Fluwa’n nun kannganfuɛ’m be kosan mun

?Ba ng’ɔ wu i nin klun’n naan b’a wu i’n, be kwla cɛn i?

Be nga be kuɛ nin a saciman le’n, be kwlá wunman ɲrɛnnɛn nga be nga i sɔ sa’n w’a ju be su le’n, be wun i’n i wlɛ. Siɛ nin niɛn nga i sɔ sa’n ju be su’n, be nun wie’m be sun lelele. Niɛn kun kpɔli kuɛ lele nnun. Kɛ ɔ́ kɔ́ i ɲrun’n, ɔ wa ɲannin ba nɲɔn. Sanngɛ i wla w’a fiman ba nnun ng’ɔ kpɔli be’n, be su. Lele m’ɔ́ fá wú’n, afuɛ nga sɛ i mma’m b’a wuman nn be le i’n, ɔ kɛli i klun. ?Ɔ le like mɔ Klistfuɛ sɔ’m be kwla fa be wla gua su naan b’a se kɛ be mma’m bé cɛ́n ɔn?

I kpo’n yɛle kɛ e siman kosan sɔ’n i su tɛlɛ’n. Biblu’n w’a kanman kuɛ nga be kpɔ be’n, annzɛ ba nga bé wú be ɔ b’a wu’n be cɛnlɛ ndɛ. Sanngɛ, mmla wie’m be o Ɲanmiɛn Ndɛ’n nun mɔ be kɛn i sɔ’n i ndɛ mɔ be kwla fɔnvɔ e ɔ.

Maan e fa e ɲin e sie i kosan nga be kɛn i sɔ mmla’m be ndɛ’n be nun nɲɔn be su e nian. ?I klikli’n, Zoova ɲrun’n, blɛ benin nun yɛ nguan’n bo i bo ɔ? ?Kɛ be fa kuɛ’n yɛ, annzɛ kɛ be wu ba’n yɛ? ?I nɲɔn su’n yɛle kɛ, wafa sɛ yɛ Zoova wun ba nga be nin a wumɛn i’n niɔn? ?Ɔ bu i sran annzɛ ɔ ti i ɲrun kɛ mmoja ngbɛn sa? Mmla nga be o Biblu’n nun’n, be tɛ kosan sɔ’m be su weiin.

Moizi i Mmla’n kle weiin kɛ nán blɛ nga be wu ba’n yɛ i nguan’n bo i bo ɔ. Sanngɛ ɔ dun mmua bo i bo i nin klun lɔ. ?Wafa sɛ? Ɔ kle kɛ sɛ sran kun ɔ kun ba ng’ɔ o i nin klun’n, be kwla kun i wie. Mmla’n i nun ndɛ kun se kɛ: “Sɛ sran kun ɔ kun sran’n, be kun i wie sie i osu.”a (Ezipt Lɔ Tulɛ 21:22, 23) E wun i lɛ kɛ ba ng’ɔ te o nin klun’n, ɔ le nguan naan ɔ ti sran. I sɔ liɛ mɔ Klistfuɛ kpanngban be wunnin i wlɛ’n, ɔ ukali be maan b’a tuman kuɛ. Afin be si kɛ i sɔ’n ti tɛ kpa Ɲanmiɛn ɲrun.

Ba ng’ɔ o i nin klun’n, ɔ le nguan sɔ. ?Sanngɛ wafa sɛ yɛ Zoova bu nguan sɔ’n niɔn? Mmla nga e kɛnnin i ndɛ icra’n lɛ’n seli kɛ sɛ sran kpɛnngbɛn kun ɔ kun ba ng’ɔ o i nin i klun’n, be kun i wie sie i osu. Ɔ maan e wun i kɛ ba nga be nin a wumɛn i’n, i nguan’n ti cinnjin Ɲanmiɛn ɲrun. Asa kusu’n, Biblu’n nun ndɛ sunman kle kɛ Zoova wun ba ng’ɔ o i nin klun’n kɛ sran wunmuan kun sa. Famiɛn Davidi kannin Zoova ndɛ seli kɛ: “A wuli min kɛ tannin sa min nin ku sɛ’n nun. [...] I nun bɔ n tɛ yo mmoja bɔbɔ’n, ɔ nyin ta min. Asiɛ’n su cɛn ba nga n ko di’n, a dun mmua klɛli i ngba guɛli i ɔ fluwa’n nun.”—Jue Mun 139:13-16; Zɔb 31:14, 15.

Zoova si ba ng’ɔ o i nin klun’n, i sran’n i wafa ng’ɔ ti’n. Sɛ ɔ́ yó kpa o, ɔ si. I nun mɔ Izaaki i yi Rebeka wunnzɛli i nda mun’n, ngondin nga ba’m be tuli i klun lɔ’n, Zoova kɛnnin i su ndɛ. I sɔ’n m’ɔ yoli’n, ɔ kle kɛ Zoova wunnin be ɲoliɛ mɔ cɛn wie lele ɔ́ wá kán sran kpanngban kpa’n.—Bo Bolɛ 25:22, 23; Rɔmfuɛ Mun 9:10-13.

Zan m’ɔ ti Batɛmu yofuɛ’n i su ndɛ liɛ’n, ɔ kwla uka e kpa ekun. Zezi i jasin fɛ’n mɔ be klɛli’n se kɛ: “Kɛ Elizabɛt tili like bɔ Mari yoli i’n, i ku’n jaojaoli, Nyanmiɛn wawɛ’n wluli’n i nun.” (Lik 1:41) Kɛ Liki m’ɔ ti dɔɔtrɔ bian’n, ɔ́ kɛ́n i sɔ liɛ’n i ndɛ’n, ɔ fali Glɛki nun ndɛ mma kun. Ndɛ mma sɔ’n be kwla fa kan ba ng’ɔ o be klun’n, ɔ nin ba nɔnman nga b’a wu i’n, be ndɛ. Kɛ be wuli Zezi m’ɔ la nnɛn’m be aliɛ diwlɛ nun’n, ndɛ mma sɔ’n yɛ ɔ fa kɛnnin i ndɛ ɔ.—Lik 2:12, 16; 18:15.

?Kɛ e bu i kwlaa nga y’a wun i lɛ’n i sin’n, Biblu’n kle kɛ ngbaciɛ dan o ba ng’ɔ o i nin klun’n, ɔ nin nga b’a guɛ i ase’n, be afiɛn? E bumɛn i sɔ. I sɔ bɔbɔ yɛ andɛ siansifuɛ’m be kan ɔn. Siansifuɛ’m be waan ba ng’ɔ o i nun klun’n, like nga be yo i gua su wa’n, ɔ kwla wun i wlɛ. Ɔ maan, sɛ bla wunnzɛfuɛ’n nin i wa ng’ɔ o i klun’n be klo be wun’n, ɔ boman e nuan.

Nán ba’m be kwlaa yɛ be di anglo ngwlan ɔn. Amun e nian ndɛ nga. Bla wunnzɛfuɛ kun i ba wulɛ anglo nin a juman, kpɛkun w’a wu ba. W’a cɛman ba’n wuli. Bla uflɛ kun liɛ’n, ba’n i wulɛ blɛ’n juli. Sanngɛ ba’n wuli i nin klun lɔ. ?E kwla se kɛ, kannzɛ bla kliklifuɛ’n i cɛn’n w’a juman, sanngɛ kɛ m’ɔ wuli ba’n ti’n, nn bé cɛ́n i wa liɛ’n naan bé yáci kunfuɛ’n i liɛ’n lɛ?

Sɛ e waan é bó i kpɔlɛ’n, e kwla se kɛ Biblu’n kɛn i weiin kɛ e nguan’n bo i bo e nin ku sɛ nun lɔ. Naan Zoova liɛ’n, ba ng’ɔ o i nin ku sɛ’n nun’n, ɔ ti sran wunmuan kun yɛ ɔ ti i cinnjin. Ndɛ nga Biblu’n kɛn i lɛ’n ti’n, ɔ kwla yo sran wie’m be kɛ, sɛ sran kun se kɛ ba nga be wu be nin klun’n be su cɛnman’n, ɔ timan su. I kpa bɔbɔ’n, ɔ kwla yo be kɛ i sɔ mɔ sran sɔ’n kan’n ti’n, like nga ti yɛ e jran Biblu’n su e se kɛ e tuman kuɛ’n, be wunmɛn i wlɛ kun. Kusu nn Biblu’n nun nanwlɛ ndɛ sɔ’n i su yɛ e jran e se sɔ ɔ.

Laa’n, fluwa kunngba nga usali kosan wie mun ba nga be wu be nin klun’n be cɛnlɛ’n su. Ɔ ti kɛ nn kosan sɔ’m be kle kɛ be su cɛnman be sa. Kosan sɔ’n i wie yɛle kɛ: ?Mɛn klanman nun lɔ’n, ba nga be wunnzɛli i laa’n, Ɲanmiɛn fɛ́ i sɔ ba liɛ’n fá wlɛ́ i, i nin ku sɛ nun ekun? E Ɲrun dinfuɛ’m be anuannzɛ’n, ɔ suannin ndɛ sɔ’n i su like kpa ekun Biblu’n nun, ɔ srɛli Ɲanmiɛn yɛ ɔ buli su akunndan. Ɔ maan ndɛ nga ɔ wunnin i’n yɛle kɛ be kwlá jranman i sɔ akunndan’n su be seman kɛ, bé cɛ́n ba sɔ mun annzɛ be su cɛnman be. Zezi seli kɛ: “Nyanmiɛn kwla sa’n kwlaa yo.” (Mark 10:27) Zezi i bɔbɔ i su ndɛ’n kle kɛ ndɛ sɔ’n ti nanwlɛ. Afin Ɲanmiɛn fɛli i nguan’n ɲanmiɛn su lɔ fa wlɛli i talua kun m’ɔ nin a siman bian’n i ku sɛ’n nun. I sɔ liɛ’n, klɔ sran fi kwlá yoman.

?Ɔ maan, i kwlaa ngalɛ’n kle kɛ Biblu’n kle kɛ ba nga be wu be nin klun lɔ kwlaa naan b’a wu be’n, bé wá cɛ́n? É tín su kpa ekun kɛ Biblu’n tɛman kosan sɔ’n su trele sa. I sɔ’n ti’n, ɔ fataman kɛ e jran su cinnjin kɛ ba sɔ’m bé cɛ́n. Ndɛ’n sɔ’n kwla yo maan be kwla usa kosan kpanngban kpa. I sɔ’n ti’n, ɔ fataman kɛ e se sa annzɛ e se sa. E liɛ nga e si i’n yɛle kɛ: I sɔ’n ndɛ’n o Ɲanmiɛn Zoova m’ɔ si aunnvuɛ yɛ ɔ ti aklunyefuɛ’n i sa nun. (Jue Mun 86:15) Zoova kunndɛ kɛ ɔ́ fá sran cɛnlɛ’n fá núnnún like nga wie’n yo’n. I sɔ liɛ’n, e kwlá simɛn i akplowa mlɔnmlɔn. (Zɔb 14:14, 15) E kwla lafi su kɛ like kwlaa ng’ɔ yo i titi’n, ɔ ti kpa. Ɔ́ yó maan ninnge tɛtɛ nga mɛn tɛ nga ti be tɔ e su’n, bé wíe. Afin ɔ seli i Wa’n kɛ ɔ ‘bu sa nga mmusu’m be si Satan yo’n i nuan nnya.’—1 Zan 3:8.

[Ja ngua lɛ ndɛ’n]

[Foto, bue 23]

Sa tɛtɛ nga be tɔ e su’n, Zoova maan bé wíe.