?Amun si sɔ?

?Ngue ti yɛ jasin fɛ’n nga akoto Pɔlu boli i Efɛzi lɔ’n ti’n, sika tɔnfuɛ’m be trili ɔ?

Efɛzi lɔ sika tɔnfuɛ’m be ɲannin be wun kpa afin be fa “jɛtɛ ufue tɔnnin Artemis i sua.” Be waan sɛ bé wú ba o, sɛ be fie’n yó ye o, sɛ koniɛn difuɛ’m bé ɲán nnɛn o, ɔ fin Artemis. (Sa Nga Be Yoli’n 19:24) Be nga be sɔ Artemis’n be waan i amuin ba’n, ‘ɔ fin nyanmiɛn su tɔli’ yɛ be fa sieli i Efɛzi lɔ Artemis i sua’n nun lɔ. (Sa Nga Be Yoli’n 19:35) Artemis i sua sɔ’n ti laa mɛn nun ninnge kpakpa nso’m be nun kun. Afuɛ nuan kwlaa’n, Artemis i sufuɛ kpanngban be kɔ Efɛzi lɔ Marsi nin Avrili anglo’n nun. Be ko di cɛn be mɛnmɛn i. Sran kpanngban sɔ mɔ be kɔ’n, be to Artemis i sɔlɛ ninnge mun. Be to wie kɛ bé fá síe annzɛ kusu bé fá sásá be wun. Be to wie ekun kɛ bé fá sɔ́ amuin bla sɔ’n be ja nun lɛ, annzɛ kɛ be sa be sin be klɔ lɔ’n, be nin be awlofuɛ’m bé sɔ́ i. Ndɛ wie mɔ be klɛli be laa Efɛzi lɔ’n, be kan sika ɔkwlɛ annzɛ jɛtɛ ufue nga be fa yi Artemis kɛ sran sa’n, be ndɛ. Ndɛ wie’m be kusu be kan sika tɔnfuɛ’m be anuannzɛ’n i ndɛ.

Pɔlu kleli kɛ “like ng’ɔ ti sran sa nuan like’n, ɔ fataman kɛ be sɔ i.” (Sa Nga Be Yoli’n 19:26) Ɔ maan sika tɔnfuɛ’m be wunnin kɛ like ng’ɔ man be aliɛ’n, ɔ su wa fi be sa. I sɔ’n ti’n, be wlawlali sran mun naan be tanndan Pɔlu i jasin fɛ’n bolɛ’n i ɲrun. Demetriisi m’ɔ ti sika tɔnfuɛ’m be nun kun’n, ɔ kannin srɛ ng’ɔ kunnin be’n i ndɛ. Ɔ seli kɛ: “Sa sɔ’n, nán kɛ e junman’n bɔ bé wá sé kɛ ɔ ti-man kpa’n i ngunmin ti ɔ, sanngɛ ɔ cɛ-man naan b’a saci Artemis b’ɔ ti amuɛn bla dan’n i sua’n, yɛ Artemis bɔbɔ bɔ Azifuɛ’m be nin mɛn nunfuɛ’m be kwlaa be sɔ i’n, i nyrun b’ɔ lɛ’n ɔ́ wíe.”—Sa Nga Be Yoli’n 19:27.