Maan aja’n i ‘ɲanman nsan’n’ sɔ titi
‘Ɲanman nga be fali ɲanman nsan yɛ be fa wɔli’n i nun kpɛlɛ ti kekle.’—AKU. 4:12.
1. ?Wan yɛ ɔ jali sran klikli mun ɔn?
KƐ ƝANMIƐN ZOOVA yili nɲanɲa mun nin nnɛn mun wieli’n, yɛ ɔ yili Adam, klɔ sran klikli’n niɔn. I sin’n, Ɲanmiɛn maan Adam lafili kpa sa pɔɔ. Yɛ ɔ fali Adam i nvɛnma kun fa yili i ukafuɛ kun ɔn. Fɔ nunman i ukafuɛ sɔ’n nun. Kɛ Adam wunnin i’n, ɔ seli kɛ: “Ɛn ɛɛn! Nga li ti kɛ m bɔbɔ min sa. Min nin i e wunnɛn’n ti kun.” (Bob. 1:27; 2:18, 21-23) Wafa nga Zoova yili bla klikli sɔ’n, i bɔbɔ i klun jɔli su. Ɔ maan, Zoova kannin be boli nun. Yɛle kɛ ɔ kpɛli aja’n i ba. Ɔ boli muae mannin be.—Bob. 1:28; 2:24.
2. ?Wafa sɛ yɛ Satan sacili Adam nin Ɛvu be afiɛn ɔn?
2 Aja nga Ɲanmiɛn kpɛli i ba’n, sa tɛ’n wa kɛnnin i. ?Wafa sɛ? Yɛle kɛ aolia nun sran kun mɔ be flɛ i Satan’n, ɔ wa lakali Ɛvu maan ɔ dili waka mma kunngba cenje nga Ɲanmiɛn seli be kɛ nán be di’n. Adam kusu wa suli i yi su. Be nɲɔn’n be jasoli Ɲanmiɛn wun. Yɛle kɛ mmla nin atin kpa nga Ɲanmiɛn kleli be’n, be kpaloli be. (Bob. 3:1-7) Kɛ Zoova usali be’n, be ayeliɛ’n kle kɛ be nin Ɲanmiɛn be afiɛn’n w’a saci. Afin, yasua’n fali ndɛ’n guɛli i bla’n su. Ɔ seli kɛ: ‘Bla mɔ a fa sieli min wun wa’n, i yɛ ɔ mannin min wie yɛ n dili ɔ.’—Bob. 3:11-13.
3. ?Akunndan tɛ benin yɛ Zuifu’m be bu i laa ɔ?
3 Kɛ ɔ fɛ i laa lele’n, Satan fa gblɛ ninnge fanunfanun fa saci be nga be o aja nun’n, be afiɛn. Wie liɛ’n, Satan sin Ɲanmiɛn sulɛ wafa ng’ɔ timan su’n, be su kpɛnngbɛn’m be sin ɔ laka sran mun naan aja’n i su ndɛ ng’ɔ timan Ɲanmiɛn liɛ’n su’n, be fa be su. Laa Zuifu’m be kpɛnngbɛn wie’m b’a buman Ɲanmiɛn i mmla’m be like fi. Ɔ maan, be seli kɛ ninnge ngbɛnngbɛn kɛ njin m’ɔ bu tro’n i ti sa’n ti’n, yasua kun kwla rɛ i yi. Sanngɛ Zezi seli be kɛ: ‘Ń kán klé amun kɛ, sran kwlaa ng’ɔ rɛ i yi’n, sɛ nán kɛ w’a kunndɛ bian i bo ti’n, naan ɔ ja uflɛ’n, nn w’a kunndɛ bla i yi bo.’—Mat. 19:9.
4. ?Wafa sɛ yɛ andɛ’n, aja mɔ Ɲanmiɛn kpɛli i ba’n su saci ɔ?
4 Satan te miɛn i ɲin te saci aja mɔ Ɲanmiɛn kpɛli i ba’n. I wie yɛle yasua m’ɔ kunndɛ i wiengu yasua’n, ɔ nin be nga b’a jaman mɔ be tran likawlɛ kɛ sran kun nin i yi sa’n, ɔ nin wafa nga sran’m be ra be wun ndɛndɛ’n. I sɔ’n kle kɛ aja’n i sacilɛ nun’n, Satan w’a bo manndrɛn kpa. (An kanngan Ebre Mun 13:4 nun.) ?Aja’n i su akunndan tɛ nga sran’m be bu’n, wafa sɛ yɛ é yó naan w’a saciman e wie ɔ? Maan e nian ajalɛ wie mɔ be kle kɛ aja kun w’a yo kpa’n.
Maan Zoova tran aja’n nun titi
5. ?Aja’n i ndɛ’n kanlɛ nun’n, kɛ be se kɛ ‘ɲanman nga be fali ɲanman nsan yɛ be fa wɔli’n,’ i bo’n yɛle benin?
5 Sɛ e kunndɛ kɛ e aja’n yo kpa kɛ Zoova kunndɛ sa’n, ɔ fata kɛ Zoova tran aja sɔ’n nun wie. Ɲanmiɛn Ndɛ’n se kɛ: ‘Ɲanman nga be fali ɲanman nsan yɛ be fa wɔli’n i nun kpɛlɛ ti kekle.’ (Aku. 4:12) Kɛ be kan ‘ɲanman nga be fali ɲanman nsan yɛ be fa wɔli’n,’ i ndɛ’n, ɔ ti akunndan nun ndɛ. Sɛ e fa akunndan nun ndɛ sɔ’n e fa sunnzun aja’n, nn yasua nin bla’n yɛ be ti ɲanman nɲɔn klikli mun ɔn. Yɛ ɲanman ng’ɔ o ɲanman nɲɔn klikli sɔ’m be afiɛn mɔ i su yɛ be wɔ i onga mun’n, yɛle Ɲanmiɛn Zoova. Ɔ maan, sɛ yasua’n nin bla’n be nin Ɲanmiɛn o nun’n, ɔ man be wunmiɛn naan b’a jran kekle sa’m be ɲrun. Yɛ i sɔ’n yɛ maan aja’n nun’n, yasua’n nin bla’n bé dí aklunjuɛ dan kpa ɔ.
6, 7. (a) ?Ngue yɛ Klistfuɛ’m be kwla yo naan Ɲanmiɛn w’a tran be aja’n nun ɔn? (b) ?Wafa sɛ yɛ aniaan bla kun yili i wun’n, i ayɛ ɔ?
6 ?Sanngɛ, ngue yɛ be nga be o aja nun’n, be kwla yo naan be aja’n w’a yo kɛ ɲanman nga be fali ɲanman nsan be wɔli’n sa ɔ? Jue tofuɛ Davidi seli kɛ: ‘Min Ɲanmiɛn, min waan ń yó ɔ klun sa. Ɔ mmla’n ɔ o min klun.’ (Jue. 40:9) E kusu maan klolɛ mɔ e klo Ɲanmiɛn’n ti’n e tu e klun e su i. I sɔ’n ti’n, maan yasua’n nin bla’n be nɲɔn’n be suan Zoova sulɛ kpa. Yɛ maan Zoova klun sa yolɛ’n yo be fɛ. Maan be uka be wiengu naan sran kun i Ɲanmiɛn klolɛ’n yo dan.—Nya. 27:17.
7 Nanwlɛ, sɛ Ɲanmiɛn i mmla’m be o yasua’n nin bla’n be klun’n, bé yí nzuɛn klanman kɛ Ɲanmiɛn sulafilɛ nin be wla mɔ be fa guɛ i Ɲanmiɛn su’n, ɔ nin sran nin Ɲanmiɛn klolɛ’n be nglo. I sɔ’n wá úka be maan be aja’n sɛ́ kpa. (1 Kor. 13:13) Be flɛ aniaan bla kun kɛ Sandra. Ɔ nin i wun be trannin lele afuɛ 50. Ɔ seli kɛ: “Like kpafuɛ nga n kloli be min wun i lika’n, yɛle min ɲrun atin ng’ɔ boli’n nin afɔtuɛ ng’ɔ mannin min’n. Be kwlaa be taka Ɲanmiɛn Ndɛ’n su. Yɛ klolɛ nga ɔ fa klo Zoova’n ɔ tra klolɛ nga ɔ fa klo min’n.” ?Nja mun, amun yi’m be kwla kɛn i sɔ ndɛ’n amun lika wie?
8. ?Sɛ e kunndɛ kɛ ‘é ɲán aja’n nun mmlusuɛ dan’n,’ ngue yɛ ɔ fata kɛ e yo ɔ?
8 ?E nga e o aja nun’n, Ɲanmiɛn ninnge nin Ɲanmiɛn Sielɛ’n yɛ be ti like cinnjin kpafuɛ’n e mɛn dilɛ’n nun ɔn? ?Asa kusu’n, e wun annzɛ e yi’n ti e liɛ kɛ e wiengu mɔ e nin i e su Zoova sa? (Bob. 2:24) Famiɛn Salomɔn ngwlɛlɛfuɛ’n seli kɛ: ‘Sɛ sran nɲɔn be bo yo kun’n, ɔ ti kpa tra sran kunngba mɔ i ngunmin o’n. Afin kɛ be ti nɲɔn’n, be ɲan be junman’n i su mmlusuɛ dan.’ (Aku. 4:9) Asa kusu’n, sɛ be nga be o aja’n nun’n, be waan ‘bé ɲán su mmlusuɛ dan’n,’ naan be wiengu klolɛ’n cɛ tititi naan Ɲanmiɛn ra be su’n, ɔ fata kɛ be nɲɔn’n be tu be klun be kunndɛ Ɲanmiɛn ninnge mun naan Ɲanmiɛn sie be.
9. (a) ?Junman cinnjin benin yɛ ɔ o yasua’n i sa nun ɔn? (b) ?Kɛ nga Kolɔsfuɛ Mun 3:19 fa kan sa’n, wafa sɛ yɛ ɔ fata kɛ yasua’n nin i yi’n be tran ɔn?
9 Like kun ng’ɔ kle kɛ Ɲanmiɛn o aja’n nun’n, yɛle kɛ yasua’n nin bla’n be mian be ɲin kpa be nanti Ɲanmiɛn mmla’m be su. Yasua’n yɛ ɔ fata kɛ ɔ niɛn i awlobofuɛ’m be lika ɔ. Ɔ fata kɛ ɔ fa ninnge ng’ɔ mian be sa’n man be. Yɛ ɔ nian be lika Ɲanmiɛn sulɛ’n nun. (1 Tim. 5:8) Ɔ fata kusu kɛ ɔ yo naan bla’n i wun yo i fɛ. Kolɔsfuɛ Mun 3:19 se kɛ: ‘Yasua mun, an klo amun yi mun, nán an yo amun ɲrun wiwi be wun.’ Biblu’n nun like sifuɛ kun waan kɛ Biblu’n se kɛ yasua’n yo ‘i ɲrun wiwi’n,’ yɛle kɛ “ɔ kpɛ bla’n i nzowa tɛtɛ kpa. Ɔ bo i. Ɔ yo bla’n i finfin. Ɔ bumɛn i akunndan. Ɔ niɛnmɛn i lika. Ɔ sasaman bla’n.” Nanwlɛ, i sɔ ayeliɛ’n nin Klistfuɛ awlo fataman. ?Nɛ́n i ɔ? Sɛ yasua kun sie i yi klolɛ su’n, bla’n kusu ló i wun mɛ́n i wɛtɛɛ su.
10. ?Nzuɛn benin yɛ ɔ fata kɛ Klistfuɛ bla’m be yi i nglo ɔ?
10 Sɛ Klistfuɛ bla’m be kusu be kunndɛ kɛ Zoova tran be aja’n nun’n, ɔ fata kɛ be nanti i mmla’m be su wie. Akoto Pɔlu seli kɛ: ‘Bla mun, an bu amun wun’m be sran, kɛ an bu e Min’n i sran’n sa. Nán an fa amun ɲin wlawla be, afin yasua yɛ ɔ ti bla i su kpɛn kɛ Klist kusu ti Asɔnun i su kpɛn’n sa.’ (Efɛ. 5:22, 23) Kɛ Satan lakali Ɛvu’n, ɔ kleli kɛ sɛ sran’m be jaso Ɲanmiɛn wun naan be yo be bɔbɔ be klunklo ninnge mun’n, bé dí alaje kpafuɛ’n tititi. Ɔ maan siɛn’n, aja’n nun’n, like nga sran kun kunndɛ kɛ ɔ́ yó’n yɛ ɔ yo ɔ. Sanngɛ bla nga be sro Ɲanmiɛn mɔ be bu aja’n kɛ Ɲanmiɛn fa bu i sa’n, sɛ be lo be wun man be wun mun naan be sie be’n, i sɔ’n yoman be ɲannzuɛn. Be wla kpɛn su kɛ Zoova yili Ɛvu kɛ ɔ yo sran ‘m’ɔ nin i wun bé kwlá trán ɔn.’ Ajalɛ ngalɛ’n yɛ i bo bolɛ’n nun’n, Zoova buli i like kpafuɛ’n niɔn. (Bob. 2:18) Klistfuɛ bla ng’ɔ nin i wun be kwla tran kɛ Ɲanmiɛn kleli’n sa’n, ‘ɔ mɛn i wun i kɔmin su.’—Nya. 12:4.
11. ?Ngue like yɛ ɔ ukali aniaan bian kun i aja’n, m’ɔ kɛnnin i ndɛ’n niɔn?
11 Ajalɛ uflɛ nga e kwla fa naan Ɲanmiɛn w’a tran e aja’n nun’n, yɛle kɛ maan yasua’n nin bla’n be suan Ɲanmiɛn Ndɛ’n likawlɛ. Zelar m’ɔ nin i yi be dili aklunjuɛ be aja’n nun lele afuɛ 55, ɔ seli kɛ: “Like kpafuɛ nga mɔ maan aja kun yo kpa’n, yɛle Biblu’n nun kannganlɛ nin i nun like suanlɛ likawlɛ’n.” Ɔ kan gua su kɛ: “Sɛ yasua’n nin bla’n be yo ninnge mun likawlɛ’n, i li sɛ be yo Ɲanmiɛn ninnge mun likawlɛ’n, be afiɛn’n mántan kpa. Be nin Zoova kusu be afiɛn’n mántan kpa wie.” Sɛ awlobofuɛ’m be suan Ɲanmiɛn Ndɛ’n likawlɛ’n, ɔ́ yó maan Ɲanmiɛn mmla’n ká be akunndan’n nun kpa. Bé tín Ɲanmiɛn sulɛ’n nun yɛ bé kɔ́ be ɲrun Ɲanmiɛn ninnge’m be nun.
12, 13. (a) ?Ngue ti yɛ ɔ ti cinnjin man be nga be o aja’n nun’n kɛ be srɛ Ɲanmiɛn likawlɛ ɔ? (b) ?Ɲanmiɛn junman dilɛ uflɛ benin wie mun yɛ be kwla wla aja’n i bo ase kpa ɔ?
12 Ɔ yoli mɔ be nga be o aja’n nun’n, be srɛ Ɲanmiɛn likawlɛ ɔ. Sɛ yasua kun ‘kan like ng’ɔ o i nin i yi be su’n kle’ Ɲanmiɛn’n, i sɔ’n yó maan be nɲɔn’n be afiɛn’n sɛ́ kpa. (Jue. 62:9) I wie yɛle kɛ sɛ yasua’n nin bla’n be tu be klun be srɛ Zoova kɛ ɔ bo be ɲrun atin’n, i sɔ’n yo maan sɛ ndɛ o be afiɛn’n be kwla wun i trawlɛ. (Mat. 6:14, 15) Kɛ be ko srɛ Ɲanmiɛn sɔ’n, ɔ fata kɛ be mian be ɲin be uka be wiengu. Yɛ maan ‘sa nga be wiengu yo mɔ be wun i’n, ɔ sɔn be nun, yɛ be yaci cɛ i.’ (Kol. 3:13) Sɛ e srɛ Ɲanmiɛn titi’n, i sɔ’n kle kɛ e lafi i su. Famiɛn Davidi seli kɛ: ‘Be kwlaa be ɲin o ɔ su.’ (Jue. 145:15) Sɛ e ɲin o Ɲanmiɛn su naan e srɛ i’n, e su kokoman ngboko, afin e si kɛ ‘ɔ nian e lika.’—1 Piɛ. 5:7.
13 Ajalɛ uflɛ nga be nga be o aja nun’n, be kwla fa naan Zoova w’a tran be aja’n nun’n, yɛle asɔnun aɲia’m be bo kɔlɛ’n, ɔ nin jasin fɛ’n bolɛ likawlɛ’n. Aɲia’m be bo’n, be kwla suan wafa nga be kwla jran “gblɛ” ninnge nga Satan fa saci awlobo mun’n, be ɲrun kekle’n. (Efɛ. 6:11) Asa kusu’n, kɛ be bo jasin fɛ’n likawlɛ titi’n, be ‘jran kekle, yɛ be wun usuman be.’—1 Kor. 15:58.
Kɛ ndɛ ko tɔ aja’n nun’n
14. ?Ngue sa ti yɛ maan ndɛ kwla tɔ aja’n nun ɔn?
14 Atrɛkpa’n, ajalɛ nga y’a kan be ndɛ lɛ’n, amun a ti be le. ?Sanngɛ ngue ti yɛ amun nin amun yi annzɛ amun wun be tranman ase naan be kokoman be su yalɛ kpa ɔ? Amun nian sɛ ajalɛ sɔ’m be nun’n, wie o lɛ m’ɔ fata kɛ amun fa be ɲin sie be su kpa o. Biblu’n kle weiin kɛ be nga Ɲanmiɛn o be aja’n nun’n, ‘bé wún be ɲin su.’ (1 Kor. 7:28) Fɔ’n o klɔ sran nun. Mɛn nga nun’n, sran’m be nantiman mmla su. Yɛ mmusu’m be si Satan sua sran’m be aya. I sɔ ninnge’m be ti’n, Klistfuɛ kpa’m be bɔbɔ ndɛ tɔ be aja’n nun. (2 Kor. 2:11) Sanngɛ Zoova kwla uka e naan y’a jran sa sɔ’m be ɲrun kekle. Nanwlɛ, e kwla jran sa sɔ’m be ɲrun kekle. Zɔbu m’ɔ ti Ɲanmiɛn sufuɛ kpa’n, i nnɛn’m be kwlaa be fili i sa. I junman difuɛ’m be wuli. I mma’m be wuli. Sanngɛ Biblu’n kɛn i ndɛ kɛ: ‘Sa ng’ɔ o lɛ’n be kwlaa nun’n, Zɔbu w’a yoman sa tɛ fi, yɛ i nuan w’a toman Ɲanmiɛn.’—Zɔb 1:13-22.
15. ?Ajalɛ benin yɛ ɲrɛnnɛn’n ti’n, sran kun kwla fa ɔ? ?Yɛ sɛ e yi annzɛ e wun yo sɔ’n, wafa sɛ yɛ ɔ fata kɛ e nanti ɔ?
15 Zɔbu i yi’n, ɔ seli i kɛ: ‘?Kɛ ɔ o yɛ’n, a te o wɔ osu kunngba’n nun? ?Sɛ b’a seman ɔ kɛ a ti kpa’n, ɔ yo sɛ li? Nán kpɛ Ɲanmiɛn i nzowa naan wu fi.’ (Zɔb 2:9) Kɛ sa kekle’m be ko tɔ e su’n, ngokɔɛ’n maan e akunndan’n sanngan. I sɔ’n kwla yo maan e yo ninnge mun kɛ y’a jinmin sa. Ngwlɛlɛfuɛ’n seli kɛ: “Sɛ be su kle sran kun [ngwlɛlɛfuɛ’n, NW] ɲrɛnnɛn’n, ɔ yo i ya lele tra su [ɔ wlɛ i sinnzin, NW].” (Aku. 7:7) Sɛ “ɲrɛnnɛn’n” m’ɔ o amun yi annzɛ amun wun su’n ti’n, ɔ kan amun ndɛ tɛtɛ’n, amun gua amun wla se. Afin, sɛ amun sɔ su’n, amun kwla kan ndɛ wie mɔ maan lika’n sáci mlɔnmlɔn ɔn. (An kanngan Jue Mun 37:8 nun.) Ɔ maan, sɛ kekle’n m’ɔ o amun yi annzɛ amun wun i su’n ti’n, annzɛ i sa sin m’ɔ bubu i ti’n, ɔ ‘kan ndɛ tɔtɔ nun’n,’ nán amun fa yo ndɛ.—Zɔb 6:3.
16. (a) ?Wafa sɛ yɛ aja’n nun’n, e kwla nanti ndɛ ng’ɔ o Matie 7:1-5 nun’n, i su ɔ? (b) ?Ngue ti yɛ aja’n nun sɛsɛ yolɛ’n, ɔ ti cinnjin kpa ɔ?
16 Be nga be o aja’n nun’n, ɔ fataman kɛ like nga be wla o su’n, ɔ yo like mɔ i yolɛ annzɛ i ɲanlɛ ti kɛ lafilɛ nun like sa ɔ. I wie yɛle kɛ yasua’n annzɛ bla’n w’a wun kɛ i yi annzɛ i wun i ayeliɛ wie’m be o lɛ’n, be ase wlalɛ ti kekle kpa. Amun kwla se kɛ ‘n kwla yo naan ɔ kaci.’ Sanngɛ klolɛ’n nin awlɛn tralɛ’n yɛ bé úka amun naan amun a uka amun yi annzɛ amun wun naan w’a kaci blɛblɛblɛ ɔ. Nán e wla fi su, Zezi seli kɛ sran kwlaa ng’ɔ fɛ i ɲin sie i i wiengu sa tɛ kaan ngba su’n, ɔ ti kɛ sran m’ɔ wun “wla” m’ɔ o i niaan i ɲin su mɔ sanngɛ ɔ wunman “janvlɛ’n” m’ɔ o i bɔbɔ ɲinma’n su sa. Ɔ maan, Zezi seli kɛ: ‘Nán an bu sran fɔ maan Ɲanmiɛn bu amun fɔ.’ (An kanngan Matie 7:1-5 nun.) Sanngɛ nɛ́n i sɔ mɔ Zezi kannin’n ti yɛ sɛ e yi’n annzɛ e wun’n, i nzuɛn tɛ kpa wie o lɛ’n, e su faman e ɲin sieman su ɔ. Lobɛ m’ɔ nin i yi be trannin aja’n nun lele afuɛ kɔe 40 seli kɛ: “Sɛ yasua’n nin bla’n, be kan be klun ndɛ’n nanwlɛ su naan be kplin su kɛ sran kun kɛn i ndɛ liɛ ng’ɔ lo i’n, naan be sɔ ndɛ nga be wiengu kan’n nun klanman’n, i sɔ’n maan be kwla kaci.” Ɔ maan, ɔ fata kɛ amun yo sran sɛsɛfuɛ. Wie liɛ’n, amun kunndɛ kɛ amun yi annzɛ amun wun’n, ɔ yo sa, ɔ yo sa. Nán amun jran i sɔ ngalɛ’n su sa cɔcɔcɔ. Sanngɛ nzuɛn klanman nga kɛ amun o lɛ’n, amun wun be amun wiengu lika’n, yɛ amun kannvu be ɔ.—Aku. 9:9.
17, 18. ?Kɛ sa kekle nɔnninnɔnnin wie’m be ko tɔ e su’n, wan sin yɛ e kwla kɔ naan w’a uka e ɔ?
17 Kɛ lika’n ko kaci’n, e kwla se kɛ ɔ ti kɛ be su sa e nian sa. Be nga be le ba’n kekle’n kwla tɔ be su. Wie liɛ’n yasua’n annzɛ bla’n annzɛ bakan’n kwla tɔ tukpacɛ kekle kpa. Wie liɛ kusu’n, e si annzɛ e nin kpɛnngbɛn’n yɛ ɔ fata kɛ e niɛn i lika kpa tra laa’n niɔn. Wie liɛ ekun’n, ba kpɛnngbɛn mun yɛ be tu awlo’n nun be kɔ be liɛ’n nun ɔn. Asa kusu’n, Ɲanmiɛn junman dilɛ’n ti’n, lika’n kwla kaci. I sɔ ngalɛ’n ngba kwla man awlaboe nin ngokɔɛ. Yɛ ɔ kwla kpɛ ndɛ yi i aja’n nun.
18 ?Yɛ sɛ ndɛ’m be o amun aja’n nun naan ɔ yo amun kɛ be su bu tɔ amun su sa’n nin? (Nya. 24:10) Nán amun sa sin bubu amun le! Afin Satan liɛ’n, like ng’ɔ kunndɛ’n yɛle kɛ Ɲanmiɛn sufuɛ’m be yaci i sulɛ kpafuɛ’n. Ɔ maan, sɛ be nga be o aja’n nun’n be yaci Ɲanmiɛn sulɛ’n, ɔ́ yó i fɛ lele trá su. I sɔ’n ti’n, maan amun fa ajalɛ naan aja’n i ɲanman nsan’n w’a sɔ titi’n. Biblu’n kan be nga blɛ kekle nun bɔbɔ be suli Ɲanmiɛn kpa lele guɛli i ti nin i bo’n, be ndɛ’n, be diman be yalɛ. I wie yɛle Davidi liɛ’n. Cɛn kun’n, ɔ kɛnnin i klun ndɛ kleli Ɲanmiɛn. Ɔ seli i kɛ: ‘Ee Ɲanmiɛn, yo min ye. Sran wie mun cɛn kwlaa be mian min sa fii.’ (Jue. 56:2) ?Ɔ nin a yoman amun le kɛ ‘sran wie’m be mian amun sa fii’? Sran nga ti yɛ amun a mian fii’n, sɛ bɔɔ amun simɛn i’n, amun kwla jran kekle. Afin Davidi kwla jrannin kekle. Ɔ seli kɛ: ‘N flɛli Zoova, ɔ tɛli min su. Zoova maan srɛ m’ɔ kun min’n w’a wie.’—Jue. 34:4.
Mmlusuɛ uflɛ wie mun ekun
19. ?Ajalɛ benin yɛ e kwla fa naan y’a tɔman Satan i aya’m be nun ɔn?
19 Blɛ kasiɛn nga nun’n, ɔ fata kɛ be nga be o aja nun’n ‘be cici be wiengu wla maan ɔ yo sran.’ (1 Tɛs. 5:11) Nán e wla fi su kɛ Satan te jran su cinnjinnjin kɛ sɛ e su Ɲanmiɛn kpa’n, e bɔbɔ e klunklo ninnge’m be ti ɔ. Ɔ maan, Satan wá fá ajalɛ kwlaa ng’ɔ kwla fa’n naan w’a saci e Ɲanmiɛn sulɛ’n. Ɔ kwla saci e aja’n naan y’a suman Ɲanmiɛn kun. Sɛ e waan e tɔman Satan i aya’m be nun’n, ɔ fata kɛ e fa e wla’n kwlaa gua Zoova su. (Nya. 3:5, 6) Pɔlu seli kɛ: ‘[Ɲanmiɛn] m’ɔ wla n fanngan’n ti’n, n kwla like kwlaa yo.’—Fil. 4:13.
20. ?Sɛ Ɲanmiɛn o e aja’n nun titi’n, mmlusuɛ benin yɛ é ɲɛ́n i ɔ?
20 Sɛ Ɲanmiɛn o e aja’n nun’n, mmlusuɛ nga é ɲɛ́n i’n, be kanman. I sɔ liɛ’n, nanwlɛ Zoɛli nin i yi m’ɔ le afuɛ 51 be wunnin i weiin. Zoɛli se kɛ: “N la Zoova i ase titi. Afin, ɔ mannin min bla kpa yɛ e afiɛn’n sɛ kpa. Kɛ be se kɛ bla kun nin i wun be trannin klanman’n yɛle min yi liɛ’n.” ?Sanngɛ ngue ti yɛ be aja’n, ɔ yoli kpa sɔ ɔ? Ɔ kan gua su kɛ: “E miannin e ɲin titi e yoli e wiengu kpa. E trali e awlɛn e wiengu wun yɛ e kloli e wun kpa.” Kɛ be se kɛ be yo like kun naan fɔ nunman nun’n, mɛn nga nun’n, sran fi sa su kwlá yomɛn i sɔ like. Sanngɛ maan e mian e ɲin naan e nanti Ɲanmiɛn mmla’m be su. Yɛ maan Ɲanmiɛn tran e aja’n nun titi. Sɛ e yo sɔ’n, e aja’n ɔ́ wá yó kɛ ‘ɲanman nga be fali ɲanman nsan yɛ be fa wɔli mɔ i nun kpɛlɛ ti kekle’n’ sa.—Aku. 4:12.
?Amun wla kwla kpɛn su?
• ?Kɛ be se kɛ maan Zoova tran e aja’n nun’n, i bo’n yɛle benin?
• ?Kɛ sa tɔ’n, ngue yɛ ɔ nin i fata kɛ yasua’n nin bla’n be yo ɔ?
• ?Wafa sɛ yɛ e kwla si kɛ Ɲanmiɛn o e aja’n nun ɔn?
[Foto mun, bue 23]
Sɛ yasua’n nin bla’n be srɛ Ɲanmiɛn likawlɛ’n, ɔ́ úka be naan b’a jran sa’m be ɲrun kekle.