?Like nga Zoova yoli fa deli e’n e bu i like dan?

“Izraɛl’m be Nyanmiɛn b’ɔ ti e Min’n, i kwla o, yɛlɛ kɛ w’a niɛn i sran’m be osu, w’a de be.”—LIK 1:68.

1, 2. ?Sa ng’ɔ o e su dɔ nga su’n i tɛ m’ɔ ti’n, e kwla fa sunnzun ngue? ?Yɛ kosan benin yɛ é tɛ́ be su ɔ?

MAAN ɔ yo e kɛ b’a la e dɔɔtrɔ sa. Sua nga e o nun’n, e nin be nga e le tukpacɛ kunngba’n yɛ e o nun ɔn. Tukpacɛ sɔ’n leman are. Kɛ e ti i kɛ dɔɔtrɔ bian kun w’a fa ajalɛ naan ɔ su kunndɛ tukpacɛ’n i are’n, i sɔ’n cici e wla. E kunndɛ kɛ é sí like kwlaa nga dɔɔtrɔ’n yo’n. Cɛn kun’n, e ti i kɛ w’a wun tukpacɛ’n i are! Dɔɔtrɔ m’ɔ wunnin are sɔ’n fɛli kpa naan w’a kwla wun i. ?Wafa sɛ yɛ é bú dɔɔtrɔ sɔ’n niɔn? Nanwlɛ e ɲin yí i kpa. Kpɛkun é sí sran sɔ mɔ maan e nin sran kpanngban uflɛ e su wuman kun’n, i ye kpa.

² I sɔ ndɛ’n kwla yo kɛ sa blɔlɛ sa. Sanngɛ ɔ yi sa kun m’ɔ o e kwlaa e su’n i nglo. E tinuntinun sa ng’ɔ o e su’n, i tɛ liɛ’n tra nga e kɛnnin i ndɛ lɛ’n. Y’a mian defuɛ wun kpa. (An kanngan Rɔmfuɛ Mun 7:24 nun.) E delɛ’n w’a yoman pɔpɔ w’a manman Zoova. W’a yoman pɔpɔ w’a manman i Wa’n wie. Siɛn’n maan e fa e ɲin e sie i kosan nnan su. ?Ngue ti yɛ y’a mian delɛ wun ɔn? ?Ngue yɛ ɔ fatali kɛ Zezi yo naan y’a ɲan e ti ɔ? ?Ngue yɛ Zoova kusu yoli ɔ? ?Kpɛkun wafa sɛ yɛ e kwla kle kɛ e bu delɛ nga Ɲanmiɛn deli e’n i like dan ɔn?

Like nga ti yɛ y’a mian delɛ wun’n

3. ?Wafa sɛ yɛ e kwla fa sa tɛ yolɛ’n e sunnzun tukpacɛ m’ɔ sa sran kpanngban’n niɔn?

³ Koko nga nun wa’n, kɛ be kali tukpacɛ nga be sa sran kpanngban’n, be nun tɛ’n kun yɛle gbɔgbɔ nga be flɛ i Grippe Espagnole m’ɔ truli kpa afuɛ nga be flɛ i 1918 nun’n. Tukpacɛ sɔ’n kunnin sran miliɔn kpanngban. Sanngɛ tukpacɛ uflɛ wie’m be kun sran tra ngalɛ’n. Wie liɛ’n sran nga tukpacɛ sɔ’m be tɔ be su’n b’a sɔnman, sanngɛ be kun be nun sunman lika.a ?Yɛ sɛ e waan é fá sa tɛ yolɛ’n é súnnzun tukpacɛ kɛ ngalɛ sa’n nin? Maan e wla kpɛn ndɛ ng’ɔ o Rɔmfuɛ Mun 5:12 nun’n i su. I waan: “Sran kun ti yɛ sa tɛ yolɛ’n bali mɛn nun-ɔn, yɛ sa tɛ sɔ’n ti yɛ maan wie’n bali-ɔ. Yɛ i ti yɛ maan wie’n wo sran’m be kwlaa be su-ɔ, afin be kwlaa be yo sa tɛ.” Sa tɛ yolɛ’n sali sran kwlaa afin klɔ sran’m be kwlaa mɔ fɔ o be nun’n, be yo sa tɛ. (An kanngan Rɔmfuɛ Mun 3:23 nun.) ?Yɛ sran nɲɛ yɛ sa tɛ yolɛ’n ti’n be wu ɔ? Pɔlu klɛli i kɛ sa tɛ yolɛ’n ti’n, wie’n o “sran’m be kwlaa” be su.

4. ?Wafa sɛ yɛ Zoova siesieli e nguan ɲanman’n niɔn? ?Yɛ wafa sɛ yɛ i sɔ’n nin akunndan nga sran’m be bu i andɛ’n ɔ timan kun ɔn?

⁴ Andɛ’n sran kpanngban be bumɛn i kɛ sa tɛ’n nin wie’n be ti kɛ ngalɛ’n sa. Like nga srɛ kun be i wun’n yɛle wie m’ɔ kun be kpɛ kunngba’n. Sanngɛ wie nga be yo kpɛnngbɛn blɛblɛ mɔ be wu’n, ɔ ti “anannganman like” be ɲrun. Like nga Like Yifuɛ’n siesieli’n, i kan nn e wla w’a fi su. E nguan ɲanman’n i tɛnndɛn’n juman nga Zoova siesieli’n nun bɔbɔ kaan sa. I kpa’n Zoova ɲrun’n klɔ sran fi nin a tranman nguan nun nin a diman “cɛn ba kun” le. (2 Piɛr 3:8) Ɔ maan, Ɲanmiɛn Ndɛ’n se kɛ e nguan ɲanman’n mɔ w’a waman’n, ɔ ti kɛ ijre m’ɔ fi blɛ kun nun’n annzɛ ɔ ti kɛ aunmuan sa. (Jue Mun 39:6; 1 Piɛr 1:24) Ɔ fata kɛ e wla kpɛn i sɔ’n su titi. ?Ngue ti ɔ? Sɛ e wun “tukpacɛ” ng’ɔ o e su’n i tɛ lika’n, e kwla wun kɛ i “are” nga be fa de e’n ti like dan.

5. ?Sa tɛ’n ti’n ngue yɛ y’a kwlá ɲɛnmɛn i le ɔ?

⁵ Sɛ e waan é wún sa tɛ’n nin i sin sa’m be tɛ lika’n, ɔ fata kɛ e mian e ɲin naan like nga sa tɛ’n yoli e’n, e wun i wlɛ. I sɔ’n kwla yo kekle man e, afin sa tɛ’n ti’n, like kun mɔ e si nin e nin klikli’m be ɲɛnnin i’n, ɔ fili e sa. I klikli nun’n fɔ nunman Adam nin Ɛvu be nun. Kɛ mɔ fɔ nunman be akunndan’n nin be wunnɛn’n nun’n ti’n, akunndan nga be bu’n, ɔ nin wafa nga be wun fa yo be’n, ɔ nin like nga be yo’n, be kwla nian su. I sɔ’n ti’n be kwla yi Ɲanmiɛn Zoova i sufuɛ’m be nzuɛn kpakpa’n i nglo. Sanngɛ be kpaloli like kpa sɔ mɔ be fa mannin be’n. Yɛle kɛ be kacili be sin be sili Zoova. Ɔ maan mɛn dilɛ wafa nga Zoova siesieli mannin be’n, ɔ fili be bɔbɔ nin be afinliɛ nunfuɛ’m be sa. (Bo Bolɛ 3:16-19) Kɛ ɔ yoli sɔ’n, be fali “tukpacɛ” tɛ kpa nga e kɛnnin i ndɛ lɛ’n be yili be bɔbɔ nin e su wie. Zoova buli be fɔ kɛ ng’ɔ nin i fata’n sa. Sanngɛ e liɛ’n, ɔ fali e wla sieli i e ti ɲanlɛ’n su.—Jue Mun 103:10.

Like nga Zezi yoli naan y’a ɲan e ti’n

6, 7. (a) ?Wafa sɛ yɛ Zoova dun mmua kleli kɛ e delɛ’n su yoman pɔpɔ ɔ? (b) ?Kwlaa naan b’a kpɛ Moizi mmla’n, ngue yɛ tɛ nga Abɛli nin lalafuɛ sran kpa’m be yili’n ɔ kle e ɔ?

⁶ Zoova si kɛ Adam nin Ɛvu be afinliɛ nunfuɛ’m be delɛ’n su yoman pɔpɔ. I nuan ndɛ ng’ɔ o Bo Bolɛ 3:15 nun’n i nun’n, e wun e delɛ’n i ti like ng’ɔ fata kɛ be yo’n. Yɛle kɛ Zoova wá súnman “bla’n i osu” kun m’ɔ́ yó e defuɛ ɔ. Defuɛ sɔ’n ɔ́ núnnún Satan. Sanngɛ i sɔ yolɛ nun’n defuɛ sɔ’n fɛ́. Yɛle kɛ ɔ́ ɲán kannin i ja sin. I sɔ’n ti nzɔliɛ like. Kɛ e niɛn i sa’n, kannin sɔ’n kwla yo ya, yɛ ɔ kwla yo maan fanngan wie i nun. ?Sanngɛ i sɔ’n i bo’n yɛle benin? ?Ngue sa yɛ ɔ́ wá jú Zoova i sran ng’ɔ kpɛli i’n su ɔ?

⁷ Klɔ sran’m be delɛ’n ti’n, defuɛ’n wá kpáta be ti. Ɔ ti like kun m’ɔ́ fá núnnún sa tɛ’n i bo nzuɛn’n, kpɛkun ɔ́ fá síesíe sran mun nin Ɲanmiɛn be afiɛn ɔn. ?Wafa sɛ yɛ ɔ́ yó sɔ ɔ? Ninnge wie’m be kleli kɛ tɛ yilɛ trán nun. Kɛ Abɛli m’ɔ ti sran kpa klikli’n, ɔ fali nnɛn mun yili tɛ mannin Zoova’n, ɔ sɔli nun klanman. I sin’n, lalafuɛ nun Ɲanmiɛn sufuɛ kpa kɛ Nowe nin Abraamu nin Zakɔbu yɛ Zɔbu sa’n, be yili i sɔ’n tɛ kunngba’n wie. Yɛ i sɔ’n jɔli Ɲanmiɛn klun. (Bo Bolɛ 4:4; 8:20, 21; 22:13; 31:54; Zɔb 1:5) Moizi Mmla’n tuli tɛ yilɛ’n i ɲin kpa kleli sran mun.

8. ?Sa tɛ’n i ti srɛlɛ cɛn’n nun’n, ngue yɛ Ɲanmiɛn ɲrun jranfuɛ’m be su kpɛn’n yo ɔ?

⁸ Tɛ cinnjin nga Moizi Mmla’n kle kɛ be yi be’n, be nun kun yɛle nga be yi i sa tɛ’n i ti srɛlɛ cɛn dan’n nun’n. Cɛn sɔ’n nun’n, Ɲanmiɛn ɲrun jranfuɛ’m be su kpɛnngbɛn’n ɔ yo nzɔliɛ ninnge wie mun. Ɔ yi tɛ sɔ’n man Zoova. Ɔ fa kpata be sa tɛ’m be ti. Ɔ dun mmua fa kpata Ɲanmiɛn ɲrun jranfuɛ’m be sa tɛ’m be ti, kpɛkun ɔ fa wie kpata be nga be timan Ɲanmiɛn ɲrun jranfuɛ’m be ti. Ɲanmiɛn ɲrun jranfuɛ’m be su kpɛn’n wlu Ɲanmiɛn i tannin sua’n annzɛ i sua’n i lika kpa tra su’n i nun. Saan i kunngba cɛ yɛ ɔ kwla wlu lɔ ɔ. Kusu afuɛ nuan kun nun’n, saan cɛn ba kun sɔ’n nun yɛ ɔ kwla wlu lɔ ɔ. Kɛ ɔ wlu lɔ’n, ɔ fa nnɛn ng’ɔ fa yili tɛ’n i mmoja’n kpɛntɛnkpɛntɛn i Ɲanmiɛn i alaka’n i ɲrun lɛ. Ɔ ju blɛ wie’n wɛnsrɛn kun m’ɔ kpaja’n ɔ fite alaka sɔ’n i ti su. I sɔ’n kle kɛ Ɲanmiɛn Zoova o lɛ.—Ezipt Lɔ Tulɛ 25:22; Saun Yolɛ 16:1-30.

9. (a) ?Sa tɛ’n i ti srɛlɛ cɛn’n nun’n, wan i nzɔliɛ sran yɛle Ɲanmiɛn ɲrun jranfuɛ’m be su kpɛn’n? ?Yɛ tɛ ng’ɔ yi’n i bo’n yɛle benin? (b) ?Kɛ Ɲanmiɛn ɲrun jranfuɛ’m be su kpɛn’n wlu Ɲanmiɛn sua’n i lika kpa tra su’n nun lɔ’n, ɔ ti ngue nzɔliɛ?

⁹ Ɲanmiɛn maan akoto Pɔlu yiyili nzɔliɛ ninnge sɔ’m be nun. Ɔ kleli kɛ Ɲanmiɛn ɲrun jranfuɛ’m be su kpɛn’n ti Mɛsi mɔ yɛle Zezi Klist’n i nzɔliɛ sran. Kpɛkun tɛ nga be yi’n ti Klist i wun m’ɔ fa kpɔli e ti’n i nzɔliɛ. (Ebre Mun 9:11-14) Tɛ sɔ mɔ fɔ nunman nun’n, ɔ kpata sran akpasua nɲɔn be ti. Akpasua kun yɛle Klist i niaan 144.000 mɔ be kpali be sieli be ngunmin’n, mɔ be ti Ɲanmiɛn ɲrun jranfuɛ’m be akpasua’n. I kun yɛle be nga be ti “bua’m be wie” mun be nunfuɛ’n. (Zan 10:16) Kɛ Ɲanmiɛn ɲrun jranfuɛ’m be su kpɛn’n wluli sua’n i lika kpa tra su nun lɔ’n, ɔ kle kɛ Zezi wá kɔ́ ɲanmiɛn bɔbɔ’n su lɔ kó fá tɛ ng’ɔ yili’n i gua’n fá klé Ɲanmiɛn Zoova.—Ebre Mun 9:24, 25.

10. ?Ɲanmiɛn nuan ndɛ ng’ɔ o Biblu’n nun’n kle kɛ ngue sa yɛ ɔ́ wá jú Mɛsi’n i su ɔ?

¹⁰ E wun weiin kɛ Adam nin Ɛvu be afinliɛ nunfuɛ’n be delɛ’n su yoman pɔpɔ. Mɛsi’n wá fɛ́ i nguan’n mán! Biblu’n i bue nga laa be klɛli i Ebre nun’n i nun’n, Ɲanmiɛn nuan ijɔfuɛ’m be yiyili i sɔ’n nun kpa. I wie yɛle kɛ Ɲanmiɛn nuan ijɔfuɛ Daniɛli kɛnnin i weiin kɛ, ‘kɛ ɔ́ yó naan b’a yaci be sa tɛ mun b’a cɛ be’n,’ “famiɛn [annzɛ Mɛsi] ng’ɔ́ síe’n [...] bé wá kún” i. (Daniɛl 9:24-26) Ezai kannin kɛ be su sɔman Mɛsi’n i nun. Bé klé i ɲrɛnnɛn, ɔ́ ɲán kannin mɔnnɛnmɔnnɛn yɛle kɛ bé kún i e sa tɛ’m be ti.—Ezai 53:4, 5, 7.

11. ?Wafa sɛ yɛ e ti ɲanlɛ’n ti’n Zoova i Wa’n fɛli i wun yili e ti tɛ ɔ?

¹¹ Kwlaa naan Ɲanmiɛn i Wa kunngba cɛ’n w’a ba asiɛ’n su wa’n, ɔ si kɛ e delɛ’n su yoman pɔpɔ mɛnmɛn i. Ɔ si kɛ ɔ́ wá wún ɲrɛnnɛn kpa kpɛkun bé kún i. ?Kɛ i Si kɛnnin i sɔ ndɛ mun kleli i’n, ɔ cuɛnnin i wun ɔli siɛn annzɛ ɔ yoli ɲin kekle i su? Cɛcɛ. I klunklo su ɔ kplinnin i Si i ndɛ’n su. (Ezai 50:4-6) I kunngba’n, i nun nga Zezi o asiɛ’n su wa’n, ɔ yoli i Si i klun sa aɲinyiɛ’n nun. ?Ngue ti yɛ ɔ yoli sɔ ɔ? Ɔ tɛli su kɛ: “N klo e Si’n.” Ɔ tɛli su ekun kɛ: “Sran klolɛ ng’ɔ ti dan trɛ i ngba’n yɛlɛ sran bɔ i janvuɛ ti ɔ fɛ i wun man’n.” (Zan 14:31; 15:13) Ɔ maan e ti ɲanlɛ’n i dan lika fin klolɛ mɔ Zoova i Wa’n klo Ɲanmiɛn nin sran’n. Kannzɛ bɔbɔ ɔ fata kɛ ɔ fɛ i nguan mɔ fɔ nunman nun’n man’n, sanngɛ e delɛ’n ti’n i sɔ yolɛ’n yoli i fɛ.

Like ng’ɔ fatali kɛ Zoova yo naan y’a ɲan e ti’n

12. ?Wan klun sa yɛle e ti kpɔlɛ tɛ’n? ?Yɛ ngue ti yɛ ɔ yili ɔ?

¹² Nán Zezi yɛ ɔ fali ajalɛ kɛ be yi e ti kpɔlɛ tɛ’n niɔn. Kusu nɛ́n i yɛ ɔ kleli wafa ng’ɔ fata kɛ be yi tɛ’n niɔn. E delɛ like sɔ’n ti Zoova i klun sa’n i nun like cinnjin’n kun. Akoto Pɔlu kleli kɛ tɛ yiwlɛ ng’ɔ o Ɲanmiɛn sua’n nun lɔ’n ti Zoova i klun sa’n i nzɔliɛ like. (Ebre Mun 10:10) Ɔ maan e ti ɲanlɛ nga e ɲɛn i Klist i tɛ’n ti’n, Zoova yɛ maan ɔ kwla yo ye ɔ. (Lik 1:68) Ɔ ti i klun sa m’ɔ leman wunsu’n, ɔ nin i sran’m be klolɛ dan’n be nuan like.—An kanngan Zan 3:16 nun.

13, 14. ?Wafa sɛ yɛ Abraamu i su ndɛ’n ɔ uka e naan y’a wun like nga Zoova yoli mannin e’n, i wlɛ ɔ?

¹³ ?Kɛ Zoova yí i klolɛ’n i nglo e lika sɔ’n, ɔ yoli i sɛ? I sɔ’n i wlɛ wunlɛ timan pɔpɔ. Sanngɛ Biblu’n nun ndɛ kun o lɛ’n, ɔ kwla uka e naan y’a wun i wlɛ kpa. Zoova seli Abraamu m’ɔ ti sran kpa’n i kɛ ɔ yo like kekle kpa kun. Yɛle kɛ ɔ fɛ i wa Izaaki yi tɛ mɛn i. Abraamu ti siɛ kun m’ɔ klo i wa’n i kpa ɔ. Zoova kannin Izaaki ndɛ kleli i kɛ: “Ɔ wa kunngba’n bɔ a klo i kpa’n.” (Bo Bolɛ 22:2) Ɔ nin i sɔ ngba’n, Abraamu wunnin i kɛ Zoova i klun sa’n i yolɛ’n ti cinnjin tra klolɛ ng’ɔ klo Izaaki’n. Abraamu yoli like nga Ɲanmiɛn waan ɔ yo’n. Sanngɛ Zoova w’a yaciman Abraamu nun naan ɔ yo like nga cɛn wie lele i bɔbɔ Zoova wá yó’n. Kɛ Abraamu wá kún i wa’n cɛ’n, Ɲanmiɛn sunmɛnnin i anzi kun naan ɔ jrɛn i. Abraamu boli manndrɛn kpa kɛ ɔ́ yó like kekle nga i Ɲanmiɛn’n seli i kɛ ɔ yo’n. Ɔ maan ɔ lafili su kɛ sɛ ɔ́ wún i wa’n i nguan nun ekun’n, saan b’a cɛn i. Kusu ɔ lafi su kpa kɛ Ɲanmiɛn cɛ́n i. I sɔ’n ti’n, Pɔlu seli kɛ Ɲanmiɛn fali Izaaki mannin Abraamu ekun, naan “sa sɔ’n ti sa nzɔliɛ.”—Ebre Mun 11:19.

¹⁴ Kɛ Abraamu síesíe i wun naan w’a fɛ i wa’n w’a yi tɛ’n, i ya ng’ɔ kwla yo i’n, nanwlɛ be kanman. I wafa kunngba’n, kɛ Zoova fɛ́ i wa m’ɔ flɛ i kɛ “min anwlɛn su ba’n” fá yí tɛ’n, wafa nga i wun fa yoli i’n, Abraamu i su sa’n ti’n e kwla wun i wlɛ. (Matie 3:17) Sanngɛ nán maan e wla fi su kɛ i ya ng’ɔ yoli Zoova’n i dan trali Abraamu liɛ’n. Ɔ nin i Wa’n be trannin aklunjuɛ nun afuɛ miliɔn kpanngban kpa. Atrɛkpa’n afuɛ miliar kpanngban kpa bɔbɔ. Ba’n nin i Si be dili junman aklunjuɛ’n nun. Ɔ maan i “sa o junman’n su.” Kpɛkun i yɛ ɔ ti i Si i nuan Ijɔfuɛ m’ɔ be flɛ i “Ndɛ’n” niɔn. (Nyanndra Mun 8:22, 30, 31; Zan 1:1) Kɛ bé klé Zoova i Wa’n i yalɛ mɔ bé yó i finfin mɔ i sin bé kún i kɛ kodiawiefuɛ wie sa’n, wafa ng’ɔ fa yoli Zoova’n, e kwlá wunmɛn i wlɛ kaan sa. Nanwlɛ e delɛ’n yoli kekle kpa mannin Zoova! ?Ɔ maan wafa sɛ yɛ e kwla kle kɛ e bu e delɛ’n i like dan ɔn?

?Wafa sɛ yɛ e kwla kle kɛ e bu e delɛ’n i like dan ɔn?

15. ?Wafa sɛ yɛ Zezi guaguali e ti kpatalɛ dan’n i bo ɔ? ?Yɛ i sɔ’n yoli ngue ye?

¹⁵ Kɛ be cɛnnin Zezi ɲanmiɛn su lɔ’n, ɔ guaguali e ti kpatalɛ dan’n i bo. Kɛ ɔ nin i Si be yiali lɔ’n, ɔ fali tɛ ng’ɔ yili’n i gua’n kleli i. Sa sɔ’n mannin suralɛ dandan. I klikli’n, be kwla yaci Klist i niaan mɔ be kpali be sieli be ngunmin’n be sa tɛ mun cɛ be. Kpɛkun i sin’n, be kwla yaci “sran’m be kwlaa” be liɛ mun cɛ be wie. Tɛ sɔ’n i ti’n, be kwlaa nga be yo sa tɛ m’ɔ yo be nsisɔ mɔ be kaci be sa’n, kpɛkun be kaci Klist i sɔnnzɔnfuɛ kpa’n, be nin Ɲanmiɛn Zoova be afiɛn’n kwla sɛ kpa. (1 Zan 2:2) ?Wafa sɛ yɛ i sɔ’n kan e ɔ?

16. ?Sa nga ti yɛ ɔ fata kɛ e si e ti ɲanlɛ mɔ Zoova maan e kwla ɲɛn i’n i su ye’n, sunnzun ase benin yɛ e kwla fa yiyi nun ɔn?

¹⁶ Maan e sa e sin sunnzun ase nga e fa fitili like suanlɛ nga su’n i su. Maan ɔ yo e kɛ dɔɔtrɔ ng’ɔ wunnin tukpacɛ’n i are’n, ɔ ba tukpacifuɛ nga e nin be e la sua kunngba’n nun’n be wun lɛ kpɛkun ɔ se kɛ: “Sran kwlaa ng’ɔ yo are’n naan ɔ nian wafa nga be fa yo’n su’n, ɔ́ yó juejue.” ?Sɛ e wiengu tukpacifuɛ’m be dan lika be waan be faman dɔɔtrɔ’n i ndɛ’n su, naan be se kɛ are’n i yolɛ’n yo ya’n nin? ?Kannzɛ bɔbɔ e si weiin kɛ are sɔ’n w’a de sran wie mun’n, é sú be su? Ɔ ti weiin kɛ e su suman be su! Saan é yó dɔɔtrɔ’n i mo, are m’ɔ mannin e’n ti. Kpɛkun é nían are nun é yó i kpa. Atrɛkpa bɔbɔ’n, é bó ajalɛ nga e fali’n su é klé e wiengu mun. E kusu e ti tɛ mɔ Zoova fɛli i Wa’n yili’n ti’n, e kwla ɲan e ti. Ɔ maan ɔ fata kɛ e tinuntinun e kle kɛ e si i ye kpa tra ngalɛ’n.—An kanngan Rɔmfuɛ Mun 6:17, 18 nun.

17. ?Like nga Zoova yoli fa deli e’n, wafa sɛ yɛ e kwla kle kɛ e si su ye ɔ?

¹⁷ Like nga Zoova nin i Wa’n be yoli i kɛ bé fá dé e sa tɛ’n nin wie’n be sa nun’n, sɛ e si su ye’n, é yí i nglo. (1 Zan 5:3) É jrán e nzuɛn m’ɔ yo e kɛ e yo sa tɛ’n, i ɲrun kekle. E bɔbɔ e ɲinfu e su yoman sa tɛ le naan y’a di e sa nɲɔn nun, kɛ nga kpɛ sunman be nga be yo sɔ’n be fa yo’n sa. I sɔ yolɛ’n ti kɛ nn e su se kɛ e buman e ti kpɔlɛ tɛ’n i like fi sa. Ɔ maan e su yoman sɔ, sanngɛ é klé kɛ e bu i like dan. Yɛle kɛ é mían e ɲin kpa naan e nin Zoova e afiɛn’n sɛ titi. (2 Piɛr 3:14) É kán e wla m’ɔ o e ti ɲanlɛ’n su’n i ndɛ é klé e wiengu é fá klé kɛ e si ye. I liɛ’n, be kusu be nin Zoova be afiɛn’n kwlá sɛ́ wie. Kpɛkun be wla trán like ng’ɔ o e ɲrun lɔ’n su. (1 Timote 4:16) Nanwlɛ e blɛ’n nin e wunmiɛn kwlaa nga e fa manman Zoova nin i Wa’n, ɔ ti su! (Mark 12:28-30) Maan e bu i akunndan! E kwla fa e ɲin e sie i blɛ nga é ɲán e ti sa tɛ’n i sa nun mlɔnmlɔn’n i su. É kwlá dí mɛn kɛ nga Ɲanmiɛn kunndɛli kɛ e di’n sa. Yɛle kɛ fɔ’n su tranman e nun mlɔnmlɔnmlɔn kun. Like nga Zoova yoli fa deli e’n i ti yɛ i ngba nga e kɛnnin i ndɛ lɛ’n, ɔ kwla yo ye ɔ!—Rɔmfuɛ Mun 8:21.

[Ja ngua lɛ ndɛ’n]

?Amún tɛ́ su sɛ?

• ?Ngue ti yɛ y’a mian delɛ wun kpa ɔ?

• ?Wafa sɛ yɛ Zezi i wun ng’ɔ fa yi e ti tɛ’n ɔ kan e ɔ?

• ?E ti kpɔlɛ tɛ mɔ Zoova yili mannin e’n, ɔ yo e sɛ?

• ?Like nga Zoova yoli naan y’a ɲan e ti’n ti’n, ngue yɛ amun kunndɛ kɛ bé yó ɔ?

[Foto, bue 30]

Sa tɛ’n i ti srɛlɛ cɛn’n nun’n, Izraɛli i Ɲanmiɛn ɲrun jranfuɛ’m be su kpɛn’n kaci Mɛsi’n i nzɔliɛ sran.

[Foto, bue 31]

Abraamu i klun m’ɔ tuli i kɛ ɔ́ fɛ́ i wa’n yí tɛ’n, ɔ kle e like kpanngban Zoova i tɛ liɛ mɔ i dan trɛ i ngba’n su.