?Ngue ti yɛ e o asiɛ’n su ɔ?

?NGUE TI YƐ Ɔ FATA KƐ E WUN KOSAN SƆ’N I BO Ɔ? Ninnge sunman bo sran’m be wla. Sanngɛ, kɛ sran kun o sa m’ɔ bu i kɛ ɔ o i liɛ sa ngbɛn’n, m’ɔ siman like nga ti yɛ ɔ o asiɛ’n su’n, i lifuɛ’n bo i wla dan ekun. Sanngɛ sran ng’ɔ si like kun sa jrɛiin mɔ i ti yɛ ɔ o mɛn nun’n, ɔ kwlɛ i awlɛn tra. Be flɛ dɔɔtrɔ bian kun kɛ Viktor Frankl. Ɔ o be nga Itilɛli blɛ su be kleli be ɲrɛnnɛn’n, be nun wie. Ɔ seli kɛ: “Kɛ n niɛn i sa’n, sɛ be su kle sran kun ɲrɛnnɛn naan ɔ leman like m’ɔ fɛ i wla gua su’n, ɔ kwlá trɛmɛn i awlɛn mlɔnmlɔn.”

Sanngɛ, like nga sran’n i wla o su mɔ i ti yɛ ɔ o asiɛ’n su’n i su akunndan nga sran’m be bu’n, ɔ ti fanunfanun. Sran wie’m be waan sran kun bɔbɔ i nguan’n ɔ o i sa nun. Be nga be se kɛ ninnge mun yɛ be kacili sran’n, be liɛ’n be waan ɔ leman like kun sa trele mɔ i ti yɛ e o asiɛ’n su ɔ.

?Kɛ mɔ Ɲanmiɛn Zoova yɛ ɔ yili e’n ti’n, nɛ́n i yɛ ɔ fata kɛ e usɛ i like nga ti yɛ e o asiɛ’n su wa’n niɔn? I lɛ nun’n, amun nian ndɛ nga Biblu’n kan’n.

Ndɛ nga Biblu’n kan’n

Biblu’n kle kɛ like kun ti yɛ Ɲanmiɛn yili sran ɔn. Ɔ seli Adam nin Ɛvu kɛ:

Bo Bolɛ 1:28. ‘An trɛ, an sɔn kpa, an yi asiɛ’n, an sie i. Jenvie’n nun jue mun nin anunman mɔ be tu sin nglo lɔ’n mun, ɔ nin nnɛn nga be wlan asiɛ’n su’n, amun sie be kwlakwla.’

Ɲanmiɛn waan Adam nin Ɛvu nin be mma’m be yo maan asiɛ wunmuan’n kaci lika klanman. W’a sunnzunman kɛ sran’m be yo oke naan be wu, annzɛ be saci lika’n. Sanngɛ, sa tɛ mɔ e nannan sɔ’m be yoli’n, i ti yɛ sa tɛ’n, ɔ nin wie’n be tɔli e su ɔ. (Bo Bolɛ 3:2-6; Rɔmfuɛ Mun 5:12) Kannzɛ ɔ ti sɔ bɔbɔ’n, Ɲanmiɛn i akunndan w’a kaciman. Ɔ ka kaan sa’n, asiɛ’n wá káci mɛn klanman.—Ezai 55:10, 11.

Kɛ Zoova boli e’n, ɔ mannin e wunmiɛn, ɔ nin ngwlɛlɛ naan y’a kwla yo i klun sa’n. W’a yiman e naan e bɔbɔ e sie e wun. Like nga Zoova klo kɛ e yo’n, Biblu’n nun ndɛ mma nga’m be yiyi nun.

Akunndanfuɛ’n 12:13. ‘E sie e su e tie ndɛ’n kwlaa ng’ɔ o lɛ’m be atabo’n: maan ɔ ɲin yi Ɲanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ ɔ.’

Mise 6:8. ‘Like nga i waan amun yo’n yɛle kɛ i waan nán an bu amun wiengu lufle, klun ufue su like’n yɛ amun yo ɔ, yɛ atin nga amun Ɲanmiɛn’n kle amun’n, amun fa su nin amun wun ase kanlɛ.’

Matie 22:37-39. ‘Klo ɔ Min Ɲanmiɛn’n kpa, fa ɔ wla’n kwlaa guɛ i su, maan ɔ akunndan’n kwlaa trɛn i su. I yɛ ɔ ti mmla klikli nin i nun dan’n niɔn. Yɛ i nɲɔn su m’ɔ fɛ’n yɛ ɔ o yɛ: Klo ɔ wiengu kɛ a fa klo ɔ bɔbɔ wun’n sa.’

Wafa nga Biblu’n tɛ kosan’m be su’n, ɔ maan e wla gua ase

Mannzin kwlaa nga i junman fa dilɛ ti kekle’n, sɛ be niɛnmɛn i sin fluwa’n su’n, ɔ kwlá yoman ye. I sɔ kunngba’n, sɛ y’a nianman e Yifuɛ’n i atin ng’ɔ kle e su’n, e su yoman kpa. Yɛle kɛ, e nin Ɲanmiɛn e su kwlá nantiman klanman. E su buman akunndan kpa, e nzuɛn su yoman kpa yɛ e bɔbɔ wunmuan’n, é fɛ́. Sɛ e si like nga Ɲanmiɛn kunndɛ kɛ e yo’n, e wla kwla gua ase. Amun e nian.

Like ng’ɔ ti sran sunman be cinnjin tra like ngba andɛ’n, yɛle aɲanbeun kunndɛlɛ. Sanngɛ Biblu’n waan: ‘Be nga be klo kɛ bé ɲán be wun’n, lakafuɛ’n láka be. Ninnge ngbɛnngbɛn mɔ be konvi sɔ be’n nin be ɲin m’ɔ blo ninnge tɛtɛ kpanngban m’ɔ saci sran’n, bé káci kɛ aya sa, bé tɔ́ nun ɔ́ trá be.’—1 Timote 6:9, 10.

Sanngɛ, be nga be klo Ɲanmiɛn tra sika’n be liɛ’n, like nga be ɲɛn i’n, ɔ ju be. (1 Timote 6:7, 8) Be si kɛ, ɔ fata kɛ be di junman kpa naan b’a ɲan be nuan nun like. (Efɛzfuɛ Mun 4:28) Sanngɛ kusu’n, be wla fiman afɔtuɛ nga Zezi mannin’n su mlɔnmlɔn. Ɔ seli kɛ: ‘Sran kun i min kwlá yoman nɲɔn, saan ɔ́ kpɔ́ kun yɛ ɔ kló kun, ɔ́ fɛ́ i wun mántan kun yɛ ɔ́ yó kun finfin. An kwlá yoman Ɲanmiɛn i sran naan amun kunngba’n amun a yo sika’n i klofuɛ.’—Matie 6:24.

Ɔ maan be nga be klo Ɲanmiɛn’n, be faman junman nga be di’n, annzɛ aɲanbeun ninnge kunndɛlɛ’n ciciman be ti. Ɲanmiɛn junman dilɛ’n yɛ ɔ ti be cinnjin ɔn. Afin, be si kɛ Ɲanmiɛn sokpɛmɛn i gbanflɛn difuɛ. I li bɔɔ Zoova tɛli i wun nda kɛ ɔ kwlá yoman sɔ.—Matie 6:25-33.

Be nin be wiengu be tranlɛ nun’n, sran sunman be bɔbɔ be wun akunndan yɛ be bu ɔ. ?Nɛ́n i sɔ’n ti yɛ andɛ fɔun nunman asiɛ’n su’n niɔn? Yɛle kɛ, sran’m be ‘bu be bɔbɔ be wun akunndan, be kloman sran.’ (2 Timote 3:2, 3) Sɛ be yo be sa kan wie’n, annzɛ be faman be ndɛ liɛ’n su’n, ‘awlɛn fufu’n, nin ya falɛ’n, nin ndɛnngan’n, nin sran wun sacilɛ’n, ɔ nin sran kpɔlɛ’n’ yɛ be si i yo ɔ. (Efɛzfuɛ Mun 4:31) I sɔ sran mɔ be siman be wun su nian mɔ be wla guaman ase’n, be “klɔklɔ utre.”—Nyanndra Mun 15:18.

Sanngɛ, be nga be nanti Ɲanmiɛn mmla ng’ɔ se kɛ sran’m be klo be wiengu kɛ be bɔbɔ sa’n su’n, be ‘yo be wun ye, be si be wun aunnvuɛ, sa nga be wiengu yo be’n, be yaci cɛ i.’ (Efɛzfuɛ Mun 4:32; Kolɔsfuɛ Mun 3:13) Kannzɛ be wiengu yo be tɛ’n, be mian be ɲin be sɔnnzɔn Zezi. Kɛ be kpɛli Zezi nzowa’n, ‘w’a yiman w’a manman be.’ (1 Piɛr 2:23) Kɛ Zezi sa’n, kannzɛ be wiengu’m be siman ye’n, sanngɛ be yo be kpa. Afin be si kɛ i sɔ yolɛ’n man aklunjuɛ. (Matie 20:25-28; Zan 13:14, 15; Sa Nga Be Yoli’n 20:35) Zoova fɛ i wawɛ’n man be nga be sɔnnzɔn i Wa’n, ɔ maan be wla gua ase.—Galasifuɛ Mun 5:22.

Sanngɛ sran’n i ɲrun lɔ’n i su akunndan nga ɔ bu ti’n, i wla kwla gua ase, annzɛ ɔ guaman ase. ?Wafa sɛ?