Maan e uka bua nga b’a mlin’n naan be sa be sin Ɲanmiɛn i bua fa’n nun
‘An maan e si able, afin m bua’n m’ɔ mlinnin’n, m’an wun i.’—LIK 15:6.
1. ?Wafa sɛ yɛ Zezi kleli kɛ ɔ ti bua tafuɛ kpa ɔ?
ZOOVA i Wa Zezi Klist kunngba yɛ be flɛ i “bua tafuɛ dan’n” niɔn. (Ebre Mun 13:20) Ɲanmiɛn Ndɛ’n dun mmua seli kɛ Zezi m’ɔ ti bua tafuɛ kun m’ɔ leman wunsu’n, ɔ́ wá bá. Naan ɔ́ wá kúnndɛ Izraɛli osu’n nun ‘bua mɔ b’a mlin’n.’ (Matie 2:1-6; 15:24) Asa kusu’n, wafa kunngba nga bua tafuɛ kun fɛ i nguan’n sie i wie nuan naan w’a de i bua mun’n, Zezi kusu yoli sɔ wie. Yɛle kɛ ɔ fɛli i wun toli be nga be ti kɛ bua mun sa’n be ti.—Zan 10:11, 15; 1 Zan 2:1, 2.
2. ?Ngue ti yɛ Klistfuɛ wie’m b’a tran ase Ɲanmiɛn sulɛ’n nun ɔn?
2 Sanngɛ sran wie mɔ be lafili Zezi i wun ng’ɔ fa kpɔli e ti sɔ’n su’n, mɔ be fali be wun mannin Ɲanmiɛn’n, be nunman asɔnun’n nun kun. Awlaboe’n, nin tukpacɛ nin ninnge wie mun ekun be wa bubuli be sa sin. Ɔ maan Ɲanmiɛn sulɛ nun’n, be wa trannin ase. Sanngɛ be nga be o Ɲanmiɛn i bua fa’n nun’n be ngunmin cɛ, yɛ be kwla di aklunjuɛ nin aunjuɛ nga Davidi kɛnnin i ndɛ Jue Mun ndɛ tre 23 nun’n niɔn. I waan: “N ti kɛ bua sa, Anannganman yɛ ɔ nian min su ɔ. Like fi su mianman min.” (Jue Mun 23:1) Ɲanmiɛn ninnge’m be nun’n, like fi mianman be nga be o Ɲanmiɛn i bua fa’n nun’n. Sanngɛ bua nga b’a mlin’n, be dimɛn i sɔ aklunjuɛ’n wie. ?Wan yɛ ɔ kwla uka be ɔ? ?Yɛ wafa sɛ yɛ be kwla uka be ɔ? ?Ngue like trele kun sa yɛ é yó naan y’a uka be naan b’a sa be sin Ɲanmiɛn i bua fa’n nun ɔn?
?Wan yɛ ɔ kwla uka be ɔ?
3. ?Wafa sɛ yɛ Zezi kleli like ng’ɔ fata kɛ be yo naan b’a uka be nga be nunman Ɲanmiɛn i bua fa’n nun kun’n niɔn?
3 Be nga be tu Ɲanmiɛn i bua fa’n nun’n, ɔ fata kɛ e mian e ɲin kpa naan y’a uka be. (Jue Mun 100:3) I sɔ’n ti’n, sunnzun ase kun nun’n, Zezi seli kɛ: ‘?Sɛ sran kun le bua ya naan be nun kun mlin’n, an bumɛn i kɛ ɔ́ yáci ablangwlan nin ngwlan’n oka’n su lɛ ɔ́ kó kúnndɛ be nun kun ng’ɔ mlinnin’n? Nanwlɛ, kɛ ɔ ko wun i’n, i klun jɔ i ti tra be nun ablangwlan nin ngwlan nga b’a mlinman’n. I kunngba’n niɔn, amun Si m’ɔ o ɲanmiɛn su lɔ’n ɔ kloman kɛ ba kanngan nga’m be nun kun mlin.’ (Matie 18:12-14) ?Ɔ maan, wan yɛ ɔ kwla uka be nga be nunman Ɲanmiɛn i bua fa’n nun kun’n niɔn?
4, 5. ?Wafa sɛ yɛ ɔ fata kɛ asɔnun kpɛnngbɛn’m be yo Ɲanmiɛn i bua fa’n niɔn?
4 Sɛ asɔnun kpɛnngbɛn’m be waan bé úka be nga be nunman Ɲanmiɛn i bua fa’n nun kun’n, ɔ fataman kɛ be wla fi like kun su. Yɛle kɛ Zoova i bua fa’n, yɛle be kwlaa nga be fali be wun be mɛnnin i mɔ be o asɔnun’n nun’n. Nanwlɛ, be ‘ti kɛ i kuku’n nun nnɛn.’ Be ti i cinnjin kpa. (Jue Mun 79:13) Ɔ maan, bua nga Ɲanmiɛn junman dilɛ’n nun b’a tran ase’n, ɔ fata kɛ be yo be cɛcɛ. Yɛle kɛ maan be ndɛ lo bua sunianfuɛ mun. Sɛ be ko nian be osu amanniɛn su’n, i sɔ’n kwla uka be. Be nga be sieli be bua sunianfuɛ’n, sɛ be wla bua nga Ɲanmiɛn junman dilɛ’n nun b’a tran ase’n be fanngan klolɛ su’n, i sɔ’n mán be wunmiɛn Ɲanmiɛn ninnge’m be nun. Kpɛkun atrɛkpa’n, bé kúnndɛ kɛ bé sá be sin Ɲanmiɛn i bua fa’n nun ekun.—1 Korɛntfuɛ Mun 8:1.
5 Be nga be nian Ɲanmiɛn i bua fa’n su’n, be junman’n yɛle bua nga be mlinnin’n be kunndɛlɛ ɔ nin be ukalɛ. Akoto Pɔlu kpɛnnin laa Efɛzi lɔ asɔnun kpɛnngbɛn’m be wla kɛ be di be bua sunianfuɛ junman’n kpa. Ɔ seli kɛ: ‘I sɔ’n ti, an nian amun bɔbɔ amun wun kpa, yɛ an nian bua fa’n nga Ɲanmiɛn wawɛ’n fa amun sieli be su’n be su kpa, yɛ an nian Ɲanmiɛn i Asɔnun’n m’ɔ fɛ i bɔbɔ wa’n toli’n i lika.’ (Sa Nga Be Yoli’n 20:28) I kunngba’n, akoto Piɛli seli asɔnun kpɛnngbɛn nga be kpali be sieli be ngunmin’n be kɛ: ‘An nian Ɲanmiɛn i bua fa’n m’ɔ fa be mannin amun’n be lika. Nán an yo i mianlɛ su, an yo i kɛ Ɲanmiɛn klo kɛ an yo’n sa. Nán an yo i kɛ amún wá ɲán like ti, sanngɛ an tu amun klun yo. Nán an tin be nga be fa be mannin amun kɛ an nian be su’n be su, sanngɛ an yo sa ng’ɔ ti kpa’n maan be nian su.’—1 Piɛr 5:1-3.
6. ?Ngue ti yɛ ɔ fata kɛ bua sunianfuɛ’m be nian Ɲanmiɛn i bua’m be lika kpa andɛ ɔ?
6 Ɔ fata kɛ asɔnun kpɛnngbɛn mɔ be ti bua sunianfuɛ’n, be nian Zezi m’ɔ ti “bua tafuɛ kpa’n” i ajalɛ’n su. (Zan 10:11) Ɲanmiɛn i bua’m be ndɛ loli i kpa. Ɔ maan, ɔ kan tinnin su kpa kɛ ɔ fata kɛ be nian be lika. I sɔ’n ti’n, ɔ seli Simɔn Piɛli kɛ ɔ ‘niɛn i bua mma’m be lika.’ (An kanngan Zan 21:15-17 nun.) Satan su kplin i ɲin kpa andɛ naan be nga be fali be wun mannin Ɲanmiɛn’n, be kaci be sin be si i. I sɔ’n ti’n, ɔ nin i fata kɛ asɔnun kpɛnngbɛn’m be nian bua’m be lika kpa. Satan jran fɔ m’ɔ o e nun’n i su, kpɛkun ɔ fa mɛn’n nun ninnge mun fa laka Zoova i bua mun naan be tɔ sa tɛ yolɛ’n nun. (1 Zan 2:15-17; 5:19) Be nga b’a jran Ɲanmiɛn i junman dilɛ’n, be sɔfuɛ mun yɛ be ɲanlɛ’n ti pɔpɔ ɔ. Ɔ maan, ɔ fata kɛ be uka be naan b’a ‘yo sa nga Ɲanmiɛn wawɛ’n kle be’n.’ (Galasifuɛ Mun 5:16-21, 25) Sɛ e waan é úka sran sɔ mun’n, ɔ fata kɛ e srɛ Ɲanmiɛn naan e lafi i su kpa. E yaci i wawɛ’n nun naan ɔ kle e atin. Yɛ e fa Ɲanmiɛn nuan Ndɛ’n e di junman kpa.—Nyanndra Mun 3:5, 6; Lik 11:13; Ebre Mun 4:12.
7. ?Ngue ti yɛ ɔ ti cinnjin man be nga be ti asɔnun kpɛnngbɛn’m be kɛ be nian be nga be ti kɛ bua sa’n be su ɔ?
7 Laa Izraɛli lɔ’n, bua tafuɛ’n le i waka kun m’ɔ fa kankan i bua mun ɔn. Kɛ bé wlú tuin’n nun annzɛ bé fíte’n, bua tafuɛ’n ‘sie be nzɔliɛ’ naan w’a si be nuan. (Saun Yolɛ 27:32; Mise 2:12; 7:14) I kunngba’n, Klistfuɛ nga be ti bua sunianfuɛ’n, ɔ fata kɛ be si Ɲanmiɛn i bua mun kpa naan be nian be lika be tinuntinun. (An nian Nyanndra Mun 27:23 nun.) I sɔ’n ti’n, Ɲanmiɛn i bua’m be su nianlɛ’n, ɔ ti ninnge cinnjin kpa’m be nun kun mɔ asɔnun kpɛnngbɛn’m be fa be ɲin sie su ɔ. I wie yɛle ajalɛ nga be fa naan b’a uka be nga Ɲanmiɛn sulɛ nun b’a tran ase’n. Zoova bɔbɔ seli kɛ ɔ́ wá kúnndɛ i bua mun naan ɔ́ nían be lika kɛ ɔ nin i fata’n sa. (Ezekiɛl 34:11) Ɔ maan, kɛ asɔnun kpɛnngbɛn’m be fa ajalɛ kunngba sɔ’n naan b’a uka be nga be trannin ase Ɲanmiɛn junman dilɛ’n nun naan be sa be sin Ɲanmiɛn i bua fa’n nun ekun’n, ɔ yo Ɲanmiɛn i fɛ.
8. ?Wafa sɛ yɛ asɔnun kpɛnngbɛn’m be kwla nian Ɲanmiɛn i bua’n i lika ɔ?
8 Sɛ aniaan kun kpinndinman naan be nga be nian Ɲanmiɛn i bua fa’n su’n, be ko niɛn i osu’n, i sɔ’n wlɛ i fanngan dan kpa. Sɛ sran kun kpinndinman Ɲanmiɛn ninnge’m be nun’n, ajalɛ kunngba’n yɛ ɔ fata kɛ be fa ɔ. Kɛ be kɔ i osu nianlɛ’n, be kwla kanngan Ɲanmiɛn Ndɛ’n nun. Be kwla koko Biblu’n i akua kun i nun ndɛ wie su yalɛ. Be kwla koko aɲia’n i bo lɔ ndɛ cinnjin’m be su yalɛ. Be nin aniaan sɔ’n be kwla srɛ Ɲanmiɛn likawlɛ. Yɛ be kwla yo like uflɛ wie ekun. Be kwla se i kɛ aniaan’m be waan be wla lo i naan ɔ bla aɲia’m be bo ekun. (2 Korɛntfuɛ Mun 1:3-7; Zak 5:13-15) Sɛ be ko nian aniaan sɔ’n i osu’n, annzɛ be flɛ i telefɔnu nun annzɛ be klɛ i fluwa’n, i sɔ’n kwla ukɛ i kpa wie. Be nga b’a tran ase Ɲanmiɛn i sulɛ nun be ukalɛ’n, ɔ kwla man asɔnun kpɛnngbɛn nga be uka be’n, be aklunjuɛ kpa wie.
Maan e kwlaa e mian e ɲin e uka be
9, 10. ?Ngue ti yɛ e kwla se kɛ nán asɔnun kpɛnngbɛn’m be ngunmin yɛ ɔ fata kɛ be uka be nga b’a jran Ɲanmiɛn sulɛ’n niɔn?
9 Blɛ mɔ e o nun yɛ’n, be ti ɲanlɛ ti kekle. Ɔ maan, kɛ e kɔ aɲia’m be bo’n, ɔ cɛman naan e ɲin w’a kpa be nga be baman kun’n, ɔ nin be nga b’a to fuan atin’n, be su. (Ebre Mun 2:1) Sanngɛ Zoova klo i bua mun kpa liɛ su. Wafa kunngba nga sran’n i wunnɛn’n i likalika’m be ti i cinnjin’n, Zoova kusu i bua’m be tinuntinun be ti i cinnjin kpa wie. I sɔ’n ti’n, ɔ fata kɛ e kwlaa, maan e niaan’m be ndɛ lo e kpa liɛ su naan e nian e wiengu lika kpa. (1 Korɛntfuɛ Mun 12:25) ?I sɔ yɛ e yo ɔ?
10 Kannzɛ bɔbɔ asɔnun kpɛnngbɛn mun yɛ be dun mmua e ɲrun be kunndɛ be nga b’a tran ase Ɲanmiɛn sulɛ nun naan b’a uka be’n, sanngɛ junman sɔ’n timan be kunngba be liɛ. Asɔnunfuɛ’m be onga’m be kwla uka asɔnun kpɛnngbɛn mun naan b’a uka aniaan sɔ mun. Be kwla wla be niaan bla nin be niaan bian nga b’a jran Ɲanmiɛn sulɛ’n be fanngan, naan b’a sa be sin Ɲanmiɛn i bua fa’n nun ekun. ?Sanngɛ wafa sɛ yɛ bé úka aniaan sɔ mun ɔn?
11, 12. ?Wafa sɛ yɛ be ng’ɔ fata kɛ be uka be’n, be ukalɛ’n ti e cenjele like ɔ?
11 Wie liɛ’n, jasin fɛ’n bofuɛ nga w’a jran jasin fɛ’n bolɛ’n i osu w’a cɛ’n, ɔ klo kɛ be ukɛ i. Sɛ ɔ ti sɔ’n, asɔnun kpɛnngbɛn’m be kwla se jasin bofuɛ kun mɔ i ɲin w’a ti Ɲanmiɛn ninnge’m be nun’n kɛ ɔ kle i Biblu’n nun like. Be yo sɔ naan i sɔfuɛ’n klo Zezi kɛ ‘nga ɔ fa kloli i laa’n sa.’ (Sa Nglo Yilɛ 2:1, 4) Ninnge nga kɛ ɔ yacili asɔnun’n nun balɛ’n, e suannin be’n, sɛ be fa kle i’n, ɔ kwla wlɛ i fanngan.
12 Asɔnun kpɛnngbɛn’m be kwla se kɛ e nin jasin fɛ’n bofuɛ nga w’a jran jasin fɛ’n bolɛ junman’n i osu w’a cɛ’n e suan Biblu’n nun like. Sɛ be se e sɔ’n, maan e srɛ Zoova naan ɔ kle e atin naan y’a ukɛ i sɔfuɛ’n. Nanwlɛ, ‘like nga e waan é yó’n, e fa wla Anannganman sa nun. Sɛ e fa wla Anannganman sa nun’n, nga e sunnzun’n ɔ́ kpɛ́n su.’ (Nyanndra Mun 16:3) Biblu’n nun ndɛ mma nin ndɛ uflɛ wie mɔ be kwla yo maan be lafi Ɲanmiɛn su kpa mɔ e kwla koko su yalɛ’n, maan e bu be su akunndan. Yɛ e bu akoto Pɔlu i ajalɛ’n i akunndan wie. (An kanngan Rɔmfuɛ Mun 1:11, 12 nun.) Pɔlu guguli kɛ ɔ́ wún aniaan nga be o Rɔmu lɔ’n be wun naan ɔ nin bé kókó Ɲanmiɛn ninnge’m be su yalɛ naan be jran kekle. Ɔ kunndɛli kɛ be wla be wun fanngan. ?Kɛ e kunndɛ kɛ é úka be nga be nunman Ɲanmiɛn i bua fa’n nun kun’n, nɛ́n i sɔ yɛ ɔ fata kɛ e yo ɔ?
13. ?Kɛ e nin jasin bofuɛ nga w’a jran jasin fɛ’n bolɛ junman’n é súan like’n, yalɛ benin yɛ ɔ fata kɛ e nin i koko ɔ?
13 Kɛ e nin jasin bofuɛ nga w’a jran jasin fɛ’n bolɛ junman’n é súan like’n, e kwla usɛ i kɛ: “?Wafa sɛ yɛ a suannin nanwlɛ ndɛ’n niɔn?” Wafa ng’ɔ dili ninnge wie’m be su aklunjuɛ laa’n, maan e wlɛ i fanngan naan ɔ nin e koko su yalɛ. Ɔ kwla yo aɲia’m be bo m’ɔ ɔli’n, ɔ nin jasin fɛ’n m’ɔ boli’n, ɔ nin aɲia dandan’m be bo’n m’ɔ wɔli’n, ɔ nin batɛmu’n m’ɔ yoli’n. Maan e kan wafa nga e kwlaa e dili aklunjuɛ asɔnun’n nun’n, i ndɛ. Maan e kan aklunjuɛ nga kɛ e fa e wun mantan Zoova’n, e di’n i ndɛ. (Zak 4:8) Sa kwlaa m’ɔ tɔ e su’n, wafa nga Ɲanmiɛn fɔnvɔ e’n, ɔ nin e wla mɔ e kwla fa guɛ i su’n, i su ye mɔ e si’n, e kɛn i ndɛ.—Rɔmfuɛ Mun 15:4; 2 Korɛntfuɛ Mun 1:3, 4.
14, 15. ?Suralɛ benin yɛ be nga be jrannin jasin fɛ’n i bolɛ w’a cɛ’n be ɲɛnnin i mɔ e kwla fa kpɛn be wla ɔ?
14 I nun mɔ aniaan’n di asɔnun’n nun junman kpa’n, wafa nga Ɲanmiɛn rɛli i su’n, sɛ e fa kpɛn i wla’n, i sɔ’n kwla ukɛ i kpa. Ɔ kwla yo aklunjuɛ nga kɛ ɔ́ wún Ɲanmiɛn Ndɛ’n nin i klun sa’n be wlɛ kpa’n kɔ́’n, ɔ dili’n. (Nyanndra Mun 4:18) I nun m’ɔ te ‘yo like nga Ɲanmiɛn wawɛ’n kle’ i’n, sa tɛ yolɛ’n i ɲrun kekle jranlɛ’n ti pɔpɔ mɛn i. (Galasifuɛ Mun 5:22-26) Ɔ maan i klun akunndan’n bumɛn i fɔ yɛ ɔ kwla srɛ Zoova naan i ‘wun w’a jɔ i fɔuun. Aunjuɛ sɔ’n maan i wla’n w’a boman, yɛ i akunndan’n w’a sannganman.’ (Filipfuɛ Mun 4:6, 7) Maan e fɛ i sɔ ajalɛ mun e sie e klun. Maan e kle be kɛ be ndɛ lo e naan e tu e klun e uka e niaan sɔ mun naan be sa be sin Ɲanmiɛn i bua fa’n nun ekun.—An kanngan Filipfuɛ Mun 2:4 nun.
15 Maan ɔ yo e kɛ e ti asɔnun kpɛnngbɛn m’ɔ su ko nian aniaan wie’m be osu’n sa. Sɛ aniaan kun nin i yi mɔ be jrannin jasin fɛ’n bolɛ w’a cɛ’n yɛ e ɔli be osu nianlɛ’n, e kwla se be kɛ be bu i klikli nun mɔ be suannin Ɲanmiɛn Ndɛ’n nanwlɛ’n, i akunndan be nian. Blɛ sɔ’n nun’n, ndɛ nanwlɛ nga be suannin’n, ɔ yoli be fɛ, be wun kpajali be yɛ ndɛ sɔ mɔ be wunnin i wlɛ’n ti’n, be ɲannin be ti! (Zan 8:32) Kɛ be suannin Zoova nin i sran klolɛ nin i klun sa’m be su like’n, be lɛli i ase dan kpa. (An nian Lik 24:32 nun.) Maan e fa wafa nga be nin Zoova be afiɛn’n mantannin kpa’n, e kpɛn be wla. Kpɛkun Ɲanmiɛn srɛlɛ m’ɔ ti Klistfuɛ nga be fali be wun mannin Ɲanmiɛn’n be cenjele like’n, maan e fa kpɛn be wla wie. Maan e tu e klun e wla be nga b’a jran jasin fɛ’n i bolɛ w’a cɛ’n be fanngan naan be wa bo Zoova e ‘Ɲanmiɛn mɔ be bo i dunman fɛ titi’n i jasin fɛ’n’ i ekun.—1 Timote 1:11.
Maan e kle kɛ e klo be titi
16. Wafa nga kɛ be tu be klun be uka sran kun Ɲanmiɛn ninnge’m be nun’n, i bo’n gua kpa’n, an fa ndɛ kun yiyi nun.
16 ?Ajalɛ sɔ’m be kwla uka e sakpa? Ɛɛn be kwla uka e. Maan e fa gbanflɛn kun i ndɛ’n e nian. Kɛ ɔ́ bó jasin fɛ’n i bolɛ’n i bo’n, nn ɔ le afuɛ 12. Sanngɛ kɛ ɔ wa ɲannin afuɛ 15, ɔ jrannin jasin fɛ’n i bolɛ. I sin’n, ɔ wa sɛli i sin boli jasin fɛ’n ekun. Ɔ wa yoli blɛ kwlaa nun Ɲanmiɛn junman difuɛ afuɛ kɔe lele 30 tra su. Sɛ ɔ kwla sɛli i sin asɔnun’n nun ekun’n, ɔ fin ukalɛ mɔ asɔnun kpɛnngbɛn kun ukɛli i’n. Nanwlɛ, ukalɛ mɔ asɔnun kpɛnngbɛn sɔ’n ukali aniaan’n, ɔ sili su ye dan kpa!
17, 18. ?Sɛ e waan é úka e wiengu nga w’a tu Ɲanmiɛn i bua fa’n nun’n, nzuɛn benin yɛ ɔ nin i fata kɛ e yi i nglo ɔ?
17 Ɲanmiɛn nin sran klolɛ’n yɛ maan Klistfuɛ’m be tu be klun be uka jasin fɛ’n bofuɛ nga b’a jran jasin fɛ’n bolɛ junman’n naan b’a sa be sin Ɲanmiɛn i bua fa’n nun ɔn. Zezi kɛnnin i sɔnnzɔnfuɛ’m be ndɛ kɛ: ‘Ḿ mán amun mmla kun ekun: an klo amun wiengu. Klolɛ nga n fa kloli amun’n, amun kusu an fa klo amun wiengu sɔ. Sɛ an klo amun wiengu’n, i sɔ’n nun yɛ sran’m be kwlaa bé sí kɛ an ti n sɔnnzɔnfuɛ ɔ.’ (Zan 13:34, 35) Nanwlɛ, Ɲanmiɛn nin sran klolɛ’n yɛ ɔ ti Klistfuɛ kpa’m be nzɔliɛ ɔ. ?Ɔ maan, ɔ nin i fataman kɛ e klo Klistfuɛ nga b’a jran jasin fɛ’n bolɛ junman’n i osu w’a cɛ’n? I yo, ɔ ti su. Sanngɛ kɛ é úka be’n, ɔ nin i fata kɛ e yi Klistfuɛ nzuɛn’n i nglo.
18 ?Sɛ e waan é úka e wiengu nga w’a tu Ɲanmiɛn i bua fa’n nun’n, nzuɛn benin yɛ ɔ nin i fata kɛ e yi i nglo ɔ? Nán klolɛ ngunmin yɛ ɔ fata kɛ e klo be ɔ. Sanngɛ maan be yo e annvɔ, e yo be kpa, e yo wɛtɛɛfuɛ, yɛ e blu sa’m be su. Ɔ ju wie bɔbɔ’n, e kwla yaci be wun sa cɛ be. Pɔlu klɛli kɛ: ‘Maan sran’m be yo amun annvɔ, an yo be kpa, an yo amun wun aenvuɛ, an yo wɛtɛɛfuɛ, yɛ an blu sa’m be su. An fa like sɔ mun cici amun ti. Sa nga amun wiengu yo mɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i. Klist yacili sa nga an yoli i’n cɛli amun, ɔ maan amun kusu, sa nga be yo amun’n, an yaci cɛ. Yɛ sa ng’ɔ ti cinnjin trɛ i ngba mɔ maan i kwlaa sɔ’n kwla yo ye’n yɛle kɛ an klo amun wiengu.’—Kolɔsfuɛ Mun 3:12-14.
19. ?Ngue ti yɛ ɔ nin i fata kɛ e mian e ɲin e uka bua nga b’a mlin’n naan be sa be sin Ɲanmiɛn i bua fa’n nun ɔn?
19 Like suanlɛ ng’ɔ́ bá lɛ nun’n, é wá wún like nga ti yɛ sran wie’m be tu Ɲanmiɛn i bua fa’n nun’n. Asa kusu’n, wafa ng’ɔ fata kɛ e sɔ be nga be sa be sin’n be nun’n, é wá kɛ́n i ndɛ. Kɛ é wá súan like sɔ’n mɔ é wá bú su akunndan’n, e ɲin mɔ e mian e uka be nga be ti kɛ bua sa’n, naan be sa be sin Ɲanmiɛn i bua fa’n nun’n, maan e lafi su kɛ ɔ timan ngbɛn. Mɛn nga nun’n, aɲanbeun kunndɛlɛ ngboko’n yɛ sran kpanngban be fa cici be ti ɔ. Sanngɛ sran kunngba cɛ i nguan’n ti cinnjin tra mɛn’n nun sika wunmuan’n. Zezi fali bua m’ɔ mlinnin’n i su sunnzun ase fa tinnin su kpa kɛ e nguan’n ti like cinnjin kpa. (Matie 18:12-14) Maan e nanti afɔtuɛ sɔ’m be su naan e uka bua nga b’a mlin’n naan be sa be sin Zoova i bua fa’n nun.
?Amún tɛ́ su sɛ?
• ?Wafa sɛ yɛ aɲinyiɛ su asɔnun kpɛnngbɛn’m be kwla uka be nga be nunman Ɲanmiɛn i bua fa’n nun kun ɔn?
• ?Wafa sɛ yɛ e kwla uka jasin fɛ’n bofuɛ nga b’a jran jasin fɛ’n bolɛ junman’n i osu w’a cɛ’n niɔn?
• ?Sɛ e waan é úka e wiengu nga w’a tu Ɲanmiɛn i bua fa’n nun’n, nzuɛn benin yɛ ɔ nin i fata kɛ e yi i nglo ɔ?
[Foto, bue 17]
Asɔnun kpɛnngbɛn’m be tu be klun be uka be nga be nunman Ɲanmiɛn i bua fa’n nun kun’n.