Maan e kle like klolɛ su kɛ Zezi sa
“Sran fi nin a kan-man ndɛ kɛ bian nga sa le.”—ZAN 7:46.
1. ?Zezi i klelɛ’n yoli sran’m be sɛ?
KƐ E bu wafa nga Zezi kleli like’n i akunndan’n, e wun kɛ nanwlɛ, i ndɛ’n i tielɛ’n yoli fɛ! Be nga Zezi kleli be like’n, wafa ng’ɔ yoli be’n, Biblu’n kɛn i ndɛ. I wie yɛle Liki m’ɔ klɛli Zezi i su ndɛ’n, i liɛ’n. Ɔ seli kɛ, kɛ Zezi klé like’n, be nga be tran Nazarɛti’n, “ndɛ fɛ b’ɔ kan’n ɔ bo be nuan.” Matie klɛli i kɛ be nga be tili ninnge nga Zezi kleli i Oka’n su lɔ’n, “fɔ sɔ’n b’ɔ tuli be’n ɔ boli be nuan.” Kpɛkun Zan sieli i nzɔliɛ kɛ sonja nga be sunmannin be kɛ be ko tra Zezi mɔ b’a trɛmɛn i’n, be seli kɛ: “Sran fi nin a kan-man ndɛ kɛ bian nga sa le.”—Lik 4:22; Matie 7:28; Zan 7:46.
2. ?Like klelɛ’n nun’n, ajalɛ benin yɛ Zezi fali ɔ?
2 Sonja sɔ’m b’a buaman ato. Zezi yɛ ɔ ti Like Klefuɛ danfuɛ mɔ be nin a ɲɛnmɛn i wunsu le’n niɔn. Ninnge ng’ɔ kleli’n fiɛn kaan sa nunmɛn i sin, i wlɛ wunlɛ yoman ya, kpɛkun sran fi kwlá simɛn i akplowa. Ɔ fali sunnzun ase nin kosan fa kleli like ngwlɛlɛ su. Ɔ niannin wafa nga sran’m be ti’n, sɛ be ti aɲanbeunfuɛ o, sɛ be ti yalɛfuɛ o, naan w’a kɛn i ndɛ’n. Nanwlɛ ndɛ ng’ɔ kleli be’n, be bo ti kploun. Sanngɛ be wlɛ wunlɛ w’a yoman ya. Kusu nɛ́n i sɔ ngunmin ti yɛ Zezi ti Like Klefuɛ dan’n niɔn.
Like cinnjin kpafuɛ’n yɛle klolɛ’n
3. ?Like klelɛ’n nun’n, ngue ti yɛ Zezi timan kɛ i blɛ su Zuifu’m be Ɲanmiɛn sulɛ wafa’n be su kpɛnngbɛn’m be sa ɔ?
3 Mmla klefuɛ nin Farizifuɛ’m be nun wie’m be si ngwlɛlɛ kpa. Yɛ be si wafa nga be kwla fa kle sran like’n. ?Sanngɛ ngue ti yɛ Zezi i like klelɛ’n, ɔ nin be liɛ’n timan kun ɔn? Yɛle kɛ Zuifu’m be Ɲanmiɛn sulɛ wafa’n be su kpɛnngbɛn sɔ’m be kloman nvle nunfuɛ mun. Be waan nvlefuɛ sɔ mun’n, “Nyanmiɛn a bo be sannzan.” (Zan 7:49) Zezi liɛ’n, w’a yoman sɔ. Kɛ ɔ wunnin be’n, ɔ sili be annvuɛ afin “b’a bo je kɛ bua bɔ be lɛ-man sunianfuɛ’n sa.” (Matie 9:36) Ɔ yoli be cɛcɛ yɛ ɔ yoli be ye. Asa ekun’n, Zuifu’m be Ɲanmiɛn sulɛ wafa’n be su kpɛnngbɛn’m be kloman Ɲanmiɛn sakpa. (Zan 5:42) Sanngɛ Zezi liɛ’n, ɔ kloli i Si. Kpɛkun i Si klun sa’n i yolɛ’n yoli i fɛ kpa. Zuifu’m be kpɛnngbɛn sɔ’m be klunklo ninnge’m be ti’n, be kpɛli Ɲanmiɛn Ndɛ’n i wun. Zezi liɛ’n, ɔ kloli “Nyanmiɛn ndɛ’n.” I ti’n, ɔ fa kleli sran mun, ɔ yiyili nun kleli be yɛ ɔ kplili i ti. Ɔ niannin i nun mmla’m be su nantili. (Lik 11:28) Klist yili klolɛ nglo like ng’ɔ kleli’n, ɔ nin wafa nga ɔ nin sran’m be trannin’n, ɔ nin wafa ng’ɔ kleli be ajalɛ’n be nun kpa.
4, 5. (a) ?Ngue ti yɛ ɔ ti cinnjin kɛ e kle sran’m be like klolɛ su ɔ? (b) ?Like klelɛ’n nun’n, ngue ti yɛ like nga e kle’n ɔ nin wafa nga e kle’n be silɛ’n ti cinnjin wie ɔ?
4 ?Yɛ e li? Kɛ mɔ e ti Klist i sɔnnzɔnfuɛ’n ti’n, e kunndɛ kɛ é yó kɛ i sa jasin fɛ’n i bolɛ’n, ɔ nin e mɛn dilɛ’n nun. (1 Piɛr 2:21) Ɔ maan, like nga e kunndɛ’n nɛ́n i yɛle sran’m be Biblu’n nun like klelɛ ngunmin. Sanngɛ e kunndɛ kɛ é yí Zoova i nzuɛn’n i nglo wie. I li i klolɛ’n yɛ e waan é yí i nglo dan ɔn. Sɛ e si like kpanngban o, sɛ e siman like kpanngban o, sɛ e si like kle o, sɛ e siman like kle o, sɛ e yi klolɛ’n i nglo’n, é kwlá kán be nga e kle be like’n be awlɛn’n. Kɛ é kúnndɛ sran mun naan be kaci Zezi i sɔnnzɔnfuɛ’n, sɛ e kunndɛ kɛ e junman’n ba nvlɛ’n, ɔ fata kɛ e nian Zezi i ajalɛ’n su. Yɛle kɛ e kle sran’m be like klolɛ su.
5 Ɔ ti su kɛ sɛ e waan é sí like klé kpa’n, ɔ fata kɛ e si like nga e kle’n. Yɛ wafa nga é fá klé sran mun’n maan e sa tɔ nun. Zezi ukɛli i sɔnnzɔnfuɛ mun naan b’a kwla ninnge nɲɔn sɔ’m be yo. Zoova fɛ i anuannzɛ’n uka e sɔ wie andɛ. (An kanngan Zan 6:45 ɔ nin Lik 12:42 be nun.) Kusu’n, nán e fa e ngwlɛlɛ’n ngunmin yɛ e fa kle sran’m be like ɔ, sanngɛ e fa e awlɛn’n wie. Maan e fa e ɲin e sie i sɔ yolɛ’n su. Sɛ e si like nga e kle’n kpa naan e sa tɔ i klelɛ’n nun kpa naan e kle i klolɛ su’n, e junman’n bá nvlɛ kpa. ?Yɛ kɛ é klé like’n, wafa sɛ yɛ e kwla kle kɛ e klo like nga e kle’n niɔn? ?Wafa sɛ yɛ Zezi nin i sɔnnzɔnfuɛ’m be yoli sɔ ɔ? Maan e nian.
Ɔ fata kɛ e klo Zoova
6. ?Wafa sɛ yɛ e kan sran nga e klo i’n i ndɛ ɔ?
6 Ninnge nga e klo be’n, e klo be ndɛ kanlɛ kpa. Yɛ kɛ é kán be ndɛ sɔ’n, sran’m be wun kɛ e kɛn i aklunjuɛ nin juejue su. I li kɛ é kán sran nga e klo i’n i ndɛ’n, yɛ e yo sɔ kpa’n niɔn. Titi’n, kɛ é kán sran sɔ’n i ndɛ é klé e wiengu mun’n, e wun blibli e. E manman sran sɔ’n, e yi i ayɛ kpɛkun sɛ be kɛn i wun ndɛ tɛ’n, e kɛn i ti ndɛ. Kɛ mɔ e kunndɛ kɛ e wiengu’m be fa be wun be mantan sran sɔ’n naan be wun i nzuɛn kpa’n kɛ e sa wie’n, i ti yɛ e yo sɔ ɔ.
7. ?Ngue yɛ klolɛ mɔ Zezi klo Ɲanmiɛn’n, ɔ suli i bo maan ɔ yoli ɔ?
7 Ka naan y’a yo naan e wiengu’m b’a klo Zoova’n, ɔ fata kɛ e bɔbɔ e si i kpa naan e klo i. Afin Ɲanmiɛn sulɛ ng’ɔ ti su’n, ɔ taka Ɲanmiɛn i klolɛ’n su. (Matie 22:36-38) I sɔ’n nun’n, Zezi kleli e ajalɛ kpa m’ɔ leman wunsu’n. Ɔ fɛli i wla’n kwlaa nin i akunndan’n kwlaa yɛ i wunmiɛn’n kwlaa kloli Zoova. Atrɛkpa’n Zezi nin i Si be trannin ɲanmiɛn su lɔ afuɛ miliar kpanngban. I ti’n ɔ sili i kpa. ?I sɔ’n i bo’n guali sɛ? Zezi seli kɛ: “N klo e Si’n.” (Zan 14:31) I sɔ klolɛ’n i ɲin fiteli like kwlaa nga Zezi yoli’n, ɔ nin ndɛ kwlaa ng’ɔ kannin’n nun. Ɔ suli i bo maan blɛ kwlaa nun’n, ɔ yoli ninnge nga Ɲanmiɛn klo be’n. (Zan 8:29) Klolɛ sɔ’n suli i bo maan Zuifu’m be Ɲanmiɛn sulɛ wafa’n be su kpɛnngbɛn mɔ be bua ato kɛ be ti Ɲanmiɛn janunfuɛ’n, ɔ yiyili be bo. Asa ekun’n, klolɛ sɔ’n maan ɔ kannin Zoova i ndɛ yɛ ɔ ukali sran uflɛ mun naan be si Ɲanmiɛn yɛ be klo i.
8. ?Ɲanmiɛn i klolɛ’n maan Zezi i sɔnnzɔnfuɛ’m be yoli ngue?
8 Zezi i sɔnnzɔnfuɛ klikli’m be kloli Zoova wie kɛ i sa. Klolɛ sɔ’n maan be boli jasin fɛ’n juejue su. Kannzɛ Zuifu’m be Ɲanmiɛn sulɛ wafa’n be su kpɛnngbɛn mɔ be le kwlalɛ’n be tanndannin be ɲrun’n, sanngɛ be fali be like klelɛ’n be truli Zerizalɛmu klɔ’n nun. Afin be kwlá yaciman like nga be wunnin i’n nin ndɛ nga be tili’n i kanlɛ. (Sa Nga Be Yoli’n 4:20; 5:28) Be si kɛ Zoova nin be o nun naan ɔ́ rá be su. Yɛ kusu ɔ rali be su sakpa! Yɛle kɛ, kɛ Zezi wuli’n w’a diman afuɛ 30, akoto Pɔlu kannin jasin fɛ’n i kanlɛ’n i ndɛ. Ɔ klɛli i kɛ: “Be kan kleli asiɛ’n sufuɛ’m be kwlaa.”—Kolɔsfuɛ Mun 1:23.
9. ?Ngue yɛ e kwla yo naan y’a klo Ɲanmiɛn kpa y’a tra laa ɔ?
9 Sɛ e kunndɛ kpa kɛ like nga e kle’n ɔ ba nvlɛ’n, ɔ fata kɛ e kusu e nian nun kpa naan klolɛ nga e klo Ɲanmiɛn’n, i bo wla ase kpa. ?Wafa sɛ yɛ é kwlá yó sɔ ɔ? Maan e srɛ Ɲanmiɛn titi. Asa kusu’n e kanngan Biblu’n i akua’m be nun kpɛkun e kɔ Klistfuɛ aɲia’m be bo naan y’a klo Ɲanmiɛn kpa. Kɛ é sí Ɲanmiɛn kpa é kɔ́ e ɲrun’n, nn i klolɛ’n kusu ɔ́ cɛ́n e awlɛn’n nun. Kɛ ɔ ko yo sɔ mɔ é yí Ɲanmiɛn i klolɛ’n i nglo ndɛ nga e kan’n nin e aeliɛ’n nun’n, e wiengu’m bé síe i nzɔliɛ. Kpɛkun atrɛkpa’n bé fá be wun mántan Zoova wie.—An kanngan Jue Mun 104:33, 34 nun.
Ɔ fata kɛ e klo like nga e kle’n
10. ?Ngue yɛ ɔ kle kɛ sran kun si like kle kpa ɔ?
10 Like ng’ɔ kle kɛ sran kun si like kle kpa’n, yɛle like ng’ɔ kle’n i klolɛ’n. Ɔ fata kɛ ɔ lafi su kɛ like sɔ’n ti nanwlɛ, ɔ ti cinnjin yɛ ɔ ti kpa. Sɛ sran kun klo like ng’ɔ kle’n, sran kwlaa wún i kɛ ɔ tu i klun kɛn i ndɛ. Yɛ i sɔ’n kán be ng’ɔ kle be like’n. ?Sanngɛ sɛ i bɔbɔ kloman like ng’ɔ kle’n, ɔ́ kwlá sé be ng’ɔ kle be like’n, be kɛ be bu i like kpa? E mɔ e kle sran’m be Ɲanmiɛn Ndɛ’n, ajalɛ nga e kle’n, ɔ ti cinnjin kpa. Zezi seli kɛ: “Sran kwlaa b’ɔ wie i like’n suan’n, ɔ yo kɛ sran b’ɔ kle i like’n sa.”—Lik 6:40.
11. ?Ngue ti yɛ Zezi kloli like ng’ɔ kle’n niɔn?
11 Zezi kloli like ng’ɔ kleli’n. Ɔ si kɛ like ng’ɔ kle sran mun sɔ’n, ɔ ti cinnjin kpa. Like sɔ’n yɛle i Si m’ɔ o ɲanmiɛn su lɔ’n i su ndɛ nanwlɛ’n. “Nyanmiɛn ndɛ’n” mɔ ‘maan e nyan anannganman nguan’n’ yɛ ɔ fa kleli sran mun ɔn. (Zan 3:34; 6:68) Kɛ lika m’ɔ kpaja’n sa’n, ndɛ nanwlɛ nga Zezi kleli be’n, ɔ yili like ng’ɔ ti tɛ’n nin ng’ɔ ti kpa’n be nglo. Be nga be tɔn be wun suɛn kɛ be su Ɲanmiɛn’n be kpɛnngbɛn’m be lakali wun ase kanfuɛ mun, kpɛkun Satan kleli be yalɛ. Sanngɛ ndɛ nanwlɛ sɔ’n, ɔ cicili be wla yɛ ɔ fɔnvɔli be. (Sa Nga Be Yoli’n 10:38) Klolɛ nga Zezi kloli ndɛ nanwlɛ’n i ɲin fiteli ninnge ng’ɔ kleli’n nun. Sanngɛ nɛ́n i ngba ɔ. I ɲin fiteli like kwlaa ng’ɔ yoli’n nun wie.
12. ?Wafa sɛ yɛ akoto Pɔlu buli jasin fɛ’n niɔn?
12 Kɛ nga Zezi fa kloli nanwlɛ’n sa’n, i sɔnnzɔnfuɛ’m be kusu be kloli Zoova nin Klist be su ndɛ nanwlɛ’n kpa. I sɔ’n ti’n, ndɛ sɔ’n i sran’m be kan klelɛ nun’n, sran fi w’a kwlá bubuman be sa sin. Pɔlu klɛli i wiengu Klistfuɛ nga be o Rɔmu lɔ’n be fluwa. I waan: “N waan ḿ má kán jasin fɛ’n klé amun [...]. Nyannzuɛn kun-man min Jasin fɛ’n bolɛ nun. Afin i yɛ ɔ ti fanngan nga Nyanmiɛn fa de sran nga be lafi i su’m be kwlaa-a.” (Rɔmfuɛ Mun 1:15, 16) Ndɛ nanwlɛ’n i sran’m be kan klelɛ’n, ɔ yoli aɲrunɲan like Pɔlu ɲrun. Ɔ klɛli i kɛ: “Nyanmiɛn [...] maan n kan kleli be nga be ti-man Zuif’m be kɛ Krist i anyanbeun’n cɛnnin, be kwlá kɛn-mɛn i be nuan nun.” (Efɛzfuɛ Mun 3:8) Kɛ Pɔlu kán Zoova nin i klun sa’n be ndɛ klé i wiengu mun’n, i fɛ ng’ɔ yo i’n, e kwla wun i wlɛ.
13. ?Ngue ti yɛ ɔ fata kɛ e klo jasin fɛ’n niɔn?
13 Jasin fɛ’n ng’ɔ o Ɲanmiɛn Ndɛ’n nun’n ti’n, e kwla si Like Yifuɛ’n. Yɛ e nin i e afiɛn’n kwla sɛ. Kosan cinnjin nga e fa usa e wun e mɛn’n dilɛ’n su’n, jasin fɛ’n sɔ’n tɛ be su klanman. Ɔ kwla uka e kusu naan y’a kaci e mɛn dilɛ’n. Ɔ yo maan e wla tran like kpa su. Kpɛkun ɔ wla e fanngan naan ɲrɛnnɛn’n nun’n, y’a jran kekle. Asa kusu’n, ɔ kle e atin nga e kwla fa naan e mɛn dilɛ’n w’a ɲan bo naan y’a ɲan anannganman nguan’n. Ɔ leman like uflɛ fi mɔ i wunsu ti kɛ jasin fɛ’n sa ɔ. Jasin fɛ’n ti like cinnjin kpafuɛ mɔ be fa cɛli e ɔ. Yɛ ɔ man e aklunjuɛ. Kɛ e kan jasin fɛ’n sɔ’n e kle sran uflɛ’n, e aklunjuɛ’n uka su ekun.—Sa Nga Be Yoli’n 20:35.
14. ?Wafa sɛ yɛ e kwla wla like nga e kle’n i klolɛ’n, i bo ase kpa ɔ?
14 ?Ngue yɛ e kwla yo naan y’a klo jasin fɛ’n i kpa y’a tra laa ɔ? Kɛ é kánngan Ɲanmiɛn Ndɛ’n nun’n, maan e jran kan naan e bu ndɛ nga e kanngan’n, i su akunndan. I wie yɛle kɛ maan ɔ yo e kɛ, kɛ Zezi o asiɛ’n su wa m’ɔ́ bó jasin fɛ’n e nin i yɛ e bo sa. Annzɛ e nin akoto Pɔlu yɛ e di ngaliɛ difuɛ junman’n sa. Maan ɔ yo e kɛ e o mɛn uflɛ’n nun sa. Yɛ maan e bu wafa nga mɛn dilɛ’n su yoman kɛ andɛ sa’n, i akunndan. Maan e bu mmlusuɛ nga jasin fɛ’n mɔ e sɔli nun klanman’n ti’n, e ɲɛnnin i’n i akunndan wie. Sɛ e klo jasin fɛ’n kpa titi’n, be nga e kan kle be’n, bé wún i sɔ’n. I ti’n, ɔ nin i fata kɛ e bu like nga e suan’n i su akunndan kpa. Yɛ e nian like nga e kle’n su kpa.—An kanngannun 1 Timote 4:15, 16 nun.
Ɔ fata kɛ e klo sran
15. ?Ngue ti yɛ ɔ nin i fata kɛ like klefuɛ’n klo sran ng’ɔ kle i like’n niɔn?
15 Like klefuɛ kpa’n, ɔ yo maan be ng’ɔ kle be like’n, be wun jɔ be wun. Ɔ maan, like nga be suan’n, be bɔbɔ be fa be wun be wla nun, yɛ ɔ yo be fɛ kɛ be kan kle sran uflɛ. Like klefuɛ ng’ɔ klo sran’n, ɔ fa like ng’ɔ si i’n kle sran ng’ɔ kle i like’n. Afin like suanfuɛ’n i ndɛ lo i. Ɔ nian like ng’ɔ mian like suanfuɛ’n i sa’n, ɔ nin wafa ng’ɔ fa suan like kɔ i ɲrun’n, be su yɛ ɔ kle i like ɔ. Like nga like suanfuɛ’n si i yo’n, ɔ nin sa nga be o i su’n, be lo like klefuɛ’n. Sɛ like klefuɛ’n klo sran ng’ɔ kle i like’n i sɔ’n, sran ng’ɔ suan like’n, ɔ sie i nzɔliɛ. Ɔ maan, like’n i klelɛ’n nin i suanlɛ’n, ɔ kaci aklunjuɛ like.
16. ?Wafa sɛ yɛ Zezi yili i nglo kɛ ɔ kloli sran mun ɔn?
16 Zezi yili i sɔ klolɛ’n i nglo. Klolɛ like’n i danfuɛ ng’ɔ yoli’n, yɛle kɛ ɔ fɛli i nguan mɔ fɔ’n nunman nun’n, ɔ mannin naan sran uflɛ’m be ɲan nguan. (Zan 15:13) I nun m’ɔ́ bó jasin fɛ’n asiɛ’n su wa’n, ɔ tuli i klun niannin sran’m be lika. Yɛle kɛ ɔ yoli maan be wun fali be feke, kpɛkun ɔ ukali be Ɲanmiɛn ninnge’m be nun wie. W’a seman kɛ sran’m be tu ajalɛ be bla kan ɔ o lɛ’n. Sanngɛ i bɔbɔ tuli ajalɛ kilo kpanngban kpa i ja nun ko boli jasin fɛ’n kleli be. (Matie 4:23-25; Lik 8:1) Zezi trɛli i awlɛn yɛ ɔ wunnin ndɛ ng’ɔ o sran’m be su’n i trawlɛ. Kɛ ɔ nin i fata kɛ ɔ tu i sɔnnzɔnfuɛ’m be fɔ’n, ɔ yoli i sɔ’n klolɛ su. (Mark 9:33-37) Ɔ wlali be fanngan. Yɛle kɛ ɔ seli be kɛ ɔ lafi su kɛ bé wá káci jasin fɛ’n bofuɛ kpa mun. Sran uflɛ fi w’a yoman like klefuɛ m’ɔ klo sran kɛ Zezi sa ɔ. Klolɛ m’ɔ kloli i sɔnnzɔnfuɛ mun’n ti’n, be kusu be kloli i wie. Ɔ maan be nantili i mmla’m be su.—An kanngan Zan 14:15 nun.
17. ?Wafa sɛ yɛ Zezi i sɔnnzɔnfuɛ’m be kleli kɛ be kloli be wiengu ɔ?
17 Kɛ Zezi sa’n, i sɔnnzɔnfuɛ’m be kusu be yili i nglo kɛ be klo be nga be bo jasin fɛ’n kle be’n kpa. Afin, kannzɛ bé klé be ɲrɛnnɛn annzɛ bé kún be’n, be boli jasin fɛ’n kleli sran mun yɛ be junman bali nvlɛ. Nanwlɛ, be kloli be nga be ukali be Ɲanmiɛn ninnge’m be nun’n be dan! Ndɛ nga akoto Pɔlu klɛli i yɛ’n, ɔ yi i sɔ sran klolɛ’n i nglo. Ɔ klɛli i kɛ: “Kɛ e o amun wun lɔ’n, [...] e yoli wɛtɛɛfuɛ kɛ bla ta b’ɔ yɛyɛ i mma mun’n sa. Klolɛ bɔ e fa klo amun’n ti, nán Nyanmiɛn jasin fɛ’n ngunmin yɛ e fa mannin amun-ɔn, sanngɛ sɛ e fa e bɔbɔ e wun nannannin su’n, ɔ ti kpa, afin e fali amun sieli e anwlɛn su.”—1 Tɛsalonikfuɛ Mun 2:7, 8.
18, 19. (a) ?Ngue ti yɛ e bɔbɔ e klunklo su e mian e ɲin e bo jasin fɛ’n niɔn? (b) An fa sa kun kle kɛ klolɛ mɔ e klo sran mun’n, be sie i nzɔliɛ.
18 I kunngba’n, andɛ kusu’n, Zoova i Lalofuɛ’m be bo jasin fɛ’n mɛn wunmuan’n nun. Be kunndɛ be nga be klo kɛ bé sí Ɲanmiɛn naan bé sú i’n. Afuɛ 17 nga b’a sin lɛ nun’n, e fali dɔ miliar kun tra su afuɛ nuan kwlaa nun, e boli jasin fɛ’n naan sran’m be kaci Zezi i sɔnnzɔnfuɛ. Yɛ e te di i sɔ junman’n. Kannzɛ jasin fɛ’n i bolɛ’n fa e blɛ nin e wunmiɛn nin e sa nun ninnge mun’n, sanngɛ e tu e klun e di i sɔ junman’n e klunklo su. Kɛ Zezi sa’n, e wun i wlɛ kɛ e Si m’ɔ o ɲanmiɛn su lɔ m’ɔ klo e’n, ɔ kunndɛ kɛ sran’m be si ndɛ ng’ɔ man anannganman nguan’n. (Zan 17:3; 1 Timote 2:3, 4) Sran klolɛ’n su e bo maan e uka be nga be awlɛn ti kpa’n, naan be si Zoova yɛ be klo i kɛ e sa wie.
19 Klolɛ nga e klo sran mun’n, be sie i nzɔliɛ. I wie yɛle anian bla titi atin bofuɛ kun m’ɔ o Amlɛnkɛn’m be mɛn’n nun lɔ’n, i liɛ’n. Ɔ klɛli fluwa ko fɔnvɔli be nga be sran wuli’n. Bian kun tɛli i fluwa’n su. Ɔ seli i kɛ: “Kɛ n kanngannin ɔ fluwa’n nun’n, ɔ dun mmua boli min nuan. Afin a siman sran’n, sanngɛ a miannin ɔ ɲin klɛli fluwa naan á fá wlɛ́ i fanngan naan ɔ jran ɲrɛnnɛn’n i ɲrun kekle. Ɔ maan, ndɛ nga n kwla kan’n, yɛle kɛ a klo sran yɛ a klo Ɲanmiɛn m’ɔ nian klɔ sran’m be su’n.”
20. ?Ngue ti yɛ ɔ ti cinnjin kɛ e kle sran’m be like klolɛ su ɔ?
20 Sran kun seli kɛ sɛ sran klolɛ nin like nga be si i kle’n be kɔ likawlɛ’n, i bo’n gua kpa. Kɛ é klé sran’m be like’n, e kunndɛ kɛ é úka be naan be kusu be akunndan’n tran Zoova i silɛ’n su, naan be klo i. Nanwlɛ, sɛ e waan é káci like klefuɛ kpa’n, ɔ fata kɛ e fa ajalɛ nsan. Yɛle kɛ e klo Ɲanmiɛn, e klo ndɛ nanwlɛ’n, yɛ e klo sran. Sɛ e suɛn i sɔ klolɛ liɛ’n, naan e yi i nglo jasin fɛ’n i bolɛ’n nun’n, aklunjuɛ nga kɛ be man sran like’n be di’n, é dí wie. Sanngɛ kusu nɛ́n i ngba ɔ. E wla gúa ase, afin e si kɛ e nanti Zezi i ajalɛ’n su naan Zoova i klun jɔ e wun.
?Amún tɛ́ su sɛ?
• ?Kɛ é bó jasin fɛ’n klé sran uflɛ’n, ngue ti yɛ ɔ ti cinnjin kɛ [...]
e klo Ɲanmiɛn ɔn?
e klo like nga e kle’n niɔn?
e klo be nga e kle be like’n niɔn?
[Foto, bue 17]
?Like klelɛ’n nun’n, ngue ti yɛ Zezi timan kɛ mmla klefuɛ nin Farizifuɛ’m be sa ɔ?
[Foto, bue 20]
Like klelɛ kpa’n, ɔ taka like silɛ’n, ɔ nin like mɔ be si i kle’n, ɔ nin klolɛ’n su.