wie mun ekun be sin, naan e bu i kɛ ndɛ nga e fa su’n ti ato. Sanngɛ ɔ́ yó i sɔ ngbɛn. Asa ekun’n, kannzɛ bɔbɔ ɲrɛnnɛn klelɛ blɛ nun’n, jasin fɛ’n bolɛ junman’n kan ase’n, sanngɛ blɛ sunman nun’n be nga be wun ɲrɛnnɛn sɔ’n, be Ɲanmiɛn sulafilɛ’n taka kpa. I sɔ’n ti’n, Satan fa ajalɛ uflɛ titi naan e Ɲanmiɛn sulafilɛ’n kan ase. Wie liɛ’n, e sa sin m’ɔ bubu e’n su yɛ ɔ fɛ i ɲin sie ɔ. I sɔ’n ti’n, be wlali Klistfuɛ klikli’m be su nun kpa kɛ: ‘An bu i mɔ kɛ sa tɛ yofuɛ’m be saci i wun’n ɔ trɛli i awlɛn’n i akunndan.’ ?Ngue ti ɔ? Biblu’n waan: “Naan amun sa sin a bubuman amun naan amun a kpɔnzɔman.”—Ebr. 12:3.
12. ?Wafa sɛ yɛ Biblu’n nun afɔtuɛ’m be wla be nga be sa sin w’a bubu be’n be fanngan ɔn?
12 ?Ɔ nin a yoman e le kɛ e yaci Zoova i sulɛ? ?Ɔ nin a yoman e le kɛ like nga e yo’n, ɔ kpɛnman su? Sɛ ɔ ti sɔ’n, nán maan e yaci Satan lɛ maan ɔ fɛ i sɔ akunndan mun yo maan e yaci Zoova i sulɛ. Maan e suan Biblu’n nun like kpa, e tu e klun e srɛ Ɲanmiɛn, yɛ e wɔ aɲia’m be bo titi kpɛkun maan e nin e niaan Klistfuɛ mun e bo yo kun. Ninnge sɔ mun yɛ bé úka e naan ‘y’a kpɔnzɔman’ ɔn. Zoova tali be nga be su i’n be nda kɛ ɔ́ úka be maan bé ɲán wunmiɛn uflɛ titi. Yɛ nda sɔ m’ɔ tali’n, e kwla lafi su. (An kanngan Ezai 40:30, 31 nun.) Maan e ɲin tran Ɲanmiɛn Sielɛ’n i junman dilɛ’n su titi. Nán maan e ɲin su yiyilɛ ninnge’m be fa e blɛ’n, sanngɛ e fa e ɲin sie i sran’m be ukalɛ’n su. Sɛ e yo sɔ’n, kannzɛ bɔɔ e sa sin bubu e’n, é ɲán wunmiɛn é jrán kekle.—Gal. 6:1, 2.
Bé fín ɲrɛnnɛn’n nun fíte, bé wlú mɛn uflɛ’n nun
13. ?Junman benin yɛ ɔ minndɛ be nga bé fíte nun Armagedɔn alɛ’n nun mun ɔn?
13 Kɛ Armagedɔn alɛ’n ko wie’n, Ɲanmiɛn wá cɛ́n sran kpanngban kpa mɔ b’a yomɛn i sufuɛ’n. Ɔ nin i fata kɛ be kle be Zoova i mmla mun. (Yol. 24:15) Ɔ fata kɛ be suan e ti kpɔlɛ tɛ nga Zezi yili’n i su like. I kpa’n bɔbɔ’n, ɔ fata kɛ be kle be wafa nga be kwla lafi tɛ sɔ’n su naan b’a ɲɛn i su mmlusuɛ’n. Ɔ fata kɛ ato ndɛ nga be tili be Ɲanmiɛn sulɛ ng’ɔ timan su’n i nun’n, be yaci be su falɛ, yɛ be wla be nzuɛn laa’n i ase. Ɔ fata kɛ be fa nzuɛn uflɛ m’ɔ kle kɛ be ti Klistfuɛ nanwlɛfuɛ’n. (Efɛ. 4:22-24; Kol. 3:9, 10) Bua’m be wie’m be nunfuɛ nga bé fíte nun alɛ sɔ nun’n, bé wá ɲán junman kpanngban bé dí. Junman sɔ mɔ bé dí mán Zoova’n, ɔ́ mán be aklunjuɛ dan kpa! Afin kɛ ɔ́ yó sɔ’n, nn mɛn tɛ nga nun afɛ nin i nun ninnge nga be kwla fa e ɲin sie i like uflɛ su’n, be nun wie fi nunman lɛ kun.
14, 15. Yalɛ nga be nga bé fín afɛ dan’n nun fíte’n, ɔ nin sran kpa nga bé wá cɛ́n’n, bé wá kókó’n, an kɛn i ndɛ.
14 Blɛ sɔ nun’n, Zoova i sufuɛ nga be wuli ka naan Zezi w’a bɛ i junman’n i dilɛ asiɛ’n su wa’n, be kusu bé wá súan like kpanngban. Mɛsi mɔ Ɲanmiɛn nuan ijɔfuɛ’m be kɛnnin i ndɛ’n, mɔ be bɔbɔ be minndɛli i lele sanngɛ b’a wunmɛn i’n, bé wá sí i. Kwlaa naan b’a wu’n, be dun mmua yili i nglo kɛ be kunndɛ kɛ Zoova kle be like. Maan e bu cenjele like nga i akunndan e nian. Ɲanmiɛn i nuan ndɛ nga Daniɛli klɛli’n, i bɔbɔ’n w’a wunmɛn i wlɛ. Sanngɛ é wá úka sran sɔ mun, naan wafa nga ndɛ sɔ’n kpɛnnin su’n, be yiyi nun kle Daniɛli.—Dan. 12:8, 9.
15 Be nga bé wá cɛ́n’n, é wá klé be ninnge kpanngban. Kpɛkun e kusu é wá úsa be kosan kpanngban kpa. Laa sa nga be kan be ndɛ Biblu’n nun mɔ sanngɛ b’a yiyiman be nun kpa’n, bé kwlá yíyí be nun klé e. Kɛ Zan Batɛmu yofuɛ m’ɔ nin Zezi be ti ngawangawa’n, i bɔbɔ wá kán Zezi i su ndɛ tɛkɛtɛkɛ mun klé e’n, maan e bu wafa nga e wun yó e’n i akunndan e nian. Ninnge nga é wá súan be Ɲanmiɛn i sufuɛ sɔ’m be sa nun’n, bé yó maan é wún Ɲanmiɛn Ndɛ’n i wlɛ kpa ekun trá andɛ. Zoova i sufuɛ nga be wuli laa’n, ɔ nin sran kpanngban kpa’m be nunfuɛ nga bé wú mɛn nga i blɛ kasiɛn’n nun’n, bé ‘cɛ́n bé ɲán nguan kpa.’ Be boli Zoova sulɛ’n bo mɛn nga Satan sie’n i nun. Kɛ bé wá sú Zoova titi mɛn uflɛ’n nun mɔ lika’n yó kpa’n, i sɔ’n mán be aklunjuɛ dan.—Ebr. 11:35; 1 Zan 5:19.
16. ?Kɛ nga Ɲanmiɛn Ndɛ’n fa kan sa’n, ngue yɛ bé yó i Jɔlɛ Dilɛ Cɛn’n nun ɔn?
16 Jɔlɛ Dilɛ Cɛn’n nun’n, bé wá ɲánnji fluwa wie’m be nun. Be kwlaa nga be ɲin o su blɛ sɔ nun’n, sɛ be nin anannganman nguan ɲanlɛ fata annzɛ be nin i fataman o, Biblu’n nin fluwa sɔ’m be nun yɛ bé nían bé dí be jɔlɛ ɔ. (An kanngan Sa Nglo Yilɛ 20:12, 13 nun.) Lele mɔ Jɔlɛ Dilɛ Cɛn’n fá wíe’n, sran’m be tinuntinun bé kwlá klé sran nga bé jrɛ́n i sin’n, nglo’n nin asiɛ’n be sielɛ ndɛ nun’n. ?Bé fá be wun mán Ɲanmiɛn maan ɔ sie be, yɛ bé yáci be wun nun naan Bua Gbanflɛn’n fa be ɔ “nzue ti mun mɔ be man nguan’n be nuan?” ?Annzɛ be su loman be wun manman Ɲanmiɛn kɛ ɔ sie be? (Ngl. 7:17; Eza. 65:20) Lele mɔ Jɔlɛ Dilɛ Cɛn’n wíe’n, asiɛ’n sufuɛ’m be kwlaa bé kwlá fá be bɔbɔ be ajalɛ nga be klo kɛ bé fá’n. Fɔ m’ɔ o e nun’n, ɔ nin sa tɛtɛ’m be su tranman lɛ kun naan b’a tanndan be ɲrun. Sran fi su kwlá siman jɔlɛ kasiɛn nga Zoova wá dí’n, i sɛsɛ m’ɔ ti’n, i su akplowa kun. Saan Klunwifuɛ nga be waan be kaciman’n, be ngunmin cɛ yɛ bé núnnún be mlɔnmlɔn ɔn.—Ngl. 20:14, 15.
17, 18. ?Ngue like yɛ Klistfuɛ nga be kpali be sieli be ngunmin’n, nin be nga be ti bua’m be wie’m be nunfuɛ’n, be ɲin o i sin kpa kɛ bé yó i Jɔlɛ Dilɛ Cɛn’n nun ɔn?
17 Andɛ Klistfuɛ nga be kpali be sieli be ngunmin’n be nin famiɛn dilɛ’n fata. Yɛ be minndɛ blɛ mɔ bé wá dí famiɛn Jɔlɛ Dilɛ Cɛn’n nun’n. I sɔ’n yó be cenjele like dan kpa. Kɛ be bu like klanman sɔ mɔ bé wá ɲɛ́n i’n i akunndan’n, i sɔ’n wla be fanngan maan afɔtuɛ nga Piɛli fa mannin Klistfuɛ klikli mun’n, be fa su. Ɔ seli kɛ: ‘An bu flɛlɛ nin falɛ mɔ Ɲanmiɛn fali amun’n i akunndan kpa naan an jran kekle. Sɛ an yo sɔ’n, an su fɔnman mlɔnmlɔn. I sɔ’n nun yɛ e Min Zezi Klist m’ɔ ti e Defuɛ’n, ɔ́ sɔ́ amun nun kpa, yɛ ɔ́ fá amun wlɛ́ i sran ng’ɔ sie be titi’n be nun ɔn.’—2 Piɛ. 1:10, 11.
18 Klistfuɛ nga be kpali be sieli be ngunmin’n be like nga bé wá ɲɛ́n i’n ti’n, be niaan nga be o bua’m be wie’m be nun’n, be di aklunjuɛ. B’a fua kɛ bé súan be bo. Andɛ’n, bua’m be wie’m be nunfuɛ’m be ti Ɲanmiɛn i janvuɛ. I sɔ’n ti, like kwlaa nga be kwla yo i Ɲanmiɛn i sulɛ nun’n, be tu be klun yo. Jɔlɛ Dilɛ Cɛn’n nun’n, bé tú be klun bé súan ninnge nga Ɲanmiɛn wá síesíe’n, be kwlaa be bo. Kɛ ɔ́ yó sɔ’n, nn Zezi kusu fá be kɔ́ nzue ti mun mɔ be man nguan’n be nuan. I sin’n, bé trán be nga bé sú Zoova asiɛ’n su wa tititi’n, be nun wie.—Rɔm. 8:20, 21; Ngl. 21:1-7.
?Amun wla kwla kpɛn su?
• ?Zezi i ninnge’n, be nun wie mun yɛle benin?
• ?Wafa sɛ yɛ sran kpanngban kpa’m be suan be niaan nga be kpali be sieli be ngunmin’n be bo ɔ?
• ?Cenjele like benin yɛ sran kpanngban kpa’m be le i ɔ? ?Yɛ ngue yɛ be ɲin o i sin ɔn?
• ?Akunndan benin yɛ amun bu i Jɔlɛ Dilɛ Cɛn’n i wun ɔn?
[Foto, bue 29]
Sran kpanngban kpa’m be kpuli be tralɛ mun Bua Gbanflɛn’n i mmoja’n nun yɛ be fieli ɔ.
[Foto, bue 31]
?Ngue like yɛ e kunndɛ kɛ Ɲanmiɛn i sufuɛ nga bé wá cɛ́n’n be kle e ɔ?