Sran’n i wafa ng’ɔ fata kɛ e mian e ɲin e kaci’n

‘Mian ɔ ɲin yo sa ng’ɔ ti kpa’n, fa ɔ wun mantan Ɲanmiɛn, lafi i su, klo Ɲanmiɛn nin sran, tra wɔ awlɛn, yɛ yo wɛtɛɛfuɛ.’—1 TIM. 6:11.

1. ?Ninnge benin mun yɛ sran’m be ɲin o su ɔ?

?NINNGE benin mun yɛ sran’m be ɲin o su andɛ ɔ? Biblu’n kan kɛ ninnge finfin mun yɛ sran’m be kunndɛ ɔ. Wie’m be “yo sika klofuɛ.” Afin be bu i kɛ aɲanbeun’n maan bé dí aklunjuɛ. Wie’m be kusu “be klo mɛn dilɛ’n.” Be ɲin su yiyilɛ’n nin mɛn dilɛ’n yɛ be fa cici be ti ɔ. (2 Tim. 3:2, 4) Sanngɛ, wafa nga be mian be ɲin be yo i sɔ ninnge mun’n, ‘ɔ ti kɛ sran kun waan ɔ́ fúan aunmuan’n naan ɔ́ kó trɛ́ i sa.’—Aku. 1:14.

2. (a) ?Ngue like yɛ Ɲanmiɛn kunndɛ kɛ Klistfuɛ wie’m be fa be ɲin sie su ɔ? (b) ?Ngue like yɛ Ɲanmiɛn fá mán Klistfuɛ’m be nun dan lika ɔ?

² Akoto Pɔlu klɛli ndɛ kun. I waan: ‘M mian min ɲin naan ń jú juwlɛ nga be sieli’n nun naan ń ɲán like nga Ɲanmiɛn flɛ e kɛ é ɲɛ́n i ɲanmiɛn su lɔ’n sran wunmuan mɔ e nin Zezi Klist y’a yo’n ti.’ (Fil. 3:14) Klistfuɛ’m be kusu be kwla mian be ɲin be yo sɔ wie. Biblu’n waan sran 144.000 yɛ bé kɔ́ ɲanmiɛn su ɔ. Pɔlu o be nun wie. Be nin Zezi bé dí famiɛn afuɛ akpi, yɛ bé síe be nga bé trán asiɛ’n su wa’n. ?I sɔ like mɔ Ɲanmiɛn flɛli be kɛ be fa be ɲin sie su’n, e wunman kɛ ɔ ti kpa dan’n? Klistfuɛ kpa’m be nun dan lika be liɛ’n, like uflɛ yɛ be ɲin o su ɔ. Like nga Adam nin Ɛvu b’a ɲɛnmɛn i’n, yɛ Ɲanmiɛn fá mán be ɔ. Yɛle kɛ bé yó juejue, yɛ bé ɲán anannganman nguan asiɛ’n su wa.—Ngl. 7:4, 9; 21:1-4.

3. ?Ngue yɛ é yó naan y’a kle kɛ e si Ɲanmiɛn i aklunye’n i su ye ɔ?

³ Klɔ sran mɔ fɔ o be nun’n, be bɔbɔ be ngunmin be kwlá mianman be ɲin naan b’a yo sa ng’ɔ ti kpa’n, naan b’a ɲan anannganman nguan. (Eza. 64:5) Saan kɛ bé láfi Zezi Klist su. Afin i yɛ Ɲanmiɛn sieli i, ɔ maan i dunman nun e kwla fite nun ɔn. ?Ngue yɛ é yó naan y’a kle kɛ aklunye dan sɔ mɔ Ɲanmiɛn sili e’n, e si su ye ɔ? Like mɔ e kwla yo’n, i kun yɛle Ɲanmiɛn i mmla nga i su falɛ. I waan: ‘Mian ɔ ɲin yo sa ng’ɔ ti kpa’n, fa ɔ wun mantan Ɲanmiɛn, lafi i su, klo Ɲanmiɛn nin sran, tra wɔ awlɛn, yɛ yo wɛtɛɛfuɛ.’ (1 Tim. 6:11) Ninnge sɔ m’ɔ fata kɛ e yo’n, sɛ e yiyi nun kpa naan e wun i wlɛ’n, ɔ kwla uka e kpa naan e “yo i sɔ tra laa’n.”—1 Tɛs. 4:1.

‘Mian ɔ ɲin yo sa ng’ɔ ti kpa’n’

4. ?Ngue ti yɛ e si kɛ “sa ng’ɔ ti kpa’n” i yolɛ’n ti cinnjin ɔn? ?Yɛ ngue yɛ ɔ fata kɛ e dun mmua yo naan y’a kwla yo sa kpa’n niɔn?

⁴ Sran i wafa ng’ɔ fata kɛ e mian e ɲin e yo’n, Pɔlu kɛnnin i ndɛ fluwa nɲɔn ng’ɔ klɛli ko mannin Timote’n be nun. I kpɛ nɲɔn sɔ’n, ndɛ ng’ɔ dun mmua kannin’n yɛle kɛ Timote miɛn i ɲin yo “sa ng’ɔ ti kpa’n.” (1 Tim. 6:11; 2 Tim. 2:22) Asa ekun’n, Biblu’n i lika wie’m be wla e fanngan trilili kɛ e yo sa ng’ɔ ti kpa’n. (Nya. 15:9; 21:21; Eza. 51:1) Like nga e fa bo i sɔ yolɛ’n i bo’n, yɛle kɛ maan e ‘si Zoova mɔ i kunngba cɛ yɛ ɔ ti Ɲanmiɛn’n nin Zezi Klist m’ɔ sunmɛnnin i’n.’ (Zan 17:3) Sran ng’ɔ miɛn i ɲin yo sa ng’ɔ ti kpa’n, ɔ́ káci i nzuɛn’n, yɛ ɔ́ ‘sɛ́ i sin Ɲanmiɛn wun’ naan w’a yo i klun sa.—Yol. 3:19.

5. ?Ngue yɛ ɔ fata kɛ e yo naan Ɲanmiɛn ɲrun’n, y’a yo sran kpa, naan y’a ka sɔ titi ɔ?

⁵ Sran akpinngbin mɔ be klo sa kpa yolɛ’n, be fali be wun mannin Ɲanmiɛn yɛ be yoli be batɛmu. Sɛ b’a yo e batɛmu’n, ɔ fata kɛ e aeliɛ’n kle kɛ e klo sa kpa yolɛ. Atrɛkpa’n i sɔ yɛ e yo ɔ. Like ng’ɔ kwla kle kɛ e yo sɔ’n, i kun yɛle kɛ sɛ é fá ajalɛ wie’n, ɔ fata kɛ e wun ‘sa ng’ɔ ti kpa’n nin tɛ’n be ngbaciɛ’n,’ i wlɛ. (An kanngan Ebre Mun 5:14 nun.) ?Ɔ maan, sɛ y’a ju bla annzɛ bian jalɛ’n, e tali e wun nda kɛ nán sran mɔ be nin a yomɛn i batɛmu’n yɛ é kúnndɛ ɔ? Sɛ e klo sa kpa yolɛ’n, saan i sɔ yɛ é yó ɔ.—1 Kor. 7:39.

6. ?Wafa sɛ yɛ be yi i nglo kɛ be yo sa kpa ɔ?

⁶ Sa kpa yolɛ’n, nɛ́n i kunngba’n yɛle ‘be wun sran kpa bulɛ’n.’ (Aku. 7:16) Zezi seli e kɛ sa kpa mɔ Ɲanmiɛn sulɛ’n ti yɛ e yo’n, nán e yo i sran’m be ti. (Mat. 6:1) Sa kpa yolɛ’n, i bo’n fin be awlɛn’n nun. Ɔ maan e kaci e akunndan tɛ’n nin e aeliɛ tɛ’n. Sɛ i sɔ yɛ e yo i titi’n, atrɛkpa’n e su yoman sa tɛ. (An kanngan Nyanndra Mun 4:23 nun; an fa sunnzun Zak 1:14, 15.) Asa ekun’n, Zoova kló e sa, yɛ ɔ́ úka e naan e nzuɛn’n w’a yo kpa w’a ɔ i ɲrun.

‘Mian ɔ ɲin mantan Ɲanmiɛn’

7. ?Kɛ be se kɛ sran kun ‘fɛ i wun mantan Ɲanmiɛn’n,’ i bo’n yɛle benin?

⁷ Sran ng’ɔ fɛ i wun man sran’n, ɔ kpɔcimɛn i. Kusu’n, sɛ ɔ fɛ i wun wla like kun i yolɛ nun’n, ɔ yimɛn i sa. Glɛki’n ndɛ mma nga Wawle’n kaci i kɛ “fa ɔ wun mantan Ɲanmiɛn’n,” fluwa kun m’ɔ yiyi Biblu’n nun ndɛ’m be nun’n waan Glɛki ndɛ mma sɔ’n i bo’n yɛle kɛ sran sɔ’n, ɔ sro Ɲanmiɛn. Kpɛ sunman Izraɛlifuɛ’m b’a yoman sɔ. Afin e si kɛ be yoli ɲin kekle Ɲanmiɛn su. Kɛ Ɲanmiɛn fali be Ezipti lɔ fiteli’n bɔbɔ’n, be ɲin w’a yimɛn i.

8. (a) ?Adam i fɔnlɛ m’ɔ fɔnnin ti’n, ngue yɛ ɔ fata kɛ e wun i wlɛ ɔ? (b) ?Wafa sɛ yɛ Zoova yili “abonuan” sa kun i nglo ɔ?

⁸ “?Ɔ le klɔ sran kun sa m’ɔ kwla fɛ i wun mantan Ɲanmiɛn guɛ i ti nin i bo ɔ?” Kɛ Adam nin Ɛvu be fɔnnin’n, lele nin andɛ’n, ɔ leman klɔ sran kun sa mɔ w’a fɛ i wun w’a mantan Ɲanmiɛn lele w’a guɛ i ti nin i bo ɔ. Sanngɛ kɛ i blɛ’n juli’n, Zoova yili “abonuan” sa kun i nglo. Zezi m’ɔ dun mmua trannin ɲanmiɛn su lɔ’n, Zoova yoli maan Mali wunnzɛli i. Ɔ maan kɛ be wuli i’n, fɔ nunmɛn i nun. Kɛ Zezi bali asiɛ’n su wa’n lele mɔ bé klé i ɲrɛnnɛn naan b’a kun i’n, ɔ kleli wafa nga be fa be wun man Ɲanmiɛn yɛ be kpɔcimɛn i’n. Wafa ng’ɔ fa srɛ i Si Ɲanmiɛn’n, ɔ kle kɛ i ɲin yi Ɲanmiɛn naan ɔ su i sakpa. (Mat. 11:25; Zan 12:27, 28) I sɔ’n ti’n, Zoova maan kɛ Pɔlu kán Zezi i ajalɛ klanman m’ɔ fɛli i asiɛ’n su wa’n i ndɛ’n, ɔ seli kɛ ɔ “yoli Ɲanmiɛn liɛ.”—An kanngan 1 Timote 3:16 nun.a

9. ?Wafa sɛ yɛ e kwla mian e ɲin e fa e wun mantan Ɲanmiɛn ɔn?

⁹ Kɛ mɔ fɔ o e nun’n, e kwlá faman e wun mantanman Ɲanmiɛn lele e guɛmɛn i ti nin i bo. Sanngɛ e kwla mian e ɲin e kunndɛ i sɔ yolɛ. I sɔ’n ti’n, ɔ fata kɛ e nian Zezi i ajalɛ liɛ’n su e nanti. (1 Piɛ. 2:21) I liɛ’n, sran mɔ ‘be yo be wun kɛ be sro Ɲanmiɛn sa, sanngɛ be lafimɛn i su kɛ ɔ kwla sa yo’n,’ e su yoman kɛ be sa. (2 Tim. 3:5) Afin sran ng’ɔ fɛ i wun mantan Ɲanmiɛn’n, ɔ leman nvialiɛ. Sran’m be sie i nzɔliɛ. Ɔ maan, sɛ e waan é wlá aja tralɛ wie o, annzɛ tralɛ uflɛ wie naan é kɔ́ like tolɛ o, ɔ fata kɛ e wun wlawlalɛ’n ɔ kle kɛ ‘e sro Ɲanmiɛn.’ (1 Tim. 2:9, 10) Nanwlɛ, kɛ e fa e wun mantan Ɲanmiɛn’n, ɔ fata kɛ e nanti i mmla’m be su titi sa kwlaa nun.

‘Mian ɔ ɲin lafi Ɲanmiɛn su’

10. ?Ngue yɛ e kwla yo naan y’a lafi Ɲanmiɛn su kpa ɔ?

¹⁰ An kanngan Rɔmfuɛ Mun 10:17 nun. Kɛ ɔ ko yo naan Klistfuɛ kun w’a kwla lafi Ɲanmiɛn su titi’n, ɔ fata kɛ ɔ bu ndɛ nanwlɛ ng’ɔ o Biblu’n nun’n i su akunndan titi. ‘Sran kpa nanwlɛfuɛ m’ɔ si ngwlɛlɛ’n,’ ɔ mannin e Biblu’n i akua kpanngban. Be nun nsan yɛle fluwa Le plus grand homme de tous les temps, Écoute le grand Enseignant, ɔ nin fluwa “ Viens, suis-moi. ” Fluwa nsan sɔ’m be uka e naan y’a kwla si Zezi kpa naan y’a niɛn i ajalɛ liɛ’n su y’a nanti. (Mat. 24:45-47) ‘Sran kpa nanwlɛfuɛ m’ɔ si ngwlɛlɛ’n’ siesie aɲia mun man e. Aɲia sɔ’m be nun sunman nun’n, e ti ‘Klist i ndɛ mɔ be kannin’n.’ ?E si like nga e kwla yo naan y’a kwla nian fluwa sɔ mɔ be ti kɛ aliɛ sa’n, be nun kpa naan y’a fa ndɛ nga e ti’n y’a ‘sie e klun kpa w’a tra laa’n?’—Ebr. 2:1.

11. ?Wafa sɛ yɛ Ɲanmiɛn srɛlɛ’n nin i mmla’m be su falɛ’n kwla uka e naan y’a lafi Ɲanmiɛn su kpa ɔ?

¹¹ Like kun ekun m’ɔ kwla uka e naan y’a lafi Ɲanmiɛn su kpa’n, yɛle Ɲanmiɛn srɛlɛ’n. Cɛn kun’n Zezi i sɔnnzɔnfuɛ’m be srɛli i kɛ: ‘Man e awlɛn maan e lafi Ɲanmiɛn su kpa.’ E kusu e kwla srɛ Ɲanmiɛn sɔ wie. (Lik 17:5) I sɔ’n ti’n, ɔ fata kɛ e srɛ Ɲanmiɛn naan ɔ fɛ i wawɛ’n uka e. Afin, ninnge nga ‘Ɲanmiɛn wawɛ’n maan sran yo’n,’ i kun yɛle Ɲanmiɛn sulafilɛ’n. (Gal. 5:22, NW) Asa ekun’n, kɛ e nanti Ɲanmiɛn mmla’m be su’n, e lafi Ɲanmiɛn su kpa. I wie yɛle kɛ e kwla uka e jasin fɛ’n bolɛ’n su. I sɔ yolɛ’n kwla man e aklunjuɛ. Kpɛkun kɛ e ‘dun mmua fa e wun man Ɲanmiɛn maan ɔ sie e’n, yɛ e yo i klun sa’n,’ ninnge ng’ɔ́ mán e’n, kɛ e bu i sin’n, e lafi Ɲanmiɛn su kpa.—Mat. 6:33.

‘Mian ɔ ɲin klo sran’

12, 13. (a) ?Mmla kun ekun mɔ Zezi mannin’n yɛle benin? (b) ?Ninnge benin’m be nun yɛ e kwla klo e niaan mun kɛ Klist sa ɔ?

¹² An kanngan 1 Timote 5:1, 2 nun. Wafa nga Klistfuɛ’m be kwla klo be wiengu’n, Pɔlu mɛnnin i su afɔtuɛ. Kɛ be se kɛ e fa e wun mantan Ɲanmiɛn’n, i wie yɛle kɛ Zezi i mmla kun ekun m’ɔ se kɛ e “klo e wiengu” kɛ ɔ fa kloli e sa’n, maan e fa su. (Zan 13:34) Akoto Zan seli kɛ: ‘?Sɛ sran kun ti aɲanbeunfuɛ m’ɔ wun i niaan wie mɔ i sa w’a mian’n, m’ɔ timɛn i wun ɲanman nun’n, ngue yɛ ɔ kle kɛ ɔ klo Ɲanmiɛn’n niɔn?’ (1 Zan 3:17) ?Wafa sɛ yɛ an yili i nglo kɛ an klo sran mun ɔn?

¹³ Sran klolɛ’n, i wafa kun ekun yɛle kɛ e yaci sa cɛ, e faman e niaan’m be wun ndɛ e sieman e klun. (An kanngan 1 Zan 4:20 nun.) Afɔtuɛ m’ɔ fata kɛ e fa su’n yɛ: ‘Sa nga e wiengu yo mɔ e wun i’n, maan ɔ sɔn e nun, sɛ sran kun yo i wiengu sa’n, maan ɔ yaci cɛ i. Klist yacili sa nga e yoli i’n cɛli e, ɔ maan e kusu, sa nga be yo e’n, e yaci cɛ.’ (Kol. 3:13) ?Sran kun o asɔnun nun m’ɔ yoli e sa mɔ e kwla yaci cɛ i ɔ? ?Yɛ é yáci cɛ i sakpa?

‘Tra wɔ awlɛn’

14. ?Ngue like yɛ aniaan nga be o Filadɛlfi asɔnun’n nun’n be kle e ɔ?

¹⁴ E kwla mian e ɲin e yo sa ng’ɔ ti kpa’n le nɲɔn kun. Sanngɛ kɛ ɔ́ cɛ́ kɔ́ trá nga e fa sunnzunnin’n su’n, sa sɔ’n i yolɛ’n kwla yo kekle man e. Nanwlɛ, sɛ e kunndɛ kɛ é ɲán anannganman nguan’n, ɔ fata kɛ e tra e awlɛn. Zezi kannin ndɛ kun kleli Filadɛlfi asɔnun’n. I waan: ‘An fa ndɛ mɔ n kan kleli amun kɛ an tra amun awlɛn’n su. Ɔ maan kɛ sa kekle tɔ́ sran’m be kwlaa be sa nianlɛ’n ti’n, n kusu ń sásá amun.’ (Ngl. 3:10) Zezi kleli kɛ e awlɛn tralɛ’n ti cinnjin. Awlɛn tralɛ’n yɛ ɔ kwla uka e naan kɛ sa’m be tɔ e su’n, y’a kpɔnzɔman ɔn. Kɛ be sali aniaan nga be o Filadɛlfi asɔnun’n nun’n be niannin’n, aniaan sɔ’m be trali be awlɛn. Ɔ maan Zezi kusu seli be kɛ, kɛ sa kekle kpa uflɛ wá tɔ́’n, ɔ́ sásá be.—Lik 16:10.

15. ?Ngue like yɛ Zezi kleli i awlɛn tralɛ’n su ɔ?

¹⁵ Zezi si kɛ i sɔnnzɔnfuɛ’m be awlofuɛ mun nin sran onga’m bé kpɔ́ be. Ɔ maan, ɔ kannin ndɛ nga wlali be fanngan kpɛ nɲɔn tra su. Ɔ seli be kɛ: ‘Sran ng’ɔ trɛ i awlɛn lele ju i awieliɛ’n, ɔ́ fíte nun.’ (Mat. 10:22; 24:13) Asa ekun’n, ɔ kleli be like nga i blɛ sɔ nun’n, ɔ kwla uka be naan b’a kwla be awlɛn tra’n. Ɔ buli ɲanndra kun. Ɲanndra sɔ nun’n, sran nga kɛ ‘be ti Ɲanmiɛn ndɛ’n, be klun jɔ su,’ sanngɛ kɛ sa kaan tɔ be su’n, kpɛkun b’a yaci i su falɛ’n, ɔ fali be sunnzunnin akpuɛ. Sanngɛ, ɔ fɛli i sɔnnzɔnfuɛ kpafuɛ mun sunnzunnin asiɛ kpa’n. Afin be liɛ’n, ‘be wun Ɲanmiɛn ndɛ’n i wlɛ, yɛ be fa su kpa.’—Lik 8:13, 15.

16. ?Like kpa benin yɛ Ɲanmiɛn mannin sran mun m’ɔ uka be naan b’a tra be awlɛn ɔn?

¹⁶ ?E sieli like nga ti yɛ sran kun kwla trɛ i awlɛn’n i nzɔliɛ? Ɔ fata kɛ e ‘wun Ɲanmiɛn ndɛ’n i wlɛ,’ naan e fa sie e awlɛn’n nin e akunndan’n nun. Sɛ e bu Ɲanmiɛn Ndɛ’n i bue kan i su akunndan cɛn kwlaa’n, ɔ kwla uka e naan y’a ɲan wunmiɛn ‘y’a fa su kpa.’—Jue. 1:1, 2.

‘An yo wɛtɛɛfuɛ’ yɛ amun nuan sɛ amun wun

17. (a) ?Ngue ti yɛ ‘wɛtɛɛ yolɛ’n’ ti cinnjin ɔn? (b) ?Wafa sɛ yɛ Zezi kleli kɛ ɔ ti wɛtɛɛfuɛ ɔ?

¹⁷ Ɔ leman sran kun sa mɔ be tɔn i suɛn’n, ɔ yo i fɛ ɔ. Titi’n, sran nga be yo i sɔ’n, ɔ tɛ su ya su. Sanngɛ, sɛ sran sɔ’n ‘tɛ su amanniɛn su’n,’ ɔ ti kpa dan! (An kanngan Nyanndra Mun 15:1 nun.) Ɔ fata kɛ sran nga be kɛn i ndɛ tɛ’n, ɔ trɛ i awlɛn kpa naan w’a kwla tɛ su amanniɛn su. I sɔ yolɛ’n nun’n, Zezi mannin e ajalɛ kpa. Biblu’n waan: ‘Bɛ kpɛli i nzowa, w’a yiman w’a manman be, be kleli i ɲrɛnnɛn, w’a fuaman be ti, sanngɛ ɔ fɛ i ndɛ liɛ’n wlali Ɲanmiɛn m’ɔ di ndɛ nanwlɛ’n i sa nun.’ (1 Piɛ. 2:23) E kwla seman kɛ é kwlá yó i sɔ kpa kɛ Zezi sa. ?Sanngɛ, e kwla mian e ɲin e yo sran wɛtɛɛfuɛ kpa tra laa’n?

18. (a) ?Sɛ e ti wɛtɛɛfuɛ’n, ngue sa kpa yɛ e kwla yo ɔ? (b) ?Sa kpa benin ekun yɛ ɔ fata kɛ e mian e ɲin e yo ɔ?

¹⁸ Kɛ mɔ e su sɔnnzɔn Zezi’n, maan ‘e bu sa ti yɛ e wla o i su’n i akunndan sie naan sɛ be usa e i su sa’n y’a kwla tɛ su. Sanngɛ e tɛ be su amanniɛn su, maan be wun kɛ e sro Ɲanmiɛn.’ (1 Piɛ. 3:15, 16) Sɛ e ti wɛtɛɛfuɛ’n, be nga e bo jasin fɛ’n e kle be’n, ɔ nin e niaan Klistfuɛ mun, sɛ e nin be e nuan sɛman ndɛ kun su’n, e su faman ya ndɛndɛ. (2 Tim. 2:24, 25) Sɛ e ti wɛtɛɛfuɛ’n, e nin sran mun e nuan kwla sɛ e wun. Atrɛkpa’n, i sɔ ti yɛ fluwa’n i nɲɔn su nga Pɔlu klɛli ko mannin Timote’n, ɔ kannin e ‘nuan m’ɔ fata kɛ ɔ sɛ e wun’n’ i ndɛ wie’n niɔn. (2 Tim. 2:22; an fa sunnzun 1 Timote 6:11) Ɲanmiɛn Ndɛ’n waan ɔ fata kɛ e mian e ɲin naan e nin sran mun ‘e nuan sɛ e wun.’—Jue. 34:15; Ebr. 12:14.

19. ?Kɛ e wieli ndɛ nga suan’n, ngue yɛ amun kunndɛ kɛ amún mían amun ɲin yo ɔ? ?Yɛ ngue ti ɔ?

¹⁹ Ninnge ng’ɔ fata kɛ e yi be nglo e nzuɛn nun’n, e kannin be nun nso be ndɛ. Yɛle kɛ, maan e yo sa ng’ɔ ti kpa’n, e fa e wun mantan Ɲanmiɛn, e lafi i su, e klo sran, e tra e awlɛn, e yo wɛtɛɛfuɛ, yɛ maan e nuan sɛ e wun. Sɛ asɔnun’m be kwlaa be nun aniaan bian nin aniaan bla’m be nanti sɔ’n, nanwlɛ, asɔnun’n nun tranlɛ’n yó fɛ! I sɔ’n mánmán Zoova. Kpɛkun e aeliɛ sɔ’n ti’n, Ɲanmiɛn úka e naan e kaci e nzuɛn’n ekun naan y’a kwla yi i ayɛ.

[Ja ngua lɛ ndɛ’n]

Maan e bu i su akunndan

• ?Ngue yɛ é yó naan y’a yo sran kpa, naan y’a mantan Ɲanmiɛn ɔn?

• ?Ngue yɛ ɔ́ úka e naan y’a lafi Ɲanmiɛn su, naan y’a tra e awlɛn ɔn?

• ?Sɛ e klo e niaan mun’n, wafa sɛ yɛ e nin be é trán ɔn?

• ?Ngue ti yɛ ɔ fata kɛ e mian e ɲin e yo wɛtɛɛfuɛ naan e nuan sɛ e wun ɔn?

[Foto, bue 20]

Zezi seli e kɛ sa kpa mɔ Ɲanmiɛn sulɛ’n ti yɛ e yo’n, nán e yo i sran’m be ti.

[Foto, bue 21]

Sɛ e bu ndɛ nanwlɛ m’ɔ o Ɲanmiɛn Ndɛ’n nun’n i su akunndan’n, yɛ é kwlá láfi Ɲanmiɛn su ɔ.

[Foto, bue 23]

E kwla mian e ɲin e klo sran yɛ e yo wɛtɛɛfuɛ.