?E si m’ɔ o nglo lɔ’n amun si i?

SƐ BE usa sran kun mɔ i si nin i nin’n be tɛli i klolɛ su’n kɛ: ?Ɔ si m’ɔ wuli wɔ’n, a si i kpa? kosan sɔ’n kwla bo i nuan. Ɔ maan, ɔ kwla tɛ su kɛ: ‘Ai! N si i kpa e.’ I yo, e nun sunman e si like nga e si klo i’n ɔ nin ng’ɔ klomɛn i’n. Sɛ sa wie ju naan e baba yó sa annzɛ ɔ́ yó sa’n, e wun i wlɛ. Yɛ wafa ng’ɔ fa nian i awlo nunfuɛ’m be lika’n, e si i wie.

Sanngɛ ɔ ju wie ɔ, e si’n i aeliɛ’n kwla bo e nuan. Wie liɛ’n, ba kun kwla se kɛ ɔ si i si naan ɔ ti sran wɛtɛɛ. Sanngɛ sa wie mɔ w’a tɔli be awlo nun’n ti’n, i si deli be yasua su, srɛ w’a kunmɛn i. I lɛ nun’n, ba’n w’a sunnzunman kɛ i si’n kwla yo sɔ.

?Yɛ e Yifuɛ’n nin? ?E si i kpa? Ɲanmiɛn Ndɛ’n waan: ‘I yɛ ɔ man e nguan ɔn, i ti yɛ e o lɛ mɔ e kwla kan e wun ɔn.’ (Sa Nga Be Yoli’n 17:28) Ɲanmiɛn yɛ ɔ man e nguan’n niɔn. I sɔ’n ti’n, ɔ ti e kwlaa e Si. (Ezai 64:7) Sɛ amun nin Ɲanmiɛn be o nun kɛ sran kun nin i wa be o nun sa’n, i su ɔ. Sanngɛ ninnge nga e kwla suan be Ɲanmiɛn su ekun’n be sɔnnin. Sɛ e wun be wlɛ’n, ɔ ti e bɔbɔ e kpa yolɛ.

E si m’ɔ wuli e’n, kɛ e si i kpa’n yɛ ɔ nin aɲinyiɛ ba ɔ. I kunngba’n yɛle Ɲanmiɛn liɛ’n. Sɛ e si i kpa’n, e nin i e afiɛn’n mántan kpa. Sɛ e si i naan e yo i klun sa’n, sa kwlaa ng’ɔ ju e su i nun’n, ɔ́ jrán e sin.

?Ɲanmiɛn i sran wafa ng’ɔ ti’n yɛle benin? ?Yɛ sɛ e wun i wlɛ’n, wafa sɛ yɛ ɔ fata kɛ e nin i e afiɛn’n káci ɔ? ?Ɲanmiɛn i silɛ’n, ɔ le i nuan su like m’ɔ fata kɛ e yo ɔ? I kwlaa sɔ’n yɛ é wá yíyí nun siɛn ɔn.

[Ndɛ kwle, bue 3]

Wafa nga e si sran’n yɛ e fa klo i ɔ.