?Cɛn wie lele lika’n yó sɛ?
?NGUE TI YƐ Ɔ FATA KƐ E WUN KOSAN SƆ’N I BO Ɔ? Wafa nga sran kun bu i kɛ cɛn wie lele lika’n yó’n, i su yɛ ɔ nian nanti ɔ. I wie yɛle kɛ, be nga kɛ be bu be ɲrun lɔ’n i akunndan be wunman be wun fɛ’n, ajalɛ nga be fa’n yɛle kɛ: ‘Maan e di like e nɔn nzan, ainman é wú, nn e liɛ w’a wie.’ (1 Korɛntfuɛ Mun 15:32) Kɛ sran’m be fɛ i sɔ ajalɛ’n, be di aliɛ, be nɔn nzan tratra su. Be wla’n bo be wun, ɔ guaman ase.
Andɛ lika’n bɔn, nzue’n nin asiɛ’n bɔbɔ’n be kwlaa’n be sacilɛ nga b’a saci’n, e nin a wunmɛn i sɔ le. Bɔmbu m’ɔ kwla nunnun asiɛ’n wunmuan’n, ɔ nin kakawlonga’m be abɔlɛ’n ti’n, srɛ m’ɔ kun sran mun’n, ɔ kɔ i ɲrun. Tukpaciɛ’n o sran kpanngban kpa be su, yɛ yalɛ di be. Nanwlɛ, sɛ sran su yɛ e lafi’n, nn klenzua kplɔwa su yɛ e lafi ɔ. Sanngɛ ɔ nin i sɔ ngba’n, nán maan e wla bo e wun.
Sran fi simɛn i ɲrun lɔ sa. Sanngɛ Zoova liɛ’n, ɔ se kɛ: ‘N dun mmua m bo sa’m be su lele yɛ be ju ɔ. Sa nga be nin a juman’n, n dun mmua n kan be ndɛ lele.’ (Ezai 46:10) ?Zoova waan cɛn wie lele lika’n yó sɛ?
Ndɛ nga Biblu’n kan’n
Zoova su yaciman sran’m be lɛ naan be saci asiɛ’n mlɔnmlɔn. Biblu’n se kɛ Ɲanmiɛn wá ‘núnnún be nga be saci asiɛ’n.’ (Sa Nglo Yilɛ 11:18) Ɲanmiɛn Sielɛ’n i fanngan nun’n, ɔ́ wá núnnún klunwifuɛ mun, yɛ ɔ́ yó maan asiɛ’n yó kpa kɛ i bo bolɛ nun’n sa. (Bo Bolɛ 1:26-31; 2:8, 9; Matie 6:9, 10) Wafa nga cɛn wie lele lika’n nin sran’m bé yó’n, Biblu’n kan be ndɛ. Amun e nian.
Jue Mun 46:9, 10. ‘Amun bla be wa nian sa nga Anannganman yo’n, amun nian sa sroesroe ng’ɔ yo i asiɛ’n su’n. Kɛ ɔ fɛ i lele m’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie, w’a bubu ta’m be nun, w’a bubu cua’m be nun, w’a wɔ ɲrɛn’m be nun.’
Ezai 35:5, 6. ‘I blɛ sɔ nun’n aɲansifuɛ’m bé wún ase, sutrefuɛ’m bé tí sa. Blɛ sɔ nun’n, cɛcɛwafuɛ’m bé tú kpɛ́n kɛ flete mun sa. Yɛ aklunjuɛ’n ti bobofuɛ’m bé kpán. Afin nzue wá ɲrɛ́n aawlɛ flɛnnɛn’n nun, yɛ nzue ba’m bé wá sónji mɛn kee’n nun.’
Ezai 65:21, 22. ‘Sɛ min sran’m be kplan sua’n, bé trán be nun, sɛ be ta viɲi’n, bé dí i su mma. Be su kplanman sua be yaciman sran wie kɛ ɔ tran nun. Be su taman waka be yaci manman sran uflɛ kɛ ɔ di i su mma. Afin min nvle’n nunfuɛ’m bé cɛ́ cɛcɛcɛcɛ. Yɛ min sran kpa’m bé dí be bɔbɔ be sa nuan ninnge’m be su.’
Daniɛl 2:44. ‘Famiɛn sɔ’m be blɛ su’n, Ɲanmiɛn m’ɔ o nglo lɔ’n ɔ́ síe famiɛn diwlɛ kun m’ɔ su saciman le, yɛ mɛn uflɛ su siemɛn i le. Famiɛn diwlɛ sɔ’n ɔ́ núnnún famiɛn diwlɛ kun nga mun kpɛkun i bɔbɔ ɔ́ ká lɛ tititi.’
Zan 5:28, 29. ‘Cɛn wie lele be kwlaa nga be o ndia nun’n, bé tí Zezi i nɛn, yɛ bé fín ndia’n nun fite.’
Sa Nglo Yilɛ 21:3, 4. ‘I bɔbɔ yó be Ɲanmiɛn. Ɔ́ núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun, afin laa ninnge sɔ’m be su tranman lɛ kun.’
Wafa nga Biblu’n tɛ kosan’m be su’n, ɔ maan e wla gua ase
Kɛ e nian ndɛ nga Biblu’n kan be lɛ’n sa’n, ɔ kwla yo e kɛ laliɛ yɛ e su cɛn ɔn. Sanngɛ, nán maan ɔ yo e sɔ. Afin ndɛ sɔ’m be finman sran, Ɲanmiɛn yɛ ɔ kannin ɔn. Yɛ ‘Ɲanmiɛn buaman ato.’—Tit 1:2.
Sɛ e lafi Ɲanmiɛn su naan e nanti i mmla’m be su’n, kannzɛ lika’n yó kekle e su sɛ’n, e wla kwla gua ase. Maan ɔ yo alɛ annzɛ yalɛ dilɛ annzɛ tukpaciɛ annzɛ kpɛnngbɛn yolɛ’n annzɛ wie’n bɔbɔ’n, be su boman e wla dan. ?Ngue ti ɔ? Afin e si kɛ Ɲanmiɛn Sielɛ’n wá yó maan ninnge sɔ’m be wie fi su tranman lɛ kun.
?Wafa sɛ yɛ é yó naan e wla w’a tran i sɔ ninnge’m be su ɔ? Ɔ fata kɛ e “kaci mlɔnmlɔn” naan e ‘wun Ɲanmiɛn i klun sa’n i wlɛ, yɛ e si sa ng’ɔ ti kpa, m’ɔ jɔ i klun, mɔ maan é yó kpa’n.’ (Rɔmfuɛ Mun 12:2) Sanngɛ atrɛkpa’n, amun kunndɛ kɛ amún láfi Ɲanmiɛn su kpa ekun. Sɛ i sɔ yɛ amun kunndɛ’n, ɔ ti kpa. Afin like uflɛ nunman lɛ mɔ sɛ amun yo ɔ, amun wla kwla gua ase ɔ.
[Foto mun, bue 7, 8]
?Ɲanmiɛn Ndɛ’n se kɛ cɛn wie lele lika’n yó sɛ?