Sran nga be yo sa i nuan su’n bé mánmán Ɲanmiɛn tititi
“Sran ng’ɔ yo sa i nuan su’n, be wla fi-mɛn i su. [...] Nyanmiɛn nin i be bo sɛ titi.”—JUE MUN 112:6, 9.
1. (a) ?Like ɲɛnmɛn benin yɛ sran nga be yo sa i nuan su Ɲanmiɛn ɲrun’n, bé ɲɛ́n i ɔ? (b) ?Kosan benin yɛ e kwla fa usa e wun ɔn?
NANWLƐ, sran nga Ɲanmiɛn ɲrun’n be yo sa i nuan su’n, bé ɲán like ɲɛnmɛn kpa kun! Bé kwlá súan Zoova i nzuɛn klanman’n i su like kpa ekun tititi. Kɛ́ bé súan Ɲanmiɛn i ninnge ng’ɔ yili be’n be su like kpa kɔ́ be ɲrun’n, aklunjuɛ’n ti’n i manmanlɛ’n su wieman le. Ninnge ng’ɔ fata kɛ be yo naan b’a di i sɔ aklunjuɛ’n, be nun cinnjin kun mɔ Jue Mun 112 kɛn i ndɛ’n, yɛle ‘sa i nuan su yolɛ’n.’ ?Sanngɛ wafa sɛ yɛ klɔ sran m’ɔ fɔ o be nun’n, be kwla yo sa i nuan su Ɲanmiɛn Zoova mɔ i nzuɛn nin klɔ sran liɛ’n timan kun’n, m’ɔ yo sa i nuan su’n, i ɲrun ɔn? Afin kannzɛ maan e mian e ɲin kɛ é yó like ng’ɔ ti kpa’n sɛ, sanngɛ e fɔn. Ɔ ju wie bɔbɔ’n e fɔn tɛ kpa.—Rɔmfuɛ Mun 3:23; Zak 3:2.
2. ?Klolɛ su’n, abonuan sa nɲɔn benin yɛ Zoova yoli be ɔ?
2 Klolɛ su’n, Zoova yoli maan klɔ sran’m be kwla yo sran kpa i ɲrun. ?Wafa sɛ? I klikli’n, ɔ yoli abonuan sa kun. Yɛle kɛ ɔ fɛli i Wa m’ɔ klo i’n, i nguan’n wlɛli i talua kun m’ɔ nin a siman bian’n i ku sɛ nun. Ɔ maan kɛ bé wú i’n fɔ nunmɛn i nun. (Lik 1:30-35) I sin’n, kɛ Zezi i kpɔfuɛ’m be kunnin i’n, Zoova yoli abonuan sa uflɛ kun ekun. Ɔ cɛnnin i. Zezi yoli aolia nun sran m’ɔ le ɲrun’n.—1 Piɛr 3:18.
3. ?Ngue ti yɛ ɔ yoli Ɲanmiɛn fɛ kɛ ɔ mɛn i Wa’n i nguan ɲanmiɛn su lɔ ɔ?
3 Zoova cɛli Zezi i like kun mɔ kwlaa naan w’a ba asiɛ’n su wa’n, ɔ lemɛn i ɔ. Yɛle kɛ ɔ yoli maan i Wa’n trán ɲanmiɛn su lɔ yɛ ɔ kwlá wuman kun mlɔnmlɔn. (Ebre Mun 7:15-17, 28) Ɔ yoli Zoova fɛ kɛ ɔ yo i sɔ like’n man Zezi. Afin kɛ be kleli i ɲrɛnnɛn’n, w’a kpɔciman Ɲanmiɛn le. Zezi kusu yoli like ng’ɔ ti kpa trɛ i ngba’n, ɔ maan i Si klun jɔli. Yɛle kɛ ato nga Satan buɛli i kɛ nán klolɛ ti yɛ sran’m be su Ɲanmiɛn naan like kun ti yɛ be su i’n, ɔ kpɛli nun.—Nyanndra Mun 27:11.
4. (a) ?Kɛ Zezi sɛli i sin ɲanmiɛn su lɔ’n, ngue yɛ ɔ yoli mannin e ɔ? ?Yɛ ngue yɛ Zoova yoli ɔ? (b) ?Like nga Zoova nin Zezi be yoli mannin e’n, e tinuntinun’n ɔ yo e sɛ?
4 Kɛ Zezi ɔli ɲanmiɛn su lɔ’n, ɔ yoli like kpa kun ekun. Yɛle kɛ “ɔ ɔli nyanmiɛn bɔbɔ’n su lɔ Nyanmiɛn wun lɔ,” kpɛkun “ɔ fɛli i bɔbɔ i mmoja’n” i gua’n kleli Ɲanmiɛn. Kɛ ɔ yoli sɔ’n, e Si m’ɔ o ɲanmiɛn su lɔ’n, ɔ sɔli Zezi ‘i wun ng’ɔ fa yili e ti tɛ naan Nyanmiɛn yaci sa nga e yoli i’n cɛ ye’n,’ i nun klanman. I sɔ’n ti’n, e ‘klun mɔ titiman e’n’ ti’n, e kwla “su Nyanmiɛn b’ɔ lafiman’n.” Nanwlɛ i sɔ wla e fanngan maan e kwla fa ndɛ ng’ɔ o Jue Mun 112 nun’n i su wie. Ɔ se kɛ: “An manman Anannganman!”—Ebre Mun 9:12-14, 24; 1 Zan 2:2.
5. (a) ?Ngue yɛ ɔ fata kɛ e yo naan Ɲanmiɛn w’a bu e sran kpa titi ɔ? (b) ?Wafa sɛ yɛ be klɛli Jue Mun 111 nin 112 mun ɔn?
5 Sɛ e kunndɛ kɛ Ɲanmiɛn bu e sran kpa’n titi’n, ɔ fata kɛ e lafi Zezi i mmoja ng’ɔ guɛli i ase’n i su. Klolɛ mɔ Zoova klo e dan’n ti’n, nán e yaci i ase lalɛ cɛn ba kun sa le. (Zan 3:16) Asa ekun’n, ɔ fata kɛ e suan Ɲanmiɛn Ndɛ’n yɛ e mian e ɲin naan e nanti su. Be nga be kunndɛman kɛ be klun titi be Ɲanmiɛn ɲrun’n, be kwla ɲan afɔtuɛ kpa Jue Mun 112 nun. Jue sɔ’n, ɔ nin Jue Mun 111 be kɔ likawlɛ. Laa kɛ bé klɛ́ jue sɔ mun Ebre aniɛn’n nun’n, be boli be bo kɛ: “An manman Ya!” I sin’n be klɛli ndɛ ɲanman 22. Ndɛ ɲanman kun bo i bo nin Ebre aniɛn’n nun fluwa mma kun.a
Like nga ti yɛ e kwla di aklunjuɛ’n
6. ?Ngue ti yɛ “sran” nga i ɲin yi Ɲanmiɛn mɔ Jue Mun 112 kɛn i ndɛ’n, ɔ́ ɲán ye ɔ?
6 “Sran nga i nyin yi Anannganman’n, bɔ Anannganman i mmla’m be su falɛ’n ɔ yo i fɛ’n, i liɛ su ti ye! I osu’n nunfuɛ nga bé wá jáso su’n bé wá yó sran waka-waka mun, afin sran nga be ti sɛsɛfuɛ’n, Anannganman maan bé nyán ye.” (Jue Mun 112:1, 2) Maan e fa e ɲin e sie su kɛ jue tofuɛ’n dun mmua kan “sran” kun i ndɛ. Kpɛkun i ndɛ mma 2 i bo gualɛ’n su’n, ɔ kan sran kpanngban be ndɛ siɛn’n, afin ɔ se kɛ “sran nga be ti sɛsɛfuɛ’n.” I sɔ’n kle kɛ sran mɔ Jue 112 sɔ’n kɛn i ndɛ’n, ɔ kwla yo sran akpasua kun. Akoto Pɔlu i ndɛ kun mɔ Ɲanmiɛn wawɛ’n maan ɔ kannin’n, ɔ kle kɛ ɔ ti sɔ sakpa. Ɔ fali Jue Mun 112:9 kannin Klistfuɛ klikli’m be ndɛ. (An kanngan 2 Korɛntfuɛ Mun 9:8, 9 nun.) Nanwlɛ, wafa nga Klist i sɔnnzɔnfuɛ nga be o asiɛ’n su wa andɛ’n be kwla di aklunjuɛ’n, jue sɔ’n kɛn i ndɛ’n klanman!
7. ?Ngue ti yɛ ɔ fata kɛ Ɲanmiɛn i sufuɛ’m be ɲin yi i ɔ? ?Yɛ wafa sɛ ɔ fata kɛ e bu Ɲanmiɛn i mmla’m be su nantilɛ’n niɔn?
7 Kɛ nga Jue Mun 112:1 fa kan’n sa’n, kɛ mɔ Klistfuɛ kpa sɔ’m be “nyin yi Anannganman’n” ti’n, be di aklunjuɛ. I sɔ aɲinyiɛ’n mɔ i ti be kunndɛman kɛ bé yó sa wie mɔ Ɲanmiɛn klomɛn i’n, ɔ uka be naan b’a buman akunndan nga Satan i mɛn nunfuɛ’m be bu’n wie. Like ‘ng’ɔ yo be fɛ’n,’ yɛle Ɲanmiɛn Ndɛ’n i suanlɛ ɔ nin i nun mmla’n be su be nantilɛ. I wie yɛle mmla ng’ɔ se kɛ be bo Ɲanmiɛn Sielɛ’n i jasin fɛ’n mɛn wunmuan’n nun’n. Be mian be ɲin be uka sran mun naan be kaci Zezi i sɔnnzɔnfuɛ. Kɛ ɔ́ yó sɔ’n, be wla klunwifuɛ’m be su nun kɛ Ɲanmiɛn i jɔlɛ dilɛ cɛn’n su wa ju.—Ezekiɛl 3:17, 18; Matie 28:19, 20.
8. (a) ?Wafa sɛ yɛ be nga be tu be klun be su Ɲanmiɛn andɛ’n be ɲan ye ɔ? (b) ?Ngue ye yɛ be nga be lafi su kɛ bé trán asiɛ’n su wa’n, bé ɲɛ́n i ɔ?
8 Mmla kɛ ngalɛ’n sa’m be su falɛ’n ti’n, andɛ Ɲanmiɛn i sufuɛ’m be su wa ju miliɔn nso. ?Wan yɛ ɔ́ sí i akplowa kɛ Ɲanmiɛn nvle nunfuɛ mun ‘be yoli sran waka-waka’ ɔ? (Zan 10:16; Sa Nglo Yilɛ 7:9, 14) Kɛ Ɲanmiɛn wá yó maan i klun sa’n kpɛ́n su’n, “bé nyán ye” ekun! Kɛ “afɛ dan’n” wá bá’n, be nga be lafi su kɛ bé trán asiɛ’n su wa’n, bé fín nun fíte. Be yɛ bé yó “asiɛ uflɛ” mɔ lɔ yɛ be nga be yo ‘sa kpa’n bé trán’n’ niɔn. Kɛ ɔ́ kɔ́ i ɲrun’n, be nga be fin Armagedɔn alɛ nun’n fiteli’n, “bé nyán ye” kpa ekun. Bé kwlá sɔ́ sran akpinngbin nga bé wá cɛ́n’n be nun. Ɔ́ wá yó ɲɛnmɛn o! I agualiɛ su’n, sran nga Ɲanmiɛn i mmla’m be su falɛ’n ‘ɔ yo be fɛ’n,’ fɔ su tranman be nun kun. Kpɛkun “nyrun nga Nyanmiɛn mma’m bé nyɛ́n i cɛn nga bé nyán alaje’n, be dunman’n tɛ́ nun wie.”—2 Piɛr 3:13; Rɔmfuɛ Mun 8:21.
Be fa be aɲanbeun’n be yo like kpa
9, 10. ?Wafa sɛ yɛ Klistfuɛ kpa’m be fali be aɲanbeun’n dili junman ɔn? ?Yɛ wafa sɛ yɛ be sa kpa nga be yoli’n, ɔ́ ká lɛ tititi ɔ?
9 “I sɔ sran liɛ’n, muae nin aunnyan’n bɔ cɛ yɛ ɔ́ trɛ́n i awlo’n nun-ɔn. Nyanmiɛn nin i be bo sɛ́ titi. Sran nga be ti sɛsɛfuɛ mun’n, be liɛ’n, kɛ aosin’n ɔ wla tuun’n, kpɛkuun Nyanmiɛn w’a man be kannin. Sran ng’ɔ yaci sa cɛ’n, b’ɔ si aunnvuɛ’n, b’ɔ yo sa i nuan su’n, i kunngba nin-ɔn.” (Jue Mun 112:3, 4) Laa’n, Ɲanmiɛn i sufuɛ wie’m be yoli aɲanbeunfuɛ kpa. Be nga Ɲanmiɛn i klun jɔ be wun’n, be ɲannin be wun wafa uflɛ. Kusu’n, ɔ ti su kɛ be nga be lo be wun be man Ɲanmiɛn’n, be nun sunman be kwla yo yalɛfuɛ. Ɔ maan kɛ nga be fa yoli i Zezi i blɛ su’n sa’n, sran’m be buman be sran. (Lik 4:18; 7:22; Zan 7:49) Kannzɛ sran kun ti aɲanbeunfuɛ, annzɛ yalɛfuɛ’n, ɔ kwla yo aɲanbeunfuɛ Ɲanmiɛn ninnge’m be nun.—Matie 6:20; 1 Timote 6:18, 19; an kanngan Zak 2:5 nun.
10 Klistfuɛ nga be kpali be sieli be ngunmin’n, be nin be niaan’m be yoman be Ɲanmiɛn ninnge’m be nun aɲanbeun’n i su awɛn. Sanngɛ Satan i mɛn tuun nga nun’n, be kpaja kɛ “kannin” sa “sran nga be ti sɛsɛfuɛ mun’n” be bo. Wafa nga be yo i sɔ liɛ’n yɛle kɛ be uka sran mun naan be si Ɲanmiɛn yɛ be ɲan ngwlɛlɛ m’ɔ fin i’n. Be nga be tanndan e ɲrun’n, be kunndɛli kɛ bé yó naan e yaci Ɲanmiɛn Sielɛ’n i jasin fɛ’n i bolɛ, sanngɛ w’a yoman ye. Junman kpa sɔ mɔ e di’n, ɔ́ bá nvlɛ “titi.” Kɛ be kle Ɲanmiɛn i sufuɛ’m be yalɛ mɔ be tra be awlɛn’n, be kwla lafi su kɛ be nin Ɲanmiɛn “be bo sɛ́ titi.” Yɛle kɛ bé trán nguan nun tititi.
11, 12. ?Ngue junman wie mun yɛ Ɲanmiɛn i sufuɛ’m be fa be sa nun ninnge’m be di ɔ?
11 Ɲanmiɛn i sufuɛ ng’ɔ fɛli i wawɛ’n mannin be mun o, “sran kpanngban kpa mun” o, be fali be aɲanbeun ninnge’m be yoli aklunye. Jue Mun 112:9 se kɛ: “Ɔ́ cɛ́ sran like-ɔ, ɔ bu-mɛn i sin, ɔ tu i klun cɛ yalɛfuɛ’m be like.” Andɛ’n, blɛ sunman Klistfuɛ kpa’m be fa be sa nun ninnge’m be suan be wiengu Klistfuɛ’m be bo. Wie liɛ bɔbɔ’n be uka be mantanfuɛ nga be o afɛ nun’n be wie. Asa ekun’n, be fa be sa nun ninnge’m be suan aniaan nga sa kekleekle tɔ be su’n be bo. Kɛ nga Zezi fa kannin’n sa’n, i sɔ’n man be aklunjuɛ wie.—An kanngan Sa Nga Be Yoli’n 20:35 ɔ nin 2 Korɛntfuɛ Mun 9:7.
12 Sanngɛ nɛ́n i ngba ɔ. Maan e bu sika nga be fa yi fluwa nga aniɛn 172 nun’n i sin e nian. Sran nga be kan aniɛn sɔ’m be nun sunman be ti yalɛfuɛ. Asa ekun’n, be yi fluwa sɔ’n bobo’m be aniɛn’n nun, yɛ be yi wie be man aɲinsifuɛ mun.
Sran ng’ɔ si aunnvuɛ’n m’ɔ ti sran kpa’n
13. ?Wan mun yɛ be kleli e ajalɛ kpa sran like manlɛ mɔ bé mán’n be si aunnvuɛ’n nun ɔn? ?Yɛ wafa sɛ yɛ e kwla nian be liɛ’n su ɔ?
13 “Sran b’ɔ si aunnvuɛ’n, bɔ be srɛ i like-ɔ, ɔ man’n, sa kpa yɛ w’a yo-ɔ.” (Jue Mun 112:5) Atrɛkpa’n amun sieli i nzɔliɛ kɛ nán sran nga be uka be wiengu’n be ngba yɛ be si aunnvuɛ ɔ. Kɛ sran wie’m be man like’n, be yo be wun kɛ be kpa tra sran nga be mɛn i like’n sa, annzɛ kɛ be man like’n be ijɔ i sin. I sɔ sran’m be like nun sɔlɛ yoman fɛ. Sanngɛ kɛ sran ng’ɔ cɛ e like’n si aunnvuɛ’n, nanwlɛ, ɔ yo e fɛ kpa. I sɔ liɛ nun’n, Zoova yɛ ɔ kle e ajalɛ kpafuɛ’n niɔn, afin ɔ si aunnvuɛ, yɛ kɛ ɔ man like’n ɔ yo i fɛ. (Jue Mun 104:31; Zak 1:5, 17) Zezi Klist kusu niannin i Si i aunnvuɛ silɛ’n su. (Mark 1:40-42) Ɔ maan, sɛ e waan Ɲanmiɛn bu e sran kpa’n, ɔ fata kɛ e si aunnvuɛ, yɛ e tu e klun e man sran like. Wafa kun mɔ e kwla yo i sɔ liɛ’n kpa’n, yɛle e mantanfuɛ’m be ukalɛ naan b’a si Ɲanmiɛn.
14. ?Ninnge nga kɛ é yó’n e ‘nian mmla’n su yɛ e yo’n,’ be nun wie mun yɛle benin?
14 “Sran b’ɔ́ yó i ninnge mun-ɔn ɔ nian mmla’n su yɛ ɔ yo’n, i kunngba nin-ɔn.” (Jue Mun 112:5) Kɛ nga be dun mmua kannin’n sa’n, sran kpa m’ɔ si like su nian kpa’n, ɔ nian Zoova i mmla’n su yɛ ɔ niɛn i Min’n i ninnge’m be su ɔ. (An kanngan Lik 12:42-44 nun.) E wun i sɔ liɛ’n ajalɛ nga Ɲanmiɛn Ndɛ’n kle asɔnun kpɛnngbɛn mun m’ɔ ju wie’n, ɔ fata kɛ be kan sran nga be yo sa tɛ kpa’n be ndɛ’n i nun. E wun i sɔ liɛ’n ekun wafa nga sran kpa nanwlɛfuɛ’n nian mmla’n su siesie ninnge mun asɔnun’m be nun’n i nun. Kpɛkun ngaliɛ difuɛ’m be awlo’m be nun yɛ Betɛli’m be nun’n, e wun i sɔ liɛ’n wie. Nán asɔnun kpɛnngbɛn’m be ngunmin yɛ ɔ fata kɛ be nian mmla’n su ɔ. Sanngɛ ɔ fata kɛ asɔnunfuɛ’m be kwlaa be nin be niaan’m be tranlɛ nun’n, yɛ be junman dilɛ nun’n be yo sɔ wie. I sɔ kunngba’n yɛ ɔ fata kɛ be nin be nga be timan Zoova Lalofuɛ’n be yo ɔ.—An kanngan Mise 6:8, 11 nun.
Sran ng’ɔ yo sa i nuan su’n ɔ́ ɲán ye
15, 16. (a) ?Kɛ be nga be yo sa i nuan su Ɲanmiɛn ɲrun’n be ti ndɛ tɛ’n wie’n, ɔ yo be sɛ? (b) ?Ngue yɛ Ɲanmiɛn i sufuɛ’m be ta nda kɛ bé yó i titi ɔ?
15 “Ɔ tɔ-man le naan kɛ ɔ́ yó-ɔ w’a yo. Sran ng’ɔ yo sa i nuan su’n, be wla fi-mɛn i su le. Sɛ ɔ ti ndɛ tɛ wie’n, srɛ ba kun sa kun-mɛn i mlɔnmlɔn. I klun suɛ-mɛn i bɔ kaan tri! Anannganman kunngba yɛ i nyin tɛ i nyin bo-ɔ. Ɔ keje-man. I klun ti-mɛn i lele kpɛkuun ɔ wun be nga be nin i be kun’n be agualiɛ’n.” (Jue Mun 112:6-8) Awlanmannun’n, e nin a timan sa tɛ yolɛ’n i ndɛ kɛ le nɲɔn nga nun sa le. I wie yɛle alɛ dilɛ’n, nin kakawlonga sa mun’n, ɔ nin tukpacɛ nga b’a ju su’n, yɛ laa tukpacɛ mɔ b’a sa be sin ekun’n, ɔ nin sran kunlɛ’n nin yalɛ’n yɛ asiɛ’n i sacilɛ’n. Be nga mɔ Ɲanmiɛn ɲrun’n be yo sa i nuan su’n bɔbɔ’n, i sɔ ninnge’m bé tó fúanman be. Sanngɛ srɛ kunman be kɛ be ɲrun lɔ’n su yoman kpa. Be bu i kɛ be ɲrun lɔ’n yó kpa, ɔ maan be klun ‘suaman be kaan’ sa, yɛ be “keje-man.” Afin be si kɛ Ɲanmiɛn i mɛn uflɛ’n mɔ lɔ yɛ sran kpa’m bé trán’n, w’a mantan koko. Sɛ sa kekle tɔ be su’n, be lafi Zoova su ti’n be kwla tra be awlɛn. Afin ɔ yaciman be nga be yo sa kpa’n be lɛ naan ‘be tɔ.’ Ɔ man be wunmiɛn naan b’a kwla jran kekle.—Filipfuɛ Mun 4:13.
16 Be nga be yo sa i nuan su Ɲanmiɛn ɲrun’n, kɛ be kpɔ be mɔ be kan be wun ndɛ tɛtɛ’n, be tra be awlɛn. Nɛ́n i sɔ’n ti yɛ Klistfuɛ kpa’m bé yáci jasin fɛ’n i bolɛ ɔ. Cɛcɛ. Kɛ Ɲanmiɛn i sufuɛ’m bé dí junman ng’ɔ fa mannin be’n, yɛle kɛ kɛ bé bó jasin fɛ’n, mɔ bé úka sran mun naan be kaci Zezi i sɔnnzɔnfuɛ’n, srɛ ba kun sa kunman be. Kusu’n, kɛ mɛn’n i awieliɛ’n mántan koko’n, bé klé be nga be yo sa i nuan su’n be yalɛ kpa trá laa’n. Kɛ mmusu’m be si Satan mɔ be flɛ i ekun kɛ Gɔgu m’ɔ fin Magɔgu ɔ́ wá kpɛ́ i ɲin be su asiɛ wunmuan’n su’n, yɛ be yalɛ klelɛ’n ɔ́ kpí ɔ. Kɛ ɔ yo sɔ’n, ‘é wún be nga be nin e kun’n be agualiɛ’n,’ afin bé núnnún be mlɔnmlɔn. Wafa nga Zoova wá yó i dunman’n sanwun mlɔnmlɔn’n sɛ e wun nun’n, nanwlɛ, ɔ́ wá yó e fɛ dan!—Ezekiɛl 38:18, 22, 23.
“I kɔmin’n jin su”
17. ?Ngue ti yɛ be nga be yo sa i nuan su’n “be kɔmin’n jin su” ɔ?
17 Kɛ e kwlaa e bo wá yó kun é mánmán Zoova, mɔ Satan nin i mɛn nunfuɛ’m be su tranman lɛ kun naan b’a tanndan e ɲrun’n, i fɛ m’ɔ́ wá yó’n, be su kanman! Be nga be yo sa i nuan su Ɲanmiɛn ɲrun’n, bé mɛ́nmɛ́n i aklunjuɛ su tititi. Be su kanman be ti ase kɛ sran mɔ b’a gua be ɲin ase’n sa. Afin Zoova seli kɛ be nga be yo sa i nuan su Ɲanmiɛn ɲrun’n be “kɔmin’n jin su” titi. (Jue Mun 112:9) Kɛ bé wún kɛ be kpɔfuɛ mɔ be kunndɛman kɛ Zoova sie nglo nin asiɛ’n be kwlaa b’a tɔ’n, bé bó sró.
18. ?Wafa sɛ yɛ Jue Mun 112 i ndɛ i atabo’n, ɔ́ kpɛ́n su ɔ?
18 “Kɛ klunwifuɛ’n wun i sɔ’n, ya kun i, kɛ ɔ kɛkɛ i nuan bui’n sa, kpɛkuun i wun glɔ i. Sa nga klunwifuɛ’m be waan ɔ́ jú’n, ɔ kpɛn-man su le.” (Jue Mun 112:10) Ɔ cɛ kaan’n, be kwlaa nga be yaciman Ɲanmiɛn i nvle nunfuɛ’m be ɲrun tanndanlɛ’n mɔ be kpɔ be’n, ‘be wun glɔ́ be.’ Be klo kɛ e yaci e junman’n i dilɛ. Sanngɛ i sɔ liɛ’n su kpɛnman su le. Afin ‘nyrɛnnɛn dan’n’ nun’n, be bɔbɔ yɛ bé wú ɔ.—Matie 24:21.
19. ?Ngue su yɛ e kwla lafi ɔ?
19 ?Kɛ Ɲanmiɛn wá núnnún klunwifuɛ sɔ mun’n, amún trán be nga bé fín nun fíte’n be nun wie? ?Sɛ kusu kpɛnngbɛn yolɛ’n, annzɛ tukpacɛ wie ti’n amun dun mmua wu naan b’a nunnun Satan i mɛn’n, amún trán “sran kpa” nga bé cɛ́n be’n be nun wie? (Sa Nga Be Yoli’n 24:15) Jue Mun 112 kan “sran” ng’ɔ yo sa i nuan su Ɲanmiɛn ɲrun’n, m’ɔ ti sran akpasua kun i nzɔliɛ’n i ndɛ. Sɛ amun lafi e ti kpɔlɛ tɛ nga Zezi yili’n su’n, naan amun nian like nga Zoova yo’n su kɛ sran sɔ’m be fa yo’n sa’n, amún kwlá tɛ́ kosan sɔ’n su kɛ ɛɛn. (An kanngan Efɛzfuɛ Mun 5:1, 2 nun.) Zoova i ‘wla su fiman’ sran sɔ’m be su le. Yɛ be sa kpa nga be yoli’n, i ɲin su kpaman su. Zoova i wla kpɛ́n be su tititi yɛ ɔ su yaciman be klolɛ le.—Jue Mun 112:3, 6, 9.
[Ja ngua lɛ ndɛ’n]
a Like ng’ɔ kle kɛ jue nɲɔn sɔ’m be kɔ likawlɛ’n, yɛle ndɛ ng’ɔ o be nun’n ɔ nin wafa nga be klɛli be’n. Jue Mun 111 kan Ɲanmiɛn i nzuɛn’n i ndɛ. Kpɛkun “sran” m’ɔ sro Ɲanmiɛn’n mɔ Jue Mun 112 kɛn i ndɛ’n, ɔ fɛ i sɔ’n nzuɛn’n su. Kɛ e fa Jue Mun 111:3, 4 e sunnzun Jue Mun 112:3, 4 e wun i sɔ liɛ’n.
Kosan nga ɔ fata kɛ e bu be su akunndan’n
• ?Ninnge benin mun be ti yɛ e bo sro kɛ ‘Aleluya’n’ niɔn?
• ?E blɛ liɛ’n nun’n, ninnge benin ti yɛ Klistfuɛ kpa’m be di aklunjuɛ ɔ?
• ?Like manlɛ nun’n, sran wafa benin yɛ Zoova klo i ɔ?
[Foto, bue 25]
Sɛ e kunndɛ kɛ Ɲanmiɛn bu e sran kpa titi’n, ɔ fata kɛ e lafi Zezi i mmoja’n m’ɔ guɛli i ase’n su.
[Foto mun, bue 26]
Kɛ e tu e klun man like’n, be fa uka be nga sa kekleekle tɔ be su’n, yɛ ɔ yo naan y’a kwla fa Biblu’n i akua’n y’a man sran mun.