Ɲanmiɛn wawɛ’n ti wunmiɛn m’ɔ fata kɛ e ɲɛn i ɔ

“NÁN fuan min maan n jaso ɔ nyrun lɛ, nán yi ɔ wawɛ b’ɔ o min nun’n.” (Jue Mun 51:13) Kɛ Famiɛn Davidi yoli sa tɛ’n, srɛlɛ ng’ɔ tuli i klun srɛli i’n yɛ ɔ o lɛ.

Blɛ sunman nun’n, Davidi sieli i nzɔliɛ kɛ Ɲanmiɛn wawɛ’n le ta dan kpa. I nun m’ɔ te yo gbanflɛn’n, ɔ kwla kunnin Goliati m’ɔ ti safuɲrɛn sroesroe’n. (1 Samiɛl 17:45-50) Jue nga be nin a wunman be wunsu le’n, Ɲanmiɛn wawɛ’n maan ɔ kwla klɛli be nun wie. Davidi yiyili nun kɛ: “Anannganman i wawɛ’n su min bo kɛ n kan ndɛ. Ɔ fɛ i ndɛ’n wla min nuan.”—2 Samiɛl 23:2.

Zezi Klist bɔbɔ kannin like nga Ɲanmiɛn wawɛ’n yoli i Davidi i mɛn dilɛ’n nun’n, i ndɛ. Cɛn kun’n, Zezi kan kleli i ndɛ tiefuɛ’m be kɛ: “Nyanmiɛn wawɛ’n maan David bɔbɔ seli kɛ: ‘E Min Nyanmiɛn’n seli min Min liɛ’n kɛ: “Tran ase min fama su wa lele maan n yi ɔ kpɔfuɛ’m be ase ɔ bo naan n fa be n yo ɔ ja siesiewlɛ.”’” (Mark 12:36; Jue Mun 110:1) Zezi sili kɛ, kɛ Davidi klɛ́ jue sɔ mun’n, nn Ɲanmiɛn wawɛ’n o i su. ?Ɲanmiɛn wawɛ kunngba sɔ’n te o lɛ naan w’a uka e?

‘An srɛ titi, bé fá mán amun’

Atrɛkpa’n, e su klɛman jue le. Sanngɛ sa wie mɔ be kwla tɔ e su’n, be dan’n kwla yo kɛ Goliati sa. I wie yɛle Izabɛli liɛ’n.a I wun’n yacili i ko jali talua kun. Kɛ bian’n kɔ́’n, kalɛ kpli ng’ɔ fali be’n, ɔ kacili bla’n i ti su trɔ. Kusu w’a yaciman sika kaan sa i sa nun naan w’a fa nian be wa bla nɲɔn’m be lika. Izabɛli waan: “Ɔ yoli min kɛ b’a kpɛ min bo waka naan m’an yo fiɛn sa. Sanngɛ kɛ ɔ ɔli’n, n wunnin i wlɛ kɛ Ɲanmiɛn wawɛ’n suannin min bo.”

?Izabɛli buli i kɛ nn ɔ́ ɲán Ɲanmiɛn wawɛ’n i kpɛ kunngba? Cɛcɛ. Afin, ɔ srɛli Ɲanmiɛn cɛn kwlaa kɛ ɔ fɛ i wawɛ’n mɛn i. Ɔ sili kɛ, sɛ i waan ɔ́ jrɛ́n i ɲrun lɔ sa’m be ɲrun kekle naan ɔ́ nían ba’m be lika kɛ ɔ nin i fata’n sa’n, naan ɔ́ bú i wun sran ekun’n, ɔ fata kɛ Ɲanmiɛn fɛ i wawɛ’n mɛn i. Ɔ maan, ɔ nantili Zezi i ndɛ nga su. Ɔ seli kɛ: “An srɛ [titi], bé fá mán amun, an kunndɛ, amún nyɛ́n, an bobo, bé tíke amun anuan.”—Matie 7:7.

Robɛto kusu wunnin kɛ ɔ fata kɛ Ɲanmiɛn fɛ i wawɛ’n mɛn i. Sanngɛ i liɛ’n sa uflɛ ti ɔ. Drɔgi nga be flɛ i Asisi nin siklɛti’n yɛ ɔ ti i aliɛ ɔ. Ɔ kplili afuɛ lele nɲɔn kɛ ɔ́ jrɛ́n i sɔ liɛ’n. Sanngɛ ngbɛn ɔn. Robɛto yiyi nun kɛ: “Kɛ a jran drɔgi i nɔnlɛ’n, akluntitiɛ’n o lɛ. Afin, cɛn kwlaa ɔ konvi sɔ i dan kpa.”

Robɛto kan gua su kɛ: “Sanngɛ n fali ajalɛ kɛ ń káci min nzuɛn’n naan ń sú Ɲanmiɛn kɛ ɔ klo’n sa. Ɔ maan, n fali Biblu’n nun mmla kpakpa mun, n sieli min akunndan’n nun. Cɛn kwlaa n tu min klun n srɛ Ɲanmiɛn kɛ ɔ man min wunmiɛn naan n nanti i mmla’n su. N si kɛ min kunngba min wunmiɛn’n kwlá yoman ngalɛ’n. Kpɛkun n wunnin kɛ Zoova tɛli min srɛlɛ’n su sakpa. Kɛ n tɔ i sɔ yolɛ’n nun ekun mɔ min sa sin’n bubu min’n, yɛ n sieli i sɔ’n i nzɔliɛ ɔ. N wunnin kɛ Ɲanmiɛn wawɛ’n mannin min wunmiɛn uflɛ. Afin, sɛ ɔ timan Ɲanmiɛn i wawɛ’n ti’n nn m’an kwlá yaciman min nzuɛn tɛ sɔ’n.”—Filipfuɛ Mun 4:6-8.

Be jaso kɛ “anunman nyin’n ɔ fa tu’n sa”

Kɛ Izabɛli nin Robɛto sa’n, Zoova i Lalofuɛ miliɔn kpanngban be wunnin kɛ Ɲanmiɛn wawɛ’n dili junman be mɛn dilɛ’n nun. Zoova i wunmiɛn m’ɔ fa di junman’n, wunmiɛn sɔ m’ɔ fa yili nglo nin asiɛ’n, sɛ e klo’n e kwla ɲɛn i. Ɲanmiɛn klo kpa kɛ ɔ́ fɛ́ i wawɛ’n mán e. Sanngɛ sɛ e tu e klun e srɛ i kpa’n, yɛ ɔ́ fá mán e ɔ. Kusu ɔ fata kɛ e suɛn i su ndɛ nanwlɛ’n, yɛ e mian e ɲin kpa e yo i klun sa’n naan y’a kwla ɲan wawɛ sɔ’n.—Ezai 55:6; Ebre Mun 11:6.

Ɲanmiɛn wawɛ’n maan e kwla ɲan wunmiɛn naan y’a su Ɲanmiɛn kpa naan kannzɛ sa nga be o e ɲrun lɔ’n be ti sɛ’n, y’a kwla jran be ɲrun kekle. Biblu’n gua e awlɛn su nzue kɛ: “Sran nga w’a fɛ’n, [Zoova] mɛn i wunmiɛn. Yɛ ɔ wla sran ng’ɔ ti fakafaka’n i nun fanngan. [...] Be nga be fa be wla gua Anannganman su’n, be liɛ be nyan wunmiɛn uflɛ tititi. Sɛ bé jáso’n, be jaso kpɛ kunngba waka kɛ anunman nyin’n ɔ fa tu’n sa. Be wanndi, sanngɛ be fɛman, be nanti tititi, sanngɛ be wunmiɛn’n wie-man.”—Ezai 40:28-31.

[Ja ngua lɛ ndɛ’n]

[Ndɛ kwle, bue 8]

‘Cɛn kwlaa n tu min klun n srɛ Ɲanmiɛn kɛ ɔ man min wunmiɛn. N si kɛ min kunngba min wunmiɛn’n kwlá yoman ngalɛ’n. Kpɛkun n wunnin wafa ng’ɔ tɛli min srɛlɛ’n su’n.’

[Kuku/Foto mun, bue 7]

JUNMAN NGA ƝANMIƐN WAWƐ’N DILI’N

Ɲanmiɛn fɛli i wawɛ’n yili asiɛ’n nin nglo’n nin i nun ninnge onga’n. Jue tofuɛ’n kpan seli kɛ: “Ee Anannganman, junman nga a di be’n, be sɔnnin o! Ngwlɛlɛ nga a fa yoli i kwlakwla sɔ’n ɔ cɛnnin o! Ɔ sa nuan ninnge’n w’a yi asiɛ’n. Sɛ a fa ɔ wawɛ’n man be ekun’n, kpɛkun b’a ɲan nguan.”—Jue Mun 104:24, 30, NW; Bo Bolɛ 1:2; Zɔb 33:4.

Ɲanmiɛn wawɛ’n maan Ɲanmiɛn i sran’m be klɛli Biblu’n. Akoto Pɔlu klɛli i kɛ: “Nyanmiɛn Ndɛ nga be klɛli’n, i bɔbɔ yɛ ɔ fɛ i kwlaa mannin sran mun yɛ be klɛli-ɔ.” (2 Timote 3:16) Glɛki nun ndɛ mma nga be kacili i kɛ ‘i bɔbɔ yɛ ɔ fɛ i kwlaa mannin’n,’ i bo’n yɛle kɛ “Ɲanmiɛn tuli be aswre.” Zoova i wawɛ’n sieli Biblu’n klɛfuɛ’m be akunndan’n. Ɔ maan ‘Nyanmiɛn i ndɛ’n’ yɛ be klɛli ɔ.—1 Tɛsalonikfuɛ Mun 2:13.

Ɲanmiɛn wawɛ’n yoli maan Ɲanmiɛn i sufuɛ’m be kannin be ɲrun lɔ sa’m be ndɛ yɛ sa sɔ’m be kpɛnnin su sɛsɛsɛ. Akoto Piɛli yiyili nun kɛ: “Sran kun i bɔbɔ tiaun ɔ kwlá tu-man Nyanmiɛn Ndɛ nga i nuan ijɔfuɛ’m be klɛli’n i nun kun sa bo. Afin Nyanmiɛn ndɛ nga sran’m be kannin’n, b’a kpɛ-man wie fi be ti nun yɛ be kannin-ɔn, i wawɛ’n yɛ ɔ fa wla be nuan yɛ be kannin-ɔn.”—2 Piɛr 1:20, 21; Zoɛl 3:1.

Ɲanmiɛn wawɛ’n ukali Zezi nin sran uflɛ mɔ be lafi Ɲanmiɛn su’n, naan b’a bo Ɲanmiɛn Sielɛ’n i jasin fɛ’n naan b’a yo abonuan sa mun. Zezi seli kɛ: “E Min Nyanmiɛn i wawɛ’n wo min su, yɛlɛ kɛ ɔ guali min su ngo kɛ m bo jasin fɛ’n kle yalɛfuɛ mun. Ɔ sunmannin n kɛ n kan kle be bɔ be trali be lomuɛn’m be kɛ bé nyán be ti, yɛ n kan kle anyansifuɛ’m be kɛ bé wún ase.”—Lik 4:18; Matie 12:28.

[Kuku/Foto mun, bue 9]

NINNGE NGA ƝANMIƐN WAWƐ’N KWLA UKA BE YOLƐ’N NUN’N

Ɲanmiɛn wawɛ’n kwla wla e fanngan naan y’a jran kekle e sa nianlɛ’n i ɲrun, naan y’a yaci e nzuɛn tɛ’n. Akoto Pɔlu seli kɛ: “E kwla fa e wla’n kwlaa guɛ i Nyanmiɛn su, afin ɔ kplin-man su kɛ sa ng’ɔ sɔn-man amun nun’n ɔ tɔ amun su. I sɔ’n ti’n, sɛ sa tɔ amun su’n, ɔ́ yó maan ɔ́ sɔ́n amun nun yɛlɛ kɛ ɔ́ yó sa nga b’ɔ maan án fíte nun’n.”—1 Korɛntfuɛ Mun 10:13.

Ɲanmiɛn wawɛ’n kwla uka e naan y’a yi nzuɛn nga Ɲanmiɛn klo be’n be nglo. “Sa nga Nyanmiɛn wawɛ’n maan sran yo’n yɛ: ɔ maan be klo Nyanmiɛn nin sran, be klun jɔ, be wla gua ase, be tra be anwlɛn, be yo sran ye, be yo aklunye, be di nanwlɛ, be yo wɛtɛɛ, yɛ be yo sa i nuan su.”—Galasifuɛ Mun 5:22, 23.

Ɲanmiɛn wawɛ’n kwla wla e fanngan naan y’a jran sa nga be tɔ e su’n be ɲrun kekle. “E kwlá yo-man like fi, sanngɛ Nyanmiɛn b’ɔ kwla like kwlaa yo’n yɛ ɔ yo sa-a.”—2 Korɛntfuɛ Mun 4:7.