E mɔ e di Ɲanmiɛn junman’n maan e yo aɲinyiɛfuɛ

“An nian like ng’ɔ [Nyanmiɛn] yo’n su, an yo.”—EFƐZFUƐ MUN 5:1.

1, 2. (a) ?Ngue ti yɛ ɔ ti cinnjin kɛ e aeliɛ’n yo kpa ɔ? (b) ?Ngue yɛ é wá kɛ́n i ndɛ like suanlɛ nga nun ɔn?

FLUWA klɛfuɛ kun mɔ be flɛ i Su Fox, ɔ klɛli aɲinyiɛ’n i su ndɛ kɛ: “Aeliɛ kpa’n i nglo yilɛ’n nun’n, ɔ leman kɛ n su lo wunmiɛn. Be kwla yi aɲinyiɛ’n i nglo blɛ nin lika kwlaa nun.” Kɛ aɲinyiɛ’n kaci sran’m be nzuɛn’n, ndɛ tɔman be nin be wiengu’m be afiɛn finfin. Sɛ ndɛ tɔ be afiɛn kusu’n, ɔ wie ndɛndɛ. Asa kusu sɛ be nin be wiengu’m be yoman ninnge mun aɲinyiɛ’n su’n, ndɛ tran be afiɛn annzɛ be fa be wun ya. Kpɛkun aklunjuɛ nunman lɛ.

² Be nga be o Klistfuɛ asɔnun’n nun’n be ɲin yi be wiengu kpa. Sanngɛ ɔ fata kɛ e nian e wun naan y’a faman aeliɛ tɛ nga w’a tru mɛn nun’n andɛ yɛ’n su wie. Wafa nga sɛ e fa aɲinyiɛ’n i su mmla nga be o Biblu’n nun’n be su’n, ɔ kwla sasa e kpɛkun ɔ kwla yo naan sran’m b’a ba Ɲanmiɛn sulɛ kpafuɛ’n nun’n, maan e nian. Maan e nian ajalɛ nga Ɲanmiɛn Zoova nin i Wa’n be kleli e’n, naan y’a wun aɲinyiɛ nga be kɛn i ndɛ’n i bo.

Zoova nin i Wa’n be kle e aɲinyiɛ’n i wun ajalɛ

3. ?Sran i sran bulɛ’n i su ajalɛ benin yɛ Ɲanmiɛn Zoova kleli ɔ?

³ Sran i sran bulɛ’n nun’n, Ɲanmiɛn Zoova kle e ajalɛ kpafuɛ’n. Kannzɛ bɔbɔ like fi nunmɛn i sin’n, sanngɛ ɔ yo sran’m be kpa yɛ ɔ bu be sran. Ebre aniɛn mɔ i nun yɛ i klikli nun’n be klɛli Biblu’n, i nun’n, kɛ Zoova kán ndɛ klé Abraamu nin Moizi’n, ɔ kɛnnin i kɛ ɔ su srɛ be like sa. (Bo Bolɛ 13:14; Ezipt Lɔ Tulɛ 4:6) Zoova i sufuɛ’m be fɔn’n, ɔ ‘si [be] aunnvuɛ, ɔ faman ya ndɛndɛ. I aklunye’n ti dan, ɔ ti nanwlɛfuɛ tititi.’ (Jue Mun 86:15) Ɔ nin klɔ sran wie mɔ kɛ sran’m be yoman like nga be klo’n, be ka lɛ fa ya be kpankpan’n, be timan kun.

4. ?Kɛ e wiengu’m bé kán ndɛ klé e’n, wafa sɛ yɛ e kwla sɔnnzɔn Zoova ɔ?

⁴ Wafa nga Ɲanmiɛn fɛ i su sie i sran’m be ndɛ’n bo’n, ɔ kle e kɛ ɔ bu sran’m be wie. Kɛ Abraamu usali Sodɔmu lɔ sran’m be su kosan’n, Zoova trɛli i awlɛn tɛli be kwlaa be su. (Bo Bolɛ 18:23-32) W’a seman kɛ Abraamu su bo i kokowa ngbɛn. Zoova tie i sufuɛ’m be srɛlɛ’n. Yɛ be nga be yo sa m’ɔ yo be nsisɔ’n, kɛ be kpan flɛ i’n, ɔ sie i su. (An kanngan Jue Mun 51:13, 19 nun.) ?Kɛ e wiengu’m bé kán ndɛ klé e’n, ɔ fataman kɛ e sie e su kɛ Zoova sa?

5. ?Sɛ sran i sran bulɛ’n nun’n e sɔnnzɔn Zezi’n, wafa sɛ yɛ e nin sran uflɛ mun é trán klanman ɔn?

⁵ Ninnge kpanngban nga Zezi Klist suɛnnin i Si wun lɔ’n, sran i sran bulɛ’n o nun wie. Kannzɛ bɔbɔ jasin fɛ’n i bolɛ’n fɛli i blɛ’n nin i wunmiɛn’n i dan lika’n, sanngɛ ɔ trɛli i awlɛn sran’m be lika yɛ ɔ yoli be kpa. Kokowefuɛ nin aɲinsifuɛ mɔ saan bé srɛ́ like naan b’a kwla ɲan be nuan nun like’n, yɛ sran uflɛ mɔ asamian’n o be su’n, be wunnin kɛ Zezi klo kɛ ɔ́ úka be. Kannzɛ kɛ bé kó wún i wun be kan klemɛn i ka’n, sanngɛ ɔ yaciman be ngbɛn. Kpɛ sunman, ɔ yaci like ng’ɔ su yo’n i yolɛ naan w’a uka sran wie mɔ be siman wie se’n. Be nga be lafili Zezi su’n, ɔ buli be sran lele tratrali su. (Mark 5:30-34; Lik 18:35-41) E mɔ e ti Klistfuɛ’n e fa Zezi i ajalɛ’n su. Yɛle kɛ e yo sran’m be kpa yɛ e uka be. E osufuɛ nin e mantanfuɛ mun yɛ sran uflɛ’m be sie e aeliɛ sɔ’n i nzɔliɛ. Asa kusu’n, i sɔ’n aeliɛ’n ɔ manman Zoova kpɛkun ɔ yo maan e klun jɔ.

6. ?Sran nin sran be tranlɛ klanman’n i su ajalɛ benin yɛ Zezi kleli ɔ?

⁶ Kusu Zezi fali sran’m be dunman’n fa flɛli be. I sɔ nun’n, ɔ kleli kɛ i ɲin yi be. ?Zuifu’m be Ɲanmiɛn sulɛ wafa’n i su kpɛnngbɛn’m be yoli sran’m be sɔ wie? Cɛcɛ. Be liɛ’n, be nga be siman mmla’n, be waan “Nyanmiɛn a bo be sannzan.” Ɔ maan, be nin be tran kɛ sran mɔ b’a bo be sannzan’n sa. (Zan 7:49) Ɲanmiɛn i Wa’n i liɛ’n, w’a yoman sɔ. Marti nin Mali yɛ Zase ɔ nin sran kpanngban uflɛ wie’m be wunnin kɛ ɔ fali be dunman’n fa flɛli be. (Lik 10:41, 42; 19:5) Andɛ’n, e finwlɛ’n ɔ nin sran wafa nga e ti’n, ɔ yo maan wafa nga e kan ndɛ e kle sran’n, ɔ kacikaci. Sanngɛ Zoova i sufuɛ’m be mian be ɲin naan be nin be wiengu’m b’a tran klanman.a Be kplinman su kɛ sran wafawafa mɔ be ti’n ti’n, be ɲin m’ɔ fata kɛ ɔ yi be wiengu Klistfuɛ nin sran uflɛ mun’n, ɔ kpɛ su.—An kanngan Zak 2:1-4 nun.

7. ?Wafa sɛ yɛ Biblu’n nun mmla’m be uka e naan y’a bu sran i sran lika kwlaa ɔ?

⁷ Wafa nga Ɲanmiɛn nin i Wa’n be yo sran wafa kwlaa be kpa’n, ɔ kle kɛ be bu be sran. Yɛ i sɔ’n yo maan sran kpa’m be ba nanwlɛ’n nun. Ɔ ti su kɛ ɔ le lika kun nin i wafa nga be kle kɛ be bu sran kun i sran’n. Ɔ maan i sɔ’n nun’n, e su seman kɛ min liɛ’n kɛ ɔ ti sa naan n su kacimɛn i. Sanngɛ e yaci Biblu’n nun mmla’m be nun naan wafawafa kpanngban nga e ɲin kwla yi sran mun lika kwlaa’n, y’a nian su y’a yo. Siɛn’n, maan e nian wafa nga kɛ e bu sran’m be sran’n, e Klistfuɛ junman’n ba nvlɛ’n.

E yo sran’m be like yɛ e nin be e koko yalɛ

8, 9. (a) ?Aeliɛ benin yɛ sran’m be kwla bu i kɛ ɔ ti tɛ ɔ? (b) ?Zezi i ndɛ ng’ɔ o Matie 5:47 nun’n, ngue ti yɛ ɔ fata kɛ e yaci i lɛ naan ɔ ɲan ta e nin sran mun e tranlɛ’n su ɔ?

⁸ Andɛ lika kpanngban nun’n, sran’m be ɲanman be ti’n ti’n, kpɛ sunman kɛ sran kun wun i wiengu kun’n, ɔ sɛn i wun. Ɔ yomɛn i like kaan sa bɔbɔ. Ɔ ti su kɛ sɛ sran kun sín atin nga sran’m be sɔn su kpa’n i nun’n, ɔ nunman nun kɛ ɔ nin be kwlaa be ijɔ. Sanngɛ blɛ wie’m be nun’n, ɔ ti kpa kɛ ɔ yo sran’m be like. ?Sran’m be like yolɛ’n ti e nzuɛn? ?Annzɛ titi e mlan e ɲrun e san sran’m be wun sa ngbɛn? Kannzɛ bɔbɔ nán akunndan tɛ yɛ sran kun bu’n, sanngɛ ɔ kwla fa nzuɛn ng’ɔ timan kpa’n.

⁹ Zezi fali ndɛ kun kpɛnnin e wla. Ɔ seli kɛ: “?Sɛ an yo amun niaan’m be ngunmin be like’n, wuun nzu like dan yɛ amu’an yo-ɔ? ?Be bɔ be ti-man Zuif mun bɔbɔ be yo-man be niaan’m be like?” (Matie 5:47) I sɔ’n su’n, bian kun m’ɔ man sran’m be afɔtuɛ mɔ be flɛ i Donald Weiss, ɔ klɛli i kɛ: “Sɛ be buman sran kun i wie’n, ɔ yo sran sɔ’n i ya. Sɛ sran kun w’a bumɛn i wiengu kun wie’n, ɔ leman ndɛ kun sa m’ɔ kwla kan naan i wiengu sɔ’n i wla w’a gua ase ɔ. I sɔ’n i are’n timan kekle. Yɛle kɛ e yo sran’m be like. E nin be e ijɔ.” Sɛ y’a faman e ɲrun wiwi y’a yoman naan sran’m b’a wanndi e’n, i bo’n gúa kpa mán e.

10. ?Wafa sɛ yɛ e nzuɛn kpa’n ɔ uka e naan e jasin fɛ’n i bolɛ’n w’a ba nvlɛ ɔ? (An nian kuku nga be flɛ i “An fa srilɛ’n fa bo i bo” nun.)

¹⁰ Maan e nian Klistfuɛ yasua kun m’ɔ suan Tɔmu’n ɔ nin i yi Karɔlu mɔ be tran Amlɛnkɛn’m be mɛn’n i nglo lɔ lika’n, i klɔ dan kun su’n, be liɛ’n. Be fali be nin be mantanfuɛ’m be ijɔlɛ fɛfɛ’n, be wlɛli i be Ɲanmiɛn junman’n i dilɛ’n nun. ?Wafa sɛ yɛ be yo i sɔ liɛ’n niɔn? Tɔmu bo Zak 3:18 su se kɛ: “E nin sran mun e koko yalɛ kpɛkun e nin be e tran fɔun. Be nga be nunman be sua’n i klun lɔ’n ɔ nin be nga be di junman e nvɛnwun lɛ’n, e mantan be. E yo be like. Kɛ ɔ́ yó sɔ’n, nn srilɛ’n kusu o e nuan. E nin be e koko like ng’ɔ lo be’n i su yalɛ. Ɔ kwla yo be mma mun annzɛ be alua mun, annzɛ be sua mun annzɛ kusu be junman’n. Kɛ ɔ́ kɔ́ i ɲrun’n be fa e kaci be janvuɛ.” Karɔlu kan guasu kɛ: “I sin’n kɛ e kɔ be osu nianlɛ ekun’n, e bo e dunman e kle be kpɛkun e usa be liɛ’n. E kan like nga e yo i lika sɔ’n nun lɛ’n i ndɛ e kle be. Sanngɛ e nin be e ijɔ cɛman ngboko. I agualiɛ su’n, e kwla bo jasin fɛ’n e kle be.” Tɔmu nin Karɔlu be mantanfuɛ kpanngban be lafi be su. Be nun sunman be sɔli Biblu’n i akua’m be nun. Wie’m be kusu ndɛ nanwlɛ’n i silɛ’n loli be.

Kekle nun’n maan e yo sran’m be kpa

11, 12. ?Kɛ é bó jasin fɛ’n ngue ti yɛ ɔ fata kɛ e si kɛ bé klé e yalɛ ɔ? ?Yɛ sɛ be yo e sɔ’n, ngue yɛ ɔ fata kɛ e yo ɔ?

¹¹ Ɔ ju wie’n, kɛ é bó jasin fɛ’n sran’m be yo e tɛtɛ. E si kɛ bé yó e sɔ, afin Klist Zezi dun mmua seli i sɔnnzɔnfuɛ’m be kɛ: “Sɛ be kleli n yalɛ’n, bé klé amun yalɛ wie.” (Zan 15:20) Sanngɛ sɛ e tɛ be su kɛ be liɛ’n sa wie’n, ɔ yoman like fi ye. ?Ngue yɛ ɔ fata kɛ e yo ɔ? Akoto Piɛli klɛli i kɛ: “An bu Krist sran, yɛ an bu i amun Min. An bu sa ti yɛ amun wla o Krist su’n i akunndan sie naan sɛ be usa amun i su sa’n amu’an kwla tɛ su.” (1 Piɛr 3:15) Sɛ sran’m be kpɛ e nzowa naan e kan e wun ase e tɛ be su aɲinyiɛ su’n, ɔ kwla yo naan be aeliɛ’n kaci.—Tit 2:7, 8.

¹² ?E kwla siesie e wun naan sɛ sran’m be kan e wun ndɛ tɛ’n, y’a kwla tɛ su kɛ Ɲanmiɛn klo’n sa? Ɛɛn. Pɔlu seli kɛ: “Maan amun ijɔlɛ wafa’n yo sran’m be fɛ [titi], maan amun nuan nun ndɛ’n yo fɛ kɛ njin sa naan amu’an tɛ sran ng’ɔ usa amun sa’n, i su klanman.” (Kolɔsfuɛ Mun 4:6) Maan e kan ndɛ aɲinyiɛ su titi e kle e awlobofuɛ mun, ɔ nin e wiengu suklu mma mun, ɔ nin e junman su lɔfuɛ mun, ɔ nin asɔnun’n nunfuɛ mun yɛ e mantanfuɛ’m be kwlaa. Sɛ e yo sɔ’n, sɛ be yo e fiaan naan be kpɛ e nzowa’n, é kwlá jrɛ́n i ɲrun kekle kɛ ng’ɔ fata kɛ Klistfuɛ kun fa yo’n sa.—An kanngan Rɔmfuɛ Mun 12:17-21 nun.

13. Sɛ e ɲin yi sran’n, wafa nga e ɲrun tanndanfuɛ’m be aeliɛ’n kwla kaci’n, an fa sa kun yiyi nun.

¹³ Sɛ blɛ kekle nun’n, e yi e aɲinyiɛ’n i nglo’n i bo’n gua kpa. Zapɔn lɔ’n, bian kun nin i aofuɛ’n be yoli Zoova i Lalofuɛ kun i finfin. Aɲinyiɛ su aniaan bian’n jasoli be wun lɛ. Kɛ ɔ́ bó jasin fɛ’n kɔ́’n, ɔ sieli i nzɔliɛ kɛ bian’n i aofuɛ’n jin mmua lɔ kan i ɲin tɛ i. Kɛ aniaan bian’n wunngeli i wun lɔ’n, bian’n seli i kɛ: “Like nga e yoli’n ti’n yaci. Kannzɛ bɔbɔ e kannin ndɛ tɛtɛ e kleli wɔ’n, sanngɛ n sieli i nzɔliɛ kɛ a yaciman srilɛ. ?Ngue yɛ n kwla yo naan m’an yo kɛ wɔ sa ɔ?” Bian sɔ’n i junman’n fili i sa kpɛkun i nin wa wuli. Ɔ maan ɔ lafiman su kɛ ɔ kwla di aklunjuɛ ekun. Zoova i Lalofuɛ’n seli i kɛ be suan Biblu’n nun like. Bian’n kplinnin su. W’a cɛman ɔ suannin like kpɛ nɲɔn le mɔcuɛ kun nun.

Like kpafuɛ nga e kwla yo naan y’a yo aɲinyiɛfuɛ’n

14, 15. ?Laa’n wafa sɛ yɛ Zoova i sufuɛ’m be tali be mma mun ɔn?

¹⁴ Laa’n siɛ nin niɛn nga be ɲin yi Ɲanmiɛn’n, be nian nun kpa naan be mma’m be ɲin yi sran awlo lɔ. Bo Bolɛ 22:7, 8 nun’n, Abraamu nin i wa Izaaki be kannin ndɛ kleli be wiengu amanniɛn su. Zozɛfu i aeliɛ’n kleli weiin kɛ i kusu i si nin i nin be tɛli i kpa. Kɛ be wlɛli i bisua’n, i ɲin yili i wiengu bisuafuɛ mun bɔbɔ. (Bo Bolɛ 40:8, 14) Ndɛ ng’ɔ kan kleli Faraɔn’n, ɔ kle kɛ ɔ suannin wafa ng’ɔ fata kɛ ɔ nin be nga be ti sran dan’n be ijɔ’n.—Bo Bolɛ 41:16, 33, 34.

¹⁵ Mmla blu nga Ɲanmiɛn fa mannin Izraɛlifuɛ mun’n, kun se kɛ: “Bu ɔ si nin ɔ nin be sran, kɛ ɔ́ yó naan ɔ nguan nyanman’n w’a yo tɛnndɛn mɛn nga min Anannganman Nyanmiɛn n fa man wɔ’n i nun’n ti.” (Ezipt Lɔ Tulɛ 20:12) Wafa kun mɔ ba’m be kwla bu be nin ɔ nin be si be sran’n, yɛle kɛ awlo lɔ’n, maan be ɲin yi sran. Zɛfte i wa bla’n kleli klanman kpa kɛ i ɲin yi i si. Yɛle kɛ nda nga i si tali’n, kannzɛ ɔ ti kekle’n, sanngɛ ɔ yoli i nuan su sa.—Jɔlɛ Difuɛ Mun 11:35-40.

16-18. (a) ?Wafa sɛ yɛ e kwla kle ba’m be aɲinyiɛ ɔ? (b) ?Sɛ e kle ba’m be aɲinyiɛ’n mmlusuɛ benin yɛ ɔ o nun ɔn?

¹⁶ Ɔ ti cinnjin kpa kɛ e ta ba mun naan be yo aɲinyiɛfuɛ. Kɛ ɔ ko yo naan sɛ be yo kpɛnngbɛn’n be aeliɛ’n w’a yo kpa’n, ɔ fata kɛ ba kanngan’m be suan wafa ng’ɔ fata kɛ be yo aofuɛ’m be like’n. Kpɛkun maan be suan wafa ng’ɔ fata kɛ be ijɔ telefɔnu’n nun ɔ nin wafa ng’ɔ fata kɛ be nin sran uflɛ be di like’n. Ɔ fata kɛ be tike anuan man sran yɛ be yo kpɛnngbɛn nin tukpacifuɛ’m be ye. Kpɛkun be uka be nga trɔ nɔnninnɔnnin o be sa nun’n. Sa nga ti yɛ ɔ fata kɛ be yo sɔ’n, maan e uka be naan be wun i wlɛ. Ɔ fata kɛ be wun like nga ti yɛ ɔ ti cinnjin kɛ be tu be klun be yo sran “mo,” be yo i “kwla,” be se sran kɛ “n kwla uka ɔ,” annzɛ be se i “yaci’n.”

¹⁷ Kɛ é klé ba’m be aɲinyiɛ’n, ɔ fataman kɛ e yo be kpokokpoko. Wafa nga e kwla yo sɔ’n be nun kpafuɛ’n yɛle kɛ e bɔbɔ e kle be ajalɛ. Kɛrt m’ɔ le afuɛ 25, ɔ kan wafa nga ɔ nin i niaan bian nsan’m be suannin aɲinyiɛ’n i ndɛ. I waan: “Baba nin manmin be kan ndɛ kle be wun amanniɛn su yɛ be tra be awlɛn sran uflɛ’m be wun kpɛkun be bu be sran. E niɛnnin i sɔ’n su yɛ e fali e su e sieli be nuan bo. Ɲanmiɛn Sielɛ Blɛ Sua nun lɔ’n, ka naan aɲia’n w’a bo i bo’n, yɛ kɛ aɲia’n ko wie’n, baba fa min kpɛkun e nin aniaan kpɛnngbɛn mun e koko yalɛ. N tili wafa ng’ɔ yo be like yɛ n wunnin wafa nga i ɲin yi be’n.” Kɛrt kan gua su kɛ: “Kɛ ɔ́ kɔ́ i ɲrun’n, i aeliɛ sɔ’n sali min. N kali lɛ n buli sran’m be sran. Nán e ɲin m’ɔ fata kɛ ɔ yi sran’n yɛ ɔ ti cinnjin ɔn. Sanngɛ wafa nga e kunndɛ kɛ é ɲin yí sran’n yɛ ɔ ti cinnjin ɔn.”

¹⁸ ?Sɛ siɛ nin niɛn’n be kle be mma’m be sran i sran bulɛ’n, i bo’n gúa sɛ? Ba’m bé kwlá trá janvuɛ yɛ be nin be wiengu’m bé trán fɔun. Be nin sran bé kwlá dí junman likawlɛ. Asa ekun’n, ba nga be bu sran i sran’n mɔ be ɲin yi sran yɛ be ti sɛsɛ’n, be yo maan be si nin be nin be klun jɔ.—An kanngan Nyanndra Mun 23:24, 25 nun.

E aeliɛ kpa’n ti’n e nin mɛn’n nunfuɛ mun e timan kun

19, 20. ?Ngue ti yɛ ɔ fata kɛ e kwlaa e mian e ɲin e nian e Ɲanmiɛn mɔ i klun ti kpa’n, ɔ nin i Wa’n be ajalɛ’n su ɔ?

¹⁹ Pɔlu klɛli i kɛ: “Kɛ an ti Nyanmiɛn i anwlɛn su ba’n, an nian like ng’ɔ yo’n su, an yo.” (Efɛzfuɛ Mun 5:1) Ɲanmiɛn Zoova nin i Wa’n be sɔnnzɔnlɛ’n i wie yɛle Biblu’n nun mmla kɛ nga y’a wun be like suanlɛ nga nun sa’n, be su falɛ. Sɛ e yo sɔ’n, e su yoman aɲinyiɛfuɛ gblɛ nun naan sran ng’ɔ ti e su kpɛn’n i klun jɔ e wun. Annzɛ e su yoman sɔ naan y’a ɲan ninnge wie mun.—Zid 16.

²⁰ Satan i mɛn tɛ ng’ɔ sie i yɛ’n i blɛ kasiɛn nga nun’n, ɔ miɛn i ɲin kpa naan Zoova i mmla ng’ɔ siesieli naan e aeliɛ’n w’a yo kpa’n, ɔ́ núnnún be. Sanngɛ Satan su kwlá nunnunman Klistfuɛ kpa’m be nzuɛn kpa’n. Maan e kwlaa e mian e ɲin e nian e Ɲanmiɛn mɔ i klun ti kpa’n, ɔ nin i Wa’n be ajalɛ’n su. I liɛ’n, e ijɔlɛ’n nin e aeliɛ’n ɔ nin be nga be kunndɛman kɛ bé bú sran i sran’n, be liɛ’n ɔ su yoman kun. Kpɛkun, e Ɲanmiɛn Zoova m’ɔ bu sran i sran’n, ɔ́ ɲán kɔmin. Yɛ sran kpa’m bé bɛ́ i sulɛ kpafuɛ’n nun.

[Ja ngua lɛ ndɛ’n]

?Amun wla kwla kpɛn su?

• ?Sran i sran bulɛ’n nun’n, ajalɛ kpa benin yɛ Zoova nin i Wa’n be kle e ɔ?

• ?Ngue ti yɛ sran’m be like yolɛ klanman’n, ɔ man Klistfuɛ’m be kɔmin su ɔ?

• ?Wafa sɛ yɛ sɛ e bu sran i sran’n, ɔ yo maan e jasin fɛ’n ba nvlɛ ɔ?

• ?Ngue yɛ siɛ nin niɛn’m be yo naan be mma’m b’a bu sran i sran ɔn?

[Kuku, bue 30]

An fa srilɛ’n fa bo i bo

Sran sunman be o lɛ’n, kɛ be nin sran nga be simɛn i’n be bo yalɛ kokolɛ bo sa’n, ɔ ti kekle. Sanngɛ Zoova i Lalofuɛ’m be liɛ’n, Ɲanmiɛn nin be wiengu’m be klolɛ’n ti’n, be mian be ɲin naan b’a suan wafa nga be kwla kle be Biblu’n nun ndɛ nanwlɛ’n. ?Ngue yɛ ɔ kwla uka amun i sɔ’n i yolɛ’n nun ɔn?

Mmla cinnjin kun o Filipfuɛ Mun 2:4 nun. Ɔ se kɛ: “Nán amun nun sran fi bu i bɔbɔ i ninnge’m be ngunmin be akunndan, sanngɛ maan amun wiengu’m be liɛ’n lo amun wie.” An bu ndɛ sɔ’n i akunndan. Sɛ amun nin sran kun be nin a yiaman nun le’n, amun ti aofuɛ i ɲrun. ?Wafa sɛ yɛ amun kwla yo naan w’a wun i wun fɛ ɔ? Sɛ amun sri yɛ amun yo i like kɛ amun janvuɛ sa’n, ɔ kwla wun i wun fɛ. Sanngɛ nɛ́n i ngba ɔ.

Kɛ amún sé kɛ amun nin sran kun bé kókó yalɛ’n, atrɛkpa’n nn ɔ su bu akunndan kun. Yɛ amun a kpɛ akunndan sɔ’n i sin. Sɛ ndɛ ng’ɔ o amun klun’n yɛ amun waan amún kán klé i, naan amun buman like ng’ɔ o lɛ bu i akunndan’n i wie’n, atrɛkpa’n ɔ su tɛman amun su klanman. Ɔ maan, sɛ amun kwla si like nga sran sɔ’n su bu i akunndan’n i wlɛ’n, amun fa bo yalɛ kokolɛ’n i bo. Kɛ Zezi nin bla kun be yiali gbo kun su Samali lɔ’n, kɛ ɔ yoli sɔ ɔ. (Zan 4:7-26) Dɔ ngalɛ’n su’n, nzue salɛ i akunndan yɛ bla’n su bu ɔ. I sɔ’n su yɛ Zezi jrannin yɛ ɔ nin i be boli yalɛ kokolɛ’n i bo ɔ. Kpɛkun be yalɛ kokolɛ sɔ’n, ɔ wa kacili Ɲanmiɛn i ndɛ kanlɛ.

[Foto mun, bue 29]

Sɛ e nin sran mun e tran janvuɛ tranlɛ’n e kwla bo jasin fɛ’n e kle be.

[Foto, bue 31]

Aɲinyiɛ’n ti kpa blɛ’n kwlaa nun.