Maan sa’n kwlaa nun e kunndɛ Zoova i atin’n
‘Anannganman ti e Ɲanmiɛn tititi. I yɛ ɔ dun mmua e ɲrun mlɔnmlɔnmlɔn ɔn.’—JUE. 48:15.
1, 2. ?Ngue ti yɛ ɔ fataman kɛ e lafi e bɔbɔ e ngwlɛlɛ liɛ’n su, naan sanngɛ Zoova i atin’n su yɛ ɔ fata kɛ e fa’n niɔn? ?Ɔ maan, kosan benin yɛ ɔ fata kɛ e wun be bo ɔ?
NINNGE finfin’m be kwla laka e fa e ti bo mankun nzue nun. (Nya. 12:11) Sɛ e waan saan fii é yó like nga ɔ nin Klistfuɛ fataman’n, é láka e wun. (Zer. 17:5, 9) Ɔ maan, jue tofuɛ m’ɔ wun sa wlɛ’n, ɔ srɛli Zoova kɛ: ‘Fa ɔ kannin’n blɛ min yɛ fa ɔ nanwlɛ’n wla min nun. Maan ɔ kannin sɔ’n nin ɔ nanwlɛ’n be kle min atin naan n wɔ ɔ oka’n su lɔ, naan n wɔ kan a tran lɔ’n.’ (Jue. 43:3) Jue tofuɛ’n w’a lafimɛn i bɔbɔ i ngwlɛlɛ m’ɔ juman lika fi’n i su, sanngɛ Zoova su yɛ ɔ lafili ɔ. Afin, sran fi kwlá klemɛn i atin kpa traman Zoova. Kɛ jue tofuɛ’n sa, ɔ flunman kɛ Ɲanmiɛn i atin’n yɛ e kunndɛ ɔ.
2 ?Sanngɛ, ngue ti yɛ ɔ fata kɛ e lafi su kɛ Zoova i atin’n, yɛ ɔ ti atin kpafuɛ’n niɔn? ?Yɛ blɛ benin nun yɛ ɔ fata kɛ e kunndɛ atin sɔ’n niɔn? ?Kpɛkun, ngue yɛ ɔ fata kɛ e yo naan y’a kwla fa atin sɔ’n su ɔ? ?Yɛ wafa sɛ yɛ Zoova kle e atin andɛ ɔ? Kosan cinnjin sɔ mun yɛ é wá tɛ́ be su ɔ.
Like nga ti yɛ e lafi su kɛ Zoova i atin’n yɛ ɔ ti kpa’n
3-5. ?Ngue ti yɛ e kwla lafi su kpa kɛ atin’n i kpafuɛ’n yɛ Zoova kle e ɔ?
3 Zoova ti e Si. (1 Kor. 8:6) Ɔ si e kwlaa e kpa. Ɔ kwla nian lele ju e awlɛn’n nun lɔ. (1 Sam. 16:7; Nya. 21:2) I sɔ’n i ndɛ yɛ Famiɛn Davidi kan kleli Ɲanmiɛn ɔn. Ɔ seli kɛ: ‘Sɛ ń trán ase o, sɛ ń jáso o, a si. A si akunndan nga ń wá bú’n. Sɛ ndɛ yɛ ń wá kán m’ɔ nin a fiteman min nuan bɔbɔ’n, a si i kwlakwla’n lalaa.’ (Jue. 139:2, 4) ?Sɛ Zoova si e kpa’n, like ng’ɔ ti kpa man e’n yɛ ɔ su simɛn i ɔ? Asa ekun’n, ngwlɛlɛ’n i bo’n fin Zoova. Ɔ wun like’n kwlaa. I akunndan’n tra klɔ sran’m be liɛ’n lele. Kpɛkun, kɛ sa kun bó i bo’n, ɔ si i agualiɛ’n. (Eza. 46:9-11; Rɔm. 11:33) Ɔ maan, ‘ngwlɛlɛfuɛ fi nunmɛn i sin.’—Rɔm. 16:27.
4 Asa kusu’n, Zoova klo e. Like’n i kpafuɛ’n yɛ ɔ kunndɛ kɛ e ɲɛn i ɔ. (Zan 3:16; 1 Zan 4:8) I sa’n timan tankaan e lika. Zezi i sɔnnzɔnfuɛ Zaki seli kɛ: ‘Like kpa kwlaa nga be fa man sran’n, ɔ nin like kpa kwlaa nga be ɲɛn i’n, be fin e Si m’ɔ o nglo lɔ m’ɔ yili anglo’n, nin nzraama, ɔ nin wia’n mɔ be kpaja’n.’ (Zak 1:17) Be nga be lo be wun naan Ɲanmiɛn kle be atin’n, Ɲanmiɛn yo be ye lele tratra su.
5 Like kasiɛn nga é yíyí nun’n yɛle kɛ Zoova kwla like kwlaa yo. Jue tofuɛ’n kɛnnin i sɔ liɛ’n i ndɛ. Ɔ seli kɛ: ‘Sran ng’ɔ ko fia Ɲanmiɛn mɔ like fi nunmɛn i sin’n i sin’n, nn w’a tran Ɲanmiɛn m’ɔ kwla like kwlaa yo’n i fɔnvɔ’n nun. Ɔ fata kɛ sran sɔ’n se Anannganman kɛ: “A ti min fiawlɛ, a ti min fiawlɛ sua, a ti min Ɲanmiɛn, ɔ su yɛ n fa n wla’n n gua ɔ!”’ (Jue. 91:1, 2) Sɛ e nanti atin nga Zoova kle e’n su’n, nn atin’n i kpafuɛ’n yɛ y’a fa su ɔ. Afin Ɲanmiɛn kwlá fɔnman mlɔnmlɔn. Kɛ be tanndan e ɲrun bɔbɔ’n, Zoova suan e bo. Ɔ sokpaman e le. (Jue. 71:4, 5; an kanngan Nyanndra Mun 3:19-26 nun.) Nanwlɛ, Zoova si like ng’ɔ ti kpa man e’n. I sɔ like’n yɛ ɔ kunndɛ kɛ e ɲɛn i ɔ. Ɔ kwla fa man e kusu. Nanwlɛ, sɛ e kunndɛman kɛ Zoova bo e ɲrun atin’n, nn y’a di sinnzin! ?Sanngɛ, blɛ benin nun yɛ ɔ fata kɛ Ɲanmiɛn kle e atin ɔn?
?Blɛ benin nun yɛ ɔ fata kɛ be kle e atin ɔn?
6, 7. ?Blɛ benin nun yɛ ɔ fata kɛ Zoova kle e atin ɔn?
6 Nanwlɛ, kɛ ɔ fɛ i e bakan nun lele mɔ é fá yó oke’n, ɔ fata kɛ Zoova kle e atin. Jue tofuɛ’n seli kɛ: ‘Anannganman ti e Ɲanmiɛn tititi. I yɛ ɔ dun mmua e ɲrun mlɔnmlɔnmlɔn ɔn.’ (Jue. 48:15) Kɛ jue tofuɛ’n sa’n, Klistfuɛ ngwlɛlɛfuɛ’m be lo be wun man Ɲanmiɛn titi.
7 Ɔ ju blɛ wie’n, e sa mian ukalɛ wun kekle kpa. Atrɛkpa’n, ‘e wo ɲrɛnnɛn nun,’ afin be kle e yalɛ annzɛ tukpacɛ tɛ wie o e wun. Annzɛ kusu’n, b’a tu e junman nun. (Jue. 69:17, 18) I sɔ blɛ nun’n, kɛ e kpɛ e ɲin Zoova wun lɔ’n, e wla gua ase. Afin, e lafi su kɛ ɔ́ wlá e fanngan naan y’a kwla tra e awlɛn. Kpɛkun, e lafi su kɛ ɔ́ klé e atin naan y’a fa ajalɛ kpa. (An kanngan Jue Mun 102:18 nun.) Kɛ é bó jasin fɛ’n klé e mantanfuɛ’m, i lɛ nun kusu’n, saan Zoova yɛ ɔ́ úka naan ndɛ’n w’a wluwlu be wun ɔn. E ɲin su yiyilɛ nun o annzɛ e wun wlawlalɛ nun o, ɔ fata kɛ e fa ajalɛ kpa. Janvuɛ tralɛ’n, junman kunndɛlɛ’n, suklu kɔlɛ nin like uflɛ wie mun ekun be o lɛ. I kwlaa ngalɛ nun’n, sɛ e fa Zoova i atin liɛ’n su’n, é fá ajalɛ kpa. I kpa bɔbɔ’n, like kwlaa nga é yó’n, sɛ b’a kleman e atin’n, ɔ su yoman ye.
Sɛ e kunndɛman Ɲanmiɛn i atin’n, i sɔ’n ti tɛ
8. ?Kɛ Ɛvu dili waka mma mɔ Ɲanmiɛn seli i kɛ nán ɔ di’n, i sɔ’n kle sɛ?
8 Nán é wla fi su kɛ, Ɲanmiɛn su mianman e kɛ é fɛ́ i atin liɛ’n su kekle nun. E bɔbɔ yɛ é fá su ɔ. Ɛvu yɛ ɔ ti sran klikli mɔ i ɲinfu w’a faman atin nga Zoova kleli i’n su’n niɔn. Ɛvu i ndɛ’n kle kɛ i sɔ ajalɛ ti tɛ kpa. Maan e bu i sin e nian. Ɛvu dili waka mma nga Ɲanmiɛn seli i kɛ nán ɔ di’n, afin ɔ kunndɛ kɛ ‘ɔ́ yó kɛ Ɲanmiɛn bɔbɔ sa, ɔ́ sí sa kpa’n nin sa tɛ’n.’ (Bob. 3:5) ?Ɔ maan, ngue ti yɛ ɔ́ fá Zoova i atin’n liɛ’n su ɔ? I sɔ m’ɔ yoli’n kle kɛ ɔ nin Zoova m’ɔ sie like kwlaa’n, be nunman nun kun. Adam m’ɔ ti i wun’n, i kusu yoli ɲin kekle Ɲanmiɛn su wie.—Rɔm. 5:12.
9. ?Sɛ e faman Zoova i mmla’m be su’n, ngue yɛ e kle ɔ? ?Yɛ ngue ti yɛ i sɔ’n timan ngwlɛlɛfuɛ aeliɛ ɔ?
9 Andɛ kusu’n, sɛ e faman atin nga Zoova kle e’n su’n, nn e su kle kɛ ɔ timan e liɛ su kɛ ɔ sie like kwlaa. Maan e fa sran kun mɔ bla nin bian nna nga be fa fite nzra nun’n yɛ ɔ niɛn i titi’n, i su sunnzun ase. Sɛ ɔ ti Klistfuɛ’n, nn i sɔ like’n i su mmla nga Zoova mannin’n, ɔ si i. Yɛle kɛ, ɔ fataman kɛ be ti sa tɛtɛ yolɛ ndɛ e nuan nun naan se kɛ i sɔ ninnge be nianlɛ’n yɛ ɔ́ yó e fɛ ɔ (Efɛ. 5:3) Sran sɔ m’ɔ kpalo Zoova i mmla mun’n, nán Zoova m’ɔ sie like kwlaa’n yɛ ɔ sie i ɔ. (1 Kor. 11:3) I sɔfuɛ’n timan ngwlɛlɛfuɛ mlɔnmlɔn. Afin, Zeremi seli kɛ: ‘Ajalɛ nga sran tu’n, ɔ finmɛn i.’—Zer. 10:23.
10. ?Kannzɛ e kwla fa e klunklo ajalɛ’n, ngue ti yɛ e su yoman finfin ɔn?
10 Sran wie’m be kwla si ndɛ nga Zeremi kannin’n i su akplowa. Afin be waan: ‘?Sɛ Ɲanmiɛn yili e kɛ ɔ fa e klunklo ajalɛ’n, ngue ti yɛ ɔ́ fá e wun ya ekun ɔn?’ Sanngɛ, atin sɔ mɔ Ɲanmiɛn mannin e’n, ɔ le i nuan su like m’ɔ fata kɛ e yo ɔ. Ɔ maan, ndɛ ng’ɔ fin e nuan fite’n, ɔ nin ninnge nga e yo be’n, Ɲanmiɛn wá úsa e be su sa. (Rɔm. 14:10) Zezi seli kɛ: ‘Ndɛ kwlaa ng’ɔ o sran awlɛn’n nun’n yɛ ɔ fite i nuan ɔn.’ Ɔ seli ekun kɛ: ‘Akunndan tɛ’n, nin sran kunlɛ’n, nin bla nin bian be yi annzɛ be wun i bo kunndɛlɛ’n, nin bla nin bian kunndɛlɛ’n, nin awie’n, nin be wiengu suɛn tɔnlɛ’n, ɔ nin sran wun ndɛ kanlɛ’n, i kwlaa sɔ’n wo sran i awlɛn’n nun.’ (Mat. 12:34; 15:19) Ɔ maan, like ng’ɔ o sran i klun m’ɔ yi i nglo’n i nzuɛn nun’n, yɛ e kwla fa si i kpa sakpa ɔ. I sɔ’n ti yɛ Klistfuɛ m’ɔ si ngwlɛlɛ’n, like kwlaa ng’ɔ́ yó’n, ɔ kunndɛ Zoova i atin’n niɔn. Kɛ ɔ yo sɔ’n, sran sɔ’n “ti sɛsɛsɛ” Zoova ɲrun. I sɔ’n ti’n, Zoova ‘yó i kpa.’—Jue. 125:4.
11. ?Afɔtuɛ benin yɛ Izraɛlifuɛ’m be su ndɛ’n ɔ man e ɔ?
11 Maan e wla kpɛn Izraɛlifuɛ’m be su. Blɛ nga Izraɛlifuɛ’m be fali ajalɛ kpa’n, be nantili Zoova i mmla’m be su’n, yɛ Zoova sasali be. (Zoz. 24:15, 21, 31) Sanngɛ, kpɛ sunman b’a faman ajalɛ kpa. Zeremi blɛ su’n, kɛ Zoova kán be ndɛ’n, ɔ seli kɛ: ‘B’a sieman be su naan se kɛ tielɛ yɛ bé tíe ɔ. Be klunklo akunndan liɛ’n su yɛ be fali ɔ. Be nzuɛn tɛ akunndan mɔ be kaci i ɔ ɔ kaciman’n i su yɛ be fali ɔ. B’a ɔman be ɲrun, be sin yɛ be ɔli ɔ.’ (Zer. 7:24-26) ?Nán ɲrɛnnɛn yɛle ngalɛ’n? Nanwlɛ, nán maan ninnge nga e konvi sɔ be’n be ti’n, e kaci e sin e si atin nga Zoova kle e’n, naan e yo e bɔbɔ e klunklo ninnge mun. Sɛ ɔ timɛn i ti’n, ‘e su kɔman e ɲrun, e sin yɛ é kɔ́ ɔ!’
?Ngue yɛ ɔ fata kɛ e yo naan y’a fa Ɲanmiɛn i atin’n su ɔ?
12, 13. (a) ?Ngue yɛ ɔ fata kɛ e yo naan y’a kwla fa Zoova i atin’n su ɔ? (b) ?Ngue ti yɛ ɔ fata kɛ e lafi Ɲanmiɛn su ɔ?
12 Sɛ e klo Zoova’n, é nánti i mmla’m be su. (1 Zan 5:3) Sanngɛ, Pɔlu kannin like kun ekun m’ɔ ti cinnjin’n i ndɛ. Ɔ seli kɛ: ‘E wunmɛn i, sanngɛ i su mɔ e lafi’n ti’n, e kɔ e ɲrun.’ (2 Kor. 5:6, 7) ?Ngue ti yɛ ɔ fata kɛ e lafi Ɲanmiɛn su ɔ? Yɛle kɛ, Zoova ‘fa e sin atin kpa’n nun.’ Sanngɛ atin sɔ’n faman e kɔman mɛn’n nga nun aɲanbeun ninnge nin dunman kunndɛlɛ’n be sin. (Jue. 23:3) I sɔ’n ti’n, Zoova sulɛ’n nun’n, ninnge kpakpa nga e kwla ɲan be’n, be su yɛ ɔ fata kɛ e fa e ɲin sie ɔ. (An kanngan 2 Korɛntfuɛ Mun 4:17, 18 nun.) Yɛ kɛ mɔ e lafi Ɲanmiɛn su’n, like kan nga e ɲɛn i’n, ɔ ju e.—1 Tim. 6:8.
13 Zezi seli kɛ sɛ e waan é sú Ɲanmiɛn kpa’n, ɔ fata kɛ e klɛn e wun. Sɛ e waan e klɛn e wun kusu’n, ɔ fata kɛ e lafi Ɲanmiɛn su. (Lik 9:23, 24) Ɲanmiɛn i sufuɛ nanwlɛfuɛ wie’m be klɛnnin be wun kpa. I ti’n, be dili yalɛ, sran’m be mianmiannin be kpa, be buli be fɔ. Kɛ mɔ be kloman be’n ti’n, be yoli be tɛ (2 Kor. 11:23-27; Ngl. 3:8-10) Saan Ɲanmiɛn su mɔ be lafili tankaan’n, yɛ maan be kwla trali be awlɛn yɛ be klun jɔli ɔ. (Zak 1:2, 3) Sɛ e fa e wla gua Zoova su kpa’n, é láfi su kɛ blɛ kwlaa nun’n, i atin’n su falɛ’n yɛ ɔ ti ajalɛ kpafuɛ’n niɔn. Kpɛkun, i sɔ liɛ’n i bo’n gúa kpa mán e tititi. E si weiin kpa kɛ, sɛ e fɛ kan naan e tra e awlɛn’n, mmlusuɛ nga é ɲɛ́n i’n, ɔ ti kpa lelele.—Ebr. 11:6.
14. ?Ngue ti yɛ ɔ fata kɛ Agali kɛn i wun ase ɔ?
14 Ɔ fata kɛ e kan e wun ase kusu naan y’a nanti atin nga Zoova kle e’n su. E wun i sɔ liɛ’n Agali m’ɔ ti Sara i afanniɛn bla’n i nantilɛ’n nun. Kɛ Sara wunnin kɛ ɔ wuman ba’n, ɔ fali Agali mannin Abraamu kɛ be wu ba. I sin’n, Agali yoli i min bla’n i finfin. I sɔ’n ti’n Sara ‘yoli Agali i tɛtɛ lele’ Agali wanndili. I sin ekun’n, Zoova i anzi kun ko toli Agali naan w’a se i kɛ: “Sa ɔ sin kɔ ɔ min bla’n i sin naan kan ɔ wun ase i bo.” (Bob. 16:2, 6, 8, 9) Atrɛkpa anzi i ndɛ sɔ’n w’a yoman Agali fɛ. Ɔ maan sɛ i waan ɔ fa anzi’n i ndɛ’n su’n, ɔ fata kɛ ɔ kɛn i wun ase. Agali kusu kɛnnin i wun ase. Ɔ maan, ɔ wuli i wa Ismaɛli Abraamu i awlo lɔ.
15. An kan sa wie mɔ kɛ be tɔ’n, ɔ fata kɛ e kan e wun ase naan y’a nanti Zoova i atin’n su’n, be ndɛ.
15 Ɔ fata kɛ e kusu e kan e wun se naan y’a nanti atin nga Zoova kle e’n su. Be ɲin su yiyilɛ wie o lɛ’n, sran wie’m be klo i, sanngɛ nn Zoova klomɛn i sɔ like’n. Wienun ɔn, Klistfuɛ kun w’a lo sran kun i ngasi yɛ ɔ fata kɛ ɔ kpɛtɛ i. Annzɛ kusu, ɔ fɔnnin yɛ ɔ fata kɛ ɔ di i sɔ liɛ’n i nanwlɛ. ?Yɛ sɛ sran kun yo sa tɛtɛ nin? I lɛ nun’n, ɔ fata kɛ ɔ kɛn i wun ase naan ɔ kan sa tɛ ng’ɔ yoli’n kle asɔnun kpɛnngbɛn mun. Sran nga be tuli i asɔnun’n nun kusu’n, ɔ fata kɛ ɔ di sa tɛ ng’ɔ yoli’n i nanwlɛ naan ɔ wlɛ i ase. I liɛ’n, bé kwlá sɔ́ i nun asɔnun’n nun ekun. Kɛ sa kɛ ngalɛ’n sa ɔ nin uflɛ wie mun ekun be tɔ’n, ndɛ ng’ɔ o Nyanndra Mun 29:23 nun’n, ɔ uka e. Ndɛ sɔ’n yɛ: ‘Wun tulɛ’n ɔ gua be ɲin ase. Sanngɛ sran ng’ɔ kɛn i wun ase’n ɔ ɲan ɲrun.’
?Wafa sɛ yɛ Zoova kle e atin’n niɔn?
16, 17. ?Wafa sɛ yɛ é yó naan Biblu’n mɔ i nun yɛ e kwla wun Ɲanmiɛn i atin’n, w’a yo e ye sakpa ɔ?
16 Biblu’n m’ɔ ti Ɲanmiɛn nuan ndɛ’n, i nun yɛ e kwla wun Ɲanmiɛn i atin’n niɔn. (An kanngan 2 Timote 3:16, 17 nun.) Kɛ ɔ ko yo naan Ɲanmiɛn Ndɛ’n w’a yo e ye sakpa’n, nán e minndɛ kɛ sa tɔ kwlaa naan y’a kunndɛ i nun ndɛ m’ɔ kwla uka e’n. Sanngɛ, ɔ fata kɛ e fa Biblu’n nun kannganlɛ cɛn kwlaa’n kaci e nzuɛn. (Jue. 1:1-3) Sɛ e yo sɔ’n, é sí Biblu’n nun ndɛ’n kpa. Ɔ maan, akunndan nga Ɲanmiɛn bu’n i wie yɛ é bú ɔ. Kpɛkun, sɛ sa fu e nun bɔbɔ’n, é kwlá jrán kekle.
17 Ɔ ti cinnjin kusu kɛ e bu like nga e kɛnngɛn i Ɲanmiɛn Ndɛ’n nun’n i su akunndan, naan e koko i su yalɛ e kle Ɲanmiɛn. Yɛ e kunndɛ wafa nga be kwla uka e sa fanunfanun be nun’n. (1 Tim. 4:15) Kɛ sa kekleekle be tɔ e su’n, e srɛ Zoova kɛ ɔ kle e atin. Zoova i wawɛ’n yó maan é wlá kpɛ́n i mmla wie mɔ e kanngannin be Biblu’n annzɛ i akua wie’m be nun’n, be su.—An kanngan Jue Mun 25:4, 5 nun.
18. ?Wafa sɛ yɛ Zoova maan e niaan’m be kle e atin ɔn?
18 E niaan Klistfuɛ’m be kusu be kwla kle e Zoova i atin’n. ‘Sran kpa nanwlɛfuɛ m’ɔ si ngwlɛlɛ’n,’ ɔ nin E ɲrun dinfuɛ’m be anuannzɛ m’ɔ ti i janunfuɛ’n be ti e sran nanndoliɛ. Sran akpasua sɔ’n yɛ ɔ kle e Ɲanmiɛn Ndɛ’n nun like kɛ aliɛ mɔ e di i titi sa’n niɔn. Yɛle kɛ ɔ yi fluwa mun, kpɛkun ɔ siesie asɔnun aɲia mun nin aɲia dandan mun man e. (Mat. 24:45-47; an fa sunnzun Sa Nga Be Yoli’n 15:6, 22-31.) Asa ekun’n, e niaan Klistfuɛ wie’m be ɲin w’a tin kpa Ɲanmiɛn sulɛ nun. Ɔ maan be bɔbɔ be kwla uka e, kpɛkun be kwla fa Biblu’n be man e afɔtuɛ. I li be nga be sa w’a tɔ i sɔ yolɛ’n nun kpa’n, yɛle asɔnun kpɛnngbɛn mun. (Eza. 32:1) Gbanflɛn nin talua mun be le sran mɔ be uka be kpa ɔ. Yɛle be si nin be mɔ be ti Klistfuɛ mɔ Ɲanmiɛn sieli be kɛ be nian be su’n. Sɛ ba’m be waan bé yó like’n, ɔ fata kɛ be usa be ngwlɛlɛ afɛ.—Efɛ. 6:1-3.
19. ?Sɛ y’a yaciman Zoova i atin’n i kunndɛlɛ’n, ye benin yɛ é dí ɔ?
19 Nanwlɛ, wafa nga Zoova kle e atin ti fanunfanun. Ɔ maan, ɔ fata kɛ e mian e ɲin e nanti atin sɔ m’ɔ kle e’n su naan y’a ɲan su mmlusuɛ. Kɛ Famiɛn Davidi kán blɛ kun mɔ Izraɛlifuɛ’m be nantili seiin’n i ndɛ’n, ɔ seli kɛ: ‘Ɔ su yɛ e nannan’m be fa be wla’n be guali ɔ. Be fa guali ɔ su yɛ a deli be. Be kpan flɛli wɔ yɛ a deli be. Be fali be wla’n guali ɔ su yɛ be ɲin w’a guaman ase mlɔnmlɔn.’ (Jue. 22:3-5) Sɛ e kusu e lafi su kɛ atin nga Zoova kle e’n ti kpa naan e fa su’n, ‘e ɲin su guaman ase mlɔnmlɔn.’ Like nga e wla o su’n, é ɲɛ́n i. Ɔ maan, nán e lafi e bɔbɔ e ngwlɛlɛ liɛ’n su. Sanngɛ maan e ‘fa e wun sa’n kwlaa wla Anannganman sa nun’n.’ I liɛ’n, andɛ bɔbɔ’n, é dí ye. (Jue. 37:5) Yɛ sɛ e yo sɔ titi’n, é dí ye tititi. Famiɛn Davidi seli kɛ: ‘Anannganman klo kɛ be yo like mun sɛsɛsɛ. Ɔ yimɛn i sufuɛ mɔ be ti nanwlɛfuɛ’m be ase. Ɔ nian be su tititi. Mɛn’n ɔ́ yó sran kpa’m be liɛ. Bé trán nun tititi.’—Jue. 37:28, 29.
?Amun kwla yiyi nun?
• ?Ngue ti yɛ e lafi su kɛ Zoova kle e atin kpa ɔ?
• ?Kɛ e faman atin nga Zoova kle e’n su’n, i sɔ’n kle sɛ?
• ?Sa benin nun yɛ ɔ fata kɛ Klistfuɛ’n kɛn i wun ase ɔ?
• ?Wafa sɛ yɛ Zoova kle e atin’n andɛ ɔ?
[Foto, bue 16]
?Sa’n kwlaa nun e kunndɛ Zoova i atin’n?