‘Maan e yo sa nga e yo ɔ e si kɛ Ɲanmiɛn klo e’n’
“Kɛ amún mínndɛ kɛ e Min’n Jésus-Krist si amun aunnvuɛ naan ɔ man amun anannganman nguan’n, an yo sa nga an yo-ɔ an si kɛ Nyanmiɛn klo amun’n.”—ZID 21.
1, 2. ?Wafa sɛ yɛ Zoova kleli kɛ ɔ klo e ɔ? ?Yɛ wafa sɛ yɛ e si kɛ Zoova kaman lɛ kloman e sa ngbɛn ɔn?
WAFA nga Ɲanmiɛn Zoova kleli kɛ ɔ klo e’n, be diman be yalɛ. Like danfuɛ nga Zoova yoli m’ɔ kle kɛ ɔ klo e’n, yɛle e ti kpɔlɛ tɛ m’ɔ yili’n. Ɔ kloli mɛn’n lele ɔ maan ɔ sunmɛnnin i Wa m’ɔ klo i’n asiɛ’n su wa naan ɔ wa wu e ti. (Zan 3:16) Zoova yoli sɔ afin ɔ klo kɛ e ɲan anannganman nguan. Yɛ ɔ kunndɛ kɛ e di klolɛ ng’ɔ fa klo e’n su tititi!
2 ?I sɔ’n ti’n, é sé kɛ i kwlaa yoli o Zoova klo e? Cɛcɛ. Afin, Zid 21 wla e fanngan kɛ: “Kɛ amún mínndɛ kɛ e Min’n Jésus-Krist si amun aunnvuɛ naan ɔ man amun anannganman nguan’n, an yo sa nga an yo-ɔ an si kɛ Nyanmiɛn klo amun’n.” Kɛ be se kɛ ‘an yo sa nga an yo-ɔ an si kɛ Nyanmiɛn klo amun’n,’ ɔ kle kɛ sɛ e kunndɛ kɛ Ɲanmiɛn klo e titi’n, ɔ fata kɛ e fa ajalɛ. ?Ngue like trele sa yɛ ɔ fata kɛ e yo naan Ɲanmiɛn w’a klo e titi ɔ?
?É yó sɛ naan Ɲanmiɛn w’a klo e titi?
3. ?Zezi waan ngue yɛ ɔ fata kɛ e yo naan i Si w’a klo e titi ɔ?
3 Kɔnguɛ kasiɛn nga Zezi dili i asiɛ’n su wa kwlaa naan b’a kun i’n, i ndɛ ng’ɔ kannin’n, ɔ tɛ i sɔ kosan’n su. Ɔ seli kɛ: “Sɛ an fa min ndɛ’n su’n, amún sí kɛ n klo amun tititi. Kɛ n fa n Si ndɛ’n su sɔ-ɔ, ɔ maan n si kɛ ɔ klo min tititi.” (Zan 15:10) Ndɛ sɔ’n kle weiin kɛ Zezi si kɛ Zoova i mmla’m be su nantilɛ’n yɛ maan ɔ nin i Si be afiɛn’n sɛ́ titi ɔ. ?Zezi m’ɔ ti Ɲanmiɛn i Wa’n mɔ fɔ nunmɛn i nun’n, sɛ ɔ fatali kɛ ɔ nanti Ɲanmiɛn mmla’n su naan w’a yo kpa’n, yɛ e li?
4, 5. (a) ?Like klikli ng’ɔ fata kɛ e yo naan y’a kle kɛ e klo Zoova’n yɛle benin? (b) ?Ngue ti yɛ ɔ nin i fataman kɛ e bu Zoova i ndɛ’n i like tɛ annzɛ e kpalo i ɔ?
4 Like klikli ng’ɔ fata kɛ e yo’n, yɛle Zoova i ndɛ’n su falɛ. Akoto Zan seli kɛ: “Nyanmiɛn i klolɛ’n yɛlɛ kɛ e fɛ i ndɛ’n su, i ndɛ sɔ’n i su falɛ’n yo-man ya.” (1 Zan 5:3) I yo, andɛ’n, aɲinyiɛ’n timan sran’m be nzuɛn. Maan e fa e ɲin e sie i ndɛ nga su. Ndɛ sɔ’n yɛ: “I ndɛ sɔ’n i su falɛ’n yo-man ya.” Trɔ ng’ɔ kwla e’n, Zoova su seman kɛ e sua.
5 Maan e fa sunnzun ase kun: Trɔ kun o lɛ’n, amun si kɛ ɔ yo nɔnnin kpa. ?Kɛ mɔ amun si sɔ’n niɔn, amún sé amun janvuɛ kpa kun kɛ ɔ sua? Amun su semɛn i sɔ. ?Nɛ́n i ɔ? ?Yɛ Zoova li? Zoova ti klun ufuefuɛ tra e lele. Ɔ si like nga e kwlɛ i yo’n tra e lele kpe nun. Biblu’n kan kɛ Zoova “si kɛ fa yɛ ɔ fa yili ye ɔ.” (Jue Mun 103:14) Ɔ maan, like nga e kwlɛmɛn i yo’n, ɔ su seman e kɛ e yo. I sɔ’n ti’n, kɛ be se kɛ maan e fɛ i ndɛ’n su’n, nán e bu i like tɛ annzɛ e kpalo i. Sɛ e fɛ i ndɛ’n su’n, é klé kɛ e klo e Si m’ɔ o ɲanmiɛn su lɔ’n sakpa naan e kunndɛ kɛ ɔ klo e titi.
Like ngunmin kun mɔ Zoova fa cɛli e’n
6, 7. (a) ?Ngue yɛle e klun akunndan’n? (b) An fa sunnzun ase kun be kle wafa nga e klun akunndan’n kwla uka e naan Ɲanmiɛn w’a klo e titi’n.
6 Mɛn mɔ w’a yo kekle yɛ nun’n, ajalɛ kpanngban nga e fa be’n, be kan e ɲin m’ɔ yi Ɲanmiɛn’n. ?Wafa sɛ yɛ e kwla si kɛ e ajalɛ sɔ’m be nin Ɲanmiɛn i klun sa’n be kɔ likawlɛ ɔ? Zoova mannin e like kpa kun m’ɔ kwla uka e dan kpa naan y’a fɛ i ndɛ’n su ɔ. Like sɔ’n yɛle e klun akunndan’n. E klun akunndan’n ti kɛ sran yɛ ɔ o e klun naan ɔ di e jɔlɛ sa. Kɛ é fá ajalɛ’n, ɔ uka e. Sɛ kusu e fali ajalɛ wieli’n, e klun akunndan’n maan e bu i sin e nian sɛ ɔ ti kpa annzɛ ɔ ti tɛ o. Sɛ i sɔ’n nin i fata annzɛ ɔ nin i fataman o.—An kanngan Rɔmfuɛ Mun 2:14, 15 nun.
7 ?Ɔ maan é yó sɛ naan e klun akunndan’n w’a uka e kpa liɛ su? Maan e fa sunnzun ase kun. Sɛ e su kɔ aofuɛ’n, sran kun m’ɔ si lika sɔ’n kpa’n, yɛ ɔ́ klé e atin’n niɔn. I liɛ’n, e su mlinman. E kwla fa sran sɔ’n e sunnzun e klun akunndan’n. Sɛ e klun akunndan’n nunman lɛ’n, ajalɛ kwlaa nga e fa’n, i bo’n su guaman kpa.
8, 9. (a) ?Ngue yɛ ɔ kwla yo e klun akunndan’n m’ɔ fataman kɛ e wla fi su ɔ? (b) ?Ngue yɛ e kwla yo naan y’a si kpa kɛ e klun akunndan’n kwla yo e ye sakpa ɔ?
8 Sanngɛ kusu’n, ɔ ju wie’n, e klun akunndan’n kwla fɔn. Kɛ é kɔ́ lika’n, sɛ lika’n sanngan e atin klefuɛ’n i ɲrun’n, ɔ kwla mlin e. ?I kunngba’n, sɛ e bɔbɔ e klunklo ninnge tɛtɛ’m be saci e klun akunndan’n, ɔ́ yó sɛ? Saan ɔ́ klé e atin tɛ. Biblu’n wla e su nun kɛ: “Klɔ sran’n i klun akunndan’n ti tɛ tra like kwlaa, be yo akunndan sɔ’n i sa fi-ɔ ɔ yo-man ye.” (Zeremi 17:9) Asa ekun sɛ e nin e atin klefuɛ’n e si akplowa’n, naan e fɛmɛn i ndɛ’n su’n naan e bɔbɔ e fa e atin liɛ’n, é mlín wie. I kunngba’n, sɛ Ɲanmiɛn Ndɛ’n w’a tinngɛman e klun akunndan’n naan e lafi i su’n, ɔ su kwlá ukaman e. (Jue Mun 119:105) I ng’ɔ yo ɲrɛnnɛn’n yɛle kɛ mɛn’n nga nun sran kpanngban be fa be ɲin sie i be klunklo ninnge’m be su. Annzɛ be faman Ɲanmiɛn Ndɛ’n su. (An kanngan Efɛzfuɛ Mun 4:17-19 nun.) I sɔ’n ti yɛ kannzɛ sran kpanngban be le klun akunndan’n, sanngɛ be yo sa tɛtɛ’n niɔn.—1 Timote 4:2.
9 Maan e mian e ɲin, nán maan e yo kɛ be sa le! Sanngɛ maan e yaci Ɲanmiɛn Ndɛ’n nun naan ɔ tinngɛ e klun akunndan’n naan ɔ yo e wun sa ye sakpa. Atin nga e klun akunndan mɔ Biblu’n tinngɛli i’n ɔ kle e’n, ɔ fata kɛ e fa su. Nán e yaci e klunklo ninnge’m be lɛ naan be tin e su. Asa kusu’n, like nga e niaan nga be o asɔnun’n nun be klun akunndan’n ti be yo annzɛ be yoman’n, maan e ɲin yi i. Maan e mian e ɲin naan be klun akunndan’n w’a sannganman naan b’a tɔman. Yɛ maan e si kɛ e niaan wie’m be klun akunndan liɛ’n kwla sanngan ndɛndɛ tra e liɛ’n.—1 Korɛntfuɛ Mun 8:12; 2 Korɛntfuɛ Mun 4:2; 1 Piɛr 3:16.
10. ?E mɛn dilɛ’n nun ninnnge nsan benin yɛ é wá kókó be su yalɛ siɛn’n niɔn?
10 Siɛn’n, maan e nian ninnnge nsan mɔ be nun’n, e kwla fa e aɲinyiɛ’n e kle kɛ e klo Zoova’n. Ninnge sɔ’m be nun’n, e klun akunndan’n di junman. Sanngɛ ng’ɔ ti cinnjin’n, yɛle kɛ ɔ fata kɛ e fa Biblu’n nun mmla’n naan e tinngɛ e klun akunndan’n. Ajalɛ nsan nga be nun’n, e kwla kle kɛ e klo Zoova’n be yɛ: (1) Maan e klo be nga Zoova klo be’n, (2) maan e kle kɛ e ɲin yi be nga be sie e’n, yɛ (3) maan e mian e ɲin naan e yo sanwun Ɲanmiɛn ɲrun.
Maan e klo be nga Zoova klo be’n
11. ?Ngue ti yɛ ɔ nin i fata kɛ e klo be nga Zoova klo be’n niɔn?
11 I klikli’n, maan e klo be nga Zoova klo be’n. Kɛ sran’m be nin wiengu’m be o’n, be ti kɛ fɔkɔ m’ɔ nɔnnɔn ninnge nga be o i wun lɛ’n sa. Yɛle kɛ sa nga be wiengu’m be yo i be wun lɛ mɔ be wun i’n, be nian su be yo. E Yifuɛ’n si kɛ, kɛ mɔ fɔ’n o e nun’n ti’n, wie liɛ’n janvuɛ tralɛ’n kwla yo tɛ annzɛ ɔ kwla yo kpa man e. I ti’n, ɔ man e afɔtuɛ kpa nga: “Sran ng’ɔ fɛ i wun mantan ngwlɛlɛfuɛ’n, ɔ kaci ngwlɛlɛfuɛ. Sran nga kusu b’ɔ fɛ i wun mantan sinnglinfuɛ’n, ɔ kaci sinnglinfuɛ.” (Nyanndra Mun 13:20; 1 Korɛntfuɛ Mun 15:33) E nun wie fi kunndɛman kɛ “ɔ́ káci sinnglinfuɛ.” Like nga e kunndɛ’n yɛle kɛ é “káci ngwlɛlɛfuɛ.” Sran fi i ngwlɛlɛ’n tranman Zoova liɛ’n. Kusu’n, sran fi kwlá saciman Zoova. Sanngɛ janvuɛ tralɛ nun’n, ɔ kle e ajalɛ klanman kpa. Maan e bu akunndan kan e nian. ?Klɔ sran’m be nun’n, sran’n i wafa benin yɛ Zoova fali be yoli i janvuɛ ɔ?
12. ?Sran’n i wafa benin yɛ Zoova tra be janvuɛ ɔ?
12 Zoova flɛli Abraamu m’ɔ ti laa sran’n kɛ “min janvuɛ.” (Ezai 41:8) Abraamu sɔ’n, kɛ be se kɛ sran kun yoli seiinfuɛ naan ɔ yoli sran kpa naan i ɲin yili Zoova’n, yɛle i liɛ’n. Nanwlɛ, ɔ lafili Ɲanmiɛn su. (Zak 2:21-23) Sran wafa kɛ ngalɛ sa’n yɛ Zoova tra be janvuɛ ɔ. Andɛ kusu’n, sran wafa kɛ ngalɛ sa’n yɛ Zoova te tra be janvuɛ wie ɔ. ?Sɛ Zoova tra janvuɛ wafa kɛ ngalɛ sa’n, ɔ timan cinnjin kɛ e mɔ e ti klɔ sran mɔ fɔ’n o e nun’n, e tra janvuɛ kpa? ?Ɔ timan cinnjin kɛ e nin ngwlɛlɛfuɛ mun e nanti naan e kusu e kaci ngwlɛlɛfuɛ?
13. ?Sɛ e waan é trá janvuɛ’n, ngue yɛ ɔ kwla uka e naan y’a tra janvuɛ kpa ɔ?
13 ?Ngue yɛ ɔ kwla uka e naan y’a tra janvuɛ kpa ɔ? Be nga Biblu’n kan be ndɛ mɔ be yoli sɔ’n, maan e nian be ajalɛ’n su, i liɛ’n é trá janvuɛ kpa. Maan e nian tranlɛ nga Riti nin i sewi Naomi be trannin’n. Maan e nian janvuɛ nga Davidi nin Zonatan be trali’n. Yɛ e nian janvuɛ nga Timote nin Pɔlu be trali’n. (Rit 1:16, 17; 1 Samiɛl 23:16-18; Filipfuɛ Mun 2:19-22) Like cinnjinfuɛ nga ti yɛ sran sɔ’m be janvuɛ tralɛ’n yoli tankaan kpa’n, yɛle kɛ be kloli Zoova sakpa. ?E kwla ɲan janvuɛ kun m’ɔ klo Zoova kɛ e bɔbɔ sa? I yo. Afin, asɔnun’n nun’n, be nga be klo Zoova’n be diman be yalɛ. Janvuɛ sɔ’m be su wlawlaman e kɛ e yo ninnge nga Zoova kloman be’n. Sanngɛ bé úka e naan e ɲin w’a yi Zoova naan y’a wɔ e ɲrun i sulɛ’n nun, naan y’a lua like nga Ɲanmiɛn wawɛ’n klo i’n. (An kanngan Galasifuɛ Mun 6:7, 8 nun.) Bé úka e naan y’a yo sa nga e yo ɔ e si kɛ Ɲanmiɛn kló e’n.
Maan e ɲin yi be nga be sie e’n
14. ?Ngue ti yɛ ɔ ti kekle e sa nun kɛ e ɲin yi be nga be sie e’n niɔn?
14 Ajalɛ i nɲɔn su mɔ i nun’n, e kwla yi i nglo kɛ e klo Zoova’n, yɛle kɛ e ɲin yi be nga be sie e’n. Ɔ fata kɛ e ɲin yi be nga be sie e’n. ?Sanngɛ ngue ti yɛ blɛ wie nun’n, i sɔ yolɛ’n ti kekle man e ɔ? I kun yɛle kɛ be nga be sie e’n, fɔ o be nun. Asa kusu’n, e bɔbɔ wunmuan’n fɔ o e nun wie. Ɔ maan, e nin ɲin kekle yolɛ’n e fin e nin klun.
15, 16. (a) ?Ngue ti yɛ ɔ ti cinnjin kɛ e ɲin yi be nga Zoova sieli be kɛ be niɛn i nvle’n nunfuɛ’m be su’n niɔn? (b) ?Wafa nga Zoova wunnin ijɔlɛ nga Izraɛlifuɛ’m be ijɔli Moizi’n, ngue afɔtuɛ yɛ e suɛn i nun ɔn?
15 Ɔ fata kɛ e usa e wun kɛ: ‘?Kannzɛ bɔbɔ ɔ ti kekle min sa nun kɛ min ɲin yi kpɛnngbɛn mun’n, sanngɛ ngue ti yɛ ɔ fata kɛ n yo sɔ ɔ?’ Kosan sɔ’n i su tɛlɛ’n nin atin nga Zoova le i sie nglo nin asiɛ’n be kɔ likawlɛ. ?Wan yɛ amún fɛ́ i kɛ ɔ sie amun ɔn? Sɛ e waan Zoova yɛ ɔ sie e’n, ɔ fata kɛ e ɲin yi i. ?Sɛ e yoman sɔ’n, e kwla se kɛ i yɛ ɔ ti e Siefuɛ’n niɔn? Asa ekun’n, Zoova fa klɔ sran mun naan be niɛn i nvle nunfuɛ’m be su. Sran sɔ mun’n, fɔ’n o be nun. ?Sɛ e ɲin yiman sran sɔ mun’n, wafa sɛ yɛ Zoova bú e ɔ?—An kanngan 1 Tɛsalonikfuɛ Mun 5:12, 13 nun.
16 I wie yɛle kɛ i nun mɔ Izraɛlifuɛ’m be ijɔli Moizi mɔ be jasoli i wun’n, Zoova wunnin sa nga be yoli i lɛ’n kɛ i bɔbɔ yɛ b’a jaso i wun naan b’a ijɔ i ɔ. (Kalɛ 14:26, 27) Ɲanmiɛn w’a kaciman. Sɛ e jaso be nga Zoova sie be kpɛnngbɛn’n be wun’n, nn Zoova wun yɛ y’a jaso ɔ!
17. ?Ajalɛ benin yɛ ɔ fata kɛ e fɛ i be nga be sieli be asɔnun’n su’n, be lika ɔ?
17 Akoto Pɔlu kleli e ajalɛ ng’ɔ fata kɛ e fɛ i be nga be sieli be Klistfuɛ asɔnun’n su’n, be lika’n. Ɔ klɛli i kɛ: “Maan amun nyin yi amun kpɛnngbɛn mun, an bu be sran. Be nian amun su titi, afin bé wá kán be junman’n i su ndɛ’n klé Nyanmiɛn. An yo sa nga bɔ maan be klun jɔ́ be junman’n su’n. Sɛ amun a yo-mɛn i sɔ bɔ be oto’n, ɔ maan be su kwlá uka-man amun.” (Ebre Mun 13:17) Nanwlɛ, ɔ fata kɛ e mian e ɲin kpa naan y’a suan aɲinyiɛ’n. Nán e wla fi su kɛ e waan é yó sa nga e yo ɔ e si kɛ Ɲanmiɛn kló e’n. ?I sɔ’n ti’n, ɔ nin i fataman kɛ e mian e ɲin e suɛn i sɔ’n yolɛ?
Maan e yo sanwun titi Zoova ɲrun
18. ?Ngue ti yɛ Zoova klo kɛ e yo sanwun titi ɔ?
18 Like nsan su nga e kwla yo naan y’a yi i nglo kɛ e klo Zoova’n, yɛle kɛ e mian e ɲin naan e yo sanwun Zoova ɲrun. Titi’n siɛ nin niɛn’m be mian be ɲin kpa naan be mma’m be yo yɛiin. ?Ngue ti ɔ? Yɛle kɛ be kunndɛ kɛ be mma’m be yo juejue yɛ be wun fa be feke. Asa kusu’n, yɛiin mɔ ba’m be ti’n ti’n, kɛ be wun be’n, be si kɛ awlo lɔ yo fɛ. Kpɛkun ɔ yi i nglo kɛ siɛ nin niɛn’m be klo be mma mun yɛ be nian be lika. I kunngba’n ti yɛ Zoova kunndɛ kɛ e yo sanwun’n niɔn. Ɔ si kɛ sɛ e ti sanwun’n, ɔ ti kpa man e bɔbɔ. Ɔ si kusu kɛ sɛ e ti sanwun’n, i sɔ’n mɛnmɛn i m’ɔ ti e Si m’ɔ o nglo lɔ’n. I sɔ’n ti cinnjin kpa, afin ɔ́ yó maan sran’m bé fá be wun mántan e Ɲanmiɛn mɔ e su i’n. Afin be sie i nzɔliɛ kɛ e nantilɛ’n nin be nga be o mɛn tɛ ng’ɔ o yɛ’n nun’n, be liɛ’n timan kun.
19. ?Wafa sɛ yɛ e si kɛ be wun yɛinyɛin yolɛ’n ti cinnjin ɔn?
19 ?Ninnge benin nun yɛ ɔ fata kɛ e yo sanwun ɔn? Nanwlɛ, ɔ fata kɛ sa’n kwlaa nun’n, e yo sanwun. Laa Izraɛli lɔ’n, Zoova kan kleli i nvle’n nunfuɛ’m be kɛ maan be yo sanwun annzɛ yɛiin be wunnɛn’n su. (Saun Yolɛ 15:31) Yɛiin yolɛ’n su’n, Moizi mmla’n kleli kɛ ɔ fata kɛ Izraɛlifuɛ’m be yo yɛiin be ufuɛ’m be su. Ɔ fata kɛ be yo be talie’m be yɛiin. Ɔ fata kɛ be wunnzin be sa nin be ja mun, yɛ be kpu be tralɛ mun. (Ezipt Lɔ Tulɛ 30:17-21; Saun Yolɛ 11:32; Kalɛ 19:17-20; Mmla’n 23:14, 15) Ɔ nin i fata kɛ Izraɛlifuɛ’m be wla kpɛn su kɛ be Ɲanmiɛn Zoova’n ti sanwun. Ɔ fata kusu kɛ Ɲanmiɛn mɔ fiɛn kaan sa nunmɛn i wun’n, i sufuɛ’m be kusu be yo sanwun. Nán fiɛn kan be.—An kanngan Saun Yolɛ 11:44, 45 nun.
20. ?Ninnge benin’m be nun yɛ ɔ fata kɛ e ka sanwun titi ɔ?
20 Ɔ fata kɛ e wunnɛn’n su o, e klun akunndan’n nun o, e yo sanwun. Maan e mian e ɲin naan y’a buman sa tɛ’n i akunndan. Kannzɛ bɔbɔ bla annzɛ bian kunndɛlɛ sukusuku’n yɛ w’a tru mɛn nun’n, sanngɛ Zoova i mmla m’ɔ kan nzuɛn kpa ndɛ’n, maan e nanti su kpa. Ng’ɔ ti cinnjin kpafuɛ’n, yɛle kɛ nán fiɛn kaan sa kan e Zoova sulɛ’n. Nán maan e fa Ɲanmiɛn sulɛ wafa ng’ɔ timan su’n, e fa sanngan e Ɲanmiɛn sulɛ’n nun mlɔnmlɔn. Nán e wla fi ndɛ nga Ɲanmiɛn maan be klɛli i Ezai 52:11 nun’n i su le. Be klɛli i kɛ: “Amun wɔ, amun wɔ, amun fite! Nán amun kan ninnge fiɛn fi.” Andɛ’n, sɛ e waan é ká sanwun Ɲanmiɛn sulɛ’n nun’n, ɔ fataman kɛ e kan like nga e Si m’ɔ o nglo lɔ’n, ɔ bu i like fiɛn’n. I sɔ’n ti yɛ, Ɲanmiɛn sulɛ ng’ɔ timan su’n, be cɛn dilɛ mɔ b’a tru mɛn’n nun andɛ’n, ɔ fata kɛ e nian e wun su kpa naan y’a diman wie ɔ. Ɔ ti su kɛ sɛ e waan é ká sanwun, ɔ timan pɔpɔ. Sanngɛ Zoova i sufuɛ’m be liɛ’n, be mian be ɲin be yo sɔ. Afin, i sɔ’n uka be naan b’a yo sa nga be yo ɔ be si kɛ Ɲanmiɛn kló be’n.
21. ?Ngue yɛ e kwla yo naan y’a lafi su kpa kɛ Ɲanmiɛn kló e titi ɔ?
21 Zoova kunndɛ kɛ e yo naan ɔ klo e tititi. Sanngɛ ɔ fata kɛ e kwlaa e tinuntinun e mian e ɲin kpa naan Ɲanmiɛn klo e titi. Sɛ e nian Zezi i ajalɛ’n su yɛ e nanti Zoova i mmla’m be su e fa kle kɛ e klo i’n, yɛ e kwla yo sɔ ɔ. Sɛ e yo sɔ’n, e kwla lafi su kɛ “klolɛ nga Nyanmiɛn fa klo e b’ɔ man Jésus-Krist yi i nglo kle ye’n, [...] like fi nun-man lɛ b’ɔ maan i nyin kwla tu e su-ɔ.”—Rɔmfuɛ Mun 8:38, 39.
?Amun wla kwla kpɛn su?
• ?Wafa sɛ yɛ e klun akunndan’n kwla uka e naan Ɲanmiɛn w’a klo e titi ɔ?
• ?Ngue ti yɛ ɔ nin i fata kɛ e klo be nga Zoova klo be’n niɔn?
• ?Ngue ti yɛ ɔ ti cinnjin kɛ e ɲin yi be nga be sie e’n niɔn?
• ?Wafa sɛ yɛ sanwun yolɛ’n ti cinnjin man Ɲanmiɛn i nvlefuɛ mun ɔn?
[Kuku/Foto, bue 28]
FLUWA KUN M’Ɔ UKA E NAAN E AELIƐ’N W’A YO KPA’N
Nvle kun aɲia nga be yoli i afuɛ nga be flɛ i 2008 nun’n, i nun’n, be yili fluwa kun. Be flɛ i kɛ ‘Maan e yo sa nga e yo ɔ e si kɛ Ɲanmiɛn klo e’n.’ ?Ngue ti yɛ be yili fluwa sɔ’n niɔn? Be yili i kɛ bé fá úka Klistfuɛ mun naan be si Zoova i mmla mun naan be klo be. Like klikli ng’ɔ fa be ɲin sie su’n yɛle Klistfuɛ nzuɛn’n. Sɛ e bo e ɲin ase naan e suan fluwa ‘Maan e yo sa nga e yo ɔ e si kɛ Ɲanmiɛn klo e’n’ i nun like kpa’n, é láfi su kpa kɛ Zoova i mmla’m be su nantilɛ’n ti kpa man e andɛ. Yɛ i sɔ’n yó maan é kwlá ɲán anannganman nguan cɛn wie lele.
Like ng’ɔ ti cinnjin kpafuɛ’n yɛle kɛ fluwa sɔ’n úka e naan y’a wun kɛ Zoova i mmla’m be su nantilɛ’n yoman nɔnnin. Sanngɛ sɛ e nanti su’n, ɔ kle kɛ e klo Zoova sakpa. Ɔ maan fluwa sɔ’n wá yó maan é úsa e wun kɛ: ‘?Ngue ti yɛ n nanti Zoova i mmla’m be su ɔ?’
Kɛ sran’m be yaci sa nga be yo ɔ be si kɛ Zoova klo be’n i yolɛ’n, ɔ finman like nga be kle be mɔ be wunmɛn i wlɛ’n. Sanngɛ ɔ fin be bɔbɔ be nzuɛn tɛ’n. I sɔ’n ti’n, ɔ ti cinnjin kpa kɛ Zoova nin i mmla mɔ be uka e cɛn kwlaa’n, e wla be klolɛ’n i bo ase kpa! E lafi su kɛ fluwa uflɛ sɔ’n, ɔ́ úka be nga be ti kɛ Zoova i bua mun sa’n mɛn wunmuan’n nun’n, naan b’a jran kekle b’a yo sa ng’ɔ ti kpa’n titi. Kusu e lafi su kɛ ɔ́ úka be maan bé klé kɛ Satan ti ato buafuɛ. Kpɛkun ng’ɔ ti cinnjin kpafuɛ’n, yɛle kɛ bé yó sa nga be yo ɔ be si kɛ Ɲanmiɛn kló be’n titi!—Zid 21.