Ato Ndɛ 4: Ɲanmiɛn ti atre nsan

?Ato ndɛ sɔ’n fin nin? “Kɛ e bu atre nsan i su like klelɛ’n i akunndan’n, ɔ yo kɛ afuɛ nga be flɛ i 300 nin 400 be afiɛn’n nun yɛ be kpɛli i ba ɔ. Kɛ e niɛn i sa’n, ɔ ti su [...]. Like klelɛ nga be waan ‘Ɲanmiɛn ti sran nsan’n,’ i bo’n w’a wlaman ase kpa sa. Saan kɛ afuɛ nga be flɛ i 400 wá jú’n, yɛ Klistfuɛ’m be fa wlaman be ninnge yolɛ nun kpa ɔ.”—New Catholic Encyclopedia (1967), Volume 14, bue 299.

“Afuɛ nga be flɛ i 325 i Mɛn anglo’n i 20 su’n, be yoli aɲia kun Nise lɔ. Kɔnstantɛn m’ɔ ti famiɛn’n yɛ ɔ tinngɛli aɲia’n niɔn. Kpɛkun i bɔbɔ yɛ ɔ seli kɛ be fa [...] ajalɛ cinnjin kun m’ɔ́ klé kɛ Klist nin Ɲanmiɛn m’ɔ ti i ‘Si’n be ti kun’n’ niɔn. [...] Srolɛ mɔ Ɲanmiɛn ɲrun jranfuɛ sɔ’m be sro famiɛn’n ti’n, be kplinnin i ndɛ’n su. Sanngɛ w’a yoman be nun sunman be klun su. Saan be nun nɲɔn cɛ yɛ b’a kplinman su ɔ.”—Encyclopædia Britannica (1970), Volume 6, bue 386.

?Ngue ndɛ yɛ Biblu’n kan ɔn? “Etiɛni bɔ Nyanmiɛn Wawɛ sie i’n, ɔ niannin nyanmiɛn su lɔ siin, yɛ ɔ wunnin kɛ Nyanmiɛn yi i wun nglo nyannyannyan yɛ Jésus jin Nyanmiɛn’n i fama su. Yɛ ɔ seli kɛ: ‘An nian, n wun nyanmiɛn su lɔ kɛ ɔ ti tikewa, yɛ i b’ɔ kacili Sran’n ɔ jin Nyanmiɛn fama su.’”—Sa Nga Be Yoli’n 7:55, 56.

?Ngue yɛ aolia nun like sɔ’n kle ɔ? Ɲanmiɛn wawɛ’n m’ɔ sieli Etiɛni’n ti’n, ɔ wunnin kɛ Zezi “jin Nyanmiɛn fama su.” I sɔ’n kle weiin kɛ, kɛ be cɛnnin Zezi m’ɔ ɔli ɲanmiɛn su’n, w’a kaciman Ɲanmiɛn sanngɛ ɔ ti aolia nun sran m’ɔ nin Ɲanmiɛn be sɛman ɔn. Ndɛ sɔ’n nun’n, b’a kanman kɛ sran kun ekun o Zezi nin Ɲanmiɛn be wun lɛ. Sran’m be mian be ɲin kɛ bé wún Biblu’n nun ndɛ mma wie m’ɔ suan atre nsan’n i bo ɔ. Sanngɛ i kwlaa sɔ’n nun’n, plɛti bian kun mɔ be flɛ i Marie-Émile Boismard klɛli i kɛ: “Biblu’n i bue nga be klɛli i Glɛki aniɛn’n nun’n, i nun ndɛ wie fi kleman kɛ Ɲanmiɛn ti atre nsan.”—À l’aube du christianisme—La naissance des dogmes.

Kɛ ɔ ko yo naan blɛ sɔ’n nun asɔnun’n i bo’n w’a yo kun’n, i ti yɛ Kɔnstantɛn suannin like klelɛ sɔ’n i bo ɔ. Sanngɛ like klelɛ sɔ’n mannin kosan uflɛ su. Yɛle kɛ: ?Mali m’ɔ wuli Zezi’n ɔ ti “Ɲanmiɛn i nin”?

An nian Biblu’n nun ndɛ mma nga’m be nun: Matie 26:39; Zan 14:28; 1 Korɛntfuɛ Mun 15:27, 28; Kolɔsfuɛ Mun 1:15, 16.

NG’Ɔ TI NANWLƐ’N:

Afuɛ nga be flɛ i 300 nin 400 be afiɛn’n nun yɛ be kpɛli atre nsan’n i ba ɔ.

[Foto cifuɛ mun, bue 7]

Museo Bardini, Florence