?Ɲanmiɛn le dunman?

Wafa nga sran sunman be tɛ su’n:

▪ “I dunman yɛle Ɲanmiɛn.”

▪ “Ɔ leman dunman.”

?Ngue ndɛ yɛ Zezi kannin ɔn?

▪ “I sɔ’n ti’n, amun liɛ’n, an se kɛ: ‘E si bɔ a o nyanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Nyanmiɛn nin-ɔn [Maan ɔ dunman’n ɔ yo sanwun, NW].’” (Matie 6:9) Zezi si kɛ Ɲanmiɛn le dunman.

▪ “N yoli maan be sili ɔ dunman’n, yɛ ń yó maan bé sí i ekun naan klolɛ nga a fa kloli min’n, be si kɛ a klo be sɔ wie, yɛ be si kɛ min nin be y’a yo sran wunmuan.” (Zan 17:26, NW) Zezi yoli maan sran’m be sili Ɲanmiɛn dunman’n.

▪ “An su wun-man min kun lele saan amún sé kɛ: ‘Sran ng’ɔ ba e Min Nyanmiɛn’n [Zoova, NW] i dunman nun’n, maan Nyanmiɛn [Zoova] yo i liɛ ye.’” (Lik 13:35; Jue Mun 118:26) Zezi fali Ɲanmiɛn i dunman’n flɛli i.

ƝANMIƐN bɔbɔ bo i dunman’n kle e. Be klɛli i kɛ: “N ti Anannganman [Zoova, NW], min dunman’n yɛ o lɛ-ɔ.”a (Ezai 42:8) Ɲanmiɛn dunman Ebre nun’n, wawle’n kaci i kɛ Zoova. I klikli nun’n, kɛ be klɛli Ɲanmiɛn Ndɛ’n, Ɲanmiɛn dunman Ebre nun’n o nun kpɛ akpiakpi kpanngban. Atrɛkpa’n i sɔ’n kwla bo amun nuan. I kpa’n, Biblu’n nun’n, be bo dunman sɔ’n su kpɛ sunman tra dunman uflɛ mun.

Sɛ be usa sran wie’m be kɛ: “?Ɲanmiɛn dunman’n yɛle benin?” Bé sé kɛ: “I dunman’n yɛle Ɲanmiɛn.” Sɛ be se sɔ’n, nn b’a tɛman kosan’n su. Afin ɔ ti kɛ be usa sran kun kɛ: “?Kɛ be yoli vote’n, wan yɛ ɔ ɲɛnnin i ɔ?” Kpɛkun ɔ tɛ su kɛ: “Sran nga i waan be vote i’n yɛ ɔ ɲɛnnin i ɔ.” Nanwlɛ sɛ ɔ se sɔ’n, w’a tɛman kosan’n su. Sɛ e se kɛ Ɲanmiɛn i dunman’n yɛle Ɲanmiɛn’n, i kunngba’n niɔn.

?Ngue ti yɛ Ɲanmiɛn boli i dunman kleli e ɔ? Ɔ yoli sɔ naan y’a kwla si i kpa. Maan e fa sunnzun ase kun e nian. Ɔ ju wie’n, be kwla flɛ sran kun kɛ nja, annzɛ baba, annzɛ nannan. I sɔ mɔ be flɛ i’n kle i sran wafa nga ɔ ti’n. Sanngɛ i dunman’n yo maan like kwlaa nga e si i sran sɔ’n su’n, e wla kpɛn su. I kunngba’n, tɔnndɔnlɛ dunman kɛ e Min, Ɲanmiɛn mɔ like fi nunmɛn i sin, e Si, annzɛ Like Yifuɛ’n, be fa e ɲin sie i junman wafawafa nga Ɲanmiɛn di be’n, be su. Sanngɛ ninnge kwlaa nga e si be Ɲanmiɛn su’n, saan i dunman Zoova’n yɛ ɔ yo maan e wla kpɛn be su ɔ. ?Sɛ e siman Ɲanmiɛn dunman’n, ɔ́ yó sɛ naan y’a kwla si i kpa?

Ɔ ti cinnjin kpa kɛ e si Ɲanmiɛn dunman’n. Sanngɛ nɛ́n i ngba ɔ. Ɔ ti cinnjin kpa kɛ e fa flɛ i wie. ?Ngue ti ɔ? Afin Biblu’n se e kɛ: “Sran kwlaa ng’ɔ flɛ e Min Nyanmiɛn’n [Zoova, NW], ɔ́ fíte nun.”—Rɔmfuɛ Mun 10:13; Zoɛl 3:5.

[Ja ngua lɛ ndɛ’n]

[Ndɛ kwle, bue 6]

Ɔ ju wie’n, be kwla flɛ sran kun kɛ nja, annzɛ baba, annzɛ nannan. Sanngɛ i dunman’n yo maan like kwlaa nga e si i sran sɔ’n su’n, e wla kpɛn su.